Krejcir wil weer vir borg probeer

villaradovanDie Tjeggiese voortvlugtige en mafiabaas Radovan Krejcir gaan opnuut probeer om borgtog te bekom.

Hy is voorheen borgtog geweier deur die landdroshof sowel as die Suid-Gautengse hooggeregshof weens die feit dat hy ‘n vlugrisiko inhou.

Hy sal in die Palm Court landdroshof redes aanvoer waarom hy op borgtog vrygelaat moet word.

Sy regsverteenwoordiger sê Krejcir sal bewyse voorlê wat aantoon dat hy ‘n geskikte kandidaat vir borgtog is.

Die onderwêreldbaas is verlede jaar in hegtenis geneem op aanklagte van ontvoering en poging tot moord.

Hy het meer as agt jaar gelede uit die Tjeggiese republiek gevlug nadat hy skuldig bevind is aan bedrog en korrupsie.

Hy het Suid-Afrika met ‘n vervalste paspoort vanuit die Seychelles binnegekom.

Die miljardêr Krejcir besit ‘n paleis in Cernosice naby Praag in Tsjeggië met goud krane, geheime gange en ‘n haai in ‘n vistenk.

Die paleis sou verlede jaar op ‘n veiling verkoop word.

Iran, P5+1 vergader oor kernooreenkoms

p5Samesprekinge vind tans plaas tussen Iran en die Veiligheidsraadlidlande Amerika, Brittanje, Rusland, Frankryk en China, plus Duitsland, kortweg bekend as die P5 + 1.

Iran en die P5 + 1 het Dinsdag in Wene, Oostenryk vergader om konflik oor Teheran se kernkragambisies te besleg.

’n Tussentydse ooreenkoms is in Januarie gesluit waarkragtens tydelike beperkinge op Iran se kernkragprogram geplaas is. ’n Finale ooreenkoms moet nog gesluit word.

Die VSA wil toesien dat Iran hul aantal uraanverrykingssentrifuges verminder van 10 000 na tussen 3000 en 4000.

Dit sal beteken dat indien Iran wel ’n kernoorlog wil voer, sy wetenskaplikes ses maande nodig sal hê om die nodige hoeveel uraan te vervaardig.

Iran sal ook versoek word om sy plutonium-aanleg by Arak te herontwerp om te verseker dat alternatiewe metodes in kernwapenvervaardiging nie beskikbaar is nie.

Iran het op sy beurt gevra dat alle sanksies opgehef word, wat sanksies op olie-uitvoere insluit. In Januarie is van die sanksies deels opgehef, maar die ergste olie- en ekonomiese sanksies is steeds in plek.

Met knelpunte in die samesprekings sal die huidige ooreenkoms heel moontlik met nog ses maande verleng word, indien die finale ooreenkoms nie in Junie bereik kan word nie.

Die opperleier van Iran, Ajatollah Ali Khamenei, het gesê alhoewel die samesprekings “na nêrens lei”, hy sal hou by die tussentydse ooreenkoms.

Hy het ook gesê dat hy die diplomasie van pres. Hassan Rouhani ondersteun.

Wie kry die e-tol-rente?

Dipuo Peters
Dipuo Peters

Sanral is gelas om die rekeningkopseer in die Gautengse e-tol-stelsel op te los, het die minister van vervoer, Dipuo Peters, Dinsdag gesê.

Peters het die parlement se portefeuljekomitee vir vervoer toegespreek en toegegee daar is ernstige probleme met die ongewilde elektroniese tolstelsel wat ondermeer die rente op internetbetalings insluit.

Peters se opmerkings het gekom ná ‘n reeks klagtes deur padgebruikers in die provinsie oor rekeninge en registrasie.

“My instruksies aan Sanral … is duidelik en helder. Hulle moet die probleme met rekeninge uitsorteer en hulle moet dit dadelik doen.

“Daar is steeds ’n behoefte om padgebruikers op te voed oor hoe die stelsel werk en die verskeie registrasie- en betalingmetodes wat beskikbaar is,” het sy gesê.

