Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

Suid-Afrikaners sterf soos vlieë op die paaie

Volgens die minister van vervoer, Dipuo Peters, is daar reeds 924 noodlottige padongelukke tot op 28 Desember aangemeld. In KwaZulu-Natal was daar 211 ongelukke waarin 249 mense dood is. In Gauteng was daar 156 noodlottige ongelukke waarin 174 mense omgekom het. In die Oos-Kaap was daar 129 noodlottige ongelukke waarin 161 mense die lewe gelaat het.

Die totale aantal sterftes in al dié ongelukke beloop “minstens 1 143 mense”.

In Limpopo was daar 106 noodlottige ongelukke waarin 138 mense dood is terwyl daar in Mpumalanga 90 ongelukke was waarin 110 mense dood is. In die Vrystaat was daar 63 noodlottige ongelukke waarin 95 mense dood is en in die Wes-Kaap was daar 78 noodlottige ongelukke waarin 91 mense dood is.

Peters sê dat daar 50 minder noodlottige ongelukke en 25 minder sterftes as in die ooreenstemmende tydperk verlede jaar was. Sy meen egter dit is “kommerwekkend dat daar sedert 23 Desember ʼn toename was in die aantal ongelukke en sterftes”. Daar was van 1 Desember tot 23 Desember 539 noodlottige ongelukke waarin 677 mense omgekom het.

Peters meen dit is “opvallend dat 31% van noodlottige ongelukke tussen 22:00 en 06:00 plaasvind”. Sy het gesê daar is teen 28 Desember reeds 415 mense vir spoedoortredings in hegtenis geneem. Die vinnigste spoed wat aangeteken is, was 265 k.p.u. in die Vrystaat. Minstens 904 mense is reeds vir dronkbestuur aangekeer.

98% van onafhanklike skole se matrikulante slaag

Die slaagsyfer vir privaatskole wat die onafhanklike eksamenraad se matriekeksamen skryf is so pas bekendgemaak. Vanjaar se slaagsyfer is 98,38% met 85,54% van kandidate wat toegang tot graadstudie verkry en 11,56% van kandidate wat vir ʼn diploma kan studeer. 10 451 kandidate, van wie 9 976 heeltyds en 475 deeltyds, het die eksamen vanjaar afgelê. Verlede jaar se slaagsyfer was 98,56%.

Wat wiskunde en fisiese wetenskappe betref, het die IEB-kandidate insgelyks goed presteer, met 89% wat in albei vakke slaag. “Die persentasie leerlinge wat 40% of meer behaal het in wiskunde is 88,6% en die persentasie leerlinge wat 40% of meer in fisiese wetenskappe behaal het, is 88,5%,” het die organisasie verklaar.

“Onderwys is soveel meer as die verwesenliking van goeie resultate in die nasionale senior-sertifikaat-eksamen,” meen Anne Oberholzer, uitvoerende hoof van die onafhanklike eksamenraad, gesê.

Die uitslae vir openbare skole sal eers op 6 Januarie aangekondig word.

Nkandla se eerste sondebok behou werk

‘n Werknemer van die departement van openbare werke is die eerste sondebok van die omstrede opgraderings van R246 miljoen aan pres. Jacob Zuma se huis in Nkandla, het City Press Sondag berig.

Volgens bronne is Itumeleng Molosi (58), direkteur van projekte, geskors nadat hy skuldig gepleit het op aanklag dat hy onreëlmatig kontrakteurs aangestel het en aanskaffingsprosedures verontagsaam het, het die koerant berig.

Hy het glo verlede Maandag die ooreenkoms onderteken nadat hy onderneem het om skuldig te pleit.

Molosi sal glo sy pos behou nadat die departement hom twee maande lank sonder betaling geskors het.

Volgens Molosi het hyself asook ander werknemers onder druk geswig om prosedures te verontagsaam omdat dit die president se huis was.

Elf ander beamptes, wat almal deur die Vereniging vir Staatsamptenare (PSA) verteenwoordig word, kan soortgelyke ooreenkomste aangaan om uitgerekte verhore te vermy.

 

Polisie keer groep aan wat Lesotho by SA wil inlyf

Die polisie in Ficksburg in die Vrystaat het bykans 140 lede van die Free Movement of Basotho, onder wie hulle leier bekend as Doctor Morolong, aangekeer.

Hulle is in hegtenis geneem toe hulle ‘n optog wou hou om te eis dat Lesotho by Suid-Afrika ingelyf word, het RSG berig.

Die polisie sê die 40-jarige leier van die groep sal van aanhitsing aangekla word.

Die ander kan vervolg word omdat hulle die land sonder die regte dokumente binnegekom het.

