Uncategorized – Bladsy 4

Spioenasie-herrie oor SA se verhouding met Israel, Iran

‘n Spioenasieherrie het losgebars nadat Al Jazeera inligting uitgelek het oor Suid-Afrika se verhouding met Israel en Iran.

In ‘n intelligensieverslag van 128 bladsye, getiteld “Operasionele Doelanalise,” wat deur Suid-Afrikaanse spioene opgestel is, is die profiele van beweerde Iranse netwerke gelys, sowel as die van tuiniers en huiswerkers by die Iranse ambassade.

Dié onthullings kom kort nadat dit rugbaar geraak het dat president Barack Obama ywerig is om ‘n ooreenkoms met Iran te bereik en die Mossad die Israelse premier daarvan beskuldig het dat hy uitsprake maak oor Iran se beweerde kernprogram wat nie deur intelligensieverslae ondersteun word nie.

Right2Know en die DA het die die “buitensporige en onaanvaarbare” geheimsinnigheid van die Suid-Afrikaanse Staatsveiligheidsagentskap (SSA) egter skerp gekritiseer.

Dié groep is skynbaar onbesorg dat buitelandse spioenasie in Suid-Afrika floreer met meer as 140 buitelandse spioene wat in die land bedrywig is.

Al Jazeera, het nogtans die Suid-Afrikaners se gebrek aan geheimhouding ver oortref deur die duisende intelligensiedokumente uit te lap.

Right2Know het dit voorts betreur dat Suid-Afrika se staatsveiligheidstrukture in die toekoms beter beheer oor die vloei van inligting sal uitoefen.

Connie September, voorsitter van die staande komitee oor intelligensie, het gesê die komitee is bekommerd oor die uitlappery van die inligting. Die komitee sal ondersoek instel en “alle betrokke persone sal verantwoordbaar gehou word”.

Mo Shaik, voormalige intelligensiehoof, het gesê dit is ’n verleentheid en owerhede moet alles in hul vermoë doen om die skuldige party vas te trek.

Die doelanalise wys veral op die militêre fokus van Iran. “Die gevorderde vlak van Suid-Afrika se tegnologie in die lugvaartnywerheid, veral in missielstelsels het toenemend ‘n fokuspunt van Iran geword, het ‘n Suid-Afrikaanse spioen vroeër gesê. “Dit word voorsien dat hierdie bedrywe geteiken sal word vir die verkrygingprosesse.”

Suid-Afrikaanse intelligensie-agente het berig dat die Iraniërs ook belangstel in die tegnologie wat gebruik word vir satellietonderskepping, aanlyntoesig en kraakbedrywighede [hacking].

Hulle het ook gesê gereedskap om enkripsiekodes te kraak en beskerming van hul eie geheime aanlyn, was deur die Iraniërs versoek.

Iranse amptenare het die bestuurders van Suid-Afrika se elektroniese onderskeppingsfasiliteit ontmoet by die Nasionale Kommunikasiesentrum in 2005. Iranse afvaardigings het ook glo verskeie ander tegniese fasiliteite, insluitend vervaardigers van onbemande tuie, elektroniese oorlogvoeringstelsels en onderskeppingstegnologie besoek.

Selfs die bloudruk van die Rooivalk-helikopter is deur ‘n buitelandse intelligensiediens gesteel en missielstelsels en intellektuele eiendom het ook in die slag gebly.

Volgens Media24 het die “Suid-Afrikaanse Intelligensiediens Israel gehelp om die omstrede missieldiefstal te probeer toesmeer”. Dit is nie bekend of die planne deur Israel aan Iran oorhandig is nie.

Tom Wheeler, navorsingsgenoot van die Suid-Afrikaanse Instituut vir Internasionale Aangeleenthede, het aan Media24 gesê die inligting wat uitgelek het, is ‘n reuse-verleentheid vir Suid-Afrika. “Dit lê die land se verhoudinge met ’n rits intelligensieagentskappe bloot.”

Suid-Afrika steun die Palestyne, maar werk ook met Israel saam.

