Penny Sparrow – praag.co.za

Dan Roodt: Die aap in die Suid-Afrikaanse politiek

Ten minste sedert die Penny Sparrow-voorval, weet ons dat die woord “aap” in ons land uiters gevaarlik geword het. Veral op Engels as: “monkey”. Vir die Afrikaanssprekende klink “monkey” na ‘n verkleiningsvorm; dit het iets kinderliks en vriendeliks. Helaas, het ons nou die ander gesig van die aap gesien, in die vorm van massa- en mediahisterie.

Nog meer onlangs het ‘n horde rooi wagte van die EFF etlike winkels van die Sweedse modehuis Hennes en Maurits bestorm en daarbinne amok gemaak. Dis nou die fameuse “H & M”. Ek besit self ‘n paar linnehemde en -broeke van H & M; ek moet sê, dit verskaf my tans ‘n vreemde gevoel om hulle aan te trek, asof ek een of ander gebod oortree. Die aapgebod?

Om ‘n swartman ‘n aap of bobbejaan te noem, is kennelik ‘n “misdryf” soos dit in die taal van die strafhof heet. Om egter by ‘n kettingwinkel in te bars en jou op die oog af soos ‘n aap te gedra, is geen misdryf of oortreding nie; dit heet “protes” of “betoging”. Ons is al gewoond daaraan dat gewelddadige betogings, wat dikwels met saakbeskadiging gepaard gaan, in ons land onder die ANC-bewind aanvaarbaar geraak het. Dit gee nuwe betekenis aan die uitdrukking: “om te maak of breek soos jy wil”.

Solank jy net nie die aapwoord gebruik nie, anders is jy in gróót moeilikheid. Dit lei egter tot ‘n — myns insiens — tweede paradoks, en dit is: In die beklemtoning van ons gemeenskaplike primaatvoorouers by die Sterkfonteingrotte en elders, het ons reeds as’t ware die aap en veral die aapmens tot iets mensliks, of dan hominieds, verhef.

Toe ek jonk was, was daar ‘n kinderboek deur Sita waarin daar sprake van ‘n aapmens was. Die titel is: Mientjie en die aapmens. Ek kan nie die besonderhede meer onthou nie, behalwe dat Mientjie op vakansie Oos-Transvaal toe gegaan het, waar sy die aapmens sou teëkom.

Dan is daar nog die plaas naby Brandfort wat aan wyle advokaat C.R. Swart, die huidige republiek se eerste seremoniële president, behoort het. Op Nederlands, het dit “De Aap” geheet. Moontlik sou ‘n hedendaagse Naarpershoernalis wat na die spreekwoordelike “rassis onder elke bed” soek, iets sinisters daarin kon lees. “Apartheidspresident het op die plaas ‘De Aap’ gewoon”, sou ‘n gepaste opskrif kon wees. Binne die huidige, taalpreutse konteks kan dit iewers dalk as “skokkend” voorgestel word.

De Aap, plaas van wyle C.R. Swart. Foto: Dana Snyman se Facebook.

Eintlik is dit heel ironies. Want, Suid-Afrika is seker een van die mees dekadente samelewings op aarde, waar elke oortreding, selfs moord of verkragting, verdra word. Die bevolking in sy geheel word deur die media en die owerheid aangemoedig om so losbandig as moontlik te wees en hul oor te gee aan lolyt, brassery en ‘n soort revolusionêre roes waarin die drifte botvier. As ‘n blyk van vreugde, brand jy sommer jou buurman se huis af. Dis soos ‘n karikatuur van die Wilde Weste in Hollywoodfilms: ‘n gesuip in die kroeg, skote in die lug of sommer ‘n skietgeveg op straat, terwyl die vrederegter (sheriff) insgelyks dronk in sy kantoor sy roes afslaap. Anders as in die films, beskik Suid-Afrika kwalik oor eerlike, opregte burgers wat teen die onreg en wanpraktyke in opstand kom.

Dus, niks kan ons meer skok nie. Ons is gewoond aan die ergste: Diefstal. Moord en doodslag. Plaasmoorde. Dis alledaags. Vele misdrywe word nie eens meer by die polisie aangemeld nie, behalwe as dit vir versekeringsdoeleindes benodig word. Daarom is die hele gedoe rondom die woord “aap” of “apie” amper verfrissend. Want dit skep ‘n soort waanbeeld dat die inwoners van dié verrotte land nog iewers oor ‘n morele beginsel beskik! Niks traak hulle meer nie, die misdaad en korrupsie, selfs diegene wat op straat urineer (dit sien ek elke dag in Johannesburg), dog iewers trek hulle die streep: by die woord “aap”. Dít vind hul skokkend, grensoorskrydend, taboe. Hoe sonderling!

Helaas. Ek vermoed dat die EFF se kordate rooi wagte in hul ewe rooi oorpakke kwalik deur die A-woord geskok word. Dis alles bloot politieke teater. Kunsmatige verontwaardiging. Netnou gaan hulle in hul luukse, Duitse viertrekwaens klim en na Amerikaanse kletsrymmusiek luister waarin daar blatant en herhaaldelik na “kaffers” (niggers) en “hoermeide” (hoes) verwys word. Hulle glimlag daaroor.

As voorbeeld – en daar is beslis veel erger – haal ek aan uit die liedjie deur die gewilde kletskrymer Drake, genaamd “Jorja interlude”:

Tryna stay light on my toes
Just ran a light in a Rolls
Told me I’m lookin’ exhausted
You hit it right on the nose
I’m tired of all of these niggas
I’m tired of all of these hoes
Worried ‘bout takin’ my lane
They ain’t even got on the road

Dis alles net ‘n groot klugspel. Die gekrenktes maak asof hulle kamma deur die aapwoord onstel word, maar eintlik is almal reeds so blasé dat niks hulle ooit kwel nie. Ons beleef lankal reeds ‘n amorele toestand van anomie. Vir diegene wat nie weet nie, die term “anomie” is deur die Franse sosioloog Émile Durkheim gewild gemaak. Dit word gedefinieer as ‘n “toestand waarin die maatskappy min morele leiding aan indvidue verskaf”. Klink dit nie presies net soos die toestand waarin ons land verkeer nie?

