Kategorie: Nuus

Grensbeheer teen onwettige sigarette oorweeg

Suid-Afrika verloor jaarliks meer as vier miljard rand aan belastinginkomste weens smokkelsigarette. Meer as 60 persent van die sigarette in die land word nie vir belastingdoeleindes verklaar nie.

Dit het aan die lig gekom tydens ‘n konferensie in Kaapstad, wat deur BAT geborg word. BAT poog om die onwettige handel in sigarette in Afrika te stuit.

Die adjunkminister van polisie, Maggie Sotyu wat die konferensie bygewoon het, sê verskerpte grensbeheer is een manier om die onwettige handel in sigarette hok te slaan.

Sotyu sê die departement van binnelandse sake gaan binne die volgende ses tot twaalf maande nuwe grensbeheermaatreëls implementeer wat sal bydra om die onwettige handel te stuit.

Die vermoede bestaan dat Zimbabwe dié smokkelhandel gebruik om sy ekonomie aan die gang te hou.

President Mugabe het openlik steun vir Savanna, sy sigaretvervaardiger uitgespreek en sy mededinger British American Tobacco (BAT) van spioenasie op Savanna en kaping van sy vragmotors beskuldig.

Houers vol sigarette wat gemaak kan word vir so min as R1,50 en is maklik om aan die plaaslike mark te versprei sonder om die R13 belasting per houer te betaal.

Gewilde handelsmerke van sigarette word in die kleinhandel teen R35 ‘n pakkie verkoop, terwyl onwettige sigarette tussen R4 en R12 ‘n pakkie kos.

Met marges wat neig na ‘n 1000%, is dié onwettige handel een van die grootste elemente in georganiseerde misdaad in Suid-Afrika.

Volgens navorsing deur BAT, is 9.5 miljard onwettige sigarette met ‘n straatwaarde van sowat R4 miljard plaaslik gerook verlede jaar.

Savanna het byna 10% van die mark ingepalm, volgens die instituut, met sowat 700 miljoen van sy onwettige sigarette.

Die uitvoerende hoof van die Tabak-instituut van Suidelike Afrika, Francois van der Merwe sê die onwettige handel in sigarette het verskeie negatiewe gevolge.

Hy sê dit het ‘n maatskaplike invloed omdat dit deur misdadigers bedryf word en nie deur die regering se gesondheidswetgewing gereguleer word nie.

Krygkor, lugmag verduidelik Zuma-straler

Die hoofbestuurder van Krygkor sê die gebruik van kommersiële vlugte dra risiko’s en die land se leiers moet beveilig word.

Krygkor en die lugmag het die media Dinsdagoggend toegespreek oor die beplande aankoop van ‘n nuwe straler vir president Jacob Zuma. Volgens berigte kan dit glo tot R4 miljard kos.

Krygkor se hoofbestuurder, Kevin Wakeford, sê egter dit is bloot ‘n aansoek en nog nie ‘n vaste besluit nie.

Die hoof van die Suid-Afrikaanse Lugmag, Fabian Msimang, sê oor die afgelope paar jaar het die beskikbaarheid van vliegtuie problematies geword.

Wakeford sê ‘n staatshoof kan nie op ‘n gewone vlug met sy personeel vergader of werk nie. Hy sê dit sal elke veiligheidsprotokol in die boek oortree.

Wakeford het ook na die jongste lugramp in Egipte verwys waar ‘n passasiersvlug met Russiese toeriste neergestort het.

Hy het gesê die bespiegelinge oor die uitgawe is voortydig omdat geen besluit nog geneem is nie.

Skoonmakers dreig om UV te ontwrig

‘n Klein groepie skoonmakers by die Universiteit van die Vrystaat en betogers het Dinsdagoggend betoog teen uitkontraktering by die instelling.

Hulle eis dat dit stopgesit word en dat hulle deur die UV aangestel word sodat hulle meer voordele kan geniet soos gratis onderrig vir gesinslede.

