Internasionale nuus Archives - Page 121 of 464

Australië verskerp anti-immigrasiebeleid

Australië gaan sy immigrasiewette verskerp en toeslaan op groepe wat haat aanhits ingevolge ’n rits teen-terrorisme maatreëls wat gister ingestel is om die bedreiging van plaaslike terrorisme die hoof te bied.

Eerste minister Tony Abbott het die maatreëls in die nadraai van Desember se dodelike aanslag op ’n kafee in Sydney se besige Martin Place plaza, aangekondig, het AP berig.

Man Monis, ’n selfverklaarde geestelike met ’n lang kriminele rekord, het 18 mense in die kafee gyselaar gehou en hulle gedwing om ’n vlag met ’n Islamitiese geloofsverklaring omhoog te hou, terwyl hy geëis het dat ’n vlag van die Islamitiese Staat aan hom voorsien word.

Monis en twee gyselaars is in die aanval dood. ’n Regeringsoorsig na die voorval het geen fout gevind met verskeie agentskappe wat nie agtergekom het Monis is ’n bedreiging nie, ondanks die feit dat hy uit was op borgtog op klagte van seksuele geweld en dat hy ’n medepligtige in ’n moordsaak was.

Abbott het toegegee dat die stelsel self misluk het en het gesê Monis moes nooit toegelaat gewees het om Australië binne te kom nie.

Hy moes ook nie op borgtog vrygelaat gewees het en moes nie toegelaat gewees het om ’n vuurwapen te koop nie.

ISIS-militante het Sondag ‘n dubbele aanslag teen Iran se ambassadeur in Libië van stapel gestuur, het AFP berig. Die aanval het glo die vensters van die ambassade van die Oekraïne in die slag laat bly.

Iran neem deel aan die lugveldtog teen ISIS in Irak.

Poetin vra dat internasionale gemeenskap Krim erken

Die leiers van Frankryk en Duitsland is werklik op soek na ‘n skikking wat sal help om ‘n einde aan die konflik in die ooste van die Oekraïne te bring, het die Russiese president Wladimir Poetin gesê in sy jongste onderhoud.

Tydens ‘n onderhoud met Rossiya 1 TV-kanaal oor die deurbraak van die Minsk-ooreenkoms waarvan die VSA nie deel is nie, het Poetin gesê “Dit lyk vir my [die leiers van Frankryk en Duitsland], het ‘n opregte begeerte om ‘n kompromie te bereik en oplossings te vind wat sal lei tot die uiteindelike skikking [van die konflik] … ”

Hy het verwys na die Minsk-protokol wat die desentralisering van mag in die Oekraïne voorstel.

“Ek het die indruk dat ons vennote meer vertroue in ons het as wantroue, en in elk geval glo in ons opregtheid,” het Poetin gesê.

Poetin het weer die belangrikheid van die implementering van die Minsk-ooreenkoms benadruk wat op 12 Februarie deur die Normandië Vier – Oekraïne, Rusland, Frankryk en Duitsland – gesluit is. “As die Minsk-ooreenkoms geïmplementeer word, is ek seker die situasie sal geleidelik normaliseer,” het hy gesê.

Intussen probeer die VSA die konflik aanwakker waarin duisende burgerlikes reeds omgekom het, deur wapens aan die junta te kanaliseer. Dit is een van die hoofredes waarom die VSA nie na die vredesamesprekinge in Minsk genooi is nie.

Oor die moontlikheid van Rusland wat betrokke raak in ‘n oorlog met die Oekraïne, het Poetin gesê “so ‘n apokaliptiese scenario is skaars moontlik, en ek hoop dit sal nooit gebeur nie.”

Wat die Krim betref, het die president die internasionale gemeenskap versoek om die Russiessprekende streek se keuse om deel van Rusland te wees, te respekteer.

“Met betrekking tot nasionaliteit, het die inwoners van die Krim hul keuse gemaak [toe hulle gestem het om by Rusland aan te sluit] en dit moet gerespekteer word. Rusland kan nie anders optree nie,” het hy gesê.

