Internasionale nuus Archives - Page 113 of 464

PRAAG ontvang repliek van UNESCO, wil Kerkplein tot wêrelderfenis verklaar sien

PRAAG (die Pro-Afrikaanse Aksiegroep) het ‘n antwoord van UNESCO, die kulturele afdeling van die Verenigde Nasies, ontvang na aanleiding van ‘n klag wat dié organisasie op 9 April 2015 teen die ANC-regering aanhangig gemaak het nadat die Paul Kruger-standbeeld op Kerkplein gevandaliseer is.

In sy skrywe aan UNESCO (sien PDF-dokumente in Frans hier onder), vra dr. Dan Roodt van PRAAG dat nie net die standbeeld nie, maar die hele Kerkplein tot ‘n wêrelderfenisterrein verklaar word sodat dit die nodige internasionale beskerming kan geniet. Hy versoek insgelyks die bemiddeling van UNESCO om samesprekings tussen die Afrikanerminderheid en die ANC-bewind oor erfenis te reël.

In hul reaksie, verwys die adjunkdirekteur: kultuur van UNESCO, mnr. Alfredo Pérez de Armiñán, die saak na Suid-Afrika se permanente verteenwoordiger by UNESCO, asook na mev. Thumeka Ntloko wat Suid-Afrika se wêrelderfenisbestuur behartig.

Daar is reeds meer as 1300 mense wat PRAAG se aansoek om Kerkplein as ‘n wêrelderfenisgebied geklassifiseer te kry, ondersteun. Die organisasie versoek egter lede van die publiek om die aanlynpetisie op sy webblad www.praag.co.za te teken ten einde nog name by die aansoek te voeg.

PRAAG onderneem om mev. Thumeka Ntloko onverwyld oor die kwessie te nader. “Indien ons nie sommer gou ‘n afspraak met Suid-Afrika se wêrelderfenisbestuurder verkry nie, sal ons ‘n bevoegde hof nader vir ‘n bevel dat sy ons oor Kerkplein te woord moet staan, op grond van die UNESCO-brief, asook Suid-Afrika se verpligtinge kragtens die Wêrelderfeniskonvensie wat hy in 1997 onderteken het,” sê dr. Dan Roodt. “Terselfdertyd sal ons die hof vra om tussentydse maatreëls te tref om Kerkplein en die Krugerstandbeeld te beskerm sodat geen verdere skade aan ons erfenis deur Boerehaat-fanatici aangerig kan word nie.”

email addressed to DG afrikaner Heritage

20150511_ADG response to Dan Roodt

Zuma, Poetin hou samesprekinge

Die Russiese president, Vladimir Poetin, en president Jacob Zuma het hulle bilaterale samesprekings in Moskou afgesluit, het RSG berig.

Die twee leiers het tydens die vieringe van die 70 ste herdenking van die oorgawe van Nazi-Duitsland in die Tweede Wêreldoorlog samesprekings gevoer.

Volgens ‘n verklaring deur die Presidensie het die twee leiers die status van die Interregeringskomitee oor Handel en Ekonomiese Samewerking vir die komende BRICS-beraad in Julie in Moskou bespreek.

Poetin en Zuma het ook ooreengekom om onderlinge samewerking in mynwese, energie en landbou te verskerp.

Rusland het die oorwinning van die Geallieerdes oor Duitsland met ‘n luisterryke militêre parade gevier.

Dit was ‘n verleentheid vir die oorwinnaars oor Nazisme in die Weste wat nie die geleentheid wou bywoon nie.

Skietery in Switserland eis vyf

Die polisie in Switserland het bevestig dat vyf persone Saterdagaand in ‘n skietery in Würenlingen in Switserland dood is.

“Die slagoffers is op twee verskillende plekke in dieselfde buurt gevind,” het Markus Gisin, hoof van die Aargau-polisie, Sondag aan verslaggewers gesê.

‘n 36-jarige man, Simon B. het homself geskiet nadat hy die vier moorde gepleeg het. Volgens die polisie het die man sy pa (58), skoonma (57), swaer (32) en ‘n 46-jarige man ná ‘n stryery doodgeskiet. Die 46-jarige buurman was glo toevallig op die misdaadtoneel.