Die groep het omstreeks 10:00 bymekaargekom het om met die protesaksie te begin.

Hulle wou die administrasiegebou binnedring om werksaamhede te ontwrig en het rewolusionêre slagspreuke gedreunsing.

Die groep sê hulle sal die universiteit lamlê as daar nie aan hulle eise gehoor gegee word nie.

Jonathan Jansen, die rektor, het vroeër gewaarsku dat die oproer sal aanhou, ook aanstaande jaar.

Gautenger wat vir DynCorp werk was slagoffer

Van die veiligheidspersoneel wat Maandag doodgeskiet is in Jordanië, het vir DynCorp International gewerk. Die Amerikaanse belastingbetaler is sy grootste kliënt.

DynCorp, ‘n bekende militêre kontrakteur wat oral in die Midde Ooste werksaam is, verdien meer as 96% van hul jaarlikse inkomste van die Amerikaanse Federale Regering.

Die Suid-Afrikaanse departement van buitelandse sake het intussen bevestig dat die Suid-Afrikaner wat doodgeskiet is, ‘n 37-jarige man van Gauteng is.

Jordaniërs onthou 9 November as die herdenking van die bomaanvalle op drie hotelle in die hoofstad Amman in 2005, waarin 60 mense dood is en meer as 110 beseer.

Die aanvalle is deur al-Qaeda in Irak uitgevoer, in reaksie, het hulle gesê, op die teenwoordigheid van die Amerikaanse en Israeliese intelligensie-agente, en Westerse regerings.

Dit was die dodelikste terreuraanval in Jordanië se geskiedenis.

Die jongste aanval het by die Jordaniese Internasionale Polisie Opleidingsentrum (JIPTC) in Muwaqqar, oos van die hoofstad plaasgevind. Dit is in 2003 opgerig tydens die Amerikaanse inval in Irak.

Die militêre opleidingsfasiliteit word tans glo gebruik vir personeel wat in Sirië ontplooi word.

Nelson Kgwete, woordvoerder vir die Suid-Afrikaanse departement van buitelandse sake, het bevestig dat die man se naasbestaandes in kennis gestel is, maar wou nie die slagoffer se naam bekendmaak nie.

Die aanvaller, ‘n Jordaniese polisiekaptein, Anwar Abu Zeid, het op die groep losgebrand in die eetsaal van die kompleks terwyl hulle besig was om te eet. Grutonele het diegene wat eerste op die toneel was, begroet.

Kommer bestaan dat Jordanië se verhouding met die VSA die oorsaak van die aanval kan wees.

Terwyl die land vanjaar ‘n miljard dollar sal ontvang om as ‘n basis te dien vir spesiale operasies as ‘n belangrike strategiese bondgenoot van die VSA, is die gevoel onder die algemene publiek toenemend anti-Amerikaans en anti-Westers.

Ontleders is bekommerd dat ondersteuning vir ekstremistiese groepe groei. Aan die begin van die jaar was daar na beraming sowat 1200 Jordaniërs wat in Sirië vir ISIS geveg het.

Uganda begin voorberei vir 2016 se verkiesing

Uganda se presidentsveldtog het Maandag afgeskop met die oog op verkiesings­ wat in Februarie 2016 gehou word.

In die verkiesing kom die land se veteraanpresident teen ’n ou teenstander en afgedankte premier te staan.

Agt kandidate het hulle beskikbaar gestel vir die verkiesing wat op 18 Februarie 2016 gehou word. Die huidige president, Yoweri Museveni, is reeds 30 jaar lank aan bewind.

Museveni, wat in 1986 president geword het, se sterkste teenstand kom van Kizza Besigye van die Forum vir Demokratiese Verandering (FDC) wat reeds drie keer in die verlede die knie voor Museveni moes buig, en Amama Mbabazi, ’n voormalige eerste minister wat as onafhanklike kandidaat staan.

