Karin Roodt – Bladsy 35

Posaflewering deur staking ontwrig

‘n Staking deur tydelike poskantoorwerkers wat aflewering ontwrig, is in sy tweede week.

Die tydelike werkers het besluit om te staak totdat hulle permanente aanstellings kry.

Talle mense kla dat pos laat, of glad nie, afgelewer word nie.

Dienste in Johannesburg en Pretoria word die ergste geraak met posbusse wat nou al veertien dae leeg staan.

Die poskantoor sê daar kan nie aan die stakende werkers se eise voldoen word nie.

‘n Woordvoerder van die poskantoor het vroeër gesê dat so ‘n stap reuse finansiële verliese sal meebring.

Wie is die geheime buitelandse skenker?

Die ANC is baie bekommerd oor die rol wat ‘n geheime internasionale skenker gespeel het om opposisiepolitiek in Suid-Afrika te manipuleer.

Druk deur ‘n buitelandse skenker het glo gelei tot die samesmeltingsplan van die DA en Agang SA wat binne enkele dae gesneuwel het.

Afrika is ‘n puinhoop van mislukkings weens buitelandse rolspelers wat politieke opportuniste ondersteun om regerings tot ‘n val te bring. Dit lei tot groter onstabiliteit en twis en dikwels tot geweld op die vasteland.

“Wat die meeste kommer wek, is die openbare erkenning van die twee partye se leiers dat buitelandse elemente, wat hul geldelike hulpbronne as hefboom gebruik, in staat is om aan hulle voor te skryf hoe hulle hul organisasie moet struktureer, wie hulle moet lei, met wie hulle moet twia soek . . .” het Jackson Mthembu, ANC-woordvoerder gesê.

Die ANC het gesê die nuutste onthulling is hopelik nie ’n weerspieëling van die rol wat dié twee partye speel om kiesers se grondwetlike reg te ondermyn om vrye politieke keuses uit te oefen nie.

The New Age het berig dat Ramphele gesê het ’n skenker wou sien dat Agang en die DA saamsmelt.

James Selfe, voorsitter van die DA se federale bestuur, het die kritiek afgelag. “Ek stel voor hulle gaan konsulteer die Wizard of Oz, wat weet van goed soos Never-Neverland.”

Zille het later ontken dan die twee partye onder druk geplaas is deur die skenker wat fondse sou weerhou indien die samesmelting nie gebeur nie, alhoewel sy self vroeër getwiet het dat Ramphele deur ‘n skenker gedwing is tot ‘n samesmelting.

Zille het trouens in die twiet gesê: “Dit was nie net een skenker wat druk op Mamphela geplaas het nie. Dit was elke skenker. Hulle wil ’n verenigde, sterk opposisie hê.”

Zille het ook erken dat sy weet wie die skenker is, maar wou nie die naam bekend maak nie. Volgens sekere bronne is die skenker George Soros se Open Society Foundation, maar dit kon nie bevestig word nie.

Politieke partye, waaronder ook die ANC, is steeds lugtig om die name van hul skenkers bekend te maak.

Skaliegasontginning kom beslis, sê minister

Die regering het dit duidelik gemaak dat hy “beslis maar verantwoordelik” sal voortgaan met die ontginning van skaliegas.

Die minister van minerale hulpbronne, Susan Shabangu het by die opening van die Mynbou-indaba in Kaapstad se amptelike opening gepraat.

Sy het gesê finale regulasies in hierdie verband sal binnekort bekend gemaak word.

Die minister sê na beraming is daar tot 485.000 miljard kubieke voet skaliegas in die Karoo se rotsformasies.

Sy sê dit is noodsaaklik dat skaliegas ontgin word wat sal bydra tot koste-doeltreffende energie, werkskepping en talle ander voordele.

Shabangu sê die regering is opgewonde oor “spelbrekerontdekkings” in petroleumontwikkeling langs die kus en in die binneland.

Die indaba het sowat 8000 afgevaardigdes gelok, wat 2100 maatskappye en 110 lande verteenwoordig. Dit word gereken as die wêreld se grootste mynbou-investeringsgebeurtenis.

Die geleentheid eindig op Donderdag.

Vavi tier oor polisieflaters na dood van familielid

Die geskorste hoofsekretaris van Cosatu, Zwelinzima Vavi het by die Khayelitsha Kommissie van Ondersoek na die polisie Maandag gesê hy is siedend oor polisieflaters.

