Karin Roodt – Bladsy 108

Agang se uitdaging: Zuma reageer

President Jacob Zuma het gereageer op Agang-leier Mamphela Ramphele se oproep om hom sy persoonlike finansies bekend te maak.

In ‘n verklaring van die presidensie Woensdagaand, het Zuma gesê hy doen jaarliks aan die Kabinet verslag, volgens bepalings in die Grondwet.

“Die Grondwet van 1996 en die Uitvoerende Lede Etiek, 1998, skryf die aard, inhoud en vorm waarin lede van die Kabinet en die Uitvoerende Rade hul finansiële belange jaarliks openbaar,” het die verklaring gelui.

Vroeër het Ramphele op ‘n perskonferensie gesê dat ‘n gebrek aan deursigtigheid oor Zuma se nettowaarde openbare wantroue in hom voed.

“Ek doen ‘n beroep op President Zuma om sy state onmiddellik te publiseer Wat is daar om weg te steek?” het sy gevra aan verslaggewers in Johannesburg. “Suid-Afrikaners verdien ‘n president wat ‘n goeie voorbeeld vir die res van die land stel om te volg.”

Sy het gesê die Parlement verwag van alle lede hul private finansiële belange te openbaar.

“President Zuma gebruik ‘n gerieflike tegniese foefie om hierdie vereiste te systap. Vanaf sy inhuldiging … het die president die kwessie vir meer as 1565 dae tot op datum gesystap.. Met elke dag wat verbygaan groei die agterdog oor sy integriteit,” het Ramphele gesê.

Sy het gesê dat sy haar eie finansiële sake is openbaar vir die land om te ondersoek, in lyn met die behoefte aan aanspreeklikheid en om ‘n voorbeeld vir Zuma te stel.

Ramphele het gesê haar netto waarde tot 27 Junie vanjaar was meer as R55 miljoen.

Sy het aandele ter waarde van R1.38 miljoen met Anglo American, Gold Fields, Sibanye en die PTI Fonds. Haar primêre woning in Kampsbaai, Kaapstad, is R10 miljoen werd. Daar is R1, 146139 in aftree-annuïteite en R1, 574064 in ‘n voorsorgfonds. Haar familietrust hou R30 miljoen en haar beleggingstrust R10.9 miljoen.

Ramphele het gesê haar rykdom sal haar nie distansieer van Suid-Afrika se armes nie.

“Ek is een van die baie leiers van hierdie land, soos die [voormalige] president [Nelson] Mandela, wat nie arm is nie,” het sy gesê. “Dit is nie ‘n hindernis vir skakeling met arm mense nie. Wat ‘n struikelblok is, is die misbruik van mag en steel van arm mense soos die regering konsekwent doen.” – Sapa

Kommissie verwerp berigte dat Seriti opsetlik wapenondersoek sloer

Die Seriti Kommissie van Ondersoek na Wapenaankope sit vandag sy openbare verhore voort, nadat hy nie kommentaar wou lewer op berigte dat die kommissie opsetlik vertraag word nie.

Die woordvoerder van die kommissie, William Baloyi sê hy sal homself nie verwerdig om kommentaar te lewer op die berigte wat in Beeld verskyn het nie.

Drie bronne voer aan dat die ondersoek reeds einde verlede jaar afgehandel kon gewees het. Daar word beweer dat die proses uitgestel is ten einde die ANC te beskerm en president Jacob Zuma ‘n tweede termyn as president van die party tydens die Mangaung-konferensie te waarborg.

Volgens die berigte verhinder die voorsitter, Regter Willie Seriti en die Navorsingshoof, Fanyana Mdumbe voortdurend die kommissie se vordering. – RSG

Wilgehof: Geen bewyse van rassisme nie, maar departement hou vol

Die Vrystaatse Onderwysdepartement gaan voort met die ondersoek na beweerde rassisme deur ‘n graad-een onderwyser teen ‘n leerder van die Laerskool Wilgehof in Bloemfontein, in weerwil daarvan dat die Suid-Afrikaanse Menseregtekommissie geen bewyse van mishandeling kon vind nie.

