Internasionale nuus – Bladsy 32

Finne en asielsoekers pak mekaar in bloedige botsing

‘n Bloedige geveg tussen Finse burgers en immigrante het in die dorp van Forssa, geleë in suidelike deel van die land, plaasgevind.

Sowat 100 mense gewapen met stokke en pype was betrokke by die skermutseling voor ‘n plaaslike asielsentrum.

Finne het glo die migrante eerste Dinsdagaand aangeval, volgens berigte in die hoofstroommedia.

Maar in aanlynberigte het twee immigrante (foto bo) ‘n 15-jarige Finse seun eerste aangeval en ernstig beseer. In reaksie hierop het die inwoners glo voor die asielsentrum byeengekom om die twee skuldiges wat daar geskuil het, uit te roep.

Getuies beskryf ‘n groot groep mans van die plaaslike bevolking wat voor die asielsentrum byeengekom het. Gevegte het daarna tussen hulle en die immigrante uitgebreek, het die Finse uitsaaidiens YLE berig.

Die jongste botsings kom te midde van ‘n groeiende aantal botsings tussen die plaaslike bevolking en immigrante oor ‘n nuwe asielsentrum wat gebou word in Forssa.

Beide groepe het wapens soos soos stokke en pype gebruik, het die polisie gesê. Vyf mense is na bewering beseer en twee van die deelnemers is in hegtenis geneem, volgens YLE.

Die polisie het meer mense wat betrokke was by die geveg aangemoedig om na vore te kom.

Volgens die beamptes, was sowat 100 mense betrokke by die botsing. Maar die presiese getal is onduidelik, aangesien albei groepe skoongemaak het voordat die polisie opgedaag het.

“Ek hoop dat almal wat ‘n besering opgedoen het, die polisie in kennis sal stel,” het Tomi Repo van Forssa se polisiestasie gesê. “Die polisie is net bewus van ‘n baie klein aantal beserings, maar ek glo dat daar nog baie meer is.”

Die plaaslike munisipaliteit is besig om ‘n komitee saam te stel wat sal probeer om die onlangse vlaag van geweld in die dorp aan te spreek.

“Ek hoop mense verstaan geweld en hierdie soort aanvalle is altyd verkeerd, aan beide kante, en niemand sluit by hulle aan nie,” sê Kaisa Lepola, voorsitter van die dorpsraad.

Intussen het inwoners ‘n protesoptog vir Donderdag gereël waar hulle van plan is om teen die verwelkoming van meer migrante te velde te trek.

Irakse man is in Julie in hegtenis geneem in Finland op die vermoede van ‘n terroriste-verwante moord en oorlogsmisdade. Die man het vermoedelik as ‘n asielsoeker in Finland aangeland.

Die 24-jarige man is deur die Finse Nasionale Buro van Ondersoek in samewerking met die plaaslike polisie-afdeling vasgevat.

Jari Raty, hoofinspekteur by die Departement Sentrale Kriminele Polisie, het gesê die man was na bewering betrokke by die Kamp Speicher-slagting deur ISIS in 2014. Sowat 1000 tot 1700 ongewapende kadette is dood in die voorval.

In Desember verlede jaar, is twee 23-jarige Irakse tweelingbroers wat ook met die Kamp Speicher-slagting verbind word, gevang deur die Finse polisie in Forssa.

Selfmoordbomaanval deur kind in Irak gefnuik

Dramatiese videomateriaal het na vore gekom van die Irakse polisie wat ‘n selfmoordplofgordel van ‘n kind afhaal, vermoedelik voor nog ‘n selfmoordbomaanvalpoging van ISIS.

Die beeldmateriaal toon hoe sekuriteitspersoneel ‘n sigbaar ontstelde seuntjie in toom hou, terwyl hulle sorgvuldig die gordel van die bolyf die jeugdige in Kirkuk afsny.

Nadat die band verwyder is, word die seun opgeraap en weggeneem.

Koerdistan24, ‘n nuusstasie in Irbil, Irak, het Sondag die beelde uitgesaai.

Owerhede het gesê hulle glo die 15-jarige het ‘n week gelede van Mosul na Kirkuk gekom, ISIS se belangrikste vesting buite Sirië.

Die arrestasie in Kirkuk kom ‘n dag nadat ‘n kind ‘n Koerdiese troue in Turkye in ‘n selfmoordaanval geteiken het.

