Internasionale nuus – Bladsy 34

Egipte muilband polisie

Egipte se parlement het Dinsdag beperkings op die polisie goedgekeur wat hulle onder meer verhinder om inligting aan die media te verskaf.

Kritici sien dit as ‘n poging om menseregteskendinge en korrupsie toe te smeer.

Kragtens wysigings aan die polisiewet moet polisiebeamptes voortaan geskrewe toestemming van die ministerie van binnelandse sake hê, alvorens hulle inligting mag verskaf of enige dokumente, verslae of foto’s mag publiseer wat met hul werk verband hou.

Die straf vir oortreders is ongespesifiseerde gevangenisstraf en boetes tot so hoog soos 20 000 Egiptiese pond.

In Februarie, het die Egiptiese president Abdel Fattah el-Sisi gelas dat voorstelle aan die parlement voorgelê word nadat ‘n junior polisiebeampte ‘n taxibestuurder oor ‘n nietige tariefargument doogeskiet het en inwoners woedend gereageer het.

Maar dié maatreëls kom vermoedelik nadat daar botsende verklarings uitgereik is oor die lugramp op 19 Mei deser, toe EgyptAir vlug MS804, vanaf Parys na Kaïro, in die Middellandse See neergestort het en 66 passasiers dood is.

Die Franse minister van buitelandse sake Jean-Marc Ayrault het Egipte se minister van buitelandse sake Sameh Shoukry verlede week geskakel en gevra om aandag te skenk aan die stygende kommer van die families van die slagoffers van die ramp.

Hy het gesê dat die families van die slagoffers nog steeds wag vir die terugkeer van menslike oorskot en persoonlike besittings, en hulle het steeds nog geen duidelike uiteensetting van die redes wat gelei het tot die ongeluk ontvang nie.

Intussen is die oorskot van die Egipties-Amerikaanse Nobelpryswenner vir chemie, Ahmed Zewail, deur Kaïro se strate gelei.

Zewail het ’n begrafnis met volle militêre eer gekry wat deur Egipte se president en topregeringsleiers bygewoon is.

Zewail, wat pres. Barack Obama se raadgewer oor wetenskap en tegnologie was, het verlede Dinsdag in Amerika gesterf. Hy was 70 jaar oud

NYT loods histeriese aanval teen Trump

Vyftig sogenaamde Republikeinse veiligheidskenners, insluitende ‘n voormalige direkteur van die Amerikaanse intelligensiediens (CIA), het Maandag die party se presidentskandidaat, Donald Trump, uitgekryt as ongekwalifiseerd om die land te lei en gesê hy sal die “mees roekelose president in Amerika se geskiedenis” wees.

Die verklaring is die jongste verwerping van Trump se kandidatuur deur veteraan Republikeinse veiligheidspesialiste en word deur die felheid van die taalgebruik gekenmerk.

“Mnr. Trump skiet te kort aan karakter, waardes en ondervinding om president te wees. Hy verswak Amerika se morele gesag om die leier van die vrye wêreld te wees. Hy beskik nie oor basiese kennis en geloof in die Amerikaanse grondwet, Amerikaanse wetgewing en Amerikaanse instansies, insluitende geloofsvryheid, mediavryheid en ’n onafhanklike regbank nie,” lui die verklaring.

Volgens die verklaring sal nie een van die vyftig ondertekenaars vir Trump stem nie.

“Uit ’n buitelandse beleidperspektief, is Donald Trump nie bevoeg om president of opperbevelvoerder te wees nie.

Ons is inderdaad daarvan oortuig dat hy ’n gevaarlike president sal wees wat die land se nasionale veiligheid en welstand in gevaar sal stel,” lui die verklaring wat eerste in die New York Times gepubliseer is.

Trump het die koerant voorheen daarvan beskuldig dat hulle partydig is en nie belangstel daar in om objektief te wees nie. Hy het ook gesê hy vrees dat die verkiesing in November ‘n gekonkel gaan wees.

