vakbonde – praag.co.za

Cosatu sê regering moet ophou inmeng in pensioene

Die president van Cosatu, S’dumo Dlamini het die regering gewaarsku om nie in te meng in die bestuur van staatsdiens-pensioenfondse nie, het RSG berig.

Hy het by die opening van die vakbondfederasie se twaalfde nasionale kongres in Midrand gesê, dreigemente om beleid oor aftrede en pensioene te verander, het tot ‘n groot aantal bedankings in die staatsdiens gelei.

Dlamini het selfs gedreig dat Cosatu nié die ANC in aanstaande jaar se munisipale verkiesings sal steun tensy die regering ophou inmeng in werkers se pensioenfondse nie.

Intussen sê President Jacob Zuma die vakbondfederasie moet uitstyg bó sy huidige uitdagings en in belang van die werkers eenheid voorop stel.

Zuma het gisteraand Cosatu se kongres toegespreek, nadat sy toespraak vroeër weens administratiewe kwessies uitgestel moes word.

Zuma sê vakbonde wat aan die federasie behoort moet alles moontlik doen om Cosatu se eenheid te beskerm sodat die federasie die kragtige vegter kan wees wat hy sedert sy stigting in 1985 was.

Vroeër is vyf van Cosatu se ses bestuurslede, insluitend die president S’dumo Dlamini, onbestrede in hulle poste herkies.

Daar sal slegs vir ‘n adjunk-hoofsekretaris gestem moet word. Die kongres duur tot Donderdag.

SARK ruk op teen korrupsie

Die Suid-Afrikaanse Raad van Kerke hou Woensdag optogte teen korrupsie landwyd.

Die SARK het lede van die publiek aangemoedig om ook hul ontevredenheid te lug.

Die raad sê kerke het ‘n morele verpligting om diegene wat skuldig bevind word aan korrupsie verantwoordbaar te hou.

Die president van die SARK, Biskop Sipho Siwa sal deel wees van die optog na die Unie-gebou in Pretoria en die Anglikaanse Aartsbiskop, Thabo Makgoba sal aan die Kaapse been deelneem.

Intussen sê die Koalisie teen Korrupsie meer as 200 burgerlike groepe, godsdiensorganisasies en sommige vakbonde sal aan die optogte deelneem.

Die voormalige hoofsekretaris van Cosatu, Zwelinzima Vavi, het vroeër gesê meer as 300 maatskappye en 800 indiwidue het reeds hulle steun aan die optog toegesê.

Nedlac het toestemming aan NUMSA geweier om aan die optogte deel te neem.

Kommer dat Cosatu-kongres tot geweld sal lei

Die president van Cosatu, Sidumo Dlamini het ‘n beroep op afgevaardigdes by die Spesiale Nasionale Kongres in Midrand gedoen onopgeloste kwessies met omsigtigheid te benader.

Die tweedaagse kongres het laat Maandagaand verdaag nadat die netelige kwessies van akkreditasie en die sakelys ná ure-lange debat afgehandel is.

Sommige vakbonde wat simpatiek staan teenoor die geskorste hoofsekretaris, Zwelinzima Vavi het egter die kongres vroeg verlaat.

Hulle het aan verslaggewers gesê dat hulle nie glo die kongres enigsins vrugbaar sal wees nie. Die Vavi- en Numsa-faksie is op die gebied van akkreditasie en agenda met stemme verslaan.

Cosatu se spesiale nasionale kongres het die sakelys vir die kongres aanvaar en sal dit vandag bekend maak.

Die uitslag van die stemmery is deur die Onafhanklike Verkiesingskommissie bekend gemaak.

Vakbonde wat NUMSA en Zwelinzima Vavi simpatiek gesind is, wou nie die akkreditasie aanvaar totdat die nuwe metaalwerkersvakbond LIMUSA en tweede adjunkpresident, Zingiswa Losi daarvan uitgesluit is nie.

Verrigtinge hervat om nege-uur vanoggend.

