OFM en Jacaranda plaas verbod op Steve Hofmeyr

Die bestuur van die radiostasie OFM het ‘n verbod op Steve Hofmeyr se musiek geplaas omdat hulle van sy politieke oortuigings verskil.

Volgens die radiostasie is Hofmeyr nie meer ‘n “hoofstroom”-kunstenaar nie.

Gary Stroebel, uitvoerende hoof van Central Media Group, wat OFM besit, het die verbod bevestig nadat Hofmeyr op sy Facebook-blad gesê het OFM en Jacaranda FM weier om musiek van sy jongste album, Toeka 3, te speel.

Volgens Stroebel het Hofmeyr aangehou om “Die Stem” te sing nadat hy uitdruklik gevra is om dit nie te doen nie.

“Dis jammer dat hy gekies het om so op te tree teenoor dié stasies wat gehelp het om sy mediaprofiel te bou – en sy fortuin te maak – omdat dit sy persoonlike politieke ambisies pas.”

Stroebel het verder gesê Hofmeyr moet die stasie direk kontak om sy klagtes te bespreek en nie “sy vuil wasgoed in die openbaar uithang nie”.

Kevin Fine, bestuurder van Jacaranda FM, het in reaksie op die die verbod gesê Steve se musiek is nie goed genoeg nie. “As die liedjie nie goed genoeg is nie, sal dit nie die speellys haal nie.”

MRK kla oor aangehoudenes in Limpopo

Die Menseregtekommissie, MRK, sê verdagtes wat by die Maake-polisiestasie buite Tzaneen in Limpopo aangehou word, se reg tot ‘n gesonde omgewing word geskend, het RSG berig.

Een-en-vyftig verhoorafwagtende gevangenes word volgens berigte aangehou sonder enige toegang tot water en sanitasie.

‘n Bron by die polisiestasie sê daar is nou al vir meer as ‘n week watertekorte. ‘n Woordvoerder van die kommissie, Victor Mavhidula sê hulle sal die polisiestasie besoek om te kyk watter gebeurlikheidsplanne die bestuur in werking gestel het, en hoe die gevangenes gehelp kan word.

Hy sê so ‘n situasie kan baie siektes tot gevolg hê.

Rasse-oorlog dreig in Johannesburg oor huise

Die onluste wat Newclare sedert Maandag teister, is ‘n rasse-oorlog in die kleine tussen swartes en bruines.

Inwoners is al vir jare in mekaar se hare. “Die regering bou huise wat vir ons [swartes] bestem is en dan voor die huise klaar is, besluit die bruines om in te beweeg en neem die plek vir hulself,” kla ‘n swart inwoner.

Bruines kla weer dat die meeste van die huise gebou word vir swart mense. “Ons wil hê dat hierdie huise voltooi word en dat die onwettige kleurlinge wat daar bly moet uittrek,” het ‘n swart inwoners egter gekla.

“Die ANC wil hê dat ons vir hulle moet stem maar hulle doen nie enigiets vir ons nie,” het ‘n ontstoke bruin inwoner gesê wat anoniem wou bly.

Paul Kruger, ‘n bruinman wat een van die huise beset, sê die wedywering is reeds vir meer as vier jaar aan die gang.

“Die regering sê al jare lank hulle is besig om die behuising aan te spreek, maar niks gebeur nie en ons het besluit om in te beweeg en die huise wat hulle begin bou het reg te maak vir onsself. Maar daarom is die swartes nie gelukkig nie en hulle beweer ons het hulle huise gevat, wat nie waar is nie,” sê Kruger.

“My baba is bedreig … die swartes en ons [bruines] is in ‘n wedywering, as gevolg van hierdie ding. Hulle het geen reg om te kom en te sê ons het hulle huise gevat nie, omdat ons gewerk het en die plekke self reggemaak het, seker gemaak het daar is water,” het hy bygevoeg.

