Swart aanvallers hou gesin op Uis aan

Die knal van ’n enkele geweerskoot­ was vroeg Dinsdagaan­d ­op Uis die aankondiging van die einde van die eerste episode van ’n aanddrama­ waarin ’n gesin van vier deur ’n boewebende van vyf gewapende swartmans aangehou is, het die Republikein berig.

Dit was ook die voorspel tot ’n tweede aflewering waarin die ganse Erongostreek in Namibië tot selfs buite sy grense in beweging gebring is.

Die woestyndorp se bekende winkelier­ en sakeman, mnr. De Wet Prinsloo, sy vrou, Christine, en die kinders, Juan (6) en Jana (3), het ’n geskatte veertig minute aan hul hande en voete geboei toegekyk hoe die bende soos ’n stropende tornado deur hul ruim huis naby hul winkelsentrum­ storm. De Wet het al vegtend oorgegee toe hy in die koue loop van ’n handwapen van een van die aanvallers vasgekyk het.

Die sesjarige seuntjie, Juan, was ’n held in die kleine. Dit was hy wat sy hande uit die kleeflint en toue losgewikkel­ het en tot by sy pa aangesukkel­ ­het. De Wet het beduie daar is ’n knipmes in sy broeksak. Daarmee het Juan sy pa se hande agter sy rug losgesny. Die einste messie is toe gebruik om al vier se hande en voete los te sny. Die aanvallers­ het met twee van die drie vuurwapens in die huis weggekom. Die derde is deur De Wet self gebruik vir die boodskap­ in die nag dat die Prinsloo-gesin bystand nodig het.

Uiteindelik het die slotepisode vroeg gisteroggend onder ’n brug by Okahandja­ aangebreek toe ’n kleinboer­ van die oewerlandskap op die duur dubbelkajuit Cruiser van De Wet Prinsloo afgekom het. Die sleutel was nog in die aansitter, los goed is uit die kajuit geslinger en op die bak het die 7 mm-jaggeweer van die sakeman gelê. Dit is naby die Vyfrandkamp­ gevind, met die padblokkade naby Brakwater ’n ent daarvandaan een van die vele versperrings wat in die nag op die moontlike uitwykroetes van die skelms opgestel was.

Behalwe vir ’n krapmerk voor, was die duur tuig, ’n 2014-model, ongeskonde­. Die krapmerk het egter getuig van die geweld waarmee die aanval begin en geëindig het. Om in die huis van die Prinsloos te kom, het die mans, die meeste van hulle met klapmusse aan, ’n buiteband gebruik om op te staan sodat hulle oor ’n muur van sowat 2,2 meter kon klouter om langs ’n kruis op die werf te staan. Hoop, genade en liefde verkondig die bewoording op die kruis. Daarna is geweld gebruik om ’n sifwering­ voor die Prinsloo huis af te ruk en geweld was weer ter sprake toe die duur voertuig­ met die wegtrek teen ’n muur gestamp het.

Die ganse kabaal het in die voorhuis voor ’n biddende Christine met klein Jana op haar skoot afgespeel. Teenoor die seuntjie en die dogtertjie was haar moederlike smeking: “Maak net die ogies toe! Sê of doen net niks nie.”

De Wet Prinsloo het self aan Republikein­ vertel wat gebeur het terwyl hy, Christine en Jana in die voorhuis na ‘n sepie op TV gekyk het. Die bende het omstreeks­ ­19:20 by die huis ingestorm­. In ’n nabygeleë­ ontspanningsvertrek­ het klein Juan sy eie TV-storie gevolg.

Vasgebind

“Nee! Nee! Nee!” So het De Wet geskreeu­ toe die mans by die huis ingestorm­ het. Hy het een met ’n panga in sy linkerhand voor die bors gegryp en was besig om hom te oorweldig toe ’n harde hou met die kapmes se plat kant hom teen sy regterskouer­ getref het.

Steeds het hy selfs vir die een met ’n bandligter in sy hande kans gesien. Die volgende oomblik het hy vasgekyk in die loop van ’n pistool van ’n derde aanvaller.­

“Los net my vrou en my kinders en vat wat julle wil hê,” het De Wet by aanskou­e van die vuurwapen­ gesê.

