Malawi – praag.co.za

Twee vragmotorbestuurders in mensehandel betrap

Twee bruin vragmotorbestuurders sal na verwagting om borgtog aansoek doen in die Marble Hall-landdroshof Dinsdag nadat hulle in hegtenis geneem is weens beweerde mensehandel.

Die Direktoraat vir Prioriteitsmisdaadondersoek (Valke) se kapt Matimba Maluleke het gesê Idrisa Yusuf Mussa, 39, en Danison Prahima, 39, is in hegtenis geneem op 28 Julie en sal Vrydag in die hof verskyn.

“Die polisie het twee verdagte vragmotors geparkeer langs die pad naby Marble Hall onderskep. Terwyl hulle ‘n deursoeking van die twee vragmotors gedoen het, was die polisie geskok om 59 Malawiese immigrante waaronder nege vroue, twee van hulle minderjariges, en die res volwasse mans te ontdek,” het Maluleke gesê.

“Die 59 migrante is aan die agterkant van die vragmotor versteek en ‘n paar was in ‘n ernstige toestand van dehidrasie. Sommige van die immigrante is met vervalste paspoorte betrap.”

Hy het gesê al 59 individue sal aangekla word omdat hulle onwettig in die land is en sal na verwagting binnekort verskyn in die Marble Hall-landdroshof.

Malawi wil geskutte ivoor verbrand

Tanzanië het Malawi gelooi oor sy besluit om drie ton ivoor met ’n waarde van meer as vyf miljoen Amerikaanse dollar te verbrand.

Volgens die land kan dit eerder gebruik word om vermeende ivoorsmokkelaars te vervolg, het AFP berig.

Die regsgeleerde Christon Ghambi het aan joernaliste gesê die vernietiging van die ivoor gaan die hofsaak beïnvloed waarin die Tanzaniese regering die vermeende smokkelaars van die ivoor voor die hof daag. Beslag is in Malawi op die gesteelde ivoor gelê.

Volgens Ghambi het Tanzanië verwag Malawi sou die vernietiging van die ivoor uitstel totdat die vermeende smokkelaars gevonnis is.

“Tanzanië is glad nie beïndruk met die besluit om die ivoor te verbrand nie. Die probleem is dit gaan die sake in Tanzanië beïnvloed. Met die ivoor wat vernietig is, kan dit moeiliker wees om die aanklagte te bewys,” het Ghambi gesê.

Tanzanië het sedert verlede jaar teen die vernietiging van die ivoor beswaar gemaak, omdat ’n groot gedeelte van die ivoor waarop beslag gelê is, in die land se nasionale parke en wildreservate gestroop is en dit daarom as bewyse moes dien.

Malawi het die 781 stukke ivoor by vermeende smokkelaars by een van hul grensposte in 2013 gekonfiskeer.

Mosambiekers vlug na Malawi

Talle Mosambiekse burgers het reeds na die naburige Malawi gevlug weens toenemende spanning en geweld in die land.

Meer as 6000 Mosambiekers word in ‘n kamp by Kapsie, sowat 100 kilometer suid van Lilongwe in Malawi gehuisves.

Dié toeloop het kommer laat onstaan oor ‘n dreigende humanitêre krisis weens oorbevolking in die kamp.

Mosambiekers sê hulle vlug na die noordelike buurland weens toenemende gevegte tussen regeringsmagte en gewapende magte van die opposisiegroep Renamo.

Regeringsmagte word daarvan beskuldig dat hulle fokus op dorpe lojaal teenoor die opposisie.

Renamo betwis die uitslag van die 2014-verkiesing wat hulle beweer onregmatig was.

Die humanitêre organisasie Dokters Sonder Grense (MSF) het ‘n permanente teenwoordigheid in die streek, met die verskaffing van gesondheidsdienste aldaar.

MSF se veldkoördineerder Whitney Ward sê voortvlugtendes word met harde lewensomstandighede gekonfronteer binne die kampe, en sy sê sy het nog nooit so ‘n vlak van oorbevolking gesien nie.

