Internasionale nuus Archives - Page 133 of 464

Turkse gyselaars van ISIS bevry

Die Turkse owerheid het bekend gemaak 49 gyselaars is uit die kloue van een van die wêreld se mees gevreesde militante groepe bevry sonder dat ’n enkele skoot gevuur, losprys betaal of ruilooreenkoms aangegaan is.

Pres. Tayyip Erdogan van Turkye het die vrylating van die gyselaars as ’n geheime reddingsoperasie beskryf, berig AP.

Die gyselaars, insluitende diplomatieke personeel, soldate van die spesiale magte en kinders, is op 11 Junie by die Turkse konsulaat in Mosoel in Irak deur militante van die Islamitiese Staat as gyselaars geneem.

Ahmet Davutoglu, die eerste minister van Turkye, sê hulle is vrygelaat ná ’n “beplande operasie” deur die land se intelligensiediens.

“Ek bedank die eerste minister en sy kollegas vir die vooraf beplanning en goed berekende en geheime operasie wat deur die nag uitgevoer is,” het Erodgan gesê.

Kenners het egter die weergawe van die Turkse regering in twyfel getrek toe die goedgeklede mans en vroue, wat meer as drie maande gelede deur lede van die gevreesde Islamitiese Staat (ISIS) as gyselaars geneem is, Saterdag hul families by die lughawe in die Turkse hoofstad omhels het.

“Die amptelike verduideliking klink te goed om waar te wees,” het Sinan Ulgen, ’n voormalige Turkse diplomaat wat aan die hoof staan van die Sentrum vir Ekonomiese en Buitelandse Beleidstudies in Istanboel, gesê. “Daar is ’n paar baie geldige vrae oor hoe dit gebeur het, wat nog onbeantwoord is.”

Die gyselaars, onder wie twee jong kinders, is uit die Turkse konsulaat in die noord-Irakese stad Mosoel ontvoer toe die stad op 11 Junie oorgeneem is. Hoe hulle van Mosoel na Turkye gereis het en hoekom die IS so ’n waardevolle bedingingsvoordeel sonder meer prysgegee het, bly onduidelik.

“Ek dink dit is redelik om te sê die volle storie is ons nie vertel nie,” het Aaron Stein van die Instituut vir Verenigde Koninklike Dienste in Londen gesê.

Hy is ’n kenner van die Turkse veiligheidsbeleid.

Een van die bevryde gyselaars het aan die staatsbeheerde Anadolou-nuusagentskap gesê een van die militante het ’n vuurwapen teen die konsul-generaal, Ozturk Yilmaz, se kop gehou en hom gedwing om ’n verklaring te maak.

Yilmaz het op sy beurt laat Saterdag aan NTV-televisie gesê hy en die ander gyselaars is gedwing om na video’s te kyk wat wys hoe ander ontvoerdes onthoof word.

“Hulle hou daarvan om hul gyselaars te demoraliseer,” het Yilmaz gesê en bygevoeg hoewel die groep met geweld gedreig is, die ISIS hulle nie fisieke skade aangedoen het nie.

Onthoofdings wat 22 koppe eis, nie deur ISIS nie

Die veroordeelde mag ‘n Disprin vra, sy einde word nie op televisie uitgesaai nie, en kom met die swiepende swaard van ‘n geskoolde laksman eerder as met ‘n kombuismes.

Anders is daar nie veel verskil tussen ‘n doodsvonnis van die jihadiste van ISIS oftewel die “Islamitiese staat” en in Saoedi-Arabië nie, behalwe dat ISIS ver agter is.

Die land word as ‘n belangrike Westerse bondgenoot in die stryd teen ISIS beskou. Daar is inderdaad voorts nie groot verskille tussen die twee entiteite wat sjaria, of Islamitiese wet, en openbare teregstellings betref nie.

Beide volg Hanbali-regspraak, die strengste van vier soorte tradisionele Sunnie-wette. Dit is alombekend in die Midde-Ooste. Egiptenare wat iemand van haarklowery beskuldig, gebruik tewens die uitdrukking “moenie so Hanbali wees nie”.

Andersdenkendes in Raqqa, die Siriese dorp wat ISIS se proto-hoofstad is, sê al 12 van die regters wat nou die hofstelsel bedryf – vanaf eiendomsgeskille tot geloofsmisdade – is Saoedi’s.

Die groep het ook ‘n Saoedi-styl godsdienspolisie, belas daarmee om gelowiges se daaglikse roetine te monitor.

