korrupsie – Bladsy 13

Fotograaf wat omkopery afneem glo aangerand

Chinese winkels doen fluks sake — Chinese winkels kla oor polisie omkoopgeld vra

’n Fotograaf van die Daily Sun is Saterdag in hegtenis geneem en aangerand nadat hy foto’s van polisiebeamptes wat omkoopgeld van Chinese winkeleienaars aanvaar, probeer neem het.

Volgens Reggy Moalusi, die adjunkredakteur, is die fotograaf, Ricky Dire na bewering in Rustenburg, Noordwes deur die polisie aangerand, het die koerant Maandag berig.

Die winkeleienaars het Dire gekontak om te kla dat die polisie hulle afdreig vir omkoopgeld.

Moalusi het gesê hulle het regsverteenwoordigers gekry om tussenbeide te tree, en die fotograaf is vyf ure later vrygelaat. Die polisie het glo ook gedreig om Dire tot Maandagoggend toe te sluit.

Volgens Moalusi is Dire se selfoon gekonfiskeer en die foto’s is uitgevee.

Volgens ‘n polisiewoordvoerder, het die beamptes klagtes van intimidasie, crimen injuria en verset teen inhegtenisneming teen Dire aanhangig gemaak. Sy het ook gesê die fotograaf was onder die invloed van drank.

“Hy is in hegtenis geneem omdat hy die polisie beledig het. Toe hulle hom in hegtenis wou neem, het hy hom daarteen verset,” het sy gesê.

Molale sê die polisie is nie bewus van die bewerings oor omkoopgeld nie.

Bedrog, korrupsie, wanadministrasie in Molteno onthul

‘n Forensiese ondersoek na die beleërde Kwanca plaaslike munisipaliteit by Molteno in die Oos-Kaap, het bedrog, korrupsie, nepotisme en wanadministrasie by die munisipaliteit onthul.

Die verslag, wat Donderdag by ‘n raadsvergadering ter tafel gelê is, het ook onthul dat Goliath Sigojo, die nuwe munisipale bestuurder, nie die vereiste kwalifikasies vir die pos het nie.

Die Oos-Kaapse LUR vir Plaaslike Regering, Mlibo Qoboshiyane het gevra vir die ondersoek na bewerings van ongerymdhede by die munisipaliteit.

Vroeër die week het inwoners en Sanco-leiers Molteno tot stilstand gebring deur paaie met klippe te versper en treinspore te vandaliseer.

Betogers het geëis dat die verslag bekend gemaak word.

Qoboshiyane sê sy departement sal die munisipaliteit bystaan om te verseker dat hy beter bestuur word. – RSG

Forensiese ondersoek na polisie-skeidingspakette

‘n Forensiese ondersoek is gelas na die Suid-Afrikaanse polisiediens se afdeling wat gemoeid is met skeidingspakette.

Die minister van polisie, Nathi Mthethwa, het gesê ‘n omvattende ondersoek sal geloods word nadat vier polisielede ivm korrupte uitbetalings vasgetrek is.

Die afdeling is verantwoordelik vir die verwerking van betalings en voordele aan voormalige SAPD-werknemers.

Die vier mense is reeds in verband met beweerde bedrog en korrupsie met uitbetalings in hegtenis geneem en die Valke sal die ondersoek verder behartig.

Die boosdoeners het vals profiele geskep aan wie uitbetalings gemaak is, terwyl legitieme begunstigdes nie hul voordele ontvang het nie.

Hulle is aangekeer nadat die seun van ‘n ontslape polisieman ‘n saak van bedrog aanhangig gemaak het.

Mthethwa sê dit is moontlik dat ‘n sindikaat wat binne die polisie opereer met hulp van buite op grootskaal by die bedrog betrokke kan wees.

Die nasionale polisiekommissaris, Rhia Phiyega het vroeër gesê die SAPD word geteiken.

Zuma vra ‘patriotiese nuus’

Die Presidensie sê hy wil nie balans en regverdigheid ondermyn in sy versoek om meer patriotiese nuusberiggewing nie.

President Jacob Zuma het in antwoord op ‘n Parlementêre vraag gesê sy versoek vir meer patriotiese nuusdekking behoort nie vertolk te word as ‘n poging om met redaksionele onafhanklikheid in te meng nie.

Zuma sê die ontbloting van korrupsie op ‘n regverdige en gebalanseerde wyse tel ook as patriotisme.

Zuma het in antwoord op ‘n vraag van COPE – oor of die regering beplan om die SAUK as die voorste uitsaaier met sogenaamde patriotiese verslaggewing te vestig – gesê die versoek was aan die media in die algemeen en nie spesifiek aan die openbare uitsaaier gerig nie.

