olie – Bladsy 2 – praag.co.za

Oliefonds en polisiebegroting geplunder

Die Sentrale Energiefonds het sy verkope van olie verdedig, en sê Suid-Afrika het toegang tot 90 dae se brent ru-olie reserwes.

Die Fonds het gereageer op ‘n berig deur die Business Day-koerant dat die fonds tien miljoen vate ru-olie in ‘n geslote transaksie verkoop het sonder om toestemming van die Nasionale Tesourie te kry.

Die koerant beweer dat dit byna die hele reserwe-voorraad was.

Die Fonds sê egter die land het toegang tot drie maande se oliereserwes, wat Suid-Afrika sal toelaat om enige markskommelings te absorbeer.

Die direkteur van die fonds, Tseliso Maqubela sê die olie is in Desember aan ‘n eenheid van Glencore, Vitol and Taleveras, teen 28 dollar per vat verkoop.

Die Tesourie sal genader word deur opposisiepartye om strafregtelike aanklagte aanhangig te maak.

Intussen is ‘n klagte van wanbesteding by die Openbare Beskermer ingedien na berigte dat die polisie luukse voertuie ter waarde van miljoene rand vir die vroue van President Jacob Zuma gekoop het.

Die polisie het bykans nege miljoen rand van sy begroting aan voertuie vir Zuma se vyf vroue bestee.

Weste stap uit Uganda se presidentsinhuldiging oor al-Basjir

Amerikaanse, Europese en Kanadese verteenwoordigers het uit die inhuldiging van die Ugandese president, Yoweri Museveni in Kampala gestap.

Die Westerse lande het uit protes teen die teenwoordigheid van die Sudanese leier, Omar al-Basjir, die byeenkoms verlaat en omdat die Ugandese president die Internasionale Strafhof beledig het in sy toespraak.

Museveni het in sy verwelkomingstoespraak aan die begin van sy vyfde ampstermyn kritiek uitgespreek teen die ISS en hulle “‘n spul nuttelose mense” genoem.

Al-Basjir het die plegtigheid bygewoon ten spyte van ‘n internasionale lasbrief teen hom op klagtes van menseslagting.

Amnestie Internasionaal sê al-Basjir moet verantwoording doen vir menseregte-skendings en Uganda moet sy internasionale verpligtinge nakom.

‘n Onlangse hofuitspraak in Suid-Afrika het die Suid-Afrikaanse regering skerp gekritiseer oor die Soedannese leier se teenwoordigheid.

‘n Lasbrief is uitgereik om Al-Basjir in hegtenis te neem, maar Suid-Afrika het versuim toe hy hom verlede jaar in Johannesburg bevind het vir ‘n Afrika Unie-beraad.

Indië het ook geweier om die president in hegtenis te neem tydens sy besoek aan Nieu-Delhi in Oktober verlede jaar het die Internasionale Strafhof gesê.

Indië is nie ’n stigter-ondertekenaar van die Verdrag van Rome waardeur die hof tot stand gebring is nie, maar die hof voer aan dat Indië ’n plig het ingevolge ’n resolusie van die Verenigde Nasies (VN) se Veiligheidsraad.

Al-Basjir se immuniteit is volgens die internasionale reg opgehef, maar Afrikalande steur hulle nie aan die hof se uitsprake nie.

Al-Basjir het ongehinderd in Indië opgedaag vir ’n Indië-Afrika-beraad en is vriendelik deur premier Narendra Modi ontvang. Die twee het intussen samesprekings gehou.

Indië is die tweede grootste handelsvennoot van Soedan na China. Verskeie Indiese olie-, gas- en konstruksiemaatskappye werk in Soedan.

In Maart verlede jaar het die president ook Egipte besoek waar hy aan ‘n internasionale ekonomiese konferensie deelgeneem het en hy het China ook besoek sedert die lasbrief uitgereik is.

Petrol raak al hoe duurder

Motoriste sal 12c meer moet opdok vir ‘n liter vir alle grade petrol, het die departement van energie in ‘n verklaring gesê.