Hulle sal tot hulle hofverskyning in aanhouding bly.

Die polisie het ook beslaggelê op vyf minibus-taxi’s sonder permitte en een gesteelde voertuig.

SAID-hoof dalk weer geskors

Ivan Pillay, adjunkhoof van die Suid-Afrikaanse Inkomstediens (SAID), kan weer geskors word net enkele dae nadat sy vorige skorsing tersyde gestel is, berig die Sunday Times.

Volgens die berig het Pillay Vrydag ‘n skorsingskennisgewing ontvang waarvolgens hy tot 12 Januarie het om redes aan te voer oor hoekom hy nie geskors moet word nie.

Die arbeidshof in Johannesburg Donderdag beveel het dat Pillay se aanvanklike skorsing tersyde gestel moet word.

Pillay is deur Tom Moyane, hoof van die SAID, geskors nadat hy ‘n paneel aangestel het om bewerings te ondersoek oor ʼn spesialeprojekte-eenheid se beweerde onwettige aktiwiteite.

Volgens die Sunday Times se berig moet Pillay geskors word aangesien hy met bewyse kan peuter tydens die ondersoek, soos hy al glo voorheen gedoen het.

Pillay word daarvan beskuldig dat hy ʼn sleutelrol gespeel het in die oprig van ʼn geheime intelligensie-eenheid binne die SAID ondanks die feit dat hy geweet het dit is ongrondwetlik.

Hy het na bewering die SAID in oneer gebring deur die “skelm gedrag van diegene wat aangestel is om onwettige bedrywighede uit te voer te magtig, of versuim om dit te verhoed”.

Volgens die berig het Pillay op bedrieglike wyse vroeë aftrede misbruik vir finansiële gewin en verkwistende en nuttelose uitgawes aangegaan.

Pillay en Peter Richer, groephoof van risiko en beplanning, het die arbeidshof genader nadat hulle op 5 Desember deur Moyane geskors is. Richer het egter ʼn skikking met die SAID bereik waarna sy skorsing tersyde gestel is.

Die Minister van Finansies Nhlanhla Nene sê hy is in konsultasie met die kommissaris van die Inkomstediens, Tom Monyane, oor hoe om die hartseer hoofstuk af te sluit.

Nene sê hy sal nie toelaat dat die onlangse gebeure die Suid-Afrikaanse Inkomstediens ontspoor nie.

Hy het onderneem om te verseker dat die Inkomstediens ‘n model-instelling bly.

Die minister sê hy sal aan die einde van aanstaande maand ‘n aankondiging maak oor die pad vorentoe.

Brandstofkrisis staar Namibiërs in gesig

Vakansiegangers op pad na feestydbestemmings in Namibië kan hulle in die komende dae voor leë brandstofpompe bevind.

Mielieboere is boonop tans besig om hul lande vir die plantseisoen gereed te kry, wat die vraag na diesel verhoog, het die Republikein berig.

TransNamib het gister erken hy ervaar “reuse-uitdagings” om grootmaat vraggoedere, insluitend brandstof, na die onderskeie leweringspunte in die land te vervoer.

Dit is weens die nasionale karweier se tekort aan werkende lokomotiewe.

‘n Bekommerde bron in die brandstofbedryf voer aan die ander rede is dat TransNamib self nie oor genoegsame brandstofvoorrade beskik om sy lokomotiewe operasioneel te hou nie, glo omdat die nasionale karweier nie sy leweransiers kan betaal nie.

Ailly Hangula-Paulino, woordvoerder van TransNamib, het by navraag erken dié vervoerreus se brandstofvoorraad “is nie op die gewenste vlak nie”. Volgens haar is wanbetaling egter nie die rede daarvoor nie, maar wel vervoerprobleme.

Hangula-Paulino sê TransNamib is die voorkeurverspreider van petrol en diesel aan die brandstofbedryf, maar kan as gevolg van die probleme wat hy ondervind nie aan die vraag na lewering voldoen nie.

“Dit is nie net tot sekere dorpe in die land beperk nie, maar tref verbruikers op ’n groter skaal,” het Hangula-Paulino gesê. Al oplossing is om dit per pad met brandstoftenkers te vervoer.

“Hoewel die vraag na brandstof toeneem, is daar terselfdertyd tans ’n afname in die vraag om ander goedere per spoor te vervoer en daarom behoort die situasie nie verder te versleg nie,” het Hangula-Paulino gesê.

Sy waarsku egter dat die tekort op sekere dorpe en by sekere brandstof-depots kan vererger.