Intussen het Julian Assange op die Nederlandse televisieprogram Nieuwsuur gesuggereer dat Seth Rich (foto bo), ‘n Demokratiese medewerker die bron vir die Wikileaks-eposkraak was en nie die Russe nie.

Die Clinton-veldtogvoerders het Rusland die skuld gegee vir die vrystelling van gekraakte eposse wat aantoon hoe Clinton die Demokratiese verteenwoordigers manipuleer.

Rich is vermoor.

Mali gaan steeds gebuk onder djihadiste-aanvalle

Minstens vyf Malinese soldate word vermis ná ’n aanval in die sentrale Mopti-streek van Mali, waar gewapende Islamitiese ekstremiste aktief is, het ’n militêre woordvoerder gesê.

Die aanvallers het Maandag een van die weermag se posisies tussen Tenenkou en Sevare aangeval. Die weermag gee Ansar Dine die skuld vir die aanval.

Ansar Dine is ’n hoofsaaklik Toeareg-groep wat vroeg in 2012, met die hulp van twee ander bewegings, waaronder Al-Kaïda in die Islamitiese Maghreb (AQIM), beheer oor die noordelike woestyngebied geneem het.

Die djihadiste is in Frans-geleide militêre operasies in 2013 uit die gebied verdryf, maar hulle voer steeds aanvalle van hul skuilings in die woestyn uit.

Ansar Dine het aanspreeklikheid aanvaar vir ’n aanval op ’n militêre basis by Nampala op 19 Julie waarin 17 soldate dood en 37 gewond is en ses vermis word.

Voortgesette internasionale militêre betrokkenheid sedert Januarie 2013 het die Islamitiese vegters uit belangrike bevolkingsentrums verdryf, maar groot dele van die land is steeds nie onder die beheer van Malinese of internasionale magte nie.

Djihadistiese groepe het vroeg verlede jaar begin om aanvalle in die sentrale en noordelike dele van Mali uit te voer.

Zuma betuig medelye aan Pakistanse selfmoordbomslagoffers

President Jacob Zuma het sy medelye aan Pakistan betuig ná ‘n dodelike terreuraanval op ‘n hospitaal in die stad Quetta.

Minstens 70 mense is dood en meer as 100 is beseer nadat ‘n bom gister by die ingang na die noodeenheid van die hospitaal ontplof het.

Tientalle regslui was uit protes by die hospitaal byeen nadat die lyk van ‘n kollega, wat vroeër doodgeskiet is, daarheen geneem is.

Die aanval was blykbaar ‘n selfmoord-bomaanval. Die meeste mense wat gedood is, is regslui.

Zuma het die daad ten skerpste veroordeel en gesê Suid-Afrika sal voortgaan om terreur te help beveg.

Die aanval dui op faksiegevegte in die land. Na Irak en Afghanistan, is Pakistan derde op die lys van lande waar selfmoordbomaanvalle die meeste voorkom.

Die aanval is glo uitgevoer deur ‘n mededinger van ISIS, die Jamaat-oer-Ahrar.

Die groep het minstens 70 mense in April gedood in ‘n soortgelyke aanval in Lahore toe Christene tydens Paasfees geteiken is.

Pakistanse regsgeleerdes het begin staak nadat dosyne van hul kollegas Maandag omgekom het.

Volgens mediese personeel was ongeveer 60 van die oorledenes regsgeleerdes, wat by die hospitaal vergader het om oor die sluipmoord van die president van die Baloetsjistan balie, Bilal Anwar Kasi, Maandagoggend te rou.

Dit was die jongste en dodelikste van ‘n reeks aanvalle teen regsgeleerdes in Pakistan. Militante beskou hulle as ‘n verlenging van die regering en gevolglik geregverdigde teikens.