Oor die juntapresident Poroshenko se stelling dat Kiëf van voornemens is om die Krim te herower, het Poetin het gesê dat sulke optrede “wraaksugtig” is. Hy het beklemtoon dat ‘n groot Europese land soos die Oekraïne moet fokus op “die bevordering van die ekonomie en sosiale sektor, en verhoudings met die suidoostelike deel van die land behoort te herstel.”

Die Oekraïne sê intussen hy gaan nie sy wapens onttrek volgens die besluite van die jongste Minsk-vredesooreenkoms nie, omdat “pro-Russiese rebelle aanhou om die skietstaking te verontagsaam”.

‘n Woordvoerder van die ministerie van verdediging in Kief, Wladislaf Seleznijof sê hulle oorweeg dit nie om swaar wapentuig te verwyder nie. Seleznijof sê die skietstaking moet vir minstens 24 uur gehoorsaam word, voor ‘n onttrekking kan begin.

Die Oekraïense minister van buitelandse sake, Pavel Klimkin het voorts met konsternasie gereageer op voorstelle van ‘n VN- of EU-vredesmag in die wegbreekrepublieke waar regeringsmagte reeds swaar verliese gelei het en honderde van sy soldate gedros het.

Ten minste 8000 mans in die Ivano-Frankivsk-streek wat deur Kiëf opgeroep is vir weermagdiens, is soek, het die nuusportaal Vesti berig. Die meeste het glo na ander lande gevlug om nie weermagdiens te doen nie.

‘n Britse regeringswoordvoerder sê die vredesmagbesluit sal alleen deur die VN se Veiligheidsraad geneem word, maar daar is geen sprake daarvan op dié stadium nie.

Klimkin het gesê hy bevraagteken die “rasionaliteit” van só ‘n besluit en gesê sy regering se versoek om ‘n buitelandse aanvalsmag op die been te bring behoort nie deur die Minsk-ooreenkoms ongedaan gemaak te word nie.

Die Oekraïne het vroeër gesê hy sal Sondag sy wapens begin onttrek, ná ‘n nuwe ooreenkoms met selfverdedigingsmagte en die Russiese weermag gesluit is.

Volgens selfverdedigingsmagte het regeringstroepe egter 29 keer op hulle stellings gevuur in ‘n poging om die skietstilstand tot niet te maak.

Spinnekopsy of klipmosseltande?

Spinnekopsy mag dalk sy aanspraak verloor dat dit die sterkste natuurlike materiaal bekend aan die mensdom is, nadat wetenskaplikes bevind het dat die tande van klipmossels nóg sterker is, het Reuters berig.

Spinnekopsy word hoog geag deur wetenskaplikes op grond van sy krag en struktuur, maar wetenskaplikes in Brittanje het vasgestel dat klipmossels se tande se struktuur só sterk is dat dit met groot welslae nageboots kan word.

Dié soort struktuur kan gebruik word om F1-renvoertuie, bote en vliegtuie te vervaardig.

Die span het die gedetailleerde meganiese gedrag van die tande uit klipmossels met atoomdrukmikroskopie ondersoek, ‘n metode wat gebruik word om materiaal tot op die vlak van die atoom uit te pluis.

Hulle het gevind dat die tande ‘n harde mineraal bekend as goethiet bevat.

Die navorsing is Woensdag in die wetenskaplike joernaal, Interface gepubliseer.

Klipmossels se supertande moet oor rotsoppervlaktes rasper en alge vir voeding afskraap wanneer die gety in is.

Navorsers het ontdek dat die vesel van goethiet net die regte grootte is om ‘n sterk saamgestelde struktuur te bou.

Swart jolytmakers vertrap mekaar na skok

‘n Routydperk van drie dae is in Haïti, die oudste swart republiek, aangekondig nadat jolyt in ‘n nagmerrie ontaard het.

Minstens 16 mense het Dinsdag in Port-au-Prince, die hoofstad van Haiti, omgekom toe ’n man tydens die jaarlikse karnaval bo-op ’n vlot geskok is.