Volgens Kruger, is die huise bedoel vir kleurlinge. “Ek is nie van die Oos-Kaap nie, Ek is hier gebore … die rede waarom ek ingetrek het in die huis, is omdat ek nie ‘n plek gehad het om te bly nie… nou nadat ek klaar gebou is, kom hulle en sê dit is hulle huise …” sê hy.

Daniela Thompson, nog ‘n bewoner van een van die huise, sê sy sal nie uittrek nie. “Ek moes basies die plek bou, dit regmaak, lopende water aanlê en dit leefbaar maak. Niemand kan dan kom en my vertel om te trek nie. Die swartes is mal,” het sy gesê.

Wyk 82 se raadslid sê daar is drie lyste en niemand weet wie veronderstel is om watter huis te kry nie, maar die onwettige inwoners gaan glo binnekort uitgesmyt word.

Sophiatown-polisiestasie se woordvoerder sê die polisie moes die woedende skare met rubberkoeëls verwilder, maar daarna het die betogers verskuif na Claremont, nog ‘n bruin area.

Swart inwoners by Burgersfort maak amok

Inwoners van Gaselepe, buite Burgersfort in Limpopo het amok gemaak nadat skietwerk by ‘n nabygeleë myn na bewering ‘n man se lewe geëis het.

Die polisie sê die slagoffer is na bewering na skietwerk by die Bokoni platinum-myn deur ‘n klip getref, en is op die toneel dood.

Die gemeenskap het minstens een huis aan die brand gesteek.

Die polisie monitor steeds die gebied.

Polisie ontplooi in Johannesburgse gebiede na oproer

Verskeie paaie is Maandag in Ennerdale, Johannesburg gesluit vanweë protesoptrede.

Die polisie moes inderhaas in die gebied ontplooi word nadat rassisme opgevlam het het oor die toewysing van behuising.

Provincial- en James-weg is was vir die grootste deel van die dag gesluit. Motoriste is aangeraai om Lenasia-rylaan as alternatief te gebruik.

Na wat berig word hou die oproer met die behuisingskwessie verband.

Verskeie paaie is ook in Westbury in die stad gesluit nadat oproer in die gebied uitgebreek het en die polisie ontplooi moes word.

‘n Veiligheidswag het ‘n oproermaker doodgeskiet nadat die skare gewelddadig begin raak het.

Die oproerige is vroeër by die Newclare-stasie deur die wag doodgeskiet.

Die Passasierspooragentskap, Prasa het intussen die brandstigting, vandalisme en diefstal van sy eiendom by die Newclare-stasie veroordeel.

Die groep uitvoerende hoof van Prasa, Lucky Montana sê die plundery het plaasgevind onder die dekmantel van ‘n diensleweringbetoging en het niks te doen gehad met die maatskappy nie.

Montana sê hy is onthuts dat ‘n gebou wat deur ‘n Prasa-werknemers gebruik word, na bewering in die teenwoordigheid van die polisie, aan die brand gesteek is.

Metrospoor in Gauteng het treindienste tussen Randfontein en Johannesburg tydelik opgeskort.

Duisende vlug voor ISIS-aanslag

Duisende Siriese Koerde het die grens tussen Sirië en Turkye oorgesteek. Tienduisende burgerlikes stroom na Turkye om die aanslag van die Islamitiese Staat te ontvlug.

’n Aanval deur die Islamitiese­ Staat op Irakse­ basisse in twee westelike dorpe het gister­ die lewens­ van minstens­ 17 lede van die veiligheidsmagte­ en 40 jihadi’s geëis.

Die aanvalle het op basisse­ in Heet en Ramadi­ plaasgevind­.

Twintig IS-aanvallers­ is in elk van die twee onderskeie­ aanvalle­ dood. Teen druktyd het vyf jihadi’­s nog skuilgehou­ in ’n gebou in Heet, maar die aanval op Ramadi is met welslae afgeweer

Honderde Siriese Koerde het ook uit die dorp Kobane naby die Turkse grens gevlug, te midde van aanduidings dat vegters van die Islamitiese Staat besig is om die dorp oor te neem.

