ISIS – Bladsy 12 – praag.co.za

Karel Combrinck: Lieflingsobsessies van die linkses

‘n Interessante situasie is in die Midde-Ooste aan’t ontwikkel. ‘n Sweedse omgeboude vistreiler met jeugdige aktiviste aan boord is onderweg na die kus van Gasa om die land- see- en lugblokkade wat die Israeli’s sedert 2006 daar in stand hou, te probeer verbreek. Om dit nog interessanter te maak, voer die Islamitiese staat (ISIS) skynbaar in die mou om die skip aan te val ten einde nog meer aandag op die situasie te vestig.

Die skip, die Marianne av Gothenburg, met ‘n onbekende aantal jong aktiviste aan boord, is tans in die Middellandse See, waar dit vanaf Sisilië, oor Kreta na die Oos-Middellandse See onderweg is met as finale bestemming, die kus van Gasa, waar dit by ander vaartuie gaan aansluit om, wat bekend staan as die « Flotielje 111″, te vorm.

Lesers mag nog onthou van die insident in 2010 toe ‘n groep van ses skepe uit Turkeie na die Gasagebied gevaar het met die doel om die blokkade te ontset en om humanitêre hulp aan die inwoners van die Gasastrook te verleen. Die flotielje is in internasionale waters deur die Israeliese vloot en lugmag onderskep en nege van die opvarendes is gedood.

Uiteraard is dit vir ons, as Afrikaners, moeilik om veel simpatie of ondersteuning te betoon met ‘n Sweedse inisiatief van watter aard ook al, selfs wanneer dit op die oog af geregverdig is. Nietemin is dit so dat die Israeli’s sedert 2006 van Gasa ‘n soort opelugkonsentrasiekamp gemaak het, deur ‘n militêre blokkade wat die mense van die gebied van alle verkeer met die buitewêreld ontneem het, met gepaardgaande hongersnood, siektes en ellende.

Die blokkade, wat ingevolge die volkerereg geheel en al onwettig is, het die »internasionale gemeenskap » tot dusver maar relatief min gesteur. Die volkereg, soos telkemale reeds aangetoon, kom in die praktyk neer op weinig meer as bloot die wil van die magtigste, d.w.s. Amerika. Soos in baie ander situasies moet die begrip « internasionale gemeenskap », hier ook verstaan word as ‘n eufemisme vir wat Amerika aanneemlik vind. En in aangeleenthede betreffende die Midde-Ooste is Amerika die volledige en gewillige lakei van die Israeli’s.

Die Islamitiese staat, bekend as ISIS, is ‘n ekstremistiese Soenni-organisasie wat, danksy Amerikaanse bemoeienis reeds die helfte van Irak beheers en dreig om Sirië ook te oorrompel, en wat bande het met militante groepe in Gasa. Daarom sou ‘n mens wou dink dat ISIS die Sweedse skip goedgesind sou wees, maar in hierdie deel van die wêreld maak dit nie sin om sin te maak nie. ISIS is bloot een van die rolspelers in die gebied, maar ‘n giftige en gevaarlike een. Die probleem wat ‘n mens het met Israel is dat hulle vyande dikwels so weersinwekkend is dat dit selfs die Israeli’s goed laat lyk.

Vanselfsprekend is die media in hierdie geval so ietwat oorhoops, want hulle het te make met teenstrydighede tussen omtrent al hulle lieflingsobsessies. Hulle beheptheid met die Jodedom enersyds en met die Palestyne van Gasa andersyds (‘n rassesituasie!), en met die reg van linkses om te betoog en te manifesteer kom hier heel netjies bymekaar. Vandaar dan ook die relatiewe mediastilte oor die situasie rondom die Sweedse skip. Ons sal maar kyk hoe lank hulle dit kan ignoreer. Net totdat die eerste lyke weer begin huis toe kom.

Irak-mislukking met nuwe Amerikaanse oorlogsgier beantwoord

Tot 450 Amerikaanse militêre raadgewers gaan na Irak gestuur word om die land te help om sy soldate op te lei.

Tot dusver het die VSA se buitelandse beleid tot niks in die streek gelei nie. Ontleders het met verbasing gereageer op die aankondiging en gesê dit lyk asof Amerikaanse mislukkings met ‘n nuwe oorlogsgier uitgebrei sal word.

Die Withuis sê in ‘n verklaring president Barack Obama het die besluit geneem ná ‘n versoek deur die Irakse eerste minister, Haider Al-Abadi.

Die groep sal gesetel wees by ‘n militêre basis in die Anbar-provinsie waarvan die hoofstad, Ramadi, in Mei deur militantes van die Islamitiese Staat beset is.

