Nuus Archives - Page 593 of 1583

‘SA kan ook terreurteiken word’

Sowat 12 rebelle was in die aanval op die Westgate-winkelsentrum in Nairobi betrokke, wat die lewens van minstens 68 mense geëis het, het The Standard berig nadat dié koerant beeldmateriaal van die sentrum se sekuriteitskameras gesien het.

Die beeldmateriaal bevestig ooggetuies se weergawes dat die aanvallers – gewapen met handgranate, gewere, pistole en ammunisie – die winkelsentrum van die voor- en agterkant bestorm het.

Die grootste groep het voor ingegaan en ‘n eetplek met geweervuur en handgranate aangeval.

Vier aanvallers het by die ingang wat na die parkeerarea lei ingegaan nadat hulle ‘n sekuriteitswag geskiet het.

Dié groep het aanbeweeg na die parkeerplekke op die dak waar ‘n plaaslike radiostasie ‘n partytjie aangebied het.

Die aanvallers het twee handgranate na die partytjiegangers geslinger, maar slegs een het ontplof.

Volgens verskeie ooggetuies is mense beveel om die Islamitiese geloofsbelydenis op te sê. Diegene wat minstens die eerste paar woorde kon voordra se lewens is gespaar en die mense wat dit nie kon opsê nie is geskiet.

“Toe ek die eerste woorde van die belydenis opsê, het hulle aanbeweeg. Dit is hoe ek bly lewe het,” het een oorlewende aan The Standard gesê.

Sulke aanvalle kan ook in Suid-Afrika plaasvind, het prof. Hussein Solomon, lektor in politieke wetenskap aan die Universiteit van die Vrystaat aan Beeld gesê.

“Die terreuraanval in Nairobi moet gevaarligte by Suid-Afrikaanse owerhede laat flikker, want as Al-Shabab sou besluit om ’n winkelsentrum hiér te teiken, is daar bitter min wat in hul pad sal staan,” het Solomon gesê.

Al-Shabaab het glo op sy Twitter-profiel, wat intussen verwyder is, gesê die aanval was in weerwraak op Keniaanse troepe se betrokkenheid by Amisom, die Afrika-Unie-mag in Somalië.

Suid-Afrika, as ’n lid van die Afrika-Unie (AU), steun Amisom onregstreeks, maar bied tans geen direkte militêre ondersteuning nie.

Suid-Afrika het ’n groot Somaliese bevolking en onder hulle tel glo al-Shabab-lede. Somaliërs wat in xenofobiese aanvalle geteiken word, het baie volgens Solomon hul gewapende Al-Shabab-landgenote betaal om hulle teen Suid-Afrikaners te beskerm.

Anneli Botha, ’n terreurkenner by die Instituut vir Sekerheidstudies, het gesê al-Shabab-lede het aan haar bevestig dat Suid-Afrika as ’n basis gebruik word.

Solomon se bewerings oor Al Kaida in Suid-Afrika het voorheen vir ‘n storm van kritiek in die Moslemgemeenskap gesorg. Leiers het sy onjuiste stellings veroordeel en gesê hy wil paniek saai en ‘n negatiewe beeld van Suid-Afrikaanse Moslems skep.

Saoedi-Arabië het vroeër gespog dat hulle Al Kaida beheer en as politieke afdreigmiddel internasionaal gebruik. Dié olieland is ‘n Amerikaanse bondgenoort.- Sapa/AFP

Brand na gru-ongeluk op N12 eis nege

Nege mense het doodgebrand toe twee motors in vlamme uitgebars het ná ‘n botsing op die N12 in die Noordwes, het die polisie gesê.

Kol. Sabata Mokgwabonehet gesê die ongeluk het tussen Christiana en Warrenton plaasgevind.

‘n Bakkie met vier insittendes was vanaf Christiana onderweg toe dit Saterdagoggend omstreeks 01:30 reg van voor teen ‘n minibus met vyf passasiers gebots het.

“Die oorsaak van die ongeluk is nog nie bekend nie,” het Mokgwabone gesê. – Sapa

Merkel vir ‘n derde termyn verkies

Kanselier Angela Merkel se konserwatiewe party het Duitsland se verkiesing gewen, net kort van ‘n volstrekte meerderheid.

Haar konserwatiewe blok het ongeveer 41,5 % van die stemme getrek, maar haar liberale vennote het nie die parlement gehaal nie.

