Karin Roodt – Bladsy 83

Outa verloor tol-appèl

Die Bondgenootskap teen Stedelike Tol, Outa, het sy teleurstelling uitgespreek met die uitspraak in die Bloemfonteinse Appèlhof waar sy laaste poging om die Gautengse e-tolstelsel te keer, van die hand gewys is.

Outa sê hy gaan die uitspraak bestudeer en die organisasie sal môre ‘n mediakonferensie hou.

Die Bondgenootskap het geappèlleer teen ‘n hofuitspraak verlede jaar wat die implementering van die tolstelsel deur die Padagentskap – Sanral – gemagtig het.

Outa het onder andere aangevoer dat daar nie behoorlike openbare raadpleging was nie. Regter Fritz Brand het in sy uitspraak gesê die horlosie kan nie teruggedraai word tot vyf jaar gelede toe die tolstelsel bekend gemaak is nie.

Hy sê in dié tydperk is groot hoofweg-opgraderings gedoen, wat nie ongedaan gemaak kan word nie, en tóe eers is die hersieningsaansoek gebring.

Hy sê die nadeel is dat hoewel Gautengers meestal vir die paaie gaan betaal, dit tot die res van die land se ekonomie sal bydra.

Brand sê die nadeel is dat Sanral R20 miljard hiervoor met geleende geld betaal het, en indien geen tolgeld gehef word nie, die regering uiteindelik daarvoor sal moet opdok.

Brand sê die koste gaan waarskynlik gedelg word deur diegene wat dit vermoedelik die minste kan bekostig, en die impak op hulle sal nie gering wees nie.

Geen kostebevel is gemaak nie. – RSG

Flysafair mag nog nie vlieg nie

Die Noord-Gautengse hooggeregshof in Pretoria het Dinsdag teen die nuwe laekoste-lugdiens FlySafair beslis.

Comair en Skywise voer aan dat FlySafair nie voldoen aan Suid-Afrika se regulasies vir eienaarskap nie, het Eyewitness News berig.

Die hof het ‘n bevel uitgereik dat FlySafair nie kan handel dryf totdat sy lisensie nie hernu is nie.

Die lugdens het reeds kaartjies aan passasiers verkoop, maar het Dinsdagmiddag op Twitter gesê hy sal klante ten volle vergoed indien hulle nie hul vlugte wil uitstel nie.

Menseregtekommissie ondersoek SAL-diskriminasie

Die Suid-Afrikaanse Menseregtekommissie (SAMRK) gaan die Suid-Afrikaanse Lugdiens (SAA) se kadetprogram ondersoek, het die vakbond Solidariteit Dinsdag gesê.

“Solidariteit het die ondersoek versoek omdat die lugdiens geen wit manlike kandidate by sy kadetprogram aanvaar het nie,” het Dirk Groenewald, hoof van die arbeidshof-afdeling van die vakbond, gesê.

Groenewald het gesê Solidariteit het namens tien wit mans, wat aansoek gedoen het vir die program, gevra dat ‘n ondersoek gedoen word. Dié mans se aansoeke was onsuksesvol omdat hulle wit is.

Hy het gesê die kadetprogram se toelatingsvereistes diskrimineer onregverdig teen wit mans en kom neer op ‘n kwotastelsel.

Groenewald het gesê Solidariteit het gevra dat die lugdiens beveel word om sy diskriminerende praktyke te stop en die program oop te stel vir mense van alle rasse en geslagte.

“Indien daar bevind word dat die tien kandidate as gevolg van hul ras nie aanvaar is nie, moet die SAA die nodige stappe doen om die saak reg te stel en die kandidate by die program insluit.”

Die SAA en die SAMRK was nie onmiddellik beskikbaar vir kommentaar nie. – Sapa

Ontvoerde vrou uit kattebak gered

‘n Vrou wat Dinsdag tydens ‘n rooftog in Randfontein aan die Wes-Rand ontvoer is, is gered het Johannesburg se metropolisie gesê.

Wayne Minnaar, polisiewoordvoerder, het gesê die vrou is uit ‘n motor se kattebak gered en drie swart mans is in verband met die voorval in hegtenis geneem.

“Die motor is met behulp van ‘n opsporingstoestel in Brixton gevind en die drie verdagtes is in hegtenis geneem,” het Minnaar gesê.

