Etiket: Rusland

Stryd rondom BRICS verhewig

Die BRICS-groepering se posisie teenoor korporatiewe mag, het gelei tot die jongste skermutseling tussen die VSA en BRICS.

By die vierde BRICS-byeenkoms in Durban het lede gesê gesonde kompetisie is ‘n voorvereiste vir ekonomiese groei.

Dit is bo-aan die agenda in Durban om onmededingende gedrag in die onderskeie lande te oorkom.

Die groep sê hulle is vasbeslote om weg te doen met monopolieë en die verbetering van die groei in opkomende ekonomieë.

Duur verbruikersgoedere, gebrek aan innovasie en stadige ekonomiese groei is rampspoedig vir opkomende ekonomieë, net soos monopolieë en nywerheidskartels sê lidlande.

Brasilië ondersoek tans sement- en koffiekartels.

Rusland se ekonomie is geruk deur samespanning toe Samsung, LG en Phillips pryse op monitors gemanipuleer het.

Indië sukkel met monopolieë op natriumkarbonaat wat gebruik word om glas te maak asook in sy sementbedryf.

En China het reeds motorvervaardigers soos Audi en Chrysler beboet vir onmededingende gedrag.

‘n Raadgewende maatskappy oor ontluikende markte, Frontier Advisory Deloitte sê egter dit is noemenswaardig dat die beleggingsbestuursmaatskappy, Goldman Sachs sy BRICS-fonds gesluit het.

Deloitte se besturende direkteur, Martyn Davies het aan ‘n beleggingsberaad in Johannesburg gesê beleggers het verkeerdelik geglo dat die wêreldekonomie na ontluikende markte verskuif, met die BRICS-lede Suid-Afrika, Brasilië, Rusland, Indië en China as die vernaamste rolspelers.

Hy sê Rusland en Brasilië se ekonomië is aan die afneem, terwyl Suid-Afrika se ekonomie vasgeval het. Slegs China is nog sterk, ten spyte van laer groeisyfers.

Poetin reageer op wilde aantygings van opkikkers

Wladimir Poetin van Rusland het gereageer op wilde aantygings teen Russiese sportlui deur die Wêreldagentskap teen opkikkers, Wada.

Hy het gesê daar bestaan geen gronde vir sulke bewerings nie.

“Sodra sulke soort aantygings gemaak word, moet bewyse ook voorsien word. Solank daar nie bewyse is nie, is dit moeilik om daarop te reageer,” het Poetin se woordvoerder, Dmitri Peskof, aan verslaggewers gesê.

‘n Komitee van Wada het Maandag verklaar dat Rusland nie aan die Olimpiese Spele moet deelneem nie en uit internasionale sport geskors moet word.

Die verklaring volg nadat Wada tot die gevolgtrekking gekom het dat daar ‘n “diepgesetelde kultuur van korrupsie in Russiese atletiek heers”.

Die verklaring het groot verbasing onder sportlui gelei, aangesien Wada swyg oor China se gebruik van opkikkers.

Ontleders meen aantygings teen Rusland deur die VSA en Brittanje is in die mode maar Wada sal dit nie waag om die opkikker-mal China uit te wys nie, omdat dit te sensitief mag wees.

Wada sal sy aanbeveling aan die IAAF deurgee, en die Raad van die IAAF sal besluit of Rusland geskors sal word.

Die IAAF word egter tans ondersoek deur Interpol vir bedrog.

Goedkoop politiekery ontsier internasionale atletiek

Amerika en Brittanje wil Rusland graag voor volgende jaar uit die Olimpiese Spele in Rio de Janeiro skors.

Die Wêreldagentskap teen opkikkers (Wada) het Maandag aanbeveel dat Rusland uitgeskop word oor “sistemiese gebreke” in die Internasionale Vereniging van Atletiekfederasies (IAAF) jeens opkikkers.

In die verslag word gesê dat die Olimpiese Spele in Londen in 2012 “gesaboteer” is deur die IAAF se trae houding.

“Ons aanbeveling is dat die Russiese Federasie in 2016 geskors word,” het Dick Pound, president van Wada, op ’n nuuskonferensie gesê.

Die Britse oud-atleet en politikus, Sebastian Coe, tans president van die IAAF, het Wada se verslag beaam en gesê Rusland behoort geskors te word.

Rusland het met 2012-Spele met 17 medaljes, tweede na die VSA geëindig.

