oproer – Bladsy 13 – praag.co.za

Oproer by TUT brei uit

Oproer oor studentelenings by die TUT, die Tshwane Universiteit van Tegnologie, het na Ga-Rankuwa, Emalahleni en die Pretoria-kampusse uitgebrei.

Werksaamhede by die TUT se Soshanguve Noord- en Suid-kampusse is reeds weens die voortslepende studente-onrus opgeskort.

Die universiteitsbestuur het Woensdag met studenteleiers vergader oor hulle griewe, maar studenteleiers het die universiteit se voorstelle verwerp

Swart studente kla dat hulle nie beurse ontvang nie.

Die Studente-organisasie Cosas het verlede week die universiteit se bestuur daarvan beskuldig dat hulle nie genoeg doen om behoeftige studente te help nie.

Die universiteit moes in September verlede jaar van sy kampusse sluit na geweldpleging. Swart studente hulself tot vandalisme en brandstigting gewend oor studente-befondsing en klasse ontwrig.

Agttien voertuie is aan die brand gesteek tydens die oproer wat byna drie weke geduur het.

Haïti weer in opstand oor brandstofpryse

Oproeriges wat teen die regering van Haïti gekant is, het Maandag begin om die hoofstad lam te lê.

Die beplande tweedag-staking is uit protes teen stygende brandstofpryse en kom midde ’n toenemende ekonomiese en politieke krisis in die land.

Protesorganiseerders het inwoners gewaarsku om tuis te bly en gesê diegene wat dit op straat waag, speel met hul lewens.

Verskeie mense is beseer toe die polisie padblokkades wou afbreek in die hoofstad, Port-au-Prince.

Die eilandbevolking van die oudste swart republiek is in opstand teen pres. Michel Martelly omdat verkiesings uitgestel word.

Petrol- en dieselpryse is onlangs deur die regering verminder, maar oproeriges wil ‘n 50% korting hê, wat glo die daling in internasionale oliepryse van die afgelope ses maande weerspieël.

Meer as 80% van die bevolking leef in totale armoede en die eiland is ‘n belangrike transitoroete vir dwelms na die VSA. Volgens die State Department beweeg byna 10% van alle kokaïene na Amerika deur Haïti.

Oproer saai oral chaos

‘n Vierde skool is by Khakhanwa in Malamulele in Limpopo aan die brand gesteek omdat hulle klasse voortgesit het.

Ouers het die skool probeer bewaak te midde van die laaste vier weke se oproer in die gebied.

Drie skole in die gebied is vroeër dié week ook aan die brand gesteek.

Dienste en toegang tot die gebied is steeds versper. Oproer in die gebied duur reeds sowat vier weke met Tsongas wat ‘n aparte munisialiteit eis.

Intussen sê die Malamulele-taakspan die Tsongas sal Sondag besluit of hulle protes gaan opskort. ‘n Woordvoerder, Isaac Nukeri, het met die minister van polisie, Nathi Nhleko en die minister van staatsveiligheid, David Mahlobo, gesprek gevoer.

In ‘n ander voorval van openbare geweld, het Jacob Mamabolo, LUR vir samewerkende regering in Gauteng, Woensdag gesê dit was EFF-lede wat munisipale geboue aan die brand gesteek het tydens oproerigheid in Mohlakeng buite Randfontein.

“Die EFF-lede het op ‘n plundertog gegaan en munisipale eiendomme aan die brand gesteek en alle paaie en ingange na die gebied versper, en die gemeenskap is verhoed om te gaan werk,” het Mamabolo gesê.

Die burgemeester se huis en motor, die biblioteek, munisipale kantore en die stadsaal is van die eiendomme wat in ligte laaie gelaat is.

Volgens Mamabolo het die betogers ook winkels, wat deur buitelanders besit word, geplunder.

