Etiket: Brittanje

Brittanje gooi geld na chaos in Calais

Brittanje sal ongeveer 20 miljoen euro’s bydra om sekuriteit by die Franse hawestad, Calais, te versterk, waar duisende migrante kamp in die hoop om die Engelse kanaal oor te steek en ‘n heenkome in Brittanje te vind.

Die Franse minister belas met Europese aangeleenthede, Harlem Desir, het die aankondiging gemaak.

Brittanje het reeds 60 miljoen euro’s daarvoor bewillig. Die geld sal gebruik word om die sekuriteit te verbeter van die toegangsone na die tonnel wat Europa met Brittanje verbind, asook om mensehandelnetwerke te bekamp.

Die aankondiging kom ure voor ‘n spitsberaad tussen die Franse president, Francois Hollande, en die Britse eerste minister, David Cameron, in die noordelike stad, Amiens, waar die Calais-krisis boaan die agenda sal wees.

Maandag het chaos uitgebreek in die kamp toe stootskrapers tente en skuilings platgestoot het.

Ontleders meen die Franse het tot die stap oorgegaan omdat die huidige Brexit-klimaat dit toelaat.

Die Franse owerhede het besluit om ‘n deel van die kamp skoon te maak omdat die inwoners van Calais in opstand is oor die misdaad en die wetteloosheid wat daar heers, en oorgespoel het na die stad.

Die polisie het stootskrapers gebruik om immigrante uit tente en tydelike skuilings te verwilder in die gebied wat sowat 6000 vlugtelinge huisves.

Kampinwoners het teruggeveg, begin vure stig en die polisie met klippe aangeval. Die situasie was Woensdag kalmer, maar nie minder gespanne nie.

Verwarring, onsekerheid en kommer heers in die kamp met die onwettige immigrante wat op hul “regte” aanspraak maak.

Die Franse regering het aanvanklik sy plan aangekondig om die suidelike deel van die kamp af te breek – nader aan die snelweg – vroeg in Februarie.

Die fortuinsoekers spring op vragmotors wat deur die Kanaaltonnel reis, in weerwil van doringdraadversperrings wat opgerig om die pad te beskerm.

Brexit kry hupstoot van Londense burgemeester

Die Britse premier David Cameron, het by 10 Downing Street ‘n referendum aankondig oor Brexit.

Cameron het gesê hy sal stemme werf sodat Brittanje deel van ’n “hervormde” EU bly.

Die burgemeester van Londen, Boris Johnson, het teen Cameron uitgekom en gesê die stemmery is ‘n “geleentheid in ‘n leeftyd” vir die VK om uit die EU te tree.

Johnson het sy jare lange ambisie om die volgende premier van Brittanje te word daarmee op die referendumuitkoms geplaas en die belangrikste Tory geword om ten gunste van Brexit uit te kom.

Ander ministers het kort ná die aankondiging reeds in hul teenkanting rugbaar gemaak. Michael Gove, die minister van justisie, het hom by die Johnson se kamp aangesluit.

Meer as die helfte van Britse kiesers wil nie deel van die EU wees nie, maar uitrede sal tot ekonomiese nadeel van die eilandbewoners wees.

Theresa May, die ongewilde minister van binnelandse sake, is bo-aan die lys van ministers wat saam met Cameron in die EU wil bly.

Cameron het die referendum beskryf as een van die grootste besluite waaroor sy landgenote in ’n baie lang tyd gaan stem.

Die debat oor Brittanje se lidmaatskap het nuwe stukrag gekry nadat tienduisende vlugtelinge die afgelope paar maande deur die Europese gemeenskap gehuisves moes word.

Maar Cameron het in ’n verklaring gewaarsku dat dit ’n “sprong in die donker” sou wees as Brittanje die EU sou verlaat.

Daarom sal dit meer sin hê om eerder op hervormings binne die unie aan te dring het hy gesê.

Brittanje beskik egter nie oor genoeg invloed om Duitsland te dwing daartoe nie, wat uiteindelik sal neerkom op leë verkiesingsbeloftes.

Volgens Cameron weet die sakegemeenskap in Brittanje byvoorbeeld nie of hulle steeds gratis tot Europa se markte gaan toegang hê nie – ook nie of Britte elders in die EU seker gaan wees van hul werk nie.

