Karin Roodt – Bladsy 98

Keniane vrees etniese geweld as leiers by Strafhof in Den Haag verskyn

Kenia se president en sy adjunk is onderweg na Den Haag terwyl kommer toeneem dat wrywing weer sal opvlam in gemeenskappe wat uitmekaar geskeur is deur ‘n post-verkiesingsbloedbad meer as vyf jaar gelede.

Adjunkpresident William Ruto gaan die beskuldigdebank by die Internasionale Strafhof staan vir misdade teen die mensdom, gevolg deur President Uhuru Kenyatta in November, terwyl lede van hul twee onderskeie etniese groepe vrees dat dit ou wonde kan oopmaak .

Hul oorwinning in vanjaar se vreedsame verkiesing onder die Jubilee Alliance het nog min gedoen om die etniese haat te genees op die grond tussen Kenyatta se Kikoejoe en Ruto se Kalenjin stamme, wat ná ‘n betwiste 2007-uitslag, die saak met geweld wou besleg.

Dit laat Oos-Afrika se grootste ekonomie op hete kole, waar stamlojaliteite ‘n deurslaggewende rol in politiek speel en geweld dryf . Dit bekommer ook die Weste, wat ‘n stabiele Kenia as noodsaaklik vir die plaaslike veiligheid en die stryd teen militante Islam beskou.

Vir die Internasionale Strafhof, is dit die eerste verhoor waarby ‘n sittende president aangekla word en sy grootste toets tot dusver as instelling wat in 1993 gestig is. Die ISH kry toenemende opposisie uit Afrika, waar dit gesien word as ‘n bevooroordeelde instelling wat slegs swartes uitsonder.

Die alliansie tussen Kenyatta en Ruto het tyd gekoop sê inwoners van die westelike stad van Eldoret, naby die plek waar ongeveer 30 Kikoejoes tot die dood verbrand is in ‘n kerk deur ‘n Kalenjinbende aan die brand gesteek is.

Ná ‘n parlementêre stemmery verlede week is geëis dat Kenia onttrek van die Den Haag-hof se jurisdiksie wat ontleders laat glo dat Nairobi politieke dekking bou vir die twee mans om hul deelname in die verhoor stop te sit, maar diplomate sien so ‘n skuif as onwaarskynlik.

Kenyatta (51) en Ruto (46) het lank belowe dat hulle sal voortgaan om saam te werk om aanklagte van misdade teen die mensdom te weerlê. Daarbenewens sal enige besluite in Kenia ‘n jaar neem om te implementeer en die komende hofsaak nie kan stuit nie.

“Die twee glo hulle kan wen by die verhoor,” sê Macharia Munene , ‘n universiteitsdosent in Nairobi . “Die hof het ook ‘n swak rekord van skuldigbevindings, ” het hy gesê , met verwysing na die Kongolese krygsheer Thomas Lubanga . – Reuters

Guptas betaal glo nie hul rekeninge nie

Die Gupta-familie het weer onder skoot gekom, hierdie keer van kontrakteurs wat beweer dat hulle nie betaling vir hul dienste ontvang nie.

Die swierige, superryk familie skuld na bewering geld vir dienste aan hul myne, berig die Sunday Times.

Volgens Marius Nel, wat ‘n drie–jaar kontrak met Shiva Uranium, ‘n myn in Gupta-besit gehad het, word hy R2.2miljoen geskuld asook ‘n verdere R2 miljoen wat verband hou met ‘n ongeluk op een van hulle myne.

Hy sê hy wag sedert Mei vir die geld. Hy het Shiva gedagvaar, wat op hulle beurt ‘n teeneis vir toerusting wat na bewering beskadig is in ‘n ongeluk ingestel het.

Ander diensverskaffers het ook gesê Shiva is ‘n slegte betaler.

Die Guptas het die myn in 2010 gekoop. Hulle het R461miljoen van hul eie geld met ‘n bykomende R250 miljoen lening van die Industrial Development Corporation (IDC) betaal. Shiva is egter nie in staat om die lening te diens nie wat glo geherstruktureer is onlangs, as gevolg van lae uraanpryse.