Hy het bygevoeg dat twee ongelisensieerde vuurwapens, drie selfone en juweliersware ook in die mans se besit gevind is.

“Die vrou het geen beserings opgedoen nie, maar sy was getraumatiseer,” het Minnaar gesê.

Die drie verdagtes sal binnekort in die hof verskyn. – Sapa

DA onthuts dat SAIR hul eie ANC-veldtog kan kelder

Die DA is onthuts dat die Suid-Afrikaanse Instituut vir Rasseverhoudinge nie die party se oppergesag wil aanvaar nie.

SAIR ondersteun die “Ken jou ANC”-veldtog, in weerwil van die DA se verwoede teenkanting.

Die DA, wat ’n baie lang verhouding met die instituut sowel as die ANC en die swart strugglekultuur het, het Dinsdag vergeefs probeer om die veldtog te stuit.

Met minder as ’n jaar voor ’n nasionale verkiesing, is die DA erg bekommerd dat hul eie ANC-veldtog wat geskoei is op die “DA as ‘n beter ANC” en die Mandela-kultus, kan skade ly.

Die DA-leier Helen Zille het haar spesiale raadgewer Gavin Davis afgevaardig om die uitvoerende hoof van die Instituut dr. Frans Cronjé, te oorreed om af te sien die veldtog.

“Gavin Davis het my gebel,” het Cronjé aan Beeld gesê.

“Hy het baie direk gesê ons moet dit eerder los omdat dit nie goed is vir ons of die DA nie. Dis vir my ’n eienaardige versoek aangesien ons onafhanklik is,” het Cronjé gesê.

Davis het ontken hy het Cronjé gevra om die veldtog te beëindig. Davis het sonder ironie gesê ‘n onafhanklike dinkskrum kan nie sy geloofwaardigheid openlik op die spel sal plaas vir ’n politieke party nie.

Die instituut, wat die ANC-regering dikwels kritiseer, het Dinsdag sy tweede van tien ANC-suksesfeite op Twitter uitgestuur as deel van ’n veldtog om die “amper verbasend positiewe feite” oor Suid-Afrika onder ANC-bewind te beklemtoon.

Dié omstrede veldtog het mense op Twitter aan die praat gehad en kritiek teen die instituut het ingestroom.

“Daar was baie kritiek van wit regses wat nie die moontlikheid dat ’n swart regering vordering gemaak het, kan aanvaar nie. Daar was ook baie kritiek van die DA,” het Cronjé gesê.

Dit is nie duidelik wie die “wit regses” was nie, aangesien die meeste wit regsgesindes nie die DA of ANC ondersteun nie.

“Dis duidelik vir hulle ’n bekommernis as iemand ernstig begin sê daar is ’n ander storie as net die ANC se mislukkings. Dán is die DA se eie veldtog in die gedrang, want die sukses van hul veldtog hang daarvan af dat niemand die DA se (negatiewe) storie oor die land in twyfel trek nie.”

Cronjé het gesê dit is “baie swak styl” van Davis om te verwag die instituut moet hul veldtog laat vaar.

“Die ANC probeer nooit voorskryf wat ons moet doen nie.”

Die instituut sal volgende week tydens ’n skemergeleentheid in Johannesburg vir Zille die geleentheid gee om 250 gaste toe te spreek.

Leerling vlug nadat hy klasmaat doodsteek

‘n 16-jarige leerling is doodgesteek tydens ‘n bakleiery met ‘n medeleerling by die Hoërskool Kgothalang in Bekkersdal, Randfontein.

“Die bakleiery het na bewering in die klaskamer begin toe die verdagte ‘n sambreel teen die muur gegooi en die stukke daarvan die slagoffer getref het,” het lt.kol. Katlego Mogale, polisiewoordvoerder, gesê.

“‘n Stryery het ontstaan en albei leerlinge het messe uitgepluk en begin baklei.”

Mogale het gesê die slagoffer is verskeie kere gesteek en is Maandagmiddag op die toneel dood verklaar. Die leerling wat hom na bewering gesteek het, het van die toneel gevlug en is steeds op vrye voet.

‘n Saak van moord word ondersoek. – Sapa

Rugbymoord-hofsaak begin

Vier mans wat daarvan beskuldig word dat hulle ‘n rugbytoeskouer doodgeslaan het, sal in Maart volgende jaar verhoor word, het die Nasionale Vervolgingsgesag (NVG) gesê.