Behalwe dat jy baie versigtig met jou verwysings na die diereryk en veral die orde van die primate moet omgaan, heers daar groot verwarring in Suid-Afrika oor wat reg en verkeerd, beskaaf of onbeskaafd, hoflik of onhoflik sou wees.

Eugène Marais, wat tans oor die algemeen as ‘n polities korrekte liberalis voorgestel word, het ‘n boek geskryf met die titel Die siel van die aap. Nie net is daar verskeie paragrawe in die boek wat hom vandag voor die erg rasbewuste SA Menseregtekommissie sou laat beland nie, maar hy het insgelyks ingesien dat die gedrag van die mens en van die bobbejaan heelwat ooreenstem.

Die mens staan dus redelik naby die sogenaamde hoër primate, soos wat Marais ingesien het:

“Nietemin is een beginsel seker (en elke oplettende Afrikaner weet dat dit so is, en sal dit geredelik erken): dat die kloof wat die bobbejaan in hierdie opsig (en in alle sielkundige opsigte) van die laer soogdiere skei, baie wyer en dieper is as dié wat die mens van die bobbejaan skei – met ander woorde, die ‘slimheid’ van die bobbejaan, wanneer met dié van die hoogste soogdier vergelyk, is oneindig groter as die ‘slimheid’ van die mens met dié van die bobbejaan vergelyk.”

Om die mens binne sy orde van primate te klassifiseer, veroorsaak politieke skande en selfs woede by radikale of Afromarxistiese groepe soos die EFF. Nietemin het die ANC-bewind, asook die links-liberale groepering in die Suid-Afrikaanse politiek, miljoene der miljoene rande daaraan bestee om die gedagte te vestig dat ons land “die wieg van die mens” verteenwoordig. Die huidige homo sapiens sou van die aapmense van Afrika afstam, iets waarop ons veronderstel is om trots te wees.

Vermoedelik is die evolusieteorie vir die huidige bewind en sy links-liberale meelopers aantreklik omdat dit sou behels dat alle menslike rasse van dieselfde aapmens afstam. Stephen Jay Gould, die ontslape Amerikaanse antropoloog, het iewers gesê: “Menslike gelykheid is ‘n toevallige feit van die (evolusie)geskiedenis.” Met ander woorde, dit sou kon gewees het dat die rasse beduidend van mekaar kon verskil het, maar “toevallig” is ons almal gelyk. Dié stelling het Gould, ‘n Joodse Amerikaner blykbaar die eerste keer tydens ‘n besoek aan Pretoria neergepen. Gould is egter ook daarvan beskuldig dat hy bepaalde feite gemanipuleer of verander het om sy siening te staaf.

Gegewe die histerie oor Penny Sparrow en die Britse H & M-kappiehemp, wil dit nou voorkom asof ons “gemeenskaplike herkoms vanaf die aapmens van Sterkfontein” nie meer so sterk beklemtoon word nie. Die hoofstroommedia en die radikale linkse groepe (eintlik is die hoofstroommedia self ‘n radikale linkse groep, wesentlik marxisties in hul uitkyk) is nie meer so erg trots op ons primaatskap en dat ons na verwant aan die ape en bobbejane is nie.

In ‘n samelewing waar die mees vuige taalgebruik, onbeskoftheid, gebrek aan beskaafde maniere — waag dit maar net op die paaie in Gauteng om die dierlike aard van die bestuurders te ervaar — is daar maar een soort “belediging” wat onaanvaarbaar is en dit is om iemand met ‘n aap of ‘n bobbejaan te vergelyk!

Dit is gewoon kranksinnig. Maar ons land het kranksinnig geword, dít weet ons lankal. Dat die kranksinnige regering en media toegelaat het dat 143 geestessiek pasiënte tydens die Life Esidimeni-voorval soos in ‘n Britse konsentrasiekamp weens honger, uitputting en verwaarlosing gesterf het, is maar een simptoom van die wesentlike waainsin onderliggend aan hierdie verdrukkende en onregverdige bestel.

Zille is die nuwe Penny Sparrow

Die Wes-Kaapse provinsiale wetgewer sal na verwagting ‘n debat hou oor die premier, Helen Zille se twiets wat kolonialisme regverdig.

Zille het intussen om verskoning gevra omdat sy getwiet het dat die nalatenskap van kolonialisme nie slegs negatief is nie, maar die ANC in die provinsie sowel as swartes in die haar eie party, wil hê Zille moet as premier afgedank word.

Die ANC-lid in die wetgewer, Khaya Magaxa het die debat aangevra. Die DA se regskommissie ondersoek intussen of Zille se twiets die party se grondwet geskend het.

Prince Mashele sê Zille wortels gaan terug na die kolonialiste wat hulself in Suid-Afrika gevestig het onder die voorwendsel dat hulle hier was om barbaarse inboorlinge beskaaf te maak.

Moderne infrastruktuur is nie ‘n bewys van die welwillendheid van kolonialisme nie, sê hy. Dit is bedoel om die geheue van swart mense uit te wis, en te laat vergeet van die groot-skaalse grondonteiening.

Vandag leef swart mense soos sardientjies in krotte en townships weens kolonialisme en Zille se apartheid, volgens hom.

“Gaan na ‘n myn in Suid-Afrika vandag en jy gaan sukkel om ‘n wit persoon ondergronds te vind,” sê Mashele.

Die feit dat Zille bomplanters, ANC-terroriste, in haar huis laat skuil het in die verlede voor die organisasie ontban is, is blykbaar vergete. Mashele het Zille reeds met die ander opspraakwekkende groot rassis, Penny Sparrow vergelyk.

Die media is ook taamlik stil oor die swart “kunstenaar” wat Zille sonder ‘n broek geskilder het.

Penny Sparrow se aansoek om appèl misluk

Penny Sparrow se aansoek om verlof tot appèl teen ‘n gelykheidshofbeslissing was onsuksesvol.

Die Scottburgh gelykheidshof het Donderdag haar aansoek ter syde stel weens onreëlmatighede in terme van die reëls van die hof se beslissing, en haar beveel om die regskoste van die ANC se betaal.

