skorsings – praag.co.za

Pukke ontken skorsings op grond van ras

Die tydelike skorsing van ses swart studente, hangende ’n dissiplinêre ondersoek ná Vrydag se betoging deur stakende werkers op die NWU se Potch-kampus, hou nie verband met hul velkleur nie.

Waarnemende rektor, Fika Jansen van Rensburg het aan OFM gesê dit is gedoen op grond van ’n berekende oortreding van prosedure-maatreëls en beleid.

Dit volg na ’n verklaring wat vroeër uitgereik is deur die SR-lid, Grantham Jonkers.

In die verklaring beweer Jonkers dat die betrokke studente die slagoffers van ’n rassistiese veldtog is, aangesien wit studente van die Laureus-manskoshuis, wat glo ’n swart student aangerand het, nie geskors is nie.

Jansen van Rensburg voer egter aan dat die studente nog nie geskors is nie omdat die ondersoek na hul beweerde wandaad pas eers begin is.

Verder sê hy Jonkers staar nou moontlik self dissiplinêre stappe in die gesig.

Nog wit DA-lid kry die trekpas terwyl DA EFF-optrede goedpraat

DA-LP Juanita Terblanche beoog om te appelleer teen haar onlangse skorsing uit die party.

Dit volg nadat die DA se nasionale woordvoerder, Phumzile van Damme, die naweek gesê het dat die besluit om Terblanche se lidmaatskap te beëindig, gekoppel word aan wanbesteding van die party se fondse in Noordwes, waarin haar kiesafdeling is.

Terblanche het gesê hoewel sy nie veel meer kan uitbrei oor die saak totdat haar appèl formeel geloods is nie, sy glo dat Van Damme ’n wanvoorstelling van die klagtes teen haar, aan die media gedoen het.

Intussen het nog ‘n wit gesig in die party, die geskorste Diane Kohler-Barnard, gesê sy is van voornemens om formeel te appelleer teen háár skorsing.

Die formele appèl sal volg nadat sy die formele redes ontvang het van die party se federale bestuur.

Die beëindiging van Kohler-Barnard se lidmaatskap is Vrydag aangekondig ná ‘n federale uitvoerende vergadering.

Zille en Van Damme maak planne teen Afrikaners en hul simpatiseerders

Dit was nadat sy gereageer het op ‘n Facebook-boodskap van joernalis Paul Kirk het waarin hy president PW Botha noem. Kohler-Barnard het gesê sy het nie die pos deurgelees voordat sy dit gedeel het nie.

Die boodskap lui as volg: “Kom asseblief terug PW Botha – jy was baie meer eerlik as enige van hierdie [African National Congress] skurke, en jy het ‘n veel beter diens aan die publiek gelewer.”

In September, het sy het skuldig gepleit op klagtes van wangedrag, wat die party in oneer gebring het asook oortreding van die party se sosiale media-beleid.

Die Demokratiese Alliansie sal ook vandag die EFF in die Grondwethof verdedig.

Die DA voer aan dat die inhegtenisneming van parlementslede ongrondwetlik is.

Die saak spruit voort uit gebeure tydens vanjaar se staatsrede toe voorsittende beamptes die polisie opdrag gegee het om opstandige EFF-lede in hegtenis te neem.

Eskom-bonusse buitensporig

Dit blyk dat tien van Eskom se senior amptenare verlede jaar ‘n bonus van miljoen rand elk ontvang het benewens hulle salarisse van meer as drie miljoen rand elk.

Die minister van Openbare Ondernemings, Lynne Brown het in reaksie op ‘n geskrewe vraag in die parlement dié astronomiese vergoedings vir ‘n sukkelende instelling bekend gemaak.

Die onthulling is gemaak te midde van verdere omstredenheid oor ‘n ondersoek na Eskom wat deur die voorsitter van Eskom se raad, Zola Tsotsi gelei sal word.

Politieke partye dring aan op ‘n onafhanklike ondersoek.

Verlede week het Tsotsi onverwags aangekondig dat Eskom se bestuurshoof en drie senior bestuurslede geskors is.

Opposisiepartye het intussen aangedui dat die Openbare Beskermer, Thuli Madonsela genader sal word om dringend in te gryp omdat Eskom self betrokke gaan wees by die ondersoek na sy probleme.

Eskom het Maandag mediaberigte ontken dat Tsotsi, homself ‘aan hoof geplaas het’ van ‘n subkomitee van Eskom se raad en dat hulle volmag gaan hê om ondersoekers aan te stel.

News24 het berig dat Tsotsi en die komitee net ‘n ‘oorsigrol’ gaan speel.

Opposisielede sê dit is duidelik dat Eskom die totale ondersoek wil orkestreer terwyl dit in landsbelang is dat ‘n behoorlike, onafhanklike ondersoek gedoen word.