Meer as 20 van die slagoffers was kinders onder 14, het ‘n Turkse amptenaar gister gesê.

Die aanvaller wat Saterdagaand láát op ’n feesviering in die suidoostelike stad Gaziantep toegeslaan het, was tussen 12 en 14 jaar oud, het Turkye se pres. Tayyip Erdogan verklaar.

Die selfmoordbomaanvaller het laatnag op die troue toegeslaan. Daar was ’n enorme ontploffing tussen die mense was wat nog gedans het.

Bloed en liggaamsdele was daarna besaai oor die terrein, sê ooggetuies. Brand- en bloedvlekke was sigbaar teen die mure in die nou stegie waar die aanval plaasgevind het.

ISIS het ‘n geskiedenis van die misbruik van kinders deur middel van propaganda, maar meer onlangs word hulle aangewend as wapens op die voorste linies en om burgerlikes te teiken.

Die terroriste-groep beskik oor ‘n leër van kindersoldate – gesteel van hul families en geïndoktrineer om die “saak” te bevorder.

Hierdie sogenaamde kleintjies van die kalifaat word ingelyf in die veldtog van geweld, met kinders so jonk as 8 wat deelneem volgens VN-verslae.

“Ons het verslae van kinders, veral kinders wat verstandelik gestremd is, wat gebruik word as selfmoordbommers, waarskynlik sonder dat hulle self verstaan wat gebeur of wat van hulle verwag word,” sê Renate Winter, ‘n VN-kinderregtespesialis.

Noord-Korea se jongste missieltoets skep eenheid in Asië

Noord-Korea het Woensdag ’n toetslansering van ’n langafstandmissiel onderneem wat 500 kilometer ver in die rigting van Japan getrek het.

Dit was die eerste keer dat ‘n Noord-Koreaanse missiel Japan se lugverdedigingidentifikasiesone binnegedring het, het die Japannese Eerste Minister Shinzo Abe gesê.

Die toets het eenheid geskep onder leiers in Asië. Die ministers van buitelandse sake van China, Japan en Suid-Korea het Woensdag die duikbootmissieltoets veroordeel.

Wapenontleders sê dit neem Noord-Korea ’n stap nader aan die verwesenliking van sy kernaanval-ambisies.

Die vlugafstand is deur Suid-Korea se gesamentlike militêre stafhoofde gemeet, wat sê dit het heelwat verder getrek as vorige toetslanserings. Dit dui volgens waarnemers op aansienlike vordering op tegnologiese gebied.

Suid-Korea se Yonhap-nuusagentskap het gister ’n militêre bron aangehaal wat sê die lansering is teen ’n akute helling gedoen, wat die missiel se afstand beperk het.

Indien dit teen die optimale helling afgevuur sou word, sal dit in staat wees om ’n afstand van 1 000 kilometer te bereik.

VSA stel sanksies in teen LRA

Amerika het vandeesweek aangekondig dat sanksies teen die seuns van Joseph Kony, leier van die Sentraal-Afrikaanse Republiek (SAR) se Lord’s Resistance Army (LRA) ingestel is.

Die Amerikaanse tesourie sê Salim en Ali Kony is geteiken omdat hulle namens die LRA en hul pa optree, het AFP berig.

Dit volg nadat sanksies in Maart teen Kony senior ingestel is omdat hy burgerlikes in die Sentraal-Afrikaanse Republiek teiken deur opdrag vir dade van geweld en ontvoering te gee en verantwoordelik is dat duisende mense haweloos gelaat is.

Die LRA, wat in 1987 vir die eerste keer in die noorde van Uganda na vore getree het, het ‘n vreesaanjaende reputasie verwerf vir barbaarse aktiwiteite in die noorde van Uganda, Suid-Soedan, die Demokratiese Republiek van Kongo en SAR.

Die groep het meer as 100 000 mense vermoor, meer as 60 000 kinders ontvoer en baie van hulle gedwing om kindersoldate te word, sê die Verenigde Nasies.

Duitsers aangemoedig om kos en water te berg

Duitsland het sy bevolking aangemoedig om kos en water te berg ter voorbereiding vir moontlike terroriste- of kuberaanvalle, in die eerste burgerlike verdedigingstrategie sedert die einde van die Koue Oorlog.