Sasolburgse gemeenskapradiostasie afgebrand

Sasolburg se gemeenskapsradiostasie Karabo FM is afgebrand in ‘n oënskynlike brandstigtingsaanval, het direksievoorsitter, Sam Mkhwanazi gesê.

“Twee gewapende mans wat hul gesigte verberg het, het in die ateljee ingekom met 25 liter petrol. Hulle het dit Saterdagnagoral uitgegooi en daarna die plek aan die brand gesteek,” het hy gesê.

Hy het gesê die twee het beveel dat die aanbieder in die ateljee die gebou verlaat voordat hulle dit aan die brand gesteek het om 21:00.

“Ons weet nie hoekom die stasie [af]gebrand is nie. Die hele gebou is vernietig en ons harde werk van vyf jaar is vernietig binne twee minute...“

Hy het gesê die stasie het ‘n normale verhouding met die inwoners in Sasolburg en hy kan nie verstaan hoekom mense verkies het om dit af te brand nie.

“Mense was lief vir die stasie, dit is ‘n groot verlies vir ons,” het hy gesê.

Vrystaat se polisie was nie dadelik beskikbaar vir kommentaar nie. – Sapa

Misdaadintelligensiehoof steeds in sy pos

Waarnemende hoof van misdaadintelligensie Chris Ngcobo het nie sy pos verlaat nie, het die SAPD gesê.

“Hy is nog steeds in sy pos, hy het nie uit die posisie getree nie,” het ‘n woordvoerder lt.genl Solomon Makgale gesê.

City Press het berig dat Ncgobo uit sy posisie getree het as ‘n gevolg van ondermyning deur ‘n pro-Richard Mdluli-faksie.

Volgens die koerant is Ncgobo amper ‘n maand gelede uit misdaadintelligensie se hoofkantoor na die veiligheids- en beskermingsdienste .

Ncgobo woon glo nie vergaderings by nie en het die nasionale kommissaris van polisie Riah Phiyega en die toppolisiebestuur ingelig dat hy nie sal terugkeer na sy pos nie.

Ncgobo het oorgeneem nadat Mdluli verlede jaar geskors is te midde van aanklagte van bedrog en korrupsie, asook die moord op sy voormalige vriendin se man .

‘n Geregtelike doodsondersoek het hom van enige betrokkenheid by die dood van sy voormalige vriendin se man onthef. Die aanklagte van bedrog en korrupsie is later almal ook teruggetrek .

Hy is later egter weer geskors in 2012 na sy heraanstelling, in afwagting van ‘n hofaansoek deur die drukgroep Freedom Under Law (FUL) om die onttrekking van die kriminele en dissiplinêre aanklagte teen hom te hersien.

Die Mdluli–geval is ‘n belangrike toets vir die Demokratiese Alliansie se poging om die howe teen president Zuma te gebruik.

Die party voer aan dat die Zuma-administrasie die weg gebaan het vir verpolitiseerde aanstellings, insluitend dié van Mdluli, van die waarnemende nasionale direkteur van openbare vervolging, adv Nomgcobo Jiba, en die hoof van die gespesialiseerde handelsmisdaadeenheid, adv Lawrence Mrwebi. – Sapa

Vrouejoernalis verongeluk R3m Ferrari

Bekroonde vrouemotorjoernalis Melinda Ferguson het ‘n rare R3.2 miljoen Ferrari California verongeluk, terwyl sy besig was om die motor te toets–bestuur.

Volgens die Sunday Times, het die voorval verlede week in Johannesburg gebeur toe Ferguson gebots het met ‘n Mitsubishi Pajero.

Die blits van ‘n V8 GT, wat 338kW se krag lewer is tans by die Italiaanse Viglietti-motorhandelaar in Johannesburg om geëvalueer te word.

Ferguson is die skrywer van ‘n memoir oor haar stryd met dwelmverslawing, en The Kelly Khumalo Story. Sy is motor-redakteur by die tydskrif True Love en bedryf die Girl Torque–blog.