Oral in ISIS-gebiede, is kerke en ander Moslemmoskees opgeblaas of word die geboue vir ander doeleindes gebruik. Saoedi-Arabië verbied nie-Moslem godsdienstige praktyk.

Op 5 September het die Saoedi-polisie ‘n klopjag op ‘n huis in Khafji, naby die Koeweitse grens, uitgevoer en 27 Asiatiese Christene aangekla omdat hulle ‘n kerkseremonie gehou het. Die Westerse media is stom daaroor.

In die afgelope maande is honderde, dalk duisende teregstellings, uitgevoer, en slagoffers dikwels onthoof sonder dat die Weste hoegenaamd ‘n vinger gelig of ‘n piepgeluid laat hoor het.

Tipies word die onthoofdings sonder ‘n verhoor van enige aard gehou. Saoedi-Arabië word met die swaard regeer. In die bestek van slegs 18 dae gedurende die enkele maand van Augustus, het die koninkryk sowat 22 mense onthoof volgens menseregte-aktiviste.

Die vlaag moorde is enersyds uitsonderlik aangesien ‘n totaal van 79 teregstellings verlede jaar plaasgevind het, maar ook omdat baie misdrywe relatief vir minder ernstige oortredings was, soos daggasmokkel en “toordery” vreemd genoeg.

In een geval was die verweerder beslis geestelik ongesond, maar sy kop het in elk geval gerol.

Sommige Saoedi-kritici vrees dat die skielike oplewing in onthoofdings ‘n reaksie verteenwoordig weens die uitdaging van ISIS.

Marteling: Australië in greep van nasionale veiligheidswetgewing

Die Australiese regering het onder openbare druk geswig en ingestem dat spesifieke marteling van verdagte terroriste deur lede van die geheimediens verbied moet word.

Die regering was van plan om die Australiese intelligensie-organisasie kwyt te skeld van enige kriminele oortredings wat hulle begaan het, wat nie moord, ernstige aanranding, seksuele aanranding en ernstige beskadiging van eiendom insluit nie.

George Brandis, prokureur-generaal, het Maandag bekend gemaak dat marteling by die lys gevoeg sal word. Marteling is teen die Australiese wet.

Maar Brandis het bevestig dat ‘n nuwe aanpassing wel gemaak is om terreur te bekamp wat vermeende buitelandse terroriste sal teiken. Die staatsaanklaer sal voortaan bloot hoef te bewys dat ‘n persoon binne aangewese “no-go areas” gereis of gebly het.

Dit sal lande soos Sirië en Irak insluit.

Die liberaal-demokratiese senator, David Leyonhjelm, het verlede week sy kommer uitgespreek dat die voorgestelde raamwerk vir nuwe “spesiale intelligensie-operasies” marteling kan toelaat.

Australië verkeer in ‘n greep van nasionale veiligheidswetgewing nadat Tony Abbott Australië se verbintenis tot militêre optrede in Irak openbaar gemaak het.

Australië het vroeër ‘n klopjag teen jihadiste onder uiterste geheimhouding onderneem. Geen name en besonderhede van die vermeende terroriste is bekend gemaak nie.

Leyonhjelm het gedreig om die maatreëls te kelder indien Asio (Australian Security Intelligence Organisation), toegelaat word om aangehoudenes te martel.

Tsjegge verbrand renosterhoring

‘n Tsjeggiese dieretuin het sowat 60 kilogram se renosterhoring verbrand as deel van ‘n internasionale veldtog wat daarop gemik is om die aandag te vestig op dié diere wat deur uitwissing bedreig word, het RSG berig.

Die Tsjeggiese Republiek het die afgelope paar jaar ‘n belangrike deurgangsroete geword vir die handel in renosterhoring van Afrika na Asië.

Die Tsjeggiese owerheid het verlede jaar op die horings van 24 wit renosters van sowat 60 miljoen rand beslag gelê, en 15 lede van ‘n beweerde internasionale smokkelnetwerk aangekla.

Die Dvur Kralove-dieretuin wat sowat 150 kilometer noordoos van Praag is, het die verbranding van die renosterhoring georganiseer op die vooraand van Wêreldrenosterdag wat vandag gevier word.

Intussen is drie SANParks-werkers Sondag in hegtenis geneem vir beweerde renosterstropery in die Krugerwildtuin.