Die plan is die eerste breë opdatering sedert 1995, toe ‘n aftakeling van die federale burgerlike verdedigingstrukture bepleit is in die nasleep van Duitse hereniging.

Die 69-bladsy dokument waarsku dat “die veiligheidsbeleidomgewing weer verander het”, en sê dat Duitsland gereed moet wees in geval van ‘n “bestaansbedreigende ontwikkeling”.

Kritici beskuldig egter kanselier Angela Merkel se koalisie van panieksaaiery voor belangrike deelstaatverkiesings in September.

En die bevolking het op sosiale media oor die strategie gespot, met die hutsteken #hamsterkaeufe (eekhoringspens) en foto’s van die harige knaagdier wyd sirkuleer op Twitter.

Die minister van Binnelandse Sake Thomas de Maiziere verwerp die kritiek. Hy het gesê “terwyl ons almal hoop dat ons gespaar sal word van ‘n groot krisis, moet ons voorbereid wees op ‘n ramp.

“Dit is net verantwoordelik, sinvol en paslik koelkop om voorbereidings vir ‘n rampscenario te tref,” het hy gesê, want “elke land in die wêreld doen dit”.

Hy erken egter “‘n aanval op Duitse grondgebied wat konvensionele verdediging noodsaak, is onwaarskynlik,” maar Europa se grootste ekonomie moet “voldoende voorberei in die geval van ‘n bestaansbedreigende ontwikkeling in die toekoms wat nie uitgesluit kan word nie”, hetbdie strategie dokument gesê.

“Die verspreiding van wapens van massavernietiging en hul afleweringstelsels, kan konflik dryf deur terreurmiddele en kuberaanvalle kan ‘n direkte bedreiging vir Duitsland en sy bondgenote wees,” het hy gesê.

Die afhanklikheid aan beide die krag en IT-netwerke, het de Maiziere gesê die regering se strategie vir noodplanne rig om sleutel energie- en waterinfrastruktuur te beskerm.

Hulle moedig mense aan om genoeg kos te berg vir 10 dae, en water vir ten minste vyf.

Drie EU-leiers sê Brexit sal nie Europa breek nie

Die leiers van Italië, Frankryk en Duitsland het dié week volgehou dat Brittanje se skokbesluit om die Europese Unie te verlaat, nie die einde van die ekonomiese magsblok sal beteken nie.

Italië se eerste minister, Matteo Renzi, die Duitse kanselier, Angela Merkel en Frankryk se pres. Francois Hollande het Maandag op die vliegdekskip, die Guiseppe Garibaldi, byeengekom om oor die Europese Unie (EU) se toekoms en Brittanje se uittrede uit die EU te beraadslaag.

Die vliegdekskip, een van die geboorteplekke van die droom vir ‘n verenigde en geïntegreerde Europa, was by die Italiaanse eiland, Ventotene, vasgemeer. Die leiers het onderneem om die EU te versterk ná Brittanje se vertrek.

“Baie het gedink dis verby met die EU ná Brexit, maar dit is nie hoe sake staan nie, het Renzi gesê.

Die EU is volgens hom die “antwoord” vir Europa se probleme en verseker “vrede, welvaart en vryheid”.

Volgens Merkel is die EU uit sommige van die “donkerste oomblikke van die Europese geskiedenis” gebore, ‘n verwysing na die Tweede Wêreldoorlog.

Sy sê die tyd het aangebreek om ‘n “beter bladsy” in Europese geskiedenis te skryf.

Hollande van Frankryk het gewaarsku dat Europa gevaar loop om gefragmenteer te word en dat verdeeldheid voorkom moet word.

Dit het ‘n “nuwe impuls” op drie fronte naamlik die ekonomie, verdediging en veiligheid nodig en werk- en opvoedkundige geleenthede moet vir jong mense geskep word.

In ‘n simboliese gebaar het die Italiaanse premier sy gaste na die graf van Altiero Spinelli, ‘n stigtersvader van die ideaal van Europese integrasie, geneem. Renzi het gesê die vergadering was daarop gemik om ‘n gemeenskaplike siening oor die EU se toekoms te vorm vóór ‘n spitsberaad van die oorblywende 27 lidlande op 16 September in Bratislawa begin.

Europa se ekonomiese vooruitsigte, djihadistiese aanvalle, die toestroming deur migrante, die Siriese konflik en betrekkinge met Rusland en Turkye was ook op die leiers se sakelys.

