Karin Roodt – Bladsy 119

Wapenskandaal-ondersoek open

Die langverwagte Kommissie van Ondersoek na strategiese verdedigingsaankope begin vandag in Pretoria met sy openbare sittings.

President Jacob Zuma het in 2011 die kommissie aangestel ná oproepe deur opposisiepartye dat bewerings van bedrog en korrupsie ondersoek word.

Die kommissie het egter verskeie terugslae beleef met die bedanking van sleutelpersoneellede. Een van die kommissarisse, regter Francis Legodi, het verlede week sy bedanking ingedien, terwyl die getuienisleier, Tayob Aboobaker Vrydag bedank het, maar gister sy bedanking teruggetrek het.

Die kommissie het bekendgemaak dat Aboobaker Vrydag sy bedanking ingedien het, maar dat hy dit teruggetrek het nadat daar met hom gesprek gevoer is.

Die woordvoerder van die kommissie, William Baloyi, kon nie redes verskaf vir Aboobaker se bedanking nie. Aboobaker is die mees senior regspersoon in die kommissie.

Volgens bronne het Aboobaker die kommissie van nepotisme, binne-gevegte en ‘n gebrek aan professionaliteit beskuldig.

Oudpresident Thabo Mbeki, die beplanningsminister, Trevor Manuel en die oudministers Mosioua Lekota, Ronnie Kasrils en Alec Erwin sal verskyn.

Die burgemeester van Kaapstad, Patricia de Lille, wat beskou word as die persoon wat die beweerde bedrog oopgevlek het, sê die kommissie moet ‘n kans gegun word om sy werk te doen.

De Lille het haar kommer uitgespreek omdat die Seriti-kommissie van ondersoek na die wapentransaksie binne ses maande aan president Jacob Zuma moet verslag doen.

Sy sê die president self word by van die bewerings betrek.

Die ondersoek na die omstrede wapentransaksie in die laat negentiger-jare, begin vandag met hul openbare sittings.

Die onafhanklike verdedigingskenner, Helmoed-Romer Heitman sê teen die tyd het diegene wat by korrupsie betrokke was waarskynlik reeds hul voetspore doodgevee. – RSG

Pak slae tuis dalk onwettig

Die minister van maatskaplike ontwikkeling het glo gesê ouers moet hul kinders met behoorlike waardes grootmaak om seker te maak dat hulle nie hul eie kinders eindelik doodmaak nie.

’n Nuwe wetsontwerp kan dit onwettig gaan maak vir ouers om hul kinders by die huis ’n pak slae te gee.

Bathabile Dlamini, die minister van maatskaplike ontwikkeling het glo aan ‘n koerant gesê ouers moet hul kinders met behoorlike waardes grootmaak om seker te maak dat hulle nie hul eie kinders eindelik doodmaak nie.

“As ’n man sy vrou slaan, is dit ’n misdaad, maar as ’n ouer ’n hulpelose kind slaan, is dit nie onwettig nie,” het sy glo gesê.

Volgens berigte kan ouers ingevolge dié wetsontwerp van aanranding aangekla word as indien hulle kinders met ’n plat hand op hul boude slaan of enige ander metode van lyfstraf toedien.

Lyfstraf by skole is reeds in 2006 onwettig verklaar.

Dit is glo die tweede keer dat die nie-regeringsorganisasie, Children’s Right Project, poog om pak slae onwettig te maak.

In 2007 het hul eerste poging glo misluk nadat hulle glo hewige teenkanting van kulturele en godsdienstige groepe ontvang het. – looklocal.co.za

Krugersdorp kry ‘nuwe’ straatnaam

Krugersdorp se Perreiras mag dalk dink ‘n letterverandering in hulle van is niks om oor te lag nie, maar vir ‘n inwoner van Noordheuwel is dit ‘n lagwekkende situasie.

Martin Higgins (48) wat al sewe jaar in Perreirastraat bly se straatnaam het oornag na Pierreirastraat verander toe munisipale werkers straatnaambordjies aangebring het met die verkeerde spelling.