Die Russiese intelligensiediens (FSB) was glo tydens die Winterspele in Sotsji teenwoordig, wat gelei het tot “partydigheid en ‘n gebrek aan oordeel en integriteit”.

Klagtes van korrupsie en geldwassery is ook verlede week in Frank­ryk teen sy voormalige president, die 82-jarige Lamine Diack, aanhangig gemaak.

Hy word daarvan beskuldig dat hy $1,09 miljoen in omkoopgeld gekry het om positiewe opkikkertoetse van Russiese atlete toe te smeer.

Interpol het Maandag bekend gemaak dat hy ’n wêreldwye ondersoek na korrupsie en opkikkergebruik in atletiek gaan lei teen die Russiese Federasie.

Al die gevolgtrekkings in die Wada-verslag is gebaseer op onbevestigde bronne en ongegronde feite, het die Russiese minister van sport Vitaly Mutko gesê.

Mutko sê dat Rusland jaarliks sowat 15.000 monsters neem en die totale aantal atlete wat gediskwalifiseer word staan op ongeveer 2 persent, “dieselfde as in ander lande”.

“Dit is onmoontlik om vandag iets weg te steek. Al die data is daar in die databasisse onder toesig van Wada. Baie daarvan kan net nie vervals word nie,” het hy gesê.

VSA maak gereed om Russiese vliegtuie af te skiet in Sirië

Die Amerikaanse president Barack Obama het die ontplooiing van duisende lede van die Amerikaanse spesiale magte in Sirië verdedig.

Dit is glo om opposisiegroepe te help in die stryd teen die Islamitiese Staat (ISIS), en nie ’n verbreking van sy belofte om nie by die Siriese konflik betrokke te raak nie, het Obama gesê.

“Hou in gedagte dat ons reeds met spesiale operasionele bedrywighede besig is. Hierdie is dus net ’n voortsetting van wat ons doen,” het Obama in ’n onderhoud op NBC Nightly News gesê in sy eerste openbare onderhoud sedert die ontplooiing verlede week Vrydag plaasgevind het.

“Ons plaas nie Amerikaanse troepe in die frontlinies om teen die ISIS te veg nie,” het Obama gesê.

“Ek was deurgaans konsekwent dat ons nie soos in Irak met bataljonne en besettings gaan veg nie,” het die Amerikaanse president geskerm.

Die ontplooiing van troepe vir die Amerikaanse sending in Sirië ná meer as ’n jaar se beperkte lugaanvalle teen ISIS, dui daarop dat die VSA hul bate in Sirië, ISIS, wil beskerm eerder as wil elimineer.

Twee jaar gelede het Obama die moontlikheid van Amerikaanse infanterie in Sirië uitgesluit, maar die Amerikaanse militêre besluit om duisende Siriese “rebelle” te bewapen en op te lei, was ‘n volslae mislukking, nadat die “rebelle” by ISIS aangesluit het.

Rusland en Iran se militêre ondersteuning van die Siriese president, Basjar al-Assad, in sy stryd teen ISIS, het Obama in ‘n onbenydenswaardige posisie geplaas.

Die Amerikaanse lugmag het intussen ook ‘n dosyn vegvliegtuie wat spesialiseer in lug-tot-lug aanvalle na Sirië gestuur.

Amptelik, is die ontplooiing van F-15C Eagle tweemotorige vegvliegtuie by Incirlik, Turkye, bedoel om “die veiligheid te verseker” van Amerika se NAVO-bondgenote, het Laura Seal, ‘n verdedigingswoordvoerder, aan The Daily Beast gesê.

Dié ontplooiing het wenkbroue laat lig, want die VSA dring daarop aan dat sy magte teen ISIS ontplooi word, maar ISIS het geen vliegtuie van sy eie nie.
 
Die F-15s sal die eerste Amerikaanse vegvliegtuie in die streek wees wat streng lug-tot-lugaanavlle uitvoer en hul vlieëniers is opgelei om uitsluitlik vyandelike vegvliegtuie af te skiet.

Dit is opmerklik dat F-15Cs nooit ontplooi is in Afghanistan nie, en hulle het ook nooit deelgeneem in die VSA-geleide besetting van Irak nie.

Ontleders meen dié ontplooiing is dus gemik teen Russiese vliegtuie wat aanvalle op ISIS uitvoer.

