Limpopo – Bladsy 5 – praag.co.za

Betogers in Limpopo maak amok oor winkelsentrum

Honderde oproeriges van “The Oaks”, ‘n lokasie in die noorde van Limpopo moes deur die polisie uiteen gejaag word met rubberkoeëls.

Die betogers het opgeruk om omdat ‘n beloofde winkelkompleks in die gebied nie gebou word nie. Hulle kla oor ‘n tekort aan winkels.

Die Departement van Landelike Ontwikkeling en Grondhervorming vertraag glo die aansoek van ‘n ontwikkelaar om ‘n winkelkompleks in die gebied op te rig.

Die ontwikkelaar en die Departement het gesê hulle handel die nodige dokumentasie tans af sodat bouwerk aan die winkelsentrum bespoedig kan word.

Lede van die polisie se Openbare Orde-eenheid moes van rubberkoeëls gebruik maak om orde te herstel nadat die polisie deur die betogers met klippe bestook is.

Inwoners het deurgang na Hoedspruit, Lydenburg en Tzaneen versper. Die pad is Donderdag gesluit en motoriste is aangeraai om van alternatiewe roetes gebruik te maak.

Die oproemakers is intussen vir openbare geweld in hegtenis geneem.

Weermag gereed vir vloede

Die Nasionale Weermag is op ‘n gereedheidsgrondslag geplaas om hulp te verleen in vloedgeteisterde gebiede van Suid-Afrika.

Die departement van Samewerkende Regering het bevestig dat die Weermag gereed is om in noodgebiede te ontplooi.

Die departement sê die nasionale Rampbestuursentrum het provinsiale en munisipale rampbestuursentrums ingelig dat hulle voorbereidings moet begin tref om bystand te verleen.

Die Suid-Afrikaanse Weerdiens het vroeër reeds gewaarsku dat nog reëns in Gauteng, Noordwes, Limpopo, Mpumalanga en KwaZulu-Natal sal uitsak.

Vloedgeteisterde gebiede het reeds die lewens van vier mense geëis, 12 is gered en een persoon word nog vermis. Tientalle mense is ook dakloos gelaat en talle paaie en brûe het weggespoel.

Swaar reën demp Krugerwildtuin, Oscar

Daar is nog geen einde in sig vir die deurdringende reën wat dae reeds oor die noordelike en oostelike dele van die land uitsak nie, het RSG berig.

Dit reën reeds ‘n week lank in Gauteng en Mpumalanga. Die Suid-Afrikaanse Weerdiens sê inwoners van dié twee provinsies moet hul regmaak vir ‘n nat naweek.

Kanse vir reën wat oor Limpopo, Noordwes, Gauteng, Mpumalanga en Kwa Zulu-Natal sal uitsak Sondag is 80 persent.

Die Nasionale Krugerwildtuin het die hek by Krokodilbrug en vier ander kampe weens oorstromings gesluit.

Volgens ‘n woordvoerder van die wildtuin, William Mabasa, word die meeste paaie en brue in die suide van die wildtuin geraak deur vloedgevaar en is dit gesluit om moontlike ongevalle te voorkom.

Die swaar reën in Pretoria sal waarskynlik lede van die publiek ontmoedig om die Oscar Pistorius-verhoor by te woon.

Die saak word Vrydagoggend halftien in die Noord-Gautengse hooggeregshof hervat. Mense het Donderdag sowat drie banke in die aangrensende hofsaal volgesit, maar minder word Vrydag verwag.

Die nat toestande bied ook tegniese uitdagings vir fotograwe en die uitsaai-media van regoor die wêreld. Die sewende staatsgetuie, dokter Johan Stipp sal binnekort verder kruisondervra word.

Intussen word berig dat Michelle Burger en haar man Charl Johnson die meeste aandag in die aanlyn-media kry. Volgens die media monitoreringsmaatskappy, Data Driven, kry die egpaar sowat 70 persent van die aandag.

Die twee was lank in die getuiebank en het onder kruisondervraging deurgeloop. Kevin Lerena, wat getuig het oor die voorval toe Pistorius ‘n vuurwapen in ‘n restourant laat afgaan het, het elf persent media aandag gekry.

Dr. Johan Stipp se getuienis oor hoe Pistorius Reeva probeer bybring het, het agt persent gekry.

Die media gebruik ook die woord skuldig, met verwysing na die saak, tien keer meer as onskuldig.