Inwoners het Woensdagoggend op ‘n plundertog uitgevaar. Christina Mabala, voorsitter van die EFF se Wes-Rand-tak, het egter gesê ANC-lede het die brande begin.

“Sommige mense binne die ANC het besluit om die geleentheid te gebruik om eiendomme te brand en te plunder. Ons as die EFF distansieer onsself van die gewelddadige optrede en skade aan eiendom,” het sy gesê. Sy het gesê die beskuldigings is vals.

Mabala het gesê die EFF het ‘n optog gereël van Mohlakeng na Randfontein om hul griewe aan die burgemeester te oorhandig.

Volgens Mabala het die polisie met rubberkoeëls op die betogers losgebrand.

In nog ‘n voorval van openbare geweld, het die polisie Woensdag met rubberkoeëls op betogers in Majakaneng, naby Mooinooi in Noordwes, losgebrand.

Brig. Thulani Ngubane, woordvoerder van die polisie, het gesê die oproeriges het dele van die N4 met hekke, klippe, bome en brandende bande versper. Volgens Ngubane het die betogings Maandag begin.

Sewe betogers is in hegtenis geneem en sal aangekla word van openbare geweld en kwaadwillige saakbeskadiging.

‘n Bus is aan die brand gesteek en twee winkels, wat aan buitelandse behoort, geplunder. Inwoners is glo ongelukkig oor water- en elektrisiteitstoevoer in die area.

Biskop Paul Verryn van die Metodistekerk en ‘n kollega wat probeer het om dialoog te bevorder, is met klippe bestook. Verryn en sy kollega is nie beseer nie.

Hoofpaaie was Woensdag gesluit nadat die oproeriges motoriste tussen Rustenburg en Pretoria met klippe bestook het. Die pad tussen Mooinooi en Brits was ook gesluit.

Die departement van gemeenskapsveiligheid in Noordwes het gesê drie vragmotors en ‘n voertuig is Dinsdagaand aan die brand gesteek.

Niemand is nog in hegtenis geneem in verband met die voorval nie.

Brand lê skool in puin na etniese konflik

Forensiese beamptes sal vandag met ondersoeke by die hoërskool in Malamulele in Limpopo begin nadat ‘n brand Maandagaand ‘n kantoorblok in puin gelê het, het RSG berig.

Die gebied word die afgelope bykans drie weke deur protesoptrede geteister deur Tsongasprekers wat ‘n afsonderlike munisipaliteit eis.

Tsongas kla dat Vendas voorkeur geniet.

Leerders het nog nie sedert die begin van die skooljaar onderrig gehad nie. Inwoners in die gebied sê die skool is deur die polisie met doringdraad afgesper en niemand kon die brand blus nie.

Hulle beweer dat die polisie niks gedoen het om die brand te bestry nie.

Die munisipale afbakeningsraad het Vrydag beslis dat die gebied nie ‘n aparte munisipaliteit van die Thulamela-munisipaliteit kan kry nie.

Die polisie is in die gebied ontplooi.

Intussen het die DA aangedui dat hy die Malamuele-taakspan, wat die protesoptrede reël, by die Menseregtekommissie gaan verkla omdat kinders nie kan skoolgaan nie.

Oproeriges suid van Johannesburg versper Lawleyweg

Oproeriges in Lawley, suid van Johannesburg het verkeer op ou Lawley-weg tot stilstand gedwing.

‘n Woordvoerder van die Metropolisie, Wayne Minnaar sê dele van die pad word versper met rotse en brandende buitebande.

Die oproermakers is glo ontevrede omdat hulle nie elektrisiteit het nie.

Minnaar het aanbeveel dat die K43 en R580 as alternatiewe roetes gebruik word om die oproeriges te vermy.

R36 by Tzaneen onbegaanbaar weens oproer

Oproeriges het verkeer op die R36 tussen Tzaneen en Hoedspruit Woensdagoggend ontwrig.

Die polisie is in die gebied ontplooi om die situasie onder beheer te probeer kry.