Die drie was in die laer Sabie-gebied bedrywig, het die waarnemende uitvoerende bestuurder van SANParks, Abe Sibiya, gesê,

‘n Jaggeweer, ammunisie, ‘n voertuig en stropertoerusting is in hul besit gekry. Hulle is gevang kort nadat ‘n vernielde renoster in die gebied waar die drie gewerk het, opgespoor is.

“Dis jammer dat diegene aan wie die welstand van die diere toevertrou word, na bewering nou dieselfde nalatenskap wat hulle moet bewaar, vernietig,” het hy gesê.

Argentinië, Egipte smee opnuut bande

Die Argentynse minister van buitelandse sake Hector Timerman het besoek gebring aan Egipte met ‘n groot sake-afvaardiging waar hy verlede naweek met president Al-Sisi en Sameh Shoukry, die minister van buitelandse sake ontmoet het.

Die samewerking tussen die twee lande het ‘n lang geskiedenis, sedert die regerings van Juan Peron in Argentinië en Gamal Abdel Nasser in Egipte na die Tweede Wêreldoorlog ontmoet het.

Shoukry het trots gesê dat sy pa in die eerste regering van Peron ambassadeur in Buenos Aires was. Hy sal Argentinië in 2015 besoek. Die minister van buitelandse sake het beklemtoon in ‘n gesamentlike verklaring van beide lande dat hulle moet saamstaan teen roofkapitaliste.

Timerman het die Egiptenare in die besonder bedank vir steun met die skuldresolusie tov Argentinië by die Verenigde Nasies se Algemene Vergadering op 9 September.

President Al-Sisi en Timerman het ook oor Argentinië se belangstelling in die “groot potensiaal” van Egiptiese landbou en landbou-tegnologie samesprekinge gevoer, asook die samewerking wat kerntegnologie betref. Die Argentynse maatskappy INVAP is reeds werksaam in Egipte.

Daarbenewens het Timerman met die sekretaris-generaal van die Arabiese Liga, Nabil Elaraby, oor die stryd teen terrorisme en ander kwessies gesels. Hy het beklemtoon dat Argentinië sy roterende voorsitterskap van die Veiligheidsraad van die VN volgende maand sal gebruik om die behoeftes van die Palestyne te beklemtoon.

Op 14 September het die Argentynse minister van Nywerheid, Debora Giorgi met ‘n honderdsterk sake-afvaardiging na Moskou vertrek. Daar word verwag dat die toekenning van kontrakte ter waarde van $5 miljard sal volg, waarvan $4 miljard Argentynse voedseluitvoere as ‘n plaasvervanger vir EU-produkte onder sanksies sal wees.

Argentinië kan glo onmiddellik benewens pluimvee, wyn, suiwelprodukte, gedroogde vrugte en vis, ook landboutoerusting lewer.

Skotse leier bedank na leë Britse beloftes

Skotland se Eerste Minister en leier van die Skotse Nasionale Party (SNP) het bedank uit sy amp nadat hy Donderdag se onafhanklikheidsreferendum moes prysgee en die Britse premier David Cameron aangedui het dat hy nie beloftes teenoor die Skotte sal nakom nie.

Die “Nee”-veldtog het met 55 persent van die stemme teen 45 persent se “Ja” stemme gewen.

“Ons het die referendum verloor, maar Skotland kan nog steeds die politieke inisiatief dra,” het Salmond aan joernaliste en ondersteuners gesê.

“Vir my as leier is my tyd amper verby, maar vir Skotland gaan die veldtog voort en die droom sal nooit sterf nie.”

Salmond sê daar is ‘n “aantal uiters bekwame en baie geskikte kandidate vir die leierspos.”

Salmond het gesê hy is trots oor die historiese 85 persent van kiesers wat in Donderdag se referendum gestem het en die wyse waarop die Skotte hulself gedra het.

“Ons het nou die geleentheid om Westminster te druk om hul beloftes wat hulle gemaak het na te kom om verdere betekenisvolle mag af te wentel na Skotland. Dit plaas Skotland in ‘n baie sterk posisie,” het hy gesê.

Salmond het Vrydag met premier David Cameron samesprekinge gevoer. Hy het gesê Cameron wou homself nie verbind tot afgewentelde magte soos vervat in die “Scotland Bill” wat deur die oud-premier Gordon Brown belowe is tydens die veldtog nie.

