Etiket: ANC

NGV sal nie amptenare in al-Basjir-saak vervolg nie

Die Nasionale Vervolgingsgesag het verklaar dat hulle sal wag vir die regering se verdere appélproses oor die al-Basjir kwessie.

Die NGV gaan dus nie dadelik met strafregtelike vervolging begin nie, het Luvuyo Mfaku gesê.

Die Vervolgingsgesag sê daar kan eers ná die proses besluit word of staatsamptenare wat gehelp het om die Soedannese president, Omar al-Bashir uit Suid-Afrika te kry, stafrefregtelik vervolg sal word.

Die Hooggeregshof in Pretoria het in Junie bevind dat die regering nie ‘n hofbevel nagekom het om te keer dat al-Basjir die land verlaat nie.

Dieselfde hof het Woensdag die staat se aansoek vir verlof tot appèl geweier.

Die ANC het ‘n beroep op die regering gedoen om ‘n petisie tot die Appèlhof te rig. Hulle het 20 dae om te besluit.

Die departement van Justisie het by monde van ‘n woordvoerder gesê hulle is teleurgesteld en hulle sal verdere stappe oorweeg.

Die regering het tot volgende maand om aan die Internasionale Strafhof te verduidelik waarom die Soedannese president nie in hegtenis geneem is nie.

Sprake van bedrog by Tlokwe-tussenverkiesing

Die OVK het in die Grondwethof erken dat die kiesersrol wat gebruik is in die 2013 Tlokwe-tussenverkiesings, geen adresse gehad het nie.

‘n Opposisielid wat die hofverrigtinge bywoon, het dié inligting getwiet.

Dit het ook aan die lig gekom dat onafhanklike kandidate nie behoorlik stemme kon werf nie omdat hulle eers sewe dae voor die verkiesings kieserslyste ontvang het.

Agt onafhanklike kandidate beweer kiesers is met busse aangery uit ander streke van die provinsie om in Tlokwe te stem, en daar het ook ander ongerymdhede tydens die verkiesings plaasgevind.

Parlementêre sirkus oor prosedures duur voort

Die DA het Julius Malema ondersteun in ‘n voorsetting van die huidige parlementêre sirkus waar landsbestuur vervaag het tot ‘n onbenulligheid omdat partye met mekaar stry oor prosedures.

Malema is vir vyf dae geskors nadat hy geweier het om ‘n opmerking terug te trek dat adjunkpresident Cyril Ramaphosa ‘n moordenaar is.

Die EFF sê die verkeerde Parlementêre reël is toegepas met die verwydering van sy leier. Die DA se hoofsweep, John Steenhuisen, stem saam dat die verkeerde reël gebruik is.

Die party sê die lewens van Parlementslede was nie in gevaar nie, en die werksaamhede van die Raad is nie geraak nie.

Malema het geweier om ‘n opmerking terug te trek dat adjunkpresident Cyril Ramaphosa ‘n moordenaar is, en verantwoordelik is vir die dood van mynwerkers by Marikana in Augustus 2012.

Grace Boroto, raadsvoorsitter, het beslis dat dié uitlatings onparlementêr is en dat die EFF-leier dit moet terugtrek.

Die ANC het in sy reaksie gesê Malema se verwydering uit die Raad was sy verdiende loon.

Die ANC se Parlementêre woordvoerder, Maloto Mothapo, sê ‘n korrekte prosedure bestaan om sulke aantygings by die Parlement in te dien.

Hy sê dit moet by wyse van ‘n mosie plaasvind, met getuienis wat die bewering steun, anders kan mense mekaar links en regs beledig.

Mothapo sê die voorsittende beampte het heeltemaal korrek opgetree deur Malema te laat verwyder.

Skildery wat terreur befonds vir miljoene verkoop

‘n Skildery deur ‘n Suid-Afrikaanse kunstenaar, Irma Stern, wat verkoop is om geld vir ANC-terreur in te samel, is vir ‘n reuseprys in Londen verkoop.

Die skildery getiteld Arabier in Swart is vir net meer as sewentien miljoen rand verkoop.

Die hoof van Suid-Afrikaanse kuns by die kunshandelaar Bonhams, Hannah O’Leary, sê die skildery dateer uit Stern se Zanzibar-tydperk.