Michael Feldmann, bedryfshoof van TransNamib, het twee weke gelede in ’n verklaring gesê die nasionale karweier het die afgelope maande by verskeie geleenthede sy kliënte gefaal. Hy het in ’n verklaring gereageer op navrae deur joernaliste oor passasierstreine wat op pad na Keetsmanshoop gestrand geraak het en gesê: “Aanvaar asseblief my verskoning vir die swak diens wat die publiek die afgelope maande ervaar het. Dit is nie goed genoeg nie en ons skuld die publiek ‘n verskoning oor wat gebeur het en wat ons doen om dit te verbeter.”

Hy het dit aan die verouderde lokomotiewe toegeskryf.

TransNamib het sowat drie maande gelede ‘n multimiljoen dollar omkeerplan van 180 dae aangekondig.

Vier vas oor boikotveldtog teen Woolworths

Vier mense is in Claremont, Kaapstad by die Cavendish-winkelsentrum in hegtenis geneem omdat hulle as deel van ‘n boikotveldtog teen Woolworths betoog het.

Die veldtog teen Woolworths is weens hul voortgesette handel met Israel ná die oorlog in Gasa.

Lt.kol. Andre Traut, woordvoerder van die polisie, het gesê drie mans en ‘n vrou is Saterdag in hegtenis geneem op aanklag van intimidasie, betreding en die oortreding van ʼn hofbevel.

Erwin Arrison, voorsitter van die National Coalition for Palestine (NC4P), het gesê vier lede van die Action Forum for Palestine (AF4P), is in hegtenis geneem.

“Volgens berigte het Woolworths die SAPD ontbied om die #BoycottWoolworths-aktiviste in hegtenis te neem. Woolworths het hulle valslik daarvan beskuldig dat hulle lede van die Boycott, Divestment and Sanctions in South Africa (BDS) is en dat hulle ‘n hofbevel oortree het,” het Arrison aan Sapa gesê.

Volgens Arrison is die vier egter nie lede van BDS nie. “BDS het ingestem om te goeder trou nie in Woolworths-winkels te betoog nie weens die hofbevel. Die hofbevel is egter nie van toepassing op ander organisasies wat nie deel is van BDS nie.”

‘n Nagwaak sal buite Claremont-polisiestasie gehou word uit solidariteit met die vier.

 

Vermoor by onklaar motor op snelweg

‘n Man is Donderdag vermoor langs sy motor op die M2-snelweg naby Denver in die suide van Johannesburg gevind.

“Dit is nog nie seker wat gebeur het nie, maar dit lyk asof sy motor gaan staan het en dat hy stilgehou het,” het inspekteur Edna Mamonyane, woordvoerder van die metropolisie, gesê. “Hy het uitgeklim en mense langs die snelweg het hom waarskynlik gekonfronteer.”

Beamptes in ʼn metropolisiepatrolliemotor het die motor opgemerk en gesien die enjinkap staan oop. “Die man se liggaam is naby sy motor aangetref. Hy is in die kop geskiet.”

Werner Vermaak, woordvoerder van ER24, het bevestig paramedici het die man, ongeveer 40, op die toneel dood verklaar.

Die polisie ondersoek ‘n saak van moord.

Trop buffels soek skuiling in dorp

Wildbewaarders moes ‘n groot trop buffels uit die Zimbabwiese toeristedorpie, Victoria Falls verjaag, het RSG berig.

Plaaslike inwoners sê die buffels is deur ‘n trop leeus in die dorp ingejaag.

Die buffels het skuiling naby een van die hotelle in die middel van die dorp gesoek.

Inwoners op die rand van die dorp kom baie met diere in aanraking, maar gevaarlike diere kom selde tot in die kern van die dorp.

Brandstofpryse kan skerp daal

Motoriste kan volgende maand ‘n rekorddaling in brandstofpryse verwag weens internasionale oliepryse wat skerp gedaal het, het die Outomobiel Assosiasie (AA) het Woensdag gesê.

“Dit is ondanks ‘n geleidelike verswakking van die rand-dollar-wisselkoers oor die afgelope twee weke,” het die AA luidens ‘n verklaring gesê.

Na verwagting sal petrol met tussen R1,05 en R1,07 per liter daal terwyl die groothandelprys van diesel met 88c per liter goedkoper sal word.

Dié voorspelling kom nadat die Sentrale Energiefonds sy ongeouditeerde mid-Desember brandstofprysdata bekend gemaak het.

Volgens die AA is die werklike syfer moeilik om te voorspel aangesien ru-oliepryse afwaarts neig, terwyl die Rand ook teenoor die Amerikaanse dollar verswak.

Die prys wat motoriste by die pompe betaal teen die einde van die maand kan dus tot onder R12 per liter daal, meen die AA.