Die dorp Reddersburg het hom van ANC-politici bevry en inwoners verskaf nou self hul eie dienste aan blank en swart, soos wat mnr. Jaap Kelder in dié video verduidelik. Dit volg nadat die Kopanong-munisipaliteit weens wanbestuur onder administrasie geplaas is. Inwoners onthou wettiglik betalings aan die munisipaliteit en bedryf hul eie alternatief.
Tag: dienste
-
Oproeriges by Krugersdorp steek huis aan die brand
Die polisie ondersoek ‘n saak van brandstigting nadat oproeriges van die Princess-plakkerskamp in Roodepoort, Dinsdagaand ‘n huis aan die brand gesteek het.
Tydens oproer en onluste, wat RSG beskryf as ‘n “diensleweringsbetoging”, is verbygaande voertuie en motoriste ook met klippe bestook.
Motoriste word aangeraai om Ontdekkersweg of die N12 te gebruik. Tot dusver is geen beserings nog aangemeld nie.
Die Johannesburgse Metropolisie sê Albertina Sisuluweg langs die plakkersgebied in die rigting van Krugersdorp, bly gesluit.
Die polisie wil duidelik nie kanse waag nie want drie maande gelede het plakkers van Princess aan die Wes-Rand ‘n vragmotor gekaap en aan die brand gesteek ná ‘n gewelddadige protes deur inwoners. Die vragmotor vol groente en vrugte op die Hoofrifpad is eers geplunder en daarna aan die brand gesteek.
Die polisie het gereageer met rubberkoeëls en skokgranate om die skare te verjaag en van die gesteelde goedere terug te vind.
Die inwoners sê hulle wil hê die regering moet hul belofte van behuising, water en elektrisiteit nakom.
Terwyl kalmte op Hoofrifweg herstel is, was dit lank gesluit aangesien beamptes moes werk om te verwyder wat oorgebly het van die brandende vragmotor, bande en sementblokke.
Gemeenskapsleier David Mathibe sê die protes sal nie ophou nie, want die regering het voortgegaan om leë beloftes te maak.
“Die regering luister nie na ons nie, wat beteken dat hulle nie omgee vir ons mense nie.”
“Ek is al so lank hier, ek behoort nou in ‘n pragtige huis te bly. Hulle neem ons nie ernstig op nie. Laat hulle dus doen soos hulle wil, en ons sal dieselfde doen,” het ‘n inwoner gesê.
Die polisie sê hulle sal in die omgewing bly om seker te maak dat protes nie weer opduik nie.
In Maart het betogers ‘n gedeelte van Elsburgweg en ander strate wat na die Ramaphosa-plakkers en Reigerpark gelei het, met brandende bande, gemors, boomtakke en vullis afgesper.
“Ons het besluit om ons griewe na die strate te neem, want daar is nog steeds geen ontwikkeling in ons omgewing nie, alhoewel ons baie keer gestem het,” het een van die inwoners gesê.
Ramaphosa word nie ontwikkel nie, terwyl ontwikkelings in ander gebiede langs hul area in die bruin gebied plaasvind, sê hulle.
“Skole, ‘n biblioteek, gemeenskapsale, sportgeriewe, teerpaaie en ander dienste is aan die orde van die dag in Reigerpark, maar nie Ramaphosa nie.
“Ons het nie eens sportgeriewe om jongmense van die strate te hou wat verslaaf is aan dwelms nie.”
-
Eskom skakel ses munisipaliteite se ligte af
Ses munisipaliteite in Noordwes en die Noord-Kaap staar van môre af daaglikse kragonderbrekings in die gesig indien hulle nie betalingsooreenkomste met Eskom aangaan nie.
Die munisipaliteite skuld Eskom miljarde rande.
In Noordwes sal daar van môre af kragonderbrekings in die Lekwa-Teemane-, Maquassi Hills-, Madibeng-, en Kgetlengrivier-munisipaliteite wees. In die Noord-Kaap sal daar geen krag in die Ubuntu- en Renosterberg-munisipaliteite wees nie.
Die kragtoevoer sal onderbreek word van Maandae tot Vrydae, soggens tussen ses en agt, en smiddae tussen 5-uur en half-agt. Saterdae en Sondae sal die krag af wees tussen half-nege en 11-uur die oggend en 15:00 en half-ses die middae.