Dié pad in Limpopo is deur swart oproermakers onbegaanbaar gemaak met brandende voorwerpe.

Die oproeriges eis lopende water en beter paaie.

Die inwoners van Mokgolobotho het sowat twee maande gelede ‘n griefskrif aan die Groter Tzaneen munisipaliteit oorhandig en is ontevrede dat daar nog nie gehoor gegee is aan hul eise nie.

Missouri kondig noodtoestand aan voor Ferguson-uitspraak

Die goewerneur van die Amerikaanse deelstaat, Missouri, moes inderhaas ‘n noodtoestand afkondig om rassespanning onder beheer te bring.

Goewerneur Jay Nixon het ook magtiging aan die Nasionale Wag verleen om die polisiemag by te staan om swart oproeriges vas te vat.

Die opstand dreig in Ferguson waar uitspraak verwag word in die saak waarin ‘n wit polisiebeampte ‘n jong swarte, Michael Brown doodgeskiet het.

Ter voorbereiding van die uitspraak wat waarskynlik in die guns van die wit polisiebeampte sal wees, betoog swart jeugdiges reeds die afgelope twee dae.

Daar is forensiese getuienis dat Brown ‘n wapen hanteer het weens reste wat aan sy hande gevind is, ten spyte daarvan dat daar beweer word dat hy nie gewapen was toe hy geskiet is nie.

Daar is ook geslote kringtelevisie wat aantoon dat Brown in ‘n winkel besig was om te steel.

Swart inwoners van Ferguson meen egter dat Darren Wilson verantwoordelik gehou moet word vir die skietdood van die ongewapende 19-jarige Brown.

Rasseonluste het na skietvoorval op 9 Augustus uitgebreek waar swart oproeriges dae lank hulself skuldig gemaak het aan plundertogte en vandalisme.

Miljoene dollar se skade is reeds aangerig en sakeondernemings in swart gebiede moes hul deure permanent sluit.

Indien die uitgebreide jurie beslis dat Wilson nie verantwoordelik is nie, verwag die owerhede ‘n swart opstand wat wyer in die VSA kan uitkring.

Volgens die FBI kan onluste elders in die VSA opvlam en die polisie is landswyd op ’n gereedheidsgrondslag geplaas.

‘n Aktivistegroep, Justice for Mike Brown, het ‘n lys bekend gestel van teikens wat aangeval sal word wat ook plekke insluit wat nie met die voorval verband hou nie.

‘Grondgryp in Pretoria is wettig’

Die EFF het Woensdag aan Sapa gesê daar is niks onwettig aan die grondgryp by Nellmapius, oos van Pretoria, nie.

“Daar is niks fout daarmee nie. Indien die regering sloer om grond aan mense toe te ken, moet hulle dit beset,” het Floyd Shivambu, EFF-hoofsweep, aan verslaggewers by die parlement gesê.

Die hoofsweep van die Tshwane-metroraad, het intussen gesê dat ‘n wyksraadslid in Nellmapius, Precious Marole, se huis gevandaliseer en geplunder is. Die polisie kon nie onmiddellik die voorval bevestig nie.

Die Tshwane-metropolisie het vroeër Woensdag besetters van Nellmapius met rubberkoeëls verwilder nadat hulle plakkershutte in ŉ oop stuk veld wou oprig.

Die oproeriges het metropolisielede met klippe bestook waarna die metropolisielede met rubberkoeëls op hulle losgebrand het. Die klipgooiers het na die nabygeleë lokasie gevlug toe die metropolisie ‘n Nyala-pantservoertuig teen hulle ontplooi het.

Die Ou Bronkhorstspruit-pad is vroeër met brandende motorbande, klippe en takke versper.