Intelligensieagentskappe sal miskien in die toekoms twee keer dink voor hulle by Suid-Afrika betrokke raak uit vrees dat inligting wat hulle met Suid-Afrika deel, nie goed bewaak word nie, het hy gesê.

Die dokumente het intussen onder meer onthul dat daar in 2012 ‘n sameswering was om die voorsitter van die Afrika Unie-kommissie, Nkosazana Dlamini-Zuma te vermoor nadat sy die pos aanvaar het.

Suid-Afrikaanse intelligensie-amptenare is glo op 22 Oktober 2012 oor die bedreiging op Dlamini-Zuma se lewe ingelig. Die inligting is na die ambassade in Addis Abeba oorgedra waar bykomende lyfwagte aan haar hotel toegewys is.

Zuma bevestig wit vrese na ontmoeting met Dooieboommedia

President Jacob Zuma het koerantredakteurs van die dooieboommedia by die Presidensiële Gastehuis in Pretoria ontmoet ter voorbereiding van sy staatsrede.

Dié stap kom te midde van ‘n groeiende ongemak by Afrikaners dat hulle geen politieke verteenwoordiging meer geniet nie en van alle invloed gestroop is, ten spyte van die enorme rol wat Afrikaners steeds speel om die land leefbaar te maak na FW de Klerk se onbesonne oorgawe.

Zuma het dié vrese bevestig. Hy het korte mette gemaak van die gedagte dat blankes ‘n spesiale rol het en gesê alle rasse moet aanvaar dat hulle gelyk is.

Zuma het ook verwys na etniese verskille wat nie geduld sal word nie.

By die Curro Roodeplaat-privaatskool is die rasverdeling onlangs deur swartes gekritiseer. Een van drie klasse, almal Engels, het 6 wit kinders gehad en 12 swartes. Die ander twee was net swart, maar swart ouers is glo woedend omdat daar nie wit kinders in die ander twee klasse is nie.

Zuma het gesê die ANC sal nie swig voor die geweld in Malamulele in Limpopo nie, waar Tsongas beweer dat die Thulamela-munisipaliteit van Vendas teen hulle diskrimineer op grond van etnisiteit.

Zuma het gesê dit sal die Bantoestans laat herleef as die Tsongas se versoek toegestaan word, en daarom het die munispale afbakeningsraad het teen ‘n eie munisipaliteit vir Malamulele beslis.

“Etniese verdelings is nooit iets wat aangemoedig moet word in ons land nie. Om mense op grond van hul stam te verdeel is gevaarlik.”

“Dit is belangrik dat ons die wet nakom. Daar is byvoorbeeld munisipaliteite wat nie volhoubaar is nie en ons werk aan ‘n plan om hulle weer in te deel. Maar die wet kan nie gebruik word om etnisiteit te bevorder nie. Ons land het reeds geweldig daaronder gely.”

Hy het die dooieboomjoernaliste die versekering gegee dat hy nie skuldig is aan enige wanbesteding wat betref uitgawes aan sy privaatwoning op Nkandla nie.

Zuma het gesê hy betaal ‘n verband op die huis, maar niemand skryf daaroor nie. Hy het bygevoeg dat oudpres. PW Botha ‘n “onlewensvatbare” lughawe vir homself by George laat bou het.

Die President het verwys na die EFF wat eis dat hy die geld terugbetaal, maar gesê die ondersoek is nog nie afgehandel nie.

Hy het ook gesê wat betref die Staatsrede verwag hy dat die parlementêre reëls nagekom sal word.

Wonderwerk na boot seun se gesig oopkloof

‘n Seun van Centurion het oorleef nadat ‘n boot bo-oor hom gery en verskeie wonde veroorsaak het.

‘n Rubberboot se stuurvin het die gesig van ‘n jong Centurion-seun Saterdag oopgekloof toe hy in ‘n fratsongeluk onder die boot beland het. Hy het ernstige beserings aan sy gesig en lyf opgedoen, het die Centurion Rekord berig.