Die sanger van die hip-hop-groep Barikad Crew, Fantom, is geskok deur die oorhoofse kragkabel toe hulle vlot onder dit beweeg het. Verskeie ander mense is ook deur die kragkabel geskok.

Volgens premier Evans Paul het 16 mense gesterf en 78 is beseer. Hy het ook ’n routydperk van drie dae afgekondig.

Hy en pres. Michel Martelly het saam met honderde mense hul medelye op die ongelukstoneel gaan betoon.

Die sanger sal na verwagting oorleef, het een van die dokters wat hom behandel in ’n radio-onderhoud gesê.

Volgens dr. Joel Desire is die meeste van die mense wat gesterf het, egter doodgetrap in die stormloop nadat Fantom geskok is.

Dom linkses snobeer Pegida

Betogings is Maandag in Duitsland deur die anti-Islamitiese Pegida (Patriotiese Europeërs teen die Islamisering van die Weste) gehou.

Die byeenkoms is voor die Kerk van Onse Dame in Dresden waar duisende betogers plakkate met die woorde “tuisland, vryheid, tradisie” omhoog gehou is.

Die betogings word deur superklas in Duitsland veroordeel asook kanselier Angela Merkel wat klaarblyklik vergeet het dat sy voorheen in die openbaar gekla het oor ongebreidelde immigrasie.

Lees meer hier.

Verdagte brief in Kopenhagen gevind na moordaanvalle

Die polisie van Kopenhagen het Maandag gesê dat ’n “verdagte” brief ondersoek word wat in die kultuursentrum gevind is waar Saterdag se Moslemterreuraanval die lewe van een mens geëis het.

Dit is die tweede soortgelyke aanval in Europa, nadat medewerkers van ‘n Franse satiretydskrif Charlie Hebdo in koele bloede in Parys neergevel is deur Moslemaanvallers.

“Ammunisie-deskundiges is uitgeroep na Krudttoenden. Dit is die normale prosedure,” het die Kopenhaagse polisie op Twitter geskryf. Die nuusagentskap, Ritzau, het berig dat die brief boodskappe bevat wat met Saterdag se aanval verbind word.

Die verdagte skieter in die twee aanvalle die naweek is Sondag deur polisie doodgeskiet, maar Kopenhagen is steeds op ’n hoë gereedheidsgrondslag. Twee mense is Maandag aangekeer en word daarvan beskuldig dat hulle die aanvaller gehelp het.

Denemarke steier om sin te maak van die naweek se dodelike aanvalle.

Maandagaand het inwoners vir ’n kerslig-nagwaak byeengekom op die toneel waar die gewapende man losgebrand het op ’n spraakvryheidforum. Die eerste slagoffer was die 55-jarige rolprentmaker, Finn Norgaard, wat tydens die forum se byeenkoms doodgeskiet is. Dieselfde aanvaller het daarna die stad se hoofsinagoge geteiken en die 37-jarige Dan Uzan doodgeskiet.

Die eerste minister, me. Helle Thorning-Schmidt, het by die geleentheid ’n beroep op nasionale eenheid gedoen.

“Vanaand wil ek aan alle Deense Jode sê: Julle is nie alleen nie. ’n Aanval op Jode in Denemarke is ’n aanval op Denemarke, op almal van ons,” het Thorning-Schmidt gesê.

Die Deense parlement het Maandag vir die eerste keer sedert die aanvalle vergader.

Die verdagte in die aanvalle is geïdentifiseer as Omar Abdel Hamid El-Hoessein. Hy het kort voor die skietery op Facebook trou aan die leier van die Islamitiese Staat-groep, Aboe Bakr al-Baghdadi, gesweer.

Amerika se president, Barack Obama, het Maandag sy solidariteit met Denemarke in ’n telefoonoproep aan Thorning-Schmidt betuig. Die twee leiers het ooreengekom om saam te werk om aanvalle op vryheid van uitdrukking asook anti-Semitiese geweld te bekamp, het die Withuis in ’n verklaring gesê.

Die FBI het hulp aangebied aan Deense owerhede met die ondersoek na die moordaanvalle.

