Barack Obama – Bladsy 3

Obama sê Russiese troepe in die Oekraïne ‘n feit

Die teenwoordigheid van Russiese troepe in die Oekraïne is sonder twyfel waar, het president Barack Obama gesê in die Tallinn Konsertgebou Nordea, in Estland.

“Russiese troepe in die gebied van die Oekraïne is nie ‘n humanitêre of vredesending nie,” het hy gesê. Volgens hom, “dit is die feite wat bewys kan word,” en “hulle kan nie bevraagteken word nie.”

‘n Verteenwoordiger van die Amerikaanse ministerie van buitelandse sake Jen Psaki het gesê dat die Verenigde State van Amerika se State Department geen onafhanklike bewyse het dat die Russiese troepe oor die grens van die Oekraïne beweeg het nie.

Die vreemde ontmoeting van Senator McCain met ISIS

Amerika het hernieude lugaanvalle teen vestings van die Islamitiese Kalifaat in Irak uitgevoer, na dreigemente van die militante om ‘n tweede Amerikaanse joernalis te onthoof.

Pres. Barack Obama het bevestig dat die joernalis James Foley wel onthoof is en dat die video van Foley se dood eg is.

Die video wat vermoedelik in die Irakse of Siriese woestyn verfilm is, toon ook ‘n tweede Amerikaanse joernalis, Steven Sotloff, wat deur die groep aangehou word.

Die Kalifaat sê Foley is vermoor nadat Obama opdrag gegee het vir die lugaanvalle teen hul vestings in die noorde van Irak.

In Mei 2013 het Senator John McCain ‘n oënskynlike onwettige besoek gebring naby Idleb in Sirië via Turkye om te ontmoet met die leiers van die “gewapende opposisie” van Sirië. Sy reis is nie bekend gemaak nie, tot ná sy terugkeer na Washington.

Hierdie reis is moontlik gemaak deur die Syrian Emergency Task Force, ‘n Sionistiese organisasie gelei deur ‘n Palestynse werknemer van AIPAC, het The Passionate Attachment onthul. Mouaz Moustafa is glo ‘n navorser by die Washington Institute for Near East Policy.

In foto’s wat vrygestel is tydens McCain se besoek is die teenwoordigheid van Mohammad Nour, ‘n woordvoerder vir die Al-Nosra Front – dit wil sê, al-Kaida in Sirië – opgemerk waar hy saam met die Amerikaanse senator verskyn.

Nour het 11 Libanese Sjiïtiese pelgrims in Asas ontvoer. Toe McCain gevra word oor sy verskyning saam met die ontvoerder, het die senator beweer Nour het homself in die foto ingenooi sonder dat hy geweet het wie dit is.

Die saak het ‘n groot opskudding in Libanon veroorsaak en die gesinne van die ontvoerdes het ‘n klag voor die Libanese regbank teen Senator McCain vir medepligtigheid in die ontvoering gelê. Uiteindelik is ‘n ooreenkoms bereik en die pelgrims is vrygelaat.

Kom ons veronderstel dat Senator McCain die waarheid gepraat het en dat hy misbruik is deur Mohammad Nour.

Die doel van sy onwettige reis na Sirië was om die hoofde van die personeel van die Vrye Siriese leër te ontmoet. Volgens hom is die organisasie “uitsluitlik Siriërs” wat veg vir “hul vryheid” teen die “diktatorskap”.

Nog ‘n foto van John McCain en die hoofde van die Vrye Siriese leër het egter sy weg na die internet gevind. In die linker voorgrond sit Ibrahim al-Badri, waarmee die Senator praat, en neffens hom brigadier-generaal Salim Idris.

Terug van sy onwettige reis, het John McCain verklaar dat almal wat verantwoordelik vir die Vrye Siriese leër “gematigdes is wat vertrou kan word”.

Maar sedert 4 Oktober 2011, is Ibrahim al-Badri (ook bekend as Abu Du’a) op die lys van die vyf mees gesoekte terroriste deur die Verenigde State van Amerika. Vandaar dus die onwettigheid van McCain se ontmoeting.

‘n Losprys van tot $10 miljoen word trouens aangebied vir enigiemand wat met sy inhegtenisname help.

Die volgende dag, 5 Oktober 2011, is Ibrahim al-Badri selfs ingesluit op die lys van die VN-sanksieskomitee as ‘n lid van Al-Kaida.

Daarbenewens het Ibrahim al-Badri, bekend onder sy nom de guerre as Abu Bakr al-Bagdadi, ‘n maand voor die ontvangs van Senator McCain, die Islamitiese Staat in Irak en die Levant (ISIL/ISIS) op die been gebring terwyl hy nog deel uitmaak van die personeel van die “baie gematigde” Vrye Siriese Leër.