Dit sal die getal Amerikaanse opleidingskampe in Irak op vyf te staan bring en sowat 9000 Irakse soldate is reeds by die vier bestaandes opgelei.

Die meeste van dié toerusting en opleiding het egter intussen die opkoms van ISIS in die streek ondersteun, toe oudsoldate in Irak in groot getalle by die groep aangesluit het.

‘n Londense taxi-bestuurder is selfs daaraan skuldig bevind dat hy bomme vervaardig het wat Amerikaanse soldate in Irak geteiken het. Anis Abib Sardar is die eerste persoon wat in ‘n Britse hof skuldig bevind is aan ‘n misdaad in die Irakse konflik.

Die hof het gehoor dat minstens een van sy bomme in 2007 die lewe van ‘n Amerikaanse soldaat wes van Bagdad geëis het. Die Amerikaanse Federale Speurdiens het Sadar se vingerafdrukke op twee van die bomme gekry.

Kort nadat President Barack Obama van Amerika die ontplooiing van ‘n bykomende 450 Amerikaanse militêre opleidingspersoneel na die Anbar-provinsie in Irak goedgekeur het, is hy deur die Australiese premier Tony Abbott ondersteun in ‘n oproep om djihadiste te beveg.

Die Islamitiese Staat het die afgelope tyd groot oorwinnings in die gebied behaal. Abbott sê die ISIS is ambisieus en het sy oog op verskeie dele van die wêreld.

Minstens agtien mense is dié week dood in ‘n reeks bomaanvalle in die Irakse hoofstad Bagdad.

Agt van die slagoffers is dood toe ‘n bom naby ‘n restaurant ontplof het. Die militante Islamitiese Staat word glo van die jongste terreuraanvalle verdink.

Oorlogsmisdadiger Blair kry skop onder die sitvlak

Die voormalige Britse eerste-minister Tony Blair, wat deesdae vir sy gruwelike menseregskendings en oorlogsmisdade onthou word, het bedank as die spesiale vredesgesant vir die Midde-Ooste.

Sy bedanking kom te midde van Anglo-Amerikaanse pogings om kernsamesprekings met Iran te voltrek tot hulle voordeel.

Behalwe dat Blair se posbeskrywing aangedui het dat hy vrede in die Israelse konflik met die Palestyne sal probeer bewerkstellig vir die agt jaar wat hy as vredesgesant gedien het, was sy ander taak om vyande teen Iran saam te snoer.

Hy het kennelik klaaglik misluk as gesant van die “Kwartet” (waaronder die VSA, Rusland, die EU en VN verstaan word) om vrede te skep.

In sy termyn het Israel ‘n bloedige aanval op Palestynse burgerlikes geloods.

Blair het sy bedanking skriftelik aan die VN se sekretaris-generaal gestuur. Selfs ondersteuners van hom sê Blair het “min impak” op die situasie in die Midde-Ooste gehad.

Blair het nooit om verskoning gevra vir die politieke ramp in Irak nie, waar ISIS vandag oorheers.

Hy het eenvoudig vier jaar later in Jerusalem opgedaag met ‘n span wat honderde miljoene in akkommodasie en lugtariewe verkwis het, en daarin geslaag om absoluut niks in byna ‘n dekade te vermag nie, behalwe chaos.

Dit het hy reggekry deur glo meer as 100 keer na die gebied te reis!

Tweede tiener wou by ISIS aansluit

Die minister van staatsveiligheid, David Mahlobo het bevestig dat ‘n tweede tiener van Kaapstad gekeer is voordat sy by die Islamitiese Staat kon aansluit.

Die hoërskool-leerder van Grassy Park op die Kaapse Vlakte is ná ‘n wenk by die Kaapstadse Internasionale Lughawe aangekeer, berig RSG.

Mahlobo sê sekere gemeenskappe in die land word deur die ISIS-militante geteiken.

Die veiligheidsdienste het na bewering gereageer op grond van inligting wat deur die eerste Kaapse meisie verskaf wat by die ISIS wou aansluit. Die twee is glo vriendinne.

Die departement en die Valke het glo reageer op inligting wat ‘n 15-jarige meisie van Kenwyn verskaf het.

Mahlobo het sedertdien ouers herhaaldelik gemaan om hul kinders se internetgebruik dop te hou. Hy het Dinsdag weer die waarskuwing tydens ‘n perskonferensie voor die minister se begrotingsdebat in die parlement uitgereik.

“Ons weet dat ISIS jongmense teiken en die internet daarvoor gebruik,” het Sonto Kudjoe, direkteur-generaal van staatsveiligheid, gesê.