Vergesel deur haar dogter Charmaine Cowie, moes Sparrow hoor daar was ‘n “aantal gebreke” in haar aansoek wat sy in Julie geliasseer het.

Die ANC se prokureur Peter Williams het die administratiewe foute in haar aansoek uitgewys.

Hy het bygevoeg dat die kennisgewing van appèl ook buite die vasgestelde tydperk ingehandig is en dat sy versuim het om die betrokke bevel en gronde uiteen te sit.

In ‘n Facebookpos in Januarie, het Sparrow swart morsjorse met ape vergelyk omdat die hordes op Nuwejaarsdag in Durban die strande vervuil het. Die ANC het haar hof toe gesleep oor haar “rassisme”, klaarblyklik ‘n bekentenis dat die strand ‘n vullisafvalhoop is.

In Junie het die Umzinto-gelykheidshof gelas dat Sparrow tot R150 000 betaal aan die Oliver en Adelaide Tambo Stigting.

Nadat die gelykheidshofsaak afgehandel is, is Sparrow krimineel aangekla weens crimen injuria.

Die Scottburgh-landdroshof het haar beboet met R5 000 in September nadat sy skuldig gepleit het. Die boete was die gevolg van ‘n pleitooreenkoms.

Sparrow is gevonnis tot ‘n verdere twee jaar gevangenisstraf, opgeskort vir vyf jaar.

Brief: Het voorgestelde haatmisdaadwetgewing ‘n bestaansreg?

Ek is nie ‘n prokureur nie en die sienings wat ek deel is slegs hoe ek dit interpreteer en nie noodwendig dié van ‘n regsgeleerde nie. Maar die voorgestelde haatmisdaadwetgewing opper baie vrae.

http://www.justice.gov.za/legislation/bills/2016-HateCrimes-HateSpeechBill.pdf

Offence of hate crime

3.

A hate crime is an offence recognised under any law, the commission of which by a person is motivated on the basis of that person’s prejudice, bias or intolerance towards the victim of the hate crime in question because of one or more of the following characteristics or perceived characteristics of the victim or his or her family member:

(a) Race; (b) gender; (c) sex, which includes intersex; (d) ethnic or social origin; (e) colour; (f) sexual orientation; (g) religion; (h) belief; (i) culture; (j) language; (k) birth; (l) disability; (m) HIV status; (n) nationality; (o) gender identity; (p) albinism; or (q) occupation or trade.

Volgens die definisie van “maatmisdaad” is dit duidelik dat die regstellende-aksiewetgewing, asook ook die swartbemagtigingswetgewing daardeur gekanselleer word. Ek sê so omdat baie van die wetgewing geskryf is in die gees van diskriminasie teen blankes en veral teen blanke mans. Die vraag dan is of dit so toegepas sal word?

Verder dink ek nogal is dit nie ‘n te slegte stuk wetgewing nie want dit sal vryheid van spraak vir die linksliberale pers totaal en al inperk en die geweeklaag van mense soos Max Dup sal nie meer kan plaasvind nie.

As mens verder lees sal jy sien dat dit nie jou as persoon se interaksie met mense inperk nie. Ek neem as ‘n voorbeeld: Ek stuur ‘n boodskap aan ‘n groep dat ek nie organisasies sal ondersteun wat Blank sowel as Swart kinders kos gee nie. Ek pleeg nie ‘n haatmisdaad deur dit te sê nie, ek deel slegs my siening met ‘n groot groep mense. Maar as een van daardie mense, kom ons sê maar die persoon is hopeloos te liberaal, my aanval oor my siening en uitkyk op die wêreld en my bv name noem pleeg daardie persoon ‘n haatmisdaad. Sou daardie persoon verder gaan en dit wat ek gesê het versprei na sy kontakte toe met die gedagte dat hulle my ook moet aanval, dan pleeg daardie persoon ook ‘n haatmisdaad.

Ek vra dus die vraag of Penny Sparrow onder dié wetgewing aangekla sou kon word, sy het verwys na morsjorse as ape. Regter Mabel Jansen het weer in ‘n privaatboodskap haar sogenaamde misdaad gepleeg. Die wetgewing is duidelik dat privaat omgang, tensy dit is om iemand aan te hits om ‘n haatmisdaad te pleeg, nie ‘n misdaad is nie. Om egter daardie privaat kommunikasie te gebruik om die persoon aan te val en in ‘n slegte lig te stel, is wel ‘n haatmisdaad. So Gillian Schutte het haarself dus skuldig gemaak aan ‘n “haatmisdaad” omdat sy Jansen aangeval het uit haar verhewe liberale “prejudice, bias or intolerance towards the victim”. My vraag dus is as Jansen ‘n klag teen Schutte sou lê wat sal die uitspraak dan wees? Sou die hof nie Schutte skuldig bevind nie sal dit al reeds ‘n groot deel van die wetgewing tot niet maak. Verder moet net een politieke persoon met aansien aangekla word vir ‘n onbesonne ding wat hy of sy kwytraak en onskuldig bevind word en daar stort die wet totaal ineen.

Nou moet ek vra: Wie het hierdie konsepwet saamgestel?

Moet ons stilbly en die wet laat deurgaan en vinnig speel, ‘n paar liberale en swartes uitlok en aankla om sodoende die tande van die wetgewing te trek of moet ons die voorgestelde wetgewing met hand en tand beveg?

Ek sal graag die siening van ‘n regsgeleerde wil sien aangaande my afleidings.

– Jan Malan

Cosatu trek ‘n Vrystaatse Penny Sparrow

Drie studente van die Universiteit van die Vrystaat staar dissiplinêre optrede in die gesig nadat hulle water in die gesig van ‘n sekuriteitswag by een van hekke van die instelling gespuit het.

Volgens UV-woordvoerder, Lacea Loader, universiteitswoordvoerder is ‘n klagte ontvang op 16 Augustus. Loader sê die dissiplinêre verhoor is geskeduleer op ‘n dringende basis vir 1 September.

