Moody, een van die twee groot Amerikaanse kredietgraderingsagenskappe het Suid-Afrika Vrydagaand 27 Maart 2019 tot ‘rommel’ afgegradeer, oftewel ‘n gradering van Ba1, met ‘n ‘negatiewe vooruitsig’ wat beteken dat die land nog verder by die leer van rommelstatus kan afgly. Dit beteken dat Suid-Afrika nou ‘n ‘rommeldriekuns’ hehaal het, want sowel Standard & Poor as Fitch, die ander twee bekende graderingsagentskappye, het ons land reeds voorheen tot dié vlak afgegradeer. Dan Roodt bespreek die implikasies hiervan en sien darem ‘n sprankie hoop op die horison wat Afrikanervoortbestaan betref.
Etiket: euro
Karel Combrinck: Weimar 1918/2018
Daar is vele wat glo dat die geskiedenis hom herhaal. Kom ons hoop maar dit is nie so nie, want daar is weinig in die geskiedenis wat ons herhaal wil sien, veral die verhaal van die twintigste eeu, sekerlik die donkerste blad in die geskiedenis van die mensdom. As dit so is dat die geskiedenis hom herhaal, is dit miskien omdat die mensdom nie wil leer nie.
Die oorsake van die Tweede Wêreldoorlog is menigvuldig en kompleks, maar die hoofoorsaak is die ineenstorting van die Duitse geldeenheid in die twintigerjare van die eeu.
Ná die afgryslike menseslagting van die Eerste Wêreldoorlog wat in 1918 met die Duitse nederlaag beëindig is, het Frankryk, Engeland en Amerika ontsaglike reparasies van Duitsland geëis. Terselfdertyd het die sg. Geallieerdes die Duitse produksiemiddele, industrieë, grondstowwe ens. afgetakel en weggery. Die Franse het bv. die Swartwoud uitgekap en die hout na Frankryk gekarwei. Die gevolg was dat Duitsland reusagtige skulde opgestapel het wat hulle net nooit sou kon betaal nie.
Die President van die Duitse Reichsbank, oftewel die Duitse sentrale bank onder die Weimar regering, Rudolf Havenstein, het die probleem probeer aanpak deur steeds meer en meer Marke te druk wat die Duitse ekonomie op sy knieë gedwing het en die algemene bevolking in die diepste ellende gedompel het.
‘n Paar syfers oor die gevolge van Havenstein se besluit volg, tesame met, tussen hakies, die parallelle groei van Hitler se Nasionaal Sosialistiese (Nazi-) Party:
- Maart 1915 1$ = 4,85 Mark (Hitler totaal onbekend)
- Feb 1920 1$ = 100 Mark (Hitler begin klein groepies toespreek)
- Maart 1921 1$ = 260Mark (Hitler hou toespraak voor 6000 mense)
- Des 1922 1$ = 6,800 Mark
- Jun 1923 1$ = 193,000 Mark (Die Nasionaal Sosialiste wen 6,5% van die setels in die Reichstag.
- Nov 1923 1$ = 3,4,000,000,000,000 Mark
- Sept 1930 Die Nazi’s wen 18,3%van die setels in die Reichstag.
- Jul 1932 Nazi’s wen 37, 4% van die setels.
- Maart 1933 Nazi’s wen 48% setels. Hitler word Rykskanselier.
- Sept 1939 Tweede Wêreldoorlog breek uit.
Die Weimar-regering het geglo dat hulle geen ander keuse gehad het nie as om hulle geldeenheid te kelder ten einde aan die oorlogskuld te ontkom.
Vandag sit ons weer met ‘n situasie van astronomiese private en staatskuld. Daar is egter geen verskoning soos oorlog of oorlogskuld nie. ‘n Land soos Frankryk bestee die totaliteit van die inkomstebelasting wat sy burgers betaal aan die vereffening van die rente op staatskuld. L.W. die rente alleen. En die ander Westerse lande is nie juis beter daaraan toe nie, sommige selfs veel slegter.