Intelligensiebronne sê egter hulle ondersoek ‘n fisiese teenwoordigheid van werwers van die jihad-groep in die land.

Mahlobo het gesê staatsveiligheidsagentskappe is baie paraat oor die kwessie van werwing deur fundamentalistiese groepe en hulle bly in kontak met gemeenskappe wat as teikens beskou word. Hy het gesê sedert die tiener van Kenwyn gepoog het om by ISIS aan te sluit, het verskeie gemeenskapsgroepe sy departement gekontak om te sê dat hul kinders aangehits word om dit ook te doen.

“In Kaapstad het ons met die Moslemregsraad vergader,” het hy gesê. Kinders word glo daagliks gewerf.

ISIS aanvaar verantwoordelikheid vir Texas-aanval

Die Islamitiese staat het verantwoordelikheid vir die aanval in Garland, Texas, via sy Al Bayan radiostasie aanvaar.

Die Islamitiese staat (ISIS) het in ‘n verklaring Dinsdag beweer dat dit die eerste aanval van die terroriste-groep op Amerikaanse bodem was en bygevoeg dat twee van sy “soldate” probeer het om ‘n aanval uit te voer omdat die uitstalling “negatiewe foto’s van die profeet Mohammed bevat” het AFP berig.

Die jihadistiese groep het gewaarsku dat dit die begin van ‘n terreurveldtog sal wees wat “groter en bitterder” sal word.

Beide aanvallers is doodgeskiet in ‘n parkeerterrein buite die die gebou waar die tentoonstelling gehou is.

Die twee is glo kamermaats Elton Simpson en Nadir Soofi, van Phoenix.

Dit blyk dat Simpson sedert 2006 dopgehou word. In 2011 is hy skuldig bevind aan ‘n terreur-verwante oortreding nadat vir FBI-agente gelieg het oor sy begeerte om na Somalië te reis en aan te sluit by jihadistiese groepe.

Geert Wilders het by die geleentheid opgetree. Hy is ongedeerd.

ISIS gaan van krag tot krag

Die Islamitiese Staat (ISIS) is die mees suksesvolle radikale Islamitiese groep wat groot dele van die grondgebied in die ooste van Sirië en oral in die noorde en weste van Irak ingeneem het.

‘n Verslag wat aan die VN se Veiligheidsraad in Julie verlede jaar voorgelê is deur ‘n VN-waarnemersmissie (UNDOF), toon dat dat Israel ten nouste betrokke is by die ondersteuning van ISIS.

Die Israelse premier Benjamin Netanyahu, het die skepping van ISIS verwelkom in ‘n toespraak in Junie 2014 by Tel Aviv Universiteit se INSS-byeenkoms.

Intussen het ‘n voormalige Amerikaanse generaal Wesley Clarke in ‘n onderhoud met CNN ook toegegee dat ISIS geskep is deur die VSA se “vriende en bondgenote”.

Die groep se brutale taktiek, insluitende massamoord en ontvoering van lede van godsdienstige en etniese minderhede, asook die onthoofding van soldate en joernaliste, het vrees en woede in die wêreld ontlok.

Die groep beplan die totstandkoming van ‘n kalifaat, ‘n staat wat deur ‘n enkele politieke en godsdienstige leier volgens sjaria, die Islamitiese wet, regeer word.

Al is die groep tans beperk tot Sirië en Irak, het ISIS beloof om die ” grense van Jordanië en Libanon te breek” en Palestina te bevry. Dit kry steun van Moslems oral in die wêreld en eis dat almal ‘n alliansie met sy leier, Ibrahim Awad Ibrahim Ali al-Badri al-Samarrai, beter bekend as Abu Bakr al-Baghdadi, aangaan.

ISIS se oorsprong dateer na die oorlede Abu Musab al-Zarqawi, ‘n Jordaniër wat die beweging Tawhid wa al-Jihad in 2002 tot stand gebring het. ‘n Jaar na die Amerikaans-geleide inval in Irak, het Zarqawi ‘n alliansie met Osama bin Laden aangegaan en Al-Kaïda in Irak (AQI) gestig, wat ‘n mag om mee rekening te hou in die insurgensie geword het. Die taktiek van Abu Musab al-Zarqawi is as te ekstreem deur Al-Kaïda se leiers beskou.

Na Zarqawi se dood in 2006, het AQI ‘n sambreelorganisasie, die Islamitiese Staat, in Irak (ISI) gevorm. ISI is stelselmatig verswak deur middel van Amerikaanse troepe se optrede en die vorming van Sahwa-rade (” ontwaking” ) deur Soenni Arabiese stamlede, wat die groep se wreedaardighede verwerp het.