Die Suid-Afrikaanse Menseregtekommissie (SAMRK) se woordvoerder Isaac Mangena sê die leerlinge, onderwysers en die Skoolbeheerliggaam (SBL) se voorsitter is tydens ‘n voorlopige ondersoek ondervra.

Hy sê dié aan die lig gebring dat die onderwyser na bewering privaat rassistiese uitlatings teenoor ‘n kollega in die skool se administrasie-afdeling geuiter het, wat glo ‘n swart werknemer gehoor is.

Mangena sê die kwessie het betrekking op werksplekdiskriminasie en moet hanteer word deur die werkgewer, die SBL, in terme van artikel 6 van die Wet op Diensbillikheid.

Die onderwyser is steeds geskors hangende die SBL se ondersoeke. Die onderwyser was die derde Wilgehof werknemer wat weens beweerde rassisme geskors is na Leonard MacKay en die skool se skoolhoof Fanie Roelofzze.

Langer skooldag in die vooruitsig

Skooldae kan met tot ’n uur per dag gerek word om leerlinge die geleentheid te gee om ’n derde inheemse taal aan te leer.

Elke skooldag sal tussen 24 minute en ’n uur langer wees, het die Cape Times berig.

Dit is vervat in die konsepbeleid wat skole sal dwing om ’n bykomende inheemse taal aan te bied.

Volgens dié beleid sal ’n derde taal geleidelik vanaf gr. R tot 12 aangebied word.

Angie Motshekga, minister van basiese onderwys, het twee weke gelede gesê die beleid sal van volgende jaar by 10 skole in elke distrik van elke provinsie ingestel word.

Gr. R tot 2 se leertyd sal met twee uur ’n week verleng word, terwyl gr. 3-leerlinge se skooldag met drie uur per week verleng sal word.

Gr. 4 tot 12-leerlinge sal elke dag ’n uur langer by die skool moet bly.

Bradley Manning kry 35 jaar

Bradley Manning, die Amerikaanse soldaat wat beskuldig word van die grootste lekkasie van geklassifiseerde inligting in die geskiedenis van die VSA, is Woensdag tot 35 jaar tronkstraf gevonnis.

Die 25-jarige Bradley Manning is in ’n krygshof daarvan aangekla dat hy meer as 700 000 dokumente aan WikiLeaks verskaf het.

Kol. Denise Lind het Manning verlede maand skuldig bevind op 20 aanklagte, insluitend spioenasie en diefstal.

Hy sal ook oneerbaar uit die Amerikaanse weermag ontslaan word en sal ’n gedeelte van sy salaris verbeur, het Lind gesê.

Manning het in 2010 as ’n intelligensie-ontleder by ’n Amerikaanse weermagbasis in Bagdad, Irak, gewerk. – AP

Hof beslis dat Moebarak vrygelaat word

’n Hof in Egipte het beslis dat oudpres. Hosni Moebarak vrygelaat moet word, het ’n beampte gesê.

Dit is nie bekend of die aanklaers teen die beslissing gaan appelleer nie.

Die uitspraak kom na die verhoor waarin Moebarak tereggestaan het op aanklagte dat hy geskenke van ’n staatsbeheerde koerant aanvaar het.

Die 85-jarige Moebarak is sedert April 2011 in aanhouding.

Moebarak word ook saam met Habib Adly, sy voormalige minister van binnelandse sake, en ses polisiebevelvoerders verhoor op aanklagte wat verband hou met hul administrasie voor die opstand teen sy bewind en die die moorde op betogers. Dié verhoor is tot 25 Augustus uitgestel.

Egipte loop steeds onder hewige geweld deur.

Hernieude oproerigheid het teen die oudpresident se opvolger, Mohamed Morsi, uitgebreek.

Minstens 750 mense is verlede week oor ’n tydperk van vier dae dood. – AP

Chemiese aanval in Sirië eis meer as 1000 lewens

Die Verenigde Nasies (VN) se Veiligheidsraad het gesê ‘n verduideliking is nodig oor ‘n beweerde chemiese wapenaanval op burgerlikes in die voorstede van Damaskus Woensdag. Die Raad het nie uitdruklik gevra vir ‘n ondersoek deur die VN-ondersoekbeamptes in Sirië nie.