Die kragtoever is reeds van gister af tussen daardie tye na die Ventersdorp- en Naledi-munisipaliteite onderbreek. Die Mamusa-munisipaliteit, wat ook kragonderbrekings in die gesig gestaar het, het egter ‘n ooreenkoms met Eskom aangegaan.
Bron: OFM Nuus
-
Oproeriges in Riverlea Johannesburg gooi klip
Toegangsroetes na Riverlea in Johannesburg is gesluit na oproer wat glo oor elektrisiteitvoorsiening en behuising voorkom.
Mainreef- en Commandoweg in Riverlea is na openbare geweld gesluit en ‘n uitgebreide polisieteenwoordigheid is in die ontplooi.
Oproeriges bestook motoriste met klippe en brand motorbande.
Die inwoners van die Zamimpilo-plakkerskamp is ontevrede oor ‘n gebrek aan huise.
Hulle sê die Johannesburgse metroraad het belowe om hulle te skuif na ‘n behuisingsprojek, maar dit het nie gebeur nie.
Inwoners is ook ontsteld oor ‘n gebrek aan elektrisiteit.
-
Waterpype lek en geld vloei
Waterlekkasies in pype, nog voor dit gemeenskappe se krane bereik, sal as prioriteit vir die regering beskou word.
Mlimandlela Ndamase, woordvoerder van die minister van Water en Sanitasie, Novula Mokonyane, sê ‘n interne ministeriële komitee vir droogte beskou dit as ‘n kritieke aangeleentheid waarna munisipaliteite moet omsien.
Hy sê die regering het die verantwoordelikheid op hom geneem om dié probleem op te los in ‘n poging om water te bespaar.
Die regering het ook onderneem om fondse beskikbaar te stel om swart loodgieters op te lei om werksgeleenthede te skep.
Gemeenskappe se samewerking is egter van groot belang. Ndamase sê mense moet waterlekkasies aanmeld.
Hy sê mense moet nie aanneem dat iemand anders ‘n lekkasie sal aanmeld nie. Hulle moet dit self doen en voortdurend opvolg hoe lank dit ‘n munisipaliteit geneem het om herstelwerk te doen.
Hy vra mense om munisipaliteite aan te gee wat versuim of tydsaam is om die lekkasies, wat ‘n vermorsing van water veroorsaak, te herstel.
Hy beklemtoon die noodsaaklikheid van samewerking onder alle belanghebbendes en gee sy versekering dat die regering toegewyd is tot waterbesparing in die land.
Inisiatiewe is reeds van stapel gestuur om water aan droogtegeteisterde gebiede te versprei.
Organisasies wil steun werf om veral swart gemeenskappe wat hulp nodig het, by te staan.
Drie miljoen liter water is reeds versprei in die Vrystaat, Noordwes en die Oos-Kaap.
Twintig tenkwaens sal water na die Tswaing plaaslike munisipaliteit aanry. Die munisipaliteit is die afgelope tyd swaar getref deur watertekorte en die droogte.
Die Departement van Water en Sanitasie het R350 miljoen bewillig vir die Ngaka Modiri Molemadistrik in Noordwes om sanitasie en droogteverwante probleme te probeer verlig.
Die gebied word geteister deur watertekorte en swak bestuur wat afvalwater-behandeling in die wiele ry.
Die uitvoerende hoof van Sedibeng Water het onderneem om te verseker dat die water-infrastruktuur in die gebied verbeter word.
Rembuluwani Takalani sê hulle het ‘n sakeplan van R2 miljard ontwikkel wat al die droogtegebiede sal insluit.
-
Polisie skiet een dood in oproer by Waterval Boven
Die polisie het bevestig dat ‘n 21-jarige man gister oppad hospitaal toe dood is nadat die polisie skote afgevuur het om ‘n groep gewelddadige betogers uiteen te jaag.
Oproeriges het strate versper in Waterval Boven en Umgwenya in Mpumalanga nadat hulle vroeër ‘n munisipale gebou aan die brand gesteek het.
Toegangsroetes na Umgwenya word steeds met klippe en brandende bande versper, en die situasie bly gespanne. In Waterval Boven is dit kalmer.