In die private sektor gaan die banke steeds voort om maar te leen en te leen, dermate dat dosyne banke wêreldwyd die afgelope paar jaar bankrot en gesluit is. Talle ander banke, veral die heel grotes, is tegnies ook bankrot, maar dit is aanvaarde wysheid dat hulle “te groot is om bankrot te laat gaan”.
Hoe is dit dus moontlik dat reusebanke nie “toegelaat” kan word om in duie te stort nie? Die verklaring is tweërlei: Aanvanklik het die Westerse regerings probeer om die banke uit die verknorsing te help deur die bevolking (die middelklas) te belas. Die stadium is nou bereik dat die middelklas wêreldwyd belastingvoos is en nie verder uitgemergel kan word nie, wat maak dat Westerse regerings nou hulle toevlug neem tot … die druk van rommelnote, of soos dit ook genoem word, monopoly money.
Die Europese geldstelsel, nl. die euro, was uit die staanspoor gegrond op die Duitse Mark. Dit was trouens ‘n voorwaarde vir die toetrede van Duitsland tot die Europese Unie en die oogmerk was Duitse beheer oor die stelsel. Die Europese sentrale bank (ESB) is dus eintlik die Duitse sentrale bank met ‘n ander naam.
Vir baie jare het die Duitse sentrale bank met ‘n arendsoog gewaak oor die ESB en dus oor die lotgevalle van die euro. Die angswekkende gevolge van ‘n gepeuter met hul geldeenheid was nog te vars in hulle geheue om weer so-iets toe te laat.
Maar ongelooflik soos dit is, het Duitsland oor die afgelope paar jaar begin om, gebuk onder ‘n ondraaglike skuldlas van die staat en die groot banke, weer die druk van rommeleuros toe te laat. Die afgelope twee jaar druk die ESB 80 miljard rommeleuros per maand, so te sê in sy geheel bestem om die bodemlose put van die groot banke te probeer vul. Soos die Weimar-regering glo hulle dat hulle geen ander keuse het nie. (Die groot banke kan nie “toegelaat” word om te vou nie.)
Die Duitse nasionale skuldlas beloop tans 2, 064, 623, 120, 800 euro. Of liewer, dit was die posisie ‘n paar minute gelede, want die Duitse skuld groei teen 92,040 € per minuut. Minstens is dit ‘n syfer waarvan ons ‘n begrip kan vorm. Die jaarlikse rente op Duitse skulde beloop 48,396,856,438 euro. En, soos gesê, dis die algemene patroon in die Westerse nywerheidslande.
Die wesentlike vraag is: Wat doen die derduisende “demokraties verkose” politici wêreldwyd om die katastrofe te beredder? Hulle doen net niks, enersyds omdat die soustrein nog te lekker loop — vet salarisse en toelaes van allerlei aard, motors met bestuurders, gratis huise, ens. — en andersyds omdat hulle niks kan doen nie. Dis die groot banke wat die opdragte gee. Parlemente is niks meer nie as rubberstempels vir die banke en “demokratiese” verkiesings is weinig meer as sleutels tot die soustrein. En verder hou hulle hulle besig met die oplegging en invordering van belastings.
In skrille teenstelling met die fabelagtige rykdomme van ‘n handjie vol oligarge lewe dermiljoene mense in die Westerse wêreld vandag in armoede. Ons hoor net selde daavran. Netsoos die Weimar-regering in Duitsland in die twintigerjare, verkies “demokraties verkose” regerings om dit net te ignoreer. En so ook die fatsoenlike media, by uitstek die lakeie van die geldmagte. Hoeveel ruimte wy Die Burger bv aan die derduisende mense wat in Suid-Afrika in ellende verkeer? Ek lees die ding nie, maar my indruk is hulle bestee meer tyd aan die swangerskappe in die Britse koningshuis as aan die nood van hulle eie mense.
Dit moet vir enigeen met oë en ‘n bietjie verstand in sy kop duidelik te wees dat die situasie nie onbepaald kan voortduurtnie. Dis nie meer ‘n vraag van of die kaartehuis in duie gaan stort nie, maar wanneer en wat die gevolge gaan wees. Tog net nie weer ‘n wêreldoorlog nie, maar dis nie uitgesluit nie, helaas.
