Namibiese NG sinode sê nee vir Belhar

Die sinode van die NG Kerk in Namibië het Saterdag ’n buitengewone­ vergadering gereël om die wysiging van artikel 1 van die Kerkorde te bespreek én om daaroor te stem.

Dié wysiging is egter nie deur die sinode aanvaar nie, het die Republikein berig.

Die voorgestelde wysiging van artikel 1 is daarop gemik om die belydenisgrondslag­ van die NG Kerk te verbreed. Dié wysiging sal dus gemeentes­ die ruimte gun om die Belydenis­ van Belhar as ’n opsionele­ vierde belydenisskrif in hul eie gemeentes­ te aanvaar of nie.

Die Belydenis van Belhar is ’n belydenisskrif­ met eenheid, versoening­ en geregtigheid as kerntemas­, om die destydse­ Nederduits-­Gereformeerde Sending­kerk­ in Suid-Afrika se protes teen apartheid te verwoord.

Die voorgestelde­ wysiging­ van artikel 1 ­ beteken nié dat alle gemeentes­ Belhar onvoorwaardelik­ moet aanvaar nie. Die besluit wat die lede van die Namibiese­ sinode dus Saterdag­ in die gesig gestaar het, is of hulle die ruimte vir ander gemeentes­ gun om die Belydenis­ van Belhar te aanvaar.

Die voorgestelde wysiging van artikel 1 lees as volg:“Die Belydenis­ van Belhar is deel van die belydenis­grondslag van die Kerk, op so ’n wyse dat daar ruimte is vir lidmate, ampsdraers­ en vergaderinge­ wat dit as in ooreenstemming­ met die Woord van God bely, sowel as vir lidmate, ampsdraers­ en vergaderinge­ wat dit nie as ’n belydenisskrif onderskryf­ nie.”

Volgens ’n verklaring van die moderamen­ (bestuur van die sinode) van die NG Kerk in Namibië het die sinode reeds in 2006 tot die ooreenkoms­ gekom dat die inhoud van Belhar “in ooreenstemming­ is met die Skrif” en dat dit ook ooreenstem­ met die “roepingverklaring­ van die NG Kerk in Namibië”.

Die uitslag van die stemproses­ was egter vir sommige lede ’n bitter pil om te sluk. Alhoewel 58% van die lede van die sinode ten gunste van die wysiging­ gestem het, het die Algemene­ Sinode, ’n tweederdemeerderheid­­ nodig om voort te gaan met die stemproses­.

Die Algemene Sinode word gevorm deur 10 sinodes, waarvan Namibië een is; die ander nege sinodes is in Suid-Afrika. Om artikel 1 te wysig, moet elke sinode met ’n tweederdemeerderheid­ ten gunste daarvan stem. Dus, as daar slegs een sinode is wat nie ’n tweederde­meerderheid “ja-stem” verkry nie, kan die wysiging nie gedoen word nie. Twee-derdes­­ van alle gemeentes­ moet ook ten gunste van die wysinging­ stem vir die wysiging­ ­om goedgekeur te word. Op sinodale­ vlak stem elke afgevaardigde­ as individu­, onafhanklik van sy of haar gemeente­ se besluit.

Volgens dr. Kobus Gerber, die hoofsekretaris van die NG Kerk, sal die stemproses in ander nege sinodes wél voortgaan, aangesien dit belangrik­ is dat die “kerk hom in die geheel kan uitdruk”.

Prof. Nelus Niemandt, moderator­ van die NG Kerk, het ook die buitengewone­ vergadering bygewoon­.

Volgens hom het dit al voorheen by ander stemprossese­ gebeur dat daar nie ’n tweederdemeerderheid behaal is nie, maar daar later weer gestem word.

Die moderator van die Namibiese­ sinode, ds. Pine Pienaar, het nadat die uitslag van die stemproses bekend gemaak is, dit sterk benadruk dat daar verdere gesprekke op ’n strukturele­ én persoonlike vlak moet plaasvind vir die sinode om saam ’n werkbare voorstel­ te vind.

Volgens Pienaar is die kwessie van Belhar nie nou “van die tafel af” net omdat die sinode “nee” gestem het nie.

Poetin vra dat internasionale gemeenskap Krim erken

Die leiers van Frankryk en Duitsland is werklik op soek na ‘n skikking wat sal help om ‘n einde aan die konflik in die ooste van die Oekraïne te bring, het die Russiese president Wladimir Poetin gesê in sy jongste onderhoud.