Hillary lyk gedaan, sukkel met bottel agurkies

Gerugte dat Hillary Clinton nie fisies geskik is vir die Withuis nie, wil nie gaan lê nie.

Maar die Demokratiese presidentskandidaat sê hierdie uitsprake kom van van die Republikeinse kandidaat, Donald Trump, en is deel van sy “mal strategie” en ‘n “alternatiewe realiteit”.

Clinton wil waarskynlik graag die aandag aflei van die nuus wat aanhoudend deursyfer oor kriminele bedrywighede rakende haar epos.

Trump het na die Clinton Foundation verwys in ‘n toespraak in Akron, Ohio, as ‘n “speel vir deel” toegangsroete vir buitelandse entiteite en regerings om invloed te koop in die VSA.

Hy het gesê haar optrede was krimineel en die gehoor het gedreunsing dat sy toegesluit moet word. Clinton verteenwoordig die korrupsie wat hoogty vier in Washington, waar invloed en besluite gekoop word, het hy gesê onder groot toejuiging.

Trump het ook verwys na haar Moslem-raadgewer, Huma Abedin, en haar ma wat ‘n fundementalistiese Moslem is. Albei dien op die redaksie van ‘n tydskrif wat fundementalisme bevorder.

Abedin se man, Anthony Weiner, ‘n ongeneeslike sekspes, het geen beheer oor homself nie, het Trump gesê. Hy het bygevoeg dat dié soort mens onder meer met staatsgeheime vertrou is.

Hillary, wat nie gesond lyk nie, het tydens ‘n opname van ABC se Jimmy Kimmel Live gesê. “Ek moet in ‘n alternatiewe realiteit instap en soos jy weet, vrae beantwoord of ek lewendig is en so aan.”

Clinton sê sy bevraagteken nie Trump se gesondheid nie en glo hy is “so gesond soos ‘n os.”

“Dit het een van hul temas geword,” sê sy. “Maak seker of ek lewendig is.”

Sy het daarna ‘n bottel agurkies met groot moeite oopgedraai – in haar “realiteit” – om te wys hoe gesond sy is. Maar die bottel was reeds vir haar oopgemaak want die kenmerkende geluid van die vakuum onder die deksel wat gebreek word, was hoorbaar afwesig.

Dit is die eerste keer dat Clinton teengekap het oor gerugte oor haar gesondheid, wat kommer wek onder haar eie ondersteuners.

Baie van die spekulasie spruit uit harsingskudding wat Clinton in Desember 2012 opgedoen het nadat sy flou geword het, ‘n episode wat haar dokter later aan ‘n maagvirus en ontwatering toegeskryf het, maar sy moes lank ‘n spesiale bril dra vir dubbelvisie na bloeding op die brein.

Dit word egter verswyg.

Dit is nou al byna ‘n jaar wat Clinton weier om enige mediakonferensies te hou.

Tobruk stem teen Libië se VN-regering

Opponente van Libië se eenheidsregering, wat die ondersteuning van die Verenigde Nasies geniet, het Maandag teen ’n mosie van vertroue in die Tripoli-bewind gestem in ’n rare sessie van die parlement wat in die ooste van die land gevestig is.

Die stemmery is ’n vars terugslag vir die regering van nasionale eenheid, wat vir maande na dié parlement se bekragtiging streef, terwyl dit probeer om invloed en gesag tot buite sy basis in die hoofstad uit te brei.

Die stemmery was die eerste sedert Januarie toe die parlement die aanvanklike lys ministers wat deur die eenheidsregering voorgestel is, verwerp het en die eerste sedert die eenheidsregering in Maart vanjaar aan bewind gekom het.

Parlementêre sessies in Tobruk is herhaaldelik uitgestel of geblokkeer, met teenkanting teen die eenheidsregering wat in die ooste van die land aan die toeneem is.

Ondersteuners van die regering, van wie baie nie Maandag se sitting bygewoon het nie, het voorheen gekla dat opponente met fisieke geweld dreig ten einde te verhoed dat stemmery plaasvind.

Altesaam 161 afgevaardigdes het die sitting bygewoon met 61 wat teen die mosie gestem het, 39 wat buite stemming gebly het en net een wat ten gunste van die mosie gestem het.