ISIS beset Sirië se belangrikste waterbron, naamlik die Eufraatrivier.

Stuur Kubaanse ingenieurs terug sê Saisi

Suid-Afrikaanse ingenieurs het vroeër gevra dat Kubaanse ingenieurs wat deur die ANC ingebring is om glo dienslewering in die Vrystaat te help verbeter, terug huis toe gestuur moet word.

Die Suid-Afrikaanse Instituut vir Siviele Ingenieurswese (Saisi) het sy afgryse en afkeuring uitgespreek oor die Vrystaatse regering se besluit om Kubaanse ingenieurs in te voer.

Saisi se uitvoerende hoof het gesê Kubaanse ingenieurs moet nie toegelaat word om in Suid-Afrika te werk as hulle nie deur die Raad vir Ingenieurswese van SA (ECSA) geregistreer kan word nie.

“Hulle kan ook nie aspirant-geregistreerde nagraadse ingenieurs in Suid-Afrika mentor nie, volgens ‘n wet van die Suid-Afrikaanse regering, die Ingenieursprofessie Wet van 2000,” het Manglin Pillay gesê.

Sowat 40 Kubaanse ingenieurs het vroeër in die land aangekom om in die Vrystaat te werk.

Hulle sal reuse-salarisse ontvang, tesame met byvoordele en reistoelaes wat ongeveer R180 miljoen oor drie jaar sal beloop.

Die Vrystaatse premier Ace Magashule het gesê die Kubane is “hoogs gekwalifiseerd”, maar Kuba, ‘n kommunistiese distopie van armoede en hongersnood, wys ‘n gapende gebrek aan ingenieursvernuf.

Vrystaatse munisipaliteite sal miljoene rande moet stort in die aanstellings, terwyl die meeste reeds nie kop bo water kan hou nie.

Die Nketoana-munisipaliteit het in Mei vanjaar reeds R44 miljoen aan Eskom geskuld. Die provinsie se munisipaliteite skuld hul diensverskaffers meer as R3 miljard.

Die Kubane se velde van kundigheid sluit siviele ingenieurswese, hidrouliese, strukturele en meganiese ingenieurswese sowel as projekbestuur in. Dié gespesialiseerde vaardighede is oral in Suid-Afrika beskikbaar.

Landelike munisipaliteite het ook beperkte behoeftes aan sulke vaardighede.

Kuba se parasitiese verhouding met Rusland het versuur nadat die VSA diplomatieke bande met die eiland herstel het op 11 April 2015. In 2008 reeds het Havana geweier om die wegbreek-republieke van Abkazië en Suid-Ossetië te erken.

Russiese nikkel- en oliebelange op die eiland is intussen deur Raoul Castro aan Kanadese en Meksikane nyweraars oorhandig.

VSA teen die toue in Sirië

By ‘n geskiedkundige byeenkoms op 30 Oktober 2015 in Wene, Oostenryk, het die wêreld se groot moondhede ooreengekom dat die staatlike integriteit van Sirië behoue sal bly.

Die besluite by die vergadering het die VSA se planne om Sirië te destabiliseer, erg geknou.

China, Egipte, Frankryk, Duitsland, en ander EU-lidlande, Iran, Irak, Jordanië, Libanon, Oman, Qatar, Rusland, Saoedi-Arabië, Turkye, die Verenigde Arabiese Emirate, die Verenigde Koninkryk, die Verenigde Nasies, asook die Verenigde State [“die deelnemers”] het vergader om die ernstige situasie in Sirië te oorweeg.

Die deelnemers het vergader oor hoe om so gou as moontlik ‘n einde aan die geweld te bring dmv ‘n openhartige en konstruktiewe bespreking oor knelpunte.

Terwyl aansienlike verskille steeds onder die deelnemers heers, het hulle ‘n wedersydse begrip oor ‘n aantal kwessies uitgespreek:

Sirië se eenheid, onafhanklikheid, territoriale integriteit en sekulêre karakter fundamenteel is.

Staatsinstellings sal dus ongeskonde bly en die regte van alle Siriërs, ongeag etnisiteit of godsdienstige denominasie, moet beskerm word.

Dit is noodsaaklik om al die diplomatieke pogings om die oorlog te beëindig, te bespoedig.

Humanitêre toegang sal verseker word oor die hele gebied.

ISIS en ander terreurgroepe, soos deur die Veiligheidsraad van die VN aangewys, moet verslaan word.