Die adjunk-hoofsekretaris van Numsa, Karl Cloete, het dié vakbond se kommer uitgespreek oor, wat hy genoem het, die militarisering van Cosatu se spesiale nasionale kongres in Midrand.

Hy het aan die media gesê Numsa se leierskorps het verneem Cosatu beplan om met geweld teen afgevaardigdes van die agt rebelle-vakbonde op te tree.

Dié vakbonde, wat Numsa en die geskorste hoofsekretaris van Cosatu, Zwelinzima Vavi, steun, wou die Numsa- en Vavi-kwessies op die kongres se agenda plaas sodat hulle skorsings opgehef en hulle na die vakverbond kan terugkeer.

Zuma onder druk om Marikana-verslag te openbaar

President Jacob Zuma moet binne 30 dae reageer op ’n aansoek dat die Marikana-verslag openbaar gemaak moet word.

Dit nadat drie burgerlike organisasies – die Marikana Support-veldtog, die Right2Know-veldtog en die Suid-Afrikaanse Historiese Argiewe – Vrydag ingevolge die Wet op die Bevordering van Toegang tot Inligting ’n aansoek by die presidensie ingedien het.

Hulle eis dat Zuma binne 30 dae op hulle aansoek reageer.

Regsverteenwoordigers wat beseerde mynwerkers van die Marikanaskietery in 2012 verteenwoordig, het bevestig dat hulle opdrag gekry het om ‘n hofbevel te bekom om Jacob Zuma te dwing om die verslag van die Farlamkommissie vry te stel.

Zuma het verlede week gesê hy oorweeg steeds die verslag en gesê daarom sal dit nie binnekort vrygestel kan word nie.

‘n Prokureur, Andries Nkome, sê die presidensie het nie gehoor gegee aan ‘n versoek om die verslag teen die naweek bekend te maak nie.

Volgens hom voel hulle kliënte dat sekere indiwidue wat in die verslag bygekom word, deur die president beskerm word.

Hulle beweer ook dat daar gerugte is dat die Nasionale Polisiekommissaris ‘n aanbod gekry het om haar amp te ontruim, en dat die provinsiale kommissaris in Noordwes aan die einde van die maand gaan aftree.

Nkome sê dit skep die indruk dat die presidensie wil seker maak dat diegene wat die sondebokke is, eers na ander poste verskuif word voordat die verslag bekendgemaak word.

Staat en vakbonde kom ooreen oor verhogings

Staatsdiensvakbonde en die regering het ‘n ooreenkoms bereik om salarisse met sewe persent te verhoog.

Reuters berig dat die ooreenkoms ‘n staking deur sowat 1,3 miljoen staatsamptenare afgeweer het.

Vakbonde wat by Cosatu ingelyf is, het aanvanklik ‘n verhoging van 15% geëis, maar dit later gedurende uitgerekte samesprekings na tien persent verminder.

Staatsamptenare sal ook verbeterde behuising- en mediese toelae ontvang.

Die Staat het vroeër aangedui dat hy nie ‘n algemene verhoging van tien persent vir staatsamptenare kan bekostig nie en by sy aanbod van 5,8% gehou.

Daar word reeds 400 miljard rand aan die salarisse van staatsamptenare uitgegee.

Duisende lede van sewe Cosatu-geaffilieerde staatsdiensvakbonde het vroeër die week in Pretoria betoog en gedreig met ’n landwye staking as daar nie aan hul eise gehoor gegee word nie.

Die hoofsekretaris van die staatsdiens se koördinerende bedingingsraad, Frikkie de Bruin sê die samesprekings was moeilik en dat dit die beste uitslag is waarvoor gehoop kon word.

Cosatu steier sonder Numsa

Die vakbondfederasie Cosatu, is op sy knieë te midde van gerugte dat die omstrede voorsitter, Zwelinzima Vavi, sy bedanking ingedien het.

Vroeër is ook berig dat Cosatu finansieel diep in die moeilikheid is en sekere bedrywighede sal moet sluit. Vavi sê Cosatu loop die risiko om binnekort sy onafhanklikheid te verloor.