Die vier het Dinsdag vlugtig in die Durbanse landdroshof verskyn.

Natasha Ramkisson, woordvoerder van die NVG, het gesê die verhoor sal van 10 tot 14 Maart in die Durbanse streekhof plaasvind.

Twee broers, Blayne en Kyle Shepard, en Andries van der Merwe en Dustin van Wyk staan almal tereg op ‘n aanklag van moord, drie van aanranding met die opset om ernstig te beseer en een van crimen injuria.

Ramkisson het gesê die aanklagte teen die vyfde beskuldigde, Grant Cramer, is weens ‘n gebrek aan bewyse laat vaar.

Die Brit Brett Williams (29) is in Maart by ’n Superrugby-wedstryd doodgeslaan. Die voormalige Royal Marine was glo betrokke in nog ‘n geveg voordat hy vermoor is in die groepsaanval buite Durban se Kings Park-stadion.

Die vier beskuldigdes is uit op borgtog van R5 000 elk. – Sapa

Bejaarde sterf in haataanval

‘n Bejaarde inwoner van Clarens is vasgebind en vermoor ná ‘n oënskynlike haataanval. Die Vrystaatse polisie het Dinsdag egter gesê hulle vermoed huisbraak.

Sersant Majang Skalkie sê die 69-jarige Daniel Meyer Wybenga met tou vasgebind op die badkamervloer Maandag vermoor aangetref.

Die polisie vermoed hy is verwurg. Sy goudkleurige Toyota Corolla, ‘n selfoon, en musiekstelsel word uit die huis vermis.

Die polisie is steeds op soek na die aanvallers en ‘n beroep is gedoen op die gemeenskap om na vore te kom met inligting.

Aanklagte van moord, huisbraak en motordiefstal word ondersoek.

Militêre oefening eindig in chaos, sterftes

Wat veronderstel was om die hoogtepunt van ’n militêre oefening tussen agt lande in Suider-Afrika te wees, het Sondagoggend in ’n tragedie op die kus suid van Pelikaanpunt in Namibië geëindig.

Minstens twee soldate van die spesiale magte van Suid-Afrika en Malawi het gesterf, verskeie word vermis en talle is beseer in ’n fratsongeluk in ‘n stormagtige see aan die Namibiese kus.

Sedert vroeg Sondagoggend is die jongste verwikkelinge in die strategiese militêre oefening van die weermagte van die Suider-Afrikaanse Ontwikkelingsgemeenskap (SADC) in die grootste geheimhouding gedompel nadat twee vlootvaartuie van die Suid-Afrikaanse spesiale magte net suid van Paaltjies vergaan het.

Sowat 600 soldate van die weermagte van Namibië, Suid-Afrika, Angola, Malawi, Zambië, Botswana, Zimbabwe en Lesotho is tans op Walvisbaai saamgetrek vir die eerste militêre oefening van sy soort in die substreek.

Die maneuvers en opleiding het van 9 tot 29 September plaasgevind en vanoggend sou die laaste fase van die projek ten einde loop. Dit het ’n taktiese aanval in woestynoorlogvoering behels waarby alle weermagelemente betrokke sou wees vanaf die vloot, die leër en die lugmag tot die geneeskundige dienste.

Presies wat gisteroggend gebeur het, bly steeds ’n geheim van die manne en vroue in uniform, maar dit was beslis die laagtepunt van ’n beplande elite-aanval op ’n denkbeeldige “vyand” suid van Walvisbaai.

Republikein was self op die toneel sowat agt kilometer suid van Paaltjies en die feite is dat die twee Barracuda landingsvaartuie van die Suid-Afrikaanse vloot op onverklaarbare wyse omgeslaan het nog voordat die branders en die kuslyn bereik kon word. Hierdie vaartuie wat spesiaal ontwerp is op die basis van ’n rubberboot om spesiale magte vanaf duikbote en groter vlootvaartuie vir aanvalle op land te ontplooi, word as “onsinkbaar” beskou.

Volgens eerstehandse inligting was die weermagspesialiste veronderstel om ’n eerstelig-aanval op die teikenbasis uit te voer en is verskeie Barracudas as landingsvaartuie ingespan.

