minister van finansies

Rand daal skerp na Gordhan se begrotingsrede

Die minister van Finansies, Pravin Gordhan het in sy Begrotingsrede in die Parlement gesê die land kan nie geld bestee wat hy nie het nie en kan nie meer geld leen as wat hy kan terugbetaal nie.

Hy het gesê die begroting sal eerder fokus op fiskale konsolidasie, maar markte het nogtans negatief gereageer.

Gordhan moes probeer voorkom dat Suid-Afrika na rommelstatus afgegradeer word. Die rand het kort na die begrotingsrede met sowat 30 sent teen die Amerikaanse dollar gedaal.

Gordhan het verwys na die tekort op die begroting wat binne drie jaar van 3,2 persent tot 2,8 persent verminder behoort te word.

Hy sê maatreëls om die ekonomiese toestande te verbeter sluit die inkorting van besteding en die verhoging van belasting in.

Gordhan sê tot ekonomiese groei gestimuleer kan word en sodoende ‘n groter inkomste vir die staat meebring, moet uitgawes beperk word, dus moet skuld as ‘n persentasie van die Bruto Binnelandse Produk gestabiliseer word.

Die minister sê die regering beoog om belastinginkomste in die 2016/2017 belastingjaar met agtien miljard rand te verhoog en volgende jaar met ‘n verdere vyftien miljard rand.

Die minister van Finansies het belastingverligting van R5,5 miljard vir middel- en laerinkomstegroepe aangekondig, maar nuwe belastings ingestel.

Die regering beoog om vanaf 1 April aanstaande jaar ‘n nuwe belasting op koeldrank en vrugtesap in te stel wat suiker bevat.

Die brandstofheffing word met 30 sent per liter verhoog en ‘n belasting op voertuigbande sal ingestel word.

Aksynsbelasting op drank en tabak sal tussen ses en agt persent styg.

Bejaardes sal maandeliks 80 rand meer ontvang in ouderdomspensioen, wat die toelae op R1500 per maand te staan bring. In Oktober sal ‘n verdere tien rand per maand bygevoeg word.

Kindertoelae word tot R350 per maand verhoog, en die toelae vir pleegsorg styg tot R890 per maand.

In totaal word ‘n bykomende 11,3 miljard rand oor die volgende drie jaar begroot vir maatskaplike toelaes.

Die DA se skaduminister van Finansies, David Maynier sê intussen die begrotingsrede het nie ‘n sterk genoeg impak gemaak deur nuwe maatreëls aan te kondig om die ekonomie ‘n hupstoot te gee en werksgeleenthede te skep nie.

Maynier sê dat die beplande besnoeiings nie ver genoeg gaan nie.

Hy sê Gordhan kon President Jacob Zuma se kabinet kleiner gemaak het, wat R4,7 miljard rand kon bespaar het.

Gordhan het ook tydens die begrotingsrede gesê die begroting is deur die Nasionale Ontwikkelingsplan gerig.

Hy sê dit is gemik op inklusiewe groei, beklemtoon vennootskappe tussen rolspelers in die ekonomie, en lê klem op onderwys en infrastruktuurontwikkeling.

Gordhan het ook gesê die begroting steun werkskepping en die bou van ‘n volhoubare ontwikkelingstaat.

Die minister het sy verbasing oor die skerp daling in die rand en staatseffekte uitgespreek nadat hy sy begrotingsrede in die Parlement gelewer het.

Gordhan sê hy voel hy het genoeg gedoen om ‘n afgradering in die land se beleggingsgradering te voorkom.

Plastieksakheffing bring R1 miljard in

Die totale omvang van geld wat ingesamel is sedert die bekendstelling van die plastieksakheffing in 2003 tot Augustus vanjaar is R1,1 miljard, het die minister van finansies, Nhlanhla Nene die parlement verklaar.

Tot dusver vanjaar is R42 miljoen ingesamel.

Die minister het erken dat slegs ‘n fraksie van die geld wat ingesamel is na die departement van omgewingsake gekanaliseer word. Oor die afgelope 10 jaar R215 miljoen aan die departement gegaan.

Hy het verduidelik dat alle geld wat deur die nasionale regering ingesamel word – insluitend alle belasting inkomste – word gedeponeer in die Nasionale Inkomstefonds, soos vereis deur die Grondwet.