“Gaan lê,” was die opdrag van die aanvallers­. Op die vloer is hy aan sy hande en voete met kleeflint gebind. Ook sy elmboë is na binne gedwing en vasgemaak. ’n Lap is in sy mond gedruk en ook dit is met kleeflint vasgetrek­ wat om sy kop gebind was. Een van die aanvallers het met klein Juan aan die hand uit die buitevertrek gekom. Die ander drie lede van die Prinsloo-gesin is net soos hy vasgebind. Selfs die veters van die Prinsloos­ se eie skoene is uitgeryg en gebruik.

Die aanvallers het deurlopend­ met mekaar en met die Prinsloos­ gekom­munikeer. Met mekaar het hulle Oshiwambo­ gepraat en met die Prinsloos ’n mengelmoe­s van Afrikaans­ en Engels. Toe is die bevele op hulle geskreeu­: “Geld! Geld! Geld!” Die Prinsloos het net ’n bietjie sakgeld by hulle gehad. Daarna is het die strooptog deur die huis begin en beslag is op feitlik elke item van waarde gelê – van juwele tot ’n duur sonbril. ’n Deel van die buit was die spaarsleutelsel­ van die Cruiser wat in die motorhuis­ gestaan het.

In die stadium het dit gelyk of die aanvallers­ in totale beheer van die situasi­e was en hulle het gemaklik met mekaar gesels. Met ’n gewikkel van die prop in sy mond kon De Wet Prinsloo uiteindelik­ ’n paar woorde uitkry. “Ons verwag mense,” het hy van onder die lint gesê. Toe raak die bendelede­ haastig. Drie of vier minute later het die Cruiser se masjien gedreun en ’n harde slag is gehoor toe die bende iets tref. Hulle het daarna weggery.

Losgesny het De Wet Prinsloo op die oorblywende­ vuurwapen­ afgekom en die skoot gevuur. Flip Laynes, ’n jong en sterk man, was die eerste om te reageer. Flip Els het ook bygekom. Die polisie is geskakel en was relatief gou op die toneel. Die pad van Uis na Hentiesbaai is deur ’n groep mans van die dorp as moontlike­ ontsnappingsroete­ gekies. Waar die pad na Khorixas wegswaai, het twee rylopers gestaan.

Hulle het bevestig­ ’n Cruiser met dié beskrywing­ is op die pad na Khorixas verby. In die nag is ander polisiekantore­ ook geskakel­ ­en het twee polisiemanne­ in uniform van Hentiesbaai­ opgedaag­. Hulle het die afstand van sowat 130 km op die grondpad binne 1 uur 10 minute afgejaag. Vroeg gisteroggend het polisieversterkings­ in vyf voertuie van Walvisbaa­i opgedaag.

Teen druktyd was niemand nog in hegtenis­ geneem nie.

Gastehuismoordverdagtes voor

‘n Egpaar verskyn binnekort in die hof in verband met die moord op Elmarie van Zyl (40) wie se ontbinde liggaam onlangs in ‘n gastehuis in Bloemfontein gevind is.

Vrystaatse polisiewoordvoerder, Mmako Mophiring, sê die paartjie is gister in Harrismith aangekeer nadat ‘n polisiebeampte, wat in die strate rondgery het, die egpaar met hul baba opgemerk het.

Die polisie het ‘n foto van die bruinman, slegs bekend as Revon, gepuliseer nadat Van Zyl se erg ontbinde liggaam in Maart in ‘n gastehuis in McHardystraat in Brandwag, Bloemfontein, aangetref is.

Mophiring sê die egpaar word in Harrisith aangehou en ‘n hofverskyning sal deur die Parkweg polisiestasie bepaal word.

Van Zyl se naakte liggaam is tussen die basis van die bed en die matras versteek. Sy is glo verwurg en die vermoede bestaan dat sy ook verkrag is. Sy het glo saam met die egpaar by die gastehuis ingeboek.