“Ek was in die wolke toe ek sien dat straatnaambordjies deur die munispaliteit aangebring word, maar toe besef ek dat die naam verkeerd gespel is,” sê Higgins.

Hy sê hy het selfs aangebied om die koste te dra om dit reg te stel.

“Ek het die munisipaliteit gebel om dit te rapporteer waar ek genoem het dat ek die koste sal dra, maar dit is van die hand gewys. Die straatnaambordjies is van ‘n sekere materiaal gemaak, wat byvoorbeeld snags reflekteer as motorligte daarop skyn.”

Hy reken ook dat die verkeerde spelling daartoe kan lei dat mense wat na sy adres moet gaan, kan verdwaal omdat hulle nie die straatnaam kry nie.

Fritz (70) en Louise (66) Crause wat langs Higgins bly reken dat dit swak is om die straatnaam verkeerd aan te bring.

Vrae rakende die spelling van die straatnaam is aan Nkosana Zali, Mogale City Plaaslike Munisipaliteit se woordvoerder gerig, maar geen terugvoering is teen druktyd ontvang nie. – looklocal.co.za

VSA, EU twyfel oor Zim-uitslag

Amerika en die Europese Unie het hul twyfel uitgespreek oor die geldigheid van Zimbabwe se presidensiële en parlementêre verkiesing.

President Robert Mugabe en sy ZANU-PF party het as duidelike wenners uit die stryd getree.

Die Amerikaanse minister van Buitelandse sake, John Kerry sê hy glo nie dat die amptelike uitslag die wil van Zimbabwiese burgers weerspieel nie.

Kerry het ‘n beroep op die Suider Afrikaanse Ontwikkelingsgemeenskap en die Afrika-Unie gedoen om in te gryp. Hy het ook die Zimbabwiese regering gevra om ‘n plan te maak sodat Zimbabwiërs hul mees fundamentele demokratiese reg in ‘n vry en regverdige omgewing kan uitoefen.

Die Europese Unie het op sy beurt gesê hy is bekommerd oor die beweerde onreëlmatighede en ‘n gebrek aan deursigtigheid in die verkiesings.

Die EU se uiteindelike besluit oor die verkiesing, sal deurslaggewend wees wanneer besluit word oor die verslapping of verstewiging van sanksies teen Zimbabwe.

Die EU se buitelandse beleidshoof – Catherine Ashton – sê die EU sal die verwikkelinge die volgende paar weke noukeurig dophou.

Volgens die amptelike uitslag het president Robert Mugabe die presidentsverkiesing met 61 persent gewen, terwyl Morgan Tsvangirai van die MDC 33 persent van die stemme op hom verenig het.

Die ZANU-PF-party het vroeër ‘n tweederde-meerderheid in die parlement gekry toe hy 150 van die 210 setels ingepalm het. – RSG

Obama-administrasie steek Bengazi-oorlewendes weg

‘n Republikeinse verteenwoordiger Trey Gowdy (R-SC) het Donderdag in die geselskap van Greta Van Susteren op Foxnews die Obama-skandale bespreek.

Dié onthullings volg nadat Jake Tapper op CNN die nuus gebreek het dat daar “tientalle” CIA-agente teenwoordig was in Benghazi op die 9/11-herdenking toe die Amerikaanse konsulaat aangeval is en ambassadeur Chris Stevens tydens die aanval dood is.

Die geheime agentskap doen sedertdien besonder baie moeite om seker te maak dat dit waarmee hule besig was in Libië, ‘n geheim bly.

Gowdy het aan Greta gesê die Obama-administrasie steek van die oorlewendes weg, versprei hulle regoor die VSA, en verander hul name.

Terselftertyd noem Obama Benghazi ‘n “kamma-skandaal”.

Veiligheidsbronne het weereens bevestig dat ambasseur Stevens besig was om wapens – waaronder Stingermissiele – aan terreurgroepe wat al-Kaida insluit, te lewer en fundamentaliste te werf om Sirië se wettige regering omver te werp.