“Dit is ‘n wonderwerk dat my kind leef,” het Keanu van der Linde (14) se ma, Sonja, Maandag gesê. “Dit kon soveel erger gewees het.”

Keanu, ‘n leerling aan die Cornwall Hill College, het saam met sy broer Wally (18) en hulle twee neefs in ‘n plaasdam naby Standerton, Mpumalanga, van ‘n rubberboot af gehengel toe die ongeluk gebeur het.

Hulle het tydens die skoolvakansie by hul pa op die plaas gekuier.

“Keanu was in die water besig om die visnette uit te trek, toe die boot skielik na die een kant swaai en bo-oor hom vaar,” het Sonja aan Rekord gesê.

“Wally het dadelik in die water gespring, vir Keanu in die boot getel en ys in ‘n handdoek om sy kop gebind. Hy het met sy broer na die naaste hospitaal gejaag om mediese hulp te kry.”

Die rubberboot se stuurvin het die regterkant van Keanu se gesig oopgekloof en ‘n diep wond van sowat 25cm gelaat. Sy bo- en onderkaak en regterwangbeen is ook gebreek.

Die vin het hom agter sy oor getref en sy aorta met ‘n sentimeter gemis.

Keanu het nog ‘n wond tussen sy oë opgedoen en die motorbootskroef het hom ook verskeie kere op die arm gekap en wonde gelaat.

Sonja sê dit is ‘n wonderwerk dat haar seun nie onherstelbare skade of kopbeserings opgedoen het nie.

“Dit is danksy die Here se genade dat hy die fratsongeluk oorleef het,” het sy gesê.

Keanu sterk sedertdien in die hoësorgeenheid van die Little Company of Mary-hospitaal in Groenkloof aan.

Sonja het almal vir hulle bystand en gebede bedank en sê sy is baie dankbaar teenoor haar seun, Wally, wat kalm en beredeneerd opgetree het terwyl hy sy broer se lewe gered het.

Broers sterf in VSA toe hulle trompop bots

Die dag na Kersdag het in ’n nagmerrie ontaard toe drie Suid-Afrikaners, waarvan twee broers is, in ’n trompop botsing in Suid-Dakota in Amerika was.

Een van hulle, Werner (Shoepie) Swart (33), wat saam met sy vriend gery het, is opslag dood.

Volgens die twee broers, MC (33) en Johan (26) Weldon, se oom, mnr. Hercus Mahoney, het Johan eerste in sy bakkie werk toe gery, terwyl MC en Werner eers ’n ruk ná hom gery het.

Daar word vermoed dat Johan ná sy aankoms terug huis toe gery het om suiker te gaan haal.

MC en Werner het in MC se Dodge Ram-bakkie eers in die dorpie Isabel ontbyt gaan koop.

“Die broers het nie geweet hulle sou mekaar om 7vm daardie oggend weer op die plaaspad tegemoet kom nie,” het mnr. Mahoney gesê.

Hul bakkies het op ’n blinde hoogte trompop gebots.

Dandré Schrambriel, hul stiefbroer het beeste gevoer, rook in die lug gesien en hom daarheen gehaas.

Die bakkie waarin MC en Werner was, het aan die brand geslaan en Dandré het Werner en Johan uit hul bakkies gesleep.

MC is uit sy bakkie geslinger. Sy een skouer is vergruis en sy been, kakebeen en bekken is gebreek en hy is tans aan ’n asemhalingstoestel gekoppel. Johan se een arm, sy bekken en albei bene is gebreek en ’n ribbebeen het sy long deurboor.

Mnr. Mahoney het gesê dat dit sleg gaan met MC en dat hy vier dae gelede ook ’n beroerte-aanval gehad het. “Johan herstel vinnig.”

Die broers is in die waakeenhede van onderskeidelik die Sanford- en St. Alexius-hospitaal.Hul ouers is jare gelede dood en hul stiefpa, mnr. Andries Schambriel, het gehelp om hulle groot te maak.