Die aanval kom te midde van ‘n besoek van VN-inspekteurs aan Sirië om bewerings van chemiese aanvalle deur sowel regerings- as rebellemagte te ondersoek en word beskryf as die ergste nog in die konflik wat reeds 29 maande duur.

Meer as 1 300 mense is Woensdag dood in aanvalle naby Damaskus.

Die Veiligheidsraad het na ‘n noodvergadering gesê duidelikheid oor die aanval sal verkry moet word.

Terwyl die Raad nie uitdruklik om ‘n VN-ondersoek gevra het nie, het die VN se sekretaris-generaal Ban Ki-moon daarvoor gevra. Lede wat graag Westerse ingryping in Sirië wil sien, het die oproep verwelkom.

“Die lede van die Veiligheidsraad verwelkom ook die vasberadenheid van die sekretaris-generaal om ‘n deeglike, onpartydige en vinnige ondersoek te verseker,” het Argentinië se VN-ambassadeur, Maria Cristina Perceval, voorsitter van die raad van hierdie maand gesê.

Sirië se opposisie het die Siriese president Bashar al-Assad se magte daarvan beskuldig dat hulle honderde mense, soveel as 1300, tydens ‘n aanval Woensdag dmv gas gedood het. Assad se regering ontken die gebruik van chemiese wapens.

Die Verenigde State van Amerika, Brittanje en Frankryk is van die sowat 35 lande wat vra dat die hoofondersoekbeampte Ake Sellstrom en sy span in Sirië die voorval so gou as moontlik ondersoek.

VN-diplomate egter gesê dat Rusland en China gekant was teen taal wat ‘n duidelike oproep vir ‘n VN-ondersoek bevat. ‘n Vroeëre Westerse verklaring, gesien deur Reuters, het gevra dat die Verenigde Nasies “dringend die stappe wat nodig is neem sodat die aanval ondersoek word deur die VN-sending.”

Rusland se ministerie van buitelandse sake het vir ‘n eerlike en professionele ondersoek gevra na berigte dat troepe lojaal aan Assad verantwoordelik vir die vermeende aanval was.

Moskou meen dat rebelle die beweerde aanval kon uitgevoer het om internasionale optrede uit te lok.

Dit was nie onmiddellik duidelik hoe die Siriese regering sal reageer op versoeke dat Sellstrom se span die beweerde voorval ondersoek nie.

Aanvallers ‘praat Afrikaans met swaar aksent’

‘n Plaaslike sakeman verkeer steeds in ‘n bedenklike toestand, nadat hy verlede week in die vroeë oggendure deur vier aanvallers by sy huis in Nigel oorval is.

Pedro Nortjé (50), eienaar van EMG Electrical, is eers vasgebind en daarna in die buik geskiet. Volgens Nigel se SAPD-woordvoerder A/O Madeleine von Wielligh, is Pedro met ‘n rewolwer gewond, waarvan die koeël een van sy longe, sowel as lewer gepenetreer het.

‘n Noodoperasie is later die dag uitgevoer. Die voorval het omstreeks 02:00 plaasgevind terwyl sy kinders in hul kamers geslaap het.

Volgens A/O Von Wielligh word ‘n saak van huisroof en poging tot moord deur die Misdaadondersoekdiens (MOD) van Nigelspeurtak ondersoek.

Niemand is nog in verband met die voorval aangekeer nie. A/O Von Wielligh het gesê die aanvallers, wat volgens die slagoffer se seun Afrikaans met ‘n swaar aksent gepraat het, se gesigte was onder balaklavas verberg.

Kwelvrae oor Heidelberg se brandbestryding

Kwelvrae oor die beskikbaarheid van slegs een brandweerenjin vir die Lesedi Munisipale gebied het weer ontstaan nadat ‘n huisbewoner van Jordaanpark in Heidelberg tevergeefs die brandweer se hulp verlede maand probeer ontbied het.