Sommige Limpopo-skole het nog nie handboeke nie

Sommige skole in Limpopo het nog nie hul handboeke ontvang vir die 2014-skooljaar nie, het Rapport Sondag berig.

“Hulle [die onderwysdepartement] maak ‘n bohaai oor die radio om te sê dat die boeke afgelewer word, maar dit is nie so, en dit is ‘n probleem,” het Sipho Mothobuka gesê. Hy is die skoolhoof van Laerskool Moloketla, een van die skole wat geraak word.

‘n Wiskunde-onderwyser by die skool, Daniel Ramatladi , het gesê onderwysers gskryf soms die hele handboek op die bord.

Moloketla Primêre was een van agt skole in die Capricorn en Mopani-distrikte in Limpopo wat joernaliste besoek het om te bepaal of handboeke afgelewer is vir die 2014-skooljaar.

Die mediaspan van Rapport se susterkoerant, City Press, het bevind dat daar ernstige tekorte aan handboeke in alle grade en vakke is, alhoewel dit nie naastenby so erg soos die tekorte in die provinsie in 2012 is nie.

Die skole wat nog steeds wag op handboeke is Moleketla Laerskool , Khethapoye Laerskool , Thaphane Laerskool , Modumela Sekondêr, Kabelo Sekondêr en Moremotse Sekondêr.

Elia Mhlanga, ‘n woordvoerder vir die departement van basiese onderwys, het gesê die tekorte kan ‘n gevolg van die migrasie van studente tussen die verskillende provinsies aan die begin van die jaar wees.

Nasionale hoof van okkulte-eenheid waarsku oor toename landwyd

Die nasionale hoof van die polisie okkulte-misdaadeenheid, kolonel Attie Lamprecht sê daar was die afgelope tyd landwyd ‘n toename in misdade wat met die okkulte verband hou.

Die toename in moetiemoorde het ook tot oproer in Motupa, Moleketla en Kubjana in Limpopo gelei. Die provinsie spog met ongeveer 250 moetiemoorde per jaar.

Navorsers soos Oliver Becker het reeds daarop gewys dat dié moorde verbind kan word aan sokker en politiek regoor Afrika.

Daar is veral in Gauteng op die liggame van kinders afgekom waarvan liggaamsdele verwyder is, het RSG berig.

Die polisie vermoed dat hulle vir moetierituele vermoor is. Daar was die afgelope maande 78 voorvalle in Johannesburg wat met daarmee verbind kan word.

Van dié gevalle was 48 strafregtelik vervolg. Lamprecht het ‘n beroep op gemeenskappe gedoen om bewus te wees van die probleem.

Oproer tref Limpopo en Gauteng

Die nasionale polisiekommissaris, Riah Phiyega sal na verwagting besoek aflê in Ha-Kutama, net buite Makhado in Limpopo, nadat oproer en geweld in die gebied uitgebreek het.

Gemeenskapslede het vier huise, twee voertuie en twee polisiemotors tydens die oproerogheid in ligte laaie gelaat.

Die ontstoke inwoners eis dat nege mense in hegtenis geneem word vir die moord op ‘n 38-jarige swart man in ‘n nabygeleë woongebied. Hulle glo die nege is vir die man se dood verantwoordelik.

Die situasie in die swart woongebiede buite Tzaneen in Limpopo is steeds kalm.

Die polisie in Limpopo het gesê dat die eenhede wat openbare orde handhaaf steeds die gebied monitor.

Relela en Kubjana is verlede week in chaos gedompel toe ‘n oproerige skare ‘n satelliet-polisiestasie aangeval het.

Die stasie in Relela het kwaai onder vandale deurgeloop. Vyftien polisiebeamptes is beseer en 19 polisievoertuie is beskadig.

Drie mense is tydens die oproer dood. Inwoners sê hulle is deur die polisie doodgeskiet.

Nege verdagtes sal môre op aanklagte van openbare geweld, saakbeskadiging en brandstigting in die plaaslike landdroshof verskyn, en nog nege is steeds in aanhouding tot hul volgende hofverskyning aanstons.

Die munisipaliteit van Mogale City het intussen die gewelddadige oproer deur Heuningklip-inwoners naby Krugersdorp veroordeel.

Die skare oproeriges het die N14 met brandende buitebande versper in ‘n poging om grond te beset.