Mnr. Mahoney het gesê dat die drie mans saam as plaaswerkers op die Lindskov Ranch, ’n groot bees- en saaiboerdery in Suid-Dakota gewerk het.“

Johan het reeds drie jaar daar gewerk, MC meer as ’n jaar en Werner slegs sowat twee maande en toe gebeur dié ramp,” het hy gesê.

Die werkgewer van Lindskov Ranch, mnr. Bryce Lindskov, het sy medelye in ’n brief aan Werner se familie uitgespreek.

Werner se roudiens vind op Vrydag, 9 Januarie om 11vm in die Evangelies Gereformeerde Kerk op Kriel plaas.

Bron: Ridge Times

Bloedige hitte vir dié week voorspel

Die Suid Afrikanse Weerdiens het gewaarsku dat toestande bevorderlik vir die onstaan van wegholveldbrande verwag kan word in dele van die land.

Die verre westelike dele van Noordwes, die sentrale dele van die Noord-Kaap, en die wes en suidelike dele van die Vrystaat kan bloedige hittetoestande te wagte wees.

Dit sal na verwagting vir die volgende sewe dae bloedig warm wees, met die moontlikheid dat ‘n hittegolf aangekondig sal word.

Nog ‘n vragmotor ploeg tussen Kersinkopers in

‘n Vragmotor wat tussen voetgangers in Glasgow, Skotland ingeploeg het, het die dood van ses mense veroorsaak.

Die ongeluk was by George Plein wat Glasgow se grootste inkopiesentrum is, en waar ‘n kermisspeelgrond en ysskaatsbaan ook ingerig is vir die feesseisoen.

Skotse polisie het dit as ‘n ongeluk beskryf, en geen sabotasie word vermoed nie, maar dit is die vyfde ongeluk nadat vier soortgelyke onlangse voorvalle met jihadiste en rasseonluste in Frankryk en die VSA verbind is.

Daar was reeds drie soortgelyke jihadistiese aanvalle in Frankryk in drie dae.

In Nantes is ‘n dosyn mense beseer, waarvan vyf ernstig, nadat ‘n wit afleweringswa Maandagaand by Place Royale, by die Kersmark in mense ingeploeg het.

Agt is ernstig beseer toe die vullisverwyderingslorrie mense in Glasgow omgery het wat besig was om hul Kersinkopies te doen.

‘n Geskokte ooggetuie het twee kinders, waaronder ‘n baba in ‘n stootwaentjie, onder die vragmotor sien beland.

Die vragmotor het vir sowat 300 meter ver deur mense geploeg langs die Gallery vir Moderne Kuns voordat dit teen die Millenium Hotel gebots en tot stilstand gekom het.

Die stadsraad se voertuig het die Millennium-hotel naby Queenstraatstasie in George-plein na middagete getref.

Die polisie in Skotland het gesê dit is te vroeg om die voorval met terreur te verbind, aangesien ‘n ondersoek eers gedoen sal word.

Ooggetuies het gesê die bestuurder het bo-oor die stuurwiel gelê. Hy het moontlik beheer verloor oor die vragmotor.

Een van die ooggetuies het gesê Kersinkopies het regoor die straat gestrooi gelê.

Talle roubeklaers by Korkie-diens verwag

‘n Groot aantal roubeklaers word by die diens van die voormalige biologie-onderwyser van Grey Kollege in Bloemfontein verwag.

Pierre Korkie is verlede naweek in ‘n mislukte ontsettingspoging deur die VSA in Jemen dood tesame met ‘n Amerikaanse aangehoudene.

Die Amerikaanse State Department het intussen in ‘n verklaring gesê hulle was nie daarvan bewus dat ‘n Suid-Afrikaner aangehou word nie.

Yolandé en Pierre is in Mei 2013 in Taiz, Jemen, as gyselaars geneem, maar die ontvoerders het haar in Januarie vanjaar sonder ’n losprys vrygelaat.

Die roudiens vind om 10:00 op Vrydag plaas.