Corrie Sanders se saak uitgestel

Die saak teen drie mans wat verdink word van die moord op die bokskampioen, Corrie Sanders, is in die landdroshof op Brits in Noordwes uitgestel.

Dit sal na die Noord-Gauteng Hooggeregshof in Pretoria verwys word. Die saak is tot 23 September uitgestel.

Sanders is verlede jaar September doodgeskiet tydens ‘n gewapende rooftog by ‘n restaurant op die dorp toe hy sy dogter teen die aanvallers wou beskerm.

‘n Vierde swart verdagte moet nog steeds vanaf Zimbabwe uitgelewer word.

Die man is tot 30 jaar tronkstraf gevonnis in Zimbabwe vir die moord op ‘n polisiebeampte.

Hy was vermoedelik in besit van die wapen waarmee Sanders doodgeskiet is. – RSG

Snowden pos by top sosiale netwerkwerf aangebied

Die Amerikaanse fluitjieblaser Edward Snowden is ‘n werk deur Rusland se top sosiale netwerk-webwerf Donderdag aangebied, ure nadat die voormalige intelligensie-kontrakteur ‘n jaar lank asiel in Rusland ontvang het.

“Ons nooi Edward Snowden na St Petersburg en sal bly wees as hy besluit om by die sterspan van programmeerders aan te sluit by VKontakte,” het Pavel Durov, een van die stigters van VKontakte, Rusland se antwoord op Facebook, gesê op sy profiel.

Snowden se tydelike asiel sal hom toelaat om te werk in Rusland, volgens Anatoly Kucherena, ‘n prokureur vir Snowden.

Moskou het Washington se herhaalde versoeke om Snowden uit te lewer geweier. Hy staan tereg op aanklagte van spioenasie nadat hy besonderhede van geheime Amerikaanse toesigprogramme uitgelek het wat selfoon- en Internetdata betref.

Om vervolging te ontsnap, het Snowden na Moskou van Hong Kong gereis op 23 Junie en moes vir meer as ‘n maand in die transitodeel van die Sheremetyevolughawe wag voor hy Donderdag met ‘n nuwe stel vlugtelingdokumente die gebou kon verlaat.

Spanning tussen Rusland en die Verenigde State van Amerika, wat reeds haaks is oor die konflik in Sirië, sowel as ander verdedigings- en menseregtekwessies, is deur Snowden se besluit verhoog.

Durov van VKontakte, of “InVoeling”, sê hulle het meer as 210 miljoen geregistreerde profiele en tot 47 miljoen daaglikse gebruikers. Hy het gesê hy is trots oor Rusland se besluit om Snowden te help.

“Vandag het Edward Snowden – die man wat die Amerikaanse veiligheiddienste se misdade aan die kaak gestel teen die burgers van die hele wêreld – tydelike asiel in Rusland ontvang,” het Durov gesê.

“In sulke oomblikke kan ‘n mens trots voel op ons land en spyt oor die loop wat geneem word deur die Verenigde State – ‘n land wat die beginsels waarop dit eens gebou was, verraai het,” het hy bygevoeg.

Wilgehof: Departement, TV-kameras slaan toe oor nóg ‘n k-woord

Die Volksblad berig dat die Vrystaatse departement van onderwys teleurgesteld moes omdraai nadat amptenare met ’n TV-nuusspan by die Laerskool Wilgehof in Bloemfontein opgedaag het om ’n onderwyseres te skors na nóg ’n beweerde rassevoorval .

Amptenare van die departement ’n skorsingsbrief aan die leerkrag oorhandig, maar moes uitvind dat sy ’n beheerliggaampos beklee en nie deur die departement geskors kan word nie.

Die onderwyseres het die aantygings teen haar ten sterkste ontken en gesê sy beplan om dadelik stappe te neem teen dié ongegronde aantygings.

Howard Ndaba, woordvoerder van die departement, sê sy het glo die k-woord gebruik.

Omdat sy nog nie amptelik aangekla is nie, kan haar naam nie bekend gemaak word nie.