Stoei terug vir 2020 Spele

Een van die wêreld se oudste sporte, stoei, het sy plek op die Olimpiese Spele se Sportrooster behou nadat die sportliggaam oorweeg het om dit af te haal vir 2020.

Ná ‘n stemmery deur die Internasionale Olimpiese Komiteelede in Buenos Aires in Argentinië is besluit om dit wel in te sluit as item. Die IOK het groot kritiek uitgelok deur sy besluit.

Stoei, wat een van die min sportsoorte is wat in die antieke sowel moderne Olimpiese Spele aangebied is, het 49 van die 95 stemme gekry. Druk deur Iran en Rusland het vir die oorwinning gesorg.

Bofbal en Sagtebal se gesamentlike bod was tweede met 24 stemme terwyl muurbal 22 stemme gekry het.

Dit beteken dat stoei by sowel die Somerspele in 2020 in Tokio en die Spele in 2024 te sien sal wees.

Petroljoggies staak

Die metaalwerkersvakbond Numsa sê duisende van sy lede in die motorbedryf begin vandag staak. Dit sluit petroljoggies en vakbondlede by onderdelehandelaars, paneelkloppers en motorwerkswinkels in.

Motoriste is gewaarsku om seker te maak dat hulle brandstof het voordat petroljoggies Maandag ophou werk.

Die vakbond NUMSA het bevestig dat samesprekings met werkgewers vasgeval het.

Die woordvoerder van die vakbond, Karl Cloete, het gesê die staking sal in Gauteng begin, terwyl die ander provinsies Woensdag en Donderdag by die arbeidsoptrede sal aansluit.

Optogte word Maandag in Randburg en Kaapstad beplan.

NUMSA eis ‘n verhoging van R30 per uur in alle sektore vir werkers wat meer as R6 000 verdien. Hulle eis ook ‘n nagskoftoelaag van 20 persent van die normale loon, en ‘n middagskoftoelaag van 15 persent.

Cloete sê Numsa verteenwoordig sowat 70 000 werkers in dié sektor.

Die mynwerkersvakbond AMCU sal na verwagting dié week ook begin staak nadat die ander vakbond – die NUM – sy staking by goudmyne verlede week opgeskort het.

Lede van AMCU het by ‘n massavergadering op Carletonville aan die verre Wes-Rand ten gunste van ‘n staking gestem nadat hulle ‘n salarisaanbod van agt persent van die hand gewys het.

AMCU eis R12 500 vir werkers op intreevlak, maar goudprodusente sê die verhogings is onrealisties in ‘n sukkelende ekonomiese klimaat.

Pinetown-gru-ongeluk: Bestuurder voor

Die vragmotorbestuurder die gru-ongeluk wat 22 lewens geëis het in Pinetown veroorsaak het, KwaZulu-Natal, verskyn vandag in die hof.

Sy voertuig het teen vier minibustaxi’s en ‘n motor gebots. Aanvanklik is geglo dat 27 mense omgekom het.

Die bestuurder, ‘n 23-jarige burger van Swaziland, is Vrydag in hegtenis geneem. Hy sal op aanklagte van strafbare manslag en roekelose of nalatige bestuur in die Pinetown-landdroshof verskyn.

Die gru-ongeluk het verlede Donderdag omstreeks 19:00 op die hoek van Fieldshillweg (M13) en Richmondweg in Pinetown gebeur. Die gebeurtenis is deur ‘n kameratjie op ‘n motoris se truspieëltjie verfilm.

‘n Beampte van die KwaZulu-Natalse padverkeersdirektoraat, het aan Jeff Radebe, waarnemende president, gesê die vragmotor se lisensie het op 31 Augustus verval.

Dipuo Peters, minister van vervoer, het ’n hoëvlak-ondersoek na die ongeluk gelas. – Sapa

Vermiste kind: Twee aangekeer

Die polisie het twee verdagtes in hegtenis geneem in verband met die verdwyning van die vierjarige Shaskia Michaels van Mitchells Plain in die Wes-Kaap.

