Etiket: korrupsie

Nog twee vas oor hospitaaldiefstal

Die polisie in Bloemfontein het Woensdag nog twee staatsamptenare in hegtenis geneem in verband met die klopjag waartydens beslag op duisende rande se hospitaaltoerusting gelê is.

Dit volg nadat twee amptenare – wat werksaam is by Pelonomi-hospitaal – vroeër vandag in hegtenis geneem is in verband met toerusting van dié hospitaal met ‘n geskatte waarde van R450 000.

Die toerusting is tydens ‘n klopjag by ‘n skrootmetaal-onderneming in Bloemfontein gevind.

Intussen sê die gesondheidwoordvoerder, Tebogo Oepeng, die departement gaan ondersoek instel om uit te vind of die saak verband hou met ‘n interne ondersoek wat laat verlede jaar begin is, ná die ontdekking van noodsaaklike medisyne wat besig was op stof op te gaar in ‘n pakhuis in dié hospitaal.

Swart aanvallers sak op ‘n groep wit tieners toe

‘n Video van ‘n groot groep swartes wat ‘n paar wit tieners, vermoedelik van Vryheid, buite ‘n vulstasie in Pongola aanval maak opslae.

Die voorval het omstreeks 03:30 verlede Sondag plaasgevind en is verfilm deur ‘n getuie wat gevra het om anoniem te bly vir veiligheidsredes.

Die rede vir die aanval is onbekend.

Die swart aanvallers kan gesien word waar hulle herhaaldelik die jongmense met stokke slaan, en volgens die getuienis, na suikerrietkapmesse soek waarmee die aanval bloedig kon raak.

Die getuie het gesê Pongola se polisiebeamptes is onmiddellik in kennis gestel en het na die toneel gehaas, maar het nie ingegryp nie.

“Hulle het net gestaan en gekyk met hul hande in hul sakke,” sê die getuie. Die veiligheidswagte het die getuie gedreig om nie die voorval te verfilm nie.

Pongola se SAPD stasiebevelvoerder het die video gesien en gaan glo ‘n dissiplinêre ondersoek van stapel stuur.

Grafte ontdek toe landboubedrog op die lappe kom

Die KwaZulu-Natalse premier, Senzo Mchunu gaan president Jacob Zuma vra om ‘n omvattende ondersoek van stapel te stuur na die grafte wat aan die Suidkus in suikerrietlande ontdek is.

Mchunu het die bykans honderd grafte by die Glenroy-plaas in Dududu besoek.

Hy sê die owerhede wil in dié stadium geen moontlikhede uitsluit oor wat kon gebeur het nie. Aanduidings is egter dat gevangenes wat as arbeiders ingespan is, op die grond begrawe is.

Daar is ook bewerings dat dit mense is wat deur die destydse Veiligheidspolisie vermoor is, het RSG berig.

Intussen is grootskaalse bedrog in die KwaZulu-Natalse departement van landbou ontbloot. ‘n Opposisielid sê sowat 175 miljoen rand het weens onreëlmatighede en wanadministrasie verdwyn.

‘n Forensiese verslag wat verlede maand afgesluit is, is nog steeds nie vrygestel nie.

Die forensiese ondersoek is glo net halfpad afgehandel wat beteken dat die bedrag dalk meer as 300 miljoen rand kan beloop.

De Lille, Ramaphosa hits mekaar aan om wit rassiste te jag

Die burgemeester van Kaapstad, Patricia de Lille het adjunkpresident Cyril Ramaphosa uitgedaag om bewyse van beweerde rassisme in Kaapstad vir haar te stuur.

De Lille het in ‘n ope brief aan Ramaphosa gevra om die bewerings, wat hy in die parlement gemaak het, met feite te staaf. Hy het na wat berig word verwys na voorvalle waar swartmense sleg behandel is in restaurante, verhoed is om by sommige hotelle tuis te gaan en ook geweier is om sommige woonstelle in die Wes-Kaap te huur.

Ramaphosa het ‘n beroep op die DA-leierskap gedoen om die inisiatief te neem om die land van die “kanker van rassisme en xenofobie” te bevry.

Hy het gereageer op ‘n vraag in die Nasionale Vergadering Woensdagmiddag oor wat die regering doen om korrupsie uit te roei, toe hy die onderwerp na xenofobie in die Wes-Kaap verander het.

“As daar ‘n restaurant is wat bekend is in die Wes-Kaap, want daar is baie [van hulle] hier, waar swart mense nie goed behandel word nie, moet dit die leierskap van die Wes-Kaap wees wat sê: ‘Dit word nie toegelaat nie” en [sulke restaurante] moet nie in Suid-Afrika toegelaat word nie.”

Dit is nie seker hoe restaurante met korrupsie verband hou nie, behalwe dat swart staatsamptenare dikwels rojaal met belastingbetalers se geld uiteet.

“Ek het vriende wat wou plekke bespreek in hotelle in die Wes-Kaap en toe hulle hul vanne uitgespreek en dit blyk swart te wees, is hulle weggewys. Ek het jong mense wat probeer woonstelle te huur in die Wes-Kaap en wanneer hulle hoor hulle is swart, word hulle onmiddellik weggewys.”

Kaapstad en Durban is berug daarvoor dat hulle op soortgelyke wyse ook teen wit Afrikaanssprekendes diskrimineer, maar klaarblyklik is Ramaphosa en De Lille nie bewus hiervan nie.

De Lille het gesê rassisme word te maklik ‘n politieke speelbal in die land maar nogtans dadelike gehoor gegee aan Ramaphosa se oproep en ‘n “teen-rassisme” veldtog van stapel gestuur.

Sy het nie kommentaar gelewer op die rassistiese uitlatings teen wittes by die Universiteit van Kaapstad nie.

Eskom-bonusse buitensporig

Dit blyk dat tien van Eskom se senior amptenare verlede jaar ‘n bonus van miljoen rand elk ontvang het benewens hulle salarisse van meer as drie miljoen rand elk.

Die minister van Openbare Ondernemings, Lynne Brown het in reaksie op ‘n geskrewe vraag in die parlement dié astronomiese vergoedings vir ‘n sukkelende instelling bekend gemaak.

Die onthulling is gemaak te midde van verdere omstredenheid oor ‘n ondersoek na Eskom wat deur die voorsitter van Eskom se raad, Zola Tsotsi gelei sal word.

Politieke partye dring aan op ‘n onafhanklike ondersoek.

Verlede week het Tsotsi onverwags aangekondig dat Eskom se bestuurshoof en drie senior bestuurslede geskors is.

Opposisiepartye het intussen aangedui dat die Openbare Beskermer, Thuli Madonsela genader sal word om dringend in te gryp omdat Eskom self betrokke gaan wees by die ondersoek na sy probleme.

Eskom het Maandag mediaberigte ontken dat Tsotsi, homself ‘aan hoof geplaas het’ van ‘n subkomitee van Eskom se raad en dat hulle volmag gaan hê om ondersoekers aan te stel.

News24 het berig dat Tsotsi en die komitee net ‘n ‘oorsigrol’ gaan speel.

Opposisielede sê dit is duidelik dat Eskom die totale ondersoek wil orkestreer terwyl dit in landsbelang is dat ‘n behoorlike, onafhanklike ondersoek gedoen word.

MDC veroordeel Mugabe se rassisme teen wittes

Zimbabawe se amptelike opposisie, Movement for Democratic Change het president Robert Mugabe se uitlatings oor wit boere tydens sy 91ste verjaardagviering as kras en rassisties bestempel.

Partyleier, Morgan Tsvangirai het Mugabe se dreigement om plase te vat wat nog aan wit boere behoort, streng veroordeel.

Tsvangirai sê beleggers sal nooit in ‘n land belê wat deur ‘n onverdraagsame, korrupte en rassistiese opsweper regeer word nie.

Na raming behoort 300 tot 400 plase steeds aan wit boere.

Tsvangirai het gesê Mugabe se uitlatings is veral onvanpas inaggenome dat die Zimbabwiese president tans voorsitter van twee vername Afrika-organisasies is, naamlik die Suider Afrikaanse Ontwikkelingsgemeenskap sowel as die Afrika-Unie.

SA ambassadeur na Japan lieg oor doktorsgraad

Suid-Afrika se ambassadeur in Japan, Mohau Pheko, het Vrydag aan die SABC gesê sy spyt dat sy voorggee het sy het ‘n doktorsgraad.

Pheko het gelieg dat sy in 2000 haar PhD aan die Amerikaanse La Salle Universiteit verwerf het.
 
Maar die universiteit is gesluit in 1996, toe dit geblyk het dat hulle grade en ander akademiese kwalifikasies via die internet verkoop, het die uitsaaier berig.
 
Pheko het aan die SABC gesê die universiteit was wettig en dat sy geregistreer was, maar dit het gesluit voordat sy haar doktorsgraad kon ontvang.
 
Sy het aan die uitsaaier gesê dat sy steeds aandring om as “doktor” aangespreek te word.
 
Pheko is deel van ‘n hele lang lys van openbare ANC-amptenare wat bedrieglike stellings oor hul akademiese kwalifikasies gemaak het. Hulle sluit ‘n senior lid van die ANC en voormalige LP Pallo Jordan, en voormalige SABC-voorsitter Ellen Tshabalala in.
 
Die opposisie het Vrydag geëis vir Pheko dadelik herroep word hangende ‘n ondersoek na die wanvoorstelling van haar kwalifikasies.
 
President Jacob Zuma was glo bewus van Pheko se gelieg oor haar graad in 2010, toe sy aangestel is as ambassadeur in Kanada.
 
“Niks minder as ‘n volle parlementêre ondersoek na hierdie internasionale flater is nodig nie,” het ‘n opposisielid gesê en bygevoeg dat van die presidensie en Dirco [departement van internasionale betrekkinge en samewerking] ook reeds jare lank bewus was hiervan, maar niks daaraan gedoen het nie.

Begroting teiken wit belastingkoeie

Die regering het in sy begrotingsrede die bekommernisse van die gewone belastingbetaler herbevestig.

Staatskuld wat in 2017 tot ‘n enorme R2,3 triljoen gaan styg, was een daarvan. Reeds R153 miljard word begroot net om die rente op staatskuld vir 2015 te dek.

Die grootte van hierdie bedrag is nie onbenullig nie, veral in die lig gesien van ontwikkelende lande soos Griekeland wat tans ten gronde gaan weens skuld.

Vrese groei dat die regering met ‘n ekonomiese groeikoers van 2% nie in staat sal wees om Suid-Afrika op die lang termyn uit ‘n skuldput te kry nie.

Die ANC moes daarbenewens vir die eerste keer in twintig jaar die persoonlike belasting met een persentasiepunt opstoot.

Brandstofheffings sal ook aansienlik verhoog word binne die volgende twee maande om die sukkelende Padongelukfonds (RAD) te red.

BTW, ‘n baie meer regverdige belasting wat op alle Suid-Afrikaners gehef kan word, is egter nie verhoog nie. Twee persentasiepunte sou ten minste ‘n deel van die nypende tekorte aangespreek het, te wete byna R40 miljoen.

Die klem bly egter om die die krimpende groepie wit belastingbetalers te straf vir die ANC se spandabele landsbestuur.

Persoonlike belastingbetalers word geteiken om die las van wanbesteding, korrupsie en gebrek aan bestuur te dra.

Die deurlopende hulp aan openbare ondernemings soos Eskom en SAL, sonder planne om dié instellings na behore te reg te ruk, is net nog geld in die water.

Die regering het pas aangekondig dat die aankope van skoolboeke gesentraliseer sal word is ‘n poging om korrupsie hok te slaan.

Die staatsdiens beskik egter reeds nie oor die administratiewe vaardighede om so ‘n aankoopproses suksesvol te implementeer nie.

Die enigste goeie nuus is dat klein sakeondernemings ‘n aantal belastingvrystellings kan verwag.

Rokers en drinkers sal moet hoes en proes, met whiskey wat byna R4 per bottel duurder sal word en ‘n pakkie sigarette met byna R1.

Balju lê beslag op 30 munisipale voertuie

Daar is op 30 munisipale voertuie van die Ngaka Modiri Molema distriksmunisipaliteit in Mafikeng beslag gelê deur die balju van die Noordwes hooggeregshof.

Die munisipaliteit skuld diensverskaffers miljoene rand.

Die beslaglegging volg nadat twee kontrakteurs regstappe gedoen het teen die munisipaliteit weens sy versuim om te betaal vir dienste wat gelewer is.

Die munisipaliteit is verlede jaar onder administrasie geplaas en die raad is ontbind weens sy onvermoë om dienste te lewer.

Die waarnemende munisipale bestuurder Kumaran Nair sê na raming benodig die munisipaliteit reeds minstens 120 miljoen rand om sy agterstallige skuld te vereffen, en die bedrag styg steeds.

Die distrik is saamgestel uit vier plaaslike munisipaliteite wat Mahikeng, Ramotshere Moiloa, Tswaing, Ditsobotla en Ratlou plaaslike munisipaliteite insluit.

Die Distriksmunisipaliteit is ‘n uitvoerende tipe met 37 raadslede, insluitende ‘n Uitvoerende Burgemeester, komitee, Speaker en Raadskomitees.

Korrupsie, wanbestuur en bedrog het die provinsiale regering genoop om verlede jaar dringend in te gryp.

Binnegeveg in EFF lei tot geweld

EFF-parlementslid, Andile Mngxitama wou die media toespreek, maar moes noodgedwonge sy inligtingsessie Donderdag uitstel toe lojaliste van Julius Malema verrigtinge met geweld ontwrig het.

Mngxitama ondersoek bewerings gemaak deur die leier van die Patriotiese Alliansie, Gayton McKenzie.

Hy het Woensdag getwiet dat hy op pad is na McKenzie se huis om bewyse te sien wat Malema in ‘n moord impliseer. In ‘n ope brief gerig aan Malema, het McKenzie beweer dat Malema sy party se fondse misbruik en ‘n aandeel in die dood van ‘n man het wat gekant was teen Papiki Babuile.

Die EFF se Noordwes-leier, Papiki Babuile is skuldig bevind aan die moord.
 
Mngxitama wou die media inlig oor sy huidige rol en toekoms in die EFF asook sy verskille met EFF-leier, Malema.

Die twee is haaks oor verskeie kwessies insluitend Malema se beskerming van Babuile.

Die veroordeelde moordenaar geniet ‘n maandelikse salaris wat deur die Noordweswetgewer betaal word, ondanks sy skuldigbevinding. Hy is in Desember en Januarie ‘n salaris betaal maar is sedertdien uit die wetgewer verwyder.

Voordat Mngxitama kon praat by die inligtingsessie by ‘n Southern Sun-hotel, het ondersteuners van Malema en Mngxitama mekaar probeer doodskree en daarna het die strydende faksies tot geweld oorgegaan.

Verskeie pogings is aangewend om Mngxitama aan te rand. Verslaggewers van verskeie mediahuise is ook in die geveg betrokke.

Mngxitama is ongedeerd nadat hy beskerm is deur sy kollegas. Hy het later getwiet dat hy nog lewe en dat die nuuskonferensie sal voortgaan.

Beurtkrag waarskynlik met sukkelende Eskom

Die geskeduleerde instandhoudingswerk by Eenheid 1van die Koeberg Kernkragsentrale naby Kaapstad begin Maandag en sal na verwagting tot einde Mei duur.

Eenheid 1 het weens ‘n onverwagse tegniese fout aan die einde van Januarie onklaar geraak.

“Die stelsel sal hierdie week ook onder druk bly, dus bly die risiko vir beurtkrag hoog,” het Eskom gesê. “Daar is ‘n tekort aan opwekkingskrag weens eenhede wat tans weens beplande en onbeplande instandhouding nie krag aan die netwerk kan voorsien nie.”

Eskom het intussen gewaarsku dat die kragnetwerk steeds onder groot druk verkeer.

“Eenheid 1 by Koeberg word vanaf Maandag afgeskakel vir ʼn geskeduleerde inspeksie en instandhouding. Die eenheid sal na verwagting teen die einde van Mei weer beskikbaar wees,” het Eskom bygevoeg.

Fase Twee-beurtkrag is die naweek toegepas, wat die sesde agtereenvolgende dag van landwye beurtkrag was.

Eskom sê hy het die naweek gefokus op sy dieselreserwes en die watervlakke van damme vir die komende week se kragopwekking.

Die fokus is om die eenhede, wat onvoorsiend van die netwerk afgehaal moes word, so gou as moontlik weer aan die gang te kry.

Die maatskappy het Suid-Afrikaners gemaan om steeds elektrisiteitsbesteding in te kort om die erns van beurtkrag te beperk.

Twee polisielede vas vir roof en ontvoering

Die geloofwaardigheid van die polisie het opnuut onder skoot gekom.

Dit volg na ‘n verslag van die navorsingsmaatskappy Futurefact waarin bevind is dat 76 persent van Suid-Afrikaners van mening is dat baie polisielede self misdadigers is.

Net meer as drieduisend mense het aan die meningspeiling deelgeneem.

Twee polisielede, onderskeidelik 35 en 44 jaar oud, is intussen op Pongola in die noorde van KwaZulu-Natal vasgetrek op aanklagte van roof en van ontvoering, het RSG berig.

Daar word beweer dat hulle onder ‘n groep mans was wat veiligheidswagte by ‘n winkel vasgebind, hulle in ‘n suikerrietland agtergelaat en toe die winkel gaan beroof het.

Die KwaZulu-Natalse LUR vir Gemeenskapsveiligheid en Skakeling, Willies Mchunu, het die polisie se betrokkenheid by misdadige bedrywighede skerp veroordeel.

Mchunu sè die meerderheid polisielede in die provinsie is nog steeds mense van integriteit wat baie hard werk en hy het die publiek gevra om saam met die lede te werk en diegene te ontbloot wat by misdadige bedrywighede betrokke is.

‘n Woordvoerder van sy Departement, Sipho Khumalo, sè die polisielede sal later vandeesmaand in die landdroshof op Pongola verskyn.

Verskeie polisiebeamptes van die Douglasdale polisiestasie in die noorde van Johannesburg is blykbaar gister ontwapen nadat hulle kollegas gedreig het.

Die polisielede is na bewering op ‘n sloerstaking omdat hulle ontevrede is oor beweerde rassisme by die stasie.

Die Gautengse polisiewoordvoerder, kolonel Noxolo Kweza, wou nie kommentaar lewer nie.

Derby-Lewis wend hom tot De Kock se regsverteenwoordiger

Clive Derby-Lewis se vrou, Gaye, het aangekondig dat Julian Knight, wat vroeër die voormalige Vlakplaas-bevelvoerder Eugene de Kock verteenwoordig het, voortaan as haar man se regsverteenwoordiger sal optree.

Derby-Lewis het Dinsdag bewerings ontken dat hy sy vorige prokureur Marius Coertze versoek het om die minister van korrektiewe dienste te dagvaar vir R2 miljoen.

“Dit het nooit gebeur nie,” het Derby-Lewis in ‘n verklaring gesê. “Ek het hom nooit opdrag gegee om die minister of enigiemand anders by die departement te dagvaar nie.”

Derby-Lewis het gesê hy het ‘n e-pos aan minister Michael Masutha se woordvoerder gestuur om hom in kennis te stel dat hy nie die opdrag aan sy prokureur gegee het nie, en het om verskoning gevra oor die verkeerde inligting.

Coertze verteenwoordig sedert Sondag nie meer vir Derby-Lewis nie.

Masutha het Vrydag aangekondig dat Derby-Lewis se aansoek om mediese parool afgekeur is. De Kock se aansoek is goedgekeur.

Alhoewel die mediese paroolraad aanbeveel het dat hy vrygelaat moet word, het Masutha ‘n naamkwessie op Derby-Lewis se mediese verslae voorgehou as ‘n verskoning om Derby-Lewis in die tronk te hou.

Derby-Lewis is deur die owerhede self versoek om ‘n skuilnaam op sy mediese verslae te gebruik, iets wat die minister nou probeer uitbuit tot sy voordeel.

Die minister het die paroolraad veroordeel dat die vrylating voorgestel word, aangesien Derby-Lewis slegs fase 3-longkanker het. Volgens wetgewing kwalifiseer glo slegs diegene met fase 4-longkanker.

De Kock ly egter aan geen kwaal nie.

Masutha het ook gesê hy is nie oortuig dat Derby-Lewis ware berou toon nie.

Clive Derby-Lewis is vir die moord veroordeel nadat ‘n regsverteenwoordiger wat sy dienste “gratis” aangebied het, hom aangeraai het om nie oor sy onskuld te getuig nie, ‘n fatale fout.

‘n Filmmaker het vroeër gesê hy is bewus van sekere regslui wat deur die ANC en hul meelopers aangewend word om sake “te gooi” in hul guns en hulself dan as simpatiek voordoen en gratis hul dienste aanbied. Die bekende regisseur wou anoniem bly, maar het aan Praag bevestig dat hy meen dat Derby-Lewis se geval soorteglyk is.

Die sogenaamde getuie, ‘n swart vrou, wat vertel het dat Derby-Lewis die wapen verskaf het, is volgens ander getuies afgedreig aangesien sy nie die oorhandiging sou kon sien plaasvind van waar sy beweer het sy was nie. Getuies wat haar leuens sou kon weerlê, is verhoed om te getuig.

Janusz Walus, ‘n Poolse immigrant, het die leier van die SAKP, Chris Hani, op 10 April 1993 doodgeskiet.

Hy is skuldig bevind aan moord en ter dood veroordeel, maar dit is na lewenslank verander toe Suid-Afrika die doodstraf afgeskaf het.

Twee van polisie vas vir gewapende roof

Twee polisiebeamptes, wat Woensdag in hegtenis geneem is vir gewapende roof sal na verwagting binnekort in die Sasolburgse landroshof verskyn.

Polisiewoordvoerder, Sellwane Mapamela, sê in ‘n verklaring die 30-jarige en 38-jarige verdagtes word daarvan beskuldig dat hulle deel was van ‘n gewapende roof by Zamdela op 18 Desember verlede jaar.

Volgens die 25-jarige klaer was sy, haar man en ‘n vriendin, van Johannesburg na Heilbron op pad toe hulle by ‘n kruising in Zamdela deur ‘n gemerkte polisie voertuig afgetrek is.

Hulle is deursoek en toe vertel dat hulle onder arres is. Op pad na die polisiestasie het die polisievoertuig onder ‘n brug gestop waar nog twee mans opgedaag het en geld vir hulle vrylating geëis het.

Almal is saam na ‘n winkelsentrum in Gauteng waar die vrou kontant uit haar bankrekening onttrek het.

Die verdagtes het die klaer en haar man by die winkelsentrum gelos nadat hulle die geld gekry het.

Volgens Mapamela is een van die mans ‘n sersant by die Vaal Rand honde-eenheid en die ander ‘n konstabel in die blitspatrollie.