Johan Volsteedt, gewese skoolhoof van Grey Kollege, Pierre Korkie se kollega, sal as spreker by die roudiens optree.

Na verwagting sal heelwat oudkollegas en oudleerlinge die diens bywoon.

Korkie se vrou, Yolandé, het Dinsdag by ‘n mediakonferensie in Johannesburg gesê daar is talle vrae oor haar man se dood, nadat sy oorskot op Waterkloof-lugmagbasis in Pretoria aangekom het.

Korkie word oorleef deur sy vrou Yolandé en die egpaar se kinders, Lize-Marie (15) en Pieter-Ben (17).

Sy twee kinders het tydens die mediakonferensie strak voor hulle uitgestaar.

CIA-marteling ontbloot

Die “skinkbord”, nagebootste teregstellings en slaapversteuring: Dít is van die “meedoënlose, maar ondoeltreffende” marteltegnieke wat die Amerikaanse Intelligensiediens, die CIA, sedert 9/11 op tot 100 terreurverdagtes toegepas het.

Getuienis oor dié martelings is vervat in ’n 500 bladsy lange opsomming van ’n verslag van die senaat se intelligensiekomitee wat Dinsdag uitgereik is.

Die verslag verwys na voorvalle ná die 9/11-aanvalle in 2001 tot 2009.

Die tegnieke was glo baie erger as wat aan die administrasie van oudpres. George W. Bush vertel is.

Die VSA het talle internasionale konvensies en verdrae oortree waarvan hulle ondertekenaars is deur aangehoudenes te martel.

Dit het in die Amerikaanse aanhoudingsentrum Guantánamo Bay in Kuba of geheime CIA-tronke gebeur.

Die voormalige Poolse president Aleksander Kwasniewski het erken dat sy land ‘n geheime gevangenis op sy grondgebied bedryf het waar aangehoudenes gemartel is.

Kwasniewski het voorheen ontken dat Pole gasheer vir ‘n geheime CIA gevangenis was.

Die marteltegnieke het ingesluit om kos fyn te maak en anaal toe te dien. Dit is “die skinkbord” genoem. Aangehoudenes moes ook hoor hul kinders sal aangerand word en hul ma’s sal seksueel aangerand of keelaf gesny word.

Daar was ook watermarteling en slaapversteurning.

Dianne Feinstein, komiteevoorsitter, het gesê die CIA het dikwels foutiewe inligting deur dié martelings verkry, maar dit dikwels nie besef nie.

Die komitee en die CIA is al tien maande lank in ’n stryd gewikkel om groot dele van die verslag van die publiek weg te hou – met die goedkeuring van pres. Barack Obama.

Feinstein se komitee sou die verslag reeds in April uitgereik het, maar moes eers met die Withuis onderhandel oor sekere feite wat om nasionale veiligheidsredes uitgelaat moes word.

Obama het Dinsdag in ’n verklaring gesê die martelings druis teen Amerikaanse waardes in.

“Dit het nie ons stappe teen terreur of ons nasionale veiligheidsbelange gesteun nie. Dit het wel Amerika se statuur in die wêreld se oë verlaag.

“Dit is waarom ek marteling verbied het. Ons doeltreffendste maatreëls teen terreur is om getrou aan ons ideale te bly,” het Obama gesê.

Groenewalds in Kaboel vermoor voor NAVO-skenkerskonferensie

Die moord op die Suid-Afrikaners in Kaboel, Afghanistan, kom enkele dae voor ‘n NAVO-skenkersbyeenkoms in London.

Die nuwe president van die land, Asjraf Ghani, is pas aangewys in die plek van president Karzai en sal vandag na Brussel en Londen reis om samesprekinge met NAVO-amptenare te voer oor skenkings.

Afghanistan is ‘n dwelmuitvoerland. Dwelmuitvoere het dramaties gestyg sedert die VSA die land mbv NAVO aangeval het.

Bronne beweer dat Ghani omgekoop is deur die VSA is nadat hy intussen talle beperkings op NAVO-bedrywighede afgeskaf het.

