Internasionale nuus – Bladsy 51

Rassistejag raak algemene Franse tydverdryf

‘n Groep Franse polisiebeamptes wat ondersoek is na foto’s van hulle op ‘n “negerpartytjie”, het in 2014 op sosiale media verskyn.

Die beamptes wat in ‘n voorstad van Parys werksaam was, was swartgesmeer en het kroespruike gedra.

Die Franse koerant Le Figaro het destyds berig dat die beamptes ondersoek is deur Frankryk se polisiewaghond.

Louis-Georges Tin, president van ‘n swart groep, Conseil Representatif des Associations Noires, het gesê: “As die polisiebeamptes wat die verantwoordelikheid dra om teen rassisme op te staan, besig is om grappe van swart mense te maak ipv om hulle te verdedig, kan dit verduidelik waarom dinge so min op dié gebied gevorder het.”

Hy het bygevoeg: “Die swart mense van hierdie land [Frankryk] hoef nie met rasprofilering bedags en ‘blackface’ snags opgeskeep te wees nie.”

Die foto’s is oorspronklik gepos deur ‘n vrou op Facebook en uiteindelik het die swart rassegelykheidamateur Claudy Siar hulle versprei.

Hy het gesê dat die persoon wat die foto’s gepos het, het beweer dit was “net vir die pret” na ‘n paar vriende besluit het om ‘n “negerpartytjie” te hou.

Siar het aan Le Figaro gesê die foto’s is dadelik verwyder, maar hy het gelukkig die skermskote vroegtydig gemaak en besluit om dit so wyd as moontlik te versprei.

Sodoende het die insident ‘n skandaal geword omdat swartes glo daardeur verneder is. Dit sou egter nie die geval gewees het indien Siar nie die foto’s oral gepos het nie.

Die Franse polisie loop dikwels deur onder beskuldigings van rassisme.

Voorheen het ‘n polisieman in Val-d’Oise, noord van Parys, ‘n reeks van rassistiese opmerkings oor sosiale media gemaak wat ook deur ‘n webwerf gepubliseer is.

Die swart Franse minister van justisie Christiane Taubira se foto is ook in 2014 tesame met dié van ‘n sjimpansee op haar Facebookblad geplaas, wat tot ‘n herrie gelei het.

Volgens ‘n Franse satiriese koerant, het polisiebeamptes van die anti-misdaadbrigade in Kremlin Bicêtre verlede jaar ‘n rassitiese boodskap uitgestuur waarin verwys is na ‘n “vieslike, kroeskop Noord-Afrikaan wat soos gewoonlik” die misdadiger is.

Die polisiebeampte is dissiplinêr verhoor.

Dié jaar het joernalis, Gille Verdez, uitgevaar teen die bekroonde wit Mejuffrou Frankryk, Iris Mittenaere, en haar daarvan beskuldig dat sy aan ‘n rassistiese skoonheidskompetisie deelgeneem het.

“Hulle het witheid bo skoonheid gekies #MissMartinique,” het Verdez op sosiale media gesê.

As die gruwel van Martinique, regs, nie wen is dit 'rassisme' — As die gruwel van Martinique, regs, nie wen is dit ‘rassisme’

VS-benoemingstryd: Donald Trump wen gister 4 uit 5 deelstate

Mnr. Donald Trump het gister vier uit die vyf benoemingstryde vir die Republikeinse Party se presidensiële kandidaatskap gewen: Florida, Missouri, Illinois en Noord-Carolina, maar moes die belangrike Ohio aan sy mededinger John Kasich afstaan. Ohio is die tuisstaat van Kasich, wat daar aan hom ‘n voordeel besorg het. Daarteenoor het Trump in Florida, tuisstaat van Marco Rubio, met 45,6% van stemme teenoor Rubio se 27,5% gewen. Weens die wenner-vat-als-stelsel in Florida, besorg dit 99 afgevaardigdes aan Trump.