Magda Strydom, sekretaris van die Suid-Afrikaanse Onderwysersunie (SAOU), sê die departement se bewerings dat die onderwyseres ’n rassistiese opmerking teenoor leerlinge vroeër vandeesweek in ’n voorval op die skoolterrein gemaak het, is ongegrond.

Sy gaan voort met haar pligte terwyl die beheerliggaam die saak ondersoek, sê Strydom.

Ndaba sê die Vrystaatse onderwysdepartement sal met Fedsas en die skool se beheerliggaam saamwerk om toe te sien dat die onderwyseres tydelik geskors word hangende ‘n ondersoek.

‘n Ondersoek kan nie geskied as sy nog by die skool betrokke is nie, sê Ndaba.

Dié aantygings kom te midde van die laerskool se geskorste skoolhoof, Fanie Roeloffze, en Lenard MacKay, ’n onderwyser, wat albei binnekort voor ’n dissiplinêre komitee van die Vrystaatse onderwysdepartement sal verskyn oor beweerde rassisme.

Chinese belê in historiese wynlandgoed

Perfect China, wat ’n belang van 51% in Perfect Wines of South Africa besit, het pas die Val de Vie-wynlandgoed tussen die Paarl en Franschhoek, gekoop.

Dit is die eerste Chinese belegging in die plaaslike wynbedryf. Dit sluit die wynplaas van 25 ha en die historiese herehuis in en is bekend vir sy Rhône-styl wyne

Hein Koegelenberg, voorsitter van Perfect Wines of South Africa en uitvoerende hoof van die wynlandgoedere La Motte en Leopard’s Leap, wou nie die koopbedrag bekendmaak nie.

’n Groter, baie duur vatverouderingskelder word in die vooruitsig gestel, en die herehuis, wat van 1783 dateer, sal in ’n Hugenote-museum omgeskep word.

Perfect Wines of South Africa voer sedert 2011 wyne uit na China.

Koegelenberg sê L’Huguenot, die wynhandelsnaam wat spesiaal vir die Chinese mark geskep is, is verantwoordelik vir byna 50% van die totale Suid-Afrikaanse wynuitvoer na China.

Perfect China versprei L’Huguenot in die Verre Ooste sowel as in Maleisië, Thailand, Hongkong, Indonesië, Singapoer, Taiwan en Viëtnam as deel van die strategie om Suid-Afrikaanse wyntoerisme in China te bemark.

Koegelenberg se span het aanvanklik op eie koste Franschhoek se toerismegids in Mandaryns vertaal en 60 000 eksemplare in China versprei.

Bennet doen oproep om weerstand teen Zanu-PF

Roy Bennet, tesourier van Zimbabwe se opposisieparty, het ‘n oproep om weerstand teen Robert Mugabe se bewind gedoen.

“Ek praat van passiewe weerstand. Ek praat van mense wat die land tot stilstand bring – moenie julle rekeninge betaal nie, moenie gaan werk nie.”

Hy het dié oproep gedoen vir ‘n veldtog om die land tot ‘n stilstand te bring nadat pres. Robert Mugabe ‘n oorwinning in Woensdag se verkiesing voorspel het.

“Daar moet weerstand teen hierdie diefstal wees en die mense van Zimbabwe moet opstaan en dit aanspreek,” het Bennett Donderdag aan AFP in Johannesburg gesê. – Sapa/AFP

Die MDC se leier, Morgan Tsvangirai, het vroeër gesê die verkiesing was ‘n klug.

Die party het ook beswaar gemaak oor ‘n gebrek aan deursigtigheid oor die druk van stembriewe, die groot aantal kiesers wat by stembusse weggewys is en die kiesersrol wat chaoties was.

Die finale uitslae moet nog bekend gemaak word, maar Mugabe se Zanu-PF voorspel reeds ‘n oorweldigende meerderheid.

Nuwe SAUK-kanaal nog ‘n nasiebouslenter

President Jacob Zuma het Donderdag die SAUK aangemoedig om Afrika se suksesvarhale wat die vasteland se vordering weerspieël, te vertel.