Die 36-jarige man, ‘n pa van drie, het nie saam met sy vrou en kinders gebly nie en het nie ‘n vuurwapenlisensie gehad nie.

Die polisie is ontbied nadat bure skote gehoor het. Die dorp, sowat 30 km noordwes van Zürich, het ongeveer 4 500 inwoners.

Die skieter het vorige oortredings wat verband hou met geweld en onwettige besit van vuurwapens gehad.

UKIP en Rooi Ed sink

Die Skotse leeu het gebrul! Skotland wat vroeër in ‘n referendum teen onafhanklikheid gestem het, het die Arbeidersparty in Brittanje die nekslag toegedien.

Die Arbeiders lyk asof hulle afstuur op die grootste pak slae sedert Neil Kinnock van die toneel verdwyn het in 1987. Ontleders meen dis die laaste sien van Ed Miliband asook die Tories se koalisievennoot Nick Clegg.

Praag het tydens die Skotse referendum die gees reg voorspel. Skotse nasionaliste het intussen nie gaan lê nie en die indruk van ‘n eenpartystaat gewek soos hulle saamgestaan het.

Indien amptelike voorspellings korrek is, kan Brittanje binne die volgende twee jaar ‘n geskiedkundige referendum oor voortgesette lidmaatskap van die EU te wagte wees, sowel as onderhandeling oor die onafhanklikheid van Skotland.

Volgens vroeë aanduidings het die Britse Konserwatiewe Party van die eerste minister David Cameron die verkiesing in die Verenigde Koninkryk gewen en die linkse Arbeiders met hul kommunistiese oorblyfsel van ‘n leier, Ed Miliband, is gesink.

Die voorspelling is dat die Konserwatiewe Party 316 van die 650 setels in die Laerhuis kan verower en die Arbeidersparty 239.

Die finale uitslae word later vandag verwag, maar daar word bespiegel dat Miliband sy uittrede sal aankondig na die loesing.

Die Arbeiders het sowat 50 setels van die Tories nodig gehad om enige kans te staan vir die premierskap, maar moes 17 parlementslede afstaan.

UKIP en die Liberale Demokrate, die sogenaamde LibDems, van Nick Clegg het besonder swak gevaar. UKIP kon sover net een setel inpalm.

Die party het kennelik ‘n groot fout begaan met die skorsing van ‘n partylid, Jack Sen, omdat hy Afrikaners teen swart rassiste verdedig het.

Britte vandag na die stembus

Die Britte gaan vandag stembus toe met peilings wat volgens die BBC aan die Konserwatiewe Party van premier David Cameron ’n voorsprong van 34% gee, teenoor die 33% van Ed Miliband se Arbeiders, 14% van Nigel Farage se Ukip en 8% van Nick Clegg se Liberaal-Demokrate.

Dit wil egter lyk asof die Tories selfs in ‘n koalisie met die LibDems nie ‘n volstrekte meerderheid sal kan behaal nie.

Die Noord-Ierse Unioniste en Ukip se steun sal waarskynlik nodig wees vir ‘n Torie-bewind.

Clegg, leier van die pro-Europese LibDems, het in ’n onderhoud intussen aangedui dat Cameron se beloofde referendum oor Britse lidmaatskap van die Europese Unie vir sy party onaanvaarbaar sal wees.

Die Arbeidersparty se kanse lyk beter, met die Skotse Nasionale Party (SNP) wat byna skoonskip in Skotland sal maak, alhoewel Miliband verlede week in ’n televisiedebat ’n koalisie met die SNP kategories verwerp het.

Indien die Tories ‘n minderheidsregering wil vorm, sal die Arbeiders dit dadelik glo mbv ‘n mosie van wantroue troef.

“Rooi Ed” Miliband het probeer stemme trek van armes deur te wys hoe proletaries hy leef, dit blyk nou dat hy vir sy kiesers gelieg het daaroor.

