Die dorp Reddersburg het hom van ANC-politici bevry en inwoners verskaf nou self hul eie dienste aan blank en swart, soos wat mnr. Jaap Kelder in dié video verduidelik. Dit volg nadat die Kopanong-munisipaliteit weens wanbestuur onder administrasie geplaas is. Inwoners onthou wettiglik betalings aan die munisipaliteit en bedryf hul eie alternatief.
Tag: elektrisiteit
-
Eskom skakel ses munisipaliteite se ligte af
Ses munisipaliteite in Noordwes en die Noord-Kaap staar van môre af daaglikse kragonderbrekings in die gesig indien hulle nie betalingsooreenkomste met Eskom aangaan nie.
Die munisipaliteite skuld Eskom miljarde rande.
In Noordwes sal daar van môre af kragonderbrekings in die Lekwa-Teemane-, Maquassi Hills-, Madibeng-, en Kgetlengrivier-munisipaliteite wees. In die Noord-Kaap sal daar geen krag in die Ubuntu- en Renosterberg-munisipaliteite wees nie.
Die kragtoevoer sal onderbreek word van Maandae tot Vrydae, soggens tussen ses en agt, en smiddae tussen 5-uur en half-agt. Saterdae en Sondae sal die krag af wees tussen half-nege en 11-uur die oggend en 15:00 en half-ses die middae.
Die kragtoever is reeds van gister af tussen daardie tye na die Ventersdorp- en Naledi-munisipaliteite onderbreek. Die Mamusa-munisipaliteit, wat ook kragonderbrekings in die gesig gestaar het, het egter ‘n ooreenkoms met Eskom aangegaan.
Bron: OFM Nuus
-
Tanzanië dank krag-hoof af na verhogings
Tanzanië se pres. John Magufuli het die hoof van die staat se elektrisiteitsmaatskappy Sondag afgedank nadat die maatskappy tariewe verhoog het, ‘n stap wat die president sê sy planne in die wiele sal ry om die Oos-Afrikaland te industrialiseer.
Waarskynlik sal dit ook sy politieke loopbaan help.
Tanzanië se elektrisiteitsreguleerder het Donderdag planne goedgekeur om elektrisiteitstariewe van Tanzanië se elektrisiteitsvoorsieningsmaatskappy (Tanesco) met 8,53 persent te verhoog, minder as die helfte van wat die nutsmaatskappy sê nodig is om verliese te verminder.
Pres. Magufuli se kantoor het die afdanking van Tanesco se besturende direkteur, Felchesmi Mramba, in ‘n verklaring aangekondig, het Reuters berig.
Ure voor die aankondiging van die afdanking het die president die prysverhogings gekanseleer.
“Dit is onaanvaarbaar terwyl ons planne maak om ‘n vervaardigingsbedryf te bou en te verseker dat meer burgers toegang tot elektrisiteit het,” het Magufuli in ‘n verklaring gesê.
Ongeveer 40 persent van Tanzanië se bevolking van ongeveer 50 miljoen mense het toegang tot elektrisiteit en die regering hoop om dit tot 75 persent teen 2025 te vermeerder.
Sedert hy ‘n jaar gelede aan bewind gekom het, het Magufuli dosyne staatsamptenare afgedank as deel van ‘n teenkorrupsieveldtog en om nuwe stukrag vir doeltreffende regering mee te bring.
Hy het ‘n dosent aan die staatsuniversiteit van Dar es Salaam, Tito Esau Mwinuka, as waarnemende besturende direkteur van Tanesco aangestel.
Die elektrisiteitsmaatskappy wou aanvanklik ‘n tariefverhoging van 18,19 persent instel om ‘n verliesmakende tendens uit te wis en skuld aan onafhanklike kragprodusente en brandstofvoorsieners te betaal.
Die tariefverhoging sou op 1 Januarie in werking getree het.
-
Wanbetaling en kabeldiefstal laat SA sonder krag
Duisende Vrystaters kan oor die feestyd sonder krag wees, omdat munisipaliteite nie hul Eskom-rekeninge betaal nie, het RSG berig.
Die agt plattelandse munisipaliteite wat by Eskom in die skuld is, sluit in Nketoana by Reitz, Nala by Bothaville en Mantsopa by Ladybrand.
Die gesamentlik skuld beloop meer as 700 miljoen rand.
Die Masilonyana Plaaslike Munisipaliteit op Theunissen is een van die munisipaliteite wie se krag afgesny kan word.
Die Uitvoerende burgemeester, Nontsizi Mochana, sê hulle sal inwoners en sakeondernemings aanmoedig om hul rekeninge te betaal.
