Etiket: landbou

ANC ignoreer AgriSA oor grondplafon

Agri SA sê hulle is “teleurgesteld” met die ANC se aankondiging dat ‘n grondplafon-plan ingestel gaan word om grondbesit tot een of twee plase van altesaam 12 000 hektaar te beperk.

Agri SA se adjunkpresident, Dan Kriek, sê dit is onverstaanbaar waarom hierdie aankondiging gedoen is, terwyl landbourolspelers vroeër tot Maart tyd gegee is om insette hieroor te lewer.

Hy sê die grondplafon-plan strook ook nie met die model in die Nasionale Ontwikkelingsplan waarvolgens groter boere sal help om nuwe boere te vestig nie.

Dit is nie duidelik of die ANC intussen afgesien het van dié grondhervormingsmodel nie.

Kriek sê Agri SA het destyds in grondsakeminister Gugile Nkwinti se Nasionale Verwysingsgroep, Nareg, standpunt ingeneem dat grondplafonne nie kan werk nie.

Die grondplafon-aankondiging is ook onverstaanbaar in die lig van Agri SA se raamwerkvoorstelle vir sinvolle grondhervorming wat verlede jaar op die Agri SA-kongres deur Nkwinti verwelkom en aanvaar is en waaroor daar steeds samesprekings is, sê Kriek.

Die Amerikaanse miljardêr Bill Gates, is een van die voorstanders van kleinskaalse boerdery in Afrika.

Bheki Cele ontken dat ras ‘n rol speel by volksmoord op boere

Plaasaanvalle waartydens boere gemartel, verkrag en tereggestel word, het niks met die ras van die slagoffers te make nie, het die adjunkminister van landbou, Bheki Cele, gister gesê.

Dit lyk asof Cele wou reageer op wye internasionele veroordeling en die organisasie Genocide Watch wat moorde op Afrikanerboere op vlak 6 van ‘n volksmoord geklassifiseer het.

“Ons doen ‘n beroep op almal, beginnende by die media en elkeen – haal die rassekwessie uit plaasmoorde. Die mense wat vermoor word, is boere,” het Cele aan verslaggewers in Pretoria gesê.

“Of hulle wit, swart, geel, groen of pers is, ons het gesien dat boere aangeval word en ons hanteer dit só. Op die gebied van boerdery, beskou ons dit in ‘n ernstige lig. Ons sou wou sien dat almal dit ontras.”

Volgens Cele is dit egter nie sy departement se verantwoordelikheid om boere te beskerm nie en het hy ‘n “beperkte rol” om te speel.

“Landbou kan nie sê ons sal diegene wat boere doodmaak in hegtenis neem nie. Ek wens ons kon, maar ons kan nie. Ons kan nie sê dat ons hulle gaan skiet nie.”

 “Daar moet goeie kommunikasie tussen plase en plaaswerkers wees. Daar ‘n behoefte aan vinnige beweging in reaksie by die polisiestasies rondom plase.”

Volgens Cele is hy “hoogs tevrede” met hoe die polisie in Estcourt, Kwazulu-Natal, gereageer het nadat mnr. Malcolm Stick Green, 69, op sy plaasy op 5 Januarie deur vier swart aanvallers vermoor is.

Sondag het die polisie drie mense vir moord en poging tot moord in hegtenis geneem ná ‘n plaasaanval op ‘n bejaarde egpaar in Lindley, Muldersdrift in Gauteng. Charles Henderson, 60, en sy vrou Jenny is deur ‘n groep swartes in ‘n hinderlaag gelei wat hulle Donderdagnag met messe en vuurwapens aangeval het.

Die egpaar is vasgemaak terwyl die rowers hul huis geplunder het.

Jenny Henderson het daarin geslaag los te kom en hulp te gaan soek. Haar man Charles is egter dood toe die aanvallers hom met ‘n houtpaal en ‘n baksteen oor die kop geslaan het.

‘n Polisiewoordvoerder, Lungelo Dlamini, sê dat die polisie na drie ander mense op soek is.

Gister het die minister van landbou, Senzeni Zokwana, gesê dat plaasaanvalle ‘n “kommerwekkende neiging” is. Tydens die perskonferensie in Pretoria wou Zokwana nie sê of daar enige strategie bestaan om plaasaanvalle te kortwiek nie.