Die verkiesingskommissie in die land het kandidate aangemoedig om vreedsame veldtogte te voer en hulle by die landswette te hou, wat onder meer ’n skemeraandklokreël vir verkiesingsvergaderings asook ’n einde aan veldtogvoering twee dae voor die verkiesing insluit.

Ander kandidate is ’n universiteitsprofessor, Venansius Baryamureeba; Abed Bwanika wat beloof om homoseksuele mense te “rehabiliteer” as hy wen; ’n evangeliese pastoor, Joseph Mabirizi; ’n afgetrede generaal, Benon Biraaro, en ’n regsgeleerde, Faith Kyalya, die enigste vroulike kandidaat.

Museveni, van die regerende party (NRM), sal na alle verwagting die oorhand kry en vir nog ’n termyn van vyf jaar verkies word.

Britse premier voer nog ‘n eierdansie uit oor EU

Die Europese Unie (EU) moet meer buigsaam wees indien dit Brittanje se kiesers wil oortuig om in die 2017-referendum ten gunste daarvan te stem, het ­premier David Cameron verklaar.

Die Britse premier moet sy kiesers onder die indruk hou dat Brittanje ‘n belangrike vennoot in die EU is wat kan eise stel, terwyl die teendeel waar is.

Die Konserwatiewe Party is diep verdeel oor EU-lidmaatskap en ‘n stemmery sal die einde van Cameron beteken.

Cameron wil Brittanje se bande met die EU “hersien” en sal glo aanstons meer besonderhede oor sy planne verskaf.

Ontleders meen hy het min beweegruimte met die anti-EU-party UKIP wat Konserwatiewe kiesers afrokkel.

“’n Mens kan al my onderhandelinge in een woord ­opsom: buigsaamheid. Is hierdie organisasie buigsaam genoeg om seker te maak dat alle lande in die euro-­sone kan groei en welslae behaal en lande buite die euro-­sone, soos Brittanje, ook kan kry wat hulle wil hê?” het Cameron aan ’n groep sakeleiers gesê.

“Indien dit buigsaam genoeg is, sal ons bly. Indien dit nie buigsaam genoeg is nie, moet ons onsself die vraag afvra: Is hierdie organisasie vir ons?”

Cameron se toespraak is vlugtig onderbreek toe twee hekelaars ’n banier oopgevou het met die bewoording: “CBI – Voice of Brussels”.

Dit wil voorkom asof die protes teen ’n werkgewersgroep se posisie oor EU-­lidmaatskap gegaan het.

Moslemkwessie in Mianmar-verkiesing onderspeel

Stemme word getel in Mianmar se algemene verkiesing maar geen amptelike uitslae is nog aangekondig nie.

Voorlopige verslae van oral in die land dui op ’n oortuigende oorwinning vir die pro-Amerikaanse Aung San Suu Kyi se Nasionale Liga vir Demokrasie (NLD).

“Ons moet vasstel waarom ons verloor het,” het Htay Oo, ’n bondgenoot van pres. Thein Sein gesê. “Ons aanvaar egter die uitslae sonder enige voorbehoud. Ons weet nog nie met sekerheid wat die finale uitslae is nie.”

Htay Oo sê hy is verbaas met die omvang van sy nederlaag in sy eie parlementêre kiesafdeling in Hinthada in die delta-gebied, wat as die hartland van die USDP se landelike steun beskou is.

’n Woordvoerder van die NLD, Win Htein, sê die aanduidings is dat die party ongeveer 70 persent van die stemme wat tot dusver getel is, verwerf het.

Na verwagting het die party tussen 50 en 80 persent van stemme in Mianmar se 14 state ingepalm.

Hy het aan die nuusagentskap The Associated Press gesê die party se sterkste vertoning is in sogenaamde hartland-state waar dit voorkom asof die party tot soveel as 80 persent van die stemme gekry het.