Hy spog dat hy op sy eie die aanval op die Taj en Abu Ghraib tronke in Irak gereël het waar hy gehelp het om tussen 500 en 1000 jihadiste te laat ontsnap wat dan by sy organisasie aangesluit het. Hierdie aanval is gekoördineer met ander gelyktydige tronkontsettings in agt ander lande!

Hierdie saak is so vreemd dat Interpol op 3 Augustus 2013 ‘n nota uitgereik het daaroor en die hulp van die 190 lidlande versoek het.

Dit blyk dus dat daar getuienis bestaan dat die Vrye Siriese Leër, die Al-Nosra Front en ISIS saamgestel is uit dieselfde individue wat voortdurend tussen die verskillende organisasies migreer.

Wanneer dié mense dus sê hulle verteenwoordig die Islamitiese Kalifaat wat die ongelowiges uitroei, bly hul tegnieke ongelukkig presies dieselfde. Hulle gaan hulle voort met dieselfde soort terreur van die ander twee organisasies: Verkragting, marteling, onthoofding en kruisigings.

Senator McCain en sy metgeselle het nie die inligting in hul besit oor Ibrahim al-Badri aan die State Department oorhandig nie en ook nie gevra vir die beloning nie. Hulle het ook nie die anti-terrorisme komitee van die VN ingelig oor hul ontmoeting met die terroris nie.

In geen land in die wêreld, ongeag hul politieke stelsel, sou ‘n mens aanvaar dat die leier van die opposisie in direkte kontak, en in die openbaar vriendelik, met ‘n baie gevaarlike terroris verkeer nie.

Hulp aan Irak in die vorm van bomme

Hulp in die vorm van bomme na Irak is oppad. Enkele dae nadat die VSA Rusland gekritiseer het dat hulle onder die dekmantel van “humanitêre hulp” militêre doelwitte stel, het pres. Barack Obama van die VSA Donderdagaand Amerikaanse lugaanvalle in Irak om “humanitêre” redes goedgekeur.

Die VSA wil klaarblyklik hulle totale mislukking en gru-nalatenskap in Irak met kinetiese humanitêre hulp probeer toesmeer.

Ten einde ‘n “volksmoord” deur Islamitiese ekstremiste op etniese en godsdiensminderhede te voorkom, gaan die VSA Irak verder onder bomme steek. Weens die Amerikaanse inval van 20 Maart 2003 om olie te buit, is die eens florerende land die afgelope 10 jaar in chaos gedompel.

Kospakkies en ander voorrade gaan uit die lug glo nou op ‘n klein groepie Irakkese van die Yazidi-minderheidsgroep neerreën in die jongste reklamepoging om Amerika se verslete beeld te poets.

Hulle is tans deur Isil (Islamitiese Staat in Irak en die Levant) vasgekeer. “Ons kan versigtig en verantwoordelik optree om ‘n moontlike volksmoord te voorkom,” het Obama gesê wat pas wapens aan Israel voorsien het om Palestynse burgerlikes uit te wis.

Die Veiligheidsraad van die Verenigde Nasies het intussen ‘n noodvergadering oor die krisis in Irak belê en die olieprys het op markte in Asië begin styg nadat dit bekend geword het dat Obama lugaanvalle op Isil goedgekeur het.

“Daarom het ek gelas dat, indien nodig, lugaanvalle op spesifieke teikens uitgevoer word om magte in Irak te help om die beleg te beëindig en die landsburgers wat vasgekeer is, te beskerm.”

Obama het ook gewaarsku dat Amerikaanse vegvliegtuie Isil sal aanval as hulle dit naby die stad Irbil waag waar ‘n Amerikaanse militêre raadgewers die Irakse weermag oplei.

Obama swakste president sedert Tweede Wêreldoorlog

’n Nuwe meningspeiling het die Amerikaanse president, Barack Obama uitgewys as die swakste Amerikaanse president sedert die Tweede Wêreldoorlog.

George W. Bush is die tweede swakste volgens die peiling.

Sowat 33 persent van die 1 446 geregistreerde Amerikaanse kiesers wat aan die Quinnipiac-universiteit se meningspeiling deelgeneem het, het Obama as die swakste president aangewys.

Bykans die helfte van die deelnemers dink Mitt Romney sou beter gewees het in die pos as hy in 2012 die presidentsverkiesing gewen het.

Die Quinnipiac-meningspeiling is een van talle meningspeilings wat Obama se ongewildheid beklemtoon.

Politieke omstredenheid en die fiasko van sy buitelandse beleid het hom tot rekordlaagtes gedwing. Net 40 persent hou van hoe hy Amerika se ekonomie regruk, terwyl net 37 persent sy buitelandse beleid goedkeur.

Die uitslae het ook getoon dat 35 persent van die kiesers dink Ronald Reagan, wat tussen 1981 en 1989 president was, die beste Amerikaanse president sedert 1945 was, met Bill Clinton (18 persent) tweede en die vermoorde John F. Kennedy (15 persent) in die derde plek.