“’n Positiewe uitkoms van die toepassing van die stelsel was die uitkenning van gekloonde lisensieplate, ongeregistreerde voertuie en voertuie sonder nommerplate,” het Peters gesê.

Sy het alle LP’s aangemoedig om te registreer, aangesien hulle as wetmakers die eerste behoort te wees wat registreer.

Peters het LP’s wat nie skyfies gekoop het nie, berispe en gesê hulle minag hul eed van getrouheid aan die Grondwet. Sy het egter ook haar eie onkunde oor die stelsel onbloot.

‘n Opposisielid het aan Peters gesê dat sy valshede in die openbaar versprei. “Die wet vereis nie van enige van ons om ‘n e-tol-skyfie te koop nie. Suid-Afrikaners kan kies om nie ‘n e-tol-skyfie te koop nie en eerder ’n rekening wil ontvang,” het hy gesê.

Nazir Alli, uitvoerende hoof van Sanral, het gesê daar is ook probleme met mense wat elektronies via die internet hul rekeninge wil betaal.

Hy sê dit kan enigiets van twee tot vyf dae neem voor die oordrag in die ontvanger se rekening aangedui word.

Dít lei volgens hom tot frustrasie, aangesien die geld “iewers in die kuberruim lê”. Volgens Alli het hy die banke oor die probleem genader.

“Wie kry daardie rente? Niemand gee vir ons daardie antwoord nie,” het hy gesê.

Oproer lei tot miljoene rande se skade

tyres2Die skade wat tydens gewelddadige diensleweringsbetogings in Gauteng aan openbare eiendom aangerig is, word op R65 miljoen geraam, het RSG berig.

Die LUR vir Behuising, Ntombi Mekgwe sê die bedrag sal waarskynlik styg weens verslae wat nog uitstaande is en die feit dat betogings voortduur.

In Bekkersdal alleen beloop die geraamde skade aan eiendom R20 miljoen. Dit sluit die skade aan ‘n gemeenskapsaal en munisipale kantore in.

Mekgwe het ‘n waarskuwing aan gemeenskappe gerig dat die reg sy loop sal neem wanneer mense openbare eiendom beskadig.

Rooivleisuitvoerverbod opgehef

rooivleis‘n Uitvoerverbod van drie jaar op Suid-Afrikaanse rooivleis is opgehef en die land is weer as “siektevrye-sone” gelys.

Die welkome stap kom nadat die rooivleisbedryf het ‘n geskatte R4 miljard per jaar verloor het sedert die verbod in werking getree het in Februarie 2011.

Die departement van Landbou sê die Wêreld-organisasie vir Dieregesondheid in Parys het Suid-Afrika se status herstel as ‘n bek-en-klouseervrye land.

Die direkteur-generaal van die departement van Landbou, Bosbou en Visserye, Edith Vries, het die opheffing van die verbod verwelkom.

Vries beskryf dit as “goeie nuus waarvoor die regering krediet moet ontvang”.

Die Organisasie het die hoofdirekteur in beheer van dieregesondheid in die departement in kennis gestel van die besluit nadat hulle die land besoek het en vasgestel het dat voorkomende maatreëls in plek gestel is

Gerhard Schutte, die hoof uitvoerende beampte van die Rooivleis Produsente-organisasie, het gesê hy is verheug oor die besluit.

“Dit is goeie nuus, nie net vir die rooivleisbedryf nie, maar vir die stoetbedryf, wol- en melkbedryf. Almal van hulle het probleme gehad as gevolg van die verlies van die bek-en-klouseervrye status,” het hy gesê.

“Die wolbedryf het groot probleme gehad om hul wol in China te kry.

“Die melk kon nie na buurlande gaan nie want daar was ‘n verbod op suiwelprodukte om uit te gaan.

“En die stoetdiere, hoofsaaklik beeste , maar skape ook, Hulle kan nou na buurlande gaan.”

 

Laaste inry in Suid-Afrika sluit

Velskoen-inry
Velskoen-inry

Die sluiting van die Menlyn Park-inryteater sal die einde van ‘n era beteken, want dit sal die laaste van sy soort in Suid-Afrika wees wat toemaak.