Vavi, wat soos Mandela aangetrek was vir die geleentheid, sê hy kon sy woede skaars beteuel weens ‘n reeks van beweerde polisieflaters na sy suster se kleinkind in die lokasie vermoor is.

Vavi het gesê die polisie het vyf dae geneem om die familie in te lig oor die moord op die 25 -jarige Busiswa Sizaba in Harare, Khayelitsha twee weke gelede.

Die polisie het opgedaag om te sê die kleindogter is dood gevind iewers in Khayelitsha, het die arbeidsleier gesê.

Hy was geklee in ‘n swart-en-wit hemp wat herinner aan die soort waarvan Nelson Mandela gehou het.

Terwyl Sizaba dikwels ‘n slagoffer van huishoudelike geweld in haar hut was, het Vavi gesê die polisie het nie ‘n bekende verdagte, wat hy beskryf as “die koning van die skrikbewind” in die gemeenskap aangekeer nie.

“Die polisie is besig om hierdie man te ondersoek, nou duidelik ‘n moordverdagte. Niks het gebeur nie,” het Vavi gesê aan ‘n klein skare inwoners en maatskaplike aktiviste wat rondom hom versamel het. “Dit is nou die einde van die tweede week sedert die moord gebeur het. Die man is nog steeds in die strate.”

Hy het gesê vigilante-bedrywighede vier hoogty oral op die Kaapse Vlakte.

Hy het ‘n beëdigde verklaring ingedien by die O’Regan-Pikoli Kommissie van Ondersoek na polisiëring in Khayelitsha.

Nie ver daarvandaan nie het Cosatu se Wes-Kaapse sekretaris, Tony Ehrenrich toegegee dat die vakbondfederasie voor ‘n uitdaging staan oor eenheid in sy geledere.

Hy het by ‘n raadsvergadering van Nehawu-verteenwoordigers in Soutrivier gesê dit is die taak van werkers om toe te sien dat die eenheid van Cosatu voorrang kry bo individuele belange.

Hy sê werkers behoort beleid na te streef wat daarop gemik is om die lewens van gewone mense te verbeter.

Multikulti-kruisvaart bots uiteindelik met Engels

Coke se multikulti-kruisvaart het dié naweek uiteindelik tot ‘n etniese uitbarsting in hul tuisland gelei.

Die Amerikaanse Superbowl, ‘n groot nasionale sportgeleentheid, se advertensies is dikwels die onderwerp van omstredenheid, gewoonlik vir hul seksuele inhoud.

Hierdie jaar was daar weer ‘n swart sanger wat minderjarige seks aangeprys het en kenners het voor die byeenkoms gewaarsku dat kriminele tans meer geld uit mensehandel verdien as met dwelmhandel.

Prostitusie en mensehandel vier hoogty tydens die Superbowl, wat hierdie pas afgelope naweek in die MetLife Stadion, East Rutherford, New Jersey gehou is en daarna tot onluste gelei het.

Maar hierdie jaar het niemand eers ‘n wenkbrou gelig oor die sangitem wat algar tot minderjarige seks aanspoor nie of die onluste en vandalisme van die wenspan, die Seahawks se ondersteuners nadat hulle die Bronco’s verslaan het nie.

Dit was die taalgebruik in ‘n Coca-Cola-advertensie wat Engelssprekende Amerikaners warm onder die kraag gehad het.

Die advertensie wys Amerikaners van verskillende rasse en etniese groepe wat “America the beautiful” in ‘n verskeidenheid van tale sing. ‘n Ware multikulti-belofte in ‘n bottel.

Nadat dit uitgesaai is, is verskeie sosiale netwerk-webwerwe oorval met woedende kommentaar omdat die woorde nie net in Engels was nie.

Die maatskappy se amptelike Facebook-bladsy is toegegooi onder kommentaar na die advertensie in die Superbowl XLVIII verskyn het.

Baie het hul ontevredenheid oor die talige diversiteit uitgespreek en gesê hulle sal Coke boikot omdat die advertensie nie net in Engels was nie.

“@CocaCola has America the Beautiful being sung in different languages in a #SuperBowl commercial? We speak ENGLISH here, IDIOTS”

“Meksikane wat die [Amerikaanse] volkslied sing, is ‘n gruwel,” het ‘n ander groep gesê.

‘n Facebook-gebruiker het gestoom dat Amerikaners “niks beter is as die ontlastingput van derdewêreldinwoners, wat weier om hulself te verhef tot beter mense [ met behulp van Engels ] nie”.

