Suider-Afrika Archives - Page 167 of 888

Nigeriese dwelmhandelaars vas

Drie van sewe Nigeriese mans is in hegtenis geneem vir beweerde dwelmhandel in Noordwes en het Maandag in die Vryburg-landdroshof verskyn, het die polisie gesê.

Hulle is verlede week in Mahikeng, Vryburg, en Lichtenburg in hegtenis geneem, het kol Sabata Mokgwabone gesê.

Nigeriese burgers Ikechukwu Julius Darlington Abatube, Theopilus Okechuku Odimegwu en Valentine Obiefona Awayiaka het Maandag in die hof verskyn en sal in aanhouding bly tot hul borgtogaansoek op 23 Maart.

Polisie het beslag gelê op kat, kristalle, kokaïen, Mandrax en Ecstasy ter waarde van honderde duisende rande tydens klopjagte in die drie dorpe verlede week.

Beslag is gelê op ‘n Toyota Yaris, Fiat Palio en Volkswagen Polo Vivo ter waarde van R335 000 tydens die operasie.

Hulle het na bewering die dwelms uit Hillbrow, Johannesburg gebring en hulle versprei aan handelaars op die platteland.

Ugochukwu Stephen, Chibuike Vincent Mbagu en Nkem Eric Nwaokearu verskyn Vrydag in die Mmabatho-landdroshof.

Hulle sal in aanhouding bly tot hul borgtogaansoeke op 24 Maart.

Die sewende man, Emeziem Berthrand Ogugiuba, verskyn Vrydag in Lichtenburg-landdroshof. Hy sal na verwagting om borgtog aansoek doen op 18 Maart.

Brand naby Vrymesselaarsperseel in Bloemfontein

‘n Brand naby die Vrymesselaarsperseel in Sterling Small Holdings in die omgewing van Horizon Stables and Guest House, het Maandag in Bloemfontein uitgebreek.

Die oorsaak van die brand wat by die spa van ‘n gastehuis naby Langenhovenpark in Bloemfontein gewoed het, sal na verwagting Dinsdag ondersoek word.

Afdelingsoffisier van die Mangaung-brandweer-en-reddingsdiens, Braam van Zyl, sê hulle is gisteraand omstreeks 20:00 na die Horizon Stables en Gastehuis by die Sterling-kleinhoewes ontbied.

Vlamme het gewoed in losstaande houthuisies naby die gastehuis. Van Zyl sê die brand het vermoedelik in een van die houthuisies wat as ‘n spa ingerig is uitgebreek en na ander houtgeboue versprei.

Van Zyl sê die brand is omstreeks 23:00 gisteraand onder beheer gebring. Niemand is in die voorval beseer nie.

Tertia de Bruin, wie se man Johan die eienaar van Horizon Stables is, sê hulle is baie dankbaar die vlamme het nie versprei na die gastehuis nie.

Eskom-bonusse buitensporig

Dit blyk dat tien van Eskom se senior amptenare verlede jaar ‘n bonus van miljoen rand elk ontvang het benewens hulle salarisse van meer as drie miljoen rand elk.

Die minister van Openbare Ondernemings, Lynne Brown het in reaksie op ‘n geskrewe vraag in die parlement dié astronomiese vergoedings vir ‘n sukkelende instelling bekend gemaak.

Die onthulling is gemaak te midde van verdere omstredenheid oor ‘n ondersoek na Eskom wat deur die voorsitter van Eskom se raad, Zola Tsotsi gelei sal word.

Politieke partye dring aan op ‘n onafhanklike ondersoek.

Verlede week het Tsotsi onverwags aangekondig dat Eskom se bestuurshoof en drie senior bestuurslede geskors is.

Opposisiepartye het intussen aangedui dat die Openbare Beskermer, Thuli Madonsela genader sal word om dringend in te gryp omdat Eskom self betrokke gaan wees by die ondersoek na sy probleme.

Eskom het Maandag mediaberigte ontken dat Tsotsi, homself ‘aan hoof geplaas het’ van ‘n subkomitee van Eskom se raad en dat hulle volmag gaan hê om ondersoekers aan te stel.

News24 het berig dat Tsotsi en die komitee net ‘n ‘oorsigrol’ gaan speel.

Opposisielede sê dit is duidelik dat Eskom die totale ondersoek wil orkestreer terwyl dit in landsbelang is dat ‘n behoorlike, onafhanklike ondersoek gedoen word.

Een terroris onthou ‘n ander

Die minister van minerale hulpbronne Ngoako Ramatlhodi het uit Londen gesê dat hy uiters geskok is oor die dood van sy vriend van veertig jaar en medeterroris, Collins Chabane.

Hy het gesê hy het Chabane Donderdag vir die laaste keer in die parlement gesien, maar het nie ‘n kans gekry om met hom te gesels nie.