Rand versterk ná Britse rentekoersverlaging en DA-vertoning
Die rand het sy beste koers in nege maande teen die dollar bereik nadat die Bank van Engeland rentekoerse verlaag het en die Demokratiese Alliansie ‘n goeie vertoning in gister se plaaslike verkiesings gelewer het.
Die rand het vanoggend vroeg op R13,7035 teen die Amerikaanse dollar gestaan en R17,9938 teenoor die Britse pond. Die plaaslike geldeenheid het laas op 3 November 2015 teen dié koerse verhandel.
Die plaaslike verkiesings het gister invloed uitgeoefen, met die DA wat lyk asof dit die meeste stemme in Johannesburg, Pretoria, Port Elizabeth en Kaapstad gaan behaal. Sommige ontleders het dit as positief vir die rand gesien.
“Die verkiesingsuitslag lyk asof dit verwagtinge vir ‘n verandering in die vernaamste stede ondersteun,” het Simon Quijano-Evens, ‘n strateeg in ontluikende markte by Legal & General Investment Management in Londen, aan Bloomberg gesê. “Verandering is waarna markte uitgesien het, hoe gering dit ook al mag wees, gegewe die voortdurende inkomste-ongelykheid en daling in groeikoerse wat mens in Suid-Afrika waarneem.”
Teen die euro het die rand op R15,2560 te staan gekom, nadat dit nie te lank gelede nie selfs teen R18 per euro verhandel het.
Ook in Johannesburg is die rand deur ‘n meer rooskleurige bril bekyk. “Plaaslike verkiesings wat glad verloop ondersteun vanoggend sentiment, dit lyk asof ons demokrasie in ‘n goeie toestand is, daarom is dit goeie nuus,” het Ion de Vleeschauwer, hoofhandelaar van Bidvestbank in Johannesburg gesê. “Verhandeling in rentekoersverskille help ook, met die rentekoersverlaging van die Bank van Engeland wat ons opbrengs oor die kort termyn aanloklik laat lyk.”
Die Bank van Engeland het gister op sogenaamde “Super-Donderdag” besluit om die Britse koerse tot 0,25% vanaf 0,50% te verlaag terwyl die terugkoop van bates onveranderd op £375bn gelaat is.
IMF kritiseer Eurosone-hulppakket aan Grieke
Die Internasionale Monetêre Fonds het die voorwaardes van die finansiële reddingspakket deur die Eurosone aan Griekeland skerp gekritiseer omdat hulle meen die land se skuld sal waarskynlik binne die volgende twee jaar twee keer soveel as die nasionale inkomste styg.
Die IMF sê ook dat die Eurosone nou veel verder sal moet gaan om Griekeland se skuldprobleem voldoende aan te spreek.
Die organisasie is ook krities oor die hervormingsmaatreëls wat op Griekeland afgedwing word en het dit as onrealisties en onvoldoende afgemaak.
Die Griekse parlement het intussen die nuutste maatreëls aanvaar om in aanmerking te kom vir die derde hulppakket.
Van die 300 parlementslede het 229 ten gunste van die besuinigingsmaatreëls gestem, terwyl 64 daarteen gestem en ses buite stemming gebly het.
Die eerste minister, Alexis Tsipras het opposisielede se stemme nodig gehad om die hervormings deur te voer terwyl verskeie lede van sy kabinet teen die voorstelle gestem het.
Van die hervormingsmaatreëls wat die parlement moes aanvaar sluit in pensioenaanpassings, verhogings in belasting op toegevoegde waarde en beperkings op staatsbesteding.
Tsipras het voor die stemmery oor die maatreëls gesê daar is geen alternatief indien Griekeland ‘n algehele finansiële ineenstorting wil voorkom nie.
Die Europese Kommissie het amptelik voorgestel dat `n korttermyn-lening van meer as R90 miljard aan Griekeland gegee word totdat die reddingsboei van die Eurogebied gefinaliseer is.
Dit sal betaal word uit `n fonds waartoe al die 28 lidlande van die Europese Unie bydrae.
