Regering sal Marikana-slagting gedenk

Marikana-slagting
Marikana-slagting

Verskeie geleenthede om die Marikana-slagting te gedenk word beplan deur die regering, geaffekteerde gemeenskappe, mynmaatskappye en vakbonde, het die nasionale kommissaris van polisie Riah Phiyega gesê.

“Ek vra dat ons ernstig bid vir die familie, vriende en kollegas van die sekuriteitswagte, polisiebeamptes, werkers en vakbondamptenare wat hul lewens verloor het.

“Baie van diegene wat geraak word deur die tragedie is nog steeds hartseer. Sommige is nog steeds kwaad as ‘n gevolg van hul verlies,” het sy gesê in ‘n voorbereide toespraak.

“Ek voel die pyn wat hulle ervaar … Ek leer om vrede te maak met dit.“

Sy het Suid-Afrikaners gevra om die tragedie verantwoordelik en sensitief te onthou en gesê sy wil die kloof tussen die polisie en die gemeenskap herstel, veral in die platinumstreek.

Phiyega het gister by ‘n kerkdiens in Langa wat deur lede van die SA Metodiste Kerk gehou is in die Kaapse Skiereiland gesê sy hoop daar is nie verdere vertragings met die ondersoek nie.

Sy sê daar sal waarskynlik baie lesse te leer wees uit die bevindings van die kommissie.

Die kommissie is verlede jaar aangestel ná 44 mense by die Lonmin myn in Marikana dood is tydens ‘n onbeskermde staking.

Die sittings van die kommissie is etlike kere vertraag weens onder meer probleme met die befondsing van mynwerkers se regsverteenwoordigers. – RSG/Sowetan

Opstande eis lewe van een in Fochville

Oproeriges in