Regtegroep vaar uit teen Operasie Fiela

President Jacob Zuma het die regering se Operasie Fiela verdedig. Die operasie is daarop gemik om seker te maak dat immigrante die nodige dokumente het en wettig in die land is.

Die veldtog is deel van die regering se planne om misdaad te bekamp.

Stephen Faulkner van die People’s Coalition Against Xenophobia, het gesê die regering vergelyk buitelanders met “gemors” omdat “fiela” beteken om skoon te maak.

Die weermagoperasie impliseer dat diegene wat in hegtenis geneem word as “gemors” in stryd is met die regering se verbintenis om xenofobie uit te roei.

Die operasie word ook gekritiseer omdat dit gesien word as `n veldtog wat nie net onwettige immigrante aankeer nie, maar ook mense wat om asiel aansoek doen.

Zuma, wat vrae in die Nasionale Raad van Provinsies beantwoord het, het gesê dat dit veldtog slegs teen misdadigers is.

Beurtkrag vir die volgende drie jaar met SA

Beurtkrag gaan vir die volgende drie jaar ‘n werklikheid in Suid-Afrika wees, het die minister van Openbare Ondernemings gewaarsku.

Lynne Brown het vroeër gesê Suid-Afrikaners sal moet saamleef met voortdurende kragonderbrekings.

Volgens die minister sal instandhouding by Eenheid Een van Koeberg teen die einde van die maand voltooi wees.

Die kernaanleg in die Kaapse Skiereiland sal 900 megawatt tot die kragnetwerk kan voeg.

Brown sê vordering word by die Medupi-aanleg in Limpopo gemaak, en die eerste opwekkingseenheid, Eenheid Ses het onlangs meer as 700 megawatt gelewer, ‘n mylpaal.

Brown sê Medupi behoort teen die middel van vanjaar ten volle in bedryf te wees en sal krag gelykstaande aan meer as 40 persent van dié by Koeberg kan uitstoot.

Burundi se president keer terug

Die president van Burundi, Pierre Nkurunziza het na die hoofstad, Bujumbura teruggekeer, het RSG berig.

Nkurunziza was in Tanzanië toe ‘n weermaggeneraal aangekondig het dat hy hom in ‘n staatsgreep ontsetel het.

Die president het die weermag, polisie en die landsburgers gelukgewens omdat hulle die staatsgreep teengestaan het.

Soldate aan beide kante het vroeër op mekaar geskiet om beheer oor Bujumbura oor te neem.

Magte wat lojaal aan die president is, sê hulle het sedertdien die rebelle verdryf en het weer volle beheer oor die stad.

Die onrus in Bururndi word deur spanning tussen China, Rusland en die VSA gedryf.

NVG ingeroep na traangasaanval by skool

Die Hoërskool Pescodia in Kimberley in die Noord-Kaap is van voorneme om die onderwysdepartement se voorgeskrewe dissiplinêre prosedure te volg om op te tree teen twee leerlinge wat Woensdag ‘n onderwyseres met traangas in ‘n klaskamer aangeval het.

Amanda Loots het haar bewussyn verloor na die aanval.

Adjunkhoof, Hendrik Phillies, sê hoewel die skool sy eie dissiplinêre beleid het vir leerlinge wat die skoolreëls oortree sal die skool die department se prosedure volg omdat dit betrekking het op meer ernstige oortredings.

Phillies sê die skool het reeds begin met ‘n interne ondersoek en wou nie uitwy oor die voorval nie. Volgens hom is die twee leerlinge nie by die skool nie. Hulle gaan saam met hul ouers die skool besoek om sake te bespreek.

Phillies wou nie die twee hoërskoolleerlinge se ouderdom bekendmaak nie. Niemand is in die voorval beseer nie. Volgens hom is die betrokke klaskamer dadelik na die voorval ontruim.

Die polisie ondersoek ‘n klag van aanranding. Die minderjariges is onder hul ouers se toesig geplaas. Die nasionale vervolgingsgesag sal besluit of die leerlinge vervolg sal word.

Gauteng-onderwysdepartement gaan 124 Afrikaanse skole verengels

Die Gautengse departement van onderwys het vandag ‘n verklaring uitgereik waarin hy dit onomwonde stel dat enkelmedium-Afrikaanse onderwys summier beëindig word. In die plek daarvan sal skole voortaan parallelmedium Afrikaans en Engels wees met die verwagting dat daar stelselmatig na Engels oorgeskakel sal word. Volgens beskikbare navorsing neem dit ongeveer vyf jaar vir ‘n Afrikaanse skool om volledig na Engels oor te skakel.