Belastingbetaler vergoed Joodse wapenhandelaar vir bokser se besoek

Fikile Mbalula, minister van sport, het die belastingbetaler mislei oor ‘n Amerikaanse bokskampioen se besoek in Januarie 2014.

Dokumente van die departement van Sport en ontspanning wys hoe Mbalula byna ‘n halfmiljoen rand oorbetaal het aan ‘n Joodse familie van wapenhandelaars met Floyd Mayweather se besoek.

Eric Ichikowitz (45), een van die drie direkteure van Frontiers, het geld van die departement ontvang. Sy broer, Ivor, is die stigter en uitvoerende hoof van die Paramount-groep, Afrika se grootste wapenvervaardiger.

Ivor Ichikowitz (48), het besonder noue bande met die ANC.

Beeld het onthul dat die bokskampioen Mayweather deur die Ichikowitz-familie by hul lodge in die Madikwe-wildreservaat getrakteer is en in hul luukse private straler rondgevlieg is.

Zuma het ook verlede jaar en in 2011 met die wapenhandelaar se Boeing na New York en in 2008 na Libanon en Kazakstan gevlieg.

Eric Ichikowitz het by navraag aan Beeld erken hulle het Mayweather in Januarie by die Molori-logde onthaal en ook vir die vlugte soontoe betaal.

Hy het vroeër gesê dit was op versoek van die departement van sport en ontspanning, maar later het hy gesê hy het aangebied om Mayweather te onthaal toe hy van sy voorgenome besoek gehoor het.

EWN het berig Ivor Ichikowitz het die vliegtuig in 2008 verniet aan Zuma geleen.

Sy uitstappie in 2011 het die belastingbetaler egter R6 miljoen uit die sak gejaag, maar die staat het geweier om navrae oor die koste te antwoord.

Die departement sê in dokumente wat aan Netwerk24 verskaf is dat Mayweather se besoek “privaat gefinansier en gereël is” en die departement is net genader om daaraan deel te neem om die “herlewing van boks in die land aan te moedig”.

“Die departement se betrokkenheid was nie deur finansiële bydraes aan die toer nie, maar deur samewerking en gesinchroniseerde programme,” lui die dokumente.

Die departement het onder meer R171 000 van dié geld aan “tafels op die galadinee” bestee. Dit is onduidelik aan wié die geld betaal is omdat die fakture nie verskaf is nie.

Op die fakture staan die betalings aan Frontiers is uit die “Mayweather Tour Budget” gedoen.

Die Ichikowitz-familie se woordvoerder het ook die media probeer mislei oor belastingbetalerfondse.

Richard Glover, besturende direkteur van Frontiers, het verlede jaar by navraag ontken dat die maatskappy vir die departement gewerk of ooit ’n kontrak van die departement losgeslaan het. Hy het gesê Ichikowitz het ’n rol gespeel om Mayweather na Suid-Afrika te bring.

“Eric het ons gevra om te help met die reëlings van sekere dele van die toer. Maar ons het nie vír die departement van sport en ontspanning gewerk nie en het geen kontrak by die departement gekry nie.”

Die Britse koerant, The Telegraph het in 2014 onthul dat die Ichikowitz Family Foundation betaal het vir ‘n veldtog deur die Londense maatskappy Bell Pottinger om president Joyce Banda se aansien onder buitelandse skenkers ná ‘n korrupsieskandaal te herbou. Praag het reeds voorheen hieroor berig in Banda vlieg hoog in straler wat sy kwansuis verkoop het.

Dié skenkers moes opdok sodat die wapenhandelaar militêre toerusting aan Malawi kon verkoop.

Eric Ichikowitz, het bevestig dat hy Bell Pottinger betaal het.

“Die familie glo dat President Banda ‘n invloed ten goede in Malawi verteenwoordig en dat sy strewe om die lewens van alle Malawiërs te verbeter,” het hy gesê.

Die wapenhandelaar het ‘n reeks lukratiewe kontrakte rakende landbou, brandstof en militêre toerusting met Banda se regime aangegaan wat na die verkiesing in 2014 – wat Banda verloor het – heronderhandel moes word.