Universiteit van Kaapstad stem in om Rhodes-beeld te verwyder

Die Universiteit van Kaapstad sê die verwydering van die standbeeld van Cecil John Rhodes is ‘n “belangrike mylpaal in die transformasie van die land se tersiëre instellings”.

Die Universiteitsraad het gister eenparig besluit dat die standbeeld om vyfuur vanmiddag verskuif moet word. Die standbeeld sal na ‘n plek van veilige bewaring geneem word.

Die Wes-Kaapse Erfenisraad sal die finale besluit oor die standbeeld se lot neem.

Gisteraand se raadsvergadering is meer as ‘n uur lank ontwrig nadat van die studente die saal binnegestorm het waar die vergadering gehou is en geëis het dat hulle dit as waarnemers bywoon.

Die Raad het geweier om dit toe te laat en was op die punt om te verdaag sonder ‘n finale besluit oor die standbeeld, maar die studente het hulle verhinder om die vertrek te verlaat.

Die dooiepunt is eers opgelos nadat die studente padgegee en die Raad toe sy werk kon afhandel.

Koning George V is verlede maand die menslike ontlasting gespaar wat die Rhodes-beeld getref het, maar ‘n standbeeld van hom in Durban is met wit verf getakel en daarna bepleister met plakkate.

Swart studente eis ‘n einde aan wit voorreg aan die Universiteit van KwaZulu-Natal.

‘n Verteenwoordiger van die SA Studente Kongres sê die skending sal voortgaan totdat die standbeeld verwyder word.

‘Ons is nie hier om te bedel nie’

Die Zimbabwiese President Robert Mugabe se woordvoerder George Charamba het ontken dat ‘n hoë-vlak afvaardiging op ‘n staatsbesoek in Suid-Afrika is om vir geld te vra van president Jacob Zuma.

Ná die amptelike verwelkoming by die Uniegebou Woensdagoggend, het Charamba gesê die Zimbabwiese leier en lede van sy kabinet is hier vir “vennootskappe”.

Daar is gerugte dat Zimbabwe sukkel om die komende buitengewone SAOG-beraad later hierdie maand aan te bied en het daarom kom hulp bedel van Suid-Afrika.

“Ons is ‘n bietjie ongelukkig dat ons hier met ‘n bakhand uitgebeeld word, as ons nie geld kom vra het nie,” sê Charamba.

“Die Suid-Afrikaanse regering weet dat ons ‘n lewensvatbare staat is wat in werklikheid ‘n sterk handelsvennoot is.

“So regtig, ons praat oor ‘n lewensvatbare staat wat na ‘n vennootskap met Suid-Afrika soek, nie finansiële bystand nie,” het hy gesê.

Zimbabwe het ‘n ekonomie wat met dié van Germiston kan vergelyk en het sy geldeenheid prysgegee weens hiperinflasie. Miljoene van sy burgers het reeds suid oor die grens verkas om van armoede en hongersnood te ontkom.

Suid-Afrika voer reeds tonne mielies uit na sy buurland om ‘n algehele ineenstorting te verhoed.

Volgens Charamba, lewer Zimbabwe ‘n betekenisvolle bydrae tot die Suid-Afrikaanse ekonomie, en sal kyk om dit te verhoog in ruil vir ‘n Suid-Afrikaanse belegging in Zimbabwe.

“Onthou daar was ‘n tyd toe ons die sterkste handelsvennoot van Suid-Afrika was. Die basis is nog steeds, hoofsaaklik in die mynbou.

“Die drywers van daardie spesiale verhouding is nog in plek. Kan jy dink wat Suid-Afrika se mynbedryf sou wees sonder die insette van Zimbabwe?” het hy gevra.

Charamba het gesê een van die belangrikste kwessies wat hulle bespreek het is die beweging van geskoolde arbeid uit Zimbabwe na Suid-Afrika, en die verskaffing van ‘n goeie konsulêre diens aan hulle.