Die New York Times het verlede week onthul dat Obama ‘n geheime bevel onderteken het om aanvalstroepe in Afghanistan te vermeerder in 2015.

Alhoewel daar beweer word dat die moorde ‘n geteikende selfmoord-bomaanval was, het die Kaboelse polisiehoof sy bedanking direk na die aanval ingedien.

Die 46-jarige Werner Groenewald, sy 17-jarige seun Jean-Pierre en 15-jarige dogter Rodé is Saterdag in die aanval dood.

Groenewald was deel van die Amerikaanse nie-regeringsorganisasie, Partnership in Academics and Development. Sy vrou, ‘n mediese dokter, het die aanval vrygespring.

Hannelie Groenewald het enkele jare gelede in ’n onderhoud met Beeld gesê hulle is die enigste voltallige Suid-Afrikaanse gesin in Kaboel.

Die aanval was ’n dag nadat Hannelie op haar Facebook-blad ’n liedjie aangehaal het: “Life as we know it is going to change soon.”

Die NG gemeente Moreletapark in Pretoria het in Sondag se erediens die familielede sterkte toegebid.

Volgens bronne het die drie ‘n grumoord gesterf gedurende die aanval wat drie uur geduur het. Die slagoffers het glo versmoor terwyl hulle doodgebloei het, het Media24 berig.

Amerikaanse nuusbronne het nie die nasionaliteit van die Groenewalds bekendgemaak nie.

Oscar het nie badkamer, Krejcir nie DSTV nie

Die departement van Korrektiewe Dienste het berigte ontken dat die Paralimpiese atleet, Oscar Pistorius ‘n spesiale badkamer gaan kry.

Die departement van korrektiewe dienste het Sondag ontken dat daar ŉ spesiale badkamer vir Pistorius gebou word in die Kgosi Mampuru-gevangenis in Pretoria.

“Die beplanning en bou van die badkamer en ander algemene instandhouding deur RC Civils-kontrakteurs het ŉ lang tyd gelede al begin,” het Manelisi Wolela, woordvoerder van die departement, gesê.

“Dit is deel van ŉ drie jaar herstel- en instandhoudingsprogram en was veronderstel om al op 31 Mei 2014 klaar te wees – maande voor Oscar skuldig bevind is.”

Volgens Wolela maak Pistorius van ŉ gemeenskaplike badkamer gebruik. City Press het Sondag berig dat die tronkowerhede alles in hulle mag doen om te verseker dat Pistorius goed versorg word terwyl hy in die tronk is.

City Press het ook berig dat Pistorius na die tronk se B-seksie naby die hospitaalvleuel geskuif is. Die Tsjeggiese voortvlugtige Radovan Krejcir is glo een van Pistorius se bure. Volgens die berig het Krejcir glo sy eie televisie met DSTV in sy sel.

Die owerhede het dit ontken.

Pistorius is van sy vorige sel in die EF-seksie verskuif nadat die selle oorstroom het. Dit was glo die werk van Etienne Kabila, wat verhoorafwagtend is nadat hy glo sy halfbroer pres. Joseph Kabila van die DRK probeer omverwerp het.

Pistorius is op 21 Oktober tot vyf jaar tronkstraf gevonnis nadat hy aan strafbare manslag skuldig bevind is. Pistorius het sy vriendin, Reeva Steenkamp, op 14 Februarie 2013 doodgeskiet.

Die Nasionale Vervolgingsgesag het verlede week sy aansoek om verlof tot appèl ingedien teen Pistorius se skuldigbevinding en vonnis.

Pistorius se regspan het aangedui dat hulle die aansoek gaan teenstaan.

EFF ontken aanranding, vuurwapen by Malema

Julius Malema, leier van die Ekonomiese Vryheidsvegters (EFF), het nie ŉ veiligheidswag aangerand of ŉ vuurwapen op hom gerig nie, het die party Maandag gesê.

Mbuyiseni Ndlozi, woordvoerder van die EFF, het gesê die openbare mening het Malema egter reeds “skuldig bevind” en probeer hom “intimideer”.