Dit kan ook prysstygings tot gevolg hê.

Cameron het onlangs sy voorgestelde plan om die EU te hervorm ná ’n beraad in Brussel opgestel. Die plan sal glo aan Brittanje “spesiale status” binne die EU-blok van lande gee.

Brexit kan EU in krisis dompel

Die Britse eerste minister, David Cameron het ‘n vergadering met die Europese Parlement se president, Martin Schulz en ander lede van die EU-parlement bygewoon om oor Brittanje se standpunte rakende Brexit te onderhandel.

Brittanje­ sal ‘n referendum hou of dit in die EU wil bly of wil onttrek, indien Cameron nie sy sin kry nie.

Maar Duitsland en Frankryk het gemaan dat Brittanje negatief geraak sal word as die premier nie Europa se wense in ag neem nie.

Van die 700 Europese maatskappye in Brittanje het ‘n derde aangedui dat hulle die VK dadelik sal verlaat met Brexit.

Volgens Le Monde staar die EU ‘n krisis in die gesig, selfs al besluit die VK om in te stem tot die EU-beleid.

‘n Peiling deur die Duitse Bertelsmann-stigting toon ‘n sterk pro-EU sentiment oor die hele sakegemeenskap, maar volgens die jongste meningspeiling sal 45 persent Britte stem dat die land die Europese Unie verlaat.

Slegs 36% wil in die EU bly en negentien persent is onseker.

Cameron het vroeër vandeesweek sy planne uiteengesit om die land se bande met die Europese Unie te heroorweeg.

Hy het sy voorstelle tydens die EU-beraad aan leiers voorgelê. ‘n Referendum word vir Junie in Brittanje beplan oor voortgesette lidmaatskap van die Europese Unie.

Konsepvoorstelle is reeds bekend gemaak om die land te oorreed om binne die EU te bly.

Van die voorstelle sluit in dat Brittanje nie betrokke hoef te wees by ‘n nouer verbintenis met die EU nie en dat welsyntoelae aan werkers van ander EU-lande opgeskort kan word.

Die Britse minister van finansies, George Osborne het vroeër gesê hy hoop ander EU-lande sal tot die planne instem, maar vier Oos-Europese lande het reeds die voorstelle verwerp.

Pole, Tsjeggië, Slowakye en Hongarye wil nie instem tot die beperkte toelaes vir werkers nie.

Indringers in Calais in kasteel gehuisves

Baie immigrante uit Calais in Frankryk se “Oerwoud” kan uitsien na uitnemende akkomodasie.

Van hulle sal gehuisves word in die kasteel by Tantonville, in die dorp van Haroué, in Meurthe-et-Moselle.

Die Prefek van Meurthe-et-Moselle het aan die einde van Januarie ‘n perskonferensie op die perseel gehou om besonderhede van die aantal “vlugtelinge” te gee en die ontvangsvoorwaardes van immigrante voor te hou.

Al die vlugtelinge in Frankryk is onwettig, maar die owerhede doen niks daaraan nie.

Die burgemeester van Tantonville, Serge Petitdant, het die aangekondiging bevestig en gesê: “Vyftien migrante vanaf Calais sal laat in Januarie by die Chateau du Clos tuisgaan,” het hy verklaar.

In wese is hy deur die Prefek gedwing om die aankondiging te maak alhoewel daar groot ongelukkigheid in sy kanton Haroué heers. Die meeste inwoners is fel gekant teen die indringers en hul luukse huisvesting.

Die Arelia-vereniging sal glo die indringers se hervestiging hanteer na die kasteel in Lorraine, die eerste uit Calais se “Oerwoud”.

Die Sosialiste se besluit is des te meer absurd na ‘n Britse hof se uitspraak dat die indringers uit Calais “nie vlugtelinge is nie”.

Die hof het oor die lot van vier jong asielsoekers beslis dat die meeste buitelanders wat uit Calais aankom met die bedoeling om hulle in die Verenigde Koninkryk te vestig, “nie vlugtelinge is nie”.

Britse regters is van mening dat die meeste ekonomiese migrante is wat probeer om die Engelse Kanaal oor te steek met die hoop om “ekonomiese voordele” in die Verenigde Koninkryk te geniet.