Nadat hy in 2010 die leier geword het, het Baghdadi ISIS heropgebou. Teen 2013 was die groep opnuut besig met dosyne aanvalle ‘n maand in Irak. Dit het ook aangesluit by die rebellie teen pres. Bashar al-Assad in Sirië en die Al-Nusra Front tot stand gebring.

In April 2013 het Baghdadi ‘n samesmelting van sy magte in Irak en Sirië en die totstandkoming van die Islamitiese Staat in Irak en die Levant (ISIS) aangekondig.

Die leiers van Al-Nusra en Al-Kaïda het die skuif verwerp, maar vegters lojaal aan Al-Baghdadi het weggebreek van Al-Nusra en gehelp om ISIS in Sirië te hou.

Godsdienstige minderhede, veral Irak se Jazidi’s, is deur die Islamitiese Staat-groep geteiken.

Teen die einde van Desember 2013, het ISIS se fokus terug na Irak verskuif en ‘n politieke dooie punt tussen die Shia-geleide regering en die minderheid Soenni Arabiese gemeenskap uitgebuit. Met die hulp van stamlede, het die groep beheer oor die sentrale stad Falluja oorgeneem.

In Junie 2014 het Isis die noordelike stad Mosul ingeneem en toe suidwaarts in die rigting van Bagdad begin beweeg. Teen die einde van die maand, nadat die groep sy beheer oor dosyne stede en dorpe gekonsolideer het, het ISIS die skepping van ‘n kalifaat verklaar.

Sommige Soenni Arabiere het die Islamitiese Staat-groep ondersteun nadat Mosul ingeneem is. Sommmige waarnemers skat dat IS en sy bondgenote ongeveer 40 000 vierkante kilometer in Irak en Sirië beheer, ongeveer die grootte van België. Ander meen hulle beheer nader aan 90 000 vierkante kilometer, ongeveer die grootte van Jordanië. Die gebied sluit stede soos Mosul, Tikrit, Falluja en Tal Afar in Irak; Raqqa in Sirië, olievelde, damme, hoofpaaie en grenskruisings in.

Dit word beraam dat agt miljoen mense in die gebied woon, wat gedeeltelik of ten volle deur ISIS beheer word. In die gebiede het die groep streng vertolkings van Sharia geïmplementeer en word vroue gedwing om sluiers te dra, nie-Moslems gedwing om ‘n spesiale belasting te betaal of hulle tot Islam te bekeer en strawwe afgedwing wat geseling en teregstelling insluit.

Duisende buitelanders het vir ISIS in Sirië en Irak geveg. Amerikaanse amptenare is van mening dat daar tot soveel as 31 000 vegters in Irak en Sirië is. ‘n Deskundige oor Irak, Hisham al-Hashimi, sê ongeveer 30 persent is ” ideoloë” en dat die res uit vrees of onder dwang aangesluit het.

‘n Betekenisvolle aantal IS-vegters is nie Irakse of Siriese burgers nie. Die Soufan-groep het onlangs beraam dat meer as 12 000 buitelanders van minstens 81 lande, insluitende 2 500 uit Westerse lande, oor die afgelope drie jaar na Sirië gereis het om vir ISIS te veg.

Die Islamitiese Staat het een van die mees gedugte djihadistiese groepe ter wêreld geword. ISIS-vegters het toegang tot en is in staat om ‘n verskeidenheid klein en swaar wapentuig te gebruik. Dit sluit in vragmotorgemonteerde masjiengewere, vuurpyllanseeerders, lugafweerwapens en beweeglike grond-tot-lug-missielstelsels. Hulle het ook tenks en gepantserde voertuie van sowel die Irakse as Siriese weermagte gebuit. Dit sluit Amerikaanse Humvees en bombestande vragmotors in.

Die groep beskik klaarblyklik ook oor ‘n buigsame voorsieningsketting wat ‘n konstante voorraad ammunisie en klein vuurwapens tot vegters se beskikking stel. Die betekennisvolle vuurkrag het ISIS gehelp om in Augustus Koerdiese Peshmerga-posisies in die noorde van Irak, tot vele se verbasing, te verower.

Die Islamitiese Staat het glo US$ 2 miljard in kontant en bates, wat dit die wêreld se rykste militante groep maak. Aanvanklik het die meeste finansiële bystand van individue in Arabiese Golfstate gekom. Vandag is IS grootliks selfvoorsienend en verdien maandeliks miljoene dollar uit die olie- en gasvelde wat dit beheer, asook uit belasting, tolgeld, smokkelarry, afpersing en ontvoering. Die offensief in Irak was ook uiters lonend en het hulle toegang gegee tot die kontant wat in groot handelsbanke gehou is in die stede wat hulle verower het.