Malawi is een van die armste lande in Afrika.

Ivor Ichikowitz, wat in die tagtigerjare ‘n dramastudent aan Wits was, het kort ná 1994 ‘n fortuin gemaak toe hy die Weermag en Lugmag se toerusting aan ander lande in Afrika en Suid-Amerika verkwansel het. Hy het onder andere van die Lugmag se Mirage-vliegtuie aan Venezuela verkoop en sodoende groot kommissies verdien.

Lees ook dié berig op die Engelse Praag:

Ivor Ichikowitz now runs biggest defence company in Africa

Militêre oefening eindig in chaos, sterftes

Wat veronderstel was om die hoogtepunt van ’n militêre oefening tussen agt lande in Suider-Afrika te wees, het Sondagoggend in ’n tragedie op die kus suid van Pelikaanpunt in Namibië geëindig.

Minstens twee soldate van die spesiale magte van Suid-Afrika en Malawi het gesterf, verskeie word vermis en talle is beseer in ’n fratsongeluk in ‘n stormagtige see aan die Namibiese kus.

Sedert vroeg Sondagoggend is die jongste verwikkelinge in die strategiese militêre oefening van die weermagte van die Suider-Afrikaanse Ontwikkelingsgemeenskap (SADC) in die grootste geheimhouding gedompel nadat twee vlootvaartuie van die Suid-Afrikaanse spesiale magte net suid van Paaltjies vergaan het.

Sowat 600 soldate van die weermagte van Namibië, Suid-Afrika, Angola, Malawi, Zambië, Botswana, Zimbabwe en Lesotho is tans op Walvisbaai saamgetrek vir die eerste militêre oefening van sy soort in die substreek.

Die maneuvers en opleiding het van 9 tot 29 September plaasgevind en vanoggend sou die laaste fase van die projek ten einde loop. Dit het ’n taktiese aanval in woestynoorlogvoering behels waarby alle weermagelemente betrokke sou wees vanaf die vloot, die leër en die lugmag tot die geneeskundige dienste.

Presies wat gisteroggend gebeur het, bly steeds ’n geheim van die manne en vroue in uniform, maar dit was beslis die laagtepunt van ’n beplande elite-aanval op ’n denkbeeldige “vyand” suid van Walvisbaai.

Republikein was self op die toneel sowat agt kilometer suid van Paaltjies en die feite is dat die twee Barracuda landingsvaartuie van die Suid-Afrikaanse vloot op onverklaarbare wyse omgeslaan het nog voordat die branders en die kuslyn bereik kon word. Hierdie vaartuie wat spesiaal ontwerp is op die basis van ’n rubberboot om spesiale magte vanaf duikbote en groter vlootvaartuie vir aanvalle op land te ontplooi, word as “onsinkbaar” beskou.

Volgens eerstehandse inligting was die weermagspesialiste veronderstel om ’n eerstelig-aanval op die teikenbasis uit te voer en is verskeie Barracudas as landingsvaartuie ingespan.

Twee van die bote met hul bemanning en die aanvalsmag het egter op see verdwyn. Eers nadat die twee groepe nie by die teiken opgedaag het nie, is onraad vermoed en ’n reusagtige soek- en reddingsveldtog op land en see van stapel gestuur.

Eers ná 11:00 is die wrakke van die twee vaartuie opgespoor omdat vermoed is dat die ongeluk tussen Paaltjies en Pelikaanpunt plaasgevind het.

Die twee vaartuie was egter tien kilometer van die teiken af.

In een weergawe word vertel dat die militêre kontingent van een van Namibië se buurlande per ongeluk een van die bote met vlootgrofgeskut raakgeskiet het en dat die ander boot hulle te hulp gesnel het.

Die ander weergawe is dat die bote op see verdwaal het en nie rekening gehou het met die deinings en golwe van tot drie meter nie. Nadat die eerste boot omgeslaan het, het die ander ’n reddingspoging probeer uitvoer, maar het self in die moeilikheid beland.

