Etiket: departement van Hoër Onderwys

Blade wil korrupsie in NFSAS pak

Die Departement van Hoër Onderwys en Opleiding gaan met ‘n forensiese ondersoek begin na die Nasionale Studente Finansiële Hulpskema om korrupsie uit te roei, het RSG berig.

Die Minister, Blade Nzimande, het die inligting op ‘n nuuskonferensie voor sy Begrotingspos in die Parlement bekendgemaak.

Nzimande sê hy is van mening dat daar korrupsie in die verspreiding van die finansiële hulpskema vir behoeftige studente by tersiëre instellings is.

Hy sê ‘n voorlopige verslag sal na verwagting teen die einde van Oktober gereed wees.

Duur universiteite is ‘voortsetting van rassisme’

Die Departement van Hoër Onderwys sê hulle is bekommerd oor die hoë koste van tersiêre onderrig wat ‘n voortsetting van rassisme is.

‘n Woordvoerder sê hulle beplan om die klasgeld deur ‘n regsraamwerk te standardiseer, het RSG berig.

President Jacob Zuma het tydens sy agt Januarie-verklaring dit benadruk dat hoër onderwys al hoe duurder begin word.

Die Departement sê wanneer universiteite soos Stellenbosch en Kaapstad hulle gelde verhoog, word dit al hoe minder bekostigbaar om te gaan studeer en dit is net die kinders uit welgestelde gesinne, wat meestal wit is, wat die studiegeld kan bekostig.

Volgens die departement is dit ‘n voortsetting van rassisme wat betref die toegang tot hoër onderwys, omdat die armer studente na die ander universiteite soos die Vrystaat en Fort Hare sal moet gaan.

Studente saai verwoesting oor registrasiegelde

Die Pietermaritzburg-kampus van die Universiteit van KwaZulu-Natal is gevandaliseer nadat studente oproerig geraak het.

Sewe studente is in hegtenis geneem nadat geweld uitgebreek het. Volgens ‘n woordvoerder van die universiteit, het die oproermakers lesings probeer ontwrig.

Klasse by die universiteit is ook nog nie hervat by die Westville-kampus nie nadat studente verlede week daar ook oproerig geraak het.

Die studente kla ondermeer oor die verhoging van registrasiegeld. Die departement van Hoër Onderwys het die Universiteitsbestuur intussen versoek om met die Studenteraad te vergader om die dooiepunt in die geskil op te los.

Die ministerie het die beskadiging van Universiteitseiendom tydens die oproer skerp veroordeel.