Die regters het in hul hofuitspraak verklaar dat baie van die Calais-immigrante waarskynlik nie vlugtelinge is nie.

“Inteendeel, hulle is immigrante wat weier om aansoek te doen vir die status van vlugtelinge in Frankryk as gevolg van die groter voordele wat hulle hoop om te ontvang in die Verenigde Koninkryk.”

Selfs die verlinkse vise-president van die Europese Kommissie Frans Timmermans het intussen toegegee dat sowat 60 persent van immigrante wat in Desember in Europa aangekom het, ekonomiese migrante is.

In werklikheid het peilings reeds aangetoon dat dit baie hoër is as net 60%. Meer as 90% is migrante wat uit armoede probeer ontsnap.

Britte besluit om ISIS te bom

Tornado-vegbomwerpers het Brittanje se eerste lugaanvalle in Sirië geloods, enkele ure nadat die parlement die premier, David Cameron, se plan om die Islamitiese staat (ISIS) daar aan te val, goedgekeur het.

‘n Regeringsbron het Donderdagoggend gesê die eerste aanval is geloods.

Die bomwerpers het glo reeds na hul basis teruggekeer.

Die Ministerie van Verdediging in Ciprus het bevestig dat vegvliegtuie van die Britse Lugmag hulle eerste aanvalle op teikens van die Islamitiese staat in Sirië uitgevoer het.

Britse parlementslede het ten gunste van die lugaanvalle in Sirië gestem, nadat die leier van die Arbeidersparty, Jeremy Corbyn, nie sy partylede kon oortuig om die Konserwatiewe regering te keer nie.

Arbeider Hilary Benn, rooi gedas, het vir groot genoegdoening gesorg onder Tories met sy emosionele toespraak om rebelle te gaan bom. Die debat het meer as 10 ure geduur.

Daar was 397 stemme ten gunste van die aanvalle en 223 daarteen. Die vier vegvliegtuie het kort daarna in Ciprus opgestyg.

Twee van die vliegtuie was drie ure later terug op Ciprus se grondgebied.

Kritici van die plan het gewaarsku dat die stap tot verdere terreur in die VK sal lei.

Obama bel Zuma oor geweld in Burundi

‘n Konsep-resolusie wat glo geweld in Burundi wil verhoed, is voorgelê aan die Verenigde Nasies se Veiligheidsraad deur Frankryk.

Frankryk het die mosie Maandag voorgelê om wat hulle bestempel as ‘n dreigende etniese burgeroorlog die hoof te bied, maar Westerse lande het ‘n beperkte ekonomiese belang in Burundi.

China het reeds aangedui dat hulle skenkings van oliemaatskappye aan Burundi soos die van die Britse Surestream sal vervang.

Rusland en ‘n aantal Afrika-lande het aangedui dat hulle nie sanksies teen Burundi se leiers sal steun nie.

Die resolusie wil druk op partye in Burundi plaas om geweld te staak sodat onderhandelinge kan hervat.

Sowat 300 000 mense is in die burgeroorlog in Burundi dood wat in 2006 beëindig is.

President, Jacob Zuma, is intussen in ‘n dringende telefoonoproep van sy Amerikaanse eweknie, Barack Obama, gevra om Anglo-Amerikaanse belange in die streek in ag te neem.

President Pierre Nkurunziza van Burundi het verlede maand nuutverkose lede van die parlement verwelkom nadat hy ingesweer is vir ‘n derde agtereenvolgende termyn.

Die ambassadeurs van Rusland en China het die geleentheid bygewoon, maar geen Westerse diplomate was teenwoordig nie.

Burundi, ‘n land van 10 miljoen mense ingewig tussen Oos- en Sentraal-Afrika, is die nuwe brandpunt tussen Anglo-Amerikaanse en Sino-Russiese belange.

Minstens 240 mense is dood en tienduisende het na buurstate gevlug nadat Nkurunziza in April besluit het om hom vir ‘n derde termyn verkiesbaar te stel. Hy het die verkiesing in Julie gewen.

Die huidige regeringstelsel in Burundi is na 10 jaar se intense onderhandelinge deur Westerse moondhede geskep met die goedkeuring van onder meer Nelson Mandela, maar klaarblyklik pas dit die Weste nie meer nie.