Franse swartbewussynskrywer skielik tronk toe weens Joodse druk

‘n Paryse advokaat en vriend van die Franse swartbewussynskrywer, Kémi Séba, beweer dat hy weens “druk van die Joodse gemeenskap” in die tronk gesmyt is en selfs in eensame aanhouding verkeer. Séba is verlede Sondag by ‘n teater in Parys, die Main d’Or, tydens ‘n boekbekendstelling in hegtenis geneem.

Die betrokke teater behoort aan die komediant en satirikus Dieudonné wat self in rusies met Frankryk se invloedryke Joodse gemeenskap betrokke is. Séba was by die teater om sy swart-nasionalistiese boek, La supra-négritude, bekend te stel.

Die swartbewussynsdenker het in 2007 sy standpunt só opgesom:

Ek droom daarvan om blankes, Arabiere en Asiate te sien wat hulself organiseer om hul eie identiteit te verdedig. Ons beveg al die ape wat hul afkoms ontken, van Stépane Pocrain tot Christiane Taubira (huidige swart Franse minister van justisie) en Mouloud Aounit… Die nasionaliste is die enigste blankes waarvan ek hou. Hulle wil nie met ons meng nie en ons ook nie met hulle nie. Omdat daar die holocaust was, het ek nie die reg om enigiets oor my sionistiese verdrukker te sê nie?

Op 19 Desember 2008 was Séba betrokke in ‘n vuisgeveg met Ahmed Meguini, ‘n videomaker wat glo ‘n baie “negatiewe film” oor hom gemaak het. Hiervoor is hy op 22 Desember 2008 tot twee maande tronkstraf, maar opgeskort vir 18 maande, gevonnis. Intussen het hy na die VSA gereis waar hy as Franssprekende “minister” van die New Black Panther Party aangestel is en het hy hom sedertdien in Senegal gevestig waar hy ook ‘n TV-program aangebied het.

Dit blyk nou dat die opgeskorte vonnis van 2008 intussen sonder sy medewete in ‘n vaste vonnis verander is en daarom is hy na afloop van sy boekbekendstelling in hegtenis geneem en na die gevangenis vervoer. Volgens regskenners sal dit nie veel help om teen die inhegtenisname te appelleer nie, aangesien die tweemaandevonnis al afgeloop sou wees teen die tyd dat die saak in die hof voorkom. Sy enigste hoop is nou dat Franse vonnisregter sy vonnis kan versag en dalk kan verminder of weer kan opskort.

Die boek van Kémi Séba wat Sondagaand vrygestel is, waarna hy in hegtenis geneem is

In 2011 is Séba op die Switserse grens in hegtenis geneem omdat hy ‘n vergadering in dié land wou gaan toespreek, maar weens klagtes van die Joodse gemeenskap in Switserland is hy uit die land gesit en aan die Franse polisie oorhandig. Die polisie het hom op daardie stadium egter bloot vrygelaat, hoewel sy misdaadrekord nagegaan is en die opgeskorte vonnis van 2008 daarop moes verskyn het.

‘n Jeugbeweging wat hy op die been gebring het, die Jeunesse Kémi Séba, is op 15 Julie 2009 deur die Franse minister van binnelandse sake, Brice Hortefeux, kragtens ‘n wet van 1936 teen privaatweermagte verbied omdat hy gemeen het dat dié beweging ‘n “rassistiese en antisemitiese ideologie propageer en hom wend tot onverdraagsame optrede wat provokasie en geweld insluit”.

President van Oekraïense junta kry staande applous in Washington

Die president van die Oekraïense junta, Petro Poroshenko, het `n gesamentlike sitting van die Amerikaanse Kongres in Washington toegespreek te midde van betogings tuis in Kiëf om hom te ontsetel.

Hy het voorheen sy steun aan vredespogings toegesê, maar intussen klaarblyklik van plan verander en Rusland se “anneksasie” van die Krim-Skiereiland veroordeel asook hul “aandeel” in die afskiet van vlug MH17 waarin byna 300 slagoffers omgekom het.

Die Russiese Vereniging van Ingenieurs het Donderdag ‘n verslag vrygestel wat toon dat die lugramp waarskynlik deur die Oekraïne veroorsaak is.

Die sjokeladekoning het Rusland se beweerde “aggressie teen die oostelike Oekraïne as ‘n bedreiging vir wêreldvrede” voorgehou voor ‘n waarderende Kongres wat hom staande applous gegee het.

Poroshenko het ook `n beroep op “dodelike” Amerikaanse militêre hulp gedoen om pro-Russiese selfverdedigingsmagte te beveg.

