Derde swart sportster sterf

‘n Swart vrouebokser Phindile Mwelase is dood nadat sy vir twee weke in ‘n koma was, het die sport- en ontspanningsministerie Maandag gesê.

Die professionele bokser Mwelase (31) is by die Steve Biko Akademiese Hospitaal in Pretoria Saterdag oorlede, het die ministerie in ‘n verklaring gesê.

Die ligte weltergewigbokser is op 10 Oktober uitgeslaan in die stryd teen Liz Butler in Pretoria.

Afrikaanse bokser Liz Butler
Afrikaanse bokser Liz Butler

“Minister Fikile Mbalula het weer van die afsterwe van nog ‘n belowende sport talent van hierdie land verneem nadat Mwelase die stryd verloor het weens haar ontydige dood op 25 Oktober,” het die ministerie gesê.

Volgens boxrec.com het Mwelase se loopbaan oor vier gevegte gestrek, waarin sy ‘n gelykopuitslag behaal het en drie verliese gely het (insluitende die uitklophou wat gelei tot die koma).

Haar dood het die aantal van sportsterftes op drie sedert Vrydag te staan gebring.

Die Olimpiese silwermedaljehouer vir 800m Mbulaeni Mulaudzi is dood in ‘n motorongeluk Vrydag.

Bafana Bafana se kaptein en doelwagter Senzo Meyiwa is doodgeskiet in Vosloorus Sondag.

Klaar met Afrika

Dit was hul tweede besoek aan Namibië, ’n wonderlike land wat hulle vertrou het. Maar nou is hulle klaar met Afrika. Hulle gaan ook hul vriende aanraai om weg te bly.

So het die egpaar Josef en Johanna Stapfler­ Vrydag aan die Republikein gesê voordat hulle drie dae ná hul aankoms in Namibië weer op ’n vliegtuig terug na Frankfurt was. Die Stapflers­ was die vorige middag by Omaruru se Franke-­toring die slagoffers van ’n man wat asof van nêrens verskyn het, hulle afgedreig en hulle toe liederlik­ aangerand het.

Ná hul aankoms in Windhoek het die egpaar in hul gehuurde motor een aand in ’n lodge net suid van Karibib geslaap. Donderdagaand­ het hulle soos bespreek in ’n bergherberg wes van Omaruru geslaap nadat hulle die vorige dag aangerand­ is. Vrydag was dit vir hulle terug Windhoek en huis toe. Hul Namibiese­ toer van 18 dae wat hulle ook na Damaraland en die Zambezi­streek sou bring, het net drie dae geduur.

Die egpaar in hul vroeë veertigerjare­ was ontnugter en teleurgesteld­.
Na behandeling in die staatshospitaal­ op Omaruru het die Stapflers self vertel wat Donderdagmiddag net voor die etensuur­ by Omaruru se Franke-­toring­ met hulle gebeur het. Hulle wou die Franke-­toring as ’n historiese­ erfenisbaken­ besoek. Daar gekom, was die deur gesluit.

Hulle was reeds terug by hul gehuurde voertuig­ toe hul aanvaller­ langs hul kar uitgeslaan het.

Die man het beduie dat hy honger was en geld of enigiets anders soek. In daardie stadium was Johanna se sak met hul kosbare reisgoed nog om haar nek. Sonder enige argument het die man haar sak gegryp en het ’n struweling­ ontstaan.­ Die volgende oomblik het die man haar met ’n harde voorwerp oor die kop geslaan. In sy een hand was ’n kannetjie­. Johanna het gemeen dit kon die een of ander spreimiddel bevat en het vir haar oë gekeer. Toe Josef bygekom het, het hy ’n hou in sy ribbes gekry. Hy was nogtans sterk genoeg om op straat hulp te soek terwyl sy bebloed by hul voertuig gestaan het.

Oor hul skielike huis toe gaan was die egpaar dit eens: “Ons wil nie meer hier wees nie”.

In die sak waarmee hul aanvaller die hasepad gekies het, was allerlei kaarte van die egpaar, sowat tweehonderd euro en ’n klompie Namibiese dollars. Behalwe die sak en die inhoud daarvan is ander goed nie uit die gehuurde motor gesteel nie.

Baas van e.tv bedank na sy skorsing

Die uitvoerende hoof van e.tv en eNCA, Marcel Golding het bedank.

Die TV-stasie het bevestig dat Golding sy bedanking ingedien het nadat hy ‘n aansoek in die Arbeidshof verloor het om sy skorsing ter syde gestel te kry.

Die maatskappy wat die televisiestasie besit, Hosken Consolidated Investments (HCI), het hom verlede week geskors.