Tydens ‘n onderhoud met Rossiya 1 TV-kanaal oor die deurbraak van die Minsk-ooreenkoms waarvan die VSA nie deel is nie, het Poetin gesê “Dit lyk vir my [die leiers van Frankryk en Duitsland], het ‘n opregte begeerte om ‘n kompromie te bereik en oplossings te vind wat sal lei tot die uiteindelike skikking [van die konflik] … ”

Hy het verwys na die Minsk-protokol wat die desentralisering van mag in die Oekraïne voorstel.

“Ek het die indruk dat ons vennote meer vertroue in ons het as wantroue, en in elk geval glo in ons opregtheid,” het Poetin gesê.

Poetin het weer die belangrikheid van die implementering van die Minsk-ooreenkoms benadruk wat op 12 Februarie deur die Normandië Vier – Oekraïne, Rusland, Frankryk en Duitsland – gesluit is. “As die Minsk-ooreenkoms geïmplementeer word, is ek seker die situasie sal geleidelik normaliseer,” het hy gesê.

Intussen probeer die VSA die konflik aanwakker waarin duisende burgerlikes reeds omgekom het, deur wapens aan die junta te kanaliseer. Dit is een van die hoofredes waarom die VSA nie na die vredesamesprekinge in Minsk genooi is nie.

Oor die moontlikheid van Rusland wat betrokke raak in ‘n oorlog met die Oekraïne, het Poetin gesê “so ‘n apokaliptiese scenario is skaars moontlik, en ek hoop dit sal nooit gebeur nie.”

Wat die Krim betref, het die president die internasionale gemeenskap versoek om die Russiessprekende streek se keuse om deel van Rusland te wees, te respekteer.

“Met betrekking tot nasionaliteit, het die inwoners van die Krim hul keuse gemaak [toe hulle gestem het om by Rusland aan te sluit] en dit moet gerespekteer word. Rusland kan nie anders optree nie,” het hy gesê.

Oor die juntapresident Poroshenko se stelling dat Kiëf van voornemens is om die Krim te herower, het Poetin het gesê dat sulke optrede “wraaksugtig” is. Hy het beklemtoon dat ‘n groot Europese land soos die Oekraïne moet fokus op “die bevordering van die ekonomie en sosiale sektor, en verhoudings met die suidoostelike deel van die land behoort te herstel.”

Die Oekraïne sê intussen hy gaan nie sy wapens onttrek volgens die besluite van die jongste Minsk-vredesooreenkoms nie, omdat “pro-Russiese rebelle aanhou om die skietstaking te verontagsaam”.

‘n Woordvoerder van die ministerie van verdediging in Kief, Wladislaf Seleznijof sê hulle oorweeg dit nie om swaar wapentuig te verwyder nie. Seleznijof sê die skietstaking moet vir minstens 24 uur gehoorsaam word, voor ‘n onttrekking kan begin.

Die Oekraïense minister van buitelandse sake, Pavel Klimkin het voorts met konsternasie gereageer op voorstelle van ‘n VN- of EU-vredesmag in die wegbreekrepublieke waar regeringsmagte reeds swaar verliese gelei het en honderde van sy soldate gedros het.

Ten minste 8000 mans in die Ivano-Frankivsk-streek wat deur Kiëf opgeroep is vir weermagdiens, is soek, het die nuusportaal Vesti berig. Die meeste het glo na ander lande gevlug om nie weermagdiens te doen nie.

‘n Britse regeringswoordvoerder sê die vredesmagbesluit sal alleen deur die VN se Veiligheidsraad geneem word, maar daar is geen sprake daarvan op dié stadium nie.

Klimkin het gesê hy bevraagteken die “rasionaliteit” van só ‘n besluit en gesê sy regering se versoek om ‘n buitelandse aanvalsmag op die been te bring behoort nie deur die Minsk-ooreenkoms ongedaan gemaak te word nie.

Die Oekraïne het vroeër gesê hy sal Sondag sy wapens begin onttrek, ná ‘n nuwe ooreenkoms met selfverdedigingsmagte en die Russiese weermag gesluit is.

Volgens selfverdedigingsmagte het regeringstroepe egter 29 keer op hulle stellings gevuur in ‘n poging om die skietstilstand tot niet te maak.

TUT gee R60 miljoen aan oproerige studente

Die Tshwane Universiteit van Tegnologie het 60 miljoen rand bewillig vir studentehulp om sodoende om ‘n einde te bring aan betogings by al sy kampusse, het RSG berig.

Studente het verlede maand met gewelddadige betogings begin toe daar aangekondig is dat staatsubsidies uitgeput is.