Die eenheidsregering is die gevolg van ’n VN-onderhandelde ooreenkoms wat in Desember onderteken is. Die ooreenkoms was daarop gemik om ’n einde aan konflik te maak, wat opgevlam het toe ’n gewapende alliansie in 2014 beheer oor instansies in Tripoli oorgeneem het en die nuutverkose parlement na die ooste van die land uitgewyk het.

Westerse magte maak op die eenheidsregering staat om Libië se veiligheidsvakuum die hoof te bied, olieproduksie te herstel en die stroom migrante te keer wat die Middellandse See vanuit Libië onderweg na Europa oorsteek.

Magte lojaal aan die eenheidsregering het byna die hele kusstad Sirte van die Islamitiese Staat-groep (ISIS) herower, maar die regering sukkel om elders ’n impak te hê.

Die regering se onvermoë om die krisis op te los, kragonderbrekings en ander probleme het bygedra dat die regering wyd steun verloor het.

Die minister van buitelandse sake van die Libiese tussentydse regering in Tobruk het in ‘n verklaring gesê die VN-gesant vir Libië, Martin Kobler (foto bo) moet vervang word met ‘n meer neutrale en doeltreffende figuur.

Kerry na Afrika te midde van stygende Moslembedreiging

Met die vredesooreenkoms in Suid-Soedan wat aan die uitrafel is en djihadiste wat voortgaan met aanvalle in Somalië, het die Amerikaanse minister van buitelandse sake, John Kerry, in Nairobi aangekom om met Kenia se pres. Uhuru Kenyatta samesprekings te voer.

Die twee het veiligheid in die streek en terrorisme bespreek voordat Kerry ministers van buitelandse sake van Kenia, Somalië, Suid-Soedan en Uganda vir samesprekings ontmoet het.

Die Amerikaanse vredesending na Oos-Afrika is bekommerd oor die verswakkende toestand in Suid-Soedan en ander lande in die streek.

Die ontmoeting was gefokus op die herstel van die mislukte vredesooreenkoms in Suid-Soedan en verkiesings in Somalië wat voor die deur is.

Suid-Soedan sal intussen ‘n Amerikaanse hulppakket van $138-miljoen ontvang, is voorwaardelik aangekondig.

In ’n verklaring wat voor die besoek deur die Keniaanse presidentskantoor uitgereik is, is verduidelik dat die ontmoeting met Kenyatta op streekveiligheid en stabiliteit sal fokus.

Verkiesings vind volgende maand in Somalië plaas en Burundi beleef sedert April 2015 ’n politieke krisis.

Terrorisme was ook op die agenda, vanweë die bedreiging wat Somalië se Al-Sjabaab-militante vir die streek inhou.

Kerry se vorige besoek aan Kenia in Mei 2015 het die weg gebaan vir ’n besoek van pres. Barack Obama, twee maande later.

Die hoë-profiel Amerikaanse diplomatieke sendings beklemtoon Kenia se belangrikheid as streekvennoot vir Amerika, veral wat sekuriteit betref, en is ook ’n aanduiding dat betrekkinge met Kenia aan die verstewig is.

Dié betrekkinge was vir ’n geruime tyd gespanne terwyl Kenyatta voor die internasionale geregshof vir vermeende misdade teen die mensdom tereggestaan het.

Kerry wil die jaaroue vredesooreenkoms in Suid-Soedan, wat tot dusver nie daarin kon slaag om ’n einde aan die konflik te maak nie, weer laat herleef.

Kerry sal ook na Nigerië reis voordat hy Afrika môre onderweg na Saoedi-Arabië verlaat.

Hy sal samesprekings met President Muhammadu Buhari in Abuja voer. Amerika het sedert Buhari verlede jaar aan bewind gekom het, groter veiligheidsondersteuning aan Nigerië gegee teen die Moslemterreurgroep Boko Haram (foto bo).

Intussen het Libië se regeringsmagte, met die steun van Amerikaanse lugaanvalle, verdere vordering met die herowering van Sirte gemaak, het woordvoerders gesê.

Die magte het die sekuriteitsgebou wat deur die Islamitiese Staat-groep (ISIS) as gevangenis gebruik is, die hof, die Al-Naga-distrik en Dubaistraat herower.

Die nuutste oorwinning is in gevegte Sondag “in die aangesig van desperate weerstand van die djihadiste” behaal, lui ’n verklaring.