Hy word daarvan beskuldig dat hy 24 miljoen rand se aandele in die elektroniese maatskappy Ellies Holdings sonder raadpleging gekoop het.

Barbara Hogan, voormalige ANC-minister en HCI-direkteur het terselftertyd bedank.

Hogan beweer dat ‘n ondersoek na die Ellies aandeel-transaksie op ‘n onprofessionele manier gedoen is en e.tv se hoofaandeelhouer, die SACTWU, die klerewerkersunie, (South African Clothing and Textile Workers’ Union) het probleme met e.tv se redaksionele praktyke.

Regter Anton Steenkamp het Maandag teen Golding beslis.

Regter Steenkamp het gesê die dissiplinêre aksie teen Golding is nie onwettig nie en hy moet hom wend tot regsmiddele soos voorgeskryf deur die Wet op Arbeidsverhoudinge .

Golding beweer dat die dissiplinêre verhoor teen hom gevolg het nadat hy geweier het om aan politieke druk toe te gee.

Hy het na die aankondiging gesê hy is gedwing om te bedank vanweë ‘n stryd om redaksionele onafhanklikheid.

Matriek 2014: Eksamen begin vandag

Die matrieks van 2014 begin vandag met hul eindeksamen.

Die minister van basiese onderwys, Angie Motshekga, het vanjaar se matrieks sterkte toegewens.

Meer as 550 000 voltydse matrieks skryf vandag die eerste Engelse vraestel.

Dit is die eerste vraestel wat matrieks onder die nuwe curriculum sal aflê.

Britse koerant hits twis aan tussen Bob se opvolgers

Grace Mugabe se ambisie om die volgende president van Zimbabwe te word, sal die regering in die land laat “skeur”, het die Guardian berig.

Britse koerante en meningsvormers is gretig om dié verwikkeling aan te moedig en poog reeds maande lank om leiersfigure teen mekaar op te steek.

Die Guardian beweer dat Grace, die vrou van die huidige president Robert Mugabe, by ‘n saamtrek buite Harare Donderdag, gesê het sy kan president wees as sy wil want sy is ‘n burger van land.

Volgens die koerant het Grace met ‘n “venynige tirade teen die huidige Zimbabwiese vise-president Joice Mujuru” losgetrek.

Grace het Mujuru glo beskryf as “ondankbare, magshonger, dom, korrupte, dwase, verdelende en ‘n skandelike persoon,” en haar beskuldig van samewerking met wittes om die land se post-onafhanklikheid te ondermyn.

Zimbabwe se adjunkpresident, Mujuru het die bewerings verwerp dat sy beplan om president Robert Mugabe te ontsetel, voor die regerende party se kongres in Desember.

Sy het bewerings in Britse koerante ontken dat sy Mugabe uit die kussings wil lig.

Grace Mugabe het Mujuru intussen aangeraai om te bedank.

Mujuru en die minister van justisie, Emmerson Mnangagwa word beskou as die voorste aanspraakmakers om die 90-jarige Mugabe op te volg.

Bafana Bafana-doelwagter doodgeskiet

Die Bafana Bafana-doelwagter en kaptein, Senzo Meyiwa, 27, is doodgeskiet tydens ‘n rooftog by ‘n huis in Vosloorus, suid van Johannesburg.

Die doelwagter het glo probeer om sy Afro-popsangeres en vriendin Kelly Khumalo, te beskerm.

Volgens die polisie het twee mans die huis binnegeggaan terwyl ‘n derde buite gewag het, en Meyiwa se selfoon geëis.

Gauteng se LUR vir Gemeenskapsveiligheid Sizakele Nkosi-Malubane het die misdaadtoneel waar Meyiwa doodgeskiet is intussen besoek.

Daar was ‘n skermutseling, en skote is afgevuur. Meyiwa het voor Khumalo ingespring om haar te beskerm en hy is in die rug geskiet. Die koeël het deur sy bors getrek.

Die twee mans het te voet gevlug saam met die derde verdagte wat buite die huis gewag het.

Daar was sewe mense in die huis toe die voorval plaasgevind het. Die ander mense is ongedeerd.

Meyiwa is by ‘n Oos-Randse hospitaal dood verklaar. Hy was kaptein van Bafana Bafana tydens die span se laaste vier kragmetings, nadat Ithumeleng Khune beseer is.

Hy was ook die kaptein en doelwagter van die klub Orlando Pirates.

Khumalo is na die voorval gesien waar sy wegry in Meyiwa se BMW onder polisiebegeleiding.