“Hoe swak en pateties is hierdie mense wat hospitale teiken, waarheen vrouens en kinders gaan om behandeling te kry?” het Ashtar Ausaf Ali, Pakistan se prokureur-generaal by ‘n betoging buite die hooggeregshof in die hoofstad Islamabad gesê.

Die president van die hooggeregshof-balie, Ali Zafar, het ‘n beroep op die regering gedoen om meer beskerming aan regsgeleerdes te verleen.

Referendum oor grondwet wys Thailand se ‘bamboesdiplomasie’

Thailand se inwoners het begin stem in ’n referendum oor ’n nuwe grondwet wat deur die militêre junta opgestel is en die weg sal baan vir ’n algemene verkiesing in 2017, maar ook voorsiening maak vir toekomstige regerings om op die voorwaardes van die weermag te regeer.

Dit is die eerste toets vir die junta onder leiding van die eerste minister, Prayuth Chan-ocha (foto bo links, op besoek aan China), wat politieke aktiwiteit onderdruk het tydens die twee jaar sedert hy ná ’n staatsgreep in 2014 aan bewind gekom het.

Voor die referendum het meningsopnames getoon dat ’n klein meerderheid ten gunste van die nuwe grondwet was, maar die meeste kiesers was besluiteloos.

Prayuth het gesê hy sal nie bedank indien Thailand die grondwet verwerp nie en dat algemene verkiesings volgende jaar sal plaasvind, ongeag die uitslag.

Ongeveer 200 000 polisiebeampes is vir die verkiesing ontplooi. Thailand se grootste politieke party het die nuwe grondwet voor die verkiesing verwerp, maar daar was geen tekens van betogings of onluste nie.

Die junta, voorheen bekend as die Nasionale Raad vir Vrede en Orde, het kritiek van die grondwet verbied en die owerhede het dosyne mense, insluitende politici en studente-aktiviste wat uitsprake teen die grondwet gemaak het, aangehou en aangekla.

Thailand se houding staan bekend as die ‘bamboesdiplomasie” wat na die winde van verandering buig. Die land se toenadering tot Rusland en China het intussen egter gesorg dat hulle uitgesluit is uit die 2014-RIMPAC-militêre see-oefeninge wat deur die VSA gelei is.

Rio Spele ingelui deur ‘n ontploffing

Die Rio Olimpiese Spele het met ‘n ontploffing afgeskop toe militêre plofstofdeskundiges ’n verdagte pakket naby aan die eindpunt van die mans se fietswedren by Copacabana-strand opgeblaas en vrees by toeskouers ingeboesem het.

By ‘n perdesportbyeenkoms in Deodoro, wat op ’n militêre basis is, het ‘n dwaalkoeël deur die seildak van die mediasentrum geskeur en op die vloer beland.

“Alle owerhede het die versekering gegee dat die koeël niks met die Spele of die Olimpiese familie of die media te doen gehad het nie. Die area was nie die teiken nie,” het ’n woordvoerder van die Spele, Mario Andrada, gesê.

Die openingseremonie was ’n glansgeleentheid, met atlete van deelnemende lande wat oudergewoonde in die Maracanã Olimpiese stadion deur Griekeland binnegelei is.

Meer as 11 000 atlete van 206 nasionale Olimpiese komitees, insluitende vir die eerste keer Kosovo en Suid-Soedan, neem vanjaar deel. Altesaam 28 sportdissiplines word aangebied, insluitende sewes-rugby en gholf, wat in 2009 deur die internasionale Olimpiese komitee ingesluit is.

Rio de Janeiro is die eerste Suid-Amerikaanse stad om die somerspele aan te bied. Dit is ook die eerste keer dat die Olimpiese Spele in ’n Portugeessprekende land aangebied word en die hele somerspele in die winter aangebied word.

Die aanloop tot die Spele is deur omstredenheid geteister, insluitende die onstabiliteit van die land se federale regering, kommer oor gesondheid en veiligheid oor die Zika-virus en ernstige besoedeling in Guanabara-baai.