Vir die anderhalf miljoen Afrikaners in Gauteng is dit ‘n nagmerrie wat bewaarheid word. Meer as ‘n eeu van Afrikaanse onderwys wat moeisaam oor geslagte heen tot stand gekom het, word hiermee revolusionêr beëindig. Beroemde Afrikaanse hoërskole soos Afrikaans Hoër, Waterkloof, Randburg en Linden, om net van hoërskole te praat, gaan daarmee sneuwel.

Die verklaring deur Panyaza Lesufi stel die totale Afrikanergemeenskap in kille terme voor die besluit wat eensydig en sonder raadpleging deur die ANC-beheerde onderwysdepartement geneem is. Daar word ook gesuggereer dat Afrikaners “demografies gaan wegkwyn” en dat hul skole dus sonder meer oorgeneem kan word. Die tersaaklike gedeelte van die verklaring lui soos volg:

“Weens die toenemende vraag na ruimte in ons skole en die toevloei van leerlinge vanuit ander provinsies na Gauteng, het die departement die besluit geneem om beskikbare ruimte te gebruik om dié leerlinge toe te laat. Daarom noop dit ons om die maksimumgebruik van alle beskikbaar ruimte in te stel, wat deur ons grondwetlike verpligting genoodsaak word om alle leerlinge wat toelating nodig het in ons skole te plaas. In die lig hiervan, het die departement ‘n strategie ontwikkel om 124 enkelmediumskole na parallelmediumskole om te skakel as ‘n manier om die oorbevolking in die meeste van ons skole te hanteer.

Dié redenasie word deur die volgende ondersteun:

  • Die bestaan van hoëgehalte-infrastruktuur wat tans onderbenut word in gemeenskappe waarvan die demografiese profiel oor die jare verander het;
  • Skole behoort die behoeftes van die gemeenskappe waarin hulle bestaan, te dien en die veranderende demografie van daardie gemeenskappe te weerspieël;
  • Die GOD (Gautengse Onderwysdepartement) het ‘n morele verpligting en gesag om toegang tot onderrig te verskaf waar ruimte bestaan soos wat deur die Suid-Afrikaanse skolewet nr. 84 van 1996 vereis word.

Die hele proses sal binne die wetlike vereistes geskied. Die departement sal binnekort ‘n raadplegingsproses met die skole wat hierdeur geraak word, begin. Die raadplegingsproses sal al die skoolhoofde, vakbonde en skoolbeheerliggame betrek wat hierdeur geraak word en sal hulle deur die proses voer, waaronder die beoogde winste en om potensiële vrese en uitdagings te hanteer.”

Dit is bekend dat mev. Barbara Creecy, die vorige LUR vir onderwys in Gauteng, van plan was om ‘n grootskaalse offensief teen Afrikaanse skole te begin. Dit wil voorkom asof sy egter gewag het totdat ‘n swartman by haar oorneem ten einde die rassekaart teen blanke Afrikaanse skole te kan speel.

Benewens die verengelsings van skole, gaan model C-skole ook gedwing word om gesamentlike beheerliggame met lokasieskole in te stel, sodat daardie skole die hulpbronne van veral die Afrikaanse skole kan oorneem.

Dr. Dan Roodt van PRAAG sê: “Dit lyk na ‘n soort proletariese nasionalisering van onderwys. ‘n Mens herken hierdie metodes uit die geskiedenis van voormalige kommunistiese lande. Nie net word Afrikaanse skole summier verengels nie, maar hulle gaan ook na die vlak van die meeste swart skole toe afgetrek word. Tot dusver was voortreflike onderwys nog al wat die blanke minderheid in staat gestel het om rassistiese regstellingswette te trotseer. Maar ook dít word nou kennelik van ons en van ons kinders af weggeneem.”

Lees ook: Verengelsing: Name van geteikende Afrikaanse skole bekend

en teken die petisie: Los ons Afrikaanse skole uit!

Oproeriges brand skole, beskadig 50 voertuie

Spanning in Alberton het daartoe gelei dat die Ekurhuleni Metropolisie op ‘n hoë gereedheidsgrondslag geplaas is.

‘n Metropolisiewoordvoerder, Wilfred Kgasago, sê dit is nog nie duidelik waaroor die oproer handel nie, maar hy sê staatsgeboue word geteiken.