Die Nasionale Studente Finansiële Hulpskema het vanjaar 463-miljoen rand aan die TUT toegeken, teenoor die 633-miljoen rand verlede jaar.

Die Universiteit het van sy eie geld beskikbaar gemaak aan meer as vyf duisend studente wat nou met hulle studies kan voortgaan.

Die vise-kanselier, professor Lourens van Staden sê die Universiteit het meer as 74.000 studente en dié geld is slegs vir behoeftige, maar verdienstelike studente.

Balju lê beslag op 30 munisipale voertuie

Daar is op 30 munisipale voertuie van die Ngaka Modiri Molema distriksmunisipaliteit in Mafikeng beslag gelê deur die balju van die Noordwes hooggeregshof.

Die munisipaliteit skuld diensverskaffers miljoene rand.

Die beslaglegging volg nadat twee kontrakteurs regstappe gedoen het teen die munisipaliteit weens sy versuim om te betaal vir dienste wat gelewer is.

Die munisipaliteit is verlede jaar onder administrasie geplaas en die raad is ontbind weens sy onvermoë om dienste te lewer.

Die waarnemende munisipale bestuurder Kumaran Nair sê na raming benodig die munisipaliteit reeds minstens 120 miljoen rand om sy agterstallige skuld te vereffen, en die bedrag styg steeds.

Die distrik is saamgestel uit vier plaaslike munisipaliteite wat Mahikeng, Ramotshere Moiloa, Tswaing, Ditsobotla en Ratlou plaaslike munisipaliteite insluit.

Die Distriksmunisipaliteit is ‘n uitvoerende tipe met 37 raadslede, insluitende ‘n Uitvoerende Burgemeester, komitee, Speaker en Raadskomitees.

Korrupsie, wanbestuur en bedrog het die provinsiale regering genoop om verlede jaar dringend in te gryp.

Plan om selfoonseine in tronke te versper

Planne deur die Departement van Justisie om selfoonversperrings in Suid-Afrikaanse tronke te installeer, is, na wat berig word, in ‘n gevorderde stadium.

Dit SABC berig dit sal gevangenes verhinder om selfone wat ingesmokkel word, in die gevangenis te gebruik.

Die Departement het die aankondiging gedoen tydens die besoek van die Minister van Justisie, Michael Masutha, aan die St Albansgevangenis in Port Elizabeth. Die besoek is deel van Masutha se besoek aan al die regsdienste.

‘n Woordvoerder van Korrektiewe Dienste, Zacharia Modise, sê hulle moet toestelle installeer om selfone op te spoor, maar ook om die selfoonsein in die gevangenisse te versper.

Modise sê hulle wag vir goedkeuring van die verspreidingsowerheid OKOSA, waarna hulle sal begin om die toestelle te installeer, veral in korrektiewe sentrums waar daar ernstige oortredings plaasvind soos ondermeer in St Albans, in Johannesburg en in Pollsmoor.

Wie het Zuma probeer vergiftig?

President Jacob Zuma se kantoor het ‘n Sunday Times-berig dat sy vrou Nompumelelo Ntuli-Zuma hom vergiftig het, as skinderpraatjies afgemaak.

Mac Maharaj, die presidensiële woordvoerder, sê die berig is gebaseer op totale spekulasie en skinderpraatjies en hy sal nie kommentaar lewer daarop nie.
 
Die Sunday Times het berig dat drie “anonieme bronne” bevestig het dat Zuma siek was en in Junie verlede jaar in die hospitaal opgeneem is.
 
Tydens ‘n besoek aan die VSA twee maande later het hy ontdek dat hy vergiftig is. Die diagnose is glo bevestig deur die Russiese dokters in Augustus nadat die president agterdogtig was oor die Amerikaners se diagnose.

Ntuli-Zuma het die president op sy Augustus-reis na die VSA vergesel, maar het Kersfees en Oujaarsaand alleen in haar huis in Nkandla deurgebring.

Spekulasie oor die egpaar se gespanne verhouding is al vir maande ryp, en is verder verlede week aangevuur deur haar afwesigheid by Zuma se staatsrede.
 
Die koerant berig dat Ntuli-Zuma in Januarie uit Nkandla getrek het en nou in Durban met haar drie kinders woon.

Sy is steeds geregtig op voordele uit die presidensie omdat sy en Zuma nie geskei is nie.
 
Zuma se broer, Michael, het bevestig dat Ntuli-Zuma “nie lank gelede nie” uitgetrek het.

Die direkte skakel tussen Ntuli-Zuma en ‘n gifkomplot kon egter nie finaal vasgestel word nie.