Bestuur sê tegniese probleme het gelei tot die besluit om die land se laaste inryteater te sluit.

Baie Pretorianers koester soete herinneringe van die inry op die dak van die Menlyn Park-winkelsentrum.

Dis deel van Pretoria se filmgeskiedenis wat gaan sluit, met die laaste vertoning wat aan die einde van Februarie sal plaasvind.

Menlyn Park was die laaste teater van sy soort in Suid-Afrika, nadat die Velskoen-inry in Randburg sy deure in Junie 2012 gesluit het.

Voorheen was daar sowat 50 inrye wat landwyd teatergangers met kussings, komberse, piekniekmandjies en die kroos in pajamas gelok het.

Die teater moes weens tegniese beperkinge sluit omdat alle films deesdae digitaal is, wat beteken dat ou 35mm-film toenemend moeilik is om in die hande te kry. Dit teater het nog ‘n ou 35mm-projektor.

Volgens die bestuur het die inry 8736 vertonings aan 1.005.088 mense gewys.

Dit is nog nie bekend waarvoor die ruimte aangewend sal word nie.

Die laaste openbare vertoning sal op Vrydag, 28 Februarie plaasvind.

Die laaste week van vertonings sal gratis aangebied word.

Egpaar vertel van nagmerrie-aanval

Noordheuwel
Noordheuwel

In die 31 jaar sedert Hannes (61) en Hannetjie (66) le Roux in hul huis in Noordheuwel, Krugersdorp woon, was die bejaarde egpaar nooit slagoffers van enige vorm van misdaad nie, maar op 28 Januarie het alles verander.

Hannes was besig om buite die huis te werk toe twee onbekende swartes sy erf binnekom, het hy aan looklocal.co.za vertel.

“Die swartes het navraag gedoen oor ‘n werker van my, en die volgende oomblik is ek en een van my ander werkers beveel om die sekuriteitshek van my huis oop te sluit en om hulle in te laat,” vertel hy.

Binne etlike oomblikke het die Le Roux’s se huis in ‘n slagveld verander.

“Toe ons instap het een van die swartes ‘n mes en geweer uitgepluk. Hy het my grond toe gegooi en meubels is heen en weer gegooi; ons het lank met mekaar gestoei.”

Uit die hoek van sy oog het Hannes gesien hoe sy werker met ‘n mes gesteek word en daarna reggekry het om te ontsnap.

Hy het by die bure gaan hulp soek en sekuriteit ontbied.

Elders in die huis is Hannes se vrou, Hannetjie en hul 15-jarige kleindogter en drie van haar vriendinne intussen met ‘n vuurwapen aangehou en beveel om in ‘n ry te staan.

“Hulle het geld en skootrekenaars gesoek en almal wat selfone gehad het moes dit oorhandig,” vertel Hannetjie.

Hannes het aangehou om met die een swarte in die sitkamer te stoei en hom uiteindelik uit die huis gekry.

“Ek het geweet dat die ander man nog in die huis is en het dadelik na my vrou en die kinders gehardloop waar ek die geveg voortgesit het. Ek kon die tweede man ook uiteindelik uit die huis kry en albei het gevlug.

“Ons was verlig en dankbaar dat ons leef. Ons wil dit net nooit weer oorhê nie,” vertel Hannetjie.

Maar presies vyf dae later, op Maandag 3 Februarie omstreeks 1vm is die egpaar en hul kleindogter se grootste vrese bewaarheid die rowers was terug.

“Dit was soos ‘n fliek. Ons was almal in die hoofslaapkamer toe ons ‘n harde geluid hoor en skielik vier gemaskerede mans deur die plafon sien val,” vertel Hannes.

Die Le Roux’s se kleindogter, wat twee van die rowers herken het van die vorige inbraak nadat hulle die maskers afgehaal het, is beveel om stil te sit en stil te bly.

Die rowers het daarna met aggressie op die egpaar toegesak. Hannetjie is met ‘n hamer in haar gesig geslaan en Hannes twee keer met ‘n mes in die bors gesteek.

“Hulle wou die kluissleutel hê,” vertel Hannes.