City Power in Johannesburg sê meer as 45 persent van kragonderbrekings in gebiede wat deur dié kragvoorsiener beheer word, is te wyte aan kabeldiefstal.
Verskeie gebiede in Johannesburg het onlangs kragonderbrekings ondervind.
‘n Vermeende reekskabeldief is verlede Sondag in Cresswell Park in hegtenis geneem. ‘n Woordvoerder van City Power, Yumna Sheik, sê die verdagte word ook verbind met ‘n ander kabeldiefstalvoorval in Roodepoort.
City Power hou tans bewusmakingsveldtogte in gemeenskappe wat deur kabeldiefstal geraak word en moedig inwoners aan om op die uitkyk te wees vir verdagte bedrywighede.
Inwoners word gevra om verdagte voorvalle by die City Power-inbelsentrum aan te meld.
-
Eskom sal kernuitbreiding bestuur
Die Minister van finansies, Pravin Gordhan het Woensdag bevestig in sy mediumtermyn-begrotingsraamwerk dat Eskom die betwiste kernverkrygingsprogram van die land sal bestuur.
“Binne die raamwerk van die Geïntegreerde Hulpbronplan, is dit bevestig dat Eskom die voortou in die kernkraginisiatief sal neem,” het Gordhan gesê in die Parlement.
Hy het bygevoeg dat die nasionale tesourie die verkrygingsproses sal monitor om te verseker dat dit deursigtig is en die belange Suid-Afrika dien.
“Die Tesourie sal saam met die departement van [Openbare Ondernemings] Minister Lynne Browne werk om te verseker dat die skaal en infasering van die program in die beste belang van Suid-Afrika is en dat die reëlings van verkryging deursigtig is en in ooreenstemming met die wet.”
Eskom se uitvoerende hoof, Brian Molefe, is ‘n voorstander van kernkrag en het in die afgelope weke gewaarsku dat Suid-Afrika nog ‘n verlammende tekort aan elektrisiteit sal ervaar binne ‘n dekade, tensy die program binnekort afskop.
Hy het hernubare energie as ‘n geskikte alternatief verwerp en gesê dit kan nie aan basisaanvraagvereistes voldoen nie.
Maar die nasionale tesourie het Molefe weerspreek in die mediumtermynbegrotingsrede.
“Geïntegreerde hulpbronplanbeplanning moet rekening hou met die dalende koste van volhoubare energie en die moontlike gebruik vir die opwekking van basisaanvraagelektrisiteit,” luidens die dokument wat Gordhan ter tafel gelê het
Nasionale Tesourie het opgemerk dat gevallestudies wat in Australië, Denemarke, Portugal en Brittanje gedoen is, bevind het dat dit haalbaar is om in die vraag na energie te voorsien deur hernubare bronne. Plaaslike studies het tot dieselfde gevolgtrekking gekom, het hy bygevoeg.
“Hoewel wind en sonkrag-tegnologie in die algemeen krag voorsien in die tussenposes, kan dit oorkom word deur die koppeling van geografies verspreide aanlegte aan die netwerk. Buigsame tegnologie soos gasturbines kan gebruik word om die gapings te vul.”
-
SA glo toegerus vir nuwe kernsentrales sê Eskom
Suid-Afrika is goed toegerus om kernkragsentrales te hê en het ‘n kernveiligheidskultuur met Koeberg wat veilig bedryf is vir meer as 32 jaar, het Eskom gister gesê.
Die prestasie van die Koeberg-kragstasie was ook konsekwent een van die sterkstes in Eskom se vloot van kragstasies, het die semistaatsinstelling in ‘n verklaring gesê wat duidelik daarop gemik is om verbruikers oor te haal tot kernkrag.
“Dit is ook die goedkoopste energieverskaffer in Suid-Afrika. Kern verg ‘n hoë aanvanklike kapitaalbesteding vir konstruksie, maar, operasioneel, bied kern een van die goedkoopste bronne van elektrisiteit, wat dit meer gunstig maak as enige fossiel kragopwekking.
“Verder, het Eskom beduidende lesse geleer uit sy huidige nuwe bouprogram om dit op die kernprogram toe te pas en om die risiko van skedulevertragings en kostes te verminder. Dit sal ook die huidige verhoudings stukrag gee om maksimum lewering van die sosio-ekonomiese impak van die kernbouprogram te verseker.”
Eskom het gesê sowat twee derdes van die wêreld se bevolking woon in lande waar kernkragsentrales ‘n integrale deel van die opwekking van elektrisiteit en industriële infrastruktuur is.