Vusi Msiza, woordvoerder van die EFF se Nellmapius-tak, het vroeër gesê die grondbesetting het Sondag begin. “Ons het mense hier op die stuk grond aangetref waar hulle besig was om plakkershutte te bou. Ons het besluit om hulle te ondersteun, aangesien ons almal hierdeur geraak word.” Hy het gesê mense is moeg daarvoor om vir HOP-huise te wag en dat hulle grond soek waar hulle hul eie huise kan bou.

Julius Malema, leier van die EFF, was nie vir kommentaar beskikbaar nie.

Dumisa Ntuli, woordvoerder van die ANC in Gauteng, het gesê die spesifieke stuk grond is geoormerk vir laekostebehuising.

Mbuyiseni Ndlozi, die EFF se nasionale woordvoerder, het vroeër gesê die party ondersteun grondonteiening maar wou nie spesifiek kommentaar lewer die gebeure in Nellmapius nie.

TUT-kanselier bedank na messtekery

Die Tshwane Universiteit van Tegnologie (TUT) het aangekondig dat Lourens van Staden as visekanselier sal waarneem ná die bedanking van Nthabiseng Ogude.

Die TUT se Raad het Ogude se versoek goedgekeur dat haar kontrak vroeër beëindig word.

‘n Woordvoerder, Willa de Ruyter, sê Ogude is in Augustus 2012 in haar huidige pos aangestel. Haar kontrak sou in 2017 verstryk het.

Ogude se bedanking volg nadat ‘n student by die universiteit se Soshanguvekampus doodgesteek is.

Die universiteit het in September vanjaar van sy kampusse na ‘n reeks gewelddadige betogings gesluit.

Die student wat Saterdagaand met ŉ mes doodgesteek is by die Soshanguve-kampus, noord van Pretoria, was in sy eerste jaar.

Studenteleiers het intussen hul kommer uitgespreek oor die veiligheid op kampus.

De Ruyter het die student geïdentifiseer as SB Masuku.

Die polisie het vroeër gesê twee mansstudente het in ŉ geveg betrokke geraak en mekaar met messe gesteek.

Masuku is dood en nog ŉ student verkeer in ‘n kritieke toestand in die George Makhuri-hospitaal.

Drie studente is na die voorval in hegtenis geneem. Hulle is aangekla van moord, poging tot moord en aanranding met die doel om ernstig te beseer. Hulle sal na verwagting Dinsdag in die Soshanguve-landdroshof verskyn.

De Ruyter het gesê ŉ Ondersoek is van stapel gestuur om vas te stel wat tot die voorval gelei het.

Oproer by platinummyn onder beheer

Gewelddadige oproer naby die Bokoni-platinummyn buite Burgersfort in Limpopo is volgens die polisie onder beheer gebring.

Inwoners het vroeër twee huise en ‘n motor van ‘n plaaslike hoofman aan die brand gesteek.

Ontstoke inwoners beskuldig die hoofman daarvan dat hy die myn toestemming gegee het om in die omgewing aktief bedrywighede te begin.

Oproermakers het ook myntoerusting aan die brand gesteek.

Oproeriges het die dood van ‘n inwoners wat vermoedelik na skietwerk by die myn deur ‘n klip getref is, maande gelede, as verskoning gebruik om op ‘n vernietigingstog te gaan.

Hulle sê die mynbestuur het sedert die ongeluk nog nie met hulle geskakel nie.

Plaasuitsettingsbrandpunte deur ANC ondersoek

Plaasuitsettings is ’n menseregtekwessie, sê die minister van landelike ontwikkeling en grondhervorming Gugile Nkwinti en hy gaan ‘n ondersoekspan ontplooi na “brandpunte”.

Nkwinti het gereageer op berigte oor plaasuitsettings in die Wes-Kaap. Hy het aangekondig dat die span die stand van plaasuitsettings in die provinsie sal bepaal.

Die span senior amptenare sal uitsettingsbrandpunte in Suid-Afrika identifiseer. Die Wes-Kaap is een van die brandpunte.