Die heffing is ingestel op 3 sent per sak in 2004, betaalbaar deur plastieksakvervaardigers en invoerders. Dit het tot 4 sent per sak in April 2009 gestyg en aan die begin van April 2013 het dit gestyg tot 6 sent per sak.

Die plastiekinkopiesakheffing is ingestel deur die destydse minister Valli Moosa in 2004 as ‘n meganisme om die probleem van plastieksakke te bestuur, wat as die wind waai, heinings, bome, of in die oop veld ontsier en as rommel rondwapper.

‘n Artikel 21 nie-winsgewende maatskappy Buyisa-e-Bag is gestig om plastieksakherwinning te bevorder.

Hierdie maatskappy het is gelikwideer in 2010/11 en en die departement van omgewingsake het die projekte en programme oorgeneem.

Die ingrypings het die gebruik van plastieksakke van tussen 45 en 75% ingekort. Voorheen is ongeveer 10 miljard sakke as rommel gestort.

Minister waarsku dat belastinglas gaan verhoog

Die ANC het die minister van Finansies, Nhlanhla Nene se eerste begrotingsrede vir die mediumtermyn verwelkom en gesê die regte balans is getref tussen die behoeftes van die armes en die noodsaaklikheid om staatsbesteding in te perk.

Nene het sy toespraak afgeskop met ‘n waarskuwing dat beleidsveranderinge ‘n nog swaarder las op belastingbetalers kan plaas.

Nene het die land se groeivooruitsigte beduidend afgeskaal met ‘n voorspelling van slegs 1,4%.

Volgens Nene is dit te wyte aan faktore soos stakings, hoë elektrisiteitskostes en ‘n afname in privaatbeleggings.

Hy het voorts die regering aangeraai om groeiende skuld te verminder en sy fiskale sake reg te ruk.

Die minister het ook beleërde staatsbeheerde instellings soos die Suid-Afrikaanse Lugdiens en die Poskantoor gewaarsku dat hulle geen regeringshulp moet verwag nie.

Nene het gesê hulle sal nie verdere reddingspakette ontvang nie, maar sal herstruktueer word om hulle finansieel volhoubaar te maak.

Hy sê enige kapitalisasie sal deur middel van die verkoop van oortollige bates geskied.

Daar sal na verwagting sowat R1,1 miljard rand oor die volgende drie jaar aan nuwe grondeise bestee sal word, het Nene aangekondig.

Kenners meen dié bedrag is nie voldoende nie.

Die departement van landelike ontwikkeling en grondhervorming sal die fondse daarvoor in sy bestaande begroting moet vind.

Die nuwe vyfjaar termyn vir eise sal teen 31 Junie 2019 ten einde loop.

Tito Mboweni onttrek as LP

Pravin Gordhan se heraanstelling in sy pos as minister van finansies, sal onstuimigheid en onsekerheid in markte kalmeer, sê sy ondersteuners.

Terwyl die voormalige voorsitter van die Suid-Afrikaanse Reserwebank, Tito Mboweni, volgens gerugte die voorloper vir die pos skyn te wees, sal dié aanstelling moeilik wees omdat markte en die vakbonde glo nie te vinde is daarvoor nie.

Die aanduiding was “baie sterk” vroeër in die jaar dat Gordhan sy pos sou verlaat aan die einde van sy termyn, sê een ontleder.

Mboweni, het hom intussen onttrek aan die ANC se lys vir die Parlement, en sal nie meer beskikbaar om as LP te dien nie.

Die ANC se sekretaris-generaal, Gwede Mantashe, wou nie reageer op die redes vir Mboweni se onttrekking nie.

Mboweni se redes vir sy besluit is vervat is in ‘n brief aan die ANC en volg na gerugte dat hy die Minister van Finansies, Gordhan sal vervang indien hy nie beskikbaar is vir aanstelling nie.

Mantashe het gesê die brief is aan die ANC gerig en daarom is dit nie gepas om dit openbaar te maak nie.

Ingevolge die wet kan die President twee ministers en twee adjunkministers in sy kabinet aanstel wat nie Parlementslede is nie.

Mboweni kan egter steeds as die minister van finansies in die nuwe kabinet aangewys word al het hy hom onttrek aan die ANC se lys vir die Parlement.

Maatskappye moet belasting betaal en politieke partye steun

Pravin Gordhan, minister van finansies, het maatskappye gewaarsku om nie geld uit Afrika te “smokkel” nie, het die SAUK Maandag berig.