Dit het op die lappe gekom dat die armoedige kombuis waar hy saam met sy gesin afgeneem is, een van twee in sy huis is waar niemand ooit kom nie. Die ander kombuis is besonder luuks.

ISIS aanvaar verantwoordelikheid vir Texas-aanval

Die Islamitiese staat het verantwoordelikheid vir die aanval in Garland, Texas, via sy Al Bayan radiostasie aanvaar.

Die Islamitiese staat (ISIS) het in ‘n verklaring Dinsdag beweer dat dit die eerste aanval van die terroriste-groep op Amerikaanse bodem was en bygevoeg dat twee van sy “soldate” probeer het om ‘n aanval uit te voer omdat die uitstalling “negatiewe foto’s van die profeet Mohammed bevat” het AFP berig.

Die jihadistiese groep het gewaarsku dat dit die begin van ‘n terreurveldtog sal wees wat “groter en bitterder” sal word.

Beide aanvallers is doodgeskiet in ‘n parkeerterrein buite die die gebou waar die tentoonstelling gehou is.

Die twee is glo kamermaats Elton Simpson en Nadir Soofi, van Phoenix.

Dit blyk dat Simpson sedert 2006 dopgehou word. In 2011 is hy skuldig bevind aan ‘n terreur-verwante oortreding nadat vir FBI-agente gelieg het oor sy begeerte om na Somalië te reis en aan te sluit by jihadistiese groepe.

Geert Wilders het by die geleentheid opgetree. Hy is ongedeerd.

Twee mans by Moslemspotprent-uitstalling geskiet

Die polisie in Texas het twee gewapende mans by ‘n tentoonstelling naby Dallas doodgeskiet.

Die twee het glo by ‘n kunsuitstalling van spotprente oor die Profeet Mohammed opgedaag en ‘n veiligheidswag in die been geskiet, het Reuters berig.

Die wag is lig beseer in die skietery in die voorstad, Garland, maar is intussen uit die hospitaal ontslaan.

Sondag se aanval het plaasgevind in ‘n parkeerterrein van die Curtis Culwell Center, ‘n binnenshuise arena in die voorstad noordoos van Dallas.

Niemand anders is beseer nie.

Die Nederlandse anti-Islamitiese politikus, Geert Wilders het die geleentheid bygewoon. Hy het op Twitter gesê dat skote geskiet is, maar dat hy die gebou verlaat het en veilig is.

Dit is onduidelik of die skietery verband hou met Islam of die spotprente by die uitstalling het owerhede Sondag gesê.

“Ek het geen idee wie hulle is nie, behalwe dat hulle dood is en in die straat was,” het die stad se polisiewoordvoerder, Joe Harn, aan Reuters gesê.

As ‘n voorsorgmaatreël, het die polisie die motor van die verdagtes ondersoek vir enige plofstof wat dalk in die voertuig versteek kon gewees het, het Harn bygevoeg.

Die geleentheid is geadverteer as die “Muhammad Art Exhibit and Contest” en is deur Pamela Geller gereël.

Geller, wat bekend is vir haar felle kritiek teen Islam, het aan Fox News gesê dat sy besluit het om die Garlandruimte vir die kunsuitstalling te benut, want dit is waar Amerikaanse Moslem-leiers ‘n konferensie oor die bekamping van Moslemhaat ‘n week na die Charlie Hebdo-aanvalle gehou het.

In Januarie, het gewapende mans 12 mense in Parys vermoor wat by die Franse satiriese tydskrif Charlie Hebdo gewerk het.

Die meeste van die mense wat die geleentheid bygewoon het was nog in die arena toe die geweld ontvou het en was onbewus van wat gebeur het totdat die polisie die gebou binnegestorm het en almal aangeraai het om binnenshuis te bly as gevolg van ‘n skietery.

“Die eerste verdagte is onmiddellik geskiet. Die tweede verdagte is geskiet en gewond -… Hy [die gewonde] het vir sy rugsak gereik. Natuurlik het beamptes nie geweet wat in die rugsak is nie, en het hom weer geskiet. Hy is gedood,” het Garland se burgemeester Douglas Athas aan CNN gesê.