Regoor die wêreld, gebruik wetenskaplikes in meer as 50 lande byna 300 navorsingsreaktore om kerntegnologie te ondersoek of om radio-isotope te vervaardig vir mediese diagnose, kankerterapie, plaagbeheer, huishoudelike gebruik, en x-strale te produseer vir die behoud van vars produkte.
Kernenergie verskaf tans sowat 11 persent van die wêreld se elektrisiteit en deur Koeberg-kernkragsentrale naby Kaapstad word die grootste deel van die Wes-Kaap aangedryf daardeur en sedert 1984 verskaf dit oor die 4,4 persent van die totale elektrisiteitsbehoeftes van Suid-Afrika.
“Die meeste kragstasies gebruik dieselfde beginsels om elektrisiteit op te wek, met die enigste verskil as die bron van energie wat gebruik word om die skag van die kragopwekker te roteer.
“Kernenergie is afkomstig van die proses van die splitsing van die kern van ‘n atoom uraan-235 vir die vrystelling van energie in die vorm van hitte en bestraling. Hierdie proses staan bekend as kernsplyting.
“Die brandstof wat gebruik word in ‘n kernkragsentrale is uraan. Suiwer uraan is ‘n silwerige, blink, harde, swaar metal. Suid-Afrika beskik ook oor groot uraanreserwes en het ‘n uitgebreide uraanmynbedryf, wat die land een van die belangrikste produsente van uraan in die wêreld maak. Uraanproduksie in Suid-Afrika is ‘n byproduk van goud- en kopermynbou,” het Eskom gesê.
Voordele van die gebruik van kern as ‘n bron van energie is dat kernkragelektrisiteit nie lei tot koolstofdioksiedemissies en ander kweekhuisgasse wat die omgewing kan beskadig nie. Daarbenewens het die proses klein volumes afval geproduseer.
As gevolg van die baie lae inhoud van splytbare materiaal in die brandstof, is ‘n kernontploffing by ‘n kernsentrale onmoontlik, sê Eskom.
-
SA verskaf steeds krag op skuld aan bankrot Zimbabwe
Terwyl Eskom sukkel om Suid-Afrika se ligte aan te hou, verskaf die openbare maatskappy steeds elektrisiteit op skuld aan Zimbabwe. Tans skuld ons noordelike buurland met sy ekstremistiese antiblanke regering Eskom R250 miljoen, sonder enige teken dat dit betaal gaan word.
In die jongste welwillende gebaar jeens Zimbabwe, het Eskom die land nog tyd – tot einde Desember 2016 – verleen om te begin betalings maak. Zimbabwe ontvang ten minste 30% van sy krag vanuit die buiteland, met Mosambiek se Hydro Cahora Bassa-maatskappy (HCB) wat ook aan die land elektrisiteit voorsien. Blykbaar skuld Zimbabwe insgelyks R126 miljoen aan HCB.
Die besturende direkteur van die Zimbabwe-elekrisiteitstransmissie en -verspreidingsmaatskappy (ZETDC), Julian Chinembiri, het intussen in die Financial Gazette verklaar dat “agterstallige bedrae ophoop”.
“Eskom het ons tot Desember 2016 gegee terwyl HCB ons tot einde November gegee het om agterstallige bedrae te vereffen,” sê Chinembiri. “Tans geniet ons stabiele kragvoorsieing en ons sou voorsiening wou hou soos dit is en verseker dat geen beurtkrag ingestel word nie.”
“Ons beskik oor voorafbetaalde reëlings met Eskom en HCB.”
Zimbabwe voer ongeveer 350 megawatt elekrisiteit van Eskom in en 50MW van HCB. Die land wek ook krag op deur middel van dieselopwekkers wat aan Robert Mugabe se skoonseun, Simba Chikore, behoort. Onlangs is Chikore insgelyks as onderhoof van die bankrot lugdiens, Air Zimbabwe, aangestel.
-
Eskom-staking kan krag knou
Elektrisiteitsvoorsiening kan onder druk kom wanneer vyftienduisend vakbondlede van die NUM vandag aansluit by ‘n onbeskermde staking.
Die vakbond sê hy het besluit om voort te gaan met volskaalse arbeidsoptrede om die werkgewer te dwing om aan werkers se salariseise gehoor te gee.
Eskomwerkers word ingevolge arbeidswetgewing verbied om te staak.
Die president van die NUM Piet Matose hou vol dat hulle met arbeidsoptrede voortgaan en werkers sal veg vir hulle reg om te staak.
-
Zim Sondag in duisternis na groot kragonderbreking
Zimbabwe was Sondag donker na ‘n groot kragonderbreking veroorsaak is deur die meeste energie-eenhede onklaar geraak het.