Vavi het Sondag tydens ‘n mediakonferensie egter gesê hy gaan nie bedank nie, en het die komitee uitgedaag om hom af te dank.

Dié stelling kom voor ‘n vergadering van die vakbondfederasie se uitvoerende komitee vandag om oor Vavi se lot te beslis.

Die vakbond se adjunk-hoofsekretaris, Carl Cloete sê Vavi moet deur ‘n verkiesingskonferensie vervang word, aangesien sy ampstermyn eers in September 2016 verstryk. Cloete sê Vavi het ‘n mandaat ontvang van afgevaardigdes wat vir hom gestem het.

Vavi het intussen bevestig dat hy nie die vergadering sal bywoon nie.

Die metaalwerkersvakbond, Numsa sê die hoofsekretaris van Cosatu hoef nie te bedank nie.

Vavi sê die skorsing van die metaalwerkersvakbond, Numsa, het ‘n negatiewe invloed op Cosatu se finansies en sy werknemers moes die afgelope twee maande uit die organisasie se politieke fonds betaal word.

Hy sê dié fonds kan binnekort uitgeput wees.

Numsa het maandeliks sowat elf miljoen rand tot Cosatu se koffers bygedra.

Cosatu staar groter krisis in die gesig

Die vakbondfederasie Cosatu is in ‘n krisis gedompel nadat nege vakbonde wat by Cosatu geaffilieer is hul sentrale uitvoerende komitee as wetteloos bestempel het.

Die vakbonde het ‘n gesamentlike mediakonferensie gehou om die krisis wat voor die algemene verkiesing in Mei vir eers bygelê is, en nou weer opgevlam het, uit te stippel.

Die vakbonde, waaronder die beleërde Numsa, het gesê dat hulle alles in die stryd sal werp om te keer dat die vakbond Numsa Vrydag tydens ‘n vergadering van die sentrale uitvoerende komitee uit Cosatu geskors word.

Die dissiplinêre verhoor teen voormalige hoofsekretaris Zwelinzima Vavi sal volgens bronne ook Vrydag op die agenda wees.

Agt vakbonde sê hulle steun Numsa se pogings vir ‘n hofinterdik om die vergadering te keer.

Hulle het ook gedreig dat hulle pogings gaan laat herleef om Cosatu deur regstappe te dwing om ‘n spesiale nasionale kongres te hou.

Namibiese visbedryf in opstand

Honderde werkers van vismaatskappye het Vrydag in Walvisbaai aan ’n massa-protesaksie deelgeneem teen wat hulle as die miskenning van hul arbeids- en menseregte beskou, het die Republikein berig.

Dié betoging volg kort op die hakke van ’n soortgelyke protesaksie verlede week toe viswerkers grond van die munisipaliteit van Walvisbaai geëis het sodat hul werkgewers vir hulle woonhuise kan bou.

Vrydag se betoging het onder leiding van die vakbonde vir die visbedryf (NFI) en vissermanne, die FWU, plaasgevind.

Bepalings in die Arbeidswet van 2007 waarin die visbedryf van sekere sleutelbepalings uitgesluit word, veral ten opsigte van diensvoorwaardes en oortydbetaling, is die kern van die viswerkers se hernieude eise aan die regering.

“Dit is hoog tyd dat die Namibiese regering aandag aan ons noodkrete gee, want ons kan nie langer toelaat om deur die kapitalistiese stelsel misbruik te word wat net op maksimum winste ingestel is nie,” lui ’n petisie wat die betogers Vrydag aan die minister van arbeid en maatskaplike welsyn, me. Doreen Sioka, gestuur het.

Die klagskrif is aan die voorsitter van die konfederasie van visverenigings, mnr. Matti Amukwa, en die plaaslike hoof van die ministerie van arbeid oorhandig.

Volgens die brief aan die minister het daar nog niks gekom van ’n soortgelyke skrywe wat op 14 Augustus deur die vakbonde aan die minister gerig is nie.