Gordhan het groot korporasies wat baie wins maak, maar min belasting betaal, vir kritiek uitgesonder.

Hy het by die jaarlikse G20-Afrika-konferensie in Johannesburg gesê dit kos die vasteland miljarde en Afrika se ekonomieë sal die bykomende belastinggeld goed kan aanwend.

“Afrika sal merkbaar verbeter, met meer skole, infrastruktuur en ekonomiese bedrywighede.”

“Sonder die belasting wat van maatskappye kom, word regerings gedwing om die belasting op individue te verhoog óf besteding te besnoei.”

Die ANC se tesourier, Zweli Mkize, het gesê maatskappye moet politieke partye finansier en het voorgestel dat ’n trustfonds vir dié doel geskep word, berig die Sowetan.

“Maatskappye moet miljoene betaal, maar dit behoort hulle nie te stop om die partye van hul keuse te ondersteun nie,” het Mkize volgens die koerant gesê.

Hy het gesê dat maatskappye voordeel trek uit vrede en demokrasie.

“As daar onrus is of gemeenskapsprotes is, sal daar geen sakegeleenthede wees nie…”

Volgens die Sowetan is hy bereid om met groot ondernemings te vergader om die voorstel van ’n trustfonds te bespreek.

Die Speaker van die parlement kan die fonds administreer. Geld sal toegewys word volgens die proporsionele verteenwoordiging van partye.

“Ek glo daar is ondernemings wat floreer danksy die stabiliteit en vrede wat deur demokrasie geskep word, maar dat hulle nie wil bydra nie,” het hy aan die Sowetan gesê. – Sapa

Geen begrotingsverrassings nie, sê ekonoom

Ekonome verwag nie verrassings tydens die Minister van Finansies se medium termyn begrotingsrede vandag nie.

Die mediumtermyn-begroting word gesien as ‘n vooruitskouing van staatsbesteding oor die volgende drie jaar.

Ekonoom Dawie Roodt sê dit is algemeen bekend dat die ekonomie swakker gevaar het as wat aan die begin van die jaar in die vooruitsig gestel is, en dat die staatsinkomste sowat vyf miljard Rand minder sal wees as wat verwag is.

Hy sê dié begroting is nie die plek om beleidsveranderings aan te kondig nie en is gewoonlik slegs ‘n terugblik oor die jaar veral oor die land se ekonomie en die staat van finansies.

Roodt sê anders as in baie ander ontwikkelde lande is die staat se uitgawes in Suid-Afrika goed onder beheer. Die begrotingsrede word om twee-uur gelewer. – RSG

‘Wêreld moet regmaak vir ergste met Amerikaanse dooiepunt’

Die minister van finansies, Pravin Gordhan sê die wêreldgemeenskap moet hulself vir die ergste voorberei weens Amerika se skuldkrisis.

Hy het gewaarsku dat ekonomiese teenmaatreëls getref moet word om dit die hoof te bied.

Gordhan het in ‘n onderhoud met Reuters gesê dat die finansiële markte gespanne raak oor die dooiepunt wat met die Amerikaanse begroting ontstaan het. Die dooiepunt moet teen 17 Oktober bygelê word.

Gordhan sê Suid-Afrikaanse owerhede het nie die hulpbronne om die rand, wat reeds 16% sedert die begin verswak het, te beïnvloed nie.

Dit is die meeste uit 16 groot geldeenhede wat deur Bloomberg dopgehou word.

Die rand se gly teen die dollar vanjaar het uitvoerders gehelp, het hy gesê. Die uitvoere het in Augustus met 7% gedaal.

Gordhan het vroeër gesê dat die ekonomiese groei in Suid-Afrika nie sy teiken van 2,7% vanjaar gaan haal nie, hoewel dit nie onder twee persent sal val nie.

Die Duitse motorvervaardiger BMW sê die arbeidsituasie in Suid-Afrika bly onbestendig en dat hy geen planne het om sy besluit om halt te roep aan uitbreidings in die land, te laat vaar nie.

Die motorbedryf dra 6% by tot die bruto binnelandse produk. Die reserwebank het reeds sy kommer uitgespreek oor die skade wat die staking aan die ekonomie berokken het.