Daar word vermoed sy is waarskynlik in ‘n koalisie met die Sosiale Demokrate ( SPD ), wat 26% ingepalm het, sal tree.

Die resultate het getoon dat die liberale Vrye Demokratiese Party ( FDP ) net 4,8% se stemme kon trek, ‘n ramp vir die junior koalisie-vennoot wat nou vir die eerste keer in Duitsland se post- oorlog geskiedenis, geen nasionale verteenwoordiging in die parlement sal hê nie.

Voorsitter van die party Philipp Roesler het dit as “die bitterste, hartseerste uur van die Vrye Demokratiese Party” beskryf.

Die FDP is verslaan deur die Groen Party ( 8,4 %) en die voormalige kommunistiese Linkse Party ( 8,6 %). Die nuwe Alternative fuer Deutschland ( AFD ), wat onttrekking uit die euro-geldeenheid voorstaan het 4,7% gekry, ook net kort van die parlementêre drumpel.

Merkel het gesê dit is te vroeg om te sê presies wat hulle gaan doen om ‘n koalisie te vorm.

Korrespondente sê dat die 59 -jarige kanselier die kompleksiteit van die vorming van ‘n regering vroeër benadruk het.

Ontbindende lyk in kattebak by Montecasino gevind

Die ontbindende lyk van ‘n man is in die kattebak van ‘n motor by Montecasino in Fourways, noord van Johannesburg, gevind, het die Gautengse polisie Maandag gesê.

“Dit is Sondag omstreeks 13:00 deur veiligheidswagte op patrollie gevind. Hulle het begin ondersoek instel toe hulle van die reuk vanaf die voertuig bewus raak,” het luitenantkolonel Lungelo Dlamini gesê.

Die polisie is ingeroep en hulle het die motor se bak oopgemaak, waar die ontbindende lyk gevind is.

‘n Soektog na die motor se registrasienommer toon dat dit nie as gesteel aangemeld is nie.

Die eienaar van die motor sal ondervra word en geen inhegtenisname het teen 9:00 Maandagoggend plaasgevind nie. Die polisie ondersoek ‘n moordsaak.

‘n Nadoodse ondersoek sal die doodsoorsaak bepaal.

Kringtelevisiemateriaal van die casino sal tydens die ondersoek gebruik word, het Dlamini gesê. – Sapa

Suid-Afrikaner sterf ná Al Kaida-groep weerwraak in Nairobi belowe

Buitelandse militêre magte ondersteun sedert 2011 Keniaanse troepe teen die al-Shabab-rebelle in Somalië. Al-Shabab is aan Al Kaida verbonde.

‘n Keniaanse militêre woordvoerder, majoor Emmanuel Chirchir, het twee jaar gelede gesê “een van die vennote”, moontlik die Verenigde State van Amerika of Frankryk, het lugaanvalle geloods wat die dood van ‘n aantal al-Shabab-militante veroorsaak het. Die Franse vloot het rebelle se posisies vanaf die see aangeval, het die Keniaanse weermag destyds in ‘n verklaring gesê .

Twee senior Amerikaanse amptenare in Washington het egter gesê dat nóg die Verenigde State van Amerika of die Sentrale Intelligensie-agentskap lugaanvalle teen Somalië geloods het.

Amerikaanse amptenare in Kenia het geweier om kommentaar te lewer . ‘n Franse diplomaat in die Verenigde State van Amerika het nie op telefoonoproepe gereageer nie.

Indien Western militêre magte inderdaad die konflik betree het, sê ontleders, kan dit ‘n keerpunt verteenwoordig. Die groep beheer die suide van Somalië.

“Almal is in die [oorlogs]teater,” het Chirchir in ‘n telefoniese onderhoud bevestig. Die Amerikaanse weermag het voorheen aanvalle in Somalië geloods.

Amerikaanse amptenare was in 2011 bekommerd oor die vooruitsig dat al-Shabab militante in Kenia se hoofstad, Nairobi, sal wraak neem, en moontlik op Westerlinge fokus en het waarskuwings gerig dat inkopiesentrums moontlike teikens mag wees..

Die Keniaanse leër is tans gewikkel in ‘n stryd om die jongste gyselaarsdrama in ‘n winkelsentrum in Nairobi te ontlont. Ontploffings en geweervuur is sedert gisteraand al ‘n paar keer gehoor. ‘n Onbekende aantal mans, wat aan die militante groep al-Shabab verbonde is, hou nog sowat 10 gyselaars aan.