Krag het omstreeks 15:00 afgegaan voor dit in sommige dele van die land herstel is drie uur later, terwyl die oorblywende gebiede eers ses uur later weer elektrisiteit gehad het.
Die kragvoorsiener ZESA Holdings het gesê: “ZESA Holdings wil graag sy gewaardeerde kliënte adviseer landwyd van die verlies van krag vir die meeste dele van die land vanmiddag weens ‘n stelselversteuring.
“Die onbeplande kragonderbreking was te wyte was aan ‘n stelselversteuring wat gelei het tot ‘n verlies van ‘n eenheid by Kariba-kragstasie, vier eenhede by Hwange-kragstasie, klein eenhede, invoer van Mosambiek, en die Zambiese interkonneksie, wat gelei tot die versteuring van die nasionale elektrisiteitsnetwerk.”
Zimbabwe sukkel met ‘n bytende energiekrisis en het meer as 2200 megawatt (MW) nodig terwyl invoere en plaaslike sentrales die land se 1355MW tans lewer.
Die land voer 300 MW se krag van Suid-Afrika se Eskom in, tussen 100 MW en 185MW van Mosambiek, en 100 MW uit die Demokratiese Republiek van die Kongo.
Die Karibakragstasie se uitbreidingsprogram sal na verwagting voltooi word teen 2018, en sal 300 MW voeg by die nasionale netwerk.
Die aanleg is slegs 40 persent voltooi. Daar is ook die Batoka Hydro Station, ‘n kragprojek wat 2400MW sal genereer.
Verskeie maatskappye is op soek na lisensies om sonkrag-projekte in die land te loods.
-
Kimberley moet ligloop vir skelms wat ‘kragbespaarders’ smous
Die Sol Plaatje munisipaliteit in Kimberley het ‘n waarskuwing uitgereik oor mense wat hulle as munisipale amptenare voordoen en elektrisiteitsbesparings apparate verkoop.
Sol Plaatje woordvoerder Sello Matsie sê die verkopers van dié apparate, waarvan die toerusting nie een dieselfde is nie, oortuig inwoners dat hulle toestel die huiseienaar baie geld sal bespaar.
Matsie sê bejaarde inwoners word geteiken deur die vals amptenare.
Verder sê hy is daar reeds vasgestel dat inwoners met sowat R25 000 reeds ingeloop is.
-
Aap sorg vir landwye algehele kragverlies in Kenia
Nie ‘n amptenaar nie, maar ‘n aap het die skuld gekry vir ‘n landwye kragonderbreking in Kenia ná hy op ‘n “transformator by ‘n kragstasie geval het”.
Die land aan ooskus van Afrika was Dinsdag sonder elektrisiteit vir meer as drie uur ná die voorval kort ná 11:30 plaaslike tyd.
Die elektrisiteitsmaatskappy Kengen het in ‘n verklaring beweer dat die onderbreking die gevolg was van ‘n aap wat op ‘n kragstasiedak geklouter het en oor ‘n transformator gestruikel het.
“Op 1129 uur vanoggend, het ‘n aap op die dak van Gitaru-kragstasie geklim en oor die transformator gestruikel.
“Dit het veroorsaak dat ander masjiene by die kragstasie oorlaai wat gelei tot ‘n verlies van meer as 180MW by die aanleg, wat ‘n nasionale kragverlies veroorsaak het.
“Die stelsel is intussen herstel en al ons krageenhede word normaalweg bedryf.
“Kengen kraginstallasies word deur elektriese heinings beskerm wat plunderende wilde diere weghou.
“Ons is jammer oor hierdie geïsoleerde voorval en die maatskappy is op soek na maniere om verdere verbetering van sekuriteit by al ons kragsentrales te verseker.”
Intussen duur openbare geweld in Kenia se westelike stad, Kisumu, voort met paaie wat deur brandende buitebande en klippe afgesper word.
Oproeriges eis dat die verkiesingsliggaam, wat volgende jaar se verkiesings moet reël, moet bedank.
Die polisie en betogers het sedert láát April herhaaldelik slaags geraak tydens protesoptogte wat byna weekliks deur die opposisie gereël is en waarin die onafhanklike verkiesing- en afbakeningskommissie van partydigheid beskuldig word.
Kisumu en ander dorpe in die weste van die Kenia is opposisievestings en het reeds van die ernstigste geweldpleging beleef. Drie mense is in gevegte in die streek op 23 Mei dood.
Die polisie het ook met betogers in Nairobi gebots, waar die opposisie gister vergaderings beplan het.