Ombudsman vir belasting aangewys

Pravin Gordhan, minister van finansies, het Dinsdag die land se eerste belastingombudsman aangewys.

Die afgetrede regter Bernard Ngoepe sal die pos beklee.

“Die kantoor is bedoel om belastingbetalers van ’n bekostigbare meganisme te voorsien waardeur hulle administratiewe probleme kan hanteer wat nie deur die Suid-Afrikaanse Inkomstediens (SAID) opgelos kan word nie.

“Regter Ngoepe het grondige ervaring in onpartydigheid; hy begryp hoe die magte en pligte van die SAID en die regte en pligte van belastingbetalers ten beste gebalanseer kan word. Bowenal is hy kundig in belasting- en administratiewe reg.”

Die aanstelling is ingevolge die Wet op Belastingadministrasie gedoen.

Besonderhede sal “mettertyd” bekend gemaak word. – Sapa

Koolstofbelasting kan ekonomie knou

Die Suid-Afrikaanse Kamer van Handel en Nywerheid waarsku dat die voorgestelde koolstofbelasting ‘n ernstige impak op die land se ekonomie en werkskepping kan hê.

Die Kamer se uitvoerende hoof, Neren Rau sê hulle ondersteun maatreëls om koolstofvrystellings te verminder, maar dit moet belasting-neutraal wees.

Die kamer het sy kommentaar oor die koolstofbelasting beleidsdokument by die Tesourie ingedien. Die beleidsdokument, wat in Mei bekendgestel is, bied ‘n raamwerk vir gesprekke rondom die beplande koolstofbelasting van R120 per ton.

Die minister van Finansies, Pravin Gordhan het die koolstofbelasting in sy begrotingsrede in Februarie aangekondig. – RSG

Swart boere immuun teen Landbankterugnames

Die Landbank neem feitlik geen plase terug van swart boere wat nie hul lenings terugbetaal nie. Hierteenoor word streng kredietbeheer teen wit boere toegepas.

Oor die afgelope tyd is 25 plase deur die Landbank opgeveil, maar slegs 5 daarvan het aan swart boere boere behoort.

Maar volgens ingeligte bronne is daar "honderde swart boere" wat nie betaal nie en wie se plase tans aan regsoptrede blootgestel is. Die uitvoerende hoof van die Landbank, Phakamani Hadebe, beweer dat die bank R100 miljoen per maand weens hierdie wanbetalings verloor en waarskynlik binne drie jaar bankrot sal speel indien daar nie weer staatshulp kom nie.

Sowel Hadebe as die waarnemende voorsitter van die bank, prof. Herman van Schalkwyk, is bekommerd dat die Landbank se reputasie weereens 'n knou kan kry indien die skuld van swart boere nie ingevorder word nie. Ander banke in die privaatsektor sal nie meer bereid wees om daarmee sake te doen nie en die Landbank se skuldbriewe sal ook nie meer deur beleggers aangekoop word nie.

Die Landbank was die afgelope jare in die nuus weens die wanbestuur en korrupsie wat tot onlangs gegeld het nadat dié apartheidsinstelling, wat boere geslagte lank gedien het, onder transformasiebestuur gekom het.

Politieke druk op die Landbank om die rasprofiel van sy kliënte by invorderings in ag te neem, word deur die ANC-voorsitter van die portefeuljekomitee vir landbou in die parlement, mnr. Lulu Johnson, toegepas. Johnson het gevra dat daar weer 'n moratorium op die terugname van swart eienaars se grond ingestel moet word. Vanaf 2002-2005 het daar sulke moratoriums op die grond van swart eienaars gegeld.

Die Landbank meen nou dat die bank nie "sy politieke mandaat as ontwikkelingsbank" kan nakom sonder geld wat deur die parlement voorgeskiet word nie. Maar Nhlanhla Nene, die adjunkminister van finansies, het geensins te kenne gegee dat sulke hulp tans oorweeg word nie.

Die Landbank is wetlik verplig om binne drie maande teen wanbetalers op te tree en hul eiendomme terug te neem, iets wat tans in die geval van swart leners nie gebeur nie.

'n Vergadering van die landbouminister, Tina Joemat-Petterson, Gugile Nkwinti, minister vir landelike ontwikkeling en Pravin Gordhan, die finansminister, is deur die parlementêre portefeuljekomitee aangevra om dringend die kwessie te bespreek.

casino day Александр Фильчаков