Twee van die bote met hul bemanning en die aanvalsmag het egter op see verdwyn. Eers nadat die twee groepe nie by die teiken opgedaag het nie, is onraad vermoed en ’n reusagtige soek- en reddingsveldtog op land en see van stapel gestuur.

Eers ná 11:00 is die wrakke van die twee vaartuie opgespoor omdat vermoed is dat die ongeluk tussen Paaltjies en Pelikaanpunt plaasgevind het.

Die twee vaartuie was egter tien kilometer van die teiken af.

In een weergawe word vertel dat die militêre kontingent van een van Namibië se buurlande per ongeluk een van die bote met vlootgrofgeskut raakgeskiet het en dat die ander boot hulle te hulp gesnel het.

Die ander weergawe is dat die bote op see verdwaal het en nie rekening gehou het met die deinings en golwe van tot drie meter nie. Nadat die eerste boot omgeslaan het, het die ander ’n reddingspoging probeer uitvoer, maar het self in die moeilikheid beland.

NamPort en die waarnemende kaptein van Walvisbaai se hawe kon gister geen lig op die werklike omstandighede en voorval werp nie en die direktoraat van maritieme sake op Walvisbaai het alle navrae na die vloot verwys.

Die vloothoofkwartier op Walvisbaai het op sy beurt alle navrae na die weermaghoofkwartier in Windhoek verwys.

Dit was uiteindelik die polisie in Windhoek wat die voorval bevestig het met ’n kort aankondiging dat twee soldate by Walvisbaai gesterf het.

Geen amptelike verklaring is egter dusver uitgereik oor die presiese aard van die voorval, die vermistes of die beseerdes nie.

Teen 15:00 gister is een van die vaartuie wel uit die water gehaal, maar die tweede boot het nog omgedop agter die branders gelê.

Om 16:00 het ’n helikopter van een van die weermagte die toneel besoek en byna onmiddellik na die Rooikop militêre basis teruggekeer. – Die Republikein

Malaria-sterftes klop MIV/Vigs

Kundiges op die gebied van malaria sê die sterftes weens dié siekte is besig om toe te neem en skryf dit toe aan die weerstand wat muskiete teen insekdoders opgebou het.

Hulle het gepraat by die sesde Pan-Afrika multilaterale inisiatief oor malaria wat in Durban gehou word.

Professor Hillary Ranson van die Liverpool Skool vir Tropiese Medisyne sê muskiete bou regdeur die vasteland weerstand op teen insekdoders.

Ranson verwag dat die aantal sterftes van 639 000 per jaar tot 644 000 per jaar gaan toeneem.

Malaria bly ‘n groter gevaar in Afrika as MIV/Vigs. – RSG

Swanger vrou by Hazyview-gastehuis verkrag

‘n Swanger vrou en haar kollega is verkrag en beroof by ‘n gastehuis in Hazyview, Mpumalanga.

Die 32-jarige vrou, wat vyf maande swanger is, en haar 23-jarige kollega van Pretoria, is Sondagoggend omstreeks 03:00 deur twee swart gewapende mans by die Tatenda Gastehuis oorrompel.

“Die twee mans het by die sekuriteitshek ingebreek en by ‘n kamer ingegaan waarna hulle die twee vroue verkrag en selfone, juweliersware en skootrekenaars gesteel het,” het die bestuurder van die gastehuis, Christel Mathee, Maandag gesê.

“Ek het saam na die hospitaal gegaan. Hulle is erg getraumatiseer, ons is almal geskok.”

Die Hazyview-gebied het die afgelope paar jaar deurgeloop onder ‘n vlaag geweldmisdade.

Verlede week het drie gemaskerde mans met ‘n haelgeweer en twee pistole 108 skoliere en tien onderwysers van Laerskool Hennopspark in Centurion, Pretoria aangeval.

Die kinders, wat lede van die skoolkoor was, het by die Aan de Vliet Gastehuis oorgebly.

Kol. Leonard Hlathi het gesê niemand is nog in verband met die twee voorvalle in hegtenis geneem nie. – Sapa

Kofi Annan probeer IS red met voorstelle vir Veiligheidsraad-hervorming

Die voormalige sekretaris-generaal van die Verenigde Nasies, Kofi Annan, het Afrika-leiers gewaarsku om nie besluite te neem wat die funksie van die Internasionale Strafhof ondermyn nie.