Dwelmskandale het die Russiese span sowel as die Keniaanse span getref, en meegebring dat talle Russiese atlete verbied is om aan die Spele deel te neem, terwyl die Keniane steeds welkom is.

Dié politiekery om die Russe uit te hou sal sorg vir minder belangstelling. Ook is onthul dat die Spelekomitee nie naastenby genoeg fondse het nie en deur die staat geborg sal moet word.

Ten minste die helfte van Brasilië se inwoners is fel gekant teen die Spele.

VSA erken dat ISIS uitbrei

Ná die VSA Dinsdag nog lugaanvalle teen ISIS-teikens in Libië van stapel gestuur het – ‘n uitbreiding van Amerikaanse militêre operasies buite Irak en Sirië – het NBC News ‘n kaart van die globale uitbreiding van die terreurgroep bekom.

Die kaart is deel van ‘n geklassifiseerde inligtingstuk wat deur die Withuis ontvang opgedateer is vir “Augustus 2016” en wat voorberei is deur die Nasionale Teenterrorisme Sentrum.

Dit toon ‘n drie-voudige toename in die aantal plekke rondom die wêreld waar ISIS werksaam is.

Die VSA se departement van buitelandse sake het dokumente wat aandui dat in 2014, toe die Amerikaanse militêre veldtog teen die ekstremiste begin het, was daar net sewe lande waarin die terroriste aktief was.

Teen 2015, volgens die State Department se eie beramings, was dit reeds byna dubbel, met 13 lande.

Die huidige inligtingsessiekaart toon 18 lande waar ISIS ten volle operasioneel is. Die kaart vertoon ook ‘n nuwe kategorie – “aspiranttakke” – en ‘n lys van ses lande waar hulle wortel skiet, naamlik Egipte, Indonesië, Mali, die Filippyne, Somalië en Bangladesj.

Die VSA was suksesvol in die aanval op die “ISIS-kern” in Irak en Sirië, maar die “hittekaart” is waarskynlik ‘n baie groter een as al die aspirerende gebiede gewys word waar ISIS graag verder wil uitbrei en reeds terroriste-aanvalle uitgevoer het, sê ontleders.

“Dit is regverdig om te sê dat die hele ruimte tot stryd uitbrei vir ISIS,” het een NBC-ontleder bygevoeg.

In ‘n verkiesingsjaar waarin die stryd teen terreur ‘n fokuspunt is, erken selfs die Amerikaanse regering dat die slagveld al hoe groter raak.

‘Hollywood-base dreig akteurs wat Trump ondersteun’

Liberale Hollywood-base dreig na bewering akteurs wat Donald Trump ondersteun dat hulle nooit weer werk sal kry nie. Dié bewerings word gemaak deur die Amerikaanse sepiester en manlike model, Antonio Sabato jr. (foto hier bo). Volgens Sabato is hy aanlyn “geteiken” en op ‘n swartlys geplaas nadat hy ‘n toespraak ter ondersteuning van Trump by die Republikeinse Nasionale Kongres gelewer het.

In ‘n onderhoud met die vermaaklikheidstydskrif Variety, het die 44-jarige akteur – wat op die eerste dag van die Republikeinse kongres sy steun vir Trump uitgespreek het – gesê dat regisseurs sy agente gekontak het en aan hulle gesê dat hulle nooit weer met hom sal werk nie.

“Op Twitter is ek beledig en deur ander glanspersoonlikhede aangeval. Ek gee nie om nie,” het Sabato aan Variety gesê. “Ek sien dit, maar ek lees dit nie. Ek versper hulle en vee dit uit en laat dit agter. Daar is soveel negatiwiteit waardeur mens ingetrek kan word. Maar ek het ook van ander glanspersoonlikhede gehoor: ‘As hy dit kan doen, wil ek ook my mening lug.’ Hulle is keelvol vir die manier waarop dié land bestuur is en vir al die leuens.”