‘n Veld wat aan huise in Bosbokstraat grens, het gebrand en Corné Botha het vreesbevange toegekyk hoe die vlamme al nader aan haar huis beweeg. Sy en haar drie kinders was alleen tuis toe sy die brandweer skakel. Die persoon aan diens het egter aan haar gesê dat daar nie ‘n grasbrand voertuig beskikbaar is om haar te kom help nie.

Volgens Corné het sy en haar kinders van 21:30 tot ongeveer 24:00 die vlamme van die balkon af met emmers water probeer blus. HERAUT het met brandweerhoof Herman Lombard gaan praat oor die situasie. Volgens Mnr Lombard beskik die brandweer net oor een medium enjin wat uitsluitlik by ongelukstonele, fabrieksbrande, huisbrande en petroldepots hulp verleen. ‘n Tweede kleiner enjin wat vir grasbrande geoormerk is, word tans aan Devon geleen.

Volgens gerugte word die brandweer se begroting elke jaar deur die munisipaliteit afgekeur. In die berig van HERAUT op 26 Junie, het Me Cynthia Mokoena (Uitvoerende Bestuurder: Gemeenskapsdienste) van Lesedi Plaaslike Munisipaliteit telefonies aan HERAUT gesê dat een of twee brandweervoertuie genoegsaam vir die Lesedi gebied is.

Mnr Lombard stem nie saam nie en sê volgens Lesedi se populasie en vierkante kilometer wat bedien word, stem die hoeveelheid voertuie nie ooreen met die Suid-Afrikaanse Nasionale Standaarde 10090 nie.

Wildstroper kry 14 jaar vir twee swartrenosters

‘n Swart wildstroper wat in Januarie ‘n swartrenosterkoei en haar kalfie in die wildtuin doodgemaak en onthoring het, is Donderdag 14 jaar tronkstraf in die plaaslike streekhof opgelê.

Leonard Mhlongo (21) het die staat se werk aansienlik makliker gemaak deur op die aanklagte teen hom skuldig te pleit. Dit is hoekom die saak so vinnig afgehandel is.

Leonard en Kenneth Sibiya (28) is op 19 Januarie by Tshokwane in die Nasionale Krugerwildtuin (NKW) vasgetrek. Leonard het drie renosterhorings in sy besit gehad en die onthoringde karkasse van ‘n swartrenosterkoei en haar kalfie is kort hierna in die omgewing gekry. Die kalfie het net ‘n stompie gehad, maar is nie ontsien nie.

Leonard is nooit borg toegestaan nie omdat hy nie ‘n paspoort kon toon nie. Kenneth het wel borg gekry en het nooit teruggekeer vir sy verhoor nie. Daar is tans ‘n lasbrief uit vir sy arrestasie. Leonard het skuldig gepleit en gesê dat ‘n derde verdagte die vuurwapen waarmee die renosters geskiet is, by hom gehad het. Dié kon daarin slaag om die dag van hul arrestasie daarmee na Mosambiek te vlug.

Leonard is op twee klagtes van onwettige jag in die wildtuin asook die onwettige betreding daarvan, aangekla.

Die landdros, mnr. Eddie Hall, het sy skulderkenning bekragtig en hom gevolglik 10 jaar tronkstraf vir die onwettige jag van die koei, asook ‘n verdere agt jaar vir die kalfie opgelê. Hy het geëis dat dit samelopend uitgedien moet word. Leonard is ook ‘n verdere vier jaar vir die onwettige betreding van die wildtuin opgelê.

Maj. genl. Johan Jooste, wat aan die stuur staan van teenstropings-operasies in die wildtuin, het die senior-staatsadvokaat, me. Isabet Erwee, asook die polisie se ondersoekbeamptes, met dié goeie vonnis gelukgewens.

“Ek wil ook my eie span gelukwens met hul aandeel in die arrestasie. Ons gaan hierdie oorlog wen en verwelkom sulke verwikkelinge,” het hy gesê. Hy het ook samewerking deur Mosambiekse owerhede verwelkom. – looklocal.co.za

Reuse kinderporno-netwerk in SA oopgevlek

Die polisie het Suid-Afrika se grootste kinderpornografienetwerk glo oopgevlek na die arrestasie van die ses mense. Die netwerk het skakels na Kanada, die Verenigde Koninkryk, die VSA, Wes-Europa en Australasië.