Die jongste dodetal is 69, maar polisiebronne vrees dat die dodetal baie hoër kan wees. ‘n Suid-Afrikaner is ook in die aanval dood.

Die Suid-Afrikaanse burger, James Thomas van Kaapstad, is glo tydens die aanval doodgeskiet. Thomas was in Kenia op ‘n sakebesoek vir die maatskappy, EcoVentures International.

Ander Suid-Afrikaners wat aanvanklik in die winkelsentrum vasgekeer was, is luidens berigte later bevry.

Sowat 10 gyselaars word nog in die winkelsentrum aangehou. Die Keniaanse weermag sê hulle doen alles in hul vermoë om die oorblywende gyselaars lewend uit te bring.

Die meeste van die gyselaars wat in die winkelsentrum vasgekeer was, is gered en die grootste gedeelte van die kompleks is beveilig.

Al-Shabab het in Januarie vanjaar ‘n foto van ‘n vermeende Franse spesmagsoldaat wat vermoor is in mislukte aanval, op Twitter rondgestuur om die Franse president te tart.

Die dooie Franse soldaat is met sy vermeende wapens en toerusting afgeneem.

Drie foto’s opgelaai wat ‘n wit man toon geklee in ‘n militêre broek en ‘n bloed-deurweekte hemp omring deur drie gewere, ammunisie en beskermende toerusting. ‘n Helm lê tussen sy bene.

In elk van die foto’s is ‘n silwer hangertjie, ‘n kruisie, om die soldaat se nek sigbaar. Al-Shabab het in sy boodskap gesê: “‘n Terugkeer van die Kruistogte, maar die kruis kon hom nie red van die swaard nie.“

Steel Durbanse metropolisie batterye en bande van hul eie voertuie af?

Die Durbanse metropolisie (die stad word nou eThekwini genoem) ondersoek blykbaar hoe batterye en nuwe bande van hul voertuie af “verdwyn”, berig die Witness-koerant.

Die koerant haal ‘n woordvoerder, senior superintendent Eugene Msomi, aan waar hy sê dat ‘n aantal interne ondersoeke aan die gang is.

Die berig bevat nog ‘n aanhaling deur ‘n senior offisier wie se naam nie genoem word nie en wat sê dat ‘n polisievoertuig met splinternuwe bande agterna met afgeloopte bande na die stasie toe sou terugkeer.

“Dis helder dat bande gestroop en verkoop word. As die beamptes skofte ruil, sien niemand enigiets raak nie,” sê hy.

He meen ook dat daar geen verklaring is oor hoe voertuie wat op die polisieperseel geparkeer staan hul batterye daar “verloor” nie. – Sapa

Hou Winnie van wit en vet?

Radio en TV-persoonlikheid Sorisha Naidoo is nie vies vir Winnie Madikizela-Mandela se openbare kritiek oor haar vinnige gewigsverlies nie.

Madikizela-Mandela het die 300 gaste teenwoordig by die bekendstelling van ‘n boek hierdie week vertel Naidoo is “te maer”. Die “moeder van die nasie” het gesê dis nie die swart ideaal nie omdat swart mense in Afrika van vet vroue hou.

“Ek is net nie gelukkig dat my dogter so maer is nie … sy moet na Johannesburg kom vir ‘n week, sodat ons haar goed kan voed,” het sy gesê.

Die kommentaar is gemaak nadat Naidoo, die vrou van die omstrede sakeman Vivian Reddy, Winnie genooi het om te praat by die boekbekendstelling by Sibaya Casino Dinsdagaand.

Naidoo het voorheen kritiek gekry vir haar velbleikproduk, wat deur Madikizela-Mandela onderskryf word .

In reaksie hierop het sy gesê: “Wit mense kan sonbrand, maar daar is ‘n probleem wanneer swartes en Indiërs hul velle bleik?”

Duitse pedofiel-priester kry borg in SA

Suid-Afrika het ‘n Duitse Katolieke priester wat vir kindermolestering deur Duitsland gesoek word, op borgtog vrygelaat, maar hy sal in November weens soortgelyke dade verhoor word.

Die priester, wie se identiteit nie gegee is nie, is in sy vyftigs en van Aachen in die weste van Duitsland. Hy is in hegtenis geneem op 13 September toe hy die hof Brits verlaat het.

Hy het verskyn vir aanranding en dade van onsedelikheid.