Die werk is in die vroeë sestigerjare opgeveil om geld in te samel vir Nelson Mandela en sy mede-aangeklaagdes se regskoste in die hoogverraadsaak nadat Mandela en sy medekommuniste ‘n terreurveldtog teen burgerlikes geloods het.

Dit is in die vyftigerjare deur die versamelaar Betty Suzman, skoonsuster van die anti-apartheidsaktivis en politikus Helen Suzman, geskenk om opgeveil te word.

Stern is in 1894 in die Transvaal gebore. Sy was van Joodse afkoms, en het by tye in Zanzibar gewerk, waar sy die rame vir haar skilderye laat kerf het.

Die werk is later na Brittanje toe die koper daarheen geëmigreer het. Die skildery het jare lank in ‘n Londense woonstel gehang en is as ‘n kennisgewingsbord gebruik.

Dit is nou een van die tien duurste Suid-Afrikaanse skilderye wat nog op ‘n veiling verkoop is.

Jeugliga beplan optog teen Krugerstandbeeld

Die ANC-jeugliga sê hulle gaan ‘n optog in Pretoria lei en die verwydering van die Paul Kruger-standbeeld op Kerkplein eis.

Die David Motsamai-tak van die jeugliga in Sunnyside, Pretoria sê in ‘n verklaring hulle is reeds besig om reëlings vir dié optog te tref.

Die jeugliga sal ook glo ‘n versoekskrif oorhandig wat onder meer sal eis dat die standbeeld van Kruger vervang word met dié van struggle-ikone wat tydens die Rivonia-verhoor vervolg is.

Dié optrede dui glo op die “algemene wanfunksionering” binne die liga se geledere sedert Julius Malema die leisels oorgeneem het, het André Duvenhage, ‘n politieke ontleder, gesê.

Dit strook egter heel duidelik met die Kulturele Marxiste se aanslag en is ‘n konsekwente houding deur die Liga.

Jeugliga-president ‘reg vir oorlog’

Die nuutverkose president van die ANC Jeugliga, Collen Maine, sê die liga wil jeugorganisasies regoor die wêreld versterk, veral onder Suid-Afrika se hoofvennote.

Hy het by die Jeugliga se 25ste nasionale kongres in Midrand gepraat.

Maine het gesê die Liga is nou gerees “vir oorlog” nadat hulle doelbewus glo verswak is.

Hy het die ANC-leierskap om verskoning gevra vir die gedrag van vorige Jeugliga leiergroepe, het RSG berig.

Maine sê die liga sal internasionale jeuguitruilprogramme aanmoedig.

Maine het verklaar dat lede van die ANC Jeugliga, wat hof toe is om die kongres te probeer verhoed, nie langer as lede geduld sal word nie.

Lede wat die Liga hof toe geneem het voor sy verkiesingskongres die afgelope naweek, sal dus sonder meer geskors word.

Maine het die aankondiging gedoen tydens die afsluiting van die kongres wat in Midrand gehou is. Maine sê die kongres het die besluit geneem

Vrydag het ‘n aantal van die Liga se lede in Noordwes die hof genader en probeer om die kongres te stop.

Hulle het aangevoer dat daar onreëlmatighede was tydens oudits by takke van die Liga.

Die groep het gesê hulle het alle interne prosesse gevolg en het geen ander keuse gehad as om hof toe te gaan nie.

Maine was verlede jaar in die nuus nadat sy vrou hulle huis se beskadig het omdat sy hom met ‘n ander vrou gevang het. Sy het hom glo aangerand.

Die nuutverkose leier wat Julius Malema se skoene sal moet volstaan, is glo 35 jaar oud, maar wou dit nie aan die Sunday Times bevestig nie.

Regering sentraliseer tender-databasis

Die minister van finansies, Nhlanhla Nene het ‘n sentrale verskaffer-databasisstelsel bekendgestel.

Die stelsel is glo daarop gemik om die proses te vereenvoudig om sake met die staat te doen, om korrupsie te bekamp en deursigtigheid te bevorder, het RSG berig.

Die stelsel sal ook gekoppel wees aan die Suid-Afrikaanse Inkomstediens, Binnelandse Sake en die kommissie vir maatskappye en intellektuele eiendom.