“Ons as seelui ly geruime tyd reeds weens ons diensvoorwaardes, wat skokkend is om die minste daarvan te sê, aangesien ons oor baie jare deur ons werkgewers uitgebuit word om net vir ’n vis-kommissie sonder oortyd te werk, sodat ons werkgewers aansienlike winste kan maak,” lui die petisie.

Hulle eis ook dat die minister van arbeid die bepalings van die arbeidswet soos vervat in artikels 15, 16, 17 en 19 sonder verwyl op die visbedryf van toepassing maak. Hulle eis ook dat die Namibiese regering die internasionale konvensie oor seelui bekragtig sodat hierdie werkers se diensvoorwaardes en voordele aan die res van die wêreld gelyk gestel kan word.

Me. Siyoka word in die klagskrif 14 dae tyd gegun om aan hul eise te voldoen.

Rentekoerse dalk onveranderd uit vrees vir vakbonde

Die Reserwebank sal na verwagting rentekoerse dieselfde hou op Donderdag se beleidsvergadering van die monetêre komitee.

Volgens Reuters meen verskeie ekonome dat die stygings dalk later vanjaar aangekondig mag word aangesien inflasiedruk kommerwekkend is.

Hulle meen ‘n verhoging in rentekoerse voor die verkiesing sal invloedryke vakbondvennote van die ANC vervreem en die drieparty-alliansie daardeur verswak.

Die algemene verkiesing vind op 7 Mei plaas.

Die Reserwebank het vroeër die maand stappe gedoen om markverwagtinge van skerp rentekoersverhogings te bestuur na ‘n verhoging in Januarie, en gesê hy sal die beleid stadiger verskerp om die druk op die wankelende ekonomie te verlig.

Drie-en-twintig van die 30 ekonome verwag dat die Reserwebank sy repokoers op 5,5 persent sal laat.

Numsa sluit by platinumstaking aan

Die twee maande lange staking in die platinumbedryf duur steeds voort nadat onderhandelings op ‘n dooie punt uitgeloop het.

Die stakende mynwerkers moes reeds vier miljard rand aan verlore inkomste opdok, terwyl mynmaatskappye al sowat nege miljard rand verloor het.

Intussen het die Metaalwerkersvakbond, Numsa, gesê sy eendaagse staking wat vir Woensdag beplan is, gaan ook voort.

Die stakings wil die werkloosheidprobleem onder jong mense belig.

Die adjunk-hoofsekretaris van die vakbond, Karl Cloete, sê sowat halfmiljoen mense sal na verwagting landwyd aan die staking deelneem.

Numsa het tydens die spesiale nasionale kongres in Desember verlede jaar besluit om nie die ANC te ondersteun of sy verkiesingsveldtog te borg nie.

Hulle het ook ‘n beroep op Cosatu gedoen om uit die drieledige alliansie met die ANC en die Suid-Afrikaanse Kommunistiese Party te onttrek.

Cloete het verlede week ‘n dokument aan Cosatu oorhandig waarin hulle verduidelik waarom hulle nie geskors behoort te word uit die vakbondfederasie oor die besluit nie.

Cloete sê dat Cosatu, ANC en SAKP-leiers wil sektore waar Numsa verteenwoordig is, met ‘n ander unie troef. Hy het gesê daar is ‘n plan om nog ‘n metaalwerkersunie tot stand te bring.

“Cosatu weet daar moet ‘n metaalwerkers [unie] binne die federasie wees as Numsa geskors word.”

Motorbedryf, goudmyne staak

Stakende werkers in die motorbedryf sal vandag ‘n optog hou na die kantore van die vereniging van motorvervaardigers, NAAMSA, in Pretoria.

‘n Woordvoerder van NUMSA, Castro Ngobese, sê hulle sal ‘n memorandum met eise aan die Werkgewersvereniging van Motorvervaardigers oorhandig. Die staking in die motorbedryf is nou in sy derde week.

Werkgewers bied ‘n tien persent verhoging aan, wat deur die vakbond verwerp is. Die staking het reeds ontwrigting veroorsaak by sewe van die land se vernaamste voertuigvervaardigingsaanlegte.

