Kategorie: Nuus

Nazi aan massamoord skuldig bevind

’n Duitse man (94) wat as boekhouer in die Auschwitz-strafkamp gewerk is, is dié week in ’n hof in Lueneburg in Duitsland daaraan skuldig bevind dat hy ’n medepligtige aan die moord van 300 000 mense was.

Hy is tot vier jaar gevangenisstraf gevonnis in wat waarskynlik een van die laaste hofsake oor die Tweede Wêreldoorlog se behandeling van Jode kan wees.

Oskar Groening het egter nie self enigiemand doodgemaak terwyl hy in die Nazi-besette Pole gewerk het nie.

Aanklaers het aangevoer dat deur die geldnote te sorteer afkomstig van treinvragte vol Jode wat by die kamp aangekom het, hy bygedra het om die bewind se “massamoord” te ondersteun.

Groening was 21 jaar oud en volgens sy eie erkenning ’n entoesiastiese Nazi, toe hy in 1942 in die kamp begin werk het.

Die klagtes teen hom hou verband met die tydperk tussen Mei en Julie 1944 toe 137 treine met ongeveer 425 000 Jode van Hongarye in Auschwitz aangekom het. Minstens 300 000 van hulle is glo reguit na die gaskamers gestuur.

China sien Vodacom-groep vir terroriste aan

Vyf Suid-Afrikaners wat in China in hegtenis geneem is, is op pad terug na Suid-Afrika. Drie is direk verwant aan die uitvoerende hoof van Vodacom.

Daar is volgens berigte nog vyf Suid-Afrikaners wat steeds in aanhouding is.

Gift of the Givers sê die toeriste was deel van ‘n groep van 20 wat antieke dele van China “verken” het. Hulle is verlede week in Binne-Mongolië in hegtenis geneem.

Die Chinese owerheid het ingegegryp nadat die toergroep as terroriste uitgewys is omdat hulle ‘n propaganda-film in hulle hotel gekyk het.

Imtiaz Sooliman van Gift of the Givers sê die vyf het gisteraand op ‘n vliegtuig geklim en word vandag in Suid-Afrika terug verwag.

Die Departement van Internasionale Betrekkinge en Samewerking het geen nuwe inligting oor die arrestasie en aanhouding van 10 Suid-Afrikaners in China ontvang nie, maar het gesê dat die amptelike besoek van adjunkpresident Cyril Ramaphosa aan die land is nie op enige manier verbind met die voorval nie.

“Hy was in China, maar sy besoek in China is nie verwant aan die voorval nie. . . Sy besoek daar het niks te doen met die voorval in Mongolië nie,” het woordvoerder Nelson Kgwete aan die uitsaaier 702 gesê.

Gift of the Givers stigter Imtiaz Sooliman het in ‘n verklaring gesê hulle was deel van ‘n 20-sterk toergroep wat in hegtenis geneem is deur Chinese amptenare.

Die toergroep was op ‘n beplande 47-dag reis na die land, bestaande ​​uit 10 Suid-Afrikaners, nege Britse burgers en een Indiër.

“Van die vyf Suid-Afrikaners wat aangehou is, is drie direkte familie van Shameel Joosub, uitvoerende hoof van Vodacom. Salim Aziz Joosub, Shameel se broer, is die uitvoerende hoof van Capital and Financial Brokers.”

Kgwete het bevestig dat die vyf Suid-Afrikaners Vrydag tergverwag word.

Polisie bevestig jongste plaasaanval by Coligny

Polisie in Noordwes het bevestig dat ‘n plaasaanval Woensdag plaasgevind het by Coligny.

Polisiewoordvoerder, Paul Ramaloko, sê meer besonderhede sal volg.
 
OFM News het inligting ontvang dat die verdagtes in hegtenis geneem is tussen Klerksdorp en Potchefstroom.

Ramaloko kon egter nie bevestig dat die arrestasie plaasgevind het nie.