NamPort en die waarnemende kaptein van Walvisbaai se hawe kon gister geen lig op die werklike omstandighede en voorval werp nie en die direktoraat van maritieme sake op Walvisbaai het alle navrae na die vloot verwys.

Die vloothoofkwartier op Walvisbaai het op sy beurt alle navrae na die weermaghoofkwartier in Windhoek verwys.

Dit was uiteindelik die polisie in Windhoek wat die voorval bevestig het met ’n kort aankondiging dat twee soldate by Walvisbaai gesterf het.

Geen amptelike verklaring is egter dusver uitgereik oor die presiese aard van die voorval, die vermistes of die beseerdes nie.

Teen 15:00 gister is een van die vaartuie wel uit die water gehaal, maar die tweede boot het nog omgedop agter die branders gelê.

Om 16:00 het ’n helikopter van een van die weermagte die toneel besoek en byna onmiddellik na die Rooikop militêre basis teruggekeer. – Die Republikein

SAOG prys Mugabe se oorwinning

Amerika sal sanksies teen Zimbabwe ophef indien die nuutverkose president, Robert Mugabe, politieke hervormings implementeer. Die naweek het leiers by die SAOG-beraad in Malawi ‘n beroep op die internasionale gemeenskap gedoen om sanksies teen Zimbabwe op te hef.

Die 15 lande in die Suider-Afrikaanse Ontwikkelingsgemeenskap het vir “die opheffing van alle vorme van sanksies tot dusver opgelê teen Zimbabwe” gevra. Dit sluit sanksies in teen die veteraan-president en die maatskappye en individue op die swartlys.

“Ek glo dat Zimbabwe beter verdien, dat Zimbabwiërs genoeg gely het,” het die voorsitter, president Joyce Banda van Malawi gesê.

Die SAOG het ook “die hou van vrye en vreedsame” verkiesings geprys en Mugabe en sy Zanu-PF party gelukgewens met hul oorweldigende oorwinning van 31 Julie.

‘n Verdere bewys van vertroue in Mugabe, was sy aanwysing as die adjunk-voorsitter van die groep en die besluit dat Zimbabwe die volgende SAOG-spitsberaad sal aanbied in Julie volgende jaar.

Terwyl SAOG-leiers hul tevredenheid met Mugabe se oorwinning by die stembus te kenne gegee het, het Die Withuis egter verklaar dat hulle sekere voorbehoude koester oor die uitslag.

President Ian Khama van Botswana wat voorheen die verkiesingsuitslag gekritiseer het, het na ‘n ontmoeting met Mugabe verklaar dat hy hom sal neerlê by die SAOG se verklaring oor Zimbabwe.

Die VSA het in Maart 2003 sanksies ingestel teen Mugabe en diegene wat bande met hom het.

Mugabe sal Donderdag ingehuldig word vir sy sewende termyn van vyf jaar.

SAOG vra dat Zim-sanksies opgehef word

Suider-Afrikaanse leiers het die internasionale gemeenskap gevra om sanksies teen Zimbabwe op te hef in die lig van president Robert Mugabe se oorwinning by die stembus.

Die voorsitter van die SAOG, Joyce Banda sê Zimbabwiërs het nou genoeg gely.

Lede van die SAOG sê hulle is tevrede dat die Zimbabwiese verkiesing vry en vreedsaam was.

Die leier van die opposisie, Morgan Tsvangirai beweer egter dat daar grootskaalse ongerymdhede was.- RSG

Spanning tussen voedselsekuriteit en politiek

As die negatiewe en positiewe faktore in die landbou tans opgeweeg word, swaai die skaal in die guns van die positiewe, volgens dr. Pieter Mulder, adjunk-minister van Landbou, Bosbou en Visserye.

Dr. Mulder het as spreker opgetree by die algemene jaarvergadering van die Caledon landbouvereniging. Hy het spesifiek gepraat oor die spanning tussen politiek en voedselsekuriteit en aangetoon hoe ondeurdagte en ideologies gemotiveerde grondhervorming voedselsekuriteit in Suid-Afrika bedreig.