Nene sê die stelsel van nege miljoen rand sal die registrasie en verifikasie-prosesse versnel. Hy sê die stelsel gaan ook verbind word met die regering se elektroniese tenderstelsel wat in April bekendgestel is.

Die Oos-Kaapse LUR vir Finansies, Sakhumzi Smoyao sê die stelsel sal inligting oor verskaffers vir alle staatsinstellings bevat en sal onwettige praktyke verminder.

ANC se staatsmynmaatskappy in Mpumalanga opgerig

Die ANC in Mpumalanga het aangedui dat ‘n provinsiale mynmaatskappy onder staatsbesit geskep kan word om ekonomiese groei en swart bemagtiging te bevorder.

Die besluit is geneem tydens die party se provinsiale kongres, het RSG berig.

Die ANC is glo bekommerd oor die stadige tempo van transformasie in die mynbedryf in Mpumalanga.

Die ANC se provinsiale sekretaris, Lucky Ndinisa sê die regering moet met ‘n lewensvatbaarheidstudie in dié verband begin.

Die regering het intussen ook ‘n komitee saamgestel om onwettige mynbedrywighede te bekamp. Die komitee sluit verteenwoordigers van die departement van Minerale Hulpbronne, intelligensiedienste, die polisie en ander rolspelers in.

Die departement het die parlementêre komitee oor Minerale Hulpbronne toegespreek.

‘n Departementslid, Reuben Masinga sê ‘n geïntegreerde forum is die beste manier om ‘n einde aan onwettige mynbedrywighede te maak.

Die SABC het ook ‘n swart sepie bekendgestel wat onder meer handel oor onwettige myners.

ANC wil provinsies afskaf

Volgens die Sunday Independent beplan die ANC om sekere provinsies af te skaf.

Die afskaffing kan lei tot groter magte vir betrokke munisipaliteite.

Dié voorstelle is vervat in ‘n verslag wat in Julie by die party se vergadering besluit is en intussen na provinsiale strukture uitgestuur is.

Die ANC se sekretaris-generaal, Gwede Mantashe, het by dié geleentheid ook verklaar dat oplossings gemik op werkloosheid, armoede en on­gelykheid nog geen vrugte afgewerp het nie.

Mantashe meen die ANC moet eerder op grondhervorming, mynboubelange en breë­band fokus.

Die party beplan glo ook om senior staatsamptenare se persoonlike uitgawes en magte te ondersoek.

Dawie Roodt se ope brief laat ANC koud

“Ope briewe skryf nooi mense nie uit om deel te neem aan ‘n bespreking nie,” sê die ANC.

Die ANC se sekretaris-generaal Gwede Mantashe is deur Media24 genader vir sy gedagtes oor ‘n ope brief van Dawie Roodt, ekonoom, wat gerig is aan alle Suid-Afrikaners oor die rede waarom hy nie beplan om te emigreer nie.

Roodt is ernstig beseer toe gewapende swart rowers hom en sy gesin by hul huis in Pretoria aangeval het.

In die brief, getiteld “Ek kies die groter vrees – ‘n brief aan my mede-Suid-Afrikaners – almal van hulle”, betreur Roodt die regering se burokrasie en hoe die land verval, voordat hy besonderhede in ‘n drie-punt plan stel oor hoe dinge verbeter kan word.

Mantashe het gesê die ANC was altyd oop vir gesprekke met iemand, maar nie deur ‘n ope brief nie.

“Hulle stel belang in ‘n publisiteitfoefie, en ek wil nie met sulke mense debat voer nie,” het hy gesê.

“Die brief is nie gerig aan ons nie, dit is gerig aan almal,” het hy bygevoeg.

OB se mediakonferensie maak opslae

Die Openbare Beskermer hou vol dat daar geen regsgronde is vir die minister van Polisie se verslag oor veiligheidsopgraderings aan president Jacob Zuma se private woning nie.

Thuli Madonsela het by ‘n mediakonferensie gesê sy rig haar tot die parlement deur die media, nadat die ANC geweier het om haar voor die ad hoc komitee oor Nkandla te laat getuig.