“Ons het nogal ‘n aansienlike bevolking van Zimbabwiërs wat hier (Suid-Afrika), nie as vlugtelinge nie, maar as geskoolde werkers noodsaaklike vaardighede aan die Suid-Afrikaanse ekonomie bied.

Suid-Afrika en Zimbabwe verwag om verskeie ekonomiese ooreenkomste Woensdagmiddag te teken.

Pamela Anderson oor Zim baba-olifante besorg

Voormalige Baywatch-ster Pamela Anderson het gevra dat Zimbabwe se omgewingsminister homself ontferm oor die uitvoer van olifantkalfies van Hwange Nasionale Park.

Sy is “diep ontsteld” oor hul lot, ‘n koerant gister berig.

Die Britse Zimbabwiese koerant beweer dat Anderson, 47, ‘n brief namens diereregte-organisasie aan die minister gerig het.
 
“Hierdie vreesbevange babas is na wat berig word gevange gehou terwyl hulle wag om aan China en die Verenigde Arabiese Emirate verkoop te word, ver van hul tuistes, waar hulle hul families sal nooit weer sal sien nie en nooit weer enige normale of gelukkige lewe sal lei nie,” sê Anderson.
 
Hollywood-akteur Pierce Brosnan het sy aanhangers in Desember gevra om teen Zimbabwe se olifantuitvoere te protesteer.

Vrese oor grootskaalse grondbesetting in Kaapstad

Die wapenmaatskappy Denel het ‘n dringende interdik bekom teen verdere onwettige besettings van sy grond in Khayelitsha op die Kaapse Vlakte.

Plakkers sê egter hulle sal bly omdat hulle nêrens anders het om te gaan nie.

Die EFF het die grondbesettings vanaf Maandag 6 April aangemoedig, want dit word histories erken as die dag waarop Jan van Riebeeck in SA aangekom het. Die EFF sê die aankoms van Van Riebeeck in 1652 het “die begin van die Europese vernietiging in die vasteland” ingelei en 6 April is “‘n belangrike herinnering aan gronddiefstal en onteiening deur die Europeërs”.

Te midde van vrese dat grootskaalse grondbesettings Kaapstad hierdie week kan tref, het die Ekonomiese Vryheidsvegters (EFF) Maandag ‘n groep van sowat 100 plakker na ‘n stuk grond gelei om te beset in Khayelitsha aan die buitewyke van Kaapstad.

Vroeër Dinsdag het sommiges begin bosse aan die brand steek om meer ruimte te skep om hul plakkershutte te bou op die eiendom in privaatbesit.

Die EFF het Maandag ‘n beroep op alle hawelose mense gedoen om oop en onbesette grond te identifiseer en “betrokke te raak in die stryd om hul grondregte te herstel”.

Volgens die Stad Kaapstad, was daar twee plekke wat in Khayelitsha geraak word.

Die ander erf behoort aan die stad en is sedertdien skoongemaak.

Richard Bosman, Kaapstad se uitvoerende direkteur vir veiligheid en sekuriteit, het gister gesê dat die stad sal Denel help om die strukture te verwyder.

Die staatsbeheerde maatskappy het gesê hulle beroep hulself op ‘n uitsettingsbevel teen die onwettige besetters.

Denel het vroeër strafregtelike aanklagte teen die vermeende onwettige grondbesetters ingedien.

‘n Woordvoerder van Denel, Vuyelwa Qinga, sê wetstoepassers is in die gebied ontplooi en het toestemming om verdere besettings te verhoed.

“Ons het nêrens om te gaan … ons is gelukkig want die EFF en Malema ondersteun ons,” sê Elizabeth Damba, een van die plakkers. Sy het gesê sy kan nie bekostig om huur te betaal nie want sy is werkloos.

Die EFF se Wes-Kaapse leier Nazier Paulsen, wat ook ‘n lid van die provinsiale wetgewer is, het gesê die party sal enige hofuitspraak om die besetting te stop, teenstaan.

Die besetting van private grond, deur EFF-lede en ondersteuners, is ‘n kriminele oortreding, het opposisielede gesê.