Dit volg in aanloop tot die AU se vergadering vandeesweek om die rol van die hof te bespreek. Annan het gisteraand sy derde jaarlikse Desmond Tutu Internasionale Vredeslesing by die Universiteit van Kaapstad gelewer.

Annan sê hy is bekommerd oor pogings om die rol van die Internasionale Strafhof te systap. Hy sê sommige Afrika-lande soos Kenia het herhaaldelik nie sy leiers vervolg vir misdade teen die mensdom nie.

Annan het ook dade van terreur op die Afrika-vasteland veroordeel asook die hedendaagse politieke verskynsel van “die wenner-kry-alles”. Hy het dit beklemtoon dat die VN-Veiligheidsraad sal moet hervorm.

Annan sê dit kan nie geregverdig word dat Afrika met sy 54 lande nie ‘n enkele setel in die Veiligheidsraad het nie.

Hy sê so het lande in Latyns-Amerika, wat ‘n vyfde van die wêreld se bevolking het, ook nie ‘n setel nie. – RSG

‘Wêreld moet regmaak vir ergste met Amerikaanse dooiepunt’

Die minister van finansies, Pravin Gordhan sê die wêreldgemeenskap moet hulself vir die ergste voorberei weens Amerika se skuldkrisis.

Hy het gewaarsku dat ekonomiese teenmaatreëls getref moet word om dit die hoof te bied.

Gordhan het in ‘n onderhoud met Reuters gesê dat die finansiële markte gespanne raak oor die dooiepunt wat met die Amerikaanse begroting ontstaan het. Die dooiepunt moet teen 17 Oktober bygelê word.

Gordhan sê Suid-Afrikaanse owerhede het nie die hulpbronne om die rand, wat reeds 16% sedert die begin verswak het, te beïnvloed nie.

Dit is die meeste uit 16 groot geldeenhede wat deur Bloomberg dopgehou word.

Die rand se gly teen die dollar vanjaar het uitvoerders gehelp, het hy gesê. Die uitvoere het in Augustus met 7% gedaal.

Gordhan het vroeër gesê dat die ekonomiese groei in Suid-Afrika nie sy teiken van 2,7% vanjaar gaan haal nie, hoewel dit nie onder twee persent sal val nie.

Die Duitse motorvervaardiger BMW sê die arbeidsituasie in Suid-Afrika bly onbestendig en dat hy geen planne het om sy besluit om halt te roep aan uitbreidings in die land, te laat vaar nie.

Die motorbedryf dra 6% by tot die bruto binnelandse produk. Die reserwebank het reeds sy kommer uitgespreek oor die skade wat die staking aan die ekonomie berokken het.

Afrika ondermyn die geloofwaardigheid van IS, Den Haag

AU-leiers dreig om uit die Internasionale Strafhof te onttrek, wat pogings om menseregte-vergrype en volksmoorde op die kontinent onder die soeklig te bring, sal striem.

Alhoewel die onderskeie lidlande van die AU ondertekenare van die Roomse Verdrag is teen sulke vergrype, sal ‘n politieke besluit deur die AU die Verdrag erg knou.

Die twee Keniaanse leiers wat aangekla is van misdade teen die mensdom, het egter reeds die skuiwergat gesien. Dit is naamlik dat slegs swart regerings tot dusver amptelik deur die hof ondersoek is, wat die aanklag van rassisme jeens Afrika laat opklink.

Dat die VSA se swart president ook nie die IS ondersteun nie, is waarskynlik vir die AU ‘n verdere onderskraging.

President Uhuru Kenyatta van Kenia, en sy adjunk William Ruto het sterker na vore getree na die Westgate Mall-terreuraanval, deur hulself te posisioneer as belangrike rolspelers in die wêreldwye stryd teen terreur. In Kenyatta se geval lyk sy waarskynlike maande-lange afwesigheid in Den Haag toenemend onhoudbaar.

As die saak in duie stort, sal die Hof magteloos wees om getuies te beskerm, het aktiviste gewaarsku. Vir ‘n prominente menseregtekampvegter in Eldoret, Kenia, is die skrif reeds aan die muur.