VSA militêre raadgewers na Irak terwyl Brent-ru-olie styg

Die Amerikaanse president, Barack Obama het aangekondig dat 300 Amerikaanse militêre raadgewers in Irak ontplooi is.

Die raadgewers sal die oorloggeteisterde land se weermag van raad te bedien oor hoe om weerstand te bied teen ‘n militante opmars van ISIS.

Die hoofsaaklik Shi’itiese regering is midde in ‘n sektariese stryd met die Sunni-militante groep bekend as ISIS wat reeds verskeie dorpe in die noorde van die land oorgeneem het.

Dié aankondiging kom nadat die VSA se inval in Irak van 2003 om Saddam Hoessein se beweerde “wapens van massavernietiging” op te spoor, klaarblyklik net geweld gebaar het.

Die redes vir die destydse Amerikaanse inval onder aanvoering van George W. Bush en Tony Blair is intussen as ‘n stel leuens ontbloot.

Obama sê egter Amerikaanse magte nie weer operasioneel sal betrokke raak in Irak nie. Die militêre personeel in Irak is egter reeds glo by die Amerikaanse ambassade daar.

Obama het gesê sy land het ‘n belang daarby om ‘n burgeroorlog in Irak af te weer.

Obama het sonder ironie bygevoeg die VSA wil verseker dat die land nie ‘n “nuwe afspringplek word vir terroriste” nie.

Die prys van Brent ru-olie het tot sy hoogste vlak in nege maande gestyg weens die risiko van ‘n volskaalse oorlog in die streek na die VSA se aankondiging.

Dit mag tot die onderbreking van olietoevoer uit Irak lei.

Hewige gevegte in die noorde het oliemaatskappye genoop om personeel weens veiligheidsredes te onttrek

Dit kan druk op voorrade uit OPUL se naasgrootste olieprodusent verhoog.

Die Irakese regeringsmagte was Donderdag in ‘n verbete stryd gewikkel met Sunni-ekstremiste om die beheer van die land se grootste olieraffinadery.

Indien die raffinadery waar 300-duisend vate olie per dag geproduseer word gesluit bly, sal die regering olie moet invoer om in die land se behoeftes te voldoen.

Tot dusver is die meeste van Irak se olievelde suid van Bagdad nog nie deur die opmars van ISIS geraak nie.

G7 val uitmekaar nadat Obama Rusland met oorlog dreig

Wêreldleiers van die G7 wat president Wladimir Poetin van Rusland uitsluit, het Woensdagaand in Brussel vergader te midde van aanduidings dat die sogenaamde Westerse koalisie besig is om uitmekaar te val.

Die G8 wat oorspronklik Rusland ingesluit het, sou voorheen in Sochi na die Winterspele byeenkom, maar na die Amerikaans-gedrewe staatsgreep in die Oekraïene is die beraad uitgestel.

Die afgelope paar dae het die leiers van Brittanje, Frankryk en Duitsland persoonlike gesprekke met die Russiese leier geskeduleer, wat die verdeeldheid onder Westerse lande verder ontbloot.

Die VSA se pogings om Rusland te isoleer na president Poetin die Amerikaanse aggressiewe houding teenoor die Oekraïne veroordeel het, is besig om negatiewe vrugte af te werp.

Obama en Poetin het verskeie kere per telefoon – maar nie in persoon nie – oor Amerikaanse pogings om die Oekraïene te destabiliseer, gesels.

Rusland het intussen korte mette gemaak van Amerikaanse militêre aggressie in die Krim na ‘n baie suksesvolle referendum waarin die inwoners oorweldigend vir onafhanklikheid gestem het.

Obama het Dinsdag gesê hy het ‘n “sakeverhouding” met Poetin en sal hom in Frankryk ontmoet Vrydag tydens byeenkomste vir die 70ste herdenking van die Geallieerde inval van Normandië. Maar hulle het geen formele gesprekke geskeduleer nie.

Obama het intussen aangekondig by sy aankoms in Pole Dinsdag dat hy die Kongres versoek het om $1 miljard te bewillig om die Amerikaanse militêre teenwoordigheid in Europa te verhoog.

Hy het bevestig dat die Amerikaanse verbintenis tot Pole se veiligheid onder die NAVO-alliansie ‘n werklikheid is.

“Dit is nie net woorde nie,” het Obama gesê. “Dit is onwrikbare verpligtinge, gerugsteun deur die sterkste alliansie in die wêreld en deur die gewapende magte van die Verenigde State van Amerika, die mees kragtige militêre mag in die geskiedenis.”

VSA wil Franse bank met $10 miljard beboet

Frankryk se beleërde Sosialistiese regering veg tevergeefs teen die Verenigde State se voorneme om die grootste Franse bank, BNP Paribas, met $10 miljard (meer as R100 miljard) te beboet omdat die bank Amerikaanse sanksiewetgewing teen Iran sou oortree het.