Die steun neem effens af tot tussen 70 en 50 persent in etniese state.

“Dit is deur die verkiesingskommissie bevestig, maar ons is nog nie seker van die finale syfers nie. Indien hierdie opmerkings deur amptelike uitslae bevestig word, is die aanduidings dat die party onder leiding van Aung San Suu Kyi ’n oortuigende verkiesing-sege behaal het.”

Sy en haar party sal eintlik saam met die generaals wat Mianmar (Burma) in 1962 tydens ’n staatsgreep oorgeneem het, regeer sê ontleders.

Die generaals het tot in 2011 geregeer, waarna hulle die mag aan hul politieke vleuel oorhandig het nadat bewerings van korrupsie aan die lig gekom het.

Mianmar is verdeel in strydende etniese en godsdiensgroepe en die junta het ‘n balans gehandhaaf in ‘n land wat worstel met ‘n “krisis van minderhede”.

Boeddhiste vrees dat Moslems meer invloed in die land sal kry, maar Aung San Suu Kyi het sulke kwellinge onderspeel.

Ten minste 10 miljoen mense kon nie stem nie omdat hulle deel is van ‘n etniese minderheid.

Dit sal nie die eerste keer wees dat die NLD ’n oorwinning behaal nie. In 1990 het die party ook gewen, maar dié oorwinning is deur die generaals ­geïgnoreer.

Bulgaarse polisie, weermag betoog teen besnoeiings

Amerikaanse druk op Bulgarye om teen Russiese belange te werk, het die land tot dusver niks in die sak gebring nie.

Die VSA probeer Russiese gastoevoer na Europa beperk om hul eie energiemonopolie te beskerm, maar dit hou geen voordele in vir lande wat daaraan moet deelneem nie.

Bulgarye is een van lande wat baie bekommerd is oor die Europese Kommissie se verwagtinge oor die uitbreiding van die Nord Stream-gaspyplyn.

Tesame met Hongarye en Griekeland kan Bulgarye ook ‘n slagoffer word van die EU se energie-oorlog.

Vantevore is groot druk op Sentraal-Europa en Balkanlande uitgeoefen om die konstruksie van die South-Stream te staak,” het die ministerie van buitelandse sake van Hongarye in ‘n verklaring gesê.

Beide Hongarye en Bulgarye kan aansienlike stygings in staatsinkomste te wagte wees indie hulle Russiese gas herlei.

Met ‘n markaandeel van 33 persent van die totale olie-invoere en 39 persent van die totale gasinvoer (en so hoog as 100 persent in die Baltiese lande), is Rusland is die grootste uitvoerder van beide brandstowwe na die EU.

Bulgarye het ook onlangs geweier dat hul lugruim deur Russiese vliegtuie vir hul Siriese missie gebruik word.

Sulke stappe is uiters ongewild by kiesers. Die regering se planne om die staatsdiens se maatskaplike voordele te verminder het intussen gelei tot betogings in die hoofstad Sofia.

Bulgaarse polisie het nasionale vlae in Sofia omhoog gehou tydens hul protes.

Honderde Bulgaarse polisiebeamp­tes, brandweermanne en gevangenis­wagte het aan die optog deelgeneem nadat die regering skielik­ voorstelle aan die hand gedoen het om pensioen­uitbetalings, betaalde verlof en ander voordele te sny sonder om dit vooraf met vakbonde te bespreek.

Bulgarye het ‘n ondergrondse gasbergingsaanleg se kapasiteit verdubbel met ‘n gedeeltelike lening van die EU, “teen die Russiese gasmonopolie Gazprom”.

Die uitbreiding sal na verwagting die kapasiteit van 550 miljoen kubieke meter na een miljard kubieke meter verhoog.

Dit is glo daarop gemik om die energie-sekuriteit in die Balkan te “bevorder”.

Zuma ontmoet Merkel in ontstuimige klimaat

President Jacob Zuma het in Berlyn in Duitsland aangekom vir samesprekings met die sukkelende Duitse kansellier, Angela Merkel.