Geweld het losgebars het toe personeel van ‘n privaat veiligheidsmaatskappy hulle van die grond afgejaag het.

Vier mense is beseer, toe die Rooimiere met rubberkoeëls op die skare losgetrek het.

‘n Woordvoerder van Mogale City sê die grond sal beskikbaar gemaak word aan gesinne wat van plase in die omgewing afgesit is.

Phiyega slaan politieke heksevure in Limpopo dood

Die liggaam van ‘n driejarige kind is gevind naby die onrusgeteisterde Rhelela buite Tzaneen in Limpopo. Die woedende gemeenskap het ‘n winkel aan die brand gesteek in Khubyana naby Rhelela.

‘n Plaaslike raadslid sê die kind se liggaam is gevind nadat drie kinders tussen drie- en vierjaar oud, Woensdagaand as vermis aangemeld is.

Die polisie in Tzaneen vermoed nie enige gemene spel in verband met die dood van ‘n driejarige kind nie.

Die Nasionale Kommissaris van Polisie Riah Phiyega het Woensdag na Limpopo gereis om te probeer om die situasie te ontlont.

Sy het die gebied besoek nadat betogers die naweek ‘n polisiekantoor aangeval het oor die dood van ‘n 15-jarige seun.

Die Groter Tzaneen se raadslid, Moses Mahasha sê die kind is in ‘n kattebak van ‘n motor van ‘n plaaslike swart sakeman gevind. Daar word beweer dat hy deur die polisie doodgeskiet is.

Dit is in dieselfde gebied waar ‘n gewelddadige openbare protes vir vyf dae geduur het. Drie betogers is tydens die botsings deur die polisie geskiet.

In die daaropvolgende geweld Dinsdagnag is twee betogers doodgeskiet en 15 polisiemanne beseer. Negentien polisievoertuie is ook beskadig.

Inwoners het ook op ‘n plundertog gegaan nadat die verminkte liggaam van ‘n 20-jarige vrou gevind is.

Phiyega het inwoners gister gewaarsku dat openbare orde nie onderhandelbaar is nie.

Vier mense is gewond toe die polisie met rubberkoeëls op ‘n groep ontstoke gemeenskapslede by die Ha-Kutama-stamgebied buite Makhado in Limpopo losgebrand het.

Die betogers dring aan op die inhegtenisneming van nege mense wat daarvan daarvan verdink word dat hulle ‘n 38-jarige man van ‘n nedersetting vermoor het.

Die polisie sê die man het selfmoord gepleeg.

Phiyega het die polisie-optrede verdedig tydens haar besoek. Sy het gesê dat die polisiebeamptes moes optree, aangesien hul lewens in gevaar was.

“Uit vrees vir hul lewens het ‘n paar van die lede lewendige ammunisie gebruik wat gelei het tot die dood van die twee lede van die gemeenskap. Die gebou en sowat 19 voertuie is beskadig. Feit van die saak is dat die polisie beamptes ook mense is. Elke lewe verloor tydens polisie-ingryping is pynlik, niemand moet tydens ‘n openbare protes sterf nie,” het Phiyega gesê.

Polisie skiet glo nog twee oproermakers in Limpopo

Die polisie in Limpopo sê hulle het geen ander keuse gehad nie as om hulself te verdedig teen die oproerige inwoners in Rhelela buite Tzaneen.

Hangwani Mulaudzi , polisiewoordvoerder, het het gereageer op die dood van twee lede van die gemeenskap wat omgekom het na skote buite ‘n satellietpolisiestasie in die gebied Dinsdagnag weerklink het.

Woedende inwoners is sedert Vrydag verlede week in oproer ná die noodlottige skietery van ‘n 15-jarige seun en die moord van ‘n 20-jarige vrou.

Hulle het ‘n satellietpolisiekantoor aangeval en beamptes met klippe gegooi. Die aanval het gevolg nadat woedende inwoners deur ‘n provinsiale leier van die Ekonomiese Vryheidsvegters toegespreek is.

Skote is afgevuur wat gelei het tot twee sterftes. Die skare is verwilder nadat die polisie versterkings ingeroep het.

Agt mense is dood in botsings tussen oproermakers en die polisie in die afgelope twee weke.

Sedert Vrydag is vier mense reeds in Rhelela dood

Aardskudding tref Gauteng, Limpopo, Mpumalanga

Die aardskudding wat dele van Gauteng gisteraand getref het, is volgens berigte ook in dele van Hartbeespoort, Johannesburg, Limpopo en Mpumalanga gevoel.