Die Afrika-Unie, die amptelike die borg van die Arusha-ooreenkoms, wat tot vrede in Burundi gelei het, kan nie ingryp nie.

Hulle word gekortwiek deur die kritiese rol wat Burundi tans in AMISOM speel met die vredesoperasie in Somalië.

Burundi het meer as 5000 goed opgeleide troepe beskikbaar gestel vir die operasie.

Na verwagting sal Joseph Kabila, staatshoof van die DRK, Denis Sassou Nguesso van die Kongo en Paul Kagame van Rwanda in onderskeidelik 2016 en 2017 moontlik Burundi se voorbeeld volg wat langer termyne betref.

Kagame is ‘n Amerikaanse Bondgenoot.

Yoweri Museveni van Uganda het drie dekades aan bewind gebly nadat hy weggedoen het met sy eie beperkings op die aantal termyne wat hy mag dien.

MONUSCO, die VN se sending van 20 000 lede in die Demokratiese Republiek van Kongo, se bates en personeel is as een moontlike opsie genoem om in te gryp in Burundi.

Dit sal egter lei tot verdere kritiek teen die VSA, iets wat hulle graag sal wil vermy.

Poetin reageer op wilde aantygings van opkikkers

Wladimir Poetin van Rusland het gereageer op wilde aantygings teen Russiese sportlui deur die Wêreldagentskap teen opkikkers, Wada.

Hy het gesê daar bestaan geen gronde vir sulke bewerings nie.

“Sodra sulke soort aantygings gemaak word, moet bewyse ook voorsien word. Solank daar nie bewyse is nie, is dit moeilik om daarop te reageer,” het Poetin se woordvoerder, Dmitri Peskof, aan verslaggewers gesê.

‘n Komitee van Wada het Maandag verklaar dat Rusland nie aan die Olimpiese Spele moet deelneem nie en uit internasionale sport geskors moet word.

Die verklaring volg nadat Wada tot die gevolgtrekking gekom het dat daar ‘n “diepgesetelde kultuur van korrupsie in Russiese atletiek heers”.

Die verklaring het groot verbasing onder sportlui gelei, aangesien Wada swyg oor China se gebruik van opkikkers.

Ontleders meen aantygings teen Rusland deur die VSA en Brittanje is in die mode maar Wada sal dit nie waag om die opkikker-mal China uit te wys nie, omdat dit te sensitief mag wees.

Wada sal sy aanbeveling aan die IAAF deurgee, en die Raad van die IAAF sal besluit of Rusland geskors sal word.

Die IAAF word egter tans ondersoek deur Interpol vir bedrog.

Moslemkwessie in Mianmar-verkiesing onderspeel

Stemme word getel in Mianmar se algemene verkiesing maar geen amptelike uitslae is nog aangekondig nie.

Voorlopige verslae van oral in die land dui op ’n oortuigende oorwinning vir die pro-Amerikaanse Aung San Suu Kyi se Nasionale Liga vir Demokrasie (NLD).

“Ons moet vasstel waarom ons verloor het,” het Htay Oo, ’n bondgenoot van pres. Thein Sein gesê. “Ons aanvaar egter die uitslae sonder enige voorbehoud. Ons weet nog nie met sekerheid wat die finale uitslae is nie.”

Htay Oo sê hy is verbaas met die omvang van sy nederlaag in sy eie parlementêre kiesafdeling in Hinthada in die delta-gebied, wat as die hartland van die USDP se landelike steun beskou is.

’n Woordvoerder van die NLD, Win Htein, sê die aanduidings is dat die party ongeveer 70 persent van die stemme wat tot dusver getel is, verwerf het.

Na verwagting het die party tussen 50 en 80 persent van stemme in Mianmar se 14 state ingepalm.

Hy het aan die nuusagentskap The Associated Press gesê die party se sterkste vertoning is in sogenaamde hartland-state waar dit voorkom asof die party tot soveel as 80 persent van die stemme gekry het.

Die steun neem effens af tot tussen 70 en 50 persent in etniese state.

“Dit is deur die verkiesingskommissie bevestig, maar ons is nog nie seker van die finale syfers nie. Indien hierdie opmerkings deur amptelike uitslae bevestig word, is die aanduidings dat die party onder leiding van Aung San Suu Kyi ’n oortuigende verkiesing-sege behaal het.”