“Ons het nie hierheen gekom met enige besonderhede nie. Onthou, sekere besonderhede rondom optrede hierteen berus by die departement van polisie. Ons sal met hulle vergader om te kyk na maatreëls wat proaktief is,” het hy verklaar.

“Ons moet ‘n forum skep waarbinne die boere, plaaswerkers en die gemeenskap rondom die plase as ‘n span kan saamwerk. Ons moet die plaasgemeenskappe harmoniseer. Ons het met ander departemente begin saamwerk.”

Twee mense is Maandag vir die moord op ‘n bejaarde egpaar naby Bainsvlei, Bloemfontein, aangekeer. Die lyke van die egpaar, Toon, 72, en Rienie Swanepoel, 70, van die plaas Waaikraal, is in ‘n bos op die eiendom gelos. Hulle is doodgeskiet.

Die woordvoerder van die Vrystaatse polisie, Harry Nagel, sê dat ‘n derde verdagte, wat 19 jaar oud is, lat by Kelly’s View gevang is. Hy is in die besit van ‘n gesteelde televisiestel en ‘n vuurwapen betrap.

Elders in die Vrystaat is die lyk van die 68-jarige Martie Bester in her verbrande huis op die plaas Erfbloem naby Theunissen gevind.

“Vier vuurwapens word uit die kluis vermis. Die slagoffer se Toyota Hilux is in ‘n uitgebrande toestand naby die plaas gevind,” sê Nagel.

‘n Nadoodse ondersoek sal uitgevoer word om te bepaal wat die oorsaak van haar dood is.

Sedert die begin van die jaar is sewe mense reeds op plase vermoor.

 

Swapo spoeg vuur oor grond

Die amptelike bekendstelling van Namibië se geskiedkundige Nasionale Aksieplan vir Menseregte 2015 – 2019 is Dinsdag oorskadu deur die pres. Pohamba se woede-uitbarsting teen koloniale grondbesitters en diegene wat oor grondbelasting kla.

President Hifikepunye Pohamba het vir ’n tyd van sy amptelike toespraak afgewyk en sy aanval begin deur uit te vaar teen die “Duitsers” en die “apartheid-regime” asook die Ruiterstandbeeld wat vroeër voor die Alte Feste-museum gestaan het.

“Toe ons die Ruiterstandbeeld verwyder het, het ons ’n nuwe monument opgerig wat vertel wat werklik gebeur het”.

Pohamba het verwys na Namibiërs van Europese oorsprong wat nie oor die verlede wil praat nie.

“Hulle kom van die Europese vasteland, maak van ons slawe en doen allerhande dinge met ons.” Volgens Pohamba moet oor dié dinge gepraat word. “Ons kinders moet weet; dis ons geskiedenis.”

Hy het verwys na Namibië se geskiedenis van Duitse heerskappy en jare van apartheid.

“Mense is doodgemaak. Eers deur die Duitsers en toe deur die apartheid-regime. Dié wat oor die grens gevlug het, die vlugtelinge, is oor die grens gevolg en by Cassinga doodgemaak.”

Vandag, sê Pohamba, is dit hierdie einste mense wat nou as die kampioene van menseregte gesien wil word.

Hy het verwys na petisies wat die des­tydse Swapo-leiers opgestel en aan die Verenigde Nasies voorgelê het. Hul pleidooie het egter op dowe ore geval, sê Pohamba, omdat die meerderheid wat dit moes aanhoor, van Europese oorsprong was.

“Ons het teen die wit mense van Europa gepraat wat gekom het om ons híér te koloniseer!”

Volgens Pohamba is dit dieselfde mense wat blyk die grootste kampvegters vir menseregte te wees.

Hy het na Namibië se stryd om onafhanklikheid as “lank en bitter” verwys, met “kosbare lewens wat geoffer is.”

Pohamba het ook ’n woord vir buurland Suid-Afrika gehad en gesê hulle is deur die Europeërs ondersteun.

“Toe ons gevra het vir soldate, toe sê hulle ee’.”

Die staatshoof het teenoor gaste by die geleentheid erken hulle sou seker eerder wou hê hy moet “diplomasie” oorweeg, maar gesê “die waarheid moet vertel word”.