Twitter-gebruikers van Pretoria tot Randburg het gisteraand gegons dat hulle mure en vloere vir vyf tot sewe sekondes geskud het.

Volgens berigte is geen skade aangemeld nie.

Verlede maand het ‘n aardskudding van vier op die Richterskaal dele van Johannesburg geruk. – RSG

Thabazimbi-babamoordenaar en ‘n eweknie op Levubu gevang

Oor die naweek is dringende soektogte na twee swart geweldenaars deur die polisie geloods en albei is aangekeer. April Thabo Senkaka, 37, het sy 22-jarige vriendin en haar een jaar oue baba in Regorogile-uitbreiding, ‘n lokasie by Thabazimbi, lewendig in hul kaia verbrand ná hy hulle onder die klippe gesteek het.

Senkaka het Maandag in die landdroshof op Thabazimbi op twee aanklagte van moord en brandstigting verskyn en hy word tans aangehou. Sy saak is tot 12 Desemer 2013 uitgestel om hom in staat te stel om om regshulp aansoek te doen.

In ‘n ander, nie-verwante voorval, het Hulisani Makhaga, 20, op Ha-Mashau naby Levubu insgelyks tydens ‘n rusie met sy 19-jarige vriendin haar en haar ma doodgeskiet. Toe Makhaga se vriendin hom afsê, het hy ‘n vuurwapen uit sy oupa se motor gesteel en haar summier doodgeskiet. Met dié dat haar ma op die toneel verskyn om te kyk wat aangaan, het hy haar ook met skote neergevel en weggevlug alvorens hy deur die polisie aangekeer is.

Makhaga het Maandag in die Levubu-landdroshof verskyn en sy saak is tot 7 Januarie 2014 uitgestel terwyl die polisie verdere ondersoek instel. Hy verkeer tans in aanhouding op twee aanklagte van moord, asook die diefstal van ‘n vuurwapen. Sy oupa, 68, is insgelyks onder die Vuurwapenbeheerwet van die nalatige hantering van ‘n vuurwapen aangekla.

Senkaka se dubbele moord op sy vriendin en haar baba is blykbaar ontketen toe sy geweier het om hom Sondagoggend te sien. Toe het hy na bewering die deur oopgebreek en haar met klippe gegooi, waarna sy haar bewussyn verloor het. Met die ma en een jaar oue baba nog binne die kaia, het hy dit aan die brand gesteek sodat albei lewendig deur die vuur verteer is.

Albei hierdie voorvalle het plaasgevind tydens die sogenaamde “16 dae van aktivisme teen geweld op vroue en kinders”, iets wat die provinsiale kommissaris van polisie, Fannie, Masemola, genoop het om te verklaar: “Dis betreurenswaardig dat sulke gruwelike voorvale plaasvind terwyl ons die 16 dae van aktivisme teen geweld op vroue en kinders met inbegrip van gestremdes, vier. Dit is ook betreurenswaardig dat dié twee daders ons hele provinsie in die oë van wetsgehoorsame burrgers in die skande steek.”

Sy het ook haar meegevoel met die familie en vriende van die slagoffers uitgespreek. – praag, met behulp van polisieverklarings en ander berigte

Veiligheid opgeskerp vir Malema se verskyning

Die polisie het veiligheidsmaatreëls in en om Polokwane in Limpopo opgeskerp nadat duisende ondersteuners van die EFF begin saamdrom het voor die hofverskyning van Julius Malema.

EFF-lede het ‘n nagwaak vóór Malema se hofverskyning aangekondig. Malema sê die klagtes teen hom is polities gemotiveerd.

Malema sal Donderdagoggend hoor of aanklagte van bedrog, geldwassery en afpersing teen hom teruggetrek is, of voortgaan.

‘n Groot polisieteenwoordigheid is opgemerk en polisielede patrolleer sedert Woensdagnag die strate van Polokwane en Seshego, Malema se tuisdorp.

Die leier van die EFF sal in die rondgaande hof verskyn.

Die klagtes teen Malema hou verband met ‘n kontrak van R52 miljoen wat die Limpopo departement van paaie en vervoer aan On-Point Engineering toegeken het.

Sy regspan voer aan dat die staat misluk het om hom met die beweerde misdrywe te verbind.