Van Woensdag sal die koste van ‘n liter 93 loodvrye petrol in die binneland R12.44/l en R12.06/l aan die kus wees. Vir 95 loodvry, sal motoriste onderskeidelik R12.74/l en R12.26/l betaal.

Die prys van diesel sal egter daal met 1c/liter vir 0,05% swael en 2c/l vir 0,005% swael.

Die hoofredes vir die brandstofprysaanpassings is die gemiddelde styging in die pryse van petroleumprodukte op internasionale markte (sowat 40c/l vir petrol en 20c/l vir diesel onderskeidelik), en die versterking van die rand teenoor die Amerikaanse dollar gedurende die oorsigtydperk.

Volgens die Automobiel-Assosiasie (AA) word ‘n styging in die prys van brandstof in Suid-Afrika in die kort tot medium termyn voorsien, met die moontlikheid van groter stygings as die rand onder druk kom.

Verlede maand se verhoging sluit ‘n 30c/l toename in die algemene brandstofheffing in, asook aanpassings in vervoerkoste gegrond op die Nasionale Energiereguleerder van Suid-Afrika se goedgekeurde pyplyntariefverhoging asook die padvervoertariefverhoging deur die Padvragvereniging.

Splintergroep van Boko Haram se leier gevang

Die Nigeriese weermag het die leier van die Islamitiese militante groep, Ansaru, ’n splinterfaksie van Boko Haram, in hegtenis geneem en hom daarvan beskuldig dat hy Westerlinge ontvoer en vermoor, het Reuters berig.

In 2012 het die Amerikaanse departement van verdediging Ansaru se leier, Khalid al-Barnawi, geïdentifiseer as een van drie Nigeriese militante wat op die swartlys geplaas is vanweë hul verbintenis met Boko Haram en al-Kaïda se Noord-Afrika vleuel.

’n Verdedigingswoordvoerder, brig.genl. Rabe Abubakar, sê al-Barnawi is Saterdag in Lokoja, die hoofstad van die sentrale deelstaat, Kogi, in hegtenis geneem. “Ons het reusevordering gemaak,” het Abubakar gesê.

Hy het voorts gesê sommige Boko Haram-vegters het hulle aan Nigeriese troepe oorgegee.

Die Nigeriese president, Muhammadu Buhari, het dit ’n prioriteit van sy presidensie gemaak om Islamitiese militante in Afrika se digsbevolkte land en die vasteland se grootste ekonomie uit te dryf.

ISIS uit sleuteldorp gedryf

Sirië het met die hulp van Russiese lugaanvalle Sondag die Islamitiese Staat (ISIS) uit die dorp al-Qaryatain gedryf.

ISIS het in Augustus beheer van die dorp geneem.

Sirië se staatstelevisie het Maandag berig dat die dorp weer in die hande van die wettige regering is. “Die laaste groepe Daesh-terroriste in die dorp is om die lewe gebring.”

Die dorp lê sowat 100km wes van die antieke stad Palmira wat verlede Sondag van die Islamitiese staat herower is.

Dit is ‘n strategiese dorp waardeur olie en gas deur die invallers gesmokkel is. ISIS se voorraadroete in Sirië is daarmee ontwrig.

Die herowering van die dorp word het ISIS se greep op die digbevolkte weste van Sirië – asook Damaskus en ander belangrike stede – losgemaak.

Die regering beplan om ander terreurneste in die gebied skoon te maak.

Volgens berigte uit Sirië het die soldate die dorp uit verskillende rigtings binnegeval en landmyne noordwes van die dorp is onskadelik te stel.

Duisende landmyne is ook geplant toe ISIS uit Palmira gevlug het en inwoners sal eers kan terugkeer wanneer die myne onskadelik gestel is.

ISIS beheer steeds die stad Raqqa – wat hy as sy hoofstad benut – en die grootste deel van die provinsie Deir al-Zor in die ooste van die land en aangrensend aan Irak.