Die 24-uur nuuskanaal moet nie net fokus op misdaad en korrupsie nie, maar die land se goeie eienskappe weergee, het hy gesê by die nuwe kanaal se bekendstelling, in Auckland Park, Johannesburg.

“Ek hoop dat hierdie kanaal die houdinge sal verander en Suid-Afrikaners trots sal maak op wat hulle in staat was om te bereik op hul eie. In kort, die ware Suid-Afrikaanse storie wat wag om vertel te word.“

Die kanaal sal uitsendings op DStv se kanaal 404 uitsaai, en was geskeduleer om te begin vanaf 18:00. “Die groei van die kommunikasiesektor … is merkwaardig,” het Zuma gesê.

Zuma het gesê dit sal ‘n deurslaggewende rol speel in die samelewing want media is ‘n belangrike kommunikasie-instrument. “Ons is gelukkig om te leef in ‘n tydperk van Afro–optimisme,” het hy bygevoeg.

Die nuwe kanaal sal in al 11 tale uitsaai en is oënskynlik geskep om die verskillende tale tot hul reg te laat kom. DStv behoort aan Naspers.

Kritici meen só ‘n ondeneming sal nooit winsgewend wees nie en dit is bloot ’n manier om die dalende kykergetalle van SABC2 te probeer teenwerk, terwyl die nuwe kanaal ’n gulde geleentheid sal bied om in al die verskillende tale ‘n nasiebouoffensief tot voordeel van die maghebbers uit te bou.

Die Afrikaanse kyker was lank die SAUK se melkkoei, aangesien adverteerders gretig is om geld uit te haal waar kykergetalle hoog is.

Afgevaardigdes na die bekendstelling het Zuma se eweknie van Lesotho Tom Thabane, minister van kommunikasie, Yunus Carrim en sokkeradministrateur Irvin Khoza ingesluit.

Carrim het gesê dit sal gratis beskikbaar wees op TV sodra die skuif van analoog na digitale televisie gebeur. DStv is steeds ‘n betaalkanaal en ‘n groot bron van inkomste vir Naspers.

Die besluit het vir kritiek teen die SAUK gesorg om sy 24-uur nuus aan te bied op ‘n betaalplatform wat oor die die enigste openbare uitsaaimandaat in die land beskik.

Carrim het egter vrese dat die kanaal finansieel onvolhoubaar is geïrriteerd afgemaak en gesê dit is die risiko wat sulke kanale reg oor die hele wêreld in die gesig staar.

Hy het die hoop uitgespreek dat die kanaal sal help om gehore wat hulle verloor het, terug te wen.

Die bekendstelling het saamgeval met die 77ste herdenking van die SABC.

Die besturende direkteur van die ATKV, Japie Gouws, sê hy is opgewonde oor die groter blootstelling wat gebied word en wat “opbouend” vir Afrikaans sal wees.

Zuma belowe werk en wetenskap

President Jacob Zuma sê die regering het nog nie sy planne laat vaar om vyf miljoen nuwe werksgeleenthde teen 2020 te skep nie.

Statistiek Suid-Afrika het vroeër die week bekendgemaak dat die getal werklose mense in die tweede kwartaal van die jaar tot vier komma sewe miljoen toegeneem het – die grootste nog.

Tussen die eerste en tweede kwartale van vanjaar het 122 000 werksgeleenthede verlore gegaan.

Zuma het Donderdagaand in Johannesburg by die bekendstelling van die SAUK se 24-uur nuuskanaal op DSTV gesê die uitdaging is dat die ekonomie nie vinnig genoeg groei om werkskepping te bevorder nie.

Die Wetenskaplike Nywerheidsnavorsingsraad werk intussen onverpoosd om tegnologie te ontwikkel wat Suid-Afrikaners in staat sal stel om beter lewens te lei.

Die bestuurshoof van die WNNR, Sibusiso Sibisa het by die Raad se Meraka Instituut in Pretoria ‘n beroep op jong Suid-Afrikaners gedoen om wiskunde en wetenskap as vakke op skool te neem.

Hy het die Minister van Wetenskap en Tegnologie, Derek Hanekom, op ‘n toer vergesel van sommige van die projekte waaraan gewerk word.