Ingevolge die 2012 Geneva Communique en VN-resolusie 2118, moet ‘n politieke proses lei tot geloofwaardige, inklusiewe, en nie-sektariese landsbestuur, gevolg deur ‘n nuwe grondwet en verkiesings.

Hierdie verkiesings moet onder VN-toesig plaasvind, maar die Siriese mense sal oor die toekoms van Sirië besluit.

Die Amerikaanse president, Barack Obama het intussen dosyne Spesmagte in Sirië ontplooi om ISIS-terroriste te beskerm teen Russiese lugaanvalle.

Obama het die onderneming gegee dat Amerikaanse soldate nie by gevegte betrokke sal raak nie.

Obama sê die ontplooiiing is net ‘n voortsetting van die hulp wat Amerika reeds aan “gematigde” insurgente, oftewel ISIS, verskaf.

Die Wit Huis het Vrydag aangekondig dat byna 50 lede van die Spesmagte na Sirië gestuur word om opposisiemagte op te lei, raad te gee en by te staan.

Nadat die VSA se betrokkenheid in Sirië met ISIS-terroriste op die lappe gekom het, moet die Pentagon bontstaan om vure dood te slaan.

Egipte sê Russiese vliegramp was tegniese fout

Die Russiese ministerie van buitelandse sake het gewaarsku dat dit nog te vroeg is om te bespiegel oor die moontlike verloop van die gebeure wat gelei het tot die vliegramp in Egipte.

Die Russiese passasierstraler, ‘n Airbus A321, met 224 mense aan boord het Saterdagoggend vroeg in Sinaï, Egipte, neergestort.

Die vliegtuig, ‘n huurvlug, het van die toeristemekka Sharm el-Sheikh in Egipte opgestyg maar kort daarna het die vlieëniers glo ’n tegniese fout by lugruimbeheerders aangemeld.

“Hoe kan ons praat oor enige weergawes, as ons spesialiste pas begin het om deur die wrakstukke van die ongelukstoneel te sif?” het die ministerie se woordvoerder Maria Zakharova aan Rossiya 1 TV-kanaal gesê.

Zakharova het geduld gevra en gesê feite eerder enige spekulasie rondom die tragedie moet oorweeg word. Sy het gesê dat die Egiptiese owerhede hul volle ondersteuning en samewerking gee.

Egiptiese owerhede het vroeër gesê dat die vliegtuig nie afgeskiet is nie, en vuilspel uitgesluit.

Alhoewel die Russiese regering nog geen ‘n omvattende verklaring vrygestel het nie, het Reuters berig dat ‘n “groep verbonde aan die Islamitiese Staat” verantwoordelikheid vir die ongeluk aanvaar het.

Intussen het die VSA ook bekendgemaak dat ‘n Duitse klets­rymer in ‘n lugaanval in Sirië gedood is.

Denis Cuspert, wat sy naam na Abou Maleeq verander het, is in Berlyn gebore en was eens ’n gewilde rapper wat opgetree het onder die naam Deso Dogg. In 2012 het hy glo by ISIS aangesluit en lede gewerf.

In een propagandavideo hou Cuspert selfs afgekapte kop vas.

Volgens Amerikaanse beamptes is Cuspert en twee ander mense dood in ’n lugaanval wat op 16 Oktober uitgevoer is.

Kiëf probeer Minsk-vrede ondermyn

Regeringsbronne in Kiëf het bekend gemaak dat ’n soldaat in die konflikgeteisterde ooste van die Oekraïne doodgeskiet is.

Dit is glo die eerste sterfgeval onder regeringsmagte in ’n maand.

Dié nuus kom pas nadat president Hollande van Frankryk verklaar het dat die Minsk-vredesooreenkoms verleng behoort te word. Dit sou strek tot Desember 2015.

Dinsdag het pro-Russiese rebelle op regeringsposisies suid van Avdiivka gevuur, volgens Kiëf. Die dorp is net noord van die rebelle-vesting Donetsk geleë.

Twee ander soldate is in die skietery gewond.

Kiëf en die rebelle het ’n skietstilstandooreenkoms gesluit wat op 1 September in werking getree het.

Op 14 September het regeringsmagte twee sterftes aangemeld en die rebelle het verlede naweek ’n vegter aan die buitewyke van Donetsk verloor.