President Zuma en sy eweknie in die Demokratiese Republiek van die Kongo, Joseph Kabila, sal vandag ‘n verdrag om die Groot Inga-dam-projek te hernieu, onderteken.

Dié projek het die potensiaal om krag aan die helfte van Afrika te voorsien.

Die Minister van Internasionale betrekkinge, Maite Nkoana-Mashabana sê beleggers is gereed om dit te befonds, omdat dit ‘n belowende projek is wat goeie opbrengste beloof.

Wanneer dit voltooi is sal dit die tweede grootste hidro-elektrisiteitsprojek in die wêreld wees. – RSG

Malawi-amptenare gevang met geld onder beddens, in motors

Malawi se president Joyce Banda het haar kabinet afgedank te midde van bewerings van korrupsie in die regering.

Verskeie amptenare is na bewering gevang met die geld weggesteek onder hul beddens en in hul motors, het die BBC se Raphael Tenthani uit Malawi berig.

Verlede maand is ‘n amptenaar van die ministerie van Finansies Paul Mphwiyo, ‘n anti-korrupsie kampvegter, geskiet en gewond.

Banda sê Mphwiyo is geteiken oor sy pogings om korrupsie te stuit. Hy word in Suid-Afrika vir sy wonde behandel.

Westerse skenkers het druk op Banda uitgeoefen om korrupsie en tenderbedrog aan te pak.

Malawi is ‘n arm Afrikastaat, baie afhanklik van finansiële hulp van die Europese Unie (EU ) en ander buitelandse skenkers.

Banda se kantoor het gesê ‘n nuwe kabinet sal aangestel word met verloop van tyd, sonder om uit te brei .

Sy het ‘n krisisvergadering van die Kabinet belê voor haar kantoor aangekondig het dat die regering ontbind is.

Op ‘n nuuskonferensie Woensdag het Banda gesê sy het ‘n spesiale span aangestel, met polisie en regeringsamptenare, om ‘n finansiële oudit te doen van alle regeringsdepartemente.

Ons verslaggewer sê na die skietery op Mphwiyo is die media oorspoel met die berigte van gewetenlose staatsamptenare wat mbv slinkse sakemanne die regering van miljoene dollars stroop deur twyfelagtige kontrakte.

Mphwiyo, die begrotingsdirekteur in die ministerie van Finansies, is geskiet in sy woning in die luukse Area 43, ‘n voorstad van die hoofstad, Lilongwe, op 13 September.

Die skietery was ‘n “aanval wat daarop gemik was om hom en die regering in die stryd teen hoë vlakke van korrupsie en bedrog stil te maak” het Banda se kantoor vroeër verklaar.

Vier verdagtes is in hegtenis geneem oor die skietery.

Sowat 10 junior amptenare is tot dusver in hegtenis geneem vir vermeende korrupsie, het Reuters berig.

Korrupsie bedreig VN-vredesendings

Korrupsie bedreig die sukses van die Verenigde Nasies se vredesendings regoor die wêreld, volgens ‘n nuwe verslag.

Die verslag van Transparency International identifiseer gebiede waar korrupsie alledaags geword het, veral met in die veld bedrywighede .

Dit verwoord ook die noodsaaklikheid vir die organisasie en die lidlande vir ‘n ernstige bespreking oor hoe om die probleem aan te spreek.

Die verslag identifiseer 28 tipes van korrupsie wat dreig om vredesendings te kelder, met die klem spesifieke gevalle van omkopery, die onreëlmatige verkryging en verkoop van bates, bedrog, diefstal en selfs seksuele aanranding gepleeg deur VN-personeel.

Die Programdirekteur van Transparency International Mark Pyman sê hulle wil die stryd teen korrupsie deur die Veiligheidsraad van die resolusies aanvoer.

Die voorsitter van die raad van direkteure Haguette Labelle verduidelik dat die risiko van korrupsie hoog is as groot hulpbronne betrokke is sowel as druk om vinnig te lewer.

Die skrywers van die verslag sê die onderwerp kry nie genoeg aandag op die oomblik nie en dat ‘n blinde kol oor korrupsie ‘n ernstige fout is.

Die verslag doen ‘n beroep vir die aanstelling van senior personeel in al missies om verantwoordelikheid vir die integriteit waar nodig te aanvaar, asook ondersoekbeamptes in groter missie soos die DRK waar kwessies wat ontstaan dadelik hanteer kan word.