By die kongres het Sabato vertel hoe hy wettig na die Verenigde State geïmmigreer het, nadat hy 11 jaar lank moes wag. Die akteur, wat oorspronklik van Rome afkomstig is, sê hy “het die reëls nagekom” tydens die immigrasieproses, en het die behoefte vir ander immigrante om dieselfde te doen, beklemtoon.

“Donald Trump staan vir eenheid,” het Sabato gedurende sy kort toespraak gesê. “Donald Trump glo aan een Amerika, met vryheid en regverdigheid vir almal. Om veilige grense te hê, om ons burgers te beskerm, niks daarvan is haatdraend nie. Dis die regering se verantwoordelikheid. En dis die regte ding om te doen. Donald Trump gaan dit gedoen kry en ons weer op die regte spoor plaas.”

Hoewel miljoene mense Trump se kandidatuur vir die Amerikaanse presidentskap ondersteun, “hou die liberale Hollywood-bedryf nie daarvan nie”.

“Baie van die base, baie van die uitvoerende hoofde, hulle besit die kanale, hulle besit die media. Hulle skenk miljoene aan Hillary Clinton en president Obama,” het hy aan Variety gesê. “Ek is net ‘n gewone ou wat my mening lug. Laat dit so wees. Ek sal aanhou om te veg vir dít waarin ek glo, en ek sal aanhou om werk te soek.

“My werk en my lewe is op God gegrond,” meen Sabato. “My leier, die een waarna ek opkyk, is Jesus Christus. Ek het mense in dié bedryf ontmoet wat sê, ‘Ek praat nie met dié vent nie, want hy praat van Jesus Christus.’ Dit openbaar die ware persoonlikhede van dié mense. Wel, ek wil in elk geval nie saam met hulle werk nie. Maar as ek soos hulle sou optree, sou ek nooit vir enigiemand werk nie. Hulle is almal aan Hillary se kant.”

Die akteur het bygevoeg dat hy mense ken wat op ‘n swartlys geplaas is eenvoudig omdat hulle die Republikeinse kongres bygewoon het.

“Jy is veronderstel om in diens geneem te word vir jou talent en jou vermoëns, nie op grond van hoe jy voel oor politiek of godsdiens nie. Maar dis hoe hulle dinge doen,” het Sabato verduidelik. “En dis net nie hoe ek is nie. Ek ken baie mense wat in dieselfde bootjie is. Die werklikheid is dat indien jy met die Republikeinse Party verbind word, die rolverdelingsregisseurs en vervaardigers jou reeds op grond daarvan op die swartlys geplaas het.

Sabato het ook sy voorspelling herhaal dat Trump teenoor Clinton in November se algemene verkiesing gaan seëvier.

“Ek gaan Hollywood nooit verlaat nie. Kom wat wil, gaan ek sukses probeer behaal,” het hy aan Variety gesê. “Ek gaan bloot die waarheid praat – mense weet nie hoe dié bedryf werk nie. Ek voel sterk daaroor dat Donald Trump gaan wen. Ek dink hy gaan in November verkies word.”

Gewapende polisie ontplooi na mesaanval in Londense park een eis

‘n Mesaanval in Londen het ‘n vrou se dood veroorsaak en vyf ander mense is beseer.

Die aanvaller wat amok gemaak het in sentraal-Londen se Russell Square kon ‘n terreurmotief gehad het, sê ondersoekbeamptes nadat ‘n verdagte in hegtenis geneem is op die toneel.

Beamptes het ‘n elektriese skokgeweer gebruik om die 19-jarige man in hegtenis te neem. Die polisie is ingeroep na die voorval in Russell Square naby die Britse Museum net ná 22:30 Woensdag.

Die verdagte is na die hospitaal geneem waar hy in polisie-aanhouding bly.

Mark Rowley, assistent-kommissaris die Metropolitaanse Polisie en mees senior teen-terrorisme beampte in Brittanje het die media toegspreek.