“Die vestiging van bestaansboere is belangrik maar enigiemand wat in Suid-Afrika oor voedselsekuriteit praat en die rol van die kommersiële landbouers daarin ignoreer, is onrealisties,” het dr. Mulder gesê.

Hy het na die mnr Bingu wa Muthanka, president van Malawi en nuwe president van die Afrika Unie, verwys wat voedselsekuriteit as een van die belangrikste prioriteite vir Afrika uitgesonder het.

“Die waardering wat in Afrika bestaan vir ons Suid-Afrikaanse landbouers se vaardighede blyk uit die feit dat reeds 21 Afrikalande versoeke gerig het om Suid-Afrikaanse kommersiële landbouers by hulle te kom vestig. Politieke aktiviste in Suid-Afrika wat so maklik propaganda uitsprake teen ons kommersiële landbouers maak, moet hiervan kennis neem,” meen dr. Mulder

In sy toespraak het dr. Mulder ook minister Tokyo Sexwale gekritiseer oor sy stelling dat Suid-Afrikaanse boere die oorsaak is dat duisende mense na die stede beweeg.

“Om die boere te blameer vir probleme waarmee die regering sukkel, skep ’n negatiewe klimaat wat nie bevorderlik is vir samewerking en veiligheid op die platteland nie,” volgens dr. Mulder.

Verstedeliking is ’n internasionale verskynsels wat in alle Afrika-stede voorkom ongeag of daar kommersiële boere soos in Suid-Afrika is of nie.

Die duisende inwoners van die Oos-Kaap wat uit die ou Transkei en Ciskei na Kaapstad stroom, dikwels met die doel om stempatrone in daardie provinsie te beïnvloed, asook die miljoene immigrante uit Afrika kan op geen wyse voor die deur van die kommersiële boere gelê word nie.

Wat wel korrek is, is dat die regering die afgelope vyftien jaar groot onsekerheid in plattelandse gebiede geskep het met hulle beleidsrigtings teenoor Suid-Afrikaanse kommersiële boere. Dit is onbillik om te verwag dat boere in landelike gebiede moet belê en meer werk moet skep as hulle geen sekerheid het oor hulle grond, hulle veiligheid en selfs net die voortbestaan van hulle kinders se skole nie.

As die regering hierdie probleme aanspreek, sal hulle verbaas wees oor die goedgesindheid en positiewe benadering by meeste kommersiële boere om landelike gebiede te ontwikkel en om so te help om die verstedelikingstroom te vertraag.

сауны проекты Фильчаков прокурор

Malawi het rekordmielieoes, maar steeds hongersnood

Honger kinders ontvang voedselhulp

Malawi het so pas 'n rekordmielieoes gehad, maar die VN se Wêreldvoedselprogram vra dringend geld om 500 000 hongeres in die land vir 'n hele jaar te voed.

Volgens Ann Callanan, 'n direkteur van die Wêreldvoedselprogram, "Soek ons skenkerondersteuning van 5,2 miljoen dollar om die WVP in staat te stel om aan die voedselbehoeftes van die geteikende begunstigdes tot Desember 2010 te voldoen."

Callanan het gesê dat in weerwil van 'n rekordmielieoes van 3,3 miljoen ton, "hierdie nasionale oorskot nie outomaties en direk na brose groepe, soos die chroniese siekes en weeskinders afwentel nie."

Die brose begunstigdes – wat op 535 000 beraam word – sluit Vigslyers in, asook pasiënte wat behandeling vir tuberkulose ontvang en kinders wat ondervoed is.

"Ons het desperaat skenkers se aanhoudende ondersteuning nodig om aan die behoeftes van die begunstigde-kategorieë te voorsien wat moontlik nie die geleentheid gaan hê om voordeel uit die voedseloorskot te trek nie," het sy bygevoeg.

Malawi het vanjaar 'n rekordmielieoes gehad, wat aan intensiewe besteding aan kunsmis en ander landbou-insette toegeskryf word.

Voedselsekerheid bly egter 'n dringende kwessie vir die Malawiërs wat deur armoede geteister word en ongeveer 45 persent van die 13 miljoen inwoners verteenwoordig.