Sir Stewart Eldon, voormalige Britse ambassadeur in Noord-Atlantiese Verdrag Organisasie ( NAVO ) en ‘n senior adviseur vir Transparency sê: “Die veranderende karakter van internasionale konflik en die probleme wat deur die internasionale gemeenskap in die gesig gestaar word, toon vir ons dat korrupsie word toenemend ‘n belangrike onderliggende element in baie van hulle, so die onderwerp is die moeite werd om aan aandag te skenk in die konteks van vrede en ander internasionale ingrypings.”

Wit metropolisiebaas van rassisme, korrupsie beskuldig

‘n Senior lid van Johannesburg se metropolisie en sy departement word aangekla van rassisme en korrupsie.

The Star het Woensdag berig dat drie polisiebeamptes beweer dat hoof-superintendent Mike Smith hulle onregmatig uit hul poste ontslaan het.

Lesiba Kganyago het aan The Star gesê hy is afgedank nadat hy ‘n kollega in gewone drag per ongeluk in hegtenis geneem het, toe laasgenoemde hom van agter bekruip en op hom gespring het.

Die kollega het homself eers geïdentifiseer nadat hy teen die grond vasgedruk en geboei is.

Ten spyte daarvan dat alle klagte teruggetrek is, het Smith glo aangedring dat Kganyago ontslaan word.

Volgens Kganyago is Smith se departement heeltemal deurtrek van korrupsie. Swart beamptes word glo geviktimiseer.

Twee ander metrobeamptes het ook teen hul afdankings geappelleer.

Wayne Minnaar, polisiewoordvoerder, het Woensdag gesê die aantygings sal bespreek word nadat die Kommissie vir Bemiddeling, Versoening en Arbitrasie (KBVA/CCMA) hul bevinding bekend gemaak het.

ISS: Nuwe, ernstige veiligheidsbedreigings in SA

Die Instituut vir Sekerheidstudies het ‘n beroep op die Minister van Polisie, Nathi Mthethwa gedoen om toe te laat dat meer gereelde en gedetailleerde inligting oor sogenaamde nuwe misdade in die land bekend gemaak word.

Die ISS het die vorige syfers van ‘n afname in geweldsmisdaad verwelkom, maar verwag dat die nuwe misdaadstatistiek wat vandag bekend gemaak word, op ‘n toename in eiendomsmisdaad sal dui.

Die hoof van die ISS se misdaad en geregtigheidsprogram, Gareth Newham sê die vorige statistieke toon nie sekere nuwe ernstige veiligheidsbedreigings in die land nie.ISS

Hy sê dit is misdade soos korrupsie, openbare geweld, groepmoorde, politieke sluipmoorde en huishoudelike geweld.

Mthethwa sal die misdaadstatistiek vir 2012/2013 vanoggend by die Tshwane Opleidingsakademie in Pretoria-Wes bekendmaak.

Die ISS word ondersteun deur Kanada, Denemarke, Finland, Japan, Noorweë, Spanje, Swede, Switserland, Nederland en die VSA. – RSG

ANC woedend oor Goldfields-bewerings

Die ANC het Dinsdag gesê die Mail & Guardian moet sy storie onttrek oor Baleka Mbete, ANC-voorsitter, wat na bewering deur Gold Fields omgekoop is en haar en die party om verskoning vra.

“In hul gretigheid om die nasionale voorsitter en die ANC te diskrediteer, het die koerant ’n swak, ongegronde storie gepubliseer,” het die regerende party in ’n verklaring gesê.

“Die Mail & Guardian gebruik opsetlik die opskrif [‘Gold Fields bribed ANC Chair’] met die bedoeling om sensasioneel, lasterlik en beledigend te wees.”

Stefaans Brummer, een van die joernaliste wat die storie geskryf het, het die ANC-verklaring as “heeltemal oordrewe” beskryf.

“Ons staan by ons storie, wat duidelik in die openbare belang was.”

’n New Yorkse regsfirma het bevind dat ’n aandeletoekenning van R25 miljoen aan Mbete neerkom op omkopery. Die koerant het berig dat Gold Fields dié bevinding onder die mat gevee het.

Die regsfirma, wat deur Gold Fields aangestel is, het bevind dat Mbete se aandeel in ’n omstrede bemagtigingstransaksie in 2010 vergroot is ná ’n beweerde dreigement deur haar verteenwoordiger. – Sapa

Misdaadintelligensiehoof steeds in sy pos

Waarnemende hoof van misdaadintelligensie Chris Ngcobo het nie sy pos verlaat nie, het die SAPD gesê.