‘n Skoolhoof (wat ook ‘n bekroonde skrywer is), twee onderwysers, ‘n prokureur, ‘n dermatoloog en sakemanne van regoor die land is in hegtenis geneem.

Die polisie ondersoek ‘n verdere 26 mense en meer arrestasies sal volg.

Die polisie-ondersoeke het seksuele uitbuiting van honderde kinders blootgelê.

In ‘n operasie wat ervare speurders beskryf as “siek”, word kinders so jonk as vyf ingespan om seks te hê met mekaar en volwassenes.

Hulle ondersoek tans of enige kinders uit Suid-Afrika betrokke is by die netwerk se bedrywighede.

Baie van die kinders ly ook onder uiterste vorme van geweld. Wetstoepassers ondersoek of enige van die kinders vermoor is.

Diegene na aan die ondersoek het aan The Times gesê dat die Suid-Afrikaanse polisie deur ‘n buitelandse polisiëringsagentskap, deur middel van Interpol, bygestaan is.

Daar is op rekenaars tydens klopjagte beslag gelê en die polisie het die adresse van honderde beweerde pedofiele van regoor die wêreld bekom.

Ervare plaaslike beamptes van verskillende eenhede het ‘n hoë-profiel-taakspan gevorm.

Onder toesig van die nasionale speurhoof is lasbriewe om huise, skole, regs-en mediese praktyke en besighede te deursoek, uitgereik.

Donderdag, het die polisie die hoof van ‘n elite-privaatskool in Nelspruit, Mpumalanga, ‘n onderwyser in Florida, wes van Johannesburg, ‘n onderwyser in Carletonville, ‘n Pretoriase dermatoloog, en ‘n senior regsbeampte in Noordwes vasgevat.

Huise in KwaZulu-Natal, Oos-Kaap, Wes-Kaap en die Vrystaat, is besoek en daar is beslag gelê op rekenaars, DVD’s, boeke, tydskrifte, rekenaargeheuestokkies, kameras, videokameras en ander digitale opneemtoestelle .

Die 43-jarige skoolhoof is glo in besit gevind betrap van DVD’s van kinderpornografie. Hy is die ontvanger van ‘n nasionale letterkundeprys.

‘n Woordvoerder van die polisie luitenant-generaal Solomon Makgale het gesê almal wat in hegtenis geneem is, is mans. Diegene wat in hegtenis geneem is, het skakels na ‘n globale kinderpornosindikaat. – timeslive.co.za

VF+ bevraagteken grondwetlikheid van EFF

Haatspraak, ‘n beleid gegrond op rassisme en ‘n ekonomiese beleid van nasionalisering druis in teen die letter en gees van Suid-Afrika se Grondwet en die Vryheidsfront Plus het in die lig hiervan by die Verkiesingskommissie (OVK) ten sterkste beswaar aangeteken teen die registrasie van Julius Malema se politieke party, die Ekonomiese Vryheidsvegters (EVV).

Volgens mnr. Pieter Groenewald, die VF Plus se voorsitter, is ‘n sterk bewoorde brief hieroor aan die Verkiesingskommissie (OVK) gestuur waarin die kommissie versoek word om Malema se registrasie-aansoek om grondwetlike redes af te keur. Individue en partye het tot einde verlede week geleentheid gehad om beswaar teen die registrasie aan te teken.

“Die EVV propageer die nasionalisering van grond, myne, banke en ander bates sonder enige vergoeding, en in besonder op ‘n rasse-grondslag. Dit is ongrondwetlik.

“Malema is reeds deur die hooggeregshof van Suid-Afrika skuldig bevind aan haatspraak oor die sing van die gewraakte lied ‘Shoot the Boer’, wat sedertdien verbied is en tot haatspraak verklaar is.

“Met die sing van die lied het Malema rasse-polarisasie geskep en emosie opgejaag teenoor ‘n spesifieke ras- en etniese groep wat ook ongrondwetlik is.