In ‘n verklaring wat uitgereik is Woensdag, het die Vrystaatse tak van Cosatu die aanval deur “wit rassiste” betreur en die studente sonder meer as “wit barbare en rasdwepers” uitgekryt.

Hulle beweer dat die swart vroulike veiligheidswag in die gesig gespuit is met “urine”, kennelik om ‘n bietjie Reitz4-voordeel te trek uit die voorval.

Gedurende die Reitz4-voorval is ook beweer dat swart skoonmakers “urine” moes drink, ‘n totale versinsel wat nooit in die media reggestel is nie.

Die drie studente is teruggestuur deur die wag na hul koshuis omdat hulle hul studentekaarte vergeet het.

In videomateriaal, is dit duidelik dat ‘n student aan die passasierskant van die voertuig iets spuit, het sy gesê.

“Ons deel die pyn, vernedering en verleentheid wat die arme werker gevoel het toe die voorval plaasgevind het. Ons veroordeel hierdie wit barbare en rasdwepers,” het Cosatu gesê in hul kollektiewe aanval op wittes.

Penny Sparrow is vir ‘n soortgelyke oortreding beboet omdat sy kollektief na swart morsjorse as “ape” verwys het.

Cosatu sonder egter nie enige wit groep uit nie, maar maak ‘n algemene anti-wit stelling, en erger nog eis hulle dat alle wit mans in die Vrystaat ‘n skulderkenning doen vir die voorval.

“Dit is beide ‘n rassistiese en ‘n patriargale aanval op hierdie werker en ons doen ‘n beroep op alle wit mense en mans in die provinsie om dit te verwerp en dit duidelik te maak dat dit nie in hul naam gedoen is nie.”

In ‘n ander voorval, sal ‘n dosent aan die Universiteit dissiplinêre stappe moet trotseer omdat hy een van die vrae ingesluit het in die Afrikaanse weergawe van ‘n vraestel, terwyl dit is uitgesluit was in die Engelse weergawe.

Die dosent sê dat dit ‘n eerlike fout en nie opsetlik nie.

Penny Sparrow kry nuwe regshulp

Penny Sparrow het Maandag vlugtig in die Umzinto-landdroshof verskyn.

Sparrow, wat neerhalende opmerkings oor swart strandgangers gemaak ná hulle morsige Oujaarsaandpartytjie op Facebook, is aangekla van crimen injuria.

Sparrow was stil in die beskuldigdebank terwyl sy deur landdros Vincent Hlatshwayo aangespreek is.

Die saak is uitgestel sodat haar nuwe prokureur kan konsulteer met haar. Sy sal nou verteenwoordig word deur ‘n Regshulpprokureur, Elaine MacDonald.

In haar oorspronklike Facebook post, Sparrow het geskryf:

“These monkeys that are allowed to be released on New Year’s eve and New Year’s day on to public beaches towns etc obviously have no education what so ever so to allow them loose is inviting huge dirt and troubles and discomfort to others.

“I’m sorry to say that I was amongst the revellers and all I saw were black on black skins what a shame. I do know some wonderful and thoughtful black people. This lot of monkeys just don’t want to even try. But think they can voice opinions and get their way of dear,” she continued.

“From now on I shall address the blacks of South Africa as monkeys as I see the cute little wild monkeys do the same, pick and drop litter,” Sparrow added.

In Junie het die Umzinto-gelykheidshof gelas dat Sparrow tot R150 000 betaal aan die Oliver en Adelaide Tambo Stigting.

In ‘n onderhoud met News24, het Sparrow gesê dat “aap” gebruik word as ‘n troetelwoord deur wit mense.

Sparrow het intussen doodsdreigemente ná haar kommentaar ontvang.

“Die dreigemente was verskriklik … my selfoon was so besig dat ek nie kon bel nie. Daar was verskriklike doodsdreigemente. Mense het gesê hulle gaan my huis bom en ander het foto’s gestuur van naakte vroue, en gesê ek gaan verkrag word… dit was skokkend,” het sy gesê.

Penny Sparrow-fondsinsameling afgehaal ná klagte van Julia Moore en KPMG

‘n Fondsinsamelingsveldtog om Penny Sparrow te help om haar R150 000 boete vir “haatspraak” te betaal, is van die internet verwyder, danksy ‘n klagte van ene Julia Moore, ‘n werknemer van die ouditeursfirma, KPMG. Dit is tans onduidelik of die klagte deur KPMG self of deur me. Moore, wat oënskynlik ‘n maatskaplikegeregtigheidskryger is, aanhangig gemaak is. Toe die veldtog van die webblad youcaring.com verwyder is, het dit reeds op $355 (ongeveer R5400) gestaan. Een van die ondersteuners op die blad was optimisties dat die insamelingspoging “viraal sou raak” en dat hulle maklik die $10 000 of selfs meer vir Penny Sparrow sou kon insamel.

Aanvanklik was daar net ‘n paar kleinerige bedrae van $10 wat mens geskenk het, maar ná twee skenkings van $100 elk, het dit skielik momentum begin verkry. Dit is egter op dié oomblik wat Julia Moore op die toneel verskyn het en verklaar het dat sy en ander klagtes teen die fondsinsameling by Youcaring aanhangig gaan maak.

Sy gebruik die Portugese slagspreuk van die Frelimo-terroristebeweging “a luta continua”, wat in die tagtigerjare insgelyks deur die ANC en SAKP oorgeneem is toe hulle meer as 200 terreuraanvalle op burgerlikes in Suid-Afrikaanse stede, asook op plase, met die hulp van die DDR en die Sowjetunie, geloods het.

Volgens haar Facebook-profiel het Julia Moore aan die Universiteit van Kaapstad gestudeer, ‘n kampus van waar vele linkse, antiwit maatskaplikegeregtigheidskrygers afkomstig is. Dit is ook daar waar die omstrede Chumani Maxwele die standbeeld van Cecil John Rhodes met ontlasting bestrooi het.

Hier is Julia Moore op ‘n Facebook-foto saam met haar vriend; hulle is ook motorfietsgeesdriftiges.

julia_moore5 — Julia Moore, die linkse maatskaplikegeregtigheidskryger wat Penny Sparrow verder finansieel wil ruïneer deur te verhoed dat simpatiekgesindes vir haar geld insamel om haar boete te betaal.