Pohamba het in die destydse Rhodesië gaan draai en verwys na die dag toe Ian Smith aan bewind gekom het.,“Ons (Swapo) het gevra vir optrede. Niks.”

Maar, het hy getier, vandag is dit dieselfde mense wat, wanneer iets in dié land gebeur en veral as dit oor die omstrede grondkwessie gaan, sanksies teen Zimbabwe toepas. “Maar julle kon dit nie teen Ian Smith doen nie, dis nie regverdig nie! Ons raak emosioneel, want ons het die gruweldade gesien!”

Hy het 21 Maart 1990 as ’n “glorieryke dag” beskryf toe die “las” verwyder en die “toekoms omhels” is. “Al ons mense, nie net swart nie. Wit ook, ja, selfs dié wat ontplooi is om gruweldade teen swart Namibiërs te pleeg.”

Volgens Pohamba was dit stigterpresident Sam Nujoma wat vir rekonsiliasie gevra het. “Dit was nie maklik om te aanvaar nie, maar dis waarom ’n mens die man bewonder.” Die staatshoof het gemaan dit is nie net gebaseer daarop om “saam met ’n wit man aan ’n tafel te eet nie,” maar ook op grond.

Hy het uitgevaar teen dié wat grond van swart mense gekonfiskeer het, maar dit nie wil laat gaan nie.

“Die basis van die vryheidstryd was nie om net saam aan die tafel te eet nie!” Pohamba het beklemtoon menseregte sluit die reg tot grond in. “Ons mense voel gediskrediteer omdat hulle nie grond besit nie, grond wat besit word deur die kinders van dié wat gekom het om ons te koloniseer!”

Hy het ook vuur gespoeg teenoor dié wat oor grondbelasting kla. “Hulle wil nie hê die regering moet die geld hê om die grond van hulle te koop nie, dis wat dit indirek beteken!”

Hy het wel lof gehad vir Swapo se besluit om gelyke verteenwoordiging tussen mans en vroue as deel van hul partystrukture te hê. “Dis ’n weerspieëling om te wys mans en vroue is gelyk.”

Bron: Die Republikein

AgriSA bekommerd oor minimumloon

Agri SA het Dinsdag gesê dat ‘n nasionale minimumloon tot werksverliese sal lei.

“Dit sal uiters kortsigtig wees, selfs onmenslik, om nie die desperate toestand te erken waarin baie Suid-Afrikaners hulself bevind nie,” het Johannes Möller, president van Agri SA, gesê.

“Ons kan as individue en as ‘n land beslis nie onsself blind hou vir die absolute armoede of selfs nog erger, dat mense nie kos het nie.”

Hy het gesê ʼn verhoging van 52% in die minimumloon in 2013 in die landbousektor, het die reeds merkbare afname in werkverskaffing in die bedryf veroorsaak.

Hy het bygevoeg dat die voorstanders van ‘n nasionale minimumloon klaarblyklik nie verstaan dat produktiwiteit die vlak van welvaart bepaal nie. Om bloot lone op hoër vlakke te stel, is nie die oplossing nie.

Möller meen dat selfs die huidige minimumloon die werksgeleenthede vir veral ongeskoolde werkers, nog verder kan belemmer.

“Dit oortree die edele doelwitte van die Nasionale Ontwikkelingsplan vir die bedryf om teen 2030 een miljoen poste te skep,” het hy gesê.

“Wat ons wel benodig, is ‘n arbeidsmag wat beter opgelei is, arbeidsmarkte wat nie so streng is nie en ‘n benadering wat ekonomiese mededinging sal aanmoedig.”

Hy het gesê om meer geld te skep is alleen oor ‘n baie kort termyn geldig. “Oor die lang termyn skep dit die illusie van meer geld sonder voordele,” het Möller gesê.

Sy pleidooi sal waarskynlik op dowe ore val, aangesien AgriSA in ‘n linkse diskoers verstrengel geraak het oor grondhervorming.

Swart boere waarsku minister, Absa prys grondbeleid

Swart boere het gevra dat grond slegs toegewys word aan nuwe swart boere wat die vermoë het om dit te gebruik.