“Tot nou toe het Malema as leier van die EVV geen berou getoon nie. Die VF Plus glo dat hy met sy ongrondwetlike optrede sal voortgaan en dat hy sy party sal misbruik as ‘n voertuig vir soortgelyke diskriminerende optrede en beleidsrigtings.

“Daarbenewens is die woord ‘Vegters’ of ‘Fighters’ in Engels nie geskik vir ‘n demokratiese bestel waar politieke partye verkiesings op ‘n geordende en demokratiese wyse voer nie. Art. 16 van die Verkiesingskommissiewet stel dit duidelik dat enige naam of afkorting wat die propageer of aanhitsing van geweld of haat voorstel, nie aanvaarbaar is nie,” sê mnr. Groenewald.

‘n Verdere versoek is ook aan die OVK gerig waarin die VF Plus beswaar aanteken teen die Engelse afkortings van die name van die VF Plus (FF Plus in Engels) en die EVV (EFF in Engels) aangesien dit tot verwarring onder die publiek kan lei.

Mnr. Groenewald sê die VF Plus ervaar reeds dat verwarring bestaan op onder meer netwerke van die sosiale-media.

“Die VF Plus sal oor hierdie aangeleenthede die nodige bewyse aan die Verkiesingskommissie voorlê indien dit benodig word. Oor die naamkwessie verwag ons ook ‘n deeglike verduideliking van die (OVK) oor sy besluit.

“Tot nog toe is die VF Plus die enigste party wat die registrasie van Malema se party teenstaan. By ons is daar geen twyfel nie dat dit ongrondwetlik is en die OVK sal gewis sy mandaat versaak indien die registrasie van die EVV goedgekeur word, sê mnr. Groenewald.

Mbeki onttrek van Seriti-ondersoek weens geld

Max Boqwana, wat oudpres. Thabo Mbeki en sy voormalige kabinetministers by die Seriti-kommissie van ondersoek verteenwoordig, het hom aan die verrigtinge onttrek.

Die Kommissie sê die onttrekking van sy regsverteenwoordiger sal geen invloed op sy werksaamhede hê nie.

Woordvoerder vir die kommissie, William Baloyi, sê: “Eintlik is daar geen impak op die kommissie nie. Dit is nie verpligtend vir die getuies om hul regspanne te bring nie. Dit is net ‘n opsie.“

Mbeki het verduidelik dat hy onttrek hangende ‘n aansoek om geldelike hulp van die staat.

Mbeki se woordvoerder, Mukoni Ratshitanga, sê Mbeki se posisie sal hersien word as die regering ‘n besluit oor regshulp aan die voormalige president geneem het.

Adv. Tshepo Sibeko, getuienisleier, het bevestig dat daar vergaderings met Boqwana was.

“Ons het geen beswaar teen sy onttrekking nie.”

Regter Willie Seriti, voorsitter van die kommissie, het gesê die regsverteenwoordiging van getuies is buite die grense van die kommissie.

Getuies kan hul eie regsverteenwoordiging hê, waarvoor hulle self moet betaal.

Pres. Jacob Zuma het die kommissie in 2011 aangestel om beweerde korrupsie in die multimiljardrand-wapentransaksie van 1999 te ondersoek.

Kaapstad: Moslems, ANC, Cosatu betoog teen geweld in Egipte

Duisende betogers sal vanoggend in Kaizergracht in Kaapstad byeenkom vir ‘n optog na die parlement om beswaar te maak teen die dood van betogers in Egipte.

Woensdagoggend se optog word gelei deur die Moslem-regsraad (MJC) asook ander organisasies, waaronder die ANC en Cosatu, wat hulle daarby sal aansluit.

“Die doel van die optog is om te protesteer teen die gewelddadige staatsgreep wat plaasgevind het drie weke gelede in Egipte en ook die gevolglike massamoord van betogers teen die staatsgreep. As Suid-Afrikaners voel ons dit is ons verantwoordelikheid om te reageer op ‘n ondemokratiese proses en die staatsterrorisme in Afrika,” het die MJC–woordvoerder Naboweya Mallick gesê.

Vroeër hierdie week, die Claremont Main Road-moskee in Kaapstad gevra vir ‘n einde aan die geweld in Egipte en vir die herstel van demokratiese regering.