Brief: Waaraan is Lee Harvey Sparrow presies skuldig?

Ek was verstom om te verneem dat die Gelykheidshof Penny Sparrow met ‘n allemintige R150 000 beboet het. Mense wat ernstige misdade soos aanranding of dwelmhandel pleeg, kom dikwels weg met ‘n veel kleiner boete, dikwels so min soos R1000.

Tweedens is ek nie seker daar bestaan eens so ‘n persoon soos sy nie. Me Sparrow het nie eens by haar verhoor in Suid-Afrika se kangaroehof opgedaag nie. As ons egter aanneem dat daar inderdaad so ‘n persoon is, en sy nie net ‘n fiktiewe Lee Harvey Oswald-tipe sondebok is nie, vind ek dit ook moeilik om te begryp presies waaraan sy presies skuldig is.

Die linkse Rand Daily Mail berig byvoorbeeld hier dat me Sparrow skuldig bevind is aan “racist speech.” Ek is geen regsgeleerde nie, maar ek het nog nooit van ‘n gedefinieerde regsterm bekend as “racist speech” gehoor nie. Bestaan daar so ‘n definisie in die Suid-Afrikaanse reg? Daar is wel iets soos haatspraak, maar haatspraak het ‘n baie eng definisie: Dit is spesifiek uitlatings wat geweld teenoor ‘n groep aanhits (“Kill the Boer”). Om bloot te kla oor rommelstrooiery op strande, voldoen baie beslis nie aan hierdie definisie nie. Lee Harvey Sparrow het ook nie op Facebook aanbeveel dat rommelstrooiers fisieke leed aangedoen moes word nie, dus kan sy nie skuldig wees aan die eng definisie hierbo verskaf nie.

Waar daar wel in die verlede rassistiese insidente was, was die regsmenings waarvan ek gelees het dit eens dat die klag van crimen iniuria eerder teen die beweerde rassis gebruik moes word. Lee Harvey Sparrow is egter juis nie van crimen iniuria aangekla nie. Weer eens, ek is geen regsgeleerde nie, maar ek sou dink ‘n suksesvolle vervolging vir crimen iniuria sou vereis dat ‘n indiwiduele klaer sou moes kon bewys dat sy eer of aansien regstreeks gekrenk is deur Lee Harvey Sparrow se uitlatings. Dit was egter die ANC wat die klag teen haar ingedien het en nie een van diegene waarna sy verwys het nie, naamlik die rommelstrooiers op die strande nie.

Hierdie inskrywing op Facebook was R150 000 werd: vir die Oliver en Adelaide Tambo-stigting.

Dit was dus ‘n soort klasaksie teen Lee Harvey Sparrow namens ander mense, en die betrokke klas van klaers blyk meestal uit professioneel gekrenkte politici te bestaan. Lee Harvey Sparrow het dit duidelik gehad teen ‘n baie spesifieke groep: Rommelstrooiers. Het daar een enkele rommelstrooier, in sy indiwiduele hoedanigheid, ‘n klag teen Lee Harvey Sparrow ingedien omdat hy skaamkwaad was oor sy eie gedrag op die strand? Nee; die politici het eerder namens die rommelstrooiers besluit húlle eer is gekrenk. As ek op straat loop en toevallig hoor hoe Jan vir Piet ‘n donkie noem, mag ek dus namens Piet ‘n klag gaan indien, al maak Piet nie self so nie?

Die grootste probleem wat die politici het, skyn te wees dat Lee Harvey Sparrow geskryf het dat swart rommelstrooiers op strande apies sou wees. Dit is uiteraard nie letterlik bedoel nie, en sulke vergelykings is algemeen. Hillary Clinton het byvoorbeeld, met verwysing na oudpresident Clinton se seksuele eskapades, gesê dat “(Clinton) is not an easy dog to keep on the porch”. Me Clinton moet haar sterre dank dat sy nie in SA woon nie, want Bill sou haar maklik voor die kangaroehof kon sleep en haar daarvan verkla het dat sy beweer hy is letterlik ‘n hond. Ons kinders sou ook destyds my ouers ook kon verkla dat hulle gese het ons was varkies omdat ons kamers so omgekrap was.

Niemand, behalwe die professionele slagoffers in Suid-Afrika, is egter so onnosel om te wil hof toe hardloop oor so ‘n onbenulligheid nie. Bill Clinton sou verstaan het dat Hillary bedoel het hy gedra hom soos ‘n rondloperhond, en nie dat hy letterlik ‘n stert en skerp tande het nie. Ek en my sussies het eweneens verstaan dat ons ouers nie bedoel het dat ons letterlik otjies was nie, maar dat ons ons eerder soos varke gedra het. Mens noem dit ‘n vergelyking of dan ‘n metafoor, en die vergelyking met dierlike gedrag handel duidelik oor ‘n bepaalde gedragspatroon.

Al hierdie dinge klink vir my heeltemal te vreemd en die uitspraak is eintlik soos ‘n boendoehof s’n vir my. Siende dat dit nou egter aanvaarbaar is om iemand kangaroehof toe te sleep vir ‘n dieremetafoor, en as dit dan wel gaan oor veralgemenings wat teen ganse groepe gemik is, wat maak mens dan oor die talle skelwoorde en beskuldigings wat daagliks teenoor blankes geslinger word? “White privilege”, “gronddiewe” en dies meer? Is dit nie tyd dat blankes ook namens ons eie pro-forma-slagoffer, ons eie Lee Harvey van der Merwe, ‘n klag by die kangaroehof indien omdat ons as groep die uitsprake van die ganse ANC en EFF grof kwetsend vind nie?

– John Visagie

Cliff gaan voort met R25 miljoen se eis teen M-Net

Die wit radiopersoonlikheid en Idols-beoordelaar Gareth Cliff se regspan sal voortgaan om M-Net vir R25 miljoen te dagvaar nadat hy weens sy beweerde rassisme afgedank is.

Cliff dagvaar M-Net vir R5 miljoen vir laster en R20 miljoen vir kontrakbreuk en eis dat hy heraangestel word as beoordelaar van Idols.