“Terwyl die soektog na Shaskia voortduur het die polisie Sondag twee mans, onderskeidelik 41 en 21 jaar oud, in hegtenis geneem op ‘n klag van ontvoering in verband met haar [Shaskia] verdwyning,” het André Traut, polisiewoordvoerder, gesê.

Shaskia is verlede Donderdag laas buite haar ouma se huis in Tafelsig gesien.

Kaapstad se burgemeester, Patricia de Lille, het ‘n beloning van R50 000 aangebied vir inligting oor die kind. – Sapa

City Power werk nasionaal saam met polisie om saboteurs aan te keer

‘n Ondersoek om vas te stel wie vir die sabotasie van substatsies in Johannesburg verantwoordelik is, is tans aan die gang.

City Power werk saam met die polisie op plaaslike en nasionale vlak om die werkers vas te trek wat vir verskeie kragonderbrekings in en buite die stad verantwoordelik is, het Sol Masolo, woordvoerder, gesê.

City Power sê geen verdagtes is nog sover aangekeer nie.

Groot dele van Johannesburg is in duisternis gedompel ná ‘n paar honderd werkers van City Power Donderdag met ‘n onbeskermde staking begin het.

Hulle is ontevrede met ‘n nuwe skofstelsel wat daarop gemik was om die uitgawe aan oortydbetalings in te kort.

Die werkers het uit weerwraak die krag by substasies afgeskakel. Die munispale vakbonde, Samwu en Imatu sê die werkers is nie van hul lede nie.

Volgens Masolo het City Power Saterdag die kragtoevoer na alle gebiede in die stad weer herstel. Hy het gesê enige verdere kragonderbrekings sal voortaan nie die gevolg van onwettige stakings wees nie.

City Power het ook gesê dat Hougton die enigste voorstad is wat van ‘n kragopwekker deur hulle self voorsien is. – Sapa

Olimpiese fakkel na Tokio

Die Olimpiese fakkel sal ná die 2016 Spele in Rio de Janeiro aan Tokio oorhandig word.

Die bodproses is gisteraand in Buenos Aires in Argentinië afgehandel en Tokio is tot die groot vreugde van Japanners as die wenner aangekondig.

Tokio het 60 stemme teenoor Istanboel se 36 ontvang. Die ander stad wat sy finale voorlegging gedoen het, was Madrid.

Madrid is eerste uitgeskakel, nadat hy gelykop was met Istanboel in die eerste ronde van stemmery. Spanje het gehoop dat die Olimpiese Spele ‘n broodnodige ekonomiese inspuiting sou verskaf.

Vroeër het die Turkse Eerste Minister, Recep Erdogan aangevoer dat dit ‘n sterk boodskap tot steun van vrede in die Midde-Ooste sou uitstuur, indien Istanboel die Spele kon aanbied.

Die Japanse Eerste Minister, Shinzo Abe het op sy beurt die lede van die Internasionale Olimpiese Komitee verseker dat die situasie by die Foekoeshima-kernkragaanleg nie ‘n rede tot kommer behoort te wees nie.

Die stad het ook in 1964 die Spele aangebied. – RSG

EFF betoog voor SAPD-hoofkantoor in Johannesburg

Agt lede van die EFF het ‘n kort betoging buite die Gauteng se SAPD-hoofkantoor in Johannesburg gehou.

Lede van die EFF se provinsiale opdragspan het struggle-liedjies gesing, insluitend “Siyaya” [Ons is op die pad vorentoe] en in ‘n sirkel gedans, onder die wakende oog van ‘n handvol polisielede.

Die betogers, geklee in rooi bykomstighede van die nuwe geregistreerde politieke party, het slagspreuke geskree soos “Weg met [nasionale kommissaris van polisie] Riah Phiyega, weg” en ” Viva EFF, viva!”

Woordvoerder Patrick Sindane het gesê hulle het betoog oor Phiyega se onlangse aanstelling van Bethuel Mondli Zuma as Gauteng kommissaris van polisie.

Die aanstelling is later teruggetrek toe dit bevestig is dat Zuma ‘n aanklag van dronkbestuur in die gesig staar.