Die onsekerheid oor die Esta-wetgewing (die Wet op die Uitbreiding van Sekerheid van Verblyfreg) wat strenger verblyfreg vir plaaswerkers voorstel, is glo die wortel van die probleem.

Nkwinti het tydens die parlementêre portefeuljekomitee se vergadering oor landelike ontwikkeling en grondhervorming gesê Alan Winde, Wes-Kaapse minister van ekonomiese geleenthede, en Nosey Pieterse, voorsitter van die plaaswerkersvakbond Bawusa het skrywes in dié verband aan hom gerig.

Winde wou volgens Nkwinti bewyse hê van die 247 plaasuitsettings sedert 1 April vanjaar in die Wes-Kaap waarna Mcebisi Skwatsha, adjunkminister van landelike ontwikkeling en grondhervorming, drie weke gelede verwys het. Skwatsha het toe ook ’n moratorium op uitsettings versoek.

Intussen het Costau boere in die Wes-Kaap gedreig met plaasbesettings. Tony Ehrenreich, Wes-Kaapse sekretaris van die vakbondfederasie het gesê plase in die provinsie gaan op groot skaal beset word indien boere nie ophou om werkers van plase uit te sit nie.

Dié dreigemente voorspel ‘n herhaling van oproer soos in 2012 toe arbeidskwessies in De Doorns opgevlam het.

Agri Wes-Kaap sê daar is nog nie genoeg inligting oor die uitsettings beskikbaar nie.

N4 sluit weens oproer

Die N4 snelweg wat Rustenburg en Zeerust met mekaar verbind, was Woensdagaand gesluit weens die voortgesette diensleweringsbetogings in die plaaslike munisipaliteit op Zeerust in Noordwes.

Oproeriges het paaie met klippe en rommel versper.

Hulle het die strate ingevaar nadat water-en sanitasieprobleme in die gebied ondervind is.

Ondanks ‘n swaar polisieteenwoordigheid in die gebied, het die oproerigheid vererger.

Volgens die polisie monitor hulle die situasie in die gebied.

Klipgooiers versper dele van Goue Hoofweg

Motoriste word aangeraai om dele van die Goue Hoofweg te vermy nadat geweld weer uitgebreek het.

Sowat 200 oproeriges van die Slovo Park-lokasie naby Bushkoppies, suid van Johannesburg het begin klipgooi op die Goue Hoofweg by die Stockwell-aansluiting.

Die oproermakers versper die pad met klippe en ander voorwerpe.

Die rede vir die betoging is nog nie bekend nie.

‘n Woordvoerder van die Johannesburgse Metropolisie, Wayne Minnaar het motoriste aangeraai om die R554 en N12 as alternatiewe roetes te gebruik.

Oproermakers sluit Goue Hoofweg

Die verkeersvloei op die Goue-hoofweg verby Lenasia is Maandagoggend weens oproer erg ontwrig.

Hoofsupt. Wayne Minnaar, woordvoerder van die Johannesburgse metropolisie (JMPD), het padgebruikers gemaan om alternatiewe roetes te gebruik omdat die situasie gevaarlik is.

“In dié stadium kan ons nie sê wat die oorsaak van die protesaksie is nie. Motoriste moet die hoofweg vermy omdat daar groot klippe in die pad lê. Oproeriges gooi verbygaande motoriste met klippe.

“Metropolisiebeamptes is op die toneel om die situasie onder beheer te probeer bring,” het Minnaar omstreeks 06:30 gesê.

In Malibongweweg, naby Boundaryweg in Kya Sands, is die verkeersvloei ook ontwrig. Plakkershutte het verlede week afgebrand in die gebied, maar volgens die owerhede is die ontwrigting te wyte aan ‘n ongeluk.

’n Ongeluk in Noordgesig naby Mookistraat op die Soweto-hoofweg het vroegoggend ook vertragings veroorsaak.