Die 44-jarige mnr. Marco Rubio, het gisteraand Suid-Afrikaanse tyd sy uittrede uit die resies aangekondig. Hy was die gunstelingkandidaat van die sogenaamde “Republikeinse establishment” wat onder geen omstandighede wil sien dat Trump die benoemingstryd wen nie. Die enigste ander kandidaat wat deur die establishment gesteun word, John Kasich, het wel gisteraand Ohio verowwer en sodoende 66 afgevaardigdes ingepalm, maar loop baie ver agter Trump wat afgevaardigdes betref. Nogtans het Kasic aan sy ondersteunders gesê: “Ek sal nie ongesiens na die hoogste amp streef nie.”

Trump se ondersteuners voel ook goed oor sy oorwinning in Illinois, die deelstaat waar Chicago geleë is. Betogers het nog laas Trump se vergadering in Chicago ontwrig sodat dit gekanselleer moes word.

Met slegs drie kandidate nou oor in die Republikeinse resies na die kandidaatskap, lyk die stand van elkeen se afgevaardigdes ná 27 state só:

Aantal afgevaardigdes om ‘n Republikeinse meerderheidstem te verseker: 1237.

Donald Trump: 621

Ted Cruz: 396

John Kasich: 138

Mev. Hillary Clinton het gisteraand skoonskip gemaak en ‘n meerderheid van stemme teenoor haar mededinger Bernie Sanders in al vyf deelstate (Florida, Ohio, Noord-Carolina, Missouri en Illinois) verkry. Indien sy slegs 40% van stemme voortaan verkry, behoort sy die Demokratiese benoeming te kan impalm. Dog Sanders se ondersteuners hou vol dat mev. Clinton tot dusver bloot danksy die swart stem in Suidelike Amerika goed gevaar het en dat deelstate in die Noorde en Midde-Weste eerder vir hom gaan stem. Indien Sanders meer Demokratiese “superafgevaardigdes” verkry, staan hy ook nog ‘n kans vir die benoeming, dus gaan hy geensins tou opgooi nie.

Aantal afgevaardigdes om ‘n Demokratiese meerderheidstem te verseker: 2383.

Hillary Clinton: 1561

Bernie Sanders: 800

China is op hol oor Trump

China is erg bekommerd oor die sukses van Donald Trump, Republikeinse voorloper vir die komende Amerikaanse presidensiële verkiesing.

In een van die eerste openbare negatiewe reaksies, het die Global Times, ‘n amptelike staatskoerant, in ‘n hoofberig gesê die groot protes teen Trump se veldtog in Chicago Vrydagaand wat in ‘n fisiese konfrontasie geëindig het, voorspel niks goeds nie.

Die Chinese kommentaar sê alhoewel vuisgevegte onder kiesers redelik algemeen is in ontwikkelende lande tydens verkiesingseisoene, is ‘n soortgelyke vertoning skokkend in die VSA, “een van die mees ontwikkelde en volwasse demokratiese verkiesingstelsels”.

Trump het glo “baie konvensionele norme van die Amerikaanse politieke lewe verwoes” en “sy opmerkings is beledigend, rassisties en ekstremisties, wat ‘n indruk by die Amerikaanse publiek gelaat het dat hy doelbewus die omverwerping van politieke korrektheid nastreef”.

Die kommentaar lui voorts:

Trump se meteoriese opgang is nie deur die meeste ontleders en waarnemers voorspel nie. Aan die begin van die verkiesing was Trump, ‘n ryk, narcissus en opruiende kandidaat, net beskou as ‘n buiteperd. Sy werk was basies om op te tree as ‘n nar om meer kiesers se aandag op die Republikeine te vestig. Maar met meeste ander belowende kandidate uitgeskakel, is die nar nou die grootste buiteperd.

Die aanval op Trump gaan voort asof China kan baat by ‘n Demokratiese oorwinning.

Die opkoms van Trump het Pandora se blik in die Amerikaanse samelewing geopen. Trump se ondersteuners is meestal laerklas wittes, en hulle het baie verloor na die finansiële krisis van 2008. Die Amerikaanse samelewing het die grootste en mees stabiele middelklas in die Westerse wêreld, maar dis besig om vinnig te verdwyn.