Daar is ook sprake daarvan dat BNP verbied gaan word om Amerikaanse dollars via die Federale Reserwestelsel aan sy kliënte te lewer, iets wat vir die bank ‘n verdere terugslag sou beteken. Indien die boete sou voortgaan, sou dit feitlik BNP se jaarlikse wins van €8,2 miljard ($11 miljard) uitwis. Die Franse regering vrees ook dat sy belastinginkomste, asook die spaargeld van BNP se deposante, deur die Amerikaanse boete geraak kan word.

Die regse opposisieparty in Frankryk, die Front National, het die boete as “Amerikaanse struikrowery” beskryf en in ‘n verklaring gesê:

“Gegewe die grootte van die betrokke bedrae ($10 miljard), betrek die geskil tussen die Amerikaanse regering en BNP Paribas die Franse staat regstreeks.

“Trouens, die regering is verplig en daarvoor verantwoordelik dat die belange van miljoene Franse deposante beskerm word.

“Hy moet ook toesien dat Franse belange nie opsy geskuif word onder valse voorwendsels met as enigste doel om die Amerikaanse belang te laat seëvier nie, soos ons reeds in Iran gesien het toe PSA (Peugeot-Citroën) gedwing is om die land te verlaat, net om enkele maande later deur Amerikaanse mededingers vervang te word nie…

“Indien die Franse staat so diskreet oor dié saak optree, is dit omdat hy nie meer oor die nodige invloed beskik om met Washington te kan onderhandel nie, weens sy stelselmatige onderwerping, onder presidente Sarkozy en Hollande, aan Amerikaanse wense en die buitelandse beleid van daardie land.

“In die BNP Paribas-aangeleentheid loop ons gevaar om baie duur te betaal vir ons leiers se aflegging van ‘n onafhanklike buitelandse beleid ten gunste van die mees kranksinnige Atlantisme.”

Intussen het die Frankryk se Sosialistiese minister van buitelandse sake, Laurent Fabius, gewaarsku dat die geskil dalk die huidige onderhandelings oor ‘n Transatlantiese handelsooreenkoms kan laat skipbreuk ly. Sy waarskuwing geskied twee dae voor president Francois Holland vir Barack Obama gaan ontvang vir samesprekings oor ander sake wat spanning tussen die twee lande veroorsaak, soos General Electric se gepoogde oorname van die Franse ingenieursgroep Alstom, asook verskille oor Sirië en sanksies teen Rusland.

Tot dusver het Hollande se senior ministers dit vermy om oor BNP se onderhandelings met die Amerikaanse owerheid te praat. Die VSA is besig met ‘n ondersoek na die bank se beweerde verbreking van Amerikaanse sanksies teen die Soedan, Iran en Sirië tussen 2002 en 2009.

Volgens Fabius sal dit die verkeerde boodskap uitstuur indien BNP se sakebedrywigheid beskadig word. “As daar ‘n fout of oortreding was, is dit aanvaarbaar dat daar ‘n boete sal wees, maar die boete moet proporsioneel en redelik wees,” het hy aan France 2 TV gesê.

“Hier sou ons ‘n voorbeeld hê van ‘n onregverdige en unilaterale besluit. Dit sou ‘n baie ernstige probleem veroorsaak. Jy kan nie wederkerigheid as die reël beskou, as jy terselfdertyd ‘n besluit soos dié het nie,” het Fabius gesê. “Dis ‘n buitengewoon ernstige kwessie wat die Amerikaners in ‘n gees van vennootskap moet hanteer en nie unilateraal nie.”

Blykbaar het Hollande self sy kommer oor die BNP-saak tydens ‘n telefoonoproep na die Withuis meer as twee weke gelede uitgespreek, volgens ‘n ingeligte bron.

Verlede week het die Franse bankreguleerder, Edouard Fernandez-Bollo, asook Christian Noyer, die goewerneur van die Bank van Frankryk, met aanklaers en reguleerders in New York ontmoet.

Die Amerikaanse owerheid, waaronder die hoofbankreguleerder van New York-staat, die departement van justisie en die distriksprokureur van Manhattan, beweer dat BNP inligting uit bankoordragte verwyder het sodat sodanige oordragte deur die Amerikaanse finansiële stelsel kon gaan sonder om slapende honde wakker te maak.

Volgens ingeligte bronne mag die boete gepaardgaan met potensieel erger strawwe, soos ‘n moontlike tydelike opskorting van die bank se magtiging om VS-dollar-transaksies te lewer. Feitlik al die groot Europese banke beskik oor takke in New York wat hulle toegang tot die dollar-stelsel gee.