Terwyl drie van die rowers die huis gestroop het, het die ander lakens om Hannes se kop en komberse om sy lyf gedraai.

“Hulle wou my versmoor.”

Hannes wat teen daardie tyd al n groot hoeveelheid bloed verloor het, sê dat hy net vir kort oomblikke sy bewussyn herwin het.

“Ek was seker ek gaan sterf.”

Hannetjie is beveel om vir die swartes te wys waar hulle die kar parkeer.

“Ek moes die kar aansluit en uitklim, toe het die vier ingeklim en gevlug.”

Toe dit stil word het die Le Roux’s se kleindogter die straat ingehardloop om hulp te soek.

Inwoners verder af in die straat het uiteindelik kom help en die ambulansdienste is ontbied.

Na dae in die intensiewe sorg-eenheid van die Netcare Krugersdorp Hospitaal is Hannes ontslaan en sterk nou by die huis aan.

Die egpaar en hul kleindogter het hul storie aan vertel om mense daarvan bewus te maak en doen ‘n beroep op Krugersdorp-inwoners om veiligheidsmaatreëls in plek te stel.

“Moenie dink dat dit nie met jou kan gebeur nie dit kan,” waarsku Hannes.

Nog twee renosters in Noordwes gestroop

Witrenosters
Witrenosters

Die Noordwes Parke en Toerismeraad sê nog twee renosters is in die provinsie gestroop, wat die totaal vir die jaar op tien te staan bring, het RSG berig.

Dit volg nadat die Lehurutshe-landdroshof naby Zeerust, gister tien jaar tronkstraf aan Hans Skhosana opgelê het vir renosterstropery.

Sy medebeskuldigde verskyn op 26 Maart in die hof.

Die raad sê in die jongste voorval is ‘n renoster Sondagaand in die Rustenburg-gebied geskiet en van sy horing gestroop.

Niemand is nog in hegtenis geneem nie.

NVP-takleier doodgeskiet

Zanele Magwaza-Msibi
Zanele Magwaza-Msibi

Die leier van die Nasionale Vryheidsparty, Zanele Magwaza-Msibi het ‘n beroep op die polisie gedoen om alles moontlik te doen om die moordenaars van ‘n tak-leier van haar party vas te trek.

Die 48-jarige Ntombi Mzila is gister by die KwaMashu hostel buite Durban doodgeskiet, het RSG berig.

Die moord op Mzila volg slegs twee dae nadat twee ander lede van die NVP in dieselfde gebied geskiet is.

Die twee NVP-ondersteuners is gewond tydens die skietvoorval.

Mzila het die slagoffers besoek wat uit die hospitaal ontslaan is, toe sy vermoor is.

‘n Polisie-woordvoerder sê twee skote is na Mzila gevuur en sy is op die toneel dood.

Die OVK in KwaZulu-Natal het vroeër gesê hy is besorgd oor die onlangse voorvalle van politieke onvedraagsaamheid in die provinsie in die aanloop tot die Mei verkiesings.

Die NVP-leier sê sy is bekommerd oor die invloed wat die aanvalle in aanloop tot die verkiesing op partylede het.

Platinumarbeidsdispuut val weer vas

stakersSamesprekings tussen myners en die bestuur het weer vasgeval het om die staking by platinummyne die beëing.

Sowat 70.000 mynwerkers staak die afgelope drie weke reeds.

Die arbeidsdispuut bly steeds onopgelos nadat Lonmin, Amplats en Implats nie hul aanbod van ‘n nege persent verhoging aangepas het nie.

Die mynwerkersvakbond, Amcu, sal binnekort glo ‘n groot aankondiging tydens ‘n mediakonferensie maak betreffende hul voortgesette optrede teen mynhuise.

Die konferensie sal waarskynlik Woensdag plaasvind, omdat die vakbondleierskap vandag steeds vergader.

Amcu se aankondiging is in teenstelling met ‘n mediaverklaring wat die Kommissie vir Versoening, Bemiddeling en Arbitrasie na Maandag se vergadering uitgereik het.

Daarvolgens sou Amcu terugvoering aan die KVBA gee nadat ‘n vergadering met sy vakbondlede gehou is.