Die voorstel is met heftige teenkanting begroet van die lande wat nie die Euro gebruik nie. Lande soos Brittanje, Denemarke, die Tsjeggiese Republiek en ander wat nie deel van die Eurogebied is nie, sê hulle weier om te betaal vir die probleme wat by die Eurogebied hoort.
Die Kommissie sê hy sal wyses probeer vind sodat die EU-lidlande buite die Eurogebied nie waarborge oor die volgende paar weke hoef te verskaf nie.
Merkel oorweeg stabiliseringsmeganisme vir Grieke
Die Duitse kanselier, Angela Merkel, het vroeër gesê ‘n Europese Stabiliseringsmeganisme is nie uitgesluit tov Griekeland nie.
Merkel sê die EU sal die kwessie ondersoek voordat onderhandelinge oor ‘n ESM-program vir Griekeland oorweeg sal word.
Daar is nog geen ooreenkoms oor hoe die noodfondse oorgedra kan word nie.
Internasionale leners binne die Euro-gebied raam dat Griekeland tot 86 miljard Euro kan benodig om ‘n finansiële ineenstorting af te weer.
Die Griekse eerste minister, Alexis Tsipras, het Sondag met leiers van die Eurosone vergader, na die opskorting van ‘n volle beraad.
Volgens die BBC wil die leiers hê die Griekse regering moet oor die volgende drie dae ‘n reeks wette in die parlement deurvoer, voordat daar met gesprekke oor ‘n derde reddingsboei begin kan word.
Griekeland het intussen dringend miljarde Euro nodig om die land oor die korttermyn aan die gang te hou.
Markte min gepla oor Griekse skuldsirkus
Internasionale markte het opwaarts beweeg en die euro het nie verder verswak nie omdat beleggers glo dat Griekeland steeds ’n manier sal kry om deel van die eurosone te bly.
Die regering het ‘n referendum vir Sondag 5 Julie uitgeroep en kapitaalbeheermaatreëls ingestel nadat dit duidelik geraak het dat die land se premier nie genoeg steun het van kiesers om die eurosone te verlaat nie.
Die kommunistiese Griekse premier, Alexis Tsipras, het in ‘n brief aan die land se krediteure, verklaar dat hy die voorstelle van die Internasionale Monetêre Fonds (IMF), die Europese Sentrale Bank en die Europese Kommissie aanvaar.
Griekeland en sy krediteure moet ‘n ooreenkoms bereik oor die land se skuld nadat inwoners oorweldigend aangedui het in meningspeilings dat hulle nie die euro as geldeenheid wil laat vaar nie.
Die referendum van Sondag kan die einde van die Kommuniste se leë beloftes oor staatsuitkerings wees en anti-Europese retoriek. Tsipras het vroeër ‘n beroep gedoen vir ‘n “nee-stem”.
Die Europese Sentrale Bank het Woensdag besluit om Griekeland nie meer met noodlenings by te staan nie, en in te stem tot ‘n finansiële reddingsplan óf die gevaar te loop dat sy bankstelsel ineenstort.
Griekeland het intussen die eerste ontwikkelde land geword wat hom aan wanbetaling skuldig maak tov ‘n IMF-lening.
Dinsdag was die spertyd vir ’n betaling van sowat 1,6 miljard euro aan die IMF deur die Grieke wat hulle verontagsaam het.
Dié nuwe stel voorvereistes moet deur die Grieke aanvaar word alvorens die instellings weer ’n reddingspakket aan die wanbetalende Griekse regering sal goedkeur.
Die voorvereistes behels onder meer dat die ekonomie drasties herstruktureer word deur staatsuitgawes te beperk en sekere belastings te verhoog.
Die brief is die eerste keer dat die Griekse regering die voorstelle aanvaar, nadat hulle al vir maande lank die ergste probeer ignoreer.
Die Griekse regering het egter gevra dat die nuwe stel vereistes aangepas word.
Ontleders waarsku dat die Suid-Afrikaanse geldeenheid wisselvallig kan bly totdat die Griekse skuldkrisis opgelos is.
Die hoof van die Internasionale Monetêre Fonds, Christine Lagarde sê sy hoop dat die uitslag van Sondag se referendum in Griekeland, meer duidelikheid en sekerheid sal bring oor die land se ekonomiese situasie.