Ontleders meen egter dat Hollande se ontmoeting met Obama vanuit ‘n posisie van swakheid sal geskied, gegewe die Sosialis se ongewildheid tuis. In die onlangse Europese verkiesings in Frankryk het die Sosialistiese Party minder as 14 persent stemme ontvang, teenoor die Front National se 25 persent en die liberale UMP se 20 persent.

BNP Paribas het ontstaan uit die samesmelting van die handelsbank Banque Nationale de Paris (BNP) en die aksepbank, Banque de Paris et des Pays-Bas (Paribas). Laasgenoemde naam beteken letterlik “Bank van Parys en Nederland”.

Withuis probeer Oekraïne-krisis de-eskaleer nadat China Rusland steun

Die Withuis het ‘n amptelike foto vrygestel van Barack Obama waar hy telefonies met Wladimir Poetin gesels oor die krisis in die Oekraïne. Die gesprek het 90 minute geduur.

Die Amerikaanse president het verkies om met sy naweek-uitrusting van denim heel loslit te poseer.

Ontleders meen die foto van die ontspanne das- en paklose leier is gemik daarop om die wêreldkrisis te de-eskaleer, nadat China Rusland teen die VSA oor die kwessie ondersteun het.

Amerika se wêreldleierstatus berus daarop dat hulle lande isoleer. China en Rusland wat saamstaan is ‘n nagmerrie vir die VSA se buitelandse beleid van verdeel en heers.

Die Oekraïne, een van die voorste uitvoerders van koring en mielies op die planeet, staar ontwrigting in die gesig weens die ingryping van sekere Westerse lande met oliebelange wat tot ‘n staatsgreep in die land gelei het.

Dié ingryping kan die opkomende globale voedselkrisis verder vererger.

‘n Gaspyplynkaart illustreer grafies waarom Westerse oliebelange die Russiese energiereus Gazprom as ‘n werklike probleem beskou. ‘n Groot mededingende gasveld loop onder Sentraal-Europa se pyplynnetwerk en boorputte kan onmiddellik gasverkope aan Duitsland en aan ander bestaande Gazpromkliënte beteken. ‘n Prysoorlog sal Gazprom se beheer oor die Europese mark en daarmee Russiese invloed knou.

Die mate waartoe die VSA se multinasionale olie- en gasmaatskappye direk Russiese ondernemings in die verskaffing aan die EU teiken, is merkwaardig. Chevron, Exxon en ander is baie prominent in die opkomende buitelandse skaliespel.

Dat skalie-ontginning onnoembare skade aan waterarm, ongerepte plekke sal aanrig, beteken vir hierdie gulsige multinasionale maatskappye minder as niks.

Die mededinging wat die Oekraïne met skaliegasontwikkeling vir Rusland kan skep, is ‘n faktor wat Anglo-Amerikaanse belange dwing om Oos-Europa te destabiliseer.

Poetin se streeksambisies word gerugsteun deur ‘n sterk energiediplomasie. Sy binnelandse politieke posisie berus op stabiele pryse om die staat se begroting te finansier.

Daarbenewens beskik hy oor ‘n revolusionêre konserwatiewe ideologie met ‘n yslike internasionale aantrekkingskrag in verskeie godsdienstige, politieke en ekonomiese sfere. Barack Obama beskik tans oor sy slagoffervelkleur en sy ondersteuning vir gayregte.

Poetin het sy internasionale status verder verhoog deur sy onlangse diplomatieke oplossing vir Sirië. Russiese sagte mag berus ironies genoeg vandag op al die fondamente waarop goeie Westerse waardes geskoei is.

Rusland het nie troepe ingestuur in die Oekraïne nie. Poetin maak gebruik van kontraktniki (goedbetaalde professionele vrywilligers) om ‘n greep op die situasie te behou.

Dieselfde hoogsopgeleide kontraktniki is die mense wat die Moslemopstand in die Kaukasus met groot sukses onderdruk het.

Poetin sal nie sommer openlik ingryp in die Oekraïne nie, maar onder druk van die nasionalistiese Russe se eie interne politiek sal die Krim se mense ook nie aan hul eie lot oorgelaat word nie.

Barack Obama versag vonnisse van swart dwelmoortreders

President Barack Obama het die gevangenisstrawwe van agt mense wat aan crack-kokaïen-oortredings skuldig bevind is, versag. Volgens die Amerikaanse president is hulle gestraf deur ‘n onbillike strafregstelsel wat verarmde swart gemeenskappe buitengewoon seermaak.

Al die gevangenes is vir ten minste 15 jaar tronk toe gestuur, waaronder ses wat lewenslange vonnisse opgelê is. Die meeste sal nou teen 17 April weens die presidensiële kwytskelding vrygelaat word.

Die gevangenes sou waarskynlik veel ligter strawwe ontvang het indien hulle onder ‘n wet gevonnis sou gewees het wat Obama drie jaar gelede onderteken het en wat die verskille in vonnis tussen crack-kokaïen en poeierkokaïen verminder het.