Vragmotors het burgerlikes uit die dorp ontruim en ambulanse is gebruik om gewonde soldate te vervoer.

Twee vlae van die Islamitiese Staat wapper aan die oostelike buitewyke van Kobane, drie weke nadat die rebelle die dorp onder beleg geplaas het.

Amerikaanse lugaanvalle op die dorp kon nie die Islamitiese Staat se dryfkrag stuit nie.

Die sekretaris-generaal van die VN, Ban Ki-Moon het ISIS se aanslag skerp veroordeel en gesê dit is “barbaars”.

Spertyd vir oproer in Hong Kong kom nader

Te midde van ’n waarskuwing oor “ernstige gevolge vir openbare veiligheid” deur die Hongkongse regering en ’n naderende spertyd om die betogings te staak, het betogergetalle op straat afgeneem, maar is dit onseker of hulle aan die oproep gehoor gegee het of bloot asem skep voor hernude protesaksie.

Op die vasteland het die Kommunistiese Party se mondstuk, die People’s Daily, in ’n hoofartikel gesê dat Hongkong se beeld as beheerste stad reeds deur die agt dag lange protes vernietig is, het AFP berig.

Personeel van die universiteit het by studente gepleit om huiswaarts te keer nadat die beleërde leier, Leung Tsjoen-jing, aangedui het dat die regering vasbeslote is om sosiale orde te herstel. Hy het spesifiek verwys na die staatsdienspersoneel wat toegang tot die sentrale regeringskantore moet verkry om vandag te kan voortgaan om dienste aan die publiek te lewer.

Leung, wat twee jaar gelede met 689 stemme uit slegs 1 200 lede van ’n pro-Beijing-komitee verkies is, het op onheilspellende wyse gewaarsku dat die voortduur van huidige betogings ernstige gevolge vir die openbare veiligheid en sosiale orde mag inhou.

Tienduisende betogers het egter Saterdagaand die grootste byeenkoms nog bygewoon en die etlikes wat Sondag terug op straat was, het aangedui dat hulle geensins van voorneme is om op te gee nie.

“Ons veg vir ons beginsels en universele stemreg,” het studente gesê. “Die regering het nog glad nie op enige van die eise vir burgerlike nominasies gereageer nie, maar eis net dat ons moet onttrek.” Die betogers eis die reg om kandidate vir die volgende leiersverkiesing in 2017 te mag nomineer.

Daarenteen dring die kommunistiese regering van China, wat in 1997 weer soewereiniteit oor Hongkong van Brittanje oorgeneem het, daarop aan dat slegs voorafgoedgekeurde kandidate in die verkiesing mag staan.

Studenteleiers en die regering het aangedui dat hulle bereid is om in gesprek te tree, maar albei dring op sekere voorwaardes aan en intussen het ver­skeie botsings, veral in die digbevolkte Kowloon-distrik, plaasgevind.

Geweld het ook opnuut in die vroeë oggendure Sondag in die Mongkok-distrik opgevlam toe die onlustepolisie knuppels en pepersproei gebruik het om betogers wat hulle van samewerking met bendelede beskuldig het, in toom te hou.

Sedert die oproer verlede Sondag begin het, het 165 beseerdes reeds in hospitale beland en ly plaaslike ondernemings ook erg onder die oproer.

Namibiese visbedryf in opstand

Honderde werkers van vismaatskappye het Vrydag in Walvisbaai aan ’n massa-protesaksie deel­geneem teen wat hulle as die miskenning van hul arbeids- en menseregte beskou, het die Republikein berig.

Dié betoging volg kort op die hakke van ’n soortgelyke protesaksie verlede week toe viswerkers grond van die munisipaliteit van Walvisbaai geëis het sodat hul werkgewers vir hulle woonhuise kan bou.

Vrydag se betoging het onder leiding van die vakbonde vir die visbedryf (NFI) en vissermanne, die FWU, plaasgevind.