Die president van die swart boerevereniging, Mzamo Mlengana, sê die minister van Grondhervorming, Gugile Nkwinti, moet sorg dat maatstawwe in plek is vir die keuring van nuwe boere.

Mlengana sê sonder boerderykennis, strek só ‘n grondbegunstigde tot nadeel van die landbou en skep dit die indruk dat swart boere nie kan boer nie.

Mlengana sê ‘n goeddeurdagte grondherverdelingsproses sal voedselsekuriteit verseker en tot voordeel van die land wees.

Die “hand van vriendskap en samewerking deur mnr. Gugile Nkwinti is dié geleentheid van ‘n leeftyd vir die landbou”, sê mnr. Ernst Janovsky, hoof van Absa AgriBesigheid.

Janovsky het Nkwinti, Minister van Landelike Ontwikkeling en Grondhervorming, by Agri SA se kongres geprys.

Hy het by die kongresdinee gesê die “oorlog” is verby. “’n Wit vlag is gehys wat sê kom ons werk saam en hierdie samewerking moet vir ons die pad vorentoe baan. Ek wil elkeen uitdaag om dit môre op jul plase te begin toepas.”

Hy het verwys na Nkwinti se opmerkings dat hy in sy skik is met die vordering wat Agri SA met hervormingsplanne maak. Hy het gesê hy is verleë dat hy nie daarvan bewus was nie.

Janovsky sê banke kan baat by grondhervorming en meer winsgewend wees. “Hierdie moet nie ’n meulsteun om jou nek wees nie. Hierdie is die geleentheid waarvoor almal gewag het. As jy kyk na hoeveel kos in die volgende 40 of 50 jaar geproduseer moet word, is hierdie die grootste enkele geleentheid wat nog binne Suid-Afrikaanse landbou bestaan het.

“Die Minister het gesê die planne het verander en júlle planne lyk beter as myne. Dit is ’n groot verandering. Moet nie daardie geleentheid laat verbygaan nie, al gaan dit nie maanskyn en rose wees nie. Daar is staatsdepartemente wat nog nie ingekoop het by dit wat gebeur het nie. Van die banke se kant af sal ons julle help bemagtig om die pad vorentoe te stap.”

Janovsky het boere gemaan om nie geleentheid te laat verbygaan nie: “Moet nie dat dit by julle verbygaan of toelaat dat klein jakkalsies die skape opvreet nie. Dit is ’n geleentheid om aan te gryp.”

‘Brand die plase’

Ten minste een swarte is erg opgewonde oor die nuwe liedjie van ‘n kletsrymgroep Dookoom.

Andile Mngxitama was in die middestad van Kaapstad vir die bekendstelling van Dookoom se Larney Jou poes.

Die video het skokgolwe in Suid-Afrika veroorsaak.

Die hoofsanger, Die Mutant, is glo ‘n “hip-hop-legende” op die Kaapse Vlakte.

Mngxitama, Julius Malema se regterhand, sê die video vertel ‘n “swart waarheid oor wit mag” en is ‘n “uitnodiging vir die hervoorstelling van bevryding”.

Hy voorspel dat Dookoom ‘n treffer gaan wees. Volgens Mngxitama is daar min twyfel dat hulle in alle waarskynlikheid Die Antwoord sal verbysteek.

Afrikaners sal waarskynlik baie verlig wees om dit te verneem.

Mngxitama meen swartes is nog steeds “vasgevang in die koloniale verhouding” waar blankes swartes deur die geweer of deur die liefde regeer. Hy sê hulp is die mees kragtige wapen van kolonialisme, deur te gee wanneer dit eintlik tienvoudig terugneem.

Kennelik is anargie en geweld volgens die sanger sowel as Mngxitama al manier om van hierdie verhouding te ontsnap.

Ramaphosa, Fransman sit keel op oor uitsettings

Adjunkpresident Cyril Ramaphosa het die voorsitter van die ANC in die Wes-Kaap ondersteun oor sy teenkanting teen die uitsetting van plaaswerkers.

Ramaphosa en die voorsitter Marius Fransman, het Sondag plaasgemeenskappe besoek tydens ‘n deur-tot-deur veldtog op Mbekweni in die Paarl.