Dit wil voorkom asof die Withuis se marionetmeesters planne maak om Trump te keer wat reeds aan die Chinese leierskap gekommunikeer is.

Hy is selfs ‘n nuwe Benito Mussolini of Adolf Hitler genoem deur die Westerse media. Mussolini en Hitler het aan bewind gekom het deur middel van verkiesings, ‘n swaar les vir Westerse demokrasie. Die meeste ontleders glo die Amerikaanse verkiesingstelsel sal verhoed dat Trump uiteindelik president word. Die proses sal skrikwekkend wees, maar nie gevaarlik nie.

Spanning tussen Rwanda en Burundi na ‘spioen’ vasgetrek word

Spanning tussen Rwanda en Burundi is besig om op te laai te midde van ‘n tien maande lange politieke krisis, nadat veiligheidsmagte in Burundi Saterdag ’n man voor joernaliste geparadeer wat daarvan beskuldig word dat hy ’n Rwandese spioen is.

Betrekkinge tussen Burundi en Rwanda het ’n laagtepunt bereik met Bujumbura en die Verenigde Nasies wat Kigali daarvan beskuldig dat dit rebelle in Burundi ondersteun, het AFP berig.

Die man, wie se naam as korporaal Rucyahintare Cyprien aangegee is, is verlede week in Rushenya op die grens met Rwanda in hegtenis geneem, sê ’n polisiewoordvoerder, Pierre Nkurikiye.

“Hy was besig om te spioeneer en dit is was die derde keer dat hy so ’n sending in Burundi uitgevoer het,” het Nkurikiye gesê. Volgens hom was die doel van die sendings om Burundi te destabiliseer.

Burundi is in ’n krisis gedompel nadat pres. Pierre Nkurunziza aangekondig het dat hy vir ’n derde termyn in die Julie 2015-verkiesings sou staan.

Die beweerde spioen het in Kinyarwanda, ’n amptelike taal in naburige Rwanda, aan joernaliste “erken” dat hy die land binnegekom het met die doel om te spioeneer.

Hy het Burundi ook in Mei 2015 binnegekom om te help om mense wat verantwoordelik vir die mislukte staatsgreep was uit die land te smokkel en weer in November 2015 om inligting in te win vir aanvalle op hooggeplaastes in die land, sê Nkurikiye.

Hy is aan die media vertoon by die hoofkantoor van die nasionale intelligensiediens, wat nie sonder meer beskuldigings van menseregteskendings en marteling kon weerlê nie.

Meer as 400 mense is dood sedert die geweld in April verlede jaar uitgebreek het en meer as 240 000 mense het op die vlug geslaan.

Duisende Rwandese wat in Burundi gewoon het, het ook uit die land gevlug sedert die krisis begin het en verskeie is in hegtenis geneem.

Merkel kry pakslae oor migrante

Drie Duitse deelstate het die afgelope naweek gewys dat Angela Merkel se dae getel is.

In die eerste betekenisvolle politieke toets sedert die land deur migrante oorstroom is op aandrang van die Duitse kanselier, het die verkiesings nou getoon tot watter mate sy ongewild geraak het.

Daar is verwag dat die anti-immigrasieparty, die AfD, goed sou vaar midde van ongemak onder Duitse kiesers oor Merkel se liberale benadering jeens Europa se migrasiekrisis.

Nagenoeg 12,7 miljoen kiesers is in drie uiteenlopende streke – Baden-Württemberg in die suidweste en ’n ekonomiese kragreus; die naburige Ryn-Palts en die relatief arm Sakse-Anhalt in die ou kommunistiese ooste van die land – na die stembus.

Meningsopnames het reeds daarop gewys dat sowel Merkel se Christen Demokratiese Unie-party en haar vennote in die nasionale regering, die sentraal-linkse Sosiale Demokrate, ’n redelik ongemaklike verkiesing te wagte sou wees.