Onthoofdings, kruisigings en massaskietery is gebruik om hul vyande te terroriseer. ISIS-lede regverdig hierdie gruweldade deur verse uit die Koran waarin verwys word na ” kap die koppe van ongelowiges af” , maar Moslems verwerp dit.

Selfs die Al-Kaïda leier, Ayman al-Zawahiri, wat hom in Februarie 2014 van ISIS gedistansieer het oor die groep se optrede in Sirië, het Zarqawi in 2005 reeds gewaarsku dat sodanige brutaliteit daartoe sal lei dat dit ” Moslem-harte en simpatie” sal verloor.

Bron: Die Republikein, BBC, CNN, Jerusalem Post

Oop grense: ‘n Ongeluk wat wag om te gebeur

Katie Hopkins, ‘n Britse rubriekskrywer vir die Murdoch-poniekoerant The Sun, is diep in die sop weens ‘n ruwe rubriek oor swart migrante.

Enkele dae voordat ‘n boot van sodanige immigrante in die Middellandse See gesink het en ten minste 700 van hulle verdrink het, het Hopkins presies geskryf wat sy dink oor die spul uit die suide wat hulp in Europa kom bedel.

Die toeval is vreemd want op dieselfde oomblik in Suid-Afrika het plaaslike swartes met mening op buitelanders toegesak in wat Zimbabwiese diplomate ‘n “grys gebied” van sterftes genoem het. Amptelik het sewe mense omgekom, maar Zimbabwiese koerante beweer daar is meer sterfgevalle.

Daar was selfs stemme in die ANC wat na ‘n “derde mag” verwys het, maar die regime het nogtans hul verbintenis tot oop grense, wat aanleiding gegee het tot die tragedie, herbevestig.

Hopkins het die aspirant-bedelaars beskuldig van ‘n “hardnekkige lewenskragtigheid wat met dié van kakkerlakke vergelyk”, en voorgestel dat hulle ter see afgeskrik word deur kanonbote eerder as wat hulle deur reddingswerkers opgepik word.

Verskeie aanlynpetisies met duisende handtekeninge het The Sun intussen gevra om Hopkins af te dank, terwyl die Vereniging van Swart Prokureurs poog om haar vir die aanhitsing van rassehaat te vervolg.

Maar die poniekoerant byt steeds vas en het nog nie geswig voor die geweldige druk om van hulle rubriekskrywer ontslae te raak nie.

Hier is nog ‘n oorspronklike uittreksel uit Hopkins se stuk:

No, I don’t care. Show me pictures of coffins, show me bodies floating in water, play violins and show me skinny people looking sad.

I still don’t care.

Because in the next minute you’ll show me pictures of aggressive young men at Calais, spreading like norovirus on a cruise ship.

Watching them try to clamber on to British lorries and steal their way into the UK, do I feel pity? Only for the British drivers, who get hit with a fine every time one of this plague of feral humans ends up in their truck.

Die dag nadat Hopkins se stuk verskyn het, het Le Figaro, die sentrum-regse Franse koerant wat min of meer tot dieselfde gehoor as die Wall Street Journal in die VSA spreek en nie as “ver-regs” sal kwalifiseer nie, ‘n stuk deur Hervé Juin die lig laat sien.

Die skrywer is bekend vir sy prominente, anti-globalistiese polemiese artikels oor die “ekologie van beskawings”.

Juin se uitstekende argument, in dié stuk asook elders, is dat die ideologie van individuele regte, in samewerking met die meedoënlose opmars van globale kapitalisme, tot die vernietiging van diversiteit van beskawings sal lei.

Volgens skattings wag daar ‘n miljoen voornemende Afrikane om in Europa aan wal te gaan met EU-wette en veral die Lissabonverdrag wat lidlande dwing om humanitêre hulp aan hulle te verleen en menselewens te red.

In Libië, Noord-Afrika, waar NAVO die eens welvarende land met lugaanvalle tot ‘n terreurnes verdoem het, wag daar vandag die meeste onwettige migrante om te vertrek.

Onder die voorwendsel dat hulle asielsoekers is, kan ISIS-elemente tans maklik die vasteland binnedring, ‘n kopseer vir sowel amptenare as politici.

Meer as 1750 migrante het reeds sedert die begin van die jaar in die Middellandse See omgekom. Dit is meer as 30 keer hoër as in dieselfde tydperk van 2014, sê die Internasionale Organisasie vir Migrasie.