Hy het gesê sonder Engels kan daar nie nasiebou wees nie en die advertensie is “slegs gemaak om selfhatende witmense te laat goed voel”.

Woedende kliënte het ook kommentaar gelewer op video’s wat op YouTube gepos is.

“Multikuluralisme het Amerika die afgelope 50 jaar in ‘n krotbuurt verander,” was een kommentaar.

Die feit is egter dat die Verenigde State oor geen amptelike taal beskik nie. Trouens, onder titel VI van die Wet op Burgerregte , kan dit as diskriminerend beskou word om toegang tot regeringsdienste of inligting aan individue met beperkte Engelse taalvaardigheid te voorsien .

Sestig miljoen mense in die VSA praat ‘n ander taal as Engels by die huis. Dit beteken dat vir elke 5 mense wat na die Superbowl kyk, ten minste 1 is waarskynlik ‘n taal praat wat nie Engels is nie.

Daar is 381 tale wat algemeen binne die Amerikaanse grense gepraat word. Die gewildste is Spaans, Frans , Duits, Chinees, Koreaans, Viëtnamees, en Arabies, volgens die jongste Amerikaanse opname.

Amerika was ook veeltalig lank voor Engels daar gepraat is. Van die 381 tale is 169 van hierdie tale inheemse Noord-Amerikaanse tale.

Terwyl die tale van die Amerikaanse inboorlinge dikwels buite rekening gelaat word, is daar nog 372,000 mense vandag wat daardie tale besig.

Baie van die stigterslede was veeltalig. John Adams, Thomas Jefferson, James Monroe, en John Quincy Adams al het verskeie tale gepraat. Van die 44 Amerikaanse presidente, kon ten minste die helfte ‘n ander taal as Engels skryf of praat.

En byna almal is boonop die produk van immigrasie.

Swart studente raak gewelddadig oor hulpgeldtekort

Die uitvoerende hoof van die Nasionale Studente Finansiële Hulpskema, NSFAS, Msulwa Daca, sê hulle beskik nie oor die nodige begroting om alle studente van hulp te wees nie.

Dié uitspraak kom nadat swart studente gewelddadig geraak het oor ‘n tekort aan hulpgeld.

Hy sê hoewel die fonds aangevul is, is dit steeds nie genoeg om al die studente te help wat aansoek gedoen het nie.

Die fonds het van R3,1 miljard in 2009 tot R9,7 miljard in 2014 gegroei.

Daca sê selfs privaatinstansies is reeds genader vir bydraes tot studentehulp.

‘n Vlaag studentebetogings by tersiêre instellings, hoofsaaklik oor befondsing, het op plekke tot geweld gelei. Weens die geweld is veiligheid by talle kampusse opgeskerp en die registrasieperiode vir aansoeke is verleng.

Die minister van Hoër Onderwys, Blade Nzimande, het ontevrede studente gemaan om eerder met die universiteit se bestuur in gesprek te tree, as om gewelddadig te raak.

Nzimande het die Durbanse Universiteit van Tegnologie besoek om met die bestuur en studenteverteenwoordigers te praat om hulle verskille te probeer bylê.

Lesings is verlede week onbepaald opgeskort nadat die studentebetogings daar in geweld ontaard het.

Die oproer by Tshwane Universiteit van Tegnologie (TUT) het bedaar en kampusse sal weer heropen hierdie week, het die instelling Maandag gesê.

Klasse sal na verwagting voortgaan Woensdag, nadat oproerige studente verlede week geskors is, het Willa de Ruyter, woordvoerder, gesê.

Nzimande het studente ook gewaarsku om hulle daarvan te weerhou om lesings te ontwrig en universiteitseiendom te beskadig.

Medupi: Swart woonbuurt in oproer oor afleggings

Inwoners van die swart woonbuurt Ga-Seleka by Ellisras (Lephalale) in Limpopo het oproerig geraak oor afleggings by die Medupi-kragstasie.

Hulle het met geweldadige protesoptrede begin teen die ontslag van werkers by die aanleg.

Die polisie is tans in die gebied ontplooi.

Die kragstasie nader uiteindelik voltooiing nadat die werk weens arbeidsonrus maande lank gesloer het.

Meer as tweeduisend poste sal vanjaar verlore gaan by Medupi wanneer verskeie projekte ten einde loop.

Die gesamentlike projekspan het begin om die werkmag van 17.000 te verminder na 800 wanneer die aanleg voltooi is.

Eskom en sy hoofkontrakteurs het vaardigheidsopleiding beskikbaar gestel aan werkers om vir die grootskaalse werkloosheid wat gaan volg te probeer vergoed.