Dali Mpofu sal Cliff se saak teen die uitsaaier behartig. Mpofu is ‘n lid van die EFF.

Die saak sal na verwagting op 26 Januarie in die hooggeregshof in Johannesburg aangehoor word.

M-Net het Cliff afgedank omdat hy Penny Sparrow se vryheid van spraak wou verdedig.

Sparrow het na swart strandmorsjorse as “ape” verwys op Facebook en Cliff het oor die rasherrie gesê Suid-Afrikaners weet nie wat meningsvryheid beteken nie.

ANC kla 3 ‘rassiste’ van DA aan, om ‘rasse-oorlogvoering’ te voorkom

Die ANC het losgetrek met ‘n reeks regsprosedures teen vier mense wat die party as die land se grootste “rassiste” beskou. Twee van hulle is DA-ampsdraers, Dianne Kohler Barnard en Chris Roberts, asook die sedertdien geskorste DA-lid wat reeds nasionale en internasionale berugtheid verwerf het, Penny Sparrow. Die enigste swart “rassis” wat aangekla word, is Velaphi Khumalo, ‘n werknemer van die dept. sport, kuns en kultuur in die Provinsie Gauteng. Khumalo het op Facebook geskryf dat blankes die “Hitler-behandeling” moet kry (sien hier bo).

Waarskynlik word Khumalo slegs aangekla omdat die Suid-Afrikaanse Raad van Joodse Afgevaardigdes druk toegepas het oor die verwysing na Hitler en die implisiete goedkeuring van sy beleid jeens Jode in die Facebook-uitspraak, en nie omdat die ANC-SAKP hoegenaamd begaan is oor antiblanke stellings nie. Dié afleiding word gestaaf deur die ANC se mediaverklaring gister waarin dié stap só omskryf word:

“Die ANC se sekretaris-generaal, Gwede Mantashe, sê die ANC beskik as regerende party oor die morele en wetlike verpligting om leierskap te betoon en die verantwoordelikheid om rassekonflik en -oorlogvoering te voorkom. Die aansoeke word primêr gebring om die waardigheid van die swart, kleurling- en Indiërmeerderheid te herstel en om die grondwet te verdedig.”

Die party wil hê die vier moet onder die Wet op die bevordering van gelykheid en die voorkoming van onbillike diskriminasie vervolg word. Die ANC het Dinsdag ‘n aansoek by die Wes-Kaapse Hooggeregshof teen die DA-lid, Dianne Kohler Barnard, geliasseer, waarin hy om ‘n bevel vra dat Paul Kirk se Facebook-inskrywing, wat verlede jaar in September deur Kohler Barnard gedeel is, as rassisties verklaar word en haatspraak en onbillike diskriminasie verteenwoordig, soos dit deur die wet omskryf word.

In sy funderende eedsverklaring beweer Gwede Mantashe dat “Kohler Barnard se oproep om die terugkeer van PW Botha ‘n oproep is vir die terugkeer van verdrukking, onderdrukking, aanhouding, marteling, skending en moord op ontelbare swart, Indiër- en kleurlingmense. Trouens, dit is ‘n oproep om die terugkeer van die gehate stelsel van apartheid self.”

Die ANC eis ook ‘n verklarende bevel dat die gedrag van Kohler Barnard die lede en ondersteuners van die ANC, asook die miljoene swartmense, kleurlinge en Indiërs hul inherente waardigheid misken, tesame met hul grondwetlike reg om hul waardigheid geag en beskerm te sien. Daar word ‘n beroep op die hof gedoen om te verklaar dat spraakvryheid nie rassistiese uitlatings en haatspraak insluit nie.

R500 000-boete vir Kohler Barnard

Die regerende party wil hê dat Kohler Barnard R500 000 moet betaal aan ‘n organisasie wat nie-rassigheid, vedraagsaamheid en versoening in Suid-Afrika bevorder en doen ‘n beroep op die direkteur van openbare vervolgings om ook strafregtelike stappe teen haar te neem.

In die Port Elizabethse Hooggeregshof doen die ANC insgelyks aansoek teen die DA-raadslid in die Nelson-Mandelabaai-metropolitaansemunisipaliteit, mnr. Chris Roberts, wat sy mederaadslid, Mongameli Bobani, tydens debat in die raadsaal op 30 Julie verlede jaar ‘n “bobbejaan” genoem het.

Gisteroggend het die ANC insgelyks ‘n aansoek teen Penny Sparrow in die Scottburgse Landdroshof in Kwazulu-Natal geliasseer weens haar uitspraak dat swartes wat rommel strooi ape is. Dié uitlating moet volgens die ANC tot haatspraak verklaar word en sy moet vergoeding ten bedrae van R200 000 betaal, asook “as ‘n misdadiger” vervolg word.

Volgens dieselfde verklaring deur Zizi Kodwa, die ANC se mediawoordvoerder, het die ANC Dinsdag ‘n geding teen Velaphi Khumalo in die Roodepoortse Landdroshof ingestel vir haatspraak en onbillike diskriminasie na aanleiding van sy oproep “dat Suid-Afrika van alle blankes gesuiwer moet word soos wat Hitler met die Jode gemaak het” (sien skermskoot hier bo).

PW Botha en Verwoerd se beleid ‘identies met dié van Hitler’

Volgens Mantashe, “het die ANC vele blanke en Joodse lede en is dit die organisasie se plig om sy lede te beskerm en die fokus op die bou van ‘n nierassige maatskappy te behou. Hitler het die Jode aan die mees onmenslike vorme van menseregteskendings onderwerp, identies met dít waaraan swartes, kleurlinge en Indiërs in Suid-Afrika onder PW Botha en Hendrik Verwoerd onderwerp is.”

Rassepolarisering oorheers sosiale media

Die radiopersoonlikheid Gareth Cliff, Standardbank se ekonoom Chris Hart en eiendomsmakelaar Penny Sparrow se beweerde rassisme het Suid-Afrikaanse sosiale media die afgelope week aan die gons gehad.