Kongo se president wen nadat hy termyne skrap

President Denis Sassou Nguesso van die Kongo het die afgelope naweek se presidentsverkiesing gewen nadat hy gesorg het dat ‘n beperking op die aantal termyne wat hy mag dien, afgeskaf is.

Hy is die afgelope 30 jaar reeds in die regeringstoel. Die land se ministerie van Binnelandse Sake het die uitslag in Brazzaville bekendgemaak te midde van ‘n verbod op alle kommunikasie.

In die hoofstad Brazzaville, het die president se ondersteuners begin om die uitslag Woensdag reeds te vier na die voorlopige resultate aangekondig is.

“In gebiede waar die regering steun geniet is die strate besig en daar is feitlik geen polisie of weermag teenwoordig nie,” het alJazeera berig.

Opposisieleiers sê egter hulle sal nie die oorwinning aanvaar nie. Die regering het selfoonseine en die internet geblokkeer om onrus te voorkom.

Nguesso het 60 persent van die stemme gekry. Hy het verlede jaar veranderinge aan die land se grondwet laat aanbring wat hom toelaat om nog sewe jaar president te wees.

Sedert die grondwetlike referendum in Oktober wat ‘n beperking op die presidensiële termyne beëindig het, was die kanse van die 72-jarige voormalige valskermsoldaat om te wen, verseker.

Die land is ryk aan olie en hout.

Suid-Afrikaanse boere in die Republiek van die Kongo het ook glo reeds ‘n indruk op die president gemaak.

Die boere het hulle gevestig op ’n staatsplaas van 85 000 ha in die Niari-vallei. Binne enkele maande het die boere 1 200 ha ontbos en met mielies beplant.

Hulle het die waterpompe en pype na die grond herstel met die gevolg dat die plaaslike bevolking nou ook kraanwater het.

Waar die plaaslike bakker maar enkele brode ’n week verkoop het, bak hy nou 200 brode per dag as gevolg van die nuwe werkgeleenthede en geld vir die plaaslike gemeenskap.

Die Kongolese minister van Landbou het ’n video van die boere se suksesse gemaak ten einde dit aan die president te vertoon.

Die projek is ook as ’n presidensiële projek verklaar.

Nigerië, Switserland kom ooreen oor ouddiktator se geld

Nigerië en Switserland het ’n ooreenkoms onderteken wat die weg baan vir die ontvangs van meer as $300 miljoen wat van die familie van Nigerië se voormalige militêre heerser, Sani Abacha, gekonfiskeer is, het Nigerië se visepresident aangekondig.

Transparency International, ’n korrupsie-waghond, het Abacha daarvan beskuldig dat hy tydens die vyf jaar wat hy aan bewind was, vanaf 1993 tot sy dood in 1998, tot soveel as $5 miljard aan staatsgeld gesteel het.

Nigerië se prokureur-generaal het ’n brief van voorneme onderteken ingevolge die voorwaardes deur Switserland gestel om US$321 miljoen “wat deur die Abacha-familie bekom is”, aan Nigerië te betaal, het Reuters berig.

Nigerië se president, Muhammadu Buhari, wie se ampstermyn verlede jaar begin het, het ‘n veldtog teen korrupsie aangekondig.

Hy het Brittanje en Amerika versoek om te help om geld terug te vind wat deur sommige van die land se vooraanstaandes oor etlike jare gesteel is.

Die ekonomiese krisis in Afrika se grootste ekonomie wat teweeggebring is deur ’n drastiese daling in die olieprys, maak dit gebiedend noodsaaklik dat die land geld moet terugkry wat weens korrupsie verloor is.

Nigerië het ook intussen ‘n reuseboete op die Suid-Afrikaanse selfoonmaatskappy MTN gehef.

In 2014 het Nigerië en die Abacha-familie ’n ooreenkoms bereik sodat die land die geld kan terugkry. In ruil hiervoor is klagte teen die voormalige heerser se seun, Abba Abacha laat vaar.