Volgens die polisie in Limpopo word drie aanklagte teen Malema ondersoek na ŉ beweerde konfrontasie met ŉ veiligheidswag. “Malema word ondersoek vir die rig van ŉ vuurwapen, aanranding en kwaadwillige saakbeskadiging,” het kol. Ronel Otto, woordvoerder van die polisie, gesê.

Malema het glo in ŉ argument betrokke geraak met ŉ veiligheidswag by die Peter Mokaba-stadion tydens ‘n rielsaamtrek in Polokwane waarna hy glo ŉ vuurwapen op die veiligheidswag gerig het.

“Malema en sy lyfwagte het glo die stadion probeer verlaat deur ŉ hek wat nie as ŉ uitgang gebruik word nie. Hulle het glo in ŉ argument met die veiligheidswag betrokke geraak waarna Malema glo ŉ vuurwapen op die veiligheidswag gerig het.”

Volgens Otto het hulle die veiligheidswag glo teen die hek vasgedruk. Hulle het die hek glo oop forseer en dit in die proses beskadig.

ŉ Klag van aanranding is ook vroeër teen Malema ingedien na ŉ voorval by ŉ kitskosrestaurant in Tzaneen wat op kringtelevisiekamera vasgelê is. Malema het glo ŉ man rondgestamp en gevloek.

Veiligheidsraad sit oor Israeliese besetting

Palestynse betogers het Dinsdag brandende motorbande opgestapel tydens ’n betoging teen die onteiening van Palestynse grond, het AFP berig.

Die stuk grond is deur Israel in die Kafr Qaddum-nedersetting naby Nablus in die besette Wesoewer-gebied teruggevat.

Onderhandelinge tussen Israel en Palestina om ’n blywende skikking oor Gaza te bereik, sal eers na die middel van November hervat word.

Dit was aanvanklik vir Dinsdag geskeduleer.

Die VN Veiligheidsraad sal nog dié week ‘n noodvergadering hou oor die spanning tussen Israel en die Palestyne in Oos-Jerusalem as gevolg van Israel se plan om meer nedersettings te bou.

Die vergadering is geskeduleer vir Woensdagmiddag, in reaksie op ‘n versoek deur Jordanië aan Argentinië se VN-ambassadeur Maria Cristina Perceval, roterende voorsitter van Veiligheidsraad hierdie maand.

Jordanië, die enigste Arabiese land op die raad van 15 lande, het Palestynse klagtes oor die gevaarlik stygende spanning in Oos-Jerusalem geopper.

Die e-posversoek is gesien deur Reuters.

Bloemfontein die vetste, Pretoria die luiste

In Suid-Afrika was daar ‘n styging van 40% in die verkope van kitsetes, lekkers en kitsnoedels tussen 2005 en 2010.

Dit is een van die bevindinge van die 2014 Vitality indeks ObeCity wat Dinsdag vrygestel is.

“Die grootste deel van supermarkvloeroppervlakte word gewy aan verwerkte voedsel,” het die indeks aangetoon.

Volgens die indeks het kitskos ‘n groot rol gespeel in die toename in gewig in die land. “Suid-Afrika is een van McDonald’s uitbreidingsuksesverhale, en breek rekords met 30 winkels wat binne in 23 maande oopgemaak het,” het die indeks uitgewys. “Vandag bedryf die maatskappy meer as 200 restaurante regoor die land.”

In Rusland het daar pas net soveel McDonald’s restaurante toegemaak weens swak gehalte bestandele wat in die kos gevind is deur gesondheidsinspekteurs.

Volgens die indeks, besoek “een van die twee Suid-Afrikaanse volwassenes ‘n Kentucky Fried Chicken [KFC] ten minste een keer per maand”.

Dit is sowat 12 miljoen mense bo die ouderdom van 15. KFC beplan 850 koswinkels in die land teen 2015.