Merkel se koalisie wankel tans onder die migrantekrisis, met haar eie gewildheid wat aanhou daal.

Die Duitse minister van binnelandse sake Thomas de Maiziere (CDU) het onlangs gesê dat hy wil die regte van sogenaamde asielsoekers beperk.

Intussen het De Maiziere prominente ondersteuning van ander hooggeplaaste CDU-lede gekry, soos die gewildste politikus in Duitsland, Wolfgang Schäuble.

Volgens Schäuble, ook ‘n kritikus van Griekeland, is die kapasiteit van Duitsland om die aankomelinge te absorbeer naby aan sy einde.

Dié uitlatings het Merkel in ‘n hoek gedryf omdat sy volhou met haar Soros-napratery wat gemik is teen die Duitse volksgevoel.

Die CSU en CDU sal groot winste in die huidige politieke klimaat behaal as hulle van die kanselier ontslae raak.

Suid-Afrika is Duitsland se grootste handelsvennoot in Afrika. Dit is die eerste keer wat dié twee leiers bilaterale samesprekings voer.

Die minister van Internasionale Betrekkinge, Maite Nkoana-Mashabane, is deel van President Zuma se afvaardiging.

Daar is meer as 600 Duitse maatskappye wat sake doen in Suid-Afrika en aan minstens 100 000 mense werk verskaf.

Die vorige geleentheid waar Suid-Afrika en Duitsland samesprekings gevoer het was tydens Thabo Mbeki se bewind in 2007 toe die Zimbabwe-krisis hoog op die agenda was.

Goedkoop politiekery ontsier internasionale atletiek

Amerika en Brittanje wil Rusland graag voor volgende jaar uit die Olimpiese Spele in Rio de Janeiro skors.

Die Wêreldagentskap teen opkikkers (Wada) het Maandag aanbeveel dat Rusland uitgeskop word oor “sistemiese gebreke” in die Internasionale Vereniging van Atletiekfederasies (IAAF) jeens opkikkers.

In die verslag word gesê dat die Olimpiese Spele in Londen in 2012 “gesaboteer” is deur die IAAF se trae houding.

“Ons aanbeveling is dat die Russiese Federasie in 2016 geskors word,” het Dick Pound, president van Wada, op ’n nuuskonferensie gesê.

Die Britse oud-atleet en politikus, Sebastian Coe, tans president van die IAAF, het Wada se verslag beaam en gesê Rusland behoort geskors te word.

Rusland het met 2012-Spele met 17 medaljes, tweede na die VSA geëindig.

Die Russiese intelligensiediens (FSB) was glo tydens die Winterspele in Sotsji teenwoordig, wat gelei het tot “partydigheid en ‘n gebrek aan oordeel en integriteit”.

Klagtes van korrupsie en geldwassery is ook verlede week in Frank­ryk teen sy voormalige president, die 82-jarige Lamine Diack, aanhangig gemaak.

Hy word daarvan beskuldig dat hy $1,09 miljoen in omkoopgeld gekry het om positiewe opkikkertoetse van Russiese atlete toe te smeer.

Interpol het Maandag bekend gemaak dat hy ’n wêreldwye ondersoek na korrupsie en opkikkergebruik in atletiek gaan lei teen die Russiese Federasie.

Al die gevolgtrekkings in die Wada-verslag is gebaseer op onbevestigde bronne en ongegronde feite, het die Russiese minister van sport Vitaly Mutko gesê.

Mutko sê dat Rusland jaarliks sowat 15.000 monsters neem en die totale aantal atlete wat gediskwalifiseer word staan op ongeveer 2 persent, “dieselfde as in ander lande”.

“Dit is onmoontlik om vandag iets weg te steek. Al die data is daar in die databasisse onder toesig van Wada. Baie daarvan kan net nie vervals word nie,” het hy gesê.