Hy het gesê “geestesgesondheid” was ‘n “beduidende” faktor in die voorval, maar het nie uitgebrei oor terrorisme nie.

Twee mans, wat na bewering van Midde-Oosterse afkoms is, is gesien dat hulle verdag optree buite die hotel na die voorval, volgens getuies.

Een getuie, ‘n 35-jarige, wat anoniem wou bly, het aan Express.co.uk gesê: “Ek het gesien hoe twee mans van Midde-Oosterse afkoms verdag optree buite die Imperial Hotel, op Southampton Row.

“Een man het op ‘n motorfiets aan die verkeerde kant van die pad opgejaag met die ander man wat in ‘n ander rigting laat spaander het.”

“Jy weet daar is iets verkeerd wanneer jy die polisie sien opdaag met gewere,” het ‘n ander ooggetuie gesê.

Maar Scotland Yard het gesê vir “gerusstelling en veiligheid” sal Londen Donderdagoggend ekstra beamptes ontplooi, insluitende gewapende polisie.

Die aanval in die gewilde toeriste-area kom te midde van waarskuwings oor die onafwendbaarheid van ‘n terroriste-aanval in die Verenigde Koninkryk na maande van jihadi-aanvalle in Europa en die Midde-Ooste.

Die slagoffer, wat vermoedelik in haar 60’s was, se naam is nog nie bekend nie. Twee vroue en drie mans is beseer.

Brandende vliegtuig moet noodlanding in Doebaai doen

‘n Vliegtuig van die Emirates-lugdiens moes ‘n noodlanding moes uitvoer op die Doebaai-lughawe.

Die 282 passasiers en 18 bemanningslede is ongedeerd.

Daar was glo ‘n Suid-Afrikaner aan boord van die vlug. ‘n Dik, swart rookwolk was sigbaar bo die gestrande vliegtuig op foto’s wat op sosiale media versprei is.

Volgens ‘n verklaring van die lugdiens was vlug EK521 op pad van Thiruvananthapuram in Indië na Doebaai, maar moes om 10:00 Woensdag ‘n noodlanding uitvoer nadat ‘n brand aan boord ontstaan het.

“Ons is nog nie seker wat die brand veroorsaak het nie,” lui die verklaring.

“Emirates kan bevestig dat alle passasiers en bemanningslede veilig is,” het die lugdiens getwiet, maar die voorval sal glo wye vertragings veroorsaak.

Die Doebaaise lughawe het getwiet dat alle vlugte deur die voorval geraak is en tot verdere kennisgewing vertraag sal wees.

Duitsland waarsku Turkye oor visum-afpersing

Duitsland het Turkye se dreigement om nie sy woord gestand te doen oor die omstrede ooreenkoms met die Europese Unie (EU) nie, verwerp.

Turkye het onderneem om die vloei van migrante na die EU te stop. Nou eis Turkye visumvrye toegang na die EU teen Oktober.

Gevra of Turkye die EU kon “afpers” oor die vlugteling-ooreenkoms, het Duitsland se minister van buitelandse sake, Frank-Walter Steinmeier, aan die koerant Rheinische Post gesê: “Dit is absurd.”

“Die feit is dat voorwaardes vir die visumvrye beleid geld, en dit is aan almal bekend,” het hy gesê.

“Turkye het onderneem om sy deel van die ooreenkoms na te kom. Dit is nog nie die geval nie en Turkye het nog werk om te doen.”

Die Turkse minister van buitelandse sake, Mevlut Cavusoglu, het in ’n onderhoud met die Duitse dagblad Frankfurter Allgemeine Zeitung gesê Ankara kan onttrek aan die ooreenkoms indien die EU Turke nie teen Oktober toelaat om sonder visums na die EU te reis nie.

Duitsland se visekanselier, Sigmar Gabriel, het teruggekap en gesê: “Nie Duitsland of Europa mag toelaat dat hulle afgepers word” deur Turkye oor die migrante-ooreenkoms nie.