Meer as 45% van die sosiale gesprek in sewe dae het oor rassisme gehandel met ‘n kloof wat al hoe dieper tussen wit en swart raak.

Die land se swak matriekuitslae en krieket kon nie meer as 20% se belansgstelling wek nie.

Die matriekuitslae en Hashim Amla se bedanking is deur wedersydse rasaanvalle oorheers.

Sparrow het onder skoot gekom nadat sy op Facebook swart strandgangers as “ape” beskryf het.

Cliff is ingeroep nadat hy op Twitter gesê het dat mense nie regtig vryheid van spraak verstaan nie.

Hart het die huidige regime se swak bestuur uitgelig.

Internasionaal maak Donald Trump, Star Wars en die Siriese oorlog opslae met byna 45% van die internasionale mediadekking.

Ten spyte van grootskaalse sensuur in Duitsland, het die etniese massaverkragtings tydens Nuwejaar en migrante-kriminaliteit uitgelek en oorheers die media in Duitsland.

Die invloedryke New York Times, ‘n NeoCon-mondstuk, het intussen gevra dat die Duitse kanselier Angela Merkel moet bedank omdat die nuus uitgelek het.

Duitse koerante word aktief ontmoedig om oor swart en bruin kriminaliteit te berig en die nuus het vir groot verleentheid gesorg by linkse meningsmouse.

Indien bevind word dat hulle aan die voorvalle van seksuele geweldpleging op Nuwejaar in Keulen deelgeneem het, sal asielsoekers gedeporteer word het die owerhede gesê.

Die polisie sê getuies het die aanvallers as van “Arabiese of Noord-Afrika-oorsprong” beskryf.

Byna 1,1 miljoen mense het verlede jaar in Duitsland politieke asiel gekry.

Amptenare het probeer vure doodslaan en inwoners gemaan “om nie alle vlugtelinge oor dieselfde kam te skeer nie”, en die verlinkse minister van justisie, Heiko Maas, moes inderhaas strenger maatreëls teen migrante belowe.

Minstens 106 vrouens het kriminele klagte van seksuele aanvalle en roof gelê.

“Indien dit aan die lig kom dat die aanvallers vlugtelinge was, het hulle die reg verbeur om ons gaste te wees,” het die hoofsekretaris van die konserwatiewe CSU, tans die sterkste party in kanselier Angela Merkel se koalisieregering, gesê.

Velaphi Khumalo glo geskors by GP weens oproep om blanke volksmoord

Terwyl Suid-Afrika nuwe hoogte- (of laagte-)punte bereik in sy nabootsing van Amerikaanse politieke korrektheid en die obsessie oor ras en rassisme, het die Gautengse provinsie aangekondig dat sy werknemer Velaphi Khumalo glo ‘n tugverhoor in die gesig staar weens sy onlangs oproep om blanke volksmoord op sosiale media (skermafdruk hierby). Khumalo is ‘n werknemer van die departement kuns en kultuur in die provinsie Gauteng.

Die volledige aanhaling van Khumalo se plasing op Facebook lui soos volg:

“We must act as Hitler did to the Jews. I don’t believe any more that the is a large number of not so racist whit people . I’m starting to be sceptical even of those within our Movement the ANC. I will from today unfriend all white people I have as friends from today u must be put under the same blanket as any other racist white because secretly u all are a bunch of racist fuck heads. as we have already seen.”

Gister het hy om verskoning gevra deur blanke rassisme die skuld vir sy uitbarsting te gee:

“I would like to apologiese (sic) to the Gauteng government for my emotional comments that I made on a public platform. I further want to apologise to the ANC for the comments I made that do not reflect the ideologies of a Democratic society that are our ideals.”

Dit is egter onduidelik of Khumalo werklik geskors is, hangende ‘n tugverhoor, aangesien daar bloot van ‘n “interne proses” by die provinsie Gauteng gepraat word. Dit mag dalk net ‘n waarskuwing of iets dergelike behels.

Intussen woed die rasseherrie rondom Penny Sparrow se uitlatings oor swart “ape” wat Durban se strande met vullis bemors steeds en dit lyk asof sy, soos die Reitz-studente voorheen, strafregtelik van crimen injuria aangekla gaan word. Geen verder nuus is oor die Chris Hart-geval bekend nie en Hart handhaaf intussen ‘n “lae profiel”.

Vandag verskyn daar in die Mail & Guardian ‘n meningstuk deur die bekende swart nasionalis en voormalige EFF-bestuurslid, Andile Mngxitama onder die titel: Penny Sparrow: Racism’s sacrificial lamb. Daarin lyk dit asof hy ‘n argument vir radikale grondhervorming uitmaak wat glo die enigste “oplossing vir rassisme” sou wees. Weens die betaalmuur wat die M&G deesdae op hul webblad het, is die artikel nie tans vir nie-intekenaars leesbaar nie, maar sal waarskynlik oor ‘n paar dae wel aanlyn beskikbaar wees.

Waarskynlik weens die verwysing na Hitler, het die Suid-Afrikaanse Joodse Raad van Afgevaardigdes aangekondig dat hy “in die komende dae ‘n formele klag by die SA Menseregtekommissie sal indien”.

Terwyl die hoofstroommedia fokus op Penny Sparrow en Chris Hart se uitlatings, bestaan daar ‘n hele horde swartes op Twitter en Facebook wat gereeld anti-blanke boodskappe plaas, waaronder oproepe om blankes uit die land te verdryf of om alle blankes dood te maak.

Die redakteur van Netwerk24, Adriaan Basson, het ‘n beroep op blankes gedoen om mede-blankes in die openbaar uit te skel as hulle hul aan “rassistiese” taal of houdings skuldig maak. Hy skryf:

2016 is die jaar wat wit mense wat glo in ’n toekoms vir Suid-Afrika nie langer kan stilbly nie. Anders gaan rassiste soos Penny Sparrow namens jou praat.

Die redaktrise van Die Volksblad, Johanna van Eeden, betreur dit dat “rassisme met rassisme beveg word”, asook die heengaan van die liberale “nasiebouprojek”:

Dit dra niks by tot ’n oplossing nie en pogings om brûe te bou is nie volhoubaar nie. Ons móét ’n manier kry om die klowe tussen rasse te oorbrug.