Sasol staar siviele eis in die gesig

Die siviele geding teen Sasol, vir skade wat verband hou met longsiektes, beloop R80 miljoen en moet glo as ‘n waarskuwing vir die hele steenkoolbedryf dien.

Dit is volgens menseregteprokureur Richard Spoor wat die 22 huidige en voormalige Sasol steenkoolmynwerkers by Secunda in Mpumalanga verdedig.

Volgens Sake24 het Spoor ‘n klasaksie-eis in die Suid-Gautengse hooggeregshof in Johannesburg ingedien vir skadevergoeding nadat die mynwerkers na bewering aan steenkoolstof blootgestel is en longsiektes opgedoen het.
 
Alex Anderson, ‘n Sasol-woordvoerder, sê dat die myn tyd nodig het om die dokumente te bestudeer, maar dat die beskerming van die gesondheid en veiligheid van werkers met groot erns beskou word.

Tergende vrae rondom ISIS-werwing

Hoe bespreek en betaal ‘n skoolmeisie van 15 plek op ‘n buitelandse vlug om by ISIS te gaan aansluit?

Dié en ander tergende vrae is geopper nadat ‘n vyftienjarige gereed was om ‘n British Airways-vlug in Kaapstad na haar bestemming te neem.

Yusuf Abramjee, die hoof van Crime Line, het gesê die meisie het ‘n vlug na Saoedi-Arabië bespreek.

Die meisie van Kenwyn is Paassondag gekeer om van Kaapstad na O.R. Tambo internasionale lughawe te vlieg volgens David Mahlobo, minister van staatsveiligheid.

Mahlobo het bevestig dat die meisie laat Sondagmiddag van ‘n British Airways-vliegtuig verwyder is waar sy in die sakeklas gewag het dat haar vlug opstyg.

Sy het nege uur voor die vlug uit haar huis verdwyn maar haar grootouers het eers Sondagoggend onraad bemerk.

Die polisie en die minister van staatsveiligheid is net betyds van haar verdwyning in kennis gestel voordat sy die land kon verlaat.

Bewysstukke wat in haar kamer gevind is, dui daarop dat sy geld oorgeplaas het en dat sy op die internet in kontak was met ISIS-werwers.

Abramjee en Mahlobo het aan ANA bevestig dat die meisie Maandag in die sorg van haar ouers geplaas is.

Die verdagte omstandighede rondom haar poging om alleen ‘n vliegtuig te bestyg wat bestem is vir Saoedi-Arabië laat talle vrae oor hoe British Airways se besprekingskantoor aan ‘n minderjarige ‘n internasionale kaartjie verkoop het.
 
Onder normale omstandighede moet ‘n tiener met ‘n wettige voog na die buiteland reis.
 
“Nee, dit is nie net ‘n wettige voog nie, net iemand wat verantwoordelik is,” het die besprekingsbeampte van British Airways by navraag gesê.
 
“Daardie persoon sal die nodige vorms teken namens die minderjarige, asook besonderhede van ‘n verantwoordelike volwassene wat die minderjarige sal afhaal by die bestemming.
 
“Hulle moet dan ‘n fooi van $150 betaal.”
 
Besoekers het ‘n visum nodig om na Saoedi-Arabië te reis, behalwe passasiers wat dieselfde of ‘n eerste aansluitingsvlug binne 18 uur haal.

Volgens die ouers sou die meisie na Turkye reis om by die rebelle in Sirië aan te sluit, het IFS berig.
 

Wit egpaar by Namibiese oord aangeval

“Dis die mees vreesaanjaende geluid om te hoor hoe ’n deur afgebreek word en jy is binne vasgekeer.”

Ida Ryan (66) en haar man, Larry (67), het albei ernstige be­serings opgedoen toe hulle Woensdag in die middernagtelike ure deur drie swart mans in hul kamer oorval is.

Die egpaar van Bethal, Mpumulanga, het saam met nog vriende uit Suid-Afrika by ’n lodge buite Windhoek oornag, voordat hulle die volgende dag vir ’n kort wegbreek na die Etosha Nasionale Park sou vertrek, het die Republikein berig.