Hy het in April 2005 in ’n Switserse hof tereggestaan op klagte van geldwassery en korrupsie nadat hy uit Duitsland gedeporteer is.

Hy het later 561 dae in aanhouding deurgebring. In 2006 het Luxemburg opdrag gegee dat die geld van die jonger Abacha bevries word.

‘n Soortgelyke versoek deur Tunisië is aan Switserland gerig om die president Ben Ali, wat deur die Arabiese Lente ontsetel is, se fondse terug te betaal.

Gaboen se oliedinastie klou vir ‘n vale

Pres. Ali Bongo Ondimba van Gaboen het aangekondig dat hy vir ‘n tweede termyn verkiesbaar is.

Verkiesings vind later vanjaar plaas en Ondimba het beloof om “ongeregverdigde bevoordeeldes” in die klein Afrikaland te aan te vat.

Indien hy verkies word, sal hy hom glo beywer vir ‘n beter lewe vir Gaboen se 1,6 miljoen mense, van wie die meeste, ondanks die land se olie-rykdom, in armoede leef.

Hy het onderneem om die ekonomie te diversifiseer, met olie wat vir 60 persent van die staatsinkomste verantwoordelik is, het AFP berig.

Bongo het vir die eerste keer in 2009 aan bewind gekom ná die dood van sy pa, Omar Bongo Ondimba. Dié was sedert 1967 aan die stuur van sake in die land en was deur kritici as ‘n “korrupte despoot” beskryf.

Sy pa het die olieryke Gaboen vir 41 jaar geregeer.

Ondertussen het ‘n hof in die westelike Franse stad, Nantes, Maandag ‘n saak deur sy halfsuster, een van 54 erfgename van sy pa se fortuin, van die hand gewys waarin sy beweer hy het sy geboortesertifikaat vervals.

Met die presidentsverkiesings wat nader kom, broei omstredenheid oor Ali Bongo se geboorteplek. Kritici sê hy het sy geboortesertifikaat vervals om die feit weg te steek dat hy in die buiteland aangeneem is.

Die Gaboense grondwet bepaal dat staatshoofde in Gaboen gebore moet wees. ‘n Franse ondersoekende joernalis, Pierre Pean, beweer in ‘n boek die president is inderdaad ‘n gebore Nigeriër wat gedurende die Biafra-oorlog in die laat 1960’s aangeneem is.

Bongo sê hy is in 1959 in Brazzaville, die voormalige hoofstad van Frans Ekwatoriaal-Afrika, gebore.

Die Nantes burgerlike registrasiesentrum is verantwoordelik vir al die geboortesertifikate van mense wat tot 1960 in die Franse Ekwatoriaal-Afrika gebore is.

Dié land het in 1960 onafhanklik geword en het verdeel om Gaboen, Tsjad en die Sentraal-Afrikaanse Republiek te vorm.

Siriese vredesonderhandelinge tydelik gestaak

Die Verenigide Nasies (VN) se afvaardiging na Sirië het aangekondig dat die vresamesprekings in Genève, Switserland, tydelik gestaak word.

Dit sal glo later vandeesmaand hervat word.

Te midde ’n toename in die felheid van gevegte in dié land, is Rusland besig om Westerse ISIS-jihadiste op die slagveld te verdryf.

Die suksesvolle Russiese lugveldtog is tans besig om die gang van die onderhandelinge te bepaal, iets wat die VSA tot dusver wou vermy.

Steffan de Mistura van die VN het ná ’n vergadering met opposisieleiers aan joernaliste gesê “dit is nie die einde nie and dit beteken nie die samesprekings het misluk nie”.

Hy sê beide kante stel belang “om die politieke proses aan die gang te kry” en dat hy 25 Februarie as datum vir hervatting van die vredesamesprekings gekies het.

Die aankondiging kom slegs twee dae nadat De Mistura vir die eerste keer in twee jaar met die hervatting van die samesprekings begin het.