Ramaphosa het ‘n beroep gedoen op boere wat na bewering betrokke is by die uitsetting van plaaswerkers in die Boland, om dit te staak.

Hy het aan die SABC gesê dit strook nie met die rol wat boere veronderstel is om te speel nie. Hy sê boere moet die hervorming van die gemeenskap en plaaswerkers ondersteun.

Ramaphosa sê hy sal by enige proses betrokke raak om die onaanvaarbare uitsettings te keer.

Fransman het ‘n beroep gedoen op ‘n moratorium op uitsettings om die “massa-uitsetting” van plaaswerkers in die Boland te keer.

Fransman sê daar is ‘n massa-uitsettingstrategie aan die gang weens die minister se fokus op integrasie en eienaarskap tussen boere en plaaswerkers.

Hy sê ‘n moratorium moet geld hangende die uitslag van wetgewing.

Boer doodgemartel

Sarel Janse van Rensburg, 75, is Donderdag op die plaas Froggy Pond naby Dullstroom doodgemartel. Hy is die vyfde slagoffer van ‘n plaasmoord in Limpopo die afgelope twee maande.

Twee jaar gelede is Van Rensburg se broer en skoonsuster in ‘n plaasaanval in Limpopo vermoor.

Sy ouer broer, Johan en skoonsuster, Gloudien, is in Junie 2012 op hul plaas naby Baltimore vermoor.

Claudine van Wyk, Janse van Rensburg se dogter, was in 2012 Mev. Verenigde Nasies vir die provinsie.

Haar pa is herhaaldelik met ‘n ysterstaaf teen die kop geslaan, met ‘n mes in die bors gesteek en in die kop geskiet. Die wewenaar sou in November sy 76ste verjaardag gevier het.

Hy was alleen toe twee swartes wat kom water vra het, hom oorval het. Janse van Rensburg is volgens die polisie eers met ’n staalstaaf geslaan voordat hy met sy eie skoenveters vasgebind is.

Hy is daarna deur die swart aanvallers met ‘n mes in die bors gesteek en in die kop geskiet.

Die twee swartes – 21 en 25 – wat onder meer ‘n geldtrommel gesteel het, is intussen gearresteer. Die polisie het die twee met die trommel betrap.

Een was voorheen gevang vir huisroof.

ANC praat uit drie monde oor landbou

Die minister van grondhervorming, Gugile Nkwinti, se voorstelle by die grondberaad dat daar ‘n beletsel geplaas moet word op die hoeveelheid grond wat landbouers mag besit, is sy eie idee, het City Press berig.

Daar is dus nog geen duidelikheid oor die minister se voorstel dat landbouers 50% van hul grond aan hul swart plaaswerkers moet afstaan nie. Boonop is die riglyne wat Nkwinti stel onuitvoerbaar.

City Press het berig dat die oordrag van wit eienaarskap na swart arbeiders die minister se eie voorstel is en dat hy nie goedkeuring van enige van die ANC-strukture of regeringstrukture gehad het om met so ʼn voorstel vorendag te kom nie.

Die Nasionale Ontwikkelingsplan (NOP) se hoofstuk ses bevat daarbenewens heeltemal ander voorstelle vir grondhervorming op distriksvlak.

Die ANC se sekretaris-generaal, Gwede Mantashe, het die NOP-voorstelle vroeër aan kommersiële landbouers voorgehou, wat verskil van die Nkwinti-planne.

Daar is voorts nog geen duidelikheid oor wat presies die nuwe onteieningswet behels wat deur die kabinet goedgekeur is nie.

Intussen het adjunk-president Cyril Ramaphosa verlede week kommersiële landbouers in Limpopo aangemoedig om opnuut in landbou te belê en as wildboere hul belange uit te brei.

Oor Nkwinti se ondeurdagte grondgrypvoorstelle was daar byna nog geen konsultasie met die landboubedryf nie, wat tot onherstelbare skade vir boerdery gelei het. Boere neem tans ingrypende besluite om hul kennis, vaardighede en beleggings buite Suid-Afrika aan te wend.

Uitbreidings word dus gestaak en werkersgetalle neem af deur weens die onophoudelike en wêreldvreemde ideologiese opswepery. Die onherstelbare skade aan die Suid-Afrikaanse landbou is tot groot nadeel van voedselsekerheid in Suid-Afrika.