President Barack Obama het Rusland se betrokkenheid in die Oekraïne veroordeel, maar nie die VSA se aandeel in die staatsgreep wat die land gedestabiliseer het nie.

Hy het egter teruggedeins van openlike “dodelike” Amerikaanse militêre hulp en gesê hulp sal glo tot nie-gevaarlike toerusting beperk word.

‘n Brose skietstilstand heers tans in die ooste van Oekraïne, waar meer as drieduisend mense reeds sedert April omgekom het weens die oorlog wat Poroshenko en sy voorgangers teen hul eie inwoners verklaar het.

Skotland stem teen onafhanklikheid

Op die lang pad na die Skotse referendum van Donderdag, staan drie geleenthede uit, sê historici en politieke wetenskaplikes. Elkeen was die gevolg van sowel politieke waaghalsigheid as uitgeslape leierskap.

Die besluit in 1989 deur die Eerste Minister Margaret Thatcher – wat reeds ongewild was nadat sy staalfabrieke en steenkoolmyne gesluit het – om belasting in Skotland te hef nog voor die res van Brittanje moes opdok, was die eerste stap.

Daarna het die besluit deur Tony Blair gevolg om ‘n referendum in Skotland te hou oor groter outonomie in 1997, wat twee jaar later gelei tot die vestiging van ‘n Skotse Parlement vir die eerste keer sedert 1707.

Dit het ten laaste aanleiding gegee tot die verpletterende 2011-oorwinning van die Skotse Nasionale Party, wat gewen het met ‘n algehele meerderheid in die Skotse parlement met ‘n mandaat om ‘n referendum oor onafhanklikheid uit te roep.

Maar Skotland het gister teruggedeins van outonomie.

Skotland het onafhanklikheid in Vrydag se referendumuitslag met sowat 55% verwerp. Die unie van 307 jaar het oorleef, hoewel meer magte oorgedra sal word na die gebied.

Die leier van die Skotse Nasionaliste, Alex Salmond, het intussen op sy webblad die slagspreuk verander na “Een Skotland”.

Alhoewel die sleutelkiesafdeling van Glasgow vir onafhanklikheid gestem het, was dit nie met ‘n besonder groot voorsprong nie, ‘n noodlottige slag vir die Ja-stemmers.

‘n Finale aangekondig vroeg Vrydagoggend moet nog gemaak word, maar met Edinburg wat oorweldigend Nee gestem het, is daar min twyfel dat die Engelse se vreespsigose in ‘n byna volledige media-aanslag teen die Skotte gewen het.

Greg Waddell, ‘n dokter in Glasgow, sê hy het Ja gestem, “want ontmagtiging kweek afhanklikheid; omdat die huidige mate van sosiale ongelykheid in Skotland elkeen van sy mense verneder.”

Reuse terro-klopjag in Australië voor G20

Intelligensieverslae toon dat ISIS-militante van plan was om ‘n lid van die publiek in Australië te onthoof, het premier Tony Abbott Dinsdag gesê.

Honderde lede van die polisie het ‘n klopjag op huise gedoen in ‘n radikale teen-terrorisme operasie.

Abbott het gesê daar is ‘n “ernstige risiko van ‘n terroriste-aanval” enkele dae nadat Australië sy nasionale terreurbedreigingsvlak vir die eerste keer na “hoog” opgeskuif het. Die verhoogde waarskuwing kom glo weens die waarskynlikheid van aanvalle deur radikale Australiërs in Irak of Sirië.

Australië, wat die G20-leiersberaad in Brisbane in die middel van November aanbied, is bekommerd oor die getal van sy burgers in die buiteland wat by Islamitiese militante groepe aangesluit het.

Tesourier Joe Hockey het daarop aangedring dat die nodige voorsorgmaatreëls in plek gestel is vir die G20-leiersberaad. Hy het gesê die klopjagte sal nie die nwaweek se G20-vergadering in Cairns raak nie.

Meer as 800 Australiese polisiebeamptes het deelgeneem en 15 mense in hegtenis geneem nadat talle eiendomme in Sydney en Brisbane deursoek is.

Reuters het Donderdag berig dat militante verbonde aan die Islamitiese Staat (ISIS) beplan het om iemand op straat in Sydney te gryp en in die openbaar te onthoof, en ISIS se vlag oor die persoon te drapeer.

Ernstige aanklagte van terrorisme is teen een van die 15 verdagtes gebring. Hy sal binnekort in die hof verskyn.