Dis daarop gemik om ’n einde te bring aan die vyf jaar lange oorlog waarin 250 000 mense gesterf het en tot die ontheemding van 11 miljoen mense gelei het.

Olie sak, maar nie by SA pompe nie

Die prys van ru-olie op internasionale markte het tot sy laagste vlak in nagenoeg 12 jaar geval, maar brandstofpryse in Suid-Afrika bly hoog.

Brent, wat as ‘n rigtingwyser beskou word, het tot onder $30 per vat gedaal ná berigte dat Amerikaanse olievoorraad toegeneem het.

Kenners sê die situasie sal nie gou verander nie te midde van OPUL-lande wat onwillig is om ‘n ooreenkoms aan te gaan om produksie te verminder.

Brent ruolie het vroeër effens herstel tot vyf sent bokant $30 per vat.

Die daling kom ook te midde van politieke druk op een van die VSA se grootste bondgenote, Saoedi-Arabië, na onwilligheid om Moslemterreur aan te spreek.

Die daling in die olieprys word egter nie aan Suid-Afrikaanse verbruikers deurgegee nie, met die regering wat al hoe meer van die belasting afskep.

Vyf olie-opgaartenks brand in Libiese hawens

Met die olieprys wat ‘n laagtepunt bereik het, is brandstofbergingsplekke oorvol.

Maar in Libië woed brande tans by die opgaartenks van Es Sider en Ras Lanuf. Twee van die brande is begin toe olie-opgaartenks deur ISIS-mortiere getref is. Die brande het toe na drie ander tenks versprei.

‘n Hawewoordvoerder, Ali al-Hassi, het gesê die wagte wat gemoeid is met die veiligheid van petroleumopslagplekke was teen Woensdagmiddag in beheer van die hawens Es Sider en Ras Lanuf, maar dat gevegte met die Islamitiese Staat-groep (ISIS) voortduur.

Minstens nege wagte is dood en in gevegte Maandag en Dinsdag aan die buitewyke van die hawens is meer as 40 beseer, het Reuters berig.

Die oorskot van 30 ISIS-terroriste is ook gevind. Die wagte het ook daarin geslaag om beslag op twee militêre tenks en ander voertuie van die militante te lê.

Mohamed al-Manfi, ’n oliebeampte in die ooste van Libië sê elk van die brandende opgaartenks bevat tussen 420 000 en 460 000 vate olie.

Es Sider en Ras Lanuf is sedert Desember 2014 gesluit. Die hawens is tussen die stad Sirte wat deur ISIS beheer word en die oostelike stad, Benghazi geleë.

Libië is verdeel tussen politieke faksies en gewapende groepe wat veg om beheer van die land se olierykdom, vier jaar ná die afsetting van Moeammar Ghaddafi.

Sedertdien het olieproduksie afgeneem na minder as ’n kwart van wat dit in 2011 was toe 1,6 miljoen vate per dag geproduseer is.

ISIS het munt geslaan uit die veiligheidsvakuum en sy teenwoordigheid uitgebrei, maar nog nie daarin geslaag om beheer oor olie-installasies in die land te neem nie.

Die ekstremiste het die wagte by Es Sider ook in Oktober 2015 aangeval, maar vandeesweek se aanvalle is oënskynlik ’n baie feller en meer gefokuste aanslag op die hawens.

Mustafa Sanalla, die voorsitter van die nasionale oliekorporasie (NOC) in Tripoli, het die hoop uitgespreek dat die geweld “politieke leiers aan albei kante in Libië tot die besef sal bring van die omvang van die bedreiging wat die land in die gesig staar.”

“Ons moet verenig teen ’n gemeenskaplike vyand, nie môre of volgende week nie, maar nou.”

Die NOC het in ’n afsonderlike verklaring gesê dit sal alles in sy vermoë doen om kontrakte na te kom en Libië se oliebronne te beskerm.