Regering se grondgrypplan gaan voort

Die minister van grondhervorming, Gugile Nkwinti het vroeër gesê dat die regering sal voortgaan met die plan om die omstrede grondhervormingsbeleid in te stel.

Hy het in Boksburg aan die Oos-Rand by ‘n beraad oor grond en eiendomsreg gepraat.

Die ANC stel in sy beleidsdokument voor dat plaaswerkers die helfte van die grond van boere wat hulle as werknemers aanhou, moet oorneem.

Die regering sal luidens dié voorstelle die koste van die oordrag van grond dra.

Die landbou-unie, AgriSA sê die kwessie van grondhervorming skep onsekerheid in die landbousektor.

Die adjunk-president van die unie, Theo de Jager sê dat die uitvoering van die beleid maak boere senuweeagtig en nie die beleid as sodanig nie.

Hy sê die unie ondersteun grondhervorming, maar dat die proses kan skeefloop indien dit nie behoorlik bestuur word nie.

De Jager het gesê vennootskappe tussen privaatondernemings en die staat moet as alternatief ondersoek word

Hy het gesê die gevaar bestaan dat voedselsekerheid in die gedrang kan kom.

Amerika draai geldkraan oop vir Afrika

Suid-Afrika sal vandag die kwessie van die Israelse-Palestynse konflik direk met die Amerikaanse regering ophaal. Kabinetsministers woon vandeesweek saam met President Jacob Zuma ‘n Amerika-Afrikaberaad in Washington by, het RSG berig.

Die minister van internasionale betrekkinge, Maite Nkoana Mashabane sê die land sal in sy hoedanigheid as vriend van die Palestyne die saak aanroer.

Sy sê die VSA het ‘n verantwoordelikheid om die waansin en sinnelose sterftes te help beëindig.

Mashabane meen die res van die wêreld kan nie eenvoudig toekyk en wag vir Israel en Hamas om die vrede te bewerkstellig nie.

Intussen sal Amerika na verwagting tien miljard rand se saketransaksies, ‘n verhoging in geld vir “vredesoperasies” en nog miljarde rand vir die uitbreiding van kos- en kragprogramme in Afrika op die beraad aankondig.

Amerikaanse amptenare hoop die beraad van 50 Afrika-staatshoofde in Washington sal Amerikaanse belange in die vinnig groeiende streek onderskryf deur ‘n reeks regerings-en privaatvennootskapstransaksies om handel en beleggings te bevorder.

Amptenare het vrae oor of die beraad in reaksie op China se toenemende teenwoordigheid in Afrika is, ontwyk.

‘n Woordvoerder van die Amerikaanse agentskap vir Internasionale Ontwikkeling, Rajiv Shah sê daar sal grootskaalse aankondigings wees wat betref aansienlike verhogings in privaatsektorsteun vir Amerikaansgesteunde kos-en landbouprogramme in Afrika.

Indringer-vrugtevliegplaag is terug

Die uitheemse indringer-vrugtevlieg het weer sy kop uitgesteek. Die Bactocera invadens het sy oorsprong in Sri Lanka.

Die plaag kom in ten minste vyf provinsies voor waaronder Limpopo, Mpumalanga, Noordwes, Kwa Zulu-Natal en die Noord-Kaap.

Die Departement van Landbou, Bosbou en Visserye het boere gewaarsku dat indien die plaag nie behoorlik beheer word nie dit tot produksie- en werkverliese kan lei.

Die vrugtevlieg het ‘n groot verskeidenheid gashere, dit beskadig nie net gewasse nie, maar kan ook ernstige uitvoer-implikasies vir die varsproduktebedrywe inhou.

Onder die gasheerplante tel kommersiële gewasse, soos mango’s, sitrus, koejawels, papajas en piesangs, wilde vrugte soos maroelas en wildevye asook groentes soos soetrissies, pampoene en tamaties.

Die vlieë lê eiers op vrugte wat beteken dat die vrugte sleg word.

Die departement het boere versoek om voorkomend op te tree om die plaag die hoof te bied.