Turkye en die EU het die omstrede ooreenkoms in Maart onderteken waarin Ankara ooreengekom het om Siriese vlugtelinge wat op Griekse eilande aangekom het, terug te neem in ruil vir politieke en finansiële aansporingsmaatreëls.

Kanselier Angela Merkel het die leiding met die ooreenkoms met Ankara geneem nadat Duitsland verlede jaar ’n rekordaantal migrante en vlugtelinge, ongeveer 2 miljoen ingeneem het.

Benewens visumvrye reise, sluit die ooreenkoms miljarde euro’s in bystand en versnelde samesprekings oor Turkye se aansoek om lidmaatskap van die EU in.

Betrekkinge is egter gespanne sedert pres. Recep Tayyip Erdogan se strawwe optrede teen vermeende samesweerders ná verlede maand se mislukte staatsgreep.

ISIS-djihadiste byna uit Sirte verdryf

Magte lojaal aan Libië se eenheidsregering maak vordering binne die djihadiste se vesting, Sirte nadat die eerste Amerikaanse lugaanvalle, posisies van die Islamitiese Staat (ISIS) in die stad geteiken het.

Die soldate het die sentrale distrik, Al-Dollar, ingeneem nadat gevegte die lewens van vyf soldate geëis het. Sewentien ander is gewond.

Die regering in Tripoli het in Mei ‘n operasie van stapel gestuur om Sirte te herower, wat sedert Junie 2015 deur die djihadiste beheer word.

Die val van die kusstad, ongeveer 450 kilometer oos van Tripoli, sal ‘n reuseslag vir ISIS wees, wat ook terugslae in Sirië en Irak beleef.

Maandag het die hoof van die eenheidsregering, Fayez al-Sarraj, pro-regeringsmagte in Misrata, 190 kilometer noordwes van Sirte, besoek.

Meer as 300 lede van die pro-regeringsmag is reeds dood en meer as 1 500 gewond sedert die aanvang van die stryd om die herowering van Sirte.

Die magte bestaan grootliks uit milisies van die weste van Libië, Hulle het in 2011 tot stand gekom tydens die opstand wat die bewind van die diktator, Moeammar Ghaddafi, omvergewerp het.

Pous sê Islam is nie aan geweld gekoppel nie

Pous Franciscus het Sondag gesê dit is verkeerd om Islam aan geweld te koppel.

Dié uitspraak kom na veral ‘n reeks dodelike aanvalle deur die Moslemterreurgroep ISIS in Europa.

Hy het tydens ‘n mediakonferensie aan boord van ‘n vliegtuig gesê afgodediens en geld is onder die belangrikste oorsake vir terrorisme.

Hy was in Pole ter viering van Wêreldjeugdag. Die pous het Sondag ‘n mis saam met 1,5 miljoen pelgrims van oral in die wêreld gehou.

Ter erkenning van vandag se oorweldigende internetgebruik, het die pous gelowiges aangemoedig om “die beste skakel ooit af te laai, naamlik ‘n hart wat goedheid sien en oordra, sonder om moeg te word.”

Tydens die vyf dag lange besoek aan Pole het hy onder meer die Auschwitz-konsentrasiekamp besoek.

Trump se posisie verstewig verder

Donald Trump se aanslag op die Amerikaanse presidentskap het verder verstewig.

Trump het beloof om die oneerlike media, veral CNN, “die Clinton News Network, aan te vat by ‘n byeenkoms in Harrisburg, Penn. Maandagaand.

“Ons het ‘n media wat so oneerlik is,” het Trump gesê. “Dit is van die mees oneerlike mense wat jy ooit, ooit sal ontmoet.”

“Ons gaan deur die media slaan,” het hy gesê. “Ons moet.” Hy het ook die New York Times uitgesonder as ‘n leuenfabriek.