By die Volkswagen-aanleg op Uitenhage naby Port Elizabeth het werkers onderneem om nie hulle salariseise te laat vaar nie.

Dit volg te midde van meningsverskille oor die staking in die motorbedryf. Werkers by die aanleg het gister met streekleiers vergader oor of hulle die staking moet aflas of nie.

‘n Woordvoerder van NUMSA, Phumzile Nodongwe, sê verskillende menings tydens stakings is normaal, en hulle sal probeer om dit eerder te bestuur en nie toelaat dat dit eenheid in die vakbond ondermyn nie.

Vandag se staking in die goudmynbedryf kan die land meer as 350 miljoen rand per dag kos aan verlore produksie. Dit is volgens berekenings wat gegrond is op die huidige goudprys. Ekonome beraam dat meer as 700 kilogram goudproduksie per dag verlore sal gaan.

Die National Union of Mineworkers het vroeër gesê 80 000 van sy lede in die goudbedryf is gereed om van vandag af te begin staak. Die NUM is die eerste mynvakbond wat vanjaar oor salarisse begin staak.

Vakbondlede het gisteraand voor die nagskof sou begin massavergaderings gehou. – RSG

Vakbonde weier om salariseise aan te pas

Die Kamer van Mynwese sê dit is die eerste keer dat daar ‘n situasie bestaan waar vakbonde nie bereid is om hulle eise vir ‘n salarisverhoging te wysig nie.

Geen ooreenkoms oor werkgewers in die goudmynbedryf se finale aanbod kon tot dusver bereik word nie. Werkgewers het dit onomwonde gestel dat hulle nié enige salarisverhogings hoër as 6,5 persent gaan aanbied nie.

Hulle plaas die blaam vir die huidige stand van sake op die tweespalt tussen vakbonde.

Werkgewers sê ook dat hulle nie afsonderlike ooreenkomste met individuele vakbonde gaan beklink nie.

Goudmynwerkers dreig om aanstaande week, selfs so vroeg as Sondag, met ‘n beskermde staking te begin.

Donderdag het goudaandele op die JSE skerp gedaal en ekonome het gewaarsku dat dit die bedryf ernstig kan skaad.

Intussen duur stakings in die voertuigvervaardigings- en konstruksiebedryf steeds voort en petroljoggies en paneelkloppers dreig ook om Maandag te begin staak. – RSG

Onderhandelinge tussen goudprodusente, vakbonde hervat

Salarisonderhandelings tussen vakbonde en goudprodusente hervat vandag voor die Kommissie vir Versoening, Bemiddeling en Arbitrasie.

Vier vakbonde wat mynwerkers verteenwoordig het ‘n geskil verklaar nadat samesprekings met die Kamer van Mynwese verlede maand misluk het.

Die saak is toe na die kommissie verwys. Dit is die derde keer die maand dat die partye voor die kommissie is.

Die goudbedryf bied ‘n salarisverhoging van vyf persent aan, terwyl vakbonde tot 100% eis, afhangende van senioriteit.

Die Kamer van Mynwese sê werkgewers se aanbod is gebaseer op die dalende goudprys en ‘n afname in produktiwiteit.

Die Kamer verteenwoordig goudprodusente wat sowat 140 000 mynwerkers in diens het. – RSG

Staking dreig in steenkoolbedryf

‘n Dreigende staking in die steenkoolbedryf, sal geweldige druk op die land se kragnetwerk plaas.

Die vakbonde, Solidariteit, UASA en die NUM het ‘n geskil met hul werkgewers verklaar en gevra dat loononderhandelinge deur die Kommissie vir Versoening, Bemiddeling en Arbitrasie gehoor word.

Die vakbonde het produsente se hersiene aanbod van 7,5% vir ongeskoolde myners en 7% vir geskoolde myners, verwerp.

Motsamai Motlhamme, die sektor se hoofonderhandelaar, sê hulle moet nog sekere kwessies met die KVBA oor die onderhandelinge besleg.