Duitsland het verlede jaar byna 1,2 miljoen mense as asielsoekers geregistreer, met Merkel wat daarop aangedring het dat “ons die uitdaging kan hanteer”, oftewel “Wir schaffen das”.

Merkel se CDU-party het in twee van die drie deelstaatverkiesings verloor omdat keelvol Duitsers haar tegemoetkomende beleid teenoor sogenaamde vlugtelinge, of ekonomiese fortuinsoekers, afgewys het.

Die verliese in beide Baden-Wuerttemberg en Rynland-Palts verteenwoordig die ergste scenario vir Merkel.

Die teenreaksie was ook sigbaar in Sakse-Anhalt, waar Merkel se Christen-Demokrate die grootste party gebly het, maar nogtans 21.5 persent van die stemme na die AfD sien gaan het.

Djihadiste dood 16 by Ivoorkus se strandoord

Ongeïdentifiseerde aanvallers het Sondag losgebrand op ’n strandoord in Grand Bassam in die Ivoorkus. Die gewapende aanvallers het hotelle by die oord bestorm en op die gaste gevuur.

Altesaam 16 mense is in die aanval doodgeskiet, het die president gesê. Veertien was burgerlikes en twee soldate, het pres. Alassane Ouattara bevestig.

Die aanval word met ’n groep militante met Al-Kaïda-bande verbind.

Die Veiligheidsraad van die VN het intussen die aanval veroordeel.

AFP berig dit laat vrese in Wes-Afrika oor ’n dreigende djihad oplaai.

“Ek het sewe oorledenes gesien. Daar was vier aanvallers. Ek het geswem toe hulle begin skiet het en toe het ek weggehardloop,” het Dramane Kima gesê, wat videomateriaal van die aanval geneem het.

Hy het ook foto’s geneem van handgranate en ammunisie wat die aanvallers vermoedelik op die toneel agtergelaat het.
Twee maande gelede het Islamitiese militante dosyne mense doodgemaak in ’n hotel en restaurant in Burkina Faso, Ivoorkus se buurland, waar buitelanders gereeld gaste is.

Die aanvalle wek kommer dat militante geweld besig is om in Wes-Afrika te versprei.

AU wil sending na Mali stuur

Die Afrika-unie sal binne die volgende weke ’n sending na die noorde van Mali stuur, het Reuters berig.

Die sending sal ondersoek instel na die oprigting van ‘n teenterrorisme-mag om die vredesending van die Verenigde Nasies (VN) te ondersteun.

Die Bamako-regering asook sommige lede van die VN-magte in Mali (Minusma), het hulp gevra in die stryd teen insurgente met bande aan al-Kaïda, wat ondanks die teenwoordigheid van Franse, Malinese en VN-troepe, toenemend aktief is.

Franse magte het die djihadiste in 2013 uit die noorde van Mali verdryf, maar hulle het hergroepeer.

In November 2015 het die insurgente onder die vaandel van ISIS ‘n luukse hotel in Bamako aangeval waartydens 20 mense omgekom het.

Londense winkels verkoop beesurine saam met kos

Beesurine word al jare lank neffens kosprodukte in Londen verkoop.

Dit word gebruik deur aanbidders in sekere Hindoeseremonies, maar dit is onwettig om te verkoop vir menslike gebruik in Engeland.

Bekend as Gau mutra, word dit in winkels aangetref wat ook kos verkoop. Dit is ‘n oortreding van gesondheidsregulasies in die VK.

Die Britse Geoktrooieerde Instituut van Omgewingsgesondheid het gewaarsku teen die aankoop van voedsel waar dié produk teenwoordig is.

In een winkel was die bottels urine selfs vertoon onder ‘n rak van naanbrood.

Een werker in ‘n winkel in Greenwich sê: “Hindoes kom om dit te koop vir godsdienstige redes, as ‘n baba gebore word, word dit gebruik in die huis vir goeie geluk.”

‘n Tempel in Watford, Bhaktivedanta Manor, besit ‘n melkplaas wat ook die urine vir gelowiges bemark.