Gaan Europa, wat fel gekritiseer word deur veral linkse Amerikaanse, sogenaamde menseregtegroepe, bes gee?

Die VSA, wat as ‘n immigranteland tot stand gekom het, is die dryfveer van die ideologie van multikulti, meng en morele verontwaardiging, asook die destabilisering van Noord-Afrika wat direk vir die stormloop verantwoordelik is.

Dertig Christene deur ISIS onthoof

Die Islamitiese Staat-groep het ‘n video vrygestel wat toon hoe 30 Christene tereggestel word.

Die beeldmateriaal van 29 minute wys hoe “volgelinge van die kruis” op ‘n strand onthoof word en ander doodgeskiet word.

Die Ethiopiese Christene is in Libië ontvoer.

Dit is soortgelyk aan ‘n ISIS-video wat toon hoe 21 Egiptiese Christene in Februarie tereggestel is.

Die groep beheer tans groot dele van Sirië en Irak en het die steun van Saoedi-Arabië, ‘n Amerikaanse bondgenoot.

ISIS het reeds in dele van die Midde-Ooste en Afrika-lande soos Libië uitgebrei.

Noord-Afrika is deur Amerikaans-geleide NAVO-lugaanvalle gedestabiliseer wat die opkoms van ISIS vergemaklik het.

‘n Woordvoerder van die Ethiopiese regering het die grusame daad veroordeel.

ISIS is bedrywig op die internet en het ‘n span kuberkrakers wat namens hulle kuberaanvalle doen.

ISIS neem olieraffinadery in Irak oor

Militante van die Islamitiese Staat (ISIS) het ‘n deel van ‘n raffinadery in Irak oorgeneem, het Xinhua berig.

Die bevelvoerder van ’n federale polisiemag wat getaak is om Irak se grootste olieraffinadery te beskerm, is Woensdag in hewige gevegte gedood.

Die ISIS-militante het teen dagbreek ’n aanval op die raffinadery naby die stad Baiji in die Salahudin-provinsie van stapel gestuur en majoor-generaal Dhaif Khalaf en nege van sy lyfwagte gedood.

Die ekstremiste het ’n deel van die raffinadery aan die brand gesteek met swart wolke wat bo die gebied gehang het en waarskynlik lugondersteuning aan die troepe voorkom het, het ’n bron gesê.

Ondanks die groot voordeel wat die ISIS-militante binne die raffinadery gehad het, kon hulle nie beheer oor groot dele van die oliefasiliteit neem nie weens die hewige teenstand van die veiligheidsmagte.

Abdul-Wahab al-Saedi, bevelvoerder van die Salahudin-operasie, het aan media in Irak gesê dat versterkingsmagte van Baiji, sowat 200 km noord van Bagdad, gearriveer het en in drie rigtings na die raffinadery beweeg om steun aan die troepe te gee wat in die raffinadery veg.

Dié aanval is deel van ’n reeks aanvalle wat die olieraffinadery sedert Saterdag teiken, maar veiligheidsmagte kon die aanvalle met die hulp van die internasionale koalisie en die lugmag van Irak afweer.

In ’n afsonderlike geval is vier polisiemanne dood toe hulle ’n bom wou ontlont in ’n huis in die Al-Qadsiyah-distrik in die noordelike deel van die provinsie se hoofstad, Tikrit, sowat 170 km noord van Bagdad.

Intussen is vier Soenni-mans dood en twee ander beseer in ’n geveg met ISIS-militante in die nedersetting Al-Mazraa in die suide van Baiji.

Gevegte in die Soenni-gedomineerde provinsie Salahudin volg twee weke nadat Irak se veiligheidsmagte weer beheer oor Tikrit geneem het toe 30 000 veiligheidslede, gesteun deur Sjiiete- en Soenni-militante en die koalisie van Irak en Amerika se lugmag die grootste offensief teen die ISIS-militante groep van stapel gestuur het.

Die Irakse premier, Haider al-Abadi het intussen met President Barack Obama samesprekings gevoer tydens sy eerste staatsbesoek aan die VSA.

Abadi sou na verwagting bykomende militêre hulp versoek om militante van die Islamitiese Staat-groep teë te staan, maar die Wit Huis sê die Eerste Minister het geen spesifieke versoek gerig nie.

Obama het dit duidelik gestel dat die VSA geen begeerte het vir ‘n nuwe regstreekse betrokkenheid in Irak nie selfs wanneer ‘n “gemeenskaplike vyand” soos ISIS ter sprake is.