Tweede verdagte van Vrede-plaasaanval vas

‘n Tweede verdagte sal binnekort in die hof verskyn nadat hy gister in hegtenis geneem is in verband met die aanval op ‘n bejaarde egpaar op hul plaas by Vrede, Sondag.

Vrystaatse polisiewoordvoerder, Sam Makhele, sê ‘n 30-jarige man het homself gister op Vrede oorgegee nadat die polisie warm op sy spoor was. Die polisie het ook op ‘n vuurwapen beslag gelê.

Johannes en Rita Kritzinger het Sondag van die kerk op die dorp teruggekeer toe hulle deur twee gewapende mans ingewag is. Hulle het verskeie skietwonde opgedoen.

Intussen het die 39-jarige Paul May Zulu, wat kort na die voorval in hegtenis geneem is, gister in die plaaslike hof op aanklagte van poging tot moord, huisbraak en gewapende roof verskyn.

Die saak is uitgestel tot Maandag wanneer hy na verwagting om regshulp aansoek sal doen. Hy is ‘n oudwerknemer van die Kritzingers.

Oproer in Steelpoort by myne

Die Tubatse plaaslike munisipaliteit sê hy het berigte ontvang dat gewelddadige betogings in die gebied werksaamhede by myne in die Steelpoort-gebied ontwrig, het RSG berig.

‘n Munisipale woordvoerder, Thabiso Mokoena sê die mynwerkers kan nie werk toe gaan nie omdat paaie in die gebied deur betogers versper word.

Hy sê busse en taxi’s word nie toegelaat in die dorpe waar die inwoners betoog nie.

Intussen sê die polisie in Limpopo die 19 betogers wat op Steelpoort in hegtenis geneem is, sal vandag in die Landdroshowe in Burgersfort en Sekhukhune verskyn.

Hulle word aangekla van openbare geweld, brandstigting en kwaadwillige saakbeskadiging.

Betogende inwoners van Mampuru en Phasha in Steelpoort het sedert Sondagaand vyf voertuie aan die brand gesteek.

IMF kritiseer Eurosone-hulppakket aan Grieke

Die Internasionale Monetêre Fonds het die voorwaardes van die finansiële reddingspakket deur die Eurosone aan Griekeland skerp gekritiseer omdat hulle meen die land se skuld sal waarskynlik binne die volgende twee jaar twee keer soveel as die nasionale inkomste styg.

Die IMF sê ook dat die Eurosone nou veel verder sal moet gaan om Griekeland se skuldprobleem voldoende aan te spreek.

Die organisasie is ook krities oor die hervormingsmaatreëls wat op Griekeland afgedwing word en het dit as onrealisties en onvoldoende afgemaak.

Die Griekse parlement het intussen die nuutste maatreëls aanvaar om in aanmerking te kom vir die derde hulppakket.

Van die 300 parlementslede het 229 ten gunste van die besuinigingsmaatreëls gestem, terwyl 64 daarteen gestem en ses buite stemming gebly het.

Die eerste minister, Alexis Tsipras het opposisielede se stemme nodig gehad om die hervormings deur te voer terwyl verskeie lede van sy kabinet teen die voorstelle gestem het.

Van die hervormingsmaatreëls wat die parlement moes aanvaar sluit in pensioenaanpassings, verhogings in belasting op toegevoegde waarde en beperkings op staatsbesteding.

Tsipras het voor die stemmery oor die maatreëls gesê daar is geen alternatief indien Griekeland ‘n algehele finansiële ineenstorting wil voorkom nie.

Die Europese Kommissie het amptelik voorgestel dat `n korttermyn-lening van meer as R90 miljard aan Griekeland gegee word totdat die reddingsboei van die Eurogebied gefinaliseer is.

Dit sal betaal word uit `n fonds waartoe al die 28 lidlande van die Europese Unie bydrae.