‘n Vergadering verlede week tussen pres. Uhuru Kenyatta en die opposisieleier, Raila Odinga, kon nie daarin slaag om die spanning te verlig in ’n land wat geneig is om politieke onrus te beleef nie. Geweldpleging ná die 2007-verkiesing het die lewens van ongeveer 1 200 mense geëis.
Die opposisie eis ’n dialoog om die verkiesingskommissie te hervorm.
Verkiesingskommissarisse ontken vooroordeel en sê hulle wil aanbly.
Die regering hou vol dat enige hervormings grondwetlike kanale moet volg, wat ’n petisie aan die parlement vereis waar Kenyatta se Jubilee-koalisie ’n meerderheid het.
-
Swaar weer ontwrig lugverkeer by OR Tambo
Alhoewel die OR Tambo Internasionale Lughawe Maandag op sy amptelike Twitter-blad ontken het dat die lughawe gesluit is, het hewige donderstorms wel lugverkeer byna tot stilstand gedwing.
Die Lughawensmaatskappy van Suid-Afrika kon nie aanvanklik vir kommentaar bereik word nie.
‘n Hewige donderstorm en hael in dele van Johannesburg het daartoe gelei dat talle vlugte by die OR Tambo Internasionale Lughawe vertraag is.
Die meeste vertragings is glo deur uiterste weerstoestande veroorsaak.
Die 18 vlugte wat geskeduleer was om op te styg moes wag, terwyl ‘n verdere 52 vlugte wat sou land ook vertraag is.
Passasiers het op die sosiale netwerk Twitter getwiet dat die lughawe gesluit is.
Intussen is groot dele van Johannesburg sonder elektrisiteit. City Power sê dele wat geraak word sluit in Sydenham en Cyrildene in die ooste in. In die noorde word Greenside, Linden, Craighall Park en Honeydew geraak en La Rochelle in die suide van die stad.
Dit is nog nie duidelik wat die kragonderbreking veroorsaak het nie. City Power sê egter die donderstorm wat oor dele van die stad gewoed het kon tot van die kragonderbrekings gelei het.
Bykomende personeel is ontplooi in ‘n poging om die onderbrekings te herstel.
-
Polisie moet oproeriges in Klerksdorp vasvat
Die polisie in Klerksdorp moes bontstaan om ongeveer 20 oproeriges, wat na bewering EFF-lede is, van ‘n kantoor by die plaaslike munisipaliteit te verwyder.
Noordwes se polisiewoordvoerder, Pelonomi Makau, sê hulle wou die kantore binnedring uit protes teen swak dienslewering in die Alabama-lokasie.
Sy sê die lede van die gemeenskap eis dat hulle huise in Alabama, wat na bewering reeds vier jaar sonder kragtoevoer is, van elektrisiteit voorsien word.
-
Namibiese president lê klem op SAOG se kragvoorsiening
President Hage Geingob het by sy intreetoespraak by die SAOG-spitsberaad in Gaborone gesê die armes kan nie natuurlike hulpbronne, demokrasie of grondwette eet nie.
“Ons mense kan nie natuurlike hulpbronne eet nie. Ons mense kan nie demokrasie eet nie. Ons mense kan nie goeie grondwette eet nie. Demokrasie is egter die voorwaarde om in ons mense se basiese behoeftes te voorsien,” het Geingob gesê.
Hy het klem gelê op waardetoevoeging wat die ekonomiese onderbou van rustofverwerking behoort te vorm, het die Republikein berig.
“Die uitvoer van rustowwe beteken eenvoudig dat ons werkgeleenthede uitvoer. Dit ontneem ons die geleentheid om te industrialiseer en ons mens-like kapitaal te ontwikkel. Ons moet ’n einde maak aan die tendens wat meebring dat ons handel dryf met goedere wat ons nie verbruik nie, en goedere verbruik wat ons nie produseer nie,” het Geingob gesê.
Ten einde te industrialiseer, is betroubare elektrisiteitsvoorsiening noodsaaklik. Streeksamewerking is die sleutel om te verseker dat SAOG sy elektrisiteitstekort oplos. Nog ’n aspek wat streeksamewerking vereis, is die ernstige droogte wat die SAOG-streek teister, het Geingob gesê.
Hy het ook daarop gewys dat die streek sy afhanklikheid van buitelandse ontwikkelingshulp moet verminder ten einde ekonomiese soewereiniteit te verseker.
“Ongeag hoe karig ons finansiële bronne mag wees, is ek van mening dat indien ons saamstaan in die gees van ‘harambee’, (Swahili vir trek saam), ons die oogmerke vir ’n geïndustrialiseerde, vooruitstrewende streek sal verseker,” het Geingob gesê.