Tsipras het in ‘n uitdagende houding Griekse burgers gevra om die voorstelle deur die land se krediteure te verwerp, maar heftig ontken dat dit Griekeland kan dwing om die Eurosone te verlaat.
Griekeland al dieper in die rooi
Die Griekse minister van ekonomie, Giorgios Stathakis, het besonderhede bekend gemaak van nuwe voorstelle om die dooiepunt in die skuldkrisis te beëindig.
Hoop dat ‘n ooreenkoms binnekort met die leiers van die Eurosone-lande bereik kan word, verflou aangesien die linkse premier Alexis Tsipras se gewildheid dermate afgeneem het dat hy geen ooreenkoms op sy landgenote sal kan afdwing nie.
‘n Opstand dreig tuis teen die Griekse leier omdat hy die besuinigingsvoorstelle aanvaar het, alhoewel dit onder meer nuwe belasting op sakeondernemings en rykes insluit.
As Tsipras se regering tot ‘n val kom sal dit maande duur om ‘n nuwe leier aan te wys wat boonop nie die mees onlangse Europese skuldmaatreëls sal kan afdwing sonder ‘n mandaat nie.
Die ministers van finansies van die Eurosone het na berig word die plan verwelkom en gesê ‘n ooreenkoms kan binne dae bereik word.
Die Duitse kanselier, Angela Merkel verkeer onder groot druk omdat Rusland kan intree om Griekeland te help met ‘n gastoevoerprojek, terwyl sy klaarblyklik aan die VSA belowe het Russiese invloed te help beperk in Europa.
Griekeland loop die gevaar om nie te voldoen aan die Europese Unie se vereistes nie, indien hy nie ‘n vorige hulppakket van 1,6 miljard euro teen 30 Junie aan die Internasionale Monetêre Fonds terugbetaal nie.
Sou Griekeland besluit om uit te tree uit die eurosone, sal hulle waarskynlik weer die drachma as geldeenheid instel en inflasie gebruik om hul skuldprobleem op te los.
Dit sal beteken dat EU-belastingbetalers nie langer sal hoef te betaal vir Griekse wanbestuur nie.
Griekeland se skuldsirkus
Die Griekse eerste minister, Alexis Tsipras, het gister gesê sy linkse regering sou ten volle gebruik maak van ’n mandaat om onderhandelinge met Europese vennote aan te gaan en ten sterkste ontken dat hy bystand by Rusland sal vra.
“Ons is in ’n gevorderde stadium van onderhandelings met ons vennote in Europa en ander wat vir ons geld geleen het. Ons het ’n verpligting teenoor hulle,” het Tsipras tydens ’n mediakonferensie gesê toe hy gevra is of hy bereid is om bystand van Rusland te ontvang.
“Op die oomblik is geensins sulke gesprekke op die tafel nie.”
Tydens sy eerste buitelandse reis as eerste minister, het Tsipras in Nicosia gesê hy en pres. Nicos Anastasiades van Ciprus het ’n gekoördineerde standpunt bespreek vir ’n “brug van vrede en samewerking tussen Europa en Rusland”.
Tsipras het gesê sy land sal voortgaan om die euro te gebruik, en bygevoeg dat enigiemand wat glo klein eurosone-lande soos Griekeland en Ciprus is nie noodsaaklik in die blok nie, verkeerd bewys sal word.
Tsipras het ook ’n beroep gedoen op die vervanging van die “troika” meganisme van die Europese Kommissie, Europese Sentrale Bank en Internasionale Monetêre Fonds wat die finansiële toestand van sukkelende lidlande beheer.
Die president van die Europese Parlement, Martin Schultz het ‘n beroep op die nuwe Griekse regering gedoen om sy anti-Duitse retoriek in te perk.
Schultz sê dit is teenproduktief om Duitsland en sy leier in die openbaar te beledig.
Tsipras het voorts beweer dat Duitsland Griekeland miljarde euro skuld weens die Nazi-besetting gedurende die Tweede Wêreldoorlog. Griekeland skuld Duitsland tans miljarde euro.