Sy inhegtensiname kom ná ‘n internasionale lasbrief en ‘n Duitse uitleweringsversoek ‘n paar jaar gelede uitgereik is, het bronne vertroud met die saak gesê.

Borgtog is vasgestel op R5000 en hy is voorwaardelik vrygelaat. Hy woon by die Ishowe–bisdom in Kwazulu-Natal.

Die Suid-Afrikaanse verhoor sal op 8 November begin. Ná November se verhoor sal die priester uitgelewer kan word aan Duitsland.

Die dade van onsedelikheid is na bewering in 2008 met vier seuns gepleeg wat toe tussen nege en 10 was, van hulle van Duitse oorsprong, tydens ‘n Katolieke jeugkamp naby Johannesburg.

Hulle het gekla dat die priester hulle na sy bed genooi het en onvanpas betas het. – Sapa/AFP

Taxi’s en busse weens onpadwaardigheid geskut

Meer as 200 taxis en busse is tydens ‘n padwaardigheidsoperasie in Johannesburg geskut.

Beamptes van die Padverkeerbestuurskorporasie het by taxi-staanplekke en busstasies in die stad besoek afgelê. Hulle sê bykans die helfte van alle taxis wat nagegaan is, het nie ‘n padwaardigheidstoets geslaag nie.

Die waarnemende hoof van die padverkeerbestuurskorporasie, Gilberto Martins het sy skok uitgespreek oor die toestand van sommige van die voertuie.

Hy sê van die probleme sluit in dat sommige taxis se wiele is nie behoorlik vasgedraai nie, terwyl ander taxis se sitplekke nie vasgeskroef is nie en dus vorentoe skuif as die taxibestuurders rem trap.

Die KwaZulu-Natalse verkeersowerheid het ook dié naweek ‘n vragmotor geskut wat aan Sagekal Logistics behoort – dieselfde maatskappy wat die vragmotor besit het wat twee weke gelede in die gru-ongeluk in Pinetown betrokke was.

Drie-en-twintig mense is in die ongeluk dood. Daar is bevind dat die vragmotor wat geskut is, onpadwaardig was weens onklaar remme.

Dit het na bewering die N3-hoofweg by Key Ridge tussen Pinetown en Pietermaritzburg versper, nadat dit sonder brandstof gaan staan het. – RSG

Terreuraanval op Nairobi-winkelsentrum skerp veroordeel

Die internasionale gemeenskap het gister se tereuraanval op die Nakumatt Westgatewinkelsentrum in Nairobi in Kenia skerp veroordeel.

Minstens 39 mense is in die aanval dood en meer as 150 is beseer. Volgens die Rooikruis sal dié aantal moontlik styg.

Twee Kanadese burgers, onder wie ‘n diplomaat, is in die aanval dood. Volgens berigte het twee Franse burgers ook omgekom.

Die Amerikaanse departement van Buitelandse Sake sê hy het inligting ontvang dat Amerikaanse burgers onder die beseerdes is.

‘n Britse oud-soldaat sê hy het ten minste vier mense gesien wat omgekom het, waaronder ook ‘n kind.

Die Britse minister van Buitelande Sake, William Hague het bekendgemaak dat ‘n spesiale diplomatieke reaksiespan onderweg na Kenia is.

Die Keniaanse president, Uhuru Kenyatta het vroeër gesê van sy familielede het ook in die aanval omgekom.

Die Somaliese Al Shabaab-rebellegroep het verantwoordelikheid op Twitter aanvaar vir die aanval. Dit is die ergste tereurdaad in 15 jaar in die land.

‘n Woordvoerder vir Al Shabaab het gesê hulle eis dat Kenia sy troepe uit Somalië onttrek.

“Kenia het ons land in Oktober 2011 binnegeval en die dood van baie onskuldige burgerlikes met hul militêre vliegtuie veroorsaak,“ het Sjeg Ali Mohamoed Rage in ‘n verklaring gesê.

“Ons het Kenia gewaarsku oor die aanval, maar hulle ïgnoreer [ons], gebruik steeds geweld teen ons land, terwyl hulle ons onskuldige burgerlikes doodmaak,“ het hy woedend gesê.

“Dit het daartoe gelei dat die Mujahedin wraakaanvalle op Kenia uitgevoer het. Vandag, het ‘n eenheid van die Al Shabaab Mujahedin ‘n belangrike sentrum in Kenia aangeval,” het hy bygevoeg.