Ramatlhodi, wat in Londen ‘n konferensie bywoon, het gesê hy is platgeslaan deur Chabane se dood.

“Dit is net so ‘n groot skok,” het Ramatlhodi gesê.

Chabane en Ramatlhodi het by die Universiteit van die Noorde (nou die Universiteit van Limpopo) in 1977 ontmoet. Ramatlhodi was destyds die voorsitter van die universiteit se kultuurvereniging.

“Destyds was hy [Chabane]’n akteur. Hy het geskryf en geregisseer,” het Ramatlhodi gesê.

Ramatlhodi was deel van die anti-apartheidbeweging se ondergrondse bedrywighede. Hy het Chabane tot die rewolusie bekeer en hom gewerf hom vir die verbode terreurorganisasie, die ANC.

“Hy was ‘n bietjie aan die rustige kant, maar kon ook ‘n groot toneelspeler wees wat gedans en musiekinstrumente gespeel het.”

Dit is nie bekend watter instrumente Chabane bemeester het nie.

Chabane het die land in 1979 verlaat om militêre opleiding in die buiteland te ondergaan sodat hy terreur in Suid-Afrika kon kom pleeg.

Hy is met sy terugkeer in hegtenis geneem en eers vrygelaat in 1990.

‘n Jaar later het hy op die ANC se nasionale uitvoerende komitee gedien, waarvan Ramatlhodi ook ‘n lid was.

Chabane het ook as LUR gedien in Ramatlhodi se provinsiale kabinet in Limpopo.

Biltong lei tot moord

‘n Man van Ventersburg in die Vrystaat is in hegtenis geneem in verband met die moord op sy susterskind, glo na ‘n stryery oor biltong, het OFM berig.

Makatisi Khumalo (59) het Vrydag in die Ventersburg-landdroshof verskyn. Hy moet op 24 Maart weer in die hof verskyn om aansoek te doen om borgtog.

Vrystaat polisiewoordvoerder, Mamello Mokhuoane, het in ‘n verklaring gesê die polisie is Dinsdagaand omstreeks 19:30 na ‘n huis in Mamahabane ontbied nadat ‘n voorval van huishoudelike geweld aangemeld is.

Toe die polisie en paramedici by die toneel opgedaag het, het hulle Mmatsiu Snanh Tsiu (43) in ‘n plas bloed op die trappies voor die huis aangetref. Sy het meswonde opgedoen en is op die toneel dood verklaar.

Khumalo het gevlug, maar die polisie het hom nie ver van die toneel af nie, aangekeer.

Die twee het glo oor vier stukkies biltong gestry. ‘n Ooggetuie het aan die polisie gesê Khumalo het Tsiu daarvan beskuldig dat sy sy biltong gevat het.

Phiyega moet getuig in heraanstellingsaak

Die nasionale polisiekommissaris, Riah Phiyega sal na verwagting vandag in die Arbeidshof in Johannesburg getuig nadat die hof genader is om die fluitjieblaser, Kobus Roos te herontplooi.

Phiyega sal moet verduidelik waarom sy Roos nie in die misdaadintelligensie-eenheid wil aanstel nie ten spyte daarvan dat ‘n vakante pos vir hom bestaan.

Roos is verplaas deur die voormalige misdaadintelligensie-hoof, Richard Mdluli nadat hy korrupsie ontbloot het.

Die Arbeidshof het in April verlede jaar beveel dat Roos in ’n soortgelyke pos in die SAPD aangestel moet word.

Die polisie word daarvan beskuldig dat hulle ‘n hofbevel verontagsaam.

Dertien vas na plundery in Noordwes

Dertien persone is in Stella in Noordwes in hegtenis geneem vir openbare geweld nadat buitelanders se winkels geplunder is.

“Die polisie het ‘n klopjag uitgevoer op ‘n kroeg in Rekgaratlhile en die alkohol gekonfiskeer,” het Kealeboga Molale, woordvoerder van die polisie, gesê.

“Die gemeenskap was glo ontevrede hieroor en ongeveer 200 lede van die gemeenskap het op die twee buitelanders se winkels toegeslaan en dit geplunder.”

Die groep is Saterdagaand omstreeks 20:00 in hegtenis geneem. Hulle sal na verwagting binnekort in die Vryburg-landdroshof verskyn.

Sekwestrasiebevel teen Malema glo hersien

‘n Voorlopige sekwestrasiebevel teen die leier van die EFF, Julius Malema sal na verwagting vandag in die Hooggeregshof in Pretoria hersien word, het RSG berig.

Die Suid-Afrikaanse Inkomstediens het Malema gedagvaar nadat hy na bewering tussen 2006 en 2010 nie belastingopgawes ingedien het nie.