Onderhoude met getuies en bronne in Eldoret, ‘n bedrywige dorp vyf ure se ry van Nairobi in Kenia se Skeurvallei, dui daarop dat grootskaalse intimidasie posgevat het.

Die Guardian het met een potensiële getuie gepraat wat erken het dat hy geld aanvaar het om van sy getuienis af te sien. Daar word ook beweer dat Keniaanse menseregtegroepe getuies afrig, en hulle aanmoedig om sekere weergawes van die gebeure te gee wat nie ooreenstem met die werklikheid nie.

In Eldoret, waar sommige van die bloedigste voorvalle soos 30 vroue en kinders wat in ‘n kerk doodgebrand het aangeteken is, is die atmosfeer gespanne. Enige wit persoon wat die dorpie betree word verdink daarvan dat hy of sy in diens van die IS is, op soek na getuies wat onttrek het om hulle te oorreed om te terug te keer.

Die Westerse aandrang op menseregte word, heel ironies, as ‘n bedreiging en nie ‘n uitkoms nie, beskou.

Een inwoner beskryf hoe hy genader is deur kennisse om nie te gaan getuig nie. Hy het ‘n miljoen sjielings [R20 000] in kontant ontvang. Hy sê hy moes onttrek omdat hy ‘n gesin het om te versorg.

Hy het eers na Nairobi in die geselskap van ondersoekbeamptes gereis waar hy gehelp het om die eufemismes te ontsyfer wat na bewering gebruik is deur Ruto se stam om geweld teen die Kikoejoe aan te hits, voor hy onttrek het.

‘n Ander bron het bevestig dat minstens 12 mense in die gebied omkoopgeld ontvang het van tussen 1 miljoen en 3 miljoen sjielings. Baie het nuwe motors ontvang, grond en beloftes van werk.

Sommige getuies het in die openbaar gesê dat hulle onttrek het sodat dit nie versoeningspogings tussen Kenyatta en Ruto in gevaar stel nie. Oproepe na die regeringswoordvoerder het onbeantwoord gebly.

Die Waki-kommissie, wat getaak was om die bloedvergieting te ondersoek, het Ruto en Kenyatta as die meesterbreine agter die geweld uitgewys, en hulle van die mobilisering van hul ondersteuners beskuldig om stamvyande aan te val, selfs voor die verkiesings.

In taal wat mens herinner aan wat gedurende die Rwandavolksmoord in 1994 gebruik is, het Ruto na bewering ondersteuners aangemoedig om “die onkruid uit die veld te roei”, ‘n verwysing na die Kikoejoe.

Buite Eldoret, op ‘n byna onbegaanbare grondpad tussen mielielande en piesangplantasies, staan ‘n blink nuwe motor – ‘n duur Toyota – geparkeer buite ‘n armoedige hut. Soos ‘n seer duim staan die ryding uit tussen die bokke en hoenders wat in die stof dwaal op soek na kos. Die deftige eienaar praat behendig op verskillende selfone.

Twee bronne sê dat hy ‘n motor en kontant ontvang het om sy getuienis te laat vaar oor bewerings dat die geweld teen die Kikoejoe vooraf beplan was, maar dit is ‘n aanklag wat hy ontken. Hy sê hy was aan geen druk onderwerp nie en die motor het hy self gekoop.

Die IS, sê hy, is besig om bewyse in te samel om ‘n vooropgestelde verhaal van georganiseerde geweld te pas. In die besonder, het hy ‘n plaaslike nie-regeringsorganisasie wat gehelp het om die potensiële getuies af te rig, daarvan beskuldig dat hulle ‘n eie agenda najaag. Hy het gesê hy is aangesê om te sê hy “sien” eerder as wat hy “hoor”.

Die NRG, die Centre Against Torture het nie reageer op ‘n versoek vir kommentaar nie.

Intussen verwys die Keniaanse media deur die bank na die “koloniale hof”. Sedert die aanvang van die verhoor teen Ruto en radio-aanbieder Josua Arap Sang, het koerante die identiteite van al die getuies laat uitlek, wat hofverrigtinge daarna noodgedwonge in camera laat voortgaan het.

Die Keniaanse media is die instrument van propaganda teen die IS, die kolonialiste en wit rassiste. Enigiemand wat inligting oor die post-verkiesinggeweld rugbaar maak, het ‘n teiken geword omdat hy saamwerk met die witman.