Nigeriese opposisie-korrupsie oopgevlek

Die waarnemende hoof van Nigerië se hoofopposisieparty, is van korrupsie aangekla het AFP berig.

Hy was die man aan die hoof van oudpresident Goodluck Jonathan se mislukte veldtog om as president herverkies te word.

Haliru Mohammed Bello en sy seun, Abba Mohammed Bello, het Dinsdag in ’n federale hof in Abuja verskyn waar hulle op vier klagte van kriminele vertrouensbreuk en geldwassery teregstaan.

Die twee word aangekla vir hul beweerde rol in die herleiding van geld wat bedoel was om wapens vir soldate te koop wat teen Boko Haram veg.

Die saak hou verband met ’n wyer ondersoek na omstrede wapentransaksies onder Jonathan en sy destydse nasionale veiligheidsadviseur, Sambo Dasuki. Verskeie groot politieke rolspelers is reeds in die ondersoek geïmpliseer.

Bello, die minister van verdediging onder Jonathan vanaf 2011 tot 2012 en tans die waarnemende voorsitter van die Peoples Democratic Party (PDP), en sy seun het na bewering 300 miljoen naira (US$1,5 miljoen) van Dasuki se kantoor ontvang.

Albei die mans het onskuldig gepleit en die saak is tot Donderdag uitgestel wanneer hulle aansoek om borgtog kan doen.

Dasuki, wat op soortgelyke klagte teregstaan, ontken aantygings dat hy nagenoeg US$2 miljard in vals transaksies vir vegvliegtuie, helikopters, wapens en ammunisie toegeken het, wat nooit gematerialiseer het nie.

Die 60-jarige voormalige weermagkolonel sê alle kontrakte en betalings is deur Jonathan as staatshoof en opperbevelvoerder van die weermag goedgekeur.

Jonathan is in Maart opgevolg deur pres. Muhammadu Buhari, wat sedertdien met ’n omvattende veldtog teen korrupsie begin het.

Die ondersoek na Dasuki het ook meegebring dat die voormalige minister van finansies onder Jonathan en die voormalige goewerneur van die noordwestelike staat, Sokoto ondervra is.

Die stigter van Nigerië se eerste private radio en televisiestasies, Raymond Dokpesi, is vir bedrog en geldwassery aangekla omdat hy na bewering 2,1 miljard naira van Dasuki ontvang het.-

Jane’s IHS meen ISIS ly verliese

Ontleding van oopbroninligting, wat sosiale media insluit, deur die Britse Jane’s IHS-span het beraam dat die totale maandelikse inkomste van die Islamitiese staat tot laat in 2015 nog $80 miljoen beloop het, maar dat hulle verliese ly weens bomaanvalle deur Rusland.

Die grootste bedrae, sowat 50 persent, kom uit belasting en konfiskering, terwyl ongeveer 43 persent afkomstig is van oliesmokkel. Dwelmsmokkelary, die verkoop van elektrisiteit en skenkings sorg vir die res.

Die sowat 80 miljoen dollar wat ISIS per maand ontvang, is dus grotendeels van belasting wat afgedwing word en beslaglegging in gebiede onder die groep se beheer.

Die inkomste uit oliehandel word deur Turkye gewaarborg wat die roete waardeur die olie vervoer word, bied.

ISIS se finansiële hulpbronne stel terroriste in staat om ‘n gedugte bedreiging vir Westerse lande te wees.

Die smokkel van antieke goedere, ander misdaad en buitelandse donateurs uit Saoedi-Arabië en Katar dra volgens die verslag ook by die geldkas.

Daar is vroeë aanduidings dat die groep sukkel om sy begroting te balanseer, met die verslae van salarisse van sy vegters verminder is, prysstygings van elektrisiteit en ander basiese dienste aangekondig is, en die bekendstelling van ‘n nuwe landboubelasting.

Beramings is moeilik gegewe die groep se gedesentraliseerde aard.

‘n Financial Times-ondersoek in Oktober het ISIS se olie-inkomste op sowat $1.5 miljoen dag gestel, terwyl die IHS meen dit is nader aan $1.1 miljoen dag.