Die besturende direkteur Gauri Das sê die tempel verkoop al koei-urine sedert die vroeë sewentigerjare en mense drink dit.

“Daar was ‘n aanvraag uit die Suid-Asiatiese gemeenskap. Hulle gebruik dit vir pujas [godsdienstige ritueel], medisinale doeleindes of selfs die skoonmaak van dinge,” het hy gesê.

Hy ontken egter dat hy dit vir menslike gebruik verkoop. “Dit hang af van die aanbidders wat hulle wil doen daarmee.”

Die Britse Foods Standards Agency (FSA) se woordvoerder het gesê dit is onwettig om urine te verkoop vir menslike gebruik, maar wanneer dit glo ekstern toegedien word, word nie as voedsel geklassifiseer nie.

Beesmis word ook saam met urine in ‘n verskeidenheid velsorgprodukte gebruik.

Aartsbiskop van Kantelberg sê vrees vir immigrante nie ‘rassisties’

Die aartsbiskop van Kantelberg, die mees senior kerkkleier in Brittanje, het gesê dit is “absoluut verregaande dat die publiek as rassiste afgemaak word” omdat hulle oor die instroming van immigrante bekommerd is.

Aartsbiskop Justin Welby het gewaarsku dat daar ‘n ware vrees onder Britte heers oor die instroming.

Hy het bygevoeg: “Wat gebeur oor behuising? Wat gebeur oor werkgeleenthede? Wat gebeur oor toegang tot gesondheidsdienste? ”

Dié verrassende uitlatings kom na jare waarin die verlinkse kerk preek dat mense behoort te meng.

Welby se voorgangers het wit vrese in Suid-Afrika voor en na 1994 met groot smaad bejeen, terwyl hulle aktief meegewerk het om blankes aan swart mag te onderwerp.

Aartsbiskop Welby het ook onthul dat die kerk baie krities staan teenoor Europa oor die vlugtelingkrisis.

Massa-immigrasie is vinnig besig om elke openbare debat te oorheers, soos kommer styg oor die miljoene immigrante wat Europa oorstroom.

Aartsbiskop Welby het gesê: “Vrees is ‘n geldige emosie in ‘n tyd van so ‘n kolossale krisis. Dit is een van die grootste bewegings van mense in die mens se geskiedenis. Net enorm. En om angstig te wees daaroor, is baie redelik.

“Daar is ‘n neiging om te sê ‘sulke mense is rassisties’, wat net verregaande, absoluut verregaande is.”

“In brose gemeenskappe veral heers daar geldige vrese. Wat gebeur oor behuising? Wat gebeur oor werkgeleenthede? Wat gebeur oor toegang tot gesondheidsdienste?”

Die aartsbiskop het gesê dit is noodsaaklik dat mense voel daar word na hulle geluister na en dat hulpbronne in plek gestel word om hul bekommernisse aan te spreek.

Nigerië, Switserland kom ooreen oor ouddiktator se geld

Nigerië en Switserland het ’n ooreenkoms onderteken wat die weg baan vir die ontvangs van meer as $300 miljoen wat van die familie van Nigerië se voormalige militêre heerser, Sani Abacha, gekonfiskeer is, het Nigerië se visepresident aangekondig.

Transparency International, ’n korrupsie-waghond, het Abacha daarvan beskuldig dat hy tydens die vyf jaar wat hy aan bewind was, vanaf 1993 tot sy dood in 1998, tot soveel as $5 miljard aan staatsgeld gesteel het.

Nigerië se prokureur-generaal het ’n brief van voorneme onderteken ingevolge die voorwaardes deur Switserland gestel om US$321 miljoen “wat deur die Abacha-familie bekom is”, aan Nigerië te betaal, het Reuters berig.

Nigerië se president, Muhammadu Buhari, wie se ampstermyn verlede jaar begin het, het ‘n veldtog teen korrupsie aangekondig.

Hy het Brittanje en Amerika versoek om te help om geld terug te vind wat deur sommige van die land se vooraanstaandes oor etlike jare gesteel is.