Bepalings in die Arbeidswet van 2007 waarin die visbedryf van sekere sleutelbepalings uitgesluit word, veral ten opsigte van diensvoorwaardes en oortydbetaling, is die kern van die viswerkers se hernieude eise aan die regering.

“Dit is hoog tyd dat die Namibiese regering aandag aan ons noodkrete gee, want ons kan nie langer toelaat om deur die kapitalistiese stelsel misbruik te word wat net op maksimum winste ingestel is nie,” lui ’n petisie wat die betogers Vrydag aan die minister van arbeid en maat­skaplike welsyn, me. Doreen Sioka, gestuur het.

Die klagskrif is aan die voorsitter van die konfederasie van visverenigings, mnr. Matti Amukwa, en die plaaslike hoof van die ministerie van arbeid oorhandig.

Volgens die brief aan die minister het daar nog niks gekom van ’n soortgelyke skrywe wat op 14 Augustus deur die vakbonde aan die minister gerig is nie.

“Ons as seelui ly geruime tyd reeds weens ons diensvoorwaardes, wat skokkend is om die minste daarvan te sê, aangesien ons oor baie jare deur ons werkgewers uitgebuit word om net vir ’n vis-kommissie sonder oortyd te werk, sodat ons werkgewers aansienlike winste kan maak,” lui die petisie.

Hulle eis ook dat die minister van arbeid die bepalings van die arbeidswet soos vervat in artikels 15, 16, 17 en 19 sonder verwyl op die visbedryf van toepassing maak. Hulle eis ook dat die Namibiese regering die internasionale konvensie oor seelui bekragtig sodat hierdie werkers se diensvoorwaardes en voordele aan die res van die wêreld gelyk gestel kan word.

Me. Siyoka word in die klagskrif 14 dae tyd gegun om aan hul eise te voldoen.

Ramaphosa, Fransman sit keel op oor uitsettings

Adjunkpresident Cyril Ramaphosa het die voorsitter van die ANC in die Wes-Kaap ondersteun oor sy teenkanting teen die uitsetting van plaaswerkers.

Ramaphosa en die voorsitter Marius Fransman, het Sondag plaasgemeenskappe besoek tydens ‘n deur-tot-deur veldtog op Mbekweni in die Paarl.

Ramaphosa het ‘n beroep gedoen op boere wat na bewering betrokke is by die uitsetting van plaaswerkers in die Boland, om dit te staak.

Hy het aan die SABC gesê dit strook nie met die rol wat boere veronderstel is om te speel nie. Hy sê boere moet die hervorming van die gemeenskap en plaaswerkers ondersteun.

Ramaphosa sê hy sal by enige proses betrokke raak om die onaanvaarbare uitsettings te keer.

Fransman het ‘n beroep gedoen op ‘n moratorium op uitsettings om die “massa-uitsetting” van plaaswerkers in die Boland te keer.

Fransman sê daar is ‘n massa-uitsettingstrategie aan die gang weens die minister se fokus op integrasie en eienaarskap tussen boere en plaaswerkers.

Hy sê ‘n moratorium moet geld hangende die uitslag van wetgewing.

ANC in Gauteng staan sterk teen e-tol

Die ANC se Gautengse provinsiale konferensie het vroeër in Pretoria ten einde geloop waar die e-tolstelsel onder meer bespreek is.

Afgevaardigdes het hul teenkanting teen die huidige formaat van die stelsel uitgespreek.

Volgens die afgevaardigdes is dit te duur en behoort ‘n brandstofheffing, wat geadministreer sal word deur SAID, die Inkomstediens, dit befonds.

Die ANC in Gauteng beplan om sy teenkanting teen die e-tolstelsel aan die hersieningspaneel oor die aangeleentheid, oor te dra.

Die provinsiale sekretaris, Hope Papo sê hulle wil voorleggings aan die paneel doen wat deur die Gautengse Premier, David Makhura aangestel is.