Zuma, wat nie verwant is aan President Jacob Zuma nie, is vervang het Lt.-genl Mzwandile Petros.

EFF-leier Julius Malema het nie deelgeneem aan die betoging nie .

Voor die betoging het EFF-lede partylidmaatskapaansoekvorms by ‘n vulstasie langs die provinsiale hoofkantoor van die polisie uitgedeel.

Die lidmaatskapvorms doen ‘n beroep op voornemende lede om te bly by die party se “doelstellings, doelwitte en radikale beleid ” en sluit ‘n afdeling vir skenkings aan die party in. – Sapa

Swazi’s vat Cosatu-leiers vas

Cosatu beweer die Swazilandse polisie het ‘n opposisieleier in hegtenis geneem asook ‘n vergadering van vakbondleiers uit Suid-Afrika ontwrig.

Cosatu se buitelandse sekretaris, Bongani Masuku, sê Mario Masuku, die leier van PUDEMO – die Swazilandse opposisieparty, is Vrydag in hegtenis geneem onderweg na ‘n betoging teen die regering van Koning Mswati III.

Die Swazilandse polisie het dit as onwaar bestempel.

‘n Verteenwoordiger van Cosatu en voormalige minister in Mandela se parlement, Jay Naidoo, en Biskop Paul Verryn van die Metodistekerk is eergister ook deur die Swazilandse polisie vir ondervraging ingeneem saam met nog lede van ‘n Suid-Afrikaanse groep wat die regte van werkers in Swaziland ondersoek.

Swaziland, Afrika se laaste absolute monargie, sal op die 20ste van vandeesmaand ‘n Parlementêre verkiesing hou. – RSG

Kragsabotasie in Johannesburg ‘terrorisme’

Die optrede van die werknemers wat betrokke is daarby om substasies regoor die stad af te skakel, is gelyk aan terrorisme, het Gauteng se LUR Faith Mazibuko het Vrydag gesê.

“Ons is kwaad as ‘n provinsiale regering, en wat gebeur het is gelyk aan ‘n daad van terrorisme,” het Mazibuko aan verslaggewers gesê.

Sy het gesê die saak word ondersoek deur verskillende agentskappe, insluitend die Valke .

Mazibuko het gesê die mense agter die kragonderbrekings het mense se lewens bedreig.

City Power se besturende direkteur Sicelo Xulu het gesê hulle het besef dat daar met skakelaars by ‘n aantal substasies gepeuter is .

“Daar was geen gedwonge toegang nie, en dit beteken eenvoudig dat iemand hulle afskakel,” het Xulu gesê.

Hy het gesê dat City Power sekuriteitsmaatreëls by substasies regoor die stad in plek gestel het om te verseker dat die ontwrigting nie weer gebeur nie.

Xulu het gesê sommige van die gebiede wat steeds geraak word, is Lenasia, Alexandra, Randburg en sommige gebiede in die middestad van Johannesburg .

“Die proses van kriminele klagtes wat gelê is, is gedoen,” het Johannesburg se burgemeester, Parks Tau gesê.

Hy het gesê die stappe wat arbeidsverhoudinge regurleer moet gerespekteer word, en ‘n situasie waar die inwoners van elektrisiteit ontneem word, kan nie toegelaat word nie.

Krag is ontwrig in dele van die Wes-Rand en die noorde van Johannesburg na ‘n paar honderd City Power personeel Woensdagmiddag uitgeloop het.

City Power het gesê die staking was nie deur ‘n unie gelei nie.

Die werkers is ontevrede oor ‘n nuwe skofstelsel.

Stakende werkers het glo infrastruktuur gesaboteer, wat wydverspreide kragonderbrekings veroorsaak het en verkeersvloei en ‘n sakebedrywighede tot ‘n stilstand gedwing het.

Kragtoevoer is Vrydagmiddag ten volle herstel na gebiede wat Houghton en Melville insluit, maar ander dele van Johannesburg kan oor die naweek nog in donkerte gehul wees, het City Power gesê.

Die voorsiening van elektrisiteit is ook weer aangesluit in Auckland Park, Kew, en Bramley. – Sapa