Obama het gesê die ses swartmans en twee -vroue is deur ‘n “onregverdige stelsel” tot gevangenisstraf gevonnis wat een gram crack-kokaïen dieselfde straf oplê as iemand wat met 100 gram poeierkokaïen gevang word, verhouding at deur die Billike Vonniswet van 2010 verminder is.

“Indien hulle kragtens die huidige wet gevonnis sou gewees het, sou baie van hulle reeds hul tronkstraf uitgedien en hul skuld aan die samelewing vereffen het,” het Obama in ‘n verklaring gesê.

“Pleks daarvan, vanweë ‘n wanbalans in die wet wat nou as onregverdig erken word, bly hulle in die gevangenis agter, teen ‘n koste van miljoene belastingbetalerdollars per jaar.” Die invloedryke American Civil Liberties Union-groep het Obama se besluit verwelkom maar beklemtoon dat hy een van die kleinste kwytskeldings- en vonnisversagtingsrekords van enige Amerikaanse president in die onlangse geskiedenis het.

Tydens sy vyf jaar as president het Obama voorheen 39 kwytskeldings en een vonnisversagting toegestaan.

“Dis een belangrike stap om die skade ongedaan te maak wat ekstreme vonnisse aan soveel mense in ons strafregstelsel berokken het,” het die ACLU se adjunkregsdirekteur Vanita Gupta gesê.

“Ons hoop dat die president sal voortgaan om sy begenadigingsmagte uit te oefen en sy steun aan stelselhervorming te verleen wat ons strafregstelsel slimmer, billiker en meer menslik sal maak.”

Die billike vonniswet van 2010 het die strawwe verminder sodat iemand wat met een gram crack nou dieselfde vonnis ontvang as iemand wat met 18 gram poeierkokaïen gevang word. Dit ruim ook die verplgte minimumstraf van vyf jaar vir die eenvoudige besit van crack uit die weg.

Net ‘n kwart van crack-kokaïengebruikers is swart, maar 81 persent van mense wat vir crack-besit of -handel in 2007 gevonnis is, was swart, volgens die Verenigde State se Vonniskommissie.

Begrafnisgangers Obama, Cameron vermaak deur blonde selfie

Vir die duisende roubeklaers in Johannesburg se ENB-stadion was dit bedoel om ‘n gepaste huldeblyk aan ‘n “reus van die geskiedenis” te wees.

Maar ‘n paar arrogante wêreldleiers wat voordeel wil trek uit die Swart Messias het dit gesien as die ideale geleentheid om nog groter pret te maak.

Die Oxfordwoordeboek het nie verniet sopas die woord “selfie” opgeneem nie. Die Amerikaanse president en sy agterryer David Cameron het hul eie selfingenome beheptheid verder gevoed deur vir ‘n selfie te poseer saam met die flirterende Deense leier Helle Thorning-Schmidt.

Niks van die aangeplakte treurmare oor Ons Dierbare Leier, met die swaarmoedige begrafnisgangerfronse vir die selfie nie.

Naïewe webgebruikers wat nog glo in die VSA en Brittanje se versinsels oor Mandela se edele motiewe, het die twee dadelik daarvan beskuldig dat hulle die erns van die geleentheid ondermyn het.

President Barack Obama, premier Cameron en die guitige Deen wat laasgenoemde sommer aan die gesig gegryp het, het nietemin ‘n ysige ontvangs van Amerika se Eerste Dame ontvang.

Michelle het strak voor haar uitgestaar, waarskynlik soos die kritici op sosiale media onder die indruk dat die trio skielik aan geheueverlies ly oor waarom hulle in Suid-Afrika opgedaag het.

Haar bui het nie verbeter tydens die verrigtinge nie en sy het later die Deen uit haar sitplek verwyder. Dié stap het dadelik viraal versprei.

Wladimir Poetin het nie die roudiens bygewoon nie.

Vyande moet uitmekaar gehou word

Daar was ‘n baie kritieke oomblik tussen lede van die VSA se veiligheidspan en Libiese sekuriteit by Mandela se inhuldiging in 1994. Dit was nog voordat kol Ghadaffi van Libië deur die VSA vermoor is tydens ‘n inval in sy land.

Daar sal vandag weer meer as een geleentheid wees vir vyandige staatshoofde om mekaar raak te loop, sê veiligheidskenners.

Zuma sal nie vir president Obama naby Fidel Castro van Kuba kan bring nie.

Met die Derde Wêreldoorlog wat dreig, sal Nelson Mandela se roudiens en begrafnis baie fyn bestuur moet word om diplomatieke verleentheid wat mag voortspruit uit kans-ontmoetings van strydende staatshoofde te vermy.