Die voorstel is met heftige teenkanting begroet van die lande wat nie die Euro gebruik nie. Lande soos Brittanje, Denemarke, die Tsjeggiese Republiek en ander wat nie deel van die Eurogebied is nie, sê hulle weier om te betaal vir die probleme wat by die Eurogebied hoort.

Die Kommissie sê hy sal wyses probeer vind sodat die EU-lidlande buite die Eurogebied nie waarborge oor die volgende paar weke hoef te verskaf nie.

Magsbalans in Midde-Ooste verander na Iran-ooreenkoms

Die kernooreenkoms wat dié week in Wene deur Iran en ses groot moondhede bereik is, sal waarskynlik die magsbalans in die Midde-Ooste verander.

Ná ‘n dekade van onderhandelinge wat met tye aan die gang was, maar telkens op ‘n dooie punt uitgeloop het, kon onderhandelaars van die Internasionale Atoomenergie-agentskap ‘n strategiese plan onderteken om lig op huidige en toekomstige uitstaande kwessies te werp.

Ingevolge die ooreenkoms sal sanksies opgeskort wat deur Amerika, die Europese Unie en die Verenigde Nasies teen Iran ingestel is. Dit is in ruil vir Irak se instemming tot langtermynbeperkinge op sy kernprogram.

Die ooreenkoms is ‘n groot politieke oorwinning vir sowel pres. Barack Obama van Amerika en Iran se pres. Hassan Rouhani, ‘n pragmatis wat twee jaar gelede verkies is met die belofte om Irak se diplomatieke isolasie te beëindig.

Albei presidente het te staan gekom voor skeptisisme tuis ná dekades van vyandigheid tussen die lande. Die lande het onder meer na mekaar as “die groot Satan” en “’n lid van die spil van boosheid” verwys.

Die finale ooreenkoms in Wene volg ná drie weke van intensiewe onderhandelinge tussen Amerika se minister van buitelandse sake, John Kerry, en Irak se minister van buitelandse sake, Mohammad Javad Zarif.

Westerse diplomate sê ingevolge die finale ooreenkoms het Iran ‘n “terugspring”-meganisme aanvaar waarvolgens sanksies binne 65 dae weer ingestel kan word indien Iran nie die ooreenkoms nakom nie.

‘n Wapen-embargo van die VN sal vir vyf jaar duur en die verbod op die aankoop van missieltegnologie sal vir agt jaar van krag wees.

Teenkanting teen die ooreenkoms van Washington se grootste bondgenoot in die Midde-Ooste, naamlik Israel, was uit die staanspoor te wagte.

“Hierdie ooreenkoms is ‘n geskiedkundige oorgawe deur die Weste aan die ‘spil van boosheid’ onder leiding van Iran,” het Israel se adjunkminister van buitelandse sake, Tzipi Hotovely, in ‘n boodskap op Twitter gesê. “Israel sal alles in sy vermoë doen om te verhoed dat die ooreenkoms bekragtig word.”

Die dramatiese verklaring deur Israel se premier Benjamin Netanyahu voor wêreldleiers in 2012 by die VN se Algemene Vergadering dat Iran binne ‘n jaar ‘n kernbom sal vervaardig, is egter weerspreek deur sy eie geheimediens.

Rosatom ontken dat kerntender toegeken is

Die Russiese staatsenergiekorporasie Rosatom het ontken dat ‘n Suid-Afrikaanse tender in die geheim reeds aan hom toegeken is.

Rosatom se streeksvisepresident, Victor Polikarpof sê dit is net gerugte dat die kernkragtender aan Rusland gegee is.

Polikarpof neem aan ‘n energieberaad in Kaapstad deel.

Die departement van Energie het Dinsdag aangekondig dat die tenderproses vir agt kernreaktors teen die einde van die jaar afgehandel sal wees.

Vyf lande, Rusland, Frankryk, Sjina, die VSA en Suid-Korea ding mee om die kontrak.