Regter Bill Prinsloo het verlede jaar gelas dat Malema se bates voorwaardelik gesekwestreer word.

Die Inkomstediens het op van Malema se eiendom beslaggelê, waaronder ‘n plaas in Limpopo en ‘n huis in Johannesburg.

Malema en sy Ratanang Familietrust skuld die ontvanger na bewering ongeveer 16 miljoen rand.

Malema het vroeër toegegee dat hy nie sy belastingsake hanteer het, soos deur die wet vereis word nie.

Beurtkragdiesel maak naeltegnikus en tandarts stinkryk

Ná ‘n week van hoë drama by Suid-Afrika se kragvoorsiener waarin vier senior amptenare geskors is, het nog skokkende onthullings na vore gekom.

Die maatskappy het selfs nie geskroom om ‘n swart tandarts en ‘n swart naeltegnikus aan te stel om diesel te verskaf vir sy kragopwekkers nie.

Dit beteken dat dié soort verskaffers reusewinste gemaak het uit beurtkrag.

Volgens die Sunday Times, was die tandarts, Dr Maxine Kekana, en skoonheidsdeskundige, Monica Nkosi, onder die verskaffers om brandstof ter waarde van R200 miljoen aan Eskom te lewer.

Kekana se maatskappy Kekoil en Nkosi se firma Kamoso is twee verskaffers wat Eskom gebruik van tyd tot tyd ondanks die feit dat kontrakte met groot olieverskaffers, insluitend PetroSA gesluit is.

Die koerant berig dat die twee vroue nuwelinge was in die energie-sektor en dat hul maatskappye nie voldoen het aan Eskom se breë-gebaseerde swart ekonomiese bemagtigingskriteria toe hul kontrakte met Eskom gesluit is nie.

Kekana het bevestig dat sy diesel aan Eskom voorsien en dat sy ‘n tandarts van beroep is, maar het daarop aangedring dat sy nie die enigste verskaffer is nie. In ‘n brief aan die koerant het sy gedreig met regstappe as die koerant haar naam of die naam van haar maatskappy publiseer.

Nkosi, die naeltegnikus, het ook bevestig sy Eskom van diesel voorsien, maar het gesê sy “het nie iets soos ‘n formele kontrak nie”.

Zola Tsotsi, voorsitter van Eskom het vroeër aangekondig dat Tshediso Matona, uitvoerende hoof geskors is, sowel as drie senior bestuurders en gesê ‘n volledige onafhanklike ondersoek sal van stapel gestuur word.

SA maak weer mediese geskiedenis met penisoorplanting

Dokters staan gereed om penisoorplantings te doen in al Suid-Afrika se hospitale. Hulle wag net vir gewillig skenkers, het City Press berig.

Suid-Afrika het weereens wêreldwyd mediese geskiedenis gemaak toe ‘n 21-jarige onlangs ‘n nuwe penis ontvang het.

Die eerste mediese deurbraak was Dr Christiaan Barnard se suksesvolle hartoorplanting in 1967.

Professor Frank Graewe, een van die dokters wat die prosedure uitgevoer het en die hoof van die afdeling van plastiese en rekonstruktiewe chirurgie aan die Universiteit Stellenbosch, het gesê die ontvanger van die penisoorplanting was een van verskeie mans op die waglys.

Sy penis moes drie jaar gelede ná ‘n mislukte besnydenis by ‘n tradisionele inlywingseremonie afgesit word.

“Dit is nou drie maande later en die pasiënt herstel baie goed. Hy het seks gehad vyf weke ná die operasie.

Die nege-uur-lange operasie is in Desember verlede jaar in Kaapstad se Tygerberghospitaal gedoen en het die internasionale media aan die gons.

Die skenkerorgaan is in ‘n twee-uur prosedure van ‘n skenker verwyder wat breindood verklaar is. Die hele deel is versigtig verwyder om die bloedvate en senuwees nie te beskadig nie.

Graewe sê die “velkleur” van die skenkerdeel stem ooreen met dié van die pasiënt.

“Dit sal nooit 100% dieselfde wees nie, want selfs wanneer die individue dieselfde velkleur het, sal gelaatskleur verskil.”

Hy sê hulle sal hierdie rasaspek in ag neem in die toekoms.

Professor André van der Merwe, hoof van die afdeling urologie by Stellenbosch wat die operasie gelei het, werk sedert 2010 aan navorsing op dié gebied.

Hy het op kadawers geoefen om die senuwees, bloedvate en ander elemente te ontleed wat ‘n normale funksionering kan verseker.

Die pasiënt is tans op medikasie wat sy immuunreaksie onderdruk om sy liggaam te verhoed om die deel te verwerp.

Graewe het aan die Universiteit van Pretoria studeer. Hy het gesê hulle het ‘n paar pasiënte wat gereed is vir die volgende oorplanting.