Een oplossing is om by ‘n alfabetiese rangorde te hou om te verhoed dat die Zimbabwiese President, Robert Mugabe langs die Britse Eerste Minister David Cameron beland.

Die Kubaanse president, Raul Castro Ruz moet liefs nie neffens Barack Obama geplaas word nie.

Diplomatieke betrekkinge tussen dié onderskeie lande is baie broos. Die Verenigde Koninkryk en die VSA het sanksies teen Mugabe se regering ingestel, en Mugabe hou hoogs opruiende uitsprake teen hulle.

Die situasie word nie aangehelp deur opmerkings deur die voormalige president Thabo Mbeki wat onlangs gesê het dat die voormalige Britse premier Tony Blair Zimbabwe wou binneval nie.

Blair gaan ook opdaag vir Mandela se roudiens. Hy het die Mbeki se stelling intussen heftig ontken.

Die VSA se verhoudings met beide Kuba en Venezuela is baie sensitief na Venezuela se president Nicolas Maduro verskeie Amerikaanse diplomate uitgejaag het weens die aanhitsing van sabotasie.

Venezuela glo ook Amerika was verantwoordelik vir die dood van hul vorige president, Hugo Chavez.

Volgens die alfabetiese gastelys sal die Verenigde Koninkryk en Zimbabwe net geskei word deur Venezuela.

Koninklikes en senior wêreldleiers van lande wat op die Veiligheidsraad dien sal dus voorkeur geniet om tussen die kwaaivriende geplaas te word.

Ander lande wat dalk ‘n rede tot kommer is, is Pakistan en Indië, en Japan en China.

Spanning tussen Japan en China is so hoog dat daar dreigemente is dat die situasie kan ontwikkel in ‘n volskaalse oorlog.

Obama sal Mandela-roubeklaers by ENB-stadion toespreek

obamajozi2 — Michelle en Barack Obama het pas in Pretoria aangekom

Nat roubeklaers stroom na die ENB-stadion om die amptelike gedenkdiens by te woon waar president Barack Obama sal praat.

Paaie om die ENB-stadion in Johannesburg is gesluit met die oog op die Mandelagedenkdiens.

Digte wolke is oor Johannesburg saamgetrek met ‘n deurdringende motreën wat sedert Maandagnag val.

Desondanks is duisende swart inwoners tans in die gure weer onderweg na die stadion om hul laaste eer te betoon.

Die minister in die presidensie, Collins Chabane het ‘n beroep op samewerking gedoen vóór die gedenkdiens.

Hy sê sommige mense sal waarskynlik weggewys moet word by die stadion, weens beperkte sitplek. Hy het gevra dat hulle dit aanvaar sonder om insidente te veroorsaak.

Daar is honderd-en-vyftig openbare plekke ingerig waar die publiek die verrigtinge kan volg.

Madiba-aanhangers het reeds oornag begin toustaan om by die ENB-stadion toegelaat te word.

Privaatvoertuie word nie by die stadion toegelaat nie en mense mag ook nie sambrele bring nie.

Sowat 100.000 mense, onder wie 90 staats- en regeringsleiers, sal na verwagting die geleentheid bywoon.

Lede van die Amerikaanse Spesiale Magte sal ook in die stadion wees om na die veiligheid van president Barack Obama en sy voorgangers om te sien.

Die Amerikaanse president, Barack Obama en sy gevolg kom vanoggend in die land aan en sal ‘n spreekbeurt by die verrigtinge kry. Obama reis saam met oudpresident George W Bush.

Die voormalige presidente, Jimmy Carter en Bill Clinton, sowel as Clinton se vrou, Hillary sal saam met Obama die geleentheid bywoon.

Ses en twintig Amerikaanse kongreslede sal ook teenwoordig wees.

Die SANW sê hulle is gereed om die groot getal hoogwaardigheidsbekleërs te hanteer. ‘n Woordvoerder van die weermag, brigadier-generaal Xolani Mabanga sê hulle enigste bekommernis is die weer.

Hoofsuperintindent Wayne Minnaar van die Johannesburgse Metropolisie sê die Randse Skou-weg, Nasrec-weg en die Soweto-hoofweg is gesluit.

Die hekke by die stadion het reeds sesuur oopgemaak met busvragte vol mense wat afgelaai word.

Die Reavya-busdiens in Johannesburg is reeds van vyfuur vanoggend oopgestel.

Minnaar het mense wat die gedenkdiens wil bywoon, aangeraai om busse en treine te gebruik aangesien parkeer plekke vir buitelandse besoekers gereserveer is.

Die Weermag is glo gereed om enige gebeurlikheid te hanteer met sowat 11.000 weermaglede wat vir die geleentheid ontplooi is.

Die minister van Verdediging, Nosiviwe Mapisa-Nqalkula het laat gister ‘n vergadering met die hoofde van die die Leër, Lugmag en Vloot gehou om veiligheidsplanne te finaliseer.