Te min oefening het ‘n impak op vetsug. Die indeks het bevind dat mense in Pretoria die minste oefen, met Johannesburg kort op hul hakke. Kaapstad is glo die mees aktiewe stad.

Bloemfontein is die stad waar jy die vetste middelklas mense met die “kleinste gesonde gewigstatus” kry. Hier eet inwoners die minste vrugte en groente en verkies koeldrank en sout kos.

In Pretoria voeg mense meer vet by hulle kos as in enige ander Suid-Afrikaanse stad.

In Kaapstad is daar goeie nuus: Kapenaars eet gesond, oefen gereeld en is glo sielkundig gesond.

Vitality is ‘n gesondheids-program mediese skema van Discovery en lede kan aansluit vir ‘n maandelikse fooi.

Volgens Discovery, is die gemiddelde ouderdom van ‘n lid 32 en Vitality-lede is meestal middelklas.

‘PW het niks vir eie gewin gedoen nie’

Oudpres. PW Botha het geweier dat belastinggeld vermors word om ’n ondergrondse bunker by sy aftreehuis in Wildernis te bou.

Barbara Botha, sy weduwee, het pres. Jacob Zuma se bewering dat die staat destyds die lughawe in George gebou het omdat Botha daar gewoon het, as snert afgemaak.

Botha se weduwee het aan Media24 vertel dat daar planne opgetrek was om ‘n bunker by Die Anker, die Bothas se aftreehuis in Wildernis, in te rig as ‘n veiligheidsmaatreël.

“Hulle het gesê die departement is besig om ondergrondse kamers by verskeie BBP’s se huise regoor die land in te rig, maar PW het net geweier. Hy het gesê dit is ’n mors van geld,” het sy gesê.

Botha het Die Anker eers in die laat sewentigs gekoop ná die besluit om die lughawe te bou, reeds geneem is.

Vandag gebruik meer as 560 000 passasiers jaarliks die lughawe.

“PW het niks vir eie gewin gedoen nie,” het sy weduwee ontstoke gesê.

Luidens die Hansard het Lourens Muller, destydse minister van vervoer, op 8 Februarie 1977 in ’n parlementêre antwoord gesê die lughawe word gebou deur die Suid-Afrikaanse lugmag, die departement van openbare werke en die departement van vervoer “vir die verskaffing van ’n meer gereelde en gerieflike lugdiens tussen gemeenskappe in die Suid-Westelike distrikte en die res van die Republiek asook vir strategiese verdedigingsdoeleindes.”

Die regering in Maart 1973 besluit om die lughawe te bou en dit is in Junie 1977 voltooi.

Daar is oorweeg om die lughawe in Oudtshoorn te bou, maar “uit ’n praktiese en veiligheidsoogpunt” is daar op George besluit, het Muller gesê.

Frans Swarts (94), SAL-hoof toe die lughawe gebou is, het aan Media24 gesê vlugte het destyds gesukkel met weerstoestande in Kaapstad en kon weens lae wolke nie in Kaapstad land nie. Daar was nie vandag se moderne toerusting om sulke hindernisse te oorkom nie.

Vlugte moes noodgedwonge dan in Bloemfontein land en dus was die lughawe in die Suid-Kaap ‘n noodsaaklikheid om ’n alternatiewe landingsplek te hê wanneer Kaapstad nie beskikbaar was nie.

Hennie Smit, wat van 1981 tot 1983 LPR vir George was en later vir Botha as LV vir George opgevolg het, het gesê daar was geen druk van Botha se kant om die lughawe te bou nie.

“Inteendeel, hy (Botha) het destyds ’n onafhanklike komitee aangestel om te kyk waar die beste plek is om die lughawe te bou. Daar is gekyk na Mosselbaai, George en Oudtshoorn. Verskeie faktore, waaronder veiligheidsoorwegings en weersomstandighede, is in ag geneem.”

Volgens Smit wou Botha gehad het dat die lughawe na die destydse minister van vervoer, Louwrens Muller, vernoem word.

Nkandla is ’n privaatwoning en die lughawe is in staatsbesit, het kritici gesê.