EFF rig dringende aansoek teen skorsing

Die regspan wat die 20 geskorste EFF-parlementslede verteenwoordig, vergader vandag met die regterpresident van die Wes-Kaapse Hooggeregshof, John Hlophe, oor ‘n regter om die party se dringende aansoek teen die skorsing aan te hoor.

‘n Aantal lede is vir dertig dae geskors sonder betaling.

Die EFF se regsverteenwoordiger, Luvuyo Godla sê hulle gaan ook vra dat die saak so gou as moontlik aangehoor word, het RSG berig.

‘n Verslag wat die skorsings aanbeveel is verlede week deur die Nasionale Vergadering aanvaar.

Die LP’s is aangekla nadat hulle President Jacob Zuma in Augustus tydens `n sitting uitgejou het.

Die Speaker van die Nasionale Vergadering Baleka Mbete, die voorsitter van die Komitee vir Bevoegdhede en Voorregte en ook President Zuma word as respondente genoem.

Die EFF voer aan dat die besluit van die Nasionale vergadering om die Komitee se verslag te aanvaar, ongrondwetlik was.

NWU wys Nazi-saluut-ondersoekspan aan

Die Noordwes-Universiteit sal ’n ondersoekspan van vier aanwys om ontgroeningspraktyke op al die universiteit se kampusse te bestudeer, het die bestuur Donderdag gesê.

Die ondersoek is gelas na ’n ontgroeningsvoorval waarin die Nazi-saluut glo gebruik is by dié universiteit.

Beeldmateriaal is kwaadwillig geredigeer deur ‘n Naspers-joernalis, bevriend met die redakteur van Beeld, om die studente as “ongetransformeerde wit studente” voor te stel. Dié stereotipiese voorstelling het groot byval by Boerhaters gevind.

President Zuma het vroeër aangedui dat die voorvalle waar die Nazi-saluut gegee word, ondersoek moet word omdat dit onaanvaarbaar is.

“Die (universiteit se) raad het besluit om ’n onafhanklike span van vier persone aan te wys om die verwelkoming en bekendstelling van eerstejaarstudente op al drie kampusse te ondersoek,” het die raadsvoorsitter, Peet van der Walt, in Pretoria aan verslaggewers gesê.

Die span sal gevra word om ondersoek in te stel na kulturele toelating, oriëntering, ontgroening en ander praktyke.

“Hulle sal die ontvangs- en bekendstellingsprogramme op al die kampusse ondersoek en vasstel wat die beste praktyke landwyd en wêreldwyd in hierdie opsig is,” het hy gesê.

Van der Walt het gesê die ondersoek na die voorval wat Beeld se voorblad gehaal het, is voltooi en daar sal nou opgetree word. “Die dissiplinêre proses sal nou voortgaan,” het hy gesê.

HK-lede van die Noordwes-Universiteit se Puk-kampus in Potchefstroom het intussen regshulp ingewin nadat hulle verlede maand geskors is.

Nege HK-lede elk van die manskoshuis Over de Voor en die Karlien-dameskoshuis is op 11 Februarie tydelik van hul verantwoordelikhede onthef weens die “onbehoorlike” praktyke.

Chantelle Ludik, die geskorste primaria van Karlien-dameskoshuis, is nooit die kans gegun om haar saak te stel voordat sy summier geskors is nie.

Twee HK-lede het hul eie regsverteenwoordigers genader, terwyl een regsverteenwoordiger moontlik die sewe ander HK-lede se saak sal behartig.

OVK gee onafhanklike kandidate gelyk

Die sekretaris-generaal van die ANC, Gwede Mantashe, sê die ANC is gereed om vandag se tussenverkiesings in die Tlokwe-munisipaliteit in Portchefstroom in Noordwes te wen.

Hy het gepraat nadat die Kieshof in Bloemfontein ses van die nege tussenverkiesings wat vandag gehou moes word, op die nippertjie uitgestel het.

Die ses tussenverkiesings is uitgestel nadat die hof ten gunste van gediskwalifiseerde kandidate beslis het.

Hulle het die Onafhanklike Verkiesingskommissie voor die hof gedaag nadat hulle nominasies om as onafhanklike kandidate te staan, deur die OVK afgewys is.

Mantashe sê die party sal nou op wyke 6, 18 en 26 konsentreer om te verseker dat die ANC dié wyke wen.

Twee munispale tussenverkiesings word ook vandag in die Wes-Kaap gehou.

Wyke in die Drakenstein-munisipaliteit in die Paarl en Mosselbaai sal betwis word. In Mosselbaai word wyk 8 deur die DA, ANC en ‘n onafhanklike kandidaat betwis, nadat die lidmaatskap van die DA-raadslid deur die party be-eindig is.

In die Paarl is die ANC-raadslid geskors en word wyk ses deur die DA, die ANC en ‘n onafhanklike kandidaat betwis. – RSG