Samesprekings oor Griekeland se internasionale skuld duur intussen voort. Die land se minister van finansies, Yanis Varoufakis is tans op besoek in Parys waar die Franse regering Griekeland teen Duitsland probeer afspeel het.
Varoufakisis ‘n burger van Australië wat in Brittanje studeer het en as ‘n professor by die Universiteit van Texas werksaam was.
Hy mag een van diegene wees met botsende lojaliteite in die EU. Varoufakis was voorheen ‘n ekonoom-in-opleiding vir die Valve Corporation, wat deel is van Microsoft.
Die waarskuwingstekens sê ontleders, dat Varoufakis ‘n “Trojaanse perd” vir George Soros is, is vollop.
Hy het intussen voorgestel dat sy land se terugbetalings aan ekonomiese herstel gekoppel word.
Die Britse minister George Osborne het Varoufakis gul ontvang, maar gewaarsku dat die stygende konfrontasie tussen Griekeland en die eurosone die “grootste risiko vir die globale ekonomie” inhou.
Duitsland en ander noord-Europese lande staan volgens Osborne “onverskillig” teenoor die gedagte dat Griekeland gedwing sal word om uit van die euro te tree.
Sommige ekonome sê die euro kan selfs beter sonder Griekeland vaar.
Joschka Fischer, die voormalige Duitse minister van buitelandse sake en visekanselier, sê die Syriza-oorwinning is regtig ‘n “Griekse begrafnis” vir die breër Duitse strategie van besuiniging en soberheid vir Europa.
Die regse politikus Bernd Lucke het by die AfD se partykongres in Bremen gesê Griekeland behoort so gou as moontlik uit die EU-groep van 19 lande te tree.
Rand versterk ná nuus van Europese stimulasieprogram
Die euro het op globale markte verswak en die rand versterk nadat die Europese sentrale bank (ESB) aangekondig het dat hy ‘n maandelikse bedrag van €60 miljard gaan aanwend om die eurosone-ekonomie te stimuleer met sogenaamde “kwantitatiewe verligting”. Behalwe dat die euro oornag teen die VS-dollar gedaal het, mag die Suid-Afrikaanse ekonomie ook baat by groter handel met die EU.Kwantitatiewe verligting is ‘n tegniek wat die Federale Reserwe van die VSA oor die afgelope aantal jare toegepas het, waardeur die bank geld druk en daarmee sy eie langtermynstaatseffekte koop. Dit veroorsaak dan ‘n daling in langtermynrentekoerse wat dit vir maatskappye en individue goedkoper maak om geld te leen.
Die president van die ESB, die Italianer Mario Draghi, sê dat die bank sy program om bates aan te koop uitbrei om staatseffekte en Europese institusionele skuld in te sluit. Van Maartmaand af sal die bank elke maand €60 miljard se effekte aankoop, iets wat tot September 2016 sal inhou.
Volgens ontleders in Johannesburg is Suid-Afrika een van die “ontluikende markte” wat by soortgelyke geldskepping deur die Amerikaanse Federale Reserwebank gebaat het. Dié program het egter einde verlede jaar ten einde geloop. Die meeste geld wat sodoende deur die sentrale bank vrygestel is, is in ontluikende markte se effekte belê aangesien hulle hoër rentekoerse as die uiters lae koerse in die ontwikkelde ekonomieë betaal.
Volgens ‘n senior ekonoom in Johannesburg, Craig Parker, sal die ESB se stap egter “in ‘n beperkte mate” ‘n kontantinspuiting vir Suid-Afrika beteken. Indien dit die vraag in Europa stimuleer, sou dit egter tot ‘n toename in Suid-Afrikaanse uitvoere lei.
‘n Hoofhandelaar in ontluikende markte by Investec-batebestuur, Ryan Wibberley, meen dat €60 miljard “aan die bokant” van die markverwagting was en dat globale aandelemarkte dus styg met die vooruitsig van meer geld wat in die Europese Unie ingepomp gaan word. Aandelemarkte het ook in aanloop tot die aankondiging gestyg, sê hy.