Ida het met ’n diep snywond en erge kneuswonde aan die struweling ontkom, terwyl Larry, wat herhaaldelik met ’n knopkierie op sy kop geslaan is, bloeding op die brein opgedoen het. Hy is gister suksesvol vir die bloeding geopereer en moet ten minste twee dae in die hoësorgeenheid deurbring.

Ida het tydens ’n onderhoud vertel sy en haar man het Woensdagoggend omstreeks een-uur van ’n hou teen die kamer se deur wakkergeskrik. Dit was egter doodstil daarna, tot sowat ’n uur later, toe die egpaar deur die “vreesaanjaende geluid van ’n deur wat oopgebreek word” en met ’n pistool se loop wat in die deur verskyn, begroet is.

Ida en Larry het opgespring en die deur teen die oormag aan die anderkant probeer toedruk en toehou.

“Ek het op my knieë gestaan en van onder teen die deur gedruk, terwyl Larry die deur met sy skouer probeer toedruk het.”

Die egpaar is egter oorval deur drie swartes, met een wat Larry met ’n knopkierie oor die kop geslaan het. Nog een het vir Ida in haar arm met ’n “mes met ’n baie lang lem” gesteek. Een van die aanvallers het sakke gegryp wat op ’n stoel by die venster gelê het en waarin Ida se beursie met identiteitsdokument en kaarte, juwele, skoene en reis­dokumente was.

“Die swartes het nie ’n woord gesê nie. Ek kon in die lig van die buitelig sien die een met die knopkierie was lank en skraal en het ’n hoed op gehad; ’n ander een was fris en groot.”

Die drie swartes het uit die kamer gestorm en in die bosse in verdwyn.

“Toe ek buite toe storm, het drie swartes met groen uniforms buite gestaan. Larry het egter geskree ek moet inkom en die deur toemaak.” Volgens Ida het die lodge nie sekuriteitspersoneel nie en weet hulle nie wie dié swartes was nie.

So hard het sy tydens die aanval geskree dat Ida se stem tydens die onderhoud ’n dag later steeds hees was.

“Die eienaars se kind het van my geskree wakker geword en hulle wakker gemaak.” Dié het met flitse en honde hul na die Ryan’s gehaas.

“Eers toe ons die lig aansit en tot verhaal kom, het ons al die bloed gesien soos wat die wond aan my arm gebloei het.”
Die polisie is ontbied, terwyl die lodge-eienaar Ida se wond verbind het om die ergste bloeding te stop.

Die egpaar is in die Mediclinic-hospitaal in die hoofstad opgeneem, waar Ida nege steke vir die wond in haar arm gekry het. Larry het ’n breinskandering ondergaan en is stil gehou tot sy operasie Maandag om die bloeding op sy brein te verlig.

Hy het Vrydag uit sy hospitaalbed gesê die egpaar sal weer Namibië besoek, waar hulle in die sewentigerjare gebly het.

“Ons het ses jaar in Namibië gebly, Sodom en Gomorra toe getrek, net om terug te kom en hier ’n pak slae te kry!”
Die polisie het teen druktyd nog geen verdagtes in hegtenis geneem nie.

Nog twee vas oor hospitaaldiefstal

Die polisie in Bloemfontein het Woensdag nog twee staatsamptenare in hegtenis geneem in verband met die klopjag waartydens beslag op duisende rande se hospitaaltoerusting gelê is.

Dit volg nadat twee amptenare – wat werksaam is by Pelonomi-hospitaal – vroeër vandag in hegtenis geneem is in verband met toerusting van dié hospitaal met ‘n geskatte waarde van R450 000.

Die toerusting is tydens ‘n klopjag by ‘n skrootmetaal-onderneming in Bloemfontein gevind.

Intussen sê die gesondheidwoordvoerder, Tebogo Oepeng, die departement gaan ondersoek instel om uit te vind of die saak verband hou met ‘n interne ondersoek wat laat verlede jaar begin is, ná die ontdekking van noodsaaklike medisyne wat besig was op stof op te gaar in ‘n pakhuis in dié hospitaal.