Vir die hoofstroommedia bly “rassisme” dus ‘n “blanke probleem” en verseg hulle om aandag te gee aan swart rassenarsisme wat besig is om handuit te ruk, ‘n narsisme wat jare lank al deur linkse en liberale joernaliste, asook akademici gevoed word…

Nuwe ANC-wet sal mense tronk toe stuur wat apartheid goedpraat of ‘rassistiese’ taal gebruik

Die ANC in die parlement sê dat hy spesiale wetgewing wil instel om enige gesprek of siening van apartheid wat met dié van sy eie marxistiese geskiedskrywers verskil, strafbaar sal maak. Daarmee saam sal taalgebruik deur blankes wat as “rassisties” geag word, insgelyks strafbaar gemaak word.

In ‘n verklaring gister deur die kantoor van sy hoofsweep uitgereik is, sê die party:

“Die huidige wetlike bepalings is nie voldoende om rassiste te straf en af te skrik nie. As die meerderheidsparty in die parlement, sal ons binnekort die skepping van ‘n spesifieke wet ondersoek of bestaande wetgewing wysig om te verseker dat rassistiese dade of die bevordering van apartheid gekriminaliseer en met tronkstraf strafbaar gemaak word. Ons sal belanghebbendes oorreed en met hulle werk om te verseker dat die parlement so ‘n wet aanvaar.”

Die ANC en SAKP beskou die beleid van vorige Afrikanerregerings in Suid-Afrika as “nazisties” en daarom wil hy wette soortgelyk aan dié in Duitsland instel wat dit onwettig maak om selfs net die amptelike siening op ‘n akademiese wyse te bevraagteken. Duitsers wat byvoorbeeld vrae stel oor die spesifieke aantal Jode wat in konsentrasiekampe gesterf het, word summier in hegtenis geneem en tot tronkstraf veroordeel. Selfs advokate en prokureurs wat sulke oortreders in die hof probeer verdedig of om hul vonnisse versag te kry, word in die howe self in hegtenis geneem en summier tot tronkstraf veroordeel. Die advokaat Sylvia Stoltz is in Januarie 2008 tot drie en ‘n half jaar tronkstraf gevonnis omdat sy die holocaust-ontkenner Ernst Zündel in die hof in haar beroepshoedanigheid verdedig het. In Februarie 2015 is sy weereens 20 maande tronkstraf deur ‘n hof in München opgelê omdat sy ‘n lesing teen sensuur in Switserland gelewer het en in die lesing beswaar gemaak het teen Duitse sensuur oor die feite van die tweede wêreldoorlog.

Die ANC beoog nou soortgelyke wetgewing in Suid-Afrika om sy morele gesag op die bevolking af te dwing en enige debat oor “die verlede” wat van sy voorskrifte afwyk, onwettig te maak.

In ‘n duidelike verwysing na die Duitse wetgewing, sê die ANC se hoofsweep:

“Elders word die verheerliking van nazisme en die ontkenning van die holocaust as misdade beskou en oortreders word verhoor en tot tronkstraf gevonnis. Apartheid is deur die Verenigde Nasies as ‘n misdaad teen die mensdom verklaar. Dit het ongehoorde lyding en onreg vir miljoene swartmense veroorsaak, waaronder moord, foltering, die vernietiging van gesinne, teistering en ontvoerings. Enige persoon wat so ‘n stelsel verheerlik, bevorder en vier wesentlik misdade wat teen swartmense gepleeg is.”

Blykbaar kyk die ANC ook na Britse wetgewing wat “aanhitsing tot rassehaat” tot ‘n strafbare oortreding maak. Die Wet op strafreg en openbare orde van 1994 in Brittanje (Criminal Justice and Public Order Act) verklaar “die publikasie van stof wat rassehaat aanblaas” as ‘n oortreding wat met tronkstraf strafbaar is. Garron Helm, ‘n Britse “trol” wat die parlementslid van die Arbeidersparty, Luciana Berger, as ‘n “kommunistiese Jodin” op Twitter beskryf het, het ‘n ligte vonnis van vier weke tronkstraf in Oktober 2014 ontvang. Strawwe vir anti-Semitiese uitlatings in Brittanje het egter intussen swaarder geword, want die Times of Israel het verlede maand berig dat nog ‘n jong Brit, Joshua Bonehill-Paine, tot meer as drie jaar tronkstraf gevonnis is vir ‘n pamflet oor ‘n anti-Joodse betoging wat hy versprei het.

Die ANC se reaksie volg op die uitlatings deur Penny Sparrow en Chris Hart wat vanweë verspreiding op Twitter en Facebook oor die afgelope paar dae voorbladnuus in Suid-Afrika was.

Volgens die kantoor van die ANC se hoofsweep,

“…is dit helder uit dié voorvalle dat daar steeds elemente bestaan wat weerstand bied teen pogings ten gunste van rasse-eenheid en onvermoeid werk om die rasseverdelings en -spanninge te vergroot wat deur apartheidverdrukking geskep is, meer as 21 jaar na die koms van ons demokratiese bedeling wat op die edele beginsels van vergifnis, versoening en genesing in die belang van ‘n verenigde, nie-rassige, nie-seksistiese en voorspoedige SA gegrond is.

“Ons kan nie langer sulke verontmenslikende oortredings, waar die swart meerderheid soos submenslikes behandel word en as ape, bobbejane en ander beledigende rasseterme in hul geboorteland getipeer word nie.

“In die konteks van ons pynlike verlede, moet rassisme en apartheid as ernstige menseregteoortredings beskou word wat met tronkstraf gestraf behoort te word.”

Regskenners met wie PRAAG gesels het, meen dat, indien die ANC se voorgenome wetgewing aanvaar word, sou die roman Disgrace deur die Nobelpryswenner J.M. Coetzee moontlik verbied word weens die negatiewe voorstelling van swartes daarin, terwyl die geskiedkundige prof. Hermann Giliomee tronk toe sou moes gaan vir sy artikels waarin hy aantoon dat Bantoe-onderwys nie so sleg was as wat algemeen aanvaar word nie.