Sy en haar party sal eintlik saam met die generaals wat Mianmar (Burma) in 1962 tydens ’n staatsgreep oorgeneem het, regeer sê ontleders.

Die generaals het tot in 2011 geregeer, waarna hulle die mag aan hul politieke vleuel oorhandig het nadat bewerings van korrupsie aan die lig gekom het.

Mianmar is verdeel in strydende etniese en godsdiensgroepe en die junta het ‘n balans gehandhaaf in ‘n land wat worstel met ‘n “krisis van minderhede”.

Boeddhiste vrees dat Moslems meer invloed in die land sal kry, maar Aung San Suu Kyi het sulke kwellinge onderspeel.

Ten minste 10 miljoen mense kon nie stem nie omdat hulle deel is van ‘n etniese minderheid.

Dit sal nie die eerste keer wees dat die NLD ’n oorwinning behaal nie. In 1990 het die party ook gewen, maar dié oorwinning is deur die generaals ­geïgnoreer.

Cameron se toetrede in Sirië kry die wind van voor

Die Verenigde Koninkryk se keurkomitee vir buitelandse sake het premier David Cameron se pogings om Britse troepe in Irak te ontplooi teen Sirië, in die wiele gery.

Die komitee se voorsitter, mnr. Crispin Blunt, ’n wetgewer in Cameron se Konserwatiewe Party, het gesê hy is bevrees die regering “reageer op die oorweldigende gevoel dat iets gedoen moet ­­word, ­­sonder enige verwagting dat sy aksie op militêre­ front beslissend sal wees”.

“Dit het ook nie ’n same­hangende en langtermynplan om ISIS te verslaan en om ’n einde aan die burgeroorlog te bring nie”.

Die Britse lugmag is deel van ’n veldtog van lugaanvalle teen militante teikens in Irak wat deur Amerikaanse magte gelei word.

In 2013 het Britse wetgewers die regering se voorstel vir militêre aksie in naburige Sirië grondig verwerp.

Cameron en sy minister­ van verdediging, Michael Fallon, het gesê hulle is ten gunste daarvan om voort te gaan met lugaanvalle in Sirië, maar net met die parlement se goedkeuring.

In ’n verslag wat Dinsdag vrygestel is, het die ministerie van buitelandse sake se keurkomitee gesê Rusland se ingryping in die konflik ter ondersteuning van Basjar al-Assad se regering “het enige voorgestelde aksie in Sirië deur die VK nog verder gekompliseer”.

Dit het gesê sonder ’n “samehangende internasionale strategie” om Sirië se burgerlike oorlog tot ’n einde te bring, “is dit steeds onsamehangend as aksie net geneem word op grond van ’n behoefte om iets te doen.”

Die komitee het gesê die regering moet fundamentele vrae beantwoord oor die voorgestelde lugaanvalle.

Dit sluit die wettigheid daarvan sonder die goedkeuring van die Verenigde Nasies in.

Dit moet aandui of hulle die steun van magte in die streek insluitend Turkye, Iran, Saoedi-Arabië en Irak, sou hê.

Tot dan “stel ons voor ’n mosie om voort te gaan met Britse militêre aksie in Sirië word nie aanvaar nie,” sê die komitee.

Die komitee se verslag is nie afdwingbaar nie, maar die voorstelle maak dit vir Cameron moeiliker om wetgewers se goedkeuring vir voortgesette lugaanvalle te bekom.

Franse minister ontplooi polisie teen migrante-misdaad

Frankryk se minister van binnelandse sake het Derde Wêreld-migrante Woensdag in die hawestad van Calais belowe dat vroue en kinders verhitte tente in ‘n tydelike kamp gegee sal word teen die bitter koue.

Hy het ook verklaar dat die misdaadprobleem aangespreek sal word deur bykomende polisiebeamptes – sowat 1 125 van hulle – te ontplooi in Calais en die omliggende gebiede.

Migrante en vlugtelinge uit die horing van Afrika, die Midde-Ooste of Afghanistan probeer om Brittanje dmv vragmotors, veerbote of deur die Kanaaltonnel te bereik.