Die weermag sê dis sy plig om sy voormalige Umkhonto we Sizwe-opperbevelvoerder te groet.

Benewens die huidige en vorige Amerikaanse presidente, sal al 54 Afrika-staatshoofde ook na verwagting die gedenkdiens bywoon, sowel as leiers uit Brasilië, Kuba en Palestina. Israel sal nie die diens bywoon nie.

‘Merkel moet meeluistering as ‘n kompliment beskou’

Woede oor die VSA se spioenasie op bondgenote is fel aan die toeneem. Meksiko en Brasilië het ook reeds beswaar daaroor aangeteken.

Kort op die hakke van Frankryk dié week, het Duitsland het die Amerikaanse ambassadeur, John B Emerson, ontbied oor die meeluisterskandaal wat dreig om verhoudinge tussen die twee lande te versuur.

Merkel se woordvoerder Steffen Seibert het gesê so iets is onaanvaarbaar en dit moet onmiddellik gestaak word. Die Duitse regering beskik glo oor klinkklare bewyse dat die kanselier se selfoon afgeluister word.

Duitse bronne beweer dat slegs Merkel se amptelike foon afegluister word en nie haar privaatfoon nie.

Die VSA het intussen die broeiende skandaal met vleitaal probeer besweer. ‘n Voormalige werknemer van die Amerikaanse geheimediens sê indien dit waar is behoort Duitsland dit as ‘n “kompliment” te sien.

Hy het gesê die tydskrif Forbes het Merkel as die wêreld se magtigste mens, naas Obama, aangewys. Die werknemer voer aan dat Veiligheidsagentskappe om dié rede haar kommunikasie sal wil monitor.

Hy het egter nie uitgebrei oor hoekom vorige slagoffers van meeluistering in sy eie land soos onder die huidige Demokratiese president of voormalige president Nixon, nie gewoonlik dié stap as ‘n kompliment beskou nie.

Onder Nixon was die Watergate-meeluisterskandaal ‘n politieke atoombom in die Verenigde State in die 1970’s as ‘n gevolg van inbraak op 17 Junie 1972 by die Demokratiese Nasionale Komitee se hoofkwartier by die Watergatekantoorkompleks in Washington, DC.

Die Republikeinse Nixon-administrasie se poging om sy betrokkenheid weg te steek, het uiteindelik gelei tot die bedanking van president Richard Nixon op 9 Augustus 1974.

Dit was die enigste bedanking van ‘n Amerikaanse president tot op datum. Die skandaal het ook daartoe gelei dat 43 persone tronkstraf gekry het, en dosyne van hulle was Nixon se top administrasie amptenare.

Die Duitse minister van Buitelandse Sake wil die bewerings oor meeluistering van kanselier Angela Merkel se selfoon met die Amerikaanse hoogste gesant bespreek.

Dit volg net ‘n dag nadat Merkel met die Amerikaanse president Barack Obama geskakel het om ‘n verduideliking oor die meeluistering te eis.

Volgens berigte het sy aan Obama gesê indien die bewerings waar is, sal dit tot ‘n ernstige vertrouensbreuk lei.

Obama het ontken dat Merkel se kommunikasie tans afgeluister word.

Frankryk het ook intussen hul weersin uitgespreek oor die VSA se spioenasie op bondgenootlande.

John Kerry, Amerikaanse sekretaris van Buitelandse Sake, het skaars in Frankryk Maandag geland, toe die koerant Le Monde hom verwelkom het met hoofopskrif oor die spioenasie op Franse burgers sowel as Franse diplomate.

Woedend oor die onthullings het die Franse die Verenigde State se ambassadeur, Charles H. Rivkin, ingeroep en hul “uiterste afkeur” oor die insameling van 70.000.000 digitale kommunikasiestukke vanaf 10 Desember 2012 tot 8 Januarie 2013 uitgespreek.

In ‘n verklaring aanlyn het James Clapper, die direkteur van nasionale intelligensie, Le Monde se verslaggewing in twyfel probeer trek en dit “misleidend en verkeerd” op ongespesifiseerde maniere genoem.

VSA ontken Merkel word afgeluister

Die Duitse regering het inligting bekom dat die kanselier, Angela Merkel, se selfoon deur Amerikaanse spioenasie-agentskappe gemonitor kan word.

Merkel het volgens haar woordvoerder met die Amerikaanse president, Barack Obama, in verbinding getree om die bewerings te toets.

Sy het in ‘n sterk bewoorde verklaring gesê dat dié optrede totaal onaanvaarbaar is en indien die bewerings waar is, sal betrekkinge tussen die twee lande ernstige skade ly.

‘n Woordvoerder van die Wit Huis, Jay Carney, het gesê Obama het Merkel die versekering gegee dat haar kommunikasie nie gemonitor word nie en dat dit nie gemonitor sal word nie. – Sapa