ISIS se skerpskutterposisies is in twee Amerikaanse lugaanvalle geneutraliseer en regeringsmagte het, sonder enige verlies in eie geledere, twee motorfopvaltoestelle onskadelik gestel.

Filippynse president roer dwelmnes, VN

Altesaam 1 800 mense is in die Filippyne dood in dwelmverwante optrede, sedert pres. Rodrigo Duterte sewe weke gelede aan bewind gekom en ’n oorlog teen dwelms verklaar het.

Die hoof van die polisie, Ronald Dela Rosa, het gister ’n senaatkomitee meegedeel dat 712 dwelmhandelaars en gebruikers sedert 1 Julie in polisieoperasies dood is.

Die polisie ondersoek ook 1 067 ander dwelmverwante sterftes, het Dela Rosa gesê.

Die opmerkings kom ’n dag nadat Duterte die Verenigde Nasies (VN) aangeval het na hul kritiek oor die vlaag sterftes.

Duterte het Sondag op ’n laatnag mediakonferensie gesê die Filippyne kan die VN verlaat.

Hy het China en ander lande genooi om saam ’n nuwe globale forum te vorm omdat die VN nie geslaag het om sy mandaat uit te voer nie.

Duterte het ook die afdanking elke lid van sy administrasie wat aangestel is deur ‘n vorige president aangekondig.

Die skuif is die jongste in watter Duterte ‘n veldtog teen korrupsie noem.

Trump op die wenpad: ‘Wat de hel het julle om te verloor?’

Donald Trump het Vrydag met swart kiesers geflikflooi en gevra dat hulle vir hom moet stem: “Wat het julle om te verloor?”

“Julle leef in armoede, jul skole is nie goed nie, julle het nie werk nie, 58% van julle jeug is werkloos. Wat de hel het julle om te verloor?”

Volgens Trump het hulle vlugtelinge in hul eie land geword.

Trump het die afgelope week in toesprake na swart Amerikaners uitgereik en gesê dat hy armoede gaan uitwis soos wat die Demokrate dit nie sedert Lyndon B. Johnson kon regkry nie.

Tydens ’n verkiesingsveldtog Donderdagaand in Charlotte, Noord-Carolina, het Trump swart Amerikaners gevra om hom ‘n kans te gee.

“Die uitslag sal wonderlik wees vir hulle,” het hy gesê. “Wat het julle om te verloor as julle iets nuuts probeer?”

Hy het gesê Hillary Clinton en die Demokratiese Party aanvaar swart kiesers as vanselfsprekend en later opgemerk dat Clinton eerder werk aan onwettige immigrante sal gee as aan werklose swart Amerikaners.

Trump het die boodskap in Dimondale, Michigan, ‘n oorwegend wit woonbuurt in Lansing, teen vryemarkhandelsooreenkomste uitgevaar wat werksgeleenthede van plaaslike inwoners wegraap.

Hy het ook Groot Kapitaal vir die ineenstorting van die Amerikaanse vervaardigingsbedryf gekritiseer.

In ‘n tweede termyn, het die Republikeinse kandidaat belowe dat hy 95% van swart kiesers se stemme sal wen.

Hillary geniet grootliks die ondersteuning van swart Amerikaners.

Trump het intussen veranderinge aan sy veldtogbestuur aangebring. Vroeër die dag het Paul Manafort, sy veldtogbestuurder, bedank nadat hy Woensdag die aanstelling van ’n nuwe bestuurder vir sy veldtog om Amerika se president te word, aangekondig het.

Sy gewildheid het weer herstel en hy loop weer voor teen Hillary, het die LA Times berig.

Twee jong Franse op Madagaskar vermoor

Dit is die tweede moordaanslag op wit Franse besoekers sedert die begin van die jaar in Madagaskar.

Die vorige moord was in die middel van Februarie, toe ‘n voormalige Franse matroos, Sylvain Thorin en sy vrou, Marinette, doodgeskiet is deur gewapende inbrekers met Kalashnikovs en pangas.

Sedert Januarie 2015, het tien Franse reeds gewelddadig gesterf op die eiland en in die meeste gevalle is nog geen vordering gemaak in die moordondersoeke nie.

In die jongste gru-voorval is twee jong Franse vrywilligers (22 en 25 onderskeidelik) dood aangetref Sondag op ‘n strand langs die noordooskus van Madasgascar waarskynlik doodgeslaan, het die owerhede gesê.

Die plaaslike burgemeester Bessaou Ismak Ado Crophe het op die eiland Sainte Marie aan AFP gesê beide liggame het tekens van koptrauma getoon, en wetstoepassers vermoed moord.

“Hulle was die aand by ‘n klub en is op die strand daar naby dood aangetref,” het hy gesê.

“Ek het gesien hoe die liggame lyk. Albei het beserings aan die kop gehad.”

Die slagoffers, ‘n jong man en ‘n vrou, was vrywilligers by Cetamada (foto bo), ‘n plaaslike nie-winsgewende omgewingsorganisasie wat poog om die oseaan se soogdiere te beskerm.

Die vrywilligers is meestal gegoede wit Franse jeugdiges.

‘n Ondersoek is van stapel gestuur.

Die Franse ambassadeur op die Indiese Oseaan-eiland asook die konsul sal Maandag besoek bring aan die eiland.

In 2012, is ‘n Franse egpaar dood op ‘n strand in die suide gevind, vermoor deur plaaslike inwoners.

‘n Jaar later, is twee Europeërs aangeval en lewendig verbrand deur ‘n skare op die Noordwes-eiland Nosy Be, nadat hulle verantwoordelik gehou is vir die dood van ‘n kind wat verdrink het.

ISIS kry skuld vir jongste aanslag in Turkye

Turkye se president, Recep Tayyip Erdogan, het die Islamitiese Staat-groep (ISIS) die skuld gegee vir die bomaanval op ’n buitelugviering van ’n troue in die suidooste van die land.

Minstens 50 mense is in die aanval dood en 94 beseer.

Amptenare sê die aanval in Gaziantep, naby die grens met Sirië, was oënskynlik ’n selfmoordbomaanval.

Turkye is die afgelope tyd deur ’n vlaag aanvalle geteister, waarvoor Koerdiese militante met bande met die Koerdiese Werkers Party (PKK) of ISIS die skuld gegee is.

Die jongste aanval kom terwyl die land nog sukkel ná verlede maand se mislukte staatsgreep wat die regering voor die deur van die Amerikaans-gebaseerde Moslem-kerklike Fethullah Gulen en sy aanhangers lê.

Erdogan sê daar is “absoluut geen verskil tussen ISIS, Koerdiese-rebelle en Gulen se beweging nie “omdat al drie terroriste-bewegings is”.

Twee Amerikaanse swemmers kry hul paspoorte terug

Die twee Amerikaanse swemmers wat Woensdagaand deur die Brasiliaanse owerheid van ’n vliegtuig afgehaal is, is toegelaat om huis toe te gaan.

Olimpiese beamptes in Rio de Janeiro sê die polisie wou die swemmers se verklarings afneem oor ‘n beweerde gewapende roof.

Gunnar Bentz en Jack Conger is hul gekonfiskeerde paspoorte teruggegee en het vertrek uit Rio, het die uitvoerende hoof van die Amerikaanse Olimpiese Komitee Scott Blackmun in ‘n verklaring gesê.

James Feigen het ook ‘n verklaring afgelê. Die vierde swemmer is die superster Ryan Lochte, maar hy was reeds tuis toe die opskudding oor hul verklaring gebeur het.

Die saak het wêreldwyd opslae gemaak. Die wenner van die goue medalje, Lochte, het gesê hy en drie ander Amerikaanse swemmers is deur gewapende mans aangehou en beroof wat hulle as polisielede voorgedoen het.

Omdat dit ‘n groot verleentheid vir Brasilië is wat gebuk gaan onder slegte publisiteit en misdaad, is die egtheid van die Amerikaners se weergawe bevraagteken.

Die atlete het by ‘n vulstasie glo ‘n badkamerdeur beskadig en daarna in ‘n onderonsie met veiligheidspersoneel beland.

‘n Argument tussen die atlete en twee gewapende veiligheidsbeamptes het gevolg, en die beamptes het hul wapens uitgepluk en beveel dat die atlete betaal vir die skade.

Nadat die beamptes eers geld ontvang het van die atlete, is die atlete toegelaat om die perseel te verlaat.

Die atlete het daarna die voorval by die polisie as ‘n gewapende roof aangegee.