Franse leier na Moskou om front teen ISIS te bou

Frankryk het die voortou geneem op die globale politieke toneel met President Francois Hollande se besoek aan Moskou Donderdag.

Sy gesprek met die Russiese president Vladimir Poetin kan lei tot nuwe verwikkelinge in die streek nadat die twee ooreengekom het om terroriste se olie-inkomste te teiken.

Hollande wil konsensus bou teen ISIS in beide Sirië en Irak, na aanleiding van die terreuraanvalle in Parys op 13 November wat 130 mense se dood gekos het en honderde beseer het.

As sodanig, is sy ontmoeting met Poetin Donderdag ‘n belangrike stap in die rigting van ‘n verdraagsame beleid teenoor Rusland.

Wetgewers van Duitsland se regerende partye het die week vergader om te bespreek hoe Berlyn bystand aan Frankryk in die stryd teen die Islamitiese Staat kan verleen.

Dit volg insgelyks na die dodelike terreuraanvalle in Parys.

Hollande, het Woensdag Duitsland se hulp gevra toe kanselier Angela Merkel hom in die Franse hoofstad besoek het. Sy het toe onderneem om “spoedig” op die versoek te reageer.

Lede van die Duitse Bundestag se konserwatiewe blok en diegene van die sentraal-linkse Sosiaal Demokrate is genooi om ‘n vergadering by te woon om die aangeleentheid te bespreek.

Die Franse en Duitse leiers het elk ook ‘n pienk roos by die ander huldeblyke vir die slagoffers van die Parysaanvalle in die Place de la Republique geplaas.

Hollande het ook met die Italiaanse eerste minister, Matteo Renzi, in Parys vergader voordat hy na Moskou gevlieg het.

Sy veldtog word aan bande gelê deur die uitval tussen Rusland en Turkye oor die Russiese vegvliegtuig wat vroeër die week afgeskiet is.

Ontleders meen dat Turkye met Washington se goedkeuring die Russiese tuig afgeskiet het nadat hulle die Russe in ‘n lokval gelei het. CNN het intussen na ISIS-terroriste in hul nuusberigte begin verwys as “amptenare van die Islamitiese Staat”.

Die Turkse president Erdogan en sy gesin baat glo uit die inkomste van gesteelde olie wat hulle by ISIS teen ‘n afslag koop.

Volgens berigte is ‘n Israeliese kolonel Yusi Oulen Shahak glo ontmasker as deel van ISIS.

Frankryk het hom beroep op ‘n resolusie wat bepaal dat lidlande van die Europese Unie (EU) militêre bystand aan Frankryk moet verleen ná die aanvalle in Parys op 13 November toe 130 mense dood is in ‘n golf aanvalle waarvoor ISIS aanspreeklikheid aanvaar het.

Hollande het egter volgehou dat die verkose Siriese president geen rol moet speel in ‘n “oorgang” nie, en dat Rusland as spreekbuis vir Siriese belange moet optree.

Duitsland het vandag ingestem om militêre hulp te verleen aan Frankryk met ondersteuning vir ‘n uitgebreide lugveldtog teen die “moorddadige bende” na die Franse president se besoek.

Deelname sal insluit dat tussen vier en ses Tornado-verkenningsvliegtuie toegerus met spesiale infrarooikameras wat vyandige posisies sal kan opspoor, gestuur word sowel as ‘n fregat om die Charles de Gaulle, die Franse vliegdekskip in die Middellandse See, te beskerm.

Duitsland sal ook hervullingsvliegtuie vir Franse tuie beskikmaar maak, het Henning Otte, verdedigingswoordvoerder vir die Duitse kanselier Angela Merkel se Christen-Demokratiese Unie, aan joernaliste gesê.

Rusland het met die ontmoeting die Turks-Amerikaanse plan om ‘n vliegspergebied oor Sirië aan te kondig, gekelder.