Tergende vrae rondom ISIS-werwing

Hoe bespreek en betaal ‘n skoolmeisie van 15 plek op ‘n buitelandse vlug om by ISIS te gaan aansluit?

Dié en ander tergende vrae is geopper nadat ‘n vyftienjarige gereed was om ‘n British Airways-vlug in Kaapstad na haar bestemming te neem.

Yusuf Abramjee, die hoof van Crime Line, het gesê die meisie het ‘n vlug na Saoedi-Arabië bespreek.

Die meisie van Kenwyn is Paassondag gekeer om van Kaapstad na O.R. Tambo internasionale lughawe te vlieg volgens David Mahlobo, minister van staatsveiligheid.

Mahlobo het bevestig dat die meisie laat Sondagmiddag van ‘n British Airways-vliegtuig verwyder is waar sy in die sakeklas gewag het dat haar vlug opstyg.

Sy het nege uur voor die vlug uit haar huis verdwyn maar haar grootouers het eers Sondagoggend onraad bemerk.

Die polisie en die minister van staatsveiligheid is net betyds van haar verdwyning in kennis gestel voordat sy die land kon verlaat.

Bewysstukke wat in haar kamer gevind is, dui daarop dat sy geld oorgeplaas het en dat sy op die internet in kontak was met ISIS-werwers.

Abramjee en Mahlobo het aan ANA bevestig dat die meisie Maandag in die sorg van haar ouers geplaas is.

Die verdagte omstandighede rondom haar poging om alleen ‘n vliegtuig te bestyg wat bestem is vir Saoedi-Arabië laat talle vrae oor hoe British Airways se besprekingskantoor aan ‘n minderjarige ‘n internasionale kaartjie verkoop het.

Onder normale omstandighede moet ‘n tiener met ‘n wettige voog na die buiteland reis.

“Nee, dit is nie net ‘n wettige voog nie, net iemand wat verantwoordelik is,” het die besprekingsbeampte van British Airways by navraag gesê.

“Daardie persoon sal die nodige vorms teken namens die minderjarige, asook besonderhede van ‘n verantwoordelike volwassene wat die minderjarige sal afhaal by die bestemming.

“Hulle moet dan ‘n fooi van $150 betaal.”

Besoekers het ‘n visum nodig om na Saoedi-Arabië te reis, behalwe passasiers wat dieselfde of ‘n eerste aansluitingsvlug binne 18 uur haal.

Volgens die ouers sou die meisie na Turkye reis om by die rebelle in Sirië aan te sluit, het IFS berig.

Vlaamsbelang besoek Siriese president

Die leier van die Vlaamsbelang (VB) in Antwerpen, Filip Dewinter, is gisteroggend gul ontvang in Damaskus deur die Siriese president Basjar al-Assad.

Dewinter het die Siriese president ‘n “bondgenoot teen Salafism en ekstremisme” genoem.

“Stadig maar seker begin algar sien dat ons hom as ‘n bondgenoot (in die stryd) teen Salafism en ekstremisme moet beskou,” sê hy gesê per telefoononderhoud met Belga.

Dewinter het gesê sy ontmoeting met Assad het “meer as ‘n uur” geduur waartydens die Siriese president die boikot wat deur die Weste teen sy regime ingestel is, asook die gevolge daarvan, veroordeel het.

Die president gaan reeds vir vier jaar onder ‘n opstand gebuk wat op ‘n burgeroorlog uitgeloop het, met meer as 215 000 sterftes. Hy het ook gewaarsku teen die “chaos” waarin sy land sal verval sonder hom.

Hy het ook sy kommer uitgespreek, oor die opmars van die terroriste-groep die Islamitiese staat (ISIS) in lande soos Libanon, Libië en “elders op die grense van Europa.”

“Ek kan hom absoluut nie verkeerd bewys nie,” sê Dewinter. Dit was nie die ondervoorsitter van die VB se eerste besoek aan Sirië nie, maar wel die eerste keer dat hy Assad ontmoet het.

Hy het gesê die Siriese president verdien ondersteuning.

“Hulle (die Siriese leiers) het my verseker dat alle chemiese wapens sedertdien vernietig is. Verder, is dit onwaarskynlik dat die regime hierdie wapens gebruik het in die distrikte in die hoofstad. Ek sluit nie uit dat dit elders gebeur het nie, maar ek voel dat ‘n propaganda-oorlog gevoer word,” het Dewinter afgesluit.

ISIS-kuberkrakers teiken Amerikaanse soldate

Die groep wat hulself die Islamitiese Staat (ISIS) se kuberkrakerafdeling noem, het gister die name van 100 Amerikaanse militêre personeellede gepubliseer en ISIS-ondersteuners aangemoedig om hulle dood te maak.