In 2012 is verskeie waarnemings van dié indringer-vrugtevlieg gemaak in Limpopo en Mpumalanga. In die meeste van die gevalle is die pes suksesvol uitgeroei.

Miljarde verkwis op landbou-‘ontwikkelingsprogram’

Die parlementêre portefeuljekomitee oor landbou het vandeesweek gehoor hoe miljarde rande verkwis is op swart boerderye as deel van die “Omvattende Landelike Ontwikkelingsprogram”.

Dié program, wat in 2009 van stapel gestuur is, het geheel en al misluk om landelike armoede te verlig of enige “ontwikkeling” te bring, volgens LP’s wat die vergadering bygewoon het. Swartmense wat die ontwikkelingsfondse ontvang het, het dit uitgegee en agterna weggetrek om as huisbediendes of tuiniers te gaan werk.

Die program was veronderstel om swart bestaansboere in staat te stel om eers kleinboere en dan kommersiële boere te word.

Nokuzola Mngxashe, ‘n parlementêre “inhoudsadviseur” vir die portefeuljekomitee oor landbou, bosbou en visserye, het gesê dat die grondhervormingsprogram gekortwiek word deur regeringsdepartemente wat “in afsondering van mekaar” werk, pleks daarvan om hul beperkte hulpbronne te gebruik om mekaar by te staan.

Swart boere wat “gementor” moes word, is nie deur die program gehelp nie. Volgens uitsprake by die vergadering van die portefeuljekomitee, “heers daar ook ‘n gebrek aan toesig oor grondhervormingsprojekte. Dit het daartoe gelei dat begunstigdes van dié projekte amper niks leer nie.”

Die gebrek aan kundigheid in die landboudepartement word as ‘n “wesentlike probleem” beskou. Daar is ook ‘n “kritiese tekort” aan gespesialiseerde vaardighede, soos veeartse en regstellende aksie by Onderstepoort verlig dit blykbaar nie.

Volgens Mgxahse, heers daar ‘n “volslae gebrek aan vertrekpuntdata oor kleinskaal- en bestaansboere, hul aantal, ligging, toegang tot grond, produktiewe potensiaal en navorsingsbehoeftes”.

“Dit is baie baie moeilik om ‘n program se implementeringsukses te beraam as daar geen vertrekpuntdata is nie,” het Mgxhashe gesê.

Voorsitter van AU, DA blêr saam oor grondgryp

Die voorsitter van die Afrika Unie, Dr Nkosazana Dlamini-Zuma sê “landbou het die potensiaal om armoede en hongersnood binne die bestek van een geslag uit te wis”.

Die beraad fokus glo op landbou en voedselsekerheid in Afrika. Die vasteland, met die uitsondering van Suid-Afrika, het ‘n haglike geskiedenis van beide.

Dié versekering kom nadat die ANC wetgewing voorgestel het wat kommersiële landbou in Suid-Afrika sal vernietig, die banke negatief sal raak en tans die land se voedselsekerheid bedreig.

Dlamini-Zuma sê dit kan bydra tot die industrialisasie van die vasteland.

President Jacob Zuma, haar gewese man, sal die beraad bywoon en lei ‘n afvaardiging van vier kabinetsministers.

Sy het ‘n vergadering van buitelandse sake-ministers toegespreek voor die AU beraad wat Woensdag in Malabo in Ekwatoriaal Guinee begin.

Die DA het intussen voorgestel dat die Wes-Kaap ‘n eie grondhervormingsprogram loods om die gedagte van grondgryp in daardie provinsie lewendig te hou.

Die DA het die ANC-regering daarvan beskuldig dat sy grondhervormingsplanne misluk het en hulle nie in staat is om dit sinvol verder te voer nie.

Dit is nie seker hoekom grondhervorming hoegenaamd “sinvol” kan wees nie, aangesien dit alle eiendomstransaksies uiteindelik raak.

‘n DA-woordvoerder oor grondhervorming, Thomas Walters het tydens ‘n mediakonferensie vroeër voorgestel dat die DA sy eie loodsprojek in die Wes-Kaap begin.

Dit volg na ‘n beleidsvoorstel van die minister van landelike ontwikkeling en grondhervorming, Gugile Nkwinti, dat boere 50 persent van hulle grond aan werkers moet afstaan.