Die Suid-Afrikaanse Polisiediens het bevestig dat ‘n beloning van tot R150 000 aangebied word vir inligting wat kan lei tot die inhegtenisneming van die moordenaar van Bafana Bafana en Orlando Pirates se doelwagter.

Die onderonsie het Sondagaand omstreeks 20:00 in Zamo-seksie van Vosloorus plaasgevind.

Dit was die tweede dood van ‘n Suid-Afrikaanse swart sportman binne ‘n kwessie van dae, ná die Olimpiese 800m silwermedaljewenner Mbulaeni Mulaudzi in ‘n motorongeluk Vrydag dood is.

Bafana Bafana het op jongste wêreldranglys van FIFA tien plekke gespring Donderdag om 57ste te wees.

Na oorwinnings oor Soedan en die Kongo, asook gelykopuitslae teen Nigerië en die Kongo, in hul Afrika-beker van Nasies (AFCON) kwalifiseerders, het die span 12 plekke in Afrika opgeskuif.

Die nasionale polisie-kommissaris, Riah Phiyega sal later vanoggend die media in Johannesburg toespreek.

Strawwe Botswana-verkiesing verwag

Politieke ontleders meen die mededinging in Vrydag se algemene verkiesing in Botswana sal die strafste wees in die land se 48 jaar van demokrasie, het RSG berig.

Drie partye neem aan die verkiesing deel. ‘n Kenner verbonde aan die Universiteit van Botswana, professor Zebani Maundeni meen die regerende BDP-party van president Ian Khama kan sy sterkste teenstand nog verwag.

Die moontlikheid bestaan dat hy nie ‘n volstrekte meerderheid in die parlement kan hê nie.

Maundeni sê daar kan vir die eerste keer ‘n koalisieregering wees.

Die Botswana Verkiesingskommissie sê meer as agthonderd-duisend kiesers het geregistreer om te kan stem.

Swart landbou in maalkolk van Amerikaanse slagspreuke

In toesprake wat op 11 Augustus 2006 en 28 Augustus 2007 gelewer is deur die toenmalige minister van landbou, Lulana Xingwana, is aangekondig – onder die gebruiklike vloedgolf van Amerikaanse slagspreuke en gemeenplase oor vroueregte en apartheidskuld – dat spesifieke plase aan swart boere gegee sal word sonder vergoeding met die suggestie dat dit gesteel is van swartes wat “moeg is van wag”.

Xingwana het ondermeer in 2007 haar toespraak met ‘n aanhaling uit Richard Stengel se boek wat hy namens Mandela geskryf het, Long Walk to Freedom afgeskop.

Een van dié gebiede, Mamahlola, beslaan 14 plase en is in 2001 hertoegewys. Mamahlola was al vroeër op die rand van ineenstorting, maar danksy pogings deur South African Farm Management (SAFM), ‘n plaaslike wit groep wat swart boere oplei, is die ergste afgeweer.

‘n Werker by Mamahlola meen tans die regering moet liewer ophou met sulke ondernemings wat klaarblyklik ewig gedoem is tot mislukking.

“Deur middel van strategiese ingrypings is dit [Mamahlola] weer op dreef en floreer,” het Xingwana in 2007 aangekondig.

Mamahlola produseer mango’s en avokado’s, piesangs, lietsjies, pekanneute en ander gewasse mbv beperkte waterbronne.

SAFM het sewe soortgelyke projekte in Limpopo, en in naburige Mpumulanga provinsie van stapel gestuur.

SAFM het in 2007 meer as R100 miljoen van belastingbetalers se geld op sulke swart boerderye bestee, het Henry Wolff, SAFM se sake-ontwikkelingsbestuurder aan IPS gesê.

Sowat 150 plaaswerkers buite Tzaneen in Limpopo het die afgelope ses maande nie egter nog geen lone ontvang nie.

Die voormalige uitvoerplaas Mamahlola behoort nou al 10 jaar lank aan die Banareng Ba-Ga-Letsoalo-gemeenskap.

‘n Woordvoerder van die werkers het erken dat nadat die plaas wanbestuur is, is dit onder administrasie van die regering geplaas.

Hy sê die plaas behoort eerder gesluit te word as die regering nie eers weet wanneer daar geld vir hulle lone sal wees nie.

Ramaphosa gee Numsa geleentheid om saak te stel

Adjunkpresident Cyril Ramaphosa het vroeër ‘n oproep om eenheid in Cosatu gedoen omdat dit volgens hom noodsaaklik is om te verseker dat werkersregte beskerm word. Hy het Numsa geleentheid gegee om eersdaag hulle saak te stel.

Cosatu dreig om te skeur en irrelevant te raak in ‘n arbeidsmark wat deur hoë werkloosheid en lae produktiwiteit gekenmerk word.