Indien die hof Donderdag beslis dat die saak teen Malema voortgaan, sal hy volgende jaar saam met ‘n medebeskuldigde verhoor word.

Sy ondersteuners sê dat hulle ongeag die staat se besluit, die EFF-leier sal steun.

Hulle het deur die nag ANC T-hemde met President Jacob Zuma se gesig daarop verbrand en uittartend teen president Zuma gedreunsing by die Jack Botes gemeenskapsaal.

Elf dood toe bus vragmotor verbysteek

Elf mense is dood in ‘n busongeluk op die N1 naby die Capricorn-tolhek in Limpopo.

Die polisie sê die bus het in ‘n motor vasgery nadat dit ‘n vragmotor verbygesteek het.

‘n Polisiewoordvoerder, Hangwani Mulaudzi, sê vyf insittendes van die motor en ses buspassasiers is dood.

Beseerdes is na die Utsogwa-hospitaal geneem.

Volgens Mulaudzi is ‘n ondersoek reeds aan die gang. In September het ‘n bus en vragmotor verongeluk wat die lewens van twee mense geëis het op dieselfde pad.

Die ongeluk kom nadat 30 mense vroeër dié maand dood is toe vier voertuie gebots het by Kwaggafontein in Mpumalanga.

Twee vragmotors, ‘n bus en bakkie was op die Molotopad in ‘n kettingbotsing betrokke waarin 29 mense beseer is.

In September, is 24 mense dood toe ‘n vragmotor in ‘n minibus gepleog het in Pinetown, in KwaZulu-Natal. – Sapa

Cyril vat City Press ombudsman toe

Die ANC gaan ’n klag by die persombudsman indien teen die Sondagkoerant City Press ná ’n berig dat mense Cyril Ramphosa uitgejou het en geweier het om sy hand te skud tydens sy besoek Sondag aan Seshego in Limpopo.

“Gaan weg, gaan weg. Jy’s nie welkom hier nie. Dis my huis. Mense gaan dood weens die ANC,” het een man volgens City Press gesê.

Cyril Ramaphosa, die ANC se adjunkpresident, het inwoners van Limpopo aangespoor om te stem anders gaan die “Boere” weer aan bewind kom, het die The Star Maandag berig.

Die werklose enkelma van drie het die ANC die skuld gegee vir die hoë werkloosheidsyfer en gesê sy het haar geloof in die party verloor.

“As al die Suid-Afrikaners nie stem nie, sal ons kwyn. Die Boere sal terugkom om ons te beheer,” het hy glo gesê.

Die ANC bestempel die City Press-berig as “fabrikasie en vervalsing”. The Star word egter geloof vir sy “akkurate, feitelike en gebalanseerde weerspieëling” van wat in Seshego gebeur het, “wat duidelik die sensasiebelaaide konkoksies en leuens wat in City Press gepubliseer is, weerspreek.

“Die manier waarop die res van die media oor dieselfde gebeurtenis berig het, wat wêrelde verskil van City Press se weergawe, laat mens vermoed dat die storie deur iemand anders in Johannesburg geskryf is, en nie deur die verslaggewer wat in Seshego was nie.

“Dis jammer dat ’n verslaggewer gestuur word om ’n storie te doen, net dat sy storie vir hom geskryf word deur iemand in die nuuskantoor ten einde ’n spesifieke agenda na te streef. Dis g’n wonder nie die maatskappy is die onderwerp van rassespanning in die nuuskantoor,” het Jackson Mthembu, nasionale woordvoerder, in die verklaring gesê. – Sapa

Kusile, Medupi sal teen 2014 krag lewer

Kusile in Mpumalanga, Suid-Afrika se steenkoolaangedrewe kragstasie kan die eerste elektrisiteit teen die einde van 2014 lewer.

Eskom sê die Medupi-aanleg in Limpopo sal ook teen die tweede helfte van aanstaande jaar begin krag lewer.

Bouwerk aan Medupi is met minstens ses maande vertraag weens arbeidsonrus en die beweerde wanprestasie van kontrakteurs.

Eskom het eers laasmaand ’n belangrike oorwinning behaal wat sy vermoë versterk het om Hitachi Power Africa tot verantwoording te roep vir brouwerk by die Medupi-perseel.

Vyf appèlregters het bevestig dat Eskom daarop geregtig is om waarborge aan te vra wat verseker dat Hitachi sy werk behoorlik en tot die bevrediging van Eskom doen. – Sapa