Paaie is met brandende bande en klippe versper.

Busse wat werkers vervoer na die kragstasie, word verhoed om te ry.

Die betogers is glo ontstoke omdat plaaslike werkers geteiken word.

ANC verwelkom DA-optog na Luthulihuis

Die ANC het die Johannesburgse landdroshof se besluit om toestemming aan die DA te gee om ‘n optog na sy hoofkwartier – Luthulihuis – te hou, verwelkom.

Die DA sou die optog vandag gehou het, maar het besluit om dit tot aanstaande week uit te stel.

Dit volg omrede die DA ‘n uitgerekte regstryd met die Johannesburgse metropolisie verwag het.

Die metropolisie het die DA vroeër toestemming geweier om die optog te hou, maar die landdroshof het dit ter syde gestel.

Die leier van die DA, Helen Zille beoog om sowat 6.000 betogers na die ANC hoofkwartier te lei om die regering se aandag te vestig op korrupsie en ‘n behoefte aan werkskepping.

Die ANC-woordvoerder, Jackson Mthembu sê die party respekteer die hofuitspraak en sal gereed wees vir die optog. – RSG

Petrolprys kan verder klim waarsku AA

Die petrolprys kan verder klim, het die Automobiel Assosiasie gewaarsku.

Die pryse van alle grade petrol sal Woensdag met 39 sent per liter styg, en nog ‘n styging word aan die einde van die maand verwag.

Die president van die Reserwebank, Gill Marcus, het verlede week gesê die swak rand wisselkoers het die petrolprys negatief geraak.

In Desember en Januarie is die prys met 55 sent per liter verhoog.

Die AA meen ‘n petrolprys van R16 per liter in die mediumtermyn is nie onmoontlik as die rand voortgaan om waarde te verloor nie.

Hulle het daarop gewys dat die rand tussen laat Desember verlede jaar en laat in Januarie vanjaar 85 sent teennoor die dollar verloor het.

Die afgelope tyd het die internasionale petroleumprys effens verstewig.

Taxi’s ruk op teen e-tol

Die Nasionale Taxivereniging sê hoewel dit jammer is dat duisende pendelaars gister sonder vervoer was, was dit nodig vir die vereniging om sulke stappe te doen.

Die vereniging het na die Departement van Vervoer in Pretoria opgeruk om ‘n memorandum van eise te oorhandig.

Onder die eise is dat die regering sy belofte gestand doen om taxi’s van e-tol vry te stel.

Taxi-operateurs voer aan dat hulle sedert die inwerkingtreding van die e-tolstelsel in Desember verlede jaar rekeninge van tussen 20- duisend en 40-duisend rand gekry het.

Die vereniging se hoofsekretaris, Alpheus Mlalazi, sê alles sal na verwagting vandag weer na normaal terugkeer. – RSG

Winnie sonder ‘n sent

Nelson Mandela se tweede vrou, Winnie Madikizela-Mandela het nie ‘n sent ontvang van die voormalige staatshoof nie.

Madikizela-Mandela en Mandela is geskei in 1996 na ‘n huwelik van 38 jaar.

Madikizela-Mandela het na bewering R20 miljoen, die helfte van Mandela se bates, geëis met die egskeiding, maar haar eis was onsuksesvol.

Die anti-apartheidsveteraan is heeltemal oorgesien Maandag deur die eksekuteurs wat die testament in Johannesburg voorgelees het.

Haar kinders en kleinkinders is die begunstigdes.

Mandela het R3 miljoen elk vir hul twee kinders Zenani Mandela-Dlamini en Zindzi Mandela geskenk voor sy dood en hulle sal voorts niks ontvang nie.

Daar is ook drie trusts waarin daar glo aansienlike bedrae geld is, baie meer as die R46 miljoen wat ivm Mandela se erflating genoem is.

Daar word vermoed dat die kinders sal probeer om die trusts tot niet te laat verklaar deur die howe om die geld in die hande te kry.

Prokureurs sê Graca Machel, Mandela se derde vrou, sal waarskynlik van haar reg om helfte van die Mandela-boedel afstand doen en vier eiendomme in Mosambiek en ander bates, insluitend motors en juweliersware ontvang.

As sy dit doen, sal die twee kinders van haar en die afgestorwe president Samora Machel R3 miljoen elk ontvang en ses kinders uit Samora Machel se vorige huwelik 100000 rand elk erf.