Die ekonomiese krisis in Afrika se grootste ekonomie wat teweeggebring is deur ’n drastiese daling in die olieprys, maak dit gebiedend noodsaaklik dat die land geld moet terugkry wat weens korrupsie verloor is.

Nigerië het ook intussen ‘n reuseboete op die Suid-Afrikaanse selfoonmaatskappy MTN gehef.

In 2014 het Nigerië en die Abacha-familie ’n ooreenkoms bereik sodat die land die geld kan terugkry. In ruil hiervoor is klagte teen die voormalige heerser se seun, Abba Abacha laat vaar.

Hy het in April 2005 in ’n Switserse hof tereggestaan op klagte van geldwassery en korrupsie nadat hy uit Duitsland gedeporteer is.

Hy het later 561 dae in aanhouding deurgebring. In 2006 het Luxemburg opdrag gegee dat die geld van die jonger Abacha bevries word.

‘n Soortgelyke versoek deur Tunisië is aan Switserland gerig om die president Ben Ali, wat deur die Arabiese Lente ontsetel is, se fondse terug te betaal.

Al- Sjabaab weer glo aanval af

Volgens die Islamitiese groep Al-Sjabaab, het hulle ‘n aanval op een van hul basisse in die suide van Somalië afgeweer.

Buitelandse kommando’s het glo met twee helikopters ingevlieg en die aanval geloods. Een Al-Sjabaab-militant is in die aanval dood.

Sjeik Abdiasis Abu Musab, Al-Sjabaab se woordvoerder vir militêre operasies, het nie die nasionaliteit van die troepe geïdentifiseer wat in die aanval ongeveer 50 km suid van Mogadisjoe, betrokke was nie.

Verskeie lande onder die vaandel van Amisom staan die Somaliese regering by in hul stryd teen die Al-Sjabaab-insurgensie.

Die sending bestaan uit troepe van verskeie Afrikalande wat sy aan sy met die Somaliese weermag veg.

Amerikaanse amptenare het in 2014 bekend gemaak dat Amerikaanse militêre adviseurs sedert 2007 in die geheim in Somalië betrokke is en dieper betrokke sal raak om die Islamitiese bedreiging af te weer.

Washington het oor die naweek aangekondig dat lugaanvalle Saterdag op ’n ander Al-Sjabaab-basis uitgevoer is en dat meer as 150 Islamitiese vegters in daardie aanval dood is.

Hulle het glo van onbemande tuie gebruik gemaak om twee sleutelfigure uit te wis. Al-Sjabaab wou nie die Pentagon se verklaring bevestig dat hulle die twee, Ugaas en Mire gedood het nie.

Die VSA het hommeltuie in Jemen sowel as in Somalië ontplooi.

Ondertussen berig Reuters dat ’n motorbomontploffing in die Somaliese hoofstad, die week die lewens van drie mense geëis het.

Die drie slagoffers was almal polisiemanne.

Nog ‘n gebou stort ineen in Nigerië

Nooddienswerkers in Lagos in Nigerië soek steeds na moontlike oorlewendes onder die puin van ‘n vyf-verdiepinggebou wat ingetuimel het.

Die dodetal staan tans op minstens 18, maar vrese bestaan dat dit verder sal styg, het RSG berig.

Nooddienswerkers sê hulle werk onverpoosd omdat stemme onder die puin steeds opklink. Elf mense is vroeër gered.

Die gebou het vermoedelik weens sanderige grond ineengestort. Die erf was eers ‘n rivier wat onlangs met sand opgevul is.

In September 2014 is 116 mense, waaronder 81 Suid-Afrikaners dood toe ‘n gastehuis by die kerk van die prediker, TB Joshua ineengestort het.

Suide stem nuwe sanksies teen Noord-Korea

Suid-Korea het die week ’n reeks nuwe, eensydige sanksies teen Noord-Korea aangekondig. Dit sluit onder meer ’n beroep op burgers in om Noord-Koreaanse restaurante in die buiteland te boikot.