Daar is hardnekkige gerugte dat president Jacob Zuma se noue bande met die Russiese president Wladimir Poetin reeds daartoe gelei het dat die transaksie ten gunste van Rosatom beklink is.

Regering appèlleer teen al-Bashir-beslissing

Die regering het hofstukke ingedien om te appèlleer teen die Hooggeregshof in Pretoria se beslissing dat die Soedannese president, Omar al-Bashir nie die land mag verlaat nie.

Die hof het verlede maand aanbeveel dat die Nasionale Direkteur van Openbare Vervolgings dit oorweeg om strafregtelike aanklagte oor die verontagsaming van die hofbevel in te stel.

Die regering voer aan dat Bashir immuniteit as ‘n Afrika-staatshoof geniet. Die regsproses kan glo etlike maande duur.

‘n Voormalige regter in die Konstitusionele Hof, Yvonne Mokgoro, het vroeër gesê sy is steeds geskok oor die regering se klaarblyklike nie-nakoming van ‘n hofbevel oor die al-Bashirkwessie.

Die Pretoriase Hooggeregshof het verlede maand beslis dat die regering se onvermoë om Omar al-Bashir aan te hou, indruis teen die Grondwet en dat die regering die Soedanese leier met sy aankoms in die land in hegtenis moes geneem het.

Mokgoro het die Kader Asmal Menseregtelesing by die Universiteit van die Witwatersrand aangebied.

Duitsland erken Namibiese volksmoord

Of daar ’n formele Duitse verskoning sal wees of nie, is onbekend, maar die federale regering in dié land het uitdruklik erken dat die gruweldade teen die Nama en die Ovaherero wel volksmoord was.

Volgens internasionale media het die Duitse Bundestag president, mnr. Norbert Lammert, Woensdag reeds van volksmoord gepraat, het die Republikein berig.

Hy het dit tydens ’n herinnering aan die slagting van die Duitse koloniale troepe in die voormalige Duits-Suidwes-Afrika gedoen.

“Die oorlog van uitwissing in Namibië tussen 1904-1908 was ’n misdaad en volksmoord,” het Lammert glo gesê.

Dit volg ná afgevaardigdes van die nasate van die volksmoordslagoffers verlede week in Duitsland was vir die oorhandiging van ’n petisie met 2 000 handtekeninge van nie-regeringsorganisasies aan die Duitse regering.

Hoewel die Duitse regering nie amp­telik met die nasate van die volksmoordslagoffers oor hierdie erkenning gekommunikeer het nie, het prof. Phanuel Kaapama, een van die volksmoordkomiteelede, gesê die regering se erkenning kan aan dié petisie toegeskryf word.

Die woordvoerder van die Duitse ministerie van buitelandse sake, mnr. Martin Schaefer, het Vrydag aan verslaggewers in Berlyn gesê dat hierdie kwessie die afgelope jare deel van die gesprekke tussen die federale en Namibiese regerings is.

Toe hy gevra is of daar ’n amptelike verskoning sou wees, het Schäfer slegs vir geduld tot die einde van die onderhandelinge gevra.

Onder wetenskaplikes, wat ook deel vorm van die 2 000 mense wat die petisie onderteken het, bly die term ‘volksmoord’ grootliks onbetwis.

Die twee Ovaherero/Ovambanderu-volksmoordkomitees en dié van die Nama’s sal vandag ’n amptelike nuusverklaring in hierdie verband uitreik.

Volgens opperhoof Tjinaani Maharero van die Tjamuaha-Maharero-koningshuis, het hulle ooreengekom om ’n gesamentlike mediakonferensie oor hul besoeke in die buiteland te hou.

Die Nama-, Ovambanderu- en Ovaherero-volksmoordkomitees was in Duitsland, terwyl die OCD-1904-raad in Londen was om internasionale steun te wen vir hul poging om ten opsigte van reparasies druk op die Duitse regering uit te oefen.