Met die aanvang van die eerste volle week se veldtogbedrywighede met die oog op die presidentsverkiesing in November, het Hillary Clinton se span ‘n “Moslemslagoffer” van haar konfliksaaiery teen Trump probeer inspan.

Die Demokrate het Kahn al voorheen gebruik in 2005 om Amerikaanse invalle in die Midde-Ooste te bemark.

Clinton het die Amerikaanse politieke en maatskaplike taboe verbreek toe sy ‘n emosiebelaaide woordestryd deur Khizr en Ghazala Khan, die ouers van ‘n Moslem weermagkaptein, teen Trump gebruik het.

Khan het deur die toedoen van ‘n selfmoordbomaanvaller in 2004 in Irak gesneuwel. Sy pa het van die verhoog af op Trump gegil, die ma blykbaar onaangetas deur die mediasirkus.

Trump het gesuggereer dat Ghazala Khan nie gepraat het nie omdat sy ‘n Moslemvrou is en daarom nie ‘n spreekbeurt kry nie. Só ‘n opmerking is in die Demokrate se oë om een of ander rede ‘n doodsonde.

Dit is kennelik ‘n teer punt om na die ooglopende gebrek aan regte onder Moslemvroue te verwys.

In nog ‘n TV-verskyning op CNN, hierdie keer op “New Day,” het Kahn nou aangekondig dat hy “uit die kollig wil bly” omdat die druk oor sy teenstrydighede blykbaar vir hom te veel raak.

Die politieke storm het Hillary grootliks geïsoleer gelaat in haar Demokratiese kampie en het die potensiaal om onafhanklike kiesers wat woedend is oor haar onderduimse manipulasies teen Bernie Sanders, nog verder te vervreem.

Intussen het Jill Stein (foto bo) Hillary se sorge nog groter gemaak.

Die Groen Party presidensiële kandidaat Stein het na berig word die swart menseregte-aktivis Ajamu Baraka as haar vise-presidentkandidaat gekies.

Dr. Stein het dit amptelike Maandag op Twitter aangekondig. Stein gaan waarskynlik stemme van die Demokrate wat Hillary en haar miljardêrsklub haat, wegrokkel.

Op sy persoonlike webwerf het Baraka gesê hy het wortels in “die Swart bevrydingsbeweging, anti-apartheid- en Sentraal-Amerikaanse solidariteitstryd”.

Sy werk was hoofsaaklik in die humanitêre sektor in samewerking met Amnestie Internasionaal in die verlede.

Sowel die speaker van die huis van verteenwoordigers, Paul Ryan, as die leier van die meerderheid in die senaat, Mitch McConnell, het verklarings uitgereik waarin kapt. Humayun Khan, aan wie ‘n brons ster en ‘n “Purple Heart” toegeken is, geprys word.

Vir die tweede keer in ‘n week het Trump se visepresidentskandidaat, Indiana se goewerneur, Mike Pence, ook ‘n verklaring uitgereik wat die angel uit die Demokrate se flou poging gehaal het.

Pence, die pa van ‘n Amerikaanse seesoldaat, het gesê kapt. Khan is ‘n held en sy familie moet deur elke Amerikaner gekoester word.

Verlede week het Pence gesê Rusland sal ernstige gevolge in die gesig staar indien hulle met Amerikaanse verkiesings inmeng.

Die swart Republikein, dr Ben Carson, wat waarskynlik ‘n pos in die Amerikaanse Departement van Gesondheid en Maatskaplike Dienste kan verwag onder ‘n Trump-administrasie, het Clinton direk gekoppel aan die duiwel twee weke gelede tydens sy toespraak by die Republikeinse Nasionale Konvensie.

Carson het gesê as ‘n dissipel van ver-linkse aktivis Saul Alinsky, is Hillary deel van die Lucifer-bende, die “oorspronklike radikales”.

Alinsky het sy boek “Reëls vir Radikales”, een van Clinton se bronverwysings aan Lucifer opgedra.