Brandbestryders van die Ngangala-munisipaliteit het vroeër die brand by die munisipale gebou geblus.
Die gebou huisves ook ‘n kliniek.
Inwoners betoog glo oor ‘n tekort aan skoon drinkwater en vullisverwydering.
-
Motoriste aangeraai om Stinkwater te vermy
Motoriste is aangeraai om Stinkwater noord van Pretoria, te vermy nadat oproeriges paaie versper het.
Die oproermakers het die Molefe Makintapad met klippe en ander rommel besaai.
Die ontevredenes het gesê hulle het verskeie kere reeds oor watertekorte en swak sanitasie in die gebied gekla, maar die stad Tshwane het die afgelope vyf jaar nie na hulle geluister en dienste verskaf nie.
Motoriste word aangeraai om alternatiewe roetes te gebruik.
‘n Gemeenskapsleier, Josua Selemane, sê hulle sal die paaie vir ‘n onbepaalde tyd versper todat daar aandag gegee word aan hulle griewe.
-
Nege vas na geweld by Zeerust
Nege oproeriges is in Zeerust in Noordwes weens openbare geweld in hegtenis geneem.
Eiendom by die Ramotshere Moiloa-munisipaliteit is tydens die geweldpleging beskadig.
Die polisie sê die werkers is byeengeroep vir ‘n vergadering deur die voormalige burgemeester, Afrika Thale. Thale is deur ‘n senior bestuurder van die munisipaliteit vergesel.
Ten spyte van die ontmoeting het die openbare geweld egter voortgeduur en vullisblikke is in die strate omgekeer.
Intussen sê die provinsiale regering van Noordwes dat Simon Senna die burgemeester is en nie Thale nie.
Die verdagtes sal binnekort in die plaaslike landdroshof verskyn.
-
Gewelddadige lokasieprotes deur wit ANC-lede ondersteun
Die polisie oorweeg tans of die Masiphumelele-lokasie te gevaarlik vir hulle is om ‘n satelliet-polisiekantoor daar te vestig.
Adjunk-minister van polisie Maggie Sotyu het Masiphumelele se inwoners in September belowe dat ‘n mobiele polisiestasie opgerig sal word totdat grond vir permanente perseel gevind kan word.
Gewelddadige protes, waartydens “inwoners” herhaaldelik beter polisiëring en ander dienste eis, duur reeds maande.
Verlede week het die Wes-Kaapse polisie se kommunikasiehoof, brigadier Novela Potelwa gesê die polisie oorweeg veiligheid in die gebied om te bepaal of ‘n mobiele polisiestasie daar opgerig kan word.
Potelwa se kommentaar het gelei tot ‘n petisie vir ‘n permanente polisiekantoor wat egter onderteken is deur net 67 inwoners, onder meer deur die voormalige minister van verdediging, Ronnie Kasrils en ANC-aktivis Ben Turok.
Nie een van die twee ondertekenaars woon in die lokasie nie.
Die petisie is Sondag oorhandig aan LUR vir gemeenskapsveiligheid Dan Plato.
-
Onderhoud wat sloer veroorsaak waterprobleme in Kestell
Die Maluti a Phofung-munisipaliteit in die Oos-Vrystaat, soos talle ander munisipaliteite, gaan gebuk onder droogte, maar onderhoud wat sloer, veroorsaak groot ongerief vir gebruikers.
Die waterprobleme in die gebied duur al maande lank.
Die gebied, wat die dorpe Kestell, Qwaqwa en Harrismith insluit, het nog nie naastenby genoeg reën gehad nie.
Die Fika Patso-dam, wat uitsluitlik op reënwater staatmaak, is tans 25% vol – byna die helfte van die dam se vlak in die ooreenstemmende tyd verlede jaar.
Dié dam buite Qwaqwa, voorsien tans water aan die dorp.
Instandhouding aan ‘n waterpyp wat Kestell van water voorsien, word tans gedoen, met die gevolg dat dié dorp reeds tien dae sonder water is.
Sterkfontein se wateraanleg sal gekoppel word aan waterpypleidings na Kestell. Konstruksie sal glo teen volgende maand voltooi wees.