Die konflik het begin toe NAVO ‘n destabiliseringsoefening van stapel gestuur het in die Oekraïne. Meer as 8 000 mense is reeds dood en 1,5 miljoen haweloos gelaat in die konflik.

Na ‘n referendum in die Krim-skiereiland in Maart 2014 is dit as ‘n selfregerende gebied deur Rusland verklaar.

MH17-verslag vrygestel

Die verslag oor Vlug MH17 van die Maleisiese lugdiens, wat verlede jaar neergestort en die dood van 298 mense veroorsaak het nadat dit neergeskiet is deur ‘n Buk-missiel, is dié week vrygestel maar dit is nie bekend wie die missiel afgevuur het nie.

Só het Tjibbe Joustra, ‘n Nederlandse militêre inligtingsoffisier, by die bekendmaking van die Nederlandse Ondersoekverslag die week verklaar.

Nederland het die ondersoek gelei omdat die meeste van die slagoffers Nederlanders was.

Joernaliste kon geen vrae aan Joustra stel oor die bevindinge nie. Kwelvrae oor die afwesigheid van lugfoto’s wat die ligging van die missielstelsel sou kon opklaar, is dus nie toegelaat nie.

Die vliegtuig wat van Amsterdam na Kuala Lumpur op pad was, is afgeskiet in ‘n lugruim wat veronderstel was om gesluit te wees.

Die plofkop het omtrent ’n meter van die stuurkajuit ontsteek en honderde stukke metaal losgeruk wat die Boeing 777 laat opbreek het, het Joustra, gesê.

Die missiel is van binne ’n gebied van 320 km² afgevuur in die ooste van die Oekraïne, het Joustra gesê, maar die Oekraïne moes die lugruim bo die oorlogsone gesluit het.

Op 17 Julie, die dag van die voorval, het daar 160 vliegtuie oor dié gebied gevlieg.

Hy het nie tydens die perskonferensie enige aanduiding gegee of die missiel deur Russies-­gesinde rebelle of regeringsmagte afgevuur is nie.

Almaz-Antey, die Russiese vervaardiger van die Buk missielstelsel, sê die missiel is afgevuur vanaf Zarosjtjenskoje, ‘n nedersetting suid 7 kilometer Sjakhtorsk, wat beheer was deur die Oekraïense weermag.

Almaz-Antey het hul teleurstelling uitgespreek dat die Nederlandse ondersoekspan nie kennis geneem het van die skrapnelpatroon van die missiel nie wat daarop dui dat selfs NAVO-lande oor sulke wapens beskik.

Daar is nog tot twee weke gelede wrakstukke opgetel en nog stukke kan in die toekoms gevind word, hoewel dit nie die raad se bevindings sal verander nie, het Joustra gesê.

Die rekonstruksie van die vliegtuig met dele wat op die toneel gekry is, was “gekompliseerd” omdat die wrakstukke in ‘n oorlogsgebied bymekaargemaak moes word, het hy verduidelik.

Volgens hom was die doel van die ondersoek nie om iemand vir die voorval te blameer nie, want die voorval word ook strafregtelik deur Nederland ondersoek.

Die kwessie rakende is die skuldige party is sentraal tot die ondersoek aangesien die EU sanksies teen Rusland gestem nog voor daar vasgestel is wie verantwoordelik gehou moet word vir die afskiet van die passasierstraler.

Twee mortiere land op Russiese ambassade in Damaskus

Twee mortiere het Dinsdag die Russiese ambassade in Da­maskus getref en paniek gesaai onder honderde mense wat daar byeengekom het om hul steun vir Moskou se lugaanvalle in Sirië te betuig.

Volgens ooggetuies het ongeveer 300 mense buite die Russiese ambassade vergader om Rusland te bedank vir die onlangse ingryping in die oorlog in Sirië, toe die mortiere die ambassade­gebou in die Mazraa-woonbuurt in die hoofstad getref het.

’n Ooggetuie buite die ambassade het aan Associated Press gesê toe die eerste mortier die ambassade tref, het rook uit die gebou begin borrel. Mense het op die vlug geslaan midde wydverspreide paniek.

Terwyl mense besig was om weg te hardloop, het die tweede mortier die ambassade getref. Daar was nie enige ongevalle nie, maar talle is beseer.

Die sogenaamde “rebelle”, wat eintlik internasionale terroriste is, het in die woonbuurte van die hoofstad in die verlede die ambassade geteiken, maar dit was aanvanklik nie duidelik of Dinsdag se aanval gemik was teen die ambassade of die skare wat buite vergader het nie.