Mandela-groep toegang tot Gasa geweier

Die Russiese president Wladimir Poetin het Woensdag met lede van ‘n groep wat hulself die “Ouderlinge” noem, ontmoet nadat hulle toegang tot Gasa geweier is.

Voormalige staatshoofde en leiers van die belangrikste internasionale organisasies was in Moskou om die Oekraïne te bespreek asook wêreldvrede.

Die groep is deur Israel toegang tot Gasa geweier nadat hulle by die Palestyne wou gaan besoek aflê. Poetin het hulle op sy Nowo-Ogarjowo landgoed buite Moskou ontvang vir hul driedaagse besoek aan Rusland se hoofstad.

Die groep is gestig in 2007 deur die voormalige Suid-Afrikaanse president Nelson Mandela om hul invloed oral te laat geld.

Bestaande uit 12 lede, en tans onder leiding van die voormalige sekretaris-generaal van die VN, Kofi Annan, wil die oudstes help om die wêreld se ernstige en ingewikkelde probleme op te los.

Desmond Tutu is ook deel van die groep.

“Kollegas, vriende, Laat my u hartlik in Moskou verwelkom…Ongelukkig het die wêreld nie eenvoudiger geraak sedert julle aktief aan die politieke lewe deelgeneem het nie. Ek probeer nie sê dat dit julle nalatenskap is nie, maar bloot dat ons wêreld regtig kompleks en uiteenlopend is en met baie konfliksituasies worstel,” het die Russiese president gesê in sy verwelkomingsrede.

Afgesien van vergaderings met president Poetin, het die oudstes gesprekke met die minister van buitelandse sake Sergei Lawrof, voormalige Sowjetpresident Mikhail Gorbatsjof en die voormalige premier Jefgeni Primakof gevoer.

Die oudstes wat deel was van die besoek aan Moskou was: Martti Ahtisaari, voormalige Finse president; Kofi Annan, voormalige sekretaris-generaal van die VN; Lakhdar Brahimi, voormalige Algerynse minister van buitelandse sake, Gro Harlem Brundtland, voormalige premier van Noorweë; Jimmy Carter, voormalige Amerikaanse president, en Ernesto Zedillo, voormalige Mexikaanse president.

Annan, Ahtisaari, Brahimi en Zedillo is almal trustees wat op die raad van George Soros se Open Society Foundation dien.

Brittanje dié week lamgelê deur verkiesing

Leiers van politieke partye in Brittanje is besig om hulle verkiesingsveldtogte af te handel in die laaste naweek voor die land se algemene verkiesing.

Volgens die jongste meningspeilings loop die Konserwatiewe Party en die Arbeidsparty kop-aan-kop om die verkiesing te wen.

Kiesers sal Donderdag na die stembus gaan om die land se 56ste regering te verkies.

Daar is egter nie enige party wat sonder ‘n koalisie sal kan regeer nie, iets wat die FT verlede week as die laaste stuiptrekkings van ‘n eertydse wêreldmoondheid beskryf het.

Die Konserwatiewe Party van David Cameron en die Liberaal Demokrate regeer die land op die oomblik saam.

Die VSA kyk toenemend na Duitsland as Europese vennoot omdat Brittanje nie genoeg in NAVO wil belê nie, wat gelei tot ‘n afwatering in die verhouding van die Atlantiese tandem. Cameron se belofte dat ‘n referendum oor die EU gehou sal word, is een van sy party se sentrale temas.

Cameron vrees dat UKIP se leier, Nigel Farage, met sy vaardige retoriek van die konserwatiewe steun kan afrokkel.

Farage is teen immigrasie gekant wat ‘n “massiewe ooraanbod in die arbeidsmark” veroorsaak.

Die huidige koalisie-regering spog dat die Verenigde Koninkryk meer in buitelandse hulp uitdeel “as enige ander Westerse land”, iets wat Farage ook uitbuit.

UKIP word as “ekstreem en rassisties” deur hulle mededingers voorgehou.