Die sogenaamde “Nuwe Oerwoud” is ‘n versameling plakkers, ​​wat ongeveer ‘n uur weg te voet van die sentrum van die noordelike Franse stad opgeskiet het.

Die Sosialiste verkeer onder druk omdat kiesers kla dat misdaad toegeneem het.

Die afgelope maande, het honderde migrante wat wil oorgaan na Brittanje, die plakkerskamp aansienlik laat uitbrei.

Sowat 6 000 mense woon in die plakkerskamp en met die heersende winterweer, vrees hulpgroepe dat toestande in die gebied verder sal versleg.

Minister Bernard Cazeneuve het Calais besoek vir die sewende keer sedert die migrantekrisis begin het, maar die onverkwiklike toestand toon geen teken van enige afname nie.

Benewens die bykomende polisie wat in die gebied ontplooi sal word, sal ‘n sentrum wat vroue en kinders huisves, verder vergroot word om 400 siele in te neem.

“In die tussentyd, sal verhitte tente opgerig word… teen die einde van die week,” het hy gesê, en belowe dat “geen vrou en geen kind sonder ‘n skuiling in hierdie stad sal bly nie”.

Net sowat 150 migrante per dag kon in Augustus onwettig na Engeland reis weens strenger veiligheidsmaatreëls om hulle uit te hou.

Baie migrante en vlugtelinge woon dus in die “Nuwe Oerwoud” ‘n krotbuurt van gevaarlike stegies besaai met tydelike skuilings wat uit afvalmateriaal opgerig is.

Vroeër hierdie week, het Calais se burgemeester Natacha Bouchart die vooruitsig van ‘n weermagontplooiing genoem, “omdat ons nie regtig weet wat daar aangaan nie”.

Bouchart het vroeër 12 miljoen Britse Pond van die Britse regering ontvang vir die migrantekrisis nadat sy gedreig het om die hawe te sluit, Britse grensbeheer op Franse grond af te skaf, die Verenigde Koninkryk se doeanebeamptes huis toe te stuur en 2000 migrante dadelik na Brittanje te laat reis.

Ebola terug in Nigerië, Londen

Die departement van gemeenskapmedisyne van die Universiteit van Calabar in die Cross River-staat van Nigerië ondersoek die jongste geval van Ebola in die land.

Tien mense word in kwarantyn gehou nadat hulle in die suidelike Nigeriese stad Calabar in kontak was met ’n pasiënt wat simptome soortgelyk aan dié van Ebola getoon het.

Die land is ’n jaar gelede vry van Ebola verklaar.

Die pasiënt het hom verlede week by die Calabar-hospitaal aangemeld met simptome wat ooreenstem met dié van Ebola.

Die plaaslike media berig dat die pasiënt sedertdien dood is, maar geen amptelike bevestiging is ontvang nie

Intussen verkeer die Skotse verpleegster wat verlede jaar Ebola in Sierra Leone opgedoen het, in ‘n “ernstige toestand” in ‘n isolasie-eenheid in Londen.

‘n Skotse hospitaal het bevestig dat die virus steeds teenwoordig is in Pauline Cafferkey se liggaam na die oorspronklike infeksie.

Die 39-jarige is terug na die isolasie-eenheid gevlieg in die Royal Free Hospital in Londen waar sy vir haar lewe veg.

Liggaamlike weefsel kan die Ebola-infeksie huisves maande nadat die persoon klaarblyklik ten volle herstel het.

Cafferkey van Cambuslang in South Lanarkshire, het byna ‘n maand in die eenheid aan die begin van die jaar deurgebring na sy die virus opdoen het in Desember 2014.

Brittanje dood twee Britse burgers met tuig-aanvalle

Die Britse premier, David Cameron, het Maandag aankondig dat twee Britse burgers in ‘n aanval deur Britse onbemande tuie gedood is.

Die twee is dood toe die Britse weermag lede van die Islamitiese Staat (IS) in Sirië geteiken het.

Hy het gesê Augustus se aanval was die eerste keer dat Britse magte ’n aanval in ’n ander land in ’n nie-oorlogsituasie uitvoer.

Die VSA loop reeds onder kwaai kritiek deur weens die onwettige aanvalle wat hulle in ander lande uitvoer sonder dat hulle oorlog teen sulke lande verklaar het. Dit is strydig met die Geneefse Konvensie.