ISIS se kuberkrakers sê die 100 personeellede van die Amerikaanse weermag, vloot en lugmag het ISIS in Irak, Sirië en Jemen geteiken.

Die situasie in Jemen het so agteruitgegaan dat Jemen se pro-Amerikaanse president, Abd Rabbuh Mansur Hadi, op een punt saam met Amerikaanse troepe sou ontruim, het amptenare aan NBC News gesê.

Terwyl Amerikaanse amptenare die onttrekking as ‘n sukses beskou, beteken dit dat die VSA se militêre magte nie meer oë en ore op die grond in Jemen het nie.

Die Amerikaanse departement van verdediging en FBI-woordvoerders het aan The New York Times gesê hulle is bewus van die dreigemente en ondersoek die webtuiste waar dit gepubliseer is.

Amerika lei ‘n internasionale koalisie wat ISIS in Irak en Sirië teiken, waar militante groot dele grondgebied beset.

Duitse kenner onthul ‘terreurbestuur’

Die Duitse joernalis en regeringskonsultant Christoph Hoerstel, was 2006/7 spreker oor die onderwerp van Afghanistan by die leierskapsentrum (ZInFü) van die Bundeswehr.

In hierdie verband het hy het die term “terreurbestuur” gedefinieer en in die klaskamer ontleed, om soldate in dié land in staat te stel om die bisarre gebeure waarmee hulle te kampe gehad het, te verklaar.

Alle lesinginhoud is persoonlik hersien en deur die Duitse owerhede goedgekeur.

Op grond van hierdie ervaring, sê hy, is die vrees vir terrorisme nie toevallig nie. Dit word, volgens Hoerstel, aangewend deur regerings met ‘n sekere doelwit.

In tye van krisis en politieke onsekerheid, bestuur intelligensie-agentskappe, tesame met alle NAVO-regerings, die voorbereiding en uitvoering van aanvalle.

Hoerstel sê hy het in Afghanistan ontdek dat alle NAVO-lande daaroor lieg dat daar ‘n stryd teen terreur woed.

Daar is geen “oorlog teen terreur” nie, maar eerder “bestuurde vrees” of dan “terreurbestuur” wat gebruik word om sekere beleidsrigtings en besluite af te dwing, sê hy, omdat die akteurs reeds aan die veiligheidsmagte in 95% van alle gevalle bekend is.

Hy onthul ook dat ISIS in Jordanië deur die CIA opgelei is om terreur te pleeg.

Dat terreur na Europa uitgevoer word, is ‘n manier om politieke probleme aan te spreek wat oplaai weens die finansiële krisis wat lidlande in die gesig staar.

Hoerstel sê dit is ‘n harde, “bloedige bedryf” waar geld, inligting en menslike hulpbronne bewillig word en waar onskuldige mense opgeoffer word.

Hy meen ook dat Charlie Hebdo só ‘n geval is waar die mees ongewilde Franse president wat slegs 13% steun geniet het vóór die skietery, se gewildheid skielik na 29% opgeskiet het.

Marine Le Pen het onlangs in ‘n onderhoud met Sophie Desjardin van Euronews gesê Francois Hollande lyk op die oppervlak onskadelik maar is tot wrede koelbloedigheid in staat. Sy het nie uitgebrei oor haar opmerking nie.

Welkomse gesin ontsnap aanval in Tunis

Die plesierbootvaartmaatskappy MSC Cruises het bekendgemaak dat net een Suid-Afrikaner in die terreuraanval op ‘n museum in Tunisië beseer is, en dat rekenskap gegee kan word van al 78 Suid-Afrikaners aan boord.

Dit volg na ‘n verklaring deur die Tunisiese regering, gister, dat een Suid-Afrikaner in die aanval dood en verskeie gewond is. Die maatskappy sê die MSC Splendida het gister in Tunis vasgemeer en ‘n besoek aan die Bardo Nasionale Museum aangebied.

Minstens 23 mense, meestal toeriste, is in die aanval dood.

Intussen is ‘n Welkomse sakeman, Johan Cronjé en sy gesin, se lewe gespaar tydens die bloedbad. Hulle hou tans vakansie op die Splendida.

Cronjé het ‘n kort rukkie gelede vanaf die boot aan OFM-nuus gesê hulle het besluit om ‘n private taxi te huur en was daarom nie tydens die aanval by die museum nie.

Cronjé sê hy is dankbaar dat hy en sy gesin ongedeerd is, maar sy hart gaan uit na dié wat geliefdes verloor het.