Berigte dat sy ‘n buite-egtelike verhouding gehad het, het ‘n paar jaar gelede opgeduik, maar is nie afdoende bewys van die aanslag nie.

Zuma, as die voormalige hoof van ANC-intelligensie in ballingskap, glo dat net iemand in sy binnekring toegang tot sy kos kon gehad het.

Gedurende die 10 dae tussen 7 en Junie 17 Junie sou Zuma na Brasilië reis vir die opening van die Wêreldbeker-sokkertoernooi en die amptelike oorhandiging omdat Suid-Afrika die vorige gasheer in 2010 was.

Maar Zuma was so siek gedurende daardie tydperk dat hy verward en onsamehangend geraak het.

Kort na Zuma se terugkeer, het hy sy persoonlike geneesheer, dr Harold Adams, afgedank vir versuim om die regte diagnose te maak, volgens twee onafhanklike bronne.

Adams, ‘n bruinman, het hierdie week ontken dat hy afgedank is, en sê dat hy tyd nodig het om verder te studeer.

Butana Komphela het voorheen Adams se rol in die Caster Semenya-sage gekritiseer, en hom beskuldig dat hy verantwoordelik is vir die uitlek Semenya se toetsuitslae aan die media.

“Waar is die Adams? Hy is die mees gevaarlike persoon wat ek nog gesien het in my lewe, wat ander mense se inligting uitlek. Ons moet na die raad waar hy geregistreer is gaan en hierdie kwessie met hulle opneem.”

Komphela het toe gesê Adams behoort nie naby die president toegelaat te word nie.

Spinnekopsy of klipmosseltande?

Spinnekopsy mag dalk sy aanspraak verloor dat dit die sterkste natuurlike materiaal bekend aan die mensdom is, nadat wetenskaplikes bevind het dat die tande van klipmossels nóg sterker is, het Reuters berig.

Spinnekopsy word hoog geag deur wetenskaplikes op grond van sy krag en struktuur, maar wetenskaplikes in Brittanje het vasgestel dat klipmossels se tande se struktuur só sterk is dat dit met groot welslae nageboots kan word.

Dié soort struktuur kan gebruik word om F1-renvoertuie, bote en vliegtuie te vervaardig.

Die span het die gedetailleerde meganiese gedrag van die tande uit klipmossels met atoomdrukmikroskopie ondersoek, ‘n metode wat gebruik word om materiaal tot op die vlak van die atoom uit te pluis.

Hulle het gevind dat die tande ‘n harde mineraal bekend as goethiet bevat.

Die navorsing is Woensdag in die wetenskaplike joernaal, Interface gepubliseer.

Klipmossels se supertande moet oor rotsoppervlaktes rasper en alge vir voeding afskraap wanneer die gety in is.

Navorsers het ontdek dat die vesel van goethiet net die regte grootte is om ‘n sterk saamgestelde struktuur te bou.

Mosambiekse staatsamptenaar dood aangetref in Durbanse hotel

‘n Beampte van die Mosambiekse regering is dood aangetref in ‘n hotel in Durban, het die polisie in KwaZulu-Natal Sondag gesê.

Hy was glo werksaam by die Mosambiekse departement van omgewingsake en landelike ontwikkeling. Hy het ‘n konferensie in Durban bygewoon.

“Hy is dood aangetref in sy hotelkamer,” het maj. Thulani Zwane, woordvoerder van die polisie, gesê. Die man is in ‘n plas bloed aangetref. Daar het bloed by die man se neus en mond uitgekom.

Zwane kon nie die oorsaak van die man se dood bekend maak nie, aangesien die forensiese verslag nog nie vrygestel is nie.

Volgens die Sunday Independent het ‘n skoonmaker Donderdagoggend by die Blue Waters Hotel op die man se naakte liggaam afgekom. Hy het naby die bad in sy kamer gelê.

Die ambassade in Durban het met die man se familie in verbinding getree, het die koerant berig.

Lüderitz ontstoke oor naamsverandering

“Hulle kan die dorp se naam verander soos hulle wil; ons sal ‘Buchters’ bly,” was die algemene gevoel oor die moontlike naamsverandering wat Lüderitz mag tref.

Wit en swart inwoners wat met Republikein gesels het, is uiters ongelukkig oor die nuwe poging vir ’n naamsverandering en sê hulle was nie deur die dorpsraad oor die kwessie geraadpleeg nie.

Die Rally for Democracy and Progress (RDP) se voormalige raadslid op die dorpsraad en lid van die Lüderitz Erfenisraad, mnr. Reginald Hercules, het gister gesê inwoners het reeds in 2013 met pres. Hifikepunye Pohamba se aankondigings oor verskeie naamsveranderinge, dit duidelik gemaak dat hulle nie die dorp se naam verander wil hê nie.