Ook meen kritici dat sulke aanvalle die risiko vir Moslemgeweld teen Westerse teikens aanmoedig.

Volgens Cameron was die aanval egter nodig om Brittanje te verdedig. Die regering se regsadviseurs het die aanval gesteun.

Dit was daarop gemik om spesifieke dreigemente deur terroriste met ’n ystervuis vas te vat, het Cameron gesê.

Die hoofteiken van die aanval was die 21-jarige Reyaad Khan, ’n Britse man wat in talle IS-werwings­videos verskyn.

“Junaid Hussain en Reyaad Khan was Britse burgers wat in Sirië besig was om aktief IS-ondersteuners te werf. Die mans was ook besig om spesifieke en wrede aanvalle teen die Weste te beplan,” het Cameron gesê.

Die derde man wat in die aanval dood is, is nóg ’n Britse burger, Ruhul Amin (26).

Volgens Cameron is Brittanje genoodsaak om betrokke te raak by lugaanvalle teen IS in Sirië, maar het onderneem om eers parlementêre goedkeuring te verkry voordat Brittanje by die Amerikaanse koalisie aansluit wat lugaanvalle in Sirië uitvoer.

Britse regering pas instromingsbeheer toe terwyl kritiek van ‘ rassisme’ woed

Die Britse regering is besig om naarstiglik instromingsbeheer teen nie-blanke immigrante toe te pas terwyl kritici hom van “rassisme”  beskuldig. Die eerste minister, David Cameron, het reeds verskeie kere neerhalend na voornemende immigrante wat die Mou by Calais probeer oorsteek as “swerms” verwys. Die Verenigde Koninkryk se hoofdiplomaat, die minister van buitelandse sake Philip Hammond, het die “plunderede swerwers” wat die land wil binnekom daarvan beskuldig dat hulle Brittanje en Europa se “lewenstandaard bedreig”.

In ‘n onderhoud met die BBC het Hammond gesê:

“Europa kan hom nie beskerm en sy lewenstandaard en maatskaplike struktuur handhaaf indien dit miljoene instromers uit Afrika moet opneem nie.”

Volgens die Guardian-koerant, die Britse Vlugtelingeraad (Refugee Council) een van die eerstes om mnr. David Cameron op Twitter te kritiseer:

Dié organisasie se woordvoerder, Dr Lisa Doyle, sê:

“Dis besonder teleurstellend om te hoor hoe die eerste minister sulke onverantwoordelike, verontmenslikende taal te gebruik om die desperate mans, vroue en kinders te beskryf wat vir hul lewens oor die Middellandse See vlug.

“Dié soort retoriek is uiters plofbaar en kom op ‘n tydstip waartydens die regering daarop behoort te fokus om saam met sy Europese eweknieë te werk om kalm en simpatiek op dié aaklike humanitêre krisis te reageer.”

Franse gendarmes keer 'n vlugteling uit Afrika op die Eurotunnel-terrein by Calais aan
Franse gendarmes keer ‘n vlugteling uit Afrika op die Eurotunnel-terrein by Calais aan

Linkse en liberale webblaaie het sowel die Britse eerste minister as sy buitelandse minister van “rassisme” beskuldig en dat hulle die Britse Wet op rassebetrekking van 1976 oortree.

Britte sien bedreiging in seemeeue

Seemeeue se manewales maak groot opslae in Britanje.

Hoewel besoekers aan die land se strande gewoond geraak het aan die voorbarige geveerdes wat hul vis en tjips steel, haal die voëls deesdae ook koerantopskrifte in die poniepers.

Van die onlangse berigte sluit in ‘n seemeeu wat ‘n slimfoon gegaps het, ‘n kanibalistiese reeksmoordenaar, en hoe die veglustige voëls onwettige immigrante laat spaander het.

Die meeue word luidens berigte in selfs die hoofstroom media al meer slinks met hul diefstal, maar kenners meen die diere het bloot net gewoond geraak aan mense se teenwoordigheid in hul omgewing en sien hulle as ‘n bron van kos.

Die seemeeue is dalk ook meer aggresief in Julie omdat hulle kuikens het.