“Hy is nog steeds in sy pos, hy het nie uit die posisie getree nie,” het ‘n woordvoerder lt.genl Solomon Makgale gesê.

City Press het berig dat Ncgobo uit sy posisie getree het as ‘n gevolg van ondermyning deur ‘n pro-Richard Mdluli-faksie.

Volgens die koerant is Ncgobo amper ‘n maand gelede uit misdaadintelligensie se hoofkantoor na die veiligheids- en beskermingsdienste .

Ncgobo woon glo nie vergaderings by nie en het die nasionale kommissaris van polisie Riah Phiyega en die toppolisiebestuur ingelig dat hy nie sal terugkeer na sy pos nie.

Ncgobo het oorgeneem nadat Mdluli verlede jaar geskors is te midde van aanklagte van bedrog en korrupsie, asook die moord op sy voormalige vriendin se man .

‘n Geregtelike doodsondersoek het hom van enige betrokkenheid by die dood van sy voormalige vriendin se man onthef. Die aanklagte van bedrog en korrupsie is later almal ook teruggetrek .

Hy is later egter weer geskors in 2012 na sy heraanstelling, in afwagting van ‘n hofaansoek deur die drukgroep Freedom Under Law (FUL) om die onttrekking van die kriminele en dissiplinêre aanklagte teen hom te hersien.

Die Mdluli–geval is ‘n belangrike toets vir die Demokratiese Alliansie se poging om die howe teen president Zuma te gebruik.

Die party voer aan dat die Zuma-administrasie die weg gebaan het vir verpolitiseerde aanstellings, insluitend dié van Mdluli, van die waarnemende nasionale direkteur van openbare vervolging, adv Nomgcobo Jiba, en die hoof van die gespesialiseerde handelsmisdaadeenheid, adv Lawrence Mrwebi. – Sapa

Twintig onderwysers vir bedrog gearresteer

Meer as 20 swart onderwysers van Mpumalanga is Donderdag in hegtenis geneem nadat hulle glo die Suid-Afrikaanse Inkomstediens (SAID) uit R7 miljoen geswendel het, het die Valke gesê.

Die onderwysers van die Ehlanzeni- en Bohlabela-distrik is by hul werkplekke in hegtenis geneem.

“Ons het 36 lasbriewe in Mpumalanga. Toe ek vanmiddag weg is, het ons reeds 22 mense in hegtenis geneem en nog mense word vasgetrek,” het kapt. Paul Ramaloko, woordvoerder van die Valke, gesê.

“Sommige van die onderwysers was nog by die werk, terwyl ander by rondgaande onderwyskantore in hegtenis geneem is. Hulle het na bewering die SAID deur belastingopgawes geswendel en die bedrag wat betrokke is, is R7 miljoen.”

Ramaloko het gesê die onderwysers sal Vrydag in vier howe op aanklag van bedrog verskyn.

“Hulle sal in die KaBokweni-, Komatipoort-, Bushbuckridge-, en Nelspruit-landdroshof verskyn.”

Die misdade is in 2012 gepleeg.

“In die tweede vlaag van arrestasies sal ons SAID-beamptes ook aankeer,” het Ramaloko gesê. – Sapa

Seriti: Direkteur van Gevegstelsels getuig

Die Seriti-kommissie van Ondersoek wat aangestel is om die regering se omstrede wapenaankope te ondersoek, sal vandag meer hoor oor die proses wat gelei het tot die besluit om die Suid-Afrikaanse Lugmag se Grippen-vegvliegtuie en Hawk-vegopleidingsvliegtuie aan te koop.

Brigadier-generaal John Bayne sal oor die Lugmag se verouderde vloot vliegtuie getuig en die debatte wat plaasgevind het oor die vervanging daarvan.

Bayne, wat die Direkteur van Gevegstelsels by die Lugmag is, sal ook getuig oor waarom vegvliegtuie aangekoop is in die huidige vreedsame politieke bestel en oor die aanwending van die vliegtuie.

Die Seriti kommissie is deur President Jacob Zuma aangestel om bewerings van bedrog, korrupsie en ongerymdhede in die sogenaamde wapenaankooptransaksie te ondersoek. – RSG

Mbeki onttrek van Seriti-ondersoek weens geld

Max Boqwana, wat oudpres. Thabo Mbeki en sy voormalige kabinetministers by die Seriti-kommissie van ondersoek verteenwoordig, het hom aan die verrigtinge onttrek.

Die Kommissie sê die onttrekking van sy regsverteenwoordiger sal geen invloed op sy werksaamhede hê nie.