Rusland het op 30 September met lugaanvalle in Sirië begin. Rusland hou vol dit is teen terroriste van die Islamitiese Staat-groep gemik.

Die Amerikaans-geleide koalisie voer egter aan dat Rusland “gematigde” terroriste teiken wat teen die bewind van pres. Bashar Assad veg.

Die Russiese minister van Buitelandse Sake, Sergei Lawrof, het die aanval as ‘n terreurdaad beskryf teen diegene wat terrorisme beveg.

Die aanval kom te midde van die Russiese lugveldtog se suksesse teen ISIS-terroriste.

Fopverslag steek MH17 dieper in die doofpot

Nederlandse navorsers het tot die gevolgtrekking gekom dat die Maleisiese vlug MH17 afgeskiet is deur ‘n “Russies-vervaardigde Bukmissiel, afgevuur deur rebelle in Oos-Oekraïne”, het ‘n Nederlandse dagblad, die Volkskrant, Dinsdag berig.

Die finale verslag is amptelik onthul by ‘n Nederlandse militêre basis by Gilze Rijen waar joernaliste verbied is om vrae te stel.

Die Boeing 777 was op pad na Kuala Lumpur van Amsterdam toe dit oor die ooste van die Oekraïne op 17 Julie verlede jaar afgeskiet is. Al die 298 mense aan boord, insluitend 80 kinders en 15 bemanningslede is dood.

Australië het intussen ‘n amptelike nadoodse ondersoek deur die Coroners Court in Melbourne wat onthul dat die passasiers se beserings nie te wyte was aan ‘n Buk-missiel nie, as geheim verklaar.

Europese juriste sê daar is ruimte vir eise omdat die Oekraïense lugvaartowerheid bewus was van die gevaar, en ten spyte van die risiko nie opgetree het nie.

Die afskiet van ‘n passasiersvliegtuig is ‘n oorlogsmisdaad. Ondertekenaars van die Roomse Statuut is veronderstel om maatreëls in plek te hê om oorlogsmisdadigers te vervolg.

Die verslag lui voorts: “Dit is nie die doel van so ‘n ondersoek om die blaam of aanspreeklikheid aan te wys nie.”

Die Oekraïne kon saam met Australië, Rusland, Engeland en die VSA, kommentaar gee op die inhoud van die ondersoek, wat dui op samespanning omdat die Oekraïne ‘n hoofverdagte blyk te wees.

Lees verder.

NAVO kla luidkeels oor Russiese veldtog teen ISIS

Die sekretaris-generaal van die Noord-Atlantiese Verdragsorganisasie, Jens Stoltenberg, het Donderdag in Brussel gesê ministers van verdediging van die NAVO-alliansie moet NAVO se eie veiligheid oorweeg midde die “kommerwekkende toename in Russiese militêre aktiwiteite” in Sirië.

Hy sê Navo is gereed om, indien nodig, magte te ontplooi om die alliansie-lid, Turkye, te verdedig. Turkye is een van die lande wat ISIS steun.

Russiese vegvliegtuie het Woensdag ­missiele afgevuur in die eerste gekombineerde offensief met troepe van die Siriese regering sedert Moskou verlede week met sy militêre veldtog in Sirië begin het.

NAVO het verlede naweek herhaaldelike skendings van Turkye lugruim deur Russiese vegvliegtuie aangemeld, maar die Turkse premier Ahmet Davutoglu het aan joernaliste gesê die voorvalle het nie betrekkinge tussen die twee lande aangetas nie.

Volgens Davutoglu, het Moskou Ankara verseker dat sodanige voorvalle in die toekoms uitgeskakel sal word.

NAVO het intussen Maandag nietemin in ’n verklaring geëis dat die skendings moet end kry.

Rusland het voorvalle in die Turkse lugruim toegeskryf aan grensbewaking.

Brittanje se minister van verdediging, Michael Fallon, het Rusland daarvan beskuldig dat die land se betrokkenheid in Sirië nie soseer teen die Islamitiese Staat-groep (ISIS) gemik is nie, maar eerder om die regering van pres. Bashar al-Assad by te staan.

Rusland se weermag is op versoek van die Siriese president ontplooi teen internasionale terreur, terwyl NAVO oor geen wettige mandaat beskik om die Siriese leierskap omver te werp nie en boonop internasionale terreur stig om dit te bereik in die vorm van ISIS.