Numsa en Cosatu is sedert die skietery by Marikana haaks en die stryery het verdiep voor die algemene verkiesing vandeesjaar.

Die twis handel oor onder meer oor ‘n besluit om steun aan die ANC te onttrek en buite sy tradisionale steunbasis in die metaal- en ingenieursbedryf lede te werf om ‘n breë sosialistiese werkersbeweging te bou.

Ramaphosa het gesê daar sal nog ‘n spesiale sentrale uitvoerende komitee vergadering in November gereël word om die metaalwerkersvakbond, Numsa die geleentheid te gee om homself teen skorsing uit die federasie te verdedig.

Die besluit is geneem op ‘n vergadering van die komitee wat Donderdag in Johannesburg plaasgevind het.

Daar was bespiegelinge dat die komitee Donderdag sal stem oor Numsa se skorsing. ‘n Stemmery sou egter klaarblyklik onwettig en ongrondwetlik wees.

Russiese kernfisici vergader met SA amptenare in Drakensberg

‘n Span van 20 Russiese kernfisici het vandeesweek met 50 Suid-Afrikaanse amptenare in die Drakensberg vergader, volgens ‘n berig in die Johannesburgse dagblad Beeld. Die groepie vergader blykbaar by die Champagne Sports Resort, wat as ‘n “luukse oord” beskryf word.

Ingang van die Champagne Sports Resort. Foto: drakensberg.biz
Ingang van die Champagne Sports Resort. Foto: drakensberg.biz

Die Suid-Afrikaanse groepering word aangevoer deur Zizamele Mbambo, adjunk-direkteur-generaal van energie, terwyl die Russiese span almal vir die staatskernkragmaatskappy Rosatom werk.

Volgens Beeld “verskyn Rosatom se naam egter nêrens in die hotelregister, op die Russe se naamkaartjies of op die plekaanwysings vir die verskillende konferensielokale nie”.

Ons het vroeër berig oor Rosatom se “verklaring… waarin bekendgemaak is dat hy ‘n ooreenkoms ter waarde van R100 miljard met die Suid-Afrikaanse regering gesluit het vir die toevoeging van ‘n kernkrag-vermoë van 9 600 megawatt”.

Wiktor Polikarpaf het blykbaar vandeesweek se byeenkoms in die Drakensberg bygewoon, aangesien sy naam in die hotelregister by chalet 27 verskyn. Hy staan aan die hoof van Rosatom se Suid-Afrikaanse kantoor in Sandton.

Beeld se verslaggewers, wat volgens die berig die hotel “geïnfiltreer het”, het twee Russiese gaste in “gholfhemde met Rosatom se naam daarop” by die ontbyttafel opgemerk.

Volgens Mbambo is dit bloot ‘n inligtingsessie waartydens die verkoopspan van Rosatom geleentheid gegee word om hul toerusting aan te bied. Ander lande se kernbedrywe sal ook so ‘n geleentheid gegun word. Frankryk en China sal volgende aan die beurt kom.

“Ander genooide lande, insluitend Suid-Korea en Amerika, sal hul voorleggings betyds reg moet hê as hulle vir die program oorweeg wil word,” het Mbambo gesê.

Die Russiese voorleggings was “omvattend”, het Mbambo gesê. Volgens hom is die geheimhouding nodig “om hierdie maatskappye se eiendomsreg” te beskerm. Toekomstige verkrygingsprosesse sal heeltemal deursigtig wees, het hy gesê.

Van die ander kernkragvervaardigers het egter gekla dat hulle nog nie genooi is nie.

‘n Fotograaf van Beeld, Rowan Philp, het hom as ‘n genooide amptenaar voorgedoen en vir 15 minute een van die werksessies bygewoon. Tydens die 15 minute is heelwat vrae oor die veiligheid van die reaktors vanaf Suid-Afrikaanse kant via ‘n tolk gevra. Die woord Foekoesjima, setel van die Japanse kernramp ná die tsoenami van 11 Maart 2011, is verskeie kere gehoor, maar soms nie getolk nie. Volgens die Russe is veiligheid ‘n hoë prioriteit by die ontwerp van Rosatom se kernkragsentrales. “Ons ontwerp verwyder hitte; ons hoofdoel is om veiligheid te verskaf”.

Die Russiese wetenskaplikes het egter erken dat hul kernkragsentrales slegs langs riviere en nie naby die see gebou is nie. Weens Suid-Afrika se gebrek aan groot riviere, sal seewater noodwendig, soos in die geval van Foekoesjima, vir verkoeling gebruik moet word.