“’n Petisie met honderde handtekeninge van beswaar was aan die burgemeester, me. Susan Ndjaleka, oorhandig. Sy is bewus van die gevoelens van die gemeenskap,” het Hercules gesê.

“As die nuwe naam op ons afgedwing gaan word, is ons volgende stap om dit in die hof te beveg,” het nóg ’n lid van die Erfenisraad wat verkies om anoniem te bly, bygevoeg.

Inwoners is ook ongelukkig omdat die kennisgewing van vergaderings met verskeie sektore op die dorp oor die kwessie slegs twee dae voor die tyd uitgereik is. Baie sê ook hulle is onseker oor die oorsprong van die hernude poging om die naam te verander.

“Mense is bitterlik ontstoke,” het ’n bekende sakepersoonlikheid op die dorp gesê.

Die voorsitter van die voormalige Lüderitzbucht-stigting, sê hy is “totaal en al negatief” oor die nuwe verwikkeling.

“Ek dink dit is baie hartseer dat die kwessie só hanteer word. Ons weet nie wie agter hierdie veldtog is nie. Ons weet nie waar dit vandaan kom nie. Hoekom is dit nou so belangrik? Wie het hierdie gesprek begin? Ek dink buitestanders het dit begin. Ek glo nie ’n ‘Buchter’ sou dit begin nie. Dit lyk asof die nuwe naam op ons afgedwing gaan word. Dit getuig van diktatorskap,” het hy gesê.

Ndjaleka wou gister geen kommentaar lewer nie, omdat sy die hele dag in vergaderings was. Haar kantoor het teen druktyd ook nog nie op vrae geantwoord nie. Daar is dus geen duidelikheid oor die oorsprong van die nuwe poging nie.

Gerugte loop egter die dorp vol dat Ndjaleka “en haar raadslede” die naamsveranderingsproses begin het.

Hoofman David Fredericks van die Soromaas tradisionele owerheid op Bethanie het oorspronklik in 2010 !Nami#nûs as ’n naam vir Lüderitz voorgestel. Die kiesafdeling is egter in 2013 so vernoem en die dorp se naam het onveranderd gebly.

Fredericks het gister gesê sy “aanvanklike standpunt” was egter dat die dorp se naam as sodanig moes verander het.

Hy het gesê hy het sedertdien met die dorpsraad vergaderings oor die kwessie, ook dié van gister, gehad.
Van die inwoners met wie Republikein gepraat het, het gesê Fredericks het by die eerste vergadering met skoolhoofde prontuit gesê die naam sal verander word. Ander het weer gesê hy het gepraat oor die oorsprong van die name Lüderitz en !Nami#nûs. Fredericks wou gister egter nie sê wat sy bydrae op die vergaderinge was nie.

“As daar dan geskiedkundige oorwegings vir die naamsverandering is, hoekom kan die dorp nie weer Angra Pequena genoem word nie?” het een inwoner gevra.

Angra Pequena is die naam wat die Portugese seevaarder Bartolomias Dias wat in 1487 op die suidelike kus geland het, die gebied genoem het.

“Ek dink nie die oorwegings vir die nuwe naamsverandering is op feite gebaseer nie,” het stigting gesê.

Polisieman, nog drie vas wat glo skape steel

Terwyl president Jacob Zuma die SANW dié naweek geloof het vir hul aandeel in landelike misdaadbekamping, is nog ‘n polisiebeampte en drie ander swartes in hegtenis geneem vir veediefstal, het die polisie in die Noord-Kaap gesê.

Priscilla Naidu, woordvoerder van die polisie, het gesê die konstabel en drie ander verdagtes het Vrydag in die Kenhardt-landdroshof verskyn. Die saak is tot 25 Februarie uitgestel wanneer die verdagtes om borg sal aansoek doen.

Die polisie het verlede week ‘n wenk ontvang oor moontlike veediefstal in die Kenhardt- en Keimoes-areas. Twee verdagtes, insluitend die polisiebeampte, is in hegtenis geneem nadat ‘n bakkie met ses skape agterop deur die polisie van die pad af getrek is.

Volgens Naidu het die twee ander verdagtes in ‘n VW Polo gery en van die toneel gevlug toe hulle die polisie gesien het.

Hulle is in Kakamas voorgekeer en in hegtenis geneem. “Hulle het glo die twee skape wat in die VW Polo was langs die pad afgelaai.”