‘n Woordvoerder van Maluti-a-Phofung Water, Jabu Malungane egter gesê die watertekorte in Kestell is te wyte aan onderhoud. Hy sê hulle verskaf aan inwoners water met tenkers.
In ‘n onsamehangende onderhoud met OFM, het Malungane ook gesê “pype lek” en dit moet reggemaak word.
-
E-tol-dreigemente is afpersing sê regskenners
Die Suid-Afrikaanse munisipale werkersvakbond- SAMWU- het ook die gewysigde Gautengse e-tol plan verwerp en gesê die stelsel kom steeds neer op die privatisering van die land se paaie.
Die vakbond sê die dreigement om voertuiglisensies te weier as tolgeld agterstallig is, sal daartoe lei dat ‘n groot aantal voertuie sonder lisensies bestuur word.
Die Suid-Afrikaanse munisipale werkersvakbond, se woordvoerder, Papikie Mohale sê hoewel daar ‘n drastiese afname in tariewe voorgestel word, doen hulle steeds ‘n beroep op Suid-Afrikaners om nie tolgeld te betaal nie.
Adjunk-President Cyril Ramaphosa het in Kaapstad aangekondig dat motoriste in Gauteng in die toekoms eers hul uitstaande e-tolgelde sal moet betaal voordat hulle hul motorlisensies kan hernieu.
Die bondgenootskap teen Stedelike Tol, OUTA, het hom by opposisiepartye aangesluit en sê die gewysigde Gautengse e-tolstelsel hou geen verandering in nie.
Die terughou van motorlisensies weens agterstallige e-tolskuld, soos dié week aangekondig, is onwettig en ongrondwetlik en kom neer op administratiewe afpersing.
Regskenners sê dit kom op ‘n leë dreigement neer want as motoriste ‘n rekening vir ‘n bepaalde diens kry, kan hulle nie gepenaliseer word omdat ‘n ander diens nog nie betaal is nie.
Hulle meen dit is kontraktueel onsinnig. Sekere opposisiepartye sal moontlik gratis die stryd opneem vir die publiek, aangesien hulle daarmee gemoeid is.
Intussen het ‘n organisasie Justice Project SA besluit om munt te slaan uit die Gautengse e-tolstelsel wat hulle sal teenstaan tot in die hof.
Die voorsitter van JPSA, Howard Dembovsky sê hulle kommentaar aan die Departement van Vervoer sal ‘n waarskuwing insluit dat die besluit strydig is met die Grondwet.
Dembovsky sê indien hulle nie in hul oproep aan die Departement slaag nie, kan die kwessie in die hof beland. Die publiek sal vir die regsgeding moet betaal dmv skenkings aan Dembovsky.
Wayne Duvenhage van Outa het glo miljoene ingesamel voorheen.
-
Oproeriges brand skole, beskadig 50 voertuie
Spanning in Alberton het daartoe gelei dat die Ekurhuleni Metropolisie op ‘n hoë gereedheidsgrondslag geplaas is.
‘n Metropolisiewoordvoerder, Wilfred Kgasago, sê dit is nog nie duidelik waaroor die oproer handel nie, maar hy sê staatsgeboue word geteiken.
Gewelddadige oproer in die Albertongebied het Dinsdag tot brandstigting gelei. Amptenare sê oproeriges het in die nag die strate ingevaar en skole aan die brand gesteek.
Talle oproermakers is intussen weens openbare geweld in hegtenis geneem.
Vier skole en ‘n gemeenskapsaal is in brande beskadig en strate is versper. ‘n Raadslid se huis is tot op die grond afgebrand.
Polisie is ook ontplooi buite Sasolburg weens klipgooiery.
Tussen Sasolburg en Koppies is meer as vyftig voertuie op die R82-pad deur klipgooiers beskadig. Die toestand is steeds gespanne.
Nog motors is op die pad tussen Sasolburg en Heilbron geteiken in die onrus oor kragvoorsiening.
Oproermakers van die Amelialokasie by Sasolburg het paaie met klippe en brandende buitebande versper om te eis dat elektrisiteit aan hulle voorsien word.
Hulle eis ook dat die Metsimaholo-munisipaliteit woonerwe aan plakkers beskikbaar stel.