Madonsela sê haar kantoor is geregtig op dieselfde respek as dié van die Ouditeur-Generaal en die Onafhanklike Verkiesingskommissie.

Mandonsela se mediakonferensie is die eerste keer sedert Suid-Afrika ‘n grondwetlike demokrasie gekry het, dat die Parlement op ‘n nuwe wyse gedwing word om na haar te luister.

Die ANC sê egter dit is onaanvaarbaar dat ‘n instelling wat aan die parlement verantwoordbaar is, inmeng in parlementêre prosesse.

Die ANC se hoofsweep, Mathole Motshekga het in reaksie op Madonsela se nuuskonferensie gesê dit is ‘n onaanvaarbare inmenging in die parlementêre proses en dat Madonsela die perke van haar kantoor oorskry het.

Madonsela se oproep dat die Speaker tussenbeide moet tree, is deur die IVP verwerp. Hulle het in hulle reaksie gesê die geskil tussen die Openbare Beskermer en lede van die uitvoerende gesag is nie goed vir demokrasie in die land nie.

Intussen sal ‘n aansoek om die Speaker van die parlement, Baleka Mbete, onbevoeg te verklaar vandag in die Hooggeregshof in Kaapstad aangehoor word.

Die opposisiepartye, Agang, die UDM en Cope wil ook hê die hof moet beslis dat Mbete nie as speaker kan optree wanneer daar ‘n debat oor ‘n mosie van wantroue in die president is nie.

Agang se parlementêre leier, Andries Tlouamma sê daar is genoeg bewyse om aan die hof te toon dat Mbete meer lojaal teenoor die ANC as teenoor die parlement as instelling is.

Die ANC in die parlement het Mbete verdedig, en sê die hofaansoek is belaglik. ‘n Woordvoerder van die ANC koukus, Moloto Mothapo sê daar is geen wettige of grondwetlike basis vir die hofaansoek om suksesvol te wees nie.

Mothapo sê die ANC glo steeds dat Mbete die regte persoon is om as speaker op te tree, en dat sy nie bevoordoordeeld, onbevoeg of slegs lojaal aan die ANC is nie.

Die Hooggeregshof in Kaapstad sal die volgende twee dae die argumente in die aansoek aanhoor.

Die Vryheidsfront Plus sê hulle ondersteun Madonsela se oproep dat die Speaker tussenbeide moet tree oor die Nkandla-kwessie.

Brief: Weste vir Afrikaners ‘n groter politieke vyand as KZN-ANC

Ek het Dan Roodt se rubriek Van triomf tot ondergang Deel 1, soos baie ander mense, met belangstelling gelees. Sien uit na vele dele.

Hy noem die liberalisme van die media, in SA, in Swede, en ander Westerse lande ná WOII.

Dit het Portugal ook getref: vandaar die 1974 en 1975 magsvakume in Mosambiek en Angola.

Met die sigbare chaos in Mosambiek, kon die SA regering in 1975 in Angola ingryp. Dat hulle dit in die geheim moes doen, maar Castro met Operasie Carlotta nie, was teken van die “vreemde gety in die Weste” waarna Verwoerd vroeër verwys het.

Die ooreenkoms in 1975 met die CIA was om ‘n MPLA-regering in Luanda te verhoed.

Die Vorsterregering moes eerder nie op die VSA staatgemaak het nie – dit was tog ‘n dom fout om van die Senaat en Kongres steun te verwag. Inteendeel, die VSA het Castro-Kuba se lug- en seebrug na Luanda “ondersteun”!

Die oordeelsfout om op die VSA staat te maak pleks van self eerder en in groter mag Luanda te beset vir Unita, het SA baie duur te staan gekom: 1976-Soweto-onluste, die val van Rhodesie, en Frelimo sterker in Mosambiek. Ek twyfel of Verwoerd die VSA sou vertrou het, en sulke geweldige groot foute sou begaan het.

In 1987 en 1988 het PW en Pik weereens die Weste vertrou. Thatcher en Reagan was mos baie goeie Westerlinge.

In 1987 en 1988 neem PW die finale besluite om nie Kuba in Angola te vernietig nie, om uit Angola te onttrek, asook Suidwes oor te gee! Die res is geskiedenis. FW het geen geskiedenis gemaak nie! Dit was PW & Pik & Neil Barnard wat die Weste vertrou het, of na hulle raad geluister het, en so die MPLA-SWAPO-ANC-situasie veroorsaak het.