“Die aankondiging is ook goed vir die goudprys, maar nie vir die euro nie, met die Europese geldeenheid wat tot die laagste vlak in elf jaar teen die dollar ($1,1455) gedaal het, wat beklemtoon dat daar geen opbrengs op geld in die eurosone is nie. Handelaars soek daarom na opbrengs in die VSA en elders,” sê hy.
Die Suid-Afrikaanse staatseffek, die R186, het reeds met 70 basispunte gestyg sedert 2 Januarie, met oorsese beleggers wat na ‘n beter opbrengs soek.
Gistermiddag laat het globale markte gestyg ná die ESB se aankondiging. Die Dow Jones-nywerheidsindeks het sterker geopen en die Stoxx Europe 600-indeks het tot die hoogste vlak in sewe jaar gestyg.
Plaaslike het die rand gisteraand gestyg en het 1,2% teen die dollar veld gewen, tot op R11,3748, terwyl die opbrengs op die R185-staatseffek met 0,62% gestyg het.
Hierteenoor het die euro skerp gedaal en vanaf sy vorige sluiting op R1,1614 tot $1,1455 afgeneem. Teenoor die rand het die euro ook gedaal en verhandel tans teen R13,1466 teenoor die vorige R13,3669. Die JSE-effektebeurs het met 1,52% gestyg ná die aankondiging maar het effens veld verloor om met ‘n styging van 0,76% te sluit op 49 967,40 punte. Banke, asook platinumaandele en hulpbronne het gepresteer.
Vroeër het die ESB sy herfinansieringskoers op 0,05% gelaat en sy repokoers op 0,30%.
Wibberley van Investec meen dat goedkoop geld in die vorm van kwantitatiewe verligting batepryse ondersteun: “Jy leen geld teen niks en belê dit in die mark… wie sou dit nie doen nie?”
Duitsland gee geld om geweld in SA hok te slaan
Die Wes-Kaapse regering het ‘n ooreenkoms ter waarde van meer as R70 miljoen met die Duitse Ontwikkelingsbank onderteken, het RSG berig.
Die doel van die ooreenkoms is om geweld in die provinsie hok te slaan.
Die premier, Helen Zille, sê dit is deel van die ooreenkoms van ses miljoen Euro tussen Duitsland en Suid-Afrika wat verlede week deur die Duitse ambassadeur, Horst Freitag en die minister van finansies, Nhlankla Nene onderteken is.
Zille sê die geld sal gebruik word om geweld te voorkom deur middel van stedelike ontwikkeling.
Freitag sê die verbintenis is deel van – wat hy noem – ‘n omvattende bilaterale ontwikkelingsplan.
Merkel vir ‘n derde termyn verkies
Kanselier Angela Merkel se konserwatiewe party het Duitsland se verkiesing gewen, net kort van ‘n volstrekte meerderheid.
Haar konserwatiewe blok het ongeveer 41,5 % van die stemme getrek, maar haar liberale vennote het nie die parlement gehaal nie.
Daar word vermoed sy is waarskynlik in ‘n koalisie met die Sosiale Demokrate ( SPD ), wat 26% ingepalm het, sal tree.
Die resultate het getoon dat die liberale Vrye Demokratiese Party ( FDP ) net 4,8% se stemme kon trek, ‘n ramp vir die junior koalisie-vennoot wat nou vir die eerste keer in Duitsland se post- oorlog geskiedenis, geen nasionale verteenwoordiging in die parlement sal hê nie.
Voorsitter van die party Philipp Roesler het dit as “die bitterste, hartseerste uur van die Vrye Demokratiese Party” beskryf.
Die FDP is verslaan deur die Groen Party ( 8,4 %) en die voormalige kommunistiese Linkse Party ( 8,6 %). Die nuwe Alternative fuer Deutschland ( AFD ), wat onttrekking uit die euro-geldeenheid voorstaan het 4,7% gekry, ook net kort van die parlementêre drumpel.
Merkel het gesê dit is te vroeg om te sê presies wat hulle gaan doen om ‘n koalisie te vorm.
Korrespondente sê dat die 59 -jarige kanselier die kompleksiteit van die vorming van ‘n regering vroeër benadruk het.