Sibisa sê geleenthede soos die WNNR se Wetenskapsweek, wat vandeesweek plaasvind, is daarop gemik om belangstelling in wiskunde en wetenskap te help bevorder. – RSG

Wit boere het ‘geen rede tot paniek nie’

Die voorsitter van Vrystaat Landbou (VL), het boere Woensdag op dié organisasie se jaarlikse kongres in Bloemfontein gerusgestel dat blanke in die Vrystaat geen rede tot paniek het oor grondgryp nie.

Dan Kriek het VL se verbintenis tot ordelike grondhervorming geprys met die aankondiging dat sy provinsiale grondoudit afgehandel is.

Kriek, sê dié inisiatief is die afgelope 18 maande met die samewerking van die staat aangepak en maak die Vrystaat die pionier-provinsie op dié gebied.

Dit is ’n poging om die ongeregtigheid van die nalatenskap van die Wet op Naturellegrond van 1913 reg te stel.

Kriek het vroeër in reaksie op die honderdjarige herdenking van dié wet gesê die nalatenskap daarvan kan nie verdedig word nie.

Kriek sê die regering se mikpunt om 30% van grond wat in 1994 in wit besit was aan swart eienaars te oorhandig, is onafdwingbaar.

Vrystaat Landbou en die provinsie se departement van grondsake se volledige grondoudit wys dat meer as 10,775 miljoen hektaar (86,39%) landbougrond in die provinsie in wit hande is.

Die totale landbougrondoppervlak in die Vrystaat meer as 12,196 miljoen hektaar waarvan 152 700 hektaar (1,22%) in swart privaatbesit is, en 209 000 hektaar deur die staat vir swartes aangekoop is. Ongeveer 5,31% is in staatsbesit.

Prof. Nick Vink, hoof van die departement landbou-ekonomie aan die Universiteit van Stellenbosch, sê die hoë persentasie wit grondbesit toon dat grondhervorming ’n “algehele mislukking is”.

Vink en prof. Johann Kirsten, hoof van die departement landbou-ekonomie aan die Universiteit van Pretoria, was gassprekers op die kongres.

Kapers gooi ma en kleuter uit kar

‘n 31-Jarige wit vrou is Vrydagoggend deur drie kapers by n huis in Brakpan-Noord ingewag, waar sy elke oggend n persoon wat saam met haar ry, oplaai

Die vrou het versoek dat haar naam nie gepubliseer moet word nie.

Volgens haar man ry sy elke oggend min of meer dieselfde tyd vanaf hul huis in Brakpan-sentraal na Malanstraat, waar sy die ander persoon oplaai.

“Ek glo die kapers het haar al n rukkie lank fyn dopgehou, want dit is asof alles net mooi volgens hul plan verloop het”, het haar man gesê.

Die vrou het voor die huis stilgehou en die passasiersdeur oopgessluit.

Die oomblik toe sy dit doen het n man dadelik die deur oopgepluk, in die voertuig gklim en n vuurwapen teen haar kop gedruk.

‘n Tweede kaper het haar deur oopgemaak en haar veiligheidsgordel self losgemaak.

“My vrou het op dié stadium gevra of sy net ons seuntjie (2), wat in sy karstoeltjie op die agtersitplek was, kon uittel.”

Die kapers het haar toegelaat om dit te doen en toe sy die kind in haar arms het, het hulle haar en die kind uit die voertuig gepluk en op die sypaadjie neergestamp.

Die twee kapers het in haar Citi Golf weggejaag.

‘n Derde boosdoener, wat in n ligkleurige voertuig gewag het, het saam met hulle weggery.

Al die vrou se persoonlike besittings, soos haar handsak en selfoon, was ook nog in die motor.

“Ek is baie dankbaar dat my vrou en kind ongedeerd hiervan afgekom het”, het haar man gesê.

“Dit is belangrik dat mense weet dat dit op enige tyd en op enige plek kan gebeur.”

Die voorval word deur die SAPD ondersoek. – looklocal.co.za