Ná WOII het die Weste die Verwoerdlose Afrikaners laat ondergaan. Die NP en die RSA was ‘n groot anachronisme. Verwoerd het dit geweet.

So groot was die post-WOII Westerse wêreld se NP-RSA anachronisme, dat Verwoerd vir seker iets “radikaals” of “revolusionêrs” moes beplan het vir die RSA en Suider-Afrika se binnelandse en buitelandse beleid, net voor die pro-Westerse moord op hom. Wat het Verwoerd beplan? ‘n Alliansie met tradisionele Afrikane, eerder as met “mede-Westerlinge” en Westerse Jode.

Viljoen reken Afrikaners soos Lang Hendrik vd Berg moes betrokke gewees het by die moord op Verwoerd, maar wie dit ook al was – hulle was in eie oë pro-Westerse blanke helde.

My punt is: alles wat Dan Roodt skryf, is waar. Dis waar, want dit moes so wees en gebeur ná WOII. Behalwe onder Verwoerd, wat nie pro-Westers was nie, omdat hy geweet het die Weste verkeer “onder vreemde gety”.

Verwoerd het gedurende die dertigerjare in Kaapstad se hawe teen verdere immigrante uit Litaue betoog. Ook NP Van Wyk Louw was ‘n ander man voor WOII.

Maar ná WOII was die Weste anders, en die een man wat daarvolgens opgetree het, was Verwoerd. Dit het Verwoerd genoodsaak om swart tradisionele leiers en volke te versterk, hulle te ontwikkel, te moderniseer en industrialiseer, en met hulle polities saam te werk.

Dit is vandag nog so. Die Weste is ‘n groter politieke vyand van Afrikaners in Suid-Afrika, as die KZN-ANC.

– Madelein Louw

Senior ANC-lid pleit vir boendoegereg voor sy eie vonnis

Ten minste een lid van die ANC se uitvoerende komitee in die Wes-Kaap is keelvol vir misdaad, alhoewel hyself met die gereg gebots het.

Andile Lili meen misdadigers moet “onmiddellik en gewelddadig” doodgemaak word in boendoeverhore.

Hy het die uitlating Dinsdag voor die landdroshof in Bellville gemaak waar hy aanstons gevonnis sal word weens ’n oortreding van die Burgerlugvaartwet.

Lili en nog agt mense was twee jaar gelede betrokke by ’n voorval waar mense-ontlasting by die Kaapstadse Lughawe uitgekeer is.

Die hofverrigtinge is egter uitgestel.

Lili het ‘n skare opgesweep oor die land se onvoldoende regstelsel. Talle misdadigers wat gearresteer word, word deur die regstelsel vrygelaat, het hy gesê. “Die enigste ding wat ons kan doen, is om ’n misdadiger dadelik dood te maak wanneer ons hom vind.

“Ons moet hulle doodmaak, kamerade! Ons bevry ons van misdadigers. Die polisie probeer, maar die regstelsel laat ons in die steek.”

Verslag sê korrupsie in SA buite beheer

Korrupsievlakke in Suid-Afrika is glo heeltemal buite beheer en byna enigiets kan teen ‘n prys verkry word.

Dit is volgens Steven Powell, mede-hoof van forensiese regsfirma ENSafrica wat kommer uitgespreek het dat korrupsie besig is om goed gevestig te raak in munisipaliteite en in die regering.
 
ENSafrica het sy 2015 anti-omkopery en korrupsie-opname vrygestel wat onder andere Suid-Afrika, Ghana en Nigerië, geïdentifiseer het as korrupsieneste.
 
Die opname het bevind dat voorvalle van omkopery in Afrika toegeneem het, maar terselftertyd het bewustheid oor anti-omkopery ook toegeneem.
 
Maar Anthea Jeffery, hoof van beleidsnavorsing by die Suid-Afrikaanse Instituut vir Rasseverhoudinge (SAIRR), sê dit is moeilik om te bepaal of korrupsie werklik buite beheer is, want dit is moeilik om te kwantifiseer.