Woordvoerder vir die kommissie, William Baloyi, sê: “Eintlik is daar geen impak op die kommissie nie. Dit is nie verpligtend vir die getuies om hul regspanne te bring nie. Dit is net ‘n opsie.“

Mbeki het verduidelik dat hy onttrek hangende ‘n aansoek om geldelike hulp van die staat.

Mbeki se woordvoerder, Mukoni Ratshitanga, sê Mbeki se posisie sal hersien word as die regering ‘n besluit oor regshulp aan die voormalige president geneem het.

Adv. Tshepo Sibeko, getuienisleier, het bevestig dat daar vergaderings met Boqwana was.

“Ons het geen beswaar teen sy onttrekking nie.”

Regter Willie Seriti, voorsitter van die kommissie, het gesê die regsverteenwoordiging van getuies is buite die grense van die kommissie.

Getuies kan hul eie regsverteenwoordiging hê, waarvoor hulle self moet betaal.

Pres. Jacob Zuma het die kommissie in 2011 aangestel om beweerde korrupsie in die multimiljardrand-wapentransaksie van 1999 te ondersoek.

Hoe kan ek ‘n trotse Suid-Afrikaner wees?

deur Ian Golombick

As die strate lyk soos vullishope want die meeste mense gooi hulle vullis net waar hulle wil, As jy na die bevolking kyk, is die meerderheid van hulle anderskleurige mense; dus kom die meeste vullis van hulle af.

As ons president ‘n gekkery van die huwelik maak en dan sê: “It’s my culture.” Ek hoop regtig nie hulle mag meer as 10 vroue hê nie want ek sal sukkel om by te hou want ek het net 10 vingers om op te tel.

As die leier van die jeugliga wat amper oud genoeg is vir pensioen goed kwytraak wat niks met sy pligte te doen het nie en niks met die jeug uitrig nie… wat wel sy plig is.

As elke tweede minister in die regering of in die koerante is oor bedrog of korrupsie en swak dienslewering.

As die polisie wat die wet moet toepas van die misdaad in die land pleeg.

As werkers in die staatsdiens net werk toe kom om ‘n salaris te kry al doen hulle heel dag niks nie.

As tenders en kontrakte na die buiteland toe gaan pleks daarvan dat óns dit hier kan doen en ons kan want ons het al baie dinge reggekry in die verlede; ek kan hulle opnoem.

As stakers alles verniel en afbreek. As hulle oor dienslewering betoog, dan brand en breek julle juis die toerusting waaroor hulle betoog. Hulle brand ‘n skool af want daar is nie genoeg skole nie; dit maak nie sin nie.

As hulle ons laat glo dat die paaie opgegradeer word vir die 2010-sokker maar nou sit hulle tollhekke met buitensporige tariewe op.

As jou regering vir mense om elke hoek lieg en bedrieg net sodat iemand uit ‘n tender kan ryk word.

Ek sê nie apartheid was reg nie maar almal het ‘n woonplek gehad. Daar was werk vir almal, mediese dienste en misdaad was beheerbaar. Baie anderskleurige ou mense het dit ook al teenoor my erken.

Kyk hoe lyk ons hospitale, ons treine, openbare toilette, ens., ens., ens.

Kyk na al die geweld en snert in ons skole. Kyk net hoeveel werklose blankes is daar en hoe het die blanke volk verarm. As jy die telefoon optel en skakel omdat jy ‘n probleem het met jou krag of telefoon …..eisj jy kom net nie geholpe nie.

Kinders is nie meer kinders nie omdat hulle nie meer by mekaar kan gaan speel nie… hulle kan dit nie waag om alleen in die strate te loop nie. Drank is jare gelede by die drankwinkel gekoop en vandag is daar ‘n sjebien op elke hoek.

Brandweermanne steel nou parfuum om skelm te gaan verkoop om bietjie beter te kan lewe. Wanneer jy ‘n bloulig agter jou sien, weet jy nie of jy moet aftrek of vet gee nie… mens kan niemand meer vertrou nie. Laat mens wonder hoekom so baie mense oppak en Suid-Afrika verlaat.

Drank mag nie meer geadverteer word nie en tabak gaan ook gestop word maar kyk gerus al die ponografie en seks op TV… geen wonder daar is soveel verkragtings nie.

Elke keer as ‘n blanke sy mond oopmaak en sy mening lug, dan word daar gesê dit is rassisties maar ander mag sê net wat hulle wil en daarmee is niks verkeerd nie. Dit is hoekom ek maar hier met myself gesels en my sê sê.