Gewelddadige oproer in die Albertongebied het Dinsdag tot brandstigting gelei. Amptenare sê oproeriges het in die nag die strate ingevaar en skole aan die brand gesteek.

Talle oproermakers is intussen weens openbare geweld in hegtenis geneem.

Vier skole en ‘n gemeenskapsaal is in brande beskadig en strate is versper. ‘n Raadslid se huis is tot op die grond afgebrand.

Polisie is ook ontplooi buite Sasolburg weens klipgooiery.

Tussen Sasolburg en Koppies is meer as vyftig voertuie op die R82-pad deur klipgooiers beskadig. Die toestand is steeds gespanne.

Nog motors is op die pad tussen Sasolburg en Heilbron geteiken in die onrus oor kragvoorsiening.

Oproermakers van die Amelialokasie by Sasolburg het paaie met klippe en brandende buitebande versper om te eis dat elektrisiteit aan hulle voorsien word.

Hulle eis ook dat die Metsimaholo-munisipaliteit woonerwe aan plakkers beskikbaar stel.

Hoërskool leer tieners oor ouerskap

Riverside College in Kaapstad stel nie soveel daarin belang om leerlinge aan Wiskunde of Wetenskap bloot te stel nie. Die skool meen leerlinge moet meer te wete kom oor ouerskap op ‘n jong ouderdom.

Die skool het tegnologie vir tien dae lank ingespan waartydens die leerlinge geleer is oor die verantwoordelikhede van ouerskap.

Die hoërskool het hul leerlinge gevra om ‘n “baba” rond te dra vir dié tydperk.

Nie net is van die leerlinge verwag om die “baba” rond te dra van 2.5kg waar hulle gaan nie, maar hulle het digitale aanmanings per selfoon ontvang oor hul opvoedingstaak.

Elke leerling het verskeie kere per dag ‘n boodskap ontvang wat hom of haar herinner dat die “ouer” die “baba” moet voed, winde moet uitvryf, doeke moet ruil, moet bad en kwaliteit aandag aan hul “kinders” moet gee.

Suid-Afrika worstel reeds met ‘n buitensporige aantal tienerswangerskappe wat deur staatstoelae aangemoedig word.

Noordwes skuld kontrakteurs miljoene

Noordwes se departement van openbare werke en paaie skuld padkonstruksiekontrakteurs meer as R280 miljoen.

Hierdie inligting het aan die lig gekom tydens ‘n vergadering van die staande komitee oor openbare rekeninge in die provinsiale wetgewer.

Die voorsitter van die komitee, Mahlakeng Mahlakeng, het gesê die komitee het met Noordwes se premier Supra Mahumapelo byeengekom om die finansiële situasie van drie provinsiale departemente wat tans deur die provinsiale tesourie help bestuur word, te bespreek.
 
Mahumapelo het verlede maand aangekondig dat die departemente van openbare werke en paaie, onderwys en gesondheid onder administrasie geplaas word.
 
Mahlakeng sê die uitstaande betalings aan kontrakteurs laat kommer oor moontlike vrugtelose en verkwistende uitgawes.

Drie verdagtes vas na moorde op paartjie

Die polisie het drie verdagtes vasgetrek ivm die moorde op twee jongmense in die Oos-Kaap. Die twee is vermoedelik ontvoer, vermoor en toe in die dam gegooi, het eNCA berig.

Drie swart vermeende aanvallers sal vandag in die landdroshof op Mthatha in verband met die moord op ‘n jong paartjie die naweek.

Die liggame van die 19-jarige Jacqueline Miller en die 20-jarige Carl George is Sondagmiddag by die Mthatha-dam gevind, nadat hulle Saterdag laas gesien is.

Die verdagtes, een van 19 en ‘n ander van 22, is in die KwaLink-woongebied in hegtenis geneem. Hulle het van die slagoffers se besittings in hul besit gehad.

Blade wil korrupsie in NFSAS pak

Die Departement van Hoër Onderwys en Opleiding gaan met ‘n forensiese ondersoek begin na die Nasionale Studente Finansiële Hulpskema om korrupsie uit te roei, het RSG berig.

Die Minister, Blade Nzimande, het die inligting op ‘n nuuskonferensie voor sy Begrotingspos in die Parlement bekendgemaak.

Nzimande sê hy is van mening dat daar korrupsie in die verspreiding van die finansiële hulpskema vir behoeftige studente by tersiëre instellings is.

Hy sê ‘n voorlopige verslag sal na verwagting teen die einde van Oktober gereed wees.