Die nuwe maatreëls volg nadat die Noorde onlangs ’n kerntoets uitgevoer en ’n langafstand-vuurpyl getoets het, het AFP berig.

’n Lang lys name van Noord-Koreaanse individue en entiteite is ook op ’n swartlys geplaas en ’n verbod is geplaas op enige skepe wat voorheen in Noord-Koreaanse hawens anker gegooi het, om in Suid-Koreaanse gebiedswaters te vaar.

Dit volg op streng sanksies wat verlede week deur die Verenigde Nasies (VN) se Veiligheidsraad teen Noord-Korea ingestel is.

Seoel het verlede maand die buitengewone stap gedoen en die operasies van die gesamentlik beheerde Kaesong-nywerheidskompleks opgeskort.

Die sanksies en die sluiting van die kompleks is daarop gemik om die krane toe te draai van enige buitelandse valuta wat na die bewind in Pjongjang vloei.

“Aangesien Noord-Koreaanse instansies, soos buitelandse restaurante, een van die maniere is waarop Noord-Korea buitelandse valuta verdien, vra ons die publiek om nie van hierdie instansies gebruik te maak nie,” het Lee Suk-Joon, hoof van die kantoor belas met regeringsbeleid-koördinering gesê.

Die Suid-Koreaanse regering beraam dat Pjongjang nagenoeg US$10 miljoen jaarliks uit 130 restaurante in 12 lande verdien.

“Verminderde benutting van Noord-Koreaanse restaurante sal bydra om die kontantvloei tot ’n groot mate te laat opdroog,” het die regering in ’n afsonderlike verklaring gesê.

Lee sê die regering vermoed dat die meeste buitelandse valuta, deur verskillende kanale, uiteindelik vir wapens van massavernietiging gebruik word.

Seoel het ook 40 indivue en 30 groepe wat betrokke is by Noord-Korea se kern- en missielprogramme, insluitende twee individue en ses groepe van ’n derde land, op die swartlys geplaas en hulle enige saketransaksies met Suid-Koreaanse ondernemings belet.

Die skuif om buitelandse vaartuie wat in die Noorde anker gegooi het, te verbied om Suid-Koreaanse gebiedswaters binne te kom, maak klaarblyklik ook ’n einde aan ’n ambisieuse trilaterale infrastruktuurprojek wat ten doel gehad het om Russiese steenkool, deur die Russiese grensdorp, Khasan en die Noorde se hawestad, Rajin na Suid-Korea uit te voer.

Die sogenaamde Rajin-Khasan-projek was ’n integrale deel van die Suid-Koreaanse president, Park Geun-Hye, se visie om die spoornetwerke van die Noorde en Suide te integreer om dit uiteindelik met Europa te verbind.

Tunisë en Libië raak by grens slaags

Tunisiese veiligheidsmagte het die week met gewapende soldate naby die grens met Libië slaags geraak, minder as ’n week nadat vyf militante wat oor die grens gekom het, deur veiligheidsmagte doodgeskiet is.

Die gewapende mans het probeer om ’n pos van die nasionale wag en weermagbarakke in die dorp, Ben Guerdane, aan te val toe die gevegte uitgebreek het.

Minstens vier burgerlikes is in die gevegte gewond.

Die gevegte het omstreeks 04:30 uitgebreek en teen dagbreek het dit steeds gewoed. Troepe in die grensgebied is op ’n hoë gereedheidsgrondslag sedert ’n Amerikaanse lugaanval op 18 Februarie ’n opleidingskamp van die Islamitiese Staat (ISIS) groep in Libië gebombardeer het.

Altesaam 18 Tunisiese militante is in die aanval dood.

Minstens vier van die vyf militante wat verlede Woensdag naby Ben Guerdane dood is toe hulle hul vaderland vanuit Libië binnegesypel het, was Tunisiërs.

Dodelike aanvalle op buitelandse vakansiegangers verlede jaar het die Tunisiese toerismebedryf ’n ernstige knou toegedien.

Die skermutselinge het vrese laat ontstaan dat die geweld in Libië kaan oorspoel na hul buurland.