Besope regter slaap deur staatsrede

Regter Ruth Bader Ginsburg van die Amerikaanse hooggeregshof het gesê sy het ’n baie goeie rede waarom sy op pres. Barack Obama se staatsrede verlede maand ingedut het: “Ek was nie 100% nugter nie.”

Die 81-jarige Ginsburg het op 20 Januarie op die gesamentlike sessie van die Kongres en die Huis van Verteenwoordigers openlik gesit en slaap, het Reuters berig.

By ’n gespreksbyeenkoms op die kampus van die George Washington-universiteit verlede week, het sy op ’n vraag van die moderator vertel dat ’n paar regters tradisioneel voor die staatsrede vir ’n ete bymekaarkom.

En regter Anthony Kennedy het vanjaar glo “’n uiters gawe Kaliforniese wyntjie, genaamd opus iets” saamgebring.

“Ek het my voorgeneem om vanjaar by die vonkelwater te hou en weg te bly van die wyn. Maar op die ou end was die ete so heerlik, ek moes net wyn ook hê,” het Ginsburg verklaar.

Koue weer vir VSA, warm weer vir Rusland

Besondere koue toestande teister steeds groot dele van Amerika. In die noordoostelike gebiede van die land het Amerikaners deurgeloop onder hul vierde winterstorm die maand.

Die kouefront het na dele in die suide uitgebrei, terwyl die middel-Atlantiese-streek ook deurloop onder die bibberweer.

Boston en die omliggende New England streek het in Februarie reeds ‘n rekord hoeveelheid sneeu gehad. New York het minder sneeu aangeteken, maar Maandag is ‘n maksimum temperatuur van minus twee grade aangeteken.

Duisende vlugte wat opgeskort is sal na verwagting hervat word namate die front oor die oseaan beweeg.

Intussen sê weerkundiges dieselfde ‘pooldraaikolk,’ veroorsaak die koue weer in die VSA sowel as warmer weer in Rusland.

Mense in die sentrale dele van Rusland is verbaas deur warm reënweer wat al die sneeu wegsmelt. Kenners sê die twee teenstrydighede is in werklikheid deel van dieselfde verskynsel.

Inwoners van die VSA en Kanada is verras deur die ysige daling in temperatuur onder minus 30 grade Celsius, terwyl die Russe ook verras is deur die Januarie-weer met temperature in Moskou wat sowat 11 grade bo die gemiddeld is.

SA boos dat Japan apartheid loof

Suid-Afrika het uitgevaar oor ‘n koerantrubriek waarin apartheid geloof word as ‘n model vir Japan se immigrasiebeleid, het Sapa berig.

Die rubriek is geskryf deur Ayako Sono, die premier van Japan se raadgewer oor onderwys. Volgens die koerant Sankei Shimbun het hulle ‘n brief van Mohau Pheko, Suid-Afrika se ambassadeur in Japan, ontvang in protes teen die rubriek.

Sono het geskryf dit is beter vir mense van verskillende rasse om apart te woon. Pheko het gesê Sono se rubriek verdra en verheerlik apartheid en dat dit ‘n skandelike en buitensporige voorstel is. Pheko het verder gesê ‘n segregasiebeleid is ‘n misdaad teen die mensdom en kan nie geregverdig word in die 21ste eeu nie.

Sono het geskryf dit is nodig vir Japan om immigrante te aanvaar, veral om vir die groeiende bejaarde bevolking te sorg, op voorwaarde dat hulle apart van die Japannese leef. “Sedert ek geleer het van die situasie in Suid-Afrika 20 tot 30 jaar terug, glo ek dat wit mense, Asiërs en swart mense apart moet woon.”

Sono het Saterdag aan die koerant gesê sy het nie bedoel om apartheid in Japan te bevorder nie. Die organisasie Africa Japan Forum, wat in Tokio gebaseer is, het Vrydag ook beswaar aangeteken die rubriek en geëis dat daar om verskoning gevra word aan die mense van Suid-Afrika.