Die Konserwatiewe Party hoop dat die aankondiging van die koninklike geboorte van ‘n prinses hul kanse sal vergroot op ‘n oorwinning.

Intussen het die Russiese media berig dat die baba ten minste drie dae ouer is as wat die gesin wil voorgee en dat die aankondiging ‘n “opvoering” is.

Britse politikus wat Afrikaners steun uit party geskors

‘n Britse politikus en kandidaat vir UKIP in die huidige parlementêre verkiesing in dié land, is uit sy party geskors, onder andere omdat hy simpatie vir Afrikaners en blanke Suid-Afrikaners uitgespreek het. In ‘n aanlynonderhoud het mnr. Jack Sen, die kandidaat vir Wes-Lancashire, gesê dat “Westerse regerings die etniese suiwering van mense van Europese afkoms in Suid-Afrika ignoreer”. Sy party het hom summier geskors en hul van sy uitlatings gedistansieer.

Mnr. Sen sou binnekort ‘n onderhoud aan PRAAG toestaan waarin hy sou uitwei oor ‘n globale strategie om die Westerse beskawing te red, waaronder die blanke minderheid in Suid-Afrika. Mnr. Sen het hom ook tydens die onderhoud beskryf as “onbeskaamd polities inkorrek”.

In ‘n onderhoud met die Londense Guardian wat vandag op die koerant se webblad verskyn, sê Jack Sen:

Die Suid-Afrikaanse en in die besonder, Afrikanerminderheid is na my mening ‘n bedreigde spesie. Dit word stelselmatig gejag tot op die punt van uitsterwing deur mense waaroor ons terug in 1994 vertel is dat hulle in demokratiese harmonie wou leef.

Onthou iemand nog die reënboognasiepropagandaveldtog? Dis moeilik om daardie verhewe ideaal te bereik as mense vir die pret in Johannesburg of Kaapstad doodgeskiet word. Die jagseisoen is nog oop, sover ek kan sien.

Sen word ook kwalik geneem dat hy verwys het na “gemeenskaplike bande” tussen die Arbeiderskandidaat, mnr. Ed Miliband, en prominente Suid-Afrikaanse Jode soos wyle Joe Slovo en Nadine Gordimer.

“U lesers sal moet besluit wat daardie bande is,” het hy gesê. Dit is bekend dat die Suid-Afrikaanse kommunistiese leier, Joe Slovo, en Ralph Miliband, Ed se vader, boesemvriende was.

In ‘n twiet wat blykbaar nie deur Sen self uitgestuur is nie, is verwys na Luciana Berger, as “Brittanje se jongste Joodse politikus”. Tesame met die noem van Joe Slovo en Nadine Gordimer se name, was dit genoeg om Sen van “anti-Semitisme” te beskuldig.

Sen het verder teen linkses uitgevaar en hulle van “dubbele standaarde” beskuldig as daar besluit word wie slagoffers is. Hy meen die Weste “word deur linkses beheer wie se wortels na die Oosbloklande teruggevoer kan word”.

Met betrekking tot die verwydering van Rhodes se standbeeld in Kaapstad, het Sen gekla oor die voorkeurbehandeling wat Nelson Mandela in die Verenigde Koninkryk ontvang. “Stel u voor dat daar voorgestel word dat die Mandela-standbeeld in Londen verwyder word omdat hy einlik ‘n veroordeelde massamoordenaar en terroris was?”

‘n Woordvoerder van UKIP het die party van Sen se uitlatings gedistansieer en gesê dat hy geskors is: “Jack Sen, ‘n UKIP-kandidaat, het menings uitgespreek wat op geen manier met die party se menings of dié van ons hardwerkende, toegewyde kandidate versoen kan word nie. In die lig van hierdie en ander uitsprake, word mnr. Sen met onmiddellike ingang uit UKIP geskors.”

Mnr. Sen het bevestig dat hy, ondanks sy skorsing uit die party, steeds sy breedvoerige onderhoud met PRAAG sal toestaan waarin hy oor sy standpunte sal uitwei.