Navo-woordvoerders het die vrees uitgespreek dat die situasie kan vererger en “nog gevaarliker” kan word.

Poetin, Obama vergader oor Sirië

In sy eerste toespraak by die Verenigde Nasies (VN) se Algemene Vergadering in ’n dekade, het die Russiese president, Vladimir Poetin, Maandag gevra vir ’n breë VN-koalisie om teen die Islamitiese Staat-jihadiste te veg voor sy ontmoeting met pres. Barack Obama van Amerika.

Ná afloop van die ontmoeting het Poetin sy gesprek met Obama as “konstruktief, saaklik en verrassend oop” bestempel.

Die 90 minute ontmoeting tussen die twee leiers was die eerste in byna twee jaar sedert Amerika Moskou die rug begin toekeer het.

Dit volg nadat Obama toegegee het dat hy bereid is om met die sterkman van die Kremlin in gesprek te tree ten einde die bloedvergieting in Sirië te beëindig.

Rusland het opnuut tot die toneel toegetree deur troepe en vegvliegtuie na Sirië te stuur.

Dit het vrees in Westerse geledere laat ontstaan dat Moskou sy aan sy met sy ou bondgenoot, pres. Bashar al-Assad, sou veg.

Die Kremlin het eise van die Weste en streekrolspelers, soos Turkye, dat Assad die trekpas moet kry, van die tafel gevee en dring daarop aan dat lede van die VSA-geleide koalisie met Rusland kragte moet saamsnoer om die groter euwel, die Islamitiese Staat, te verslaan.

Ná afloop van die ontmoeting met Obama het Poetin tevrede gelyk met die erkenning dat Rusland wel ’n rol te speel het.

’n Senior Wit Huis-woordvoerder het egter gesê al stem albei leiers saam oor die noodsaaklikheid van politieke transformasie in Sirië, verskil hulle wesentlik oor die rol van Assad.

Rusland voer lugaanvalle teen ISIS uit

Rusland het Woensdag 20 lugaanvalle in Sirië uitgevoer na hulle deur die land se president versoek is om op te tree teen internasionale terroriste.

Die Kremlin het die militêre ingryping goedgekeur om pres. Basjar al-Assad, ‘n bondgenoot in die streek, te help om militante te verdryf.

Pres. Wladimir Poetin het eenparige steun van sy parlement ontvang om lugaanvalle op die Islamitiese Staat (ISIS) in Sirië uit te voer.

Washington is in ‘n moeilike posisie geplaas, nadat dit duidelik geword het dat Amerikaanse lugaanvalle nie die opmars van ISIS stuit nie.

Moskou het Washington reeds weke gelede oor die ingryping ingelig om ‘n verenigde front teen internasionale terreur te skep, maar die VSA het min belangstelling getoon.

Rusland het die Amerikaanse lugmag versoek om die Siriese lugruim tydens die operasie te vermy, het John Kirby, woordvoerder van die Amerikaanse departement van buitelandse sake, gesê.

Rusland en die VSA het teenstrydige weergawes gegee van watter teikens aangeval is.

Die Amerikaners het gesê dit blyk die teikens was in die Homs-provinsie, maar nie in gebiede wat deur die IS beheer word nie, terwyl Rusland aangedui het dat hulle reeds 8 ISIS-posisies uitgewis het.

Verskeie rebellegroepe is blykbaar in dié provinsie gevestig, waaronder talle wat as die Free Syrian Army bekend staan. Hulle word deur die VSA ondersteun.

Die Russiese ministerie van verdediging het gesê die aanvalle was op ISIS-militante gemik en dat arsenale, ammunisie, infrastruktuur en brandstof van die IS in die aanvalle getref is.

Poetin wil verhoed dat internasionale terroriste wat in die Russiese Federasie gewerf is, terugsypel en terreurdade pleeg.

Rusland het vroeër beklemtoon dat die Amerikaanse inval in Sirië nie deur die VN goedgekeur is nie en strydig is met Internasionale Wetgewing.

Senator Dick Black, ‘n Amerikaanse politikus het intussen erken dat Turkye, ‘n NAVO-lid, agter die Islamitiese Staat sit. Turkye het 300 lugaanvalle teen die Koerdiese minderheid uitgevoer en slegs één teen ISIS.