Wat die Mandela-dogters betref sal Zenani se kinders – Zinhle , Zaziwe en Zamaswazi – R100 000 elk ontvang.

Bambatha, Zondwa, Zwelabo en Zoleka – wat Zindzi se kinders is – sal ook R100 000 elk kry.

Mandela se agterkleinkind, Zozuko Mandela (Zamaswazi se kind) sal insgelyks R100 000 kry van die boedel.

Adjunk-Hoofregter Dikgang Moseneke het Maandag aan verslaggewers die inhoud van Mandela se testament voorgehou.

Beskermd: Bodem 24: Die insypeling

Mampie wou nie by DA aansluit nie

Dr. Mamphela Aletta Ramphele het Maandag gesê die samewerking tussen die Demokratiese Alliansie (DA) en Agang SA het weens partypolitiek gesneuwel.

Sy het ook gesê die ineenstorting van die koalisie tussen die twee partye is hul albei se fout.

Ramphele kan volgens die DA se grondwet nie staan as die presidensiële kandidaat tensy sy ‘n DA-lid word nie.

“As ek ‘n DA-lid moet word om my droom en visie te bewaarheid, dan kan ek nie die DA se aanbod aanvaar nie,” het Mampie Rampie gesê.

“Sommige mense sal net nie na partypolitiek kan oorskuif nie,” het sy bygevoeg. “Mense is vasgevang in rassepolitiek.

“Ek het geleer om te luister na my lede. En daar is miljoene Suid-Afrikaners wat nie vir die DA sal stem nie,” het sy gesê.

Agang-lede beskou die DA as ‘n wit party.

Die DA het Sondag verklaar dat Ramphele nie meer die DA se presidensiële kandidaat sal wees nie na ‘n samesmelting vyf dae gelede met groot fanfare aangekondig is.

Volgens Helen Zille wou Mampie Rampie die leier van Agang SA bly asook die DA in die komende nasionale verkiesings lei.

“Dit is verkiesingsnonsens,” het Zille woedend gesê. “Jy kan nie ‘n leier van ‘n party wees en ‘n presidensiële kandidaat van ‘n ander nie,” het sy gesê.

Bronne binne AgangSA sê egter dit is presies wat die DA aan Mampie voorgehou het.

Verlede week se aankondiging is byna op die laaste minuut gekanselleer omdat Mampie glo daarop aangedring het om die volgende sin in te sluit: “In ‘n nuwe Suid-Afrikaanse inisiatief sal ek leier van Agang SA bly asook die DA se presidensiële kandidaat”.

Zille het gesê dit was nie wettig moontlik nie, maar haar nogtans omgepraat om die inligtingsessie oor die samesmelting te hou.

Mampie Rampie het Maandag om verskoning gevra vir enige ongelukkigheid wat haar besluit meegebring het.

Trevor Manuel sê mense moet nie soos hy geld uit politiek maak nie

Trevor Manuel, minister in die presidensie, het Maandag gesê Suid-Afrikaners moet nie soos hy geld uit politiek probeer maak nie.

Hy het gesê om sy voorbeeld te volg is nie die oplossing nie.

“Moenie na my kyk en sê dat omdat ek my geld uit politiek maak, is ek die oplossing nie. Ek is nie die oplossing nie. Ek dink ons moet anders na die kwessie kyk.”

Hy het Maandag ‘n toespraak by die Universiteit van Stellenbosch se Teologiese Dag gelewer oor die funksie van die Nasionale Ontwikkelingsplan (NOP).

Politici is nie die oplossing vir Suid-Afrika se probleme nie, het hy gesê.

Elkeen moet die verantwoordelikheid vir sosiale probleme op sy eie skouers neem en nie na politici soos hy kyk vir ‘n oplossing nie.

“Al het demokrasie vir elke Suid-Afrikaner die geleentheid gegee om eienaarskap te neem van wat in die land gebeur, is ons grootliks besig om die taak te wil oorhandig aan iemand anders. Ons weet dit gebeur. Ons reageer net nie daarop nie,” het hy gesê.

Volgens Manuel weet Suid-Afrikaners nie hoe aktiewe burgerskap werk nie, en dit lei tot swak demokrasie en uiteindelik korrupsie.

“Pak die probleme self aan,” het hy gesê. “Moenie wag tot met die verkiesing en dan jou skouers ophaal en sê dat jy nou gaan wag en sien wat die party vir jou gaan doen nie. Dis nie demokrasie nie.”

Hy het gesê die NOP beteken dat Suid-Afrikaners aktief betrokke moet raak.