Terreuraanval ruk Deense hoofstad

In nog ’n beweerde terreuraanval in die Deense hoofstad Kopenhagen, is twee mense dood en vyf polisiebeamptes in twee verskillende skietvoorvalle beseer wat slegs ure namekaar plaasgevind het.

Die eerste voorval het omstreeks 16:00 Saterdag by die Krudttoenden kultuursentrum plaasgevind en die tweede gister ná middernag by ’n sinagoge .

Dit het vrese na vore gebring van nog ’n terreurvlaag in ’n Europese hoofstad nadat 17 mense in Parys ’n maand gelede vermoor is.

Die polisie kon nie sê of die skietery by die kultuursentrum en voor die sinagoge met mekaar verband hou nie, maar dat dit nie uitgesluit kan word nie.

Twee ure later het die polisie aangekondig dat hulle ’n man by ’n treinstasie doodgeskiet het nadat die man op hulle begin skote vuur het. Hulle ondersoek of die voorval met die ander twee voorvalle verband hou.

Volgens die polisie se verklaring het die skietery plaasgevind nadat hulle ’n adres naby die stasie onder observasie geplaas het. Geen polisielede is in die voorval beseer nie.

Die polisie het ‘n klopjag uitgevoer op ‘n internetkafee naby aan waar die verdagte geskiet is. Hoewel die polisie glo dat hy alleen opgetree het, probeer hulle bepaal of hy enige medepligtiges gehad het

Die Deense polisie het gesê in die eerste voorval het die skieter ’n outomatiese geweer gebruik om deur die vensters van die sentrum te skiet. Tydens die skietery was ’n paneelbespreking oor die vryheid van spraak aan die gang.

’n Man (55) wat die geleentheid bygewoon het, is dood en drie polisielede is beseer. Twee lede het aan die Deense sekuriteitsmaatskappy, PET, gesê die omstandighede van die voorval “dui aan dat ons praat van ’n terreuraanval”.

Die skieter het in ’n gekaapte voertuig van die toneel gevlug. Die voertuig is later ’n paar kilometer van die toneel gevind.

’n Sweedse kunstenaar, Lars Vilks (68), wat al verskeie doodsdreigemente in die gesig moes staar vir spotprente oor die profeet Mohammed, was een van die hoofsprekers by die geleentheid. Die naam van die geleentheid was “Kuns, laster en die vryheid van uitdrukking”. Hy is deur sy lyfwagte weggeneem en het geen beserings opgedoen nie. Vilks het later vir die nuusagentskap AP vertel hy glo hy was die teiken gewees. “Watter ander motief kan daar wees? Dit is moontlik dat dit deur Charlie Hebdo geïnspireer is,” het hy gesê.

Die polisiewoordvoerder, Joergen Skov, het gesê dit is moontlik dat die skieter beplan het om die omstandighede van Charlie Hebdo te herhaal. Nadat die polisie vir ure na die eerste skieter gesoek het, het hulle gerapporteer daar is ’n tweede skietery in ’n ander deel van die stad.

Wadsworth-Hansen het gesê die skieter het skote op twee polisiebeamptes buite ’n sinagoge gevuur. Hulle is in die arms en bene gewond, maar dit is nie lewensgevaarlik nie. ’n Lid van die gemeenskap het wel sy lewe verloor.

Die polisie beskryf die skieter van die eerste voorval as ’n man tussen 25 en 30 jaar oud, atleties gebou en hy het ’n swart outomatiese geweer gehad. Hulle het ’n dowwe foto vrygestel an die verdagte geklee in donker klere en ’n serp wat sy gesig bedek.

Met besoek aan die toneel na die eerste skietery het die Deense premier, Helle Thorning-Schmidt, dit “n politiese aanval en dus ’n terreuraanval” genoem.

Die Franse minister van binnelandse sake, Bernard Cazeneuve, het gister in Kopenhagen geland.

Die polisie in Denemarke het intussen minstens twee verdagtes in hegtenis geneem.

Moslemleiers in Denemarke het intussen die aanvalle veroordeel. Hulle sê die meeste Moslems respekteer die Deense samelewing.