Etiket: forensiese ondersoek

Kaapse brande glo doelbewus gestig sê ondersoeker

Brande wat groot verwoesting gesaai het in die Kaapse Skiereiland en die lewe van ‘n brandbestryder geëis het, is glo doelbewus gestig.

Twee van die drie brande in Maart is kwaadwillig gestig en die derde een, die grootste van die drie by Houtbaai, is moontlik per ongeluk deur bergies gestig.

‘n Forensiese ondersoek deur dr. David Klatzow, ‘n forensiese ondersoekbeampte, het glo aangetoon dat bergies die vuur aangesteek het.

Hy sê daar is geen moontlike elektriese oorsake vir die ander twee brande nie. Meer as 3 000 hektaar en huise het in die slag gebly.

Die brande kan die belastingbetaler tussen R20 miljoen en R40 miljoen uit die sak jaag, alhoewel nog geen amptelike beraming van die skade gedoen is nie.

Grafte ontdek toe landboubedrog op die lappe kom

Die KwaZulu-Natalse premier, Senzo Mchunu gaan president Jacob Zuma vra om ‘n omvattende ondersoek van stapel te stuur na die grafte wat aan die Suidkus in suikerrietlande ontdek is.

Mchunu het die bykans honderd grafte by die Glenroy-plaas in Dududu besoek.

Hy sê die owerhede wil in dié stadium geen moontlikhede uitsluit oor wat kon gebeur het nie. Aanduidings is egter dat gevangenes wat as arbeiders ingespan is, op die grond begrawe is.

Daar is ook bewerings dat dit mense is wat deur die destydse Veiligheidspolisie vermoor is, het RSG berig.

Intussen is grootskaalse bedrog in die KwaZulu-Natalse departement van landbou ontbloot. ‘n Opposisielid sê sowat 175 miljoen rand het weens onreëlmatighede en wanadministrasie verdwyn.

‘n Forensiese verslag wat verlede maand afgesluit is, is nog steeds nie vrygestel nie.

Die forensiese ondersoek is glo net halfpad afgehandel wat beteken dat die bedrag dalk meer as 300 miljoen rand kan beloop.

Forensiese ondersoek na polisie-skeidingspakette

Nathi Mthethwa
Nathi Mthethwa

‘n Forensiese ondersoek is gelas na die Suid-Afrikaanse polisiediens se afdeling wat gemoeid is met skeidingspakette.

Die minister van polisie, Nathi Mthethwa, het gesê ‘n omvattende ondersoek sal geloods word nadat vier polisielede ivm korrupte uitbetalings vasgetrek is.

Die afdeling is verantwoordelik vir die verwerking van betalings en voordele aan voormalige SAPD-werknemers.

Die vier mense is reeds in verband met beweerde bedrog en korrupsie met uitbetalings in hegtenis geneem en die Valke sal die ondersoek verder behartig.

Die boosdoeners het vals profiele geskep aan wie uitbetalings gemaak is, terwyl legitieme begunstigdes nie hul voordele ontvang het nie.

Hulle is aangekeer nadat die seun van ‘n ontslape polisieman ‘n saak van bedrog aanhangig gemaak het.

Mthethwa sê dit is moontlik dat ‘n sindikaat wat binne die polisie opereer met hulp van buite op grootskaal by die bedrog betrokke kan wees.

Die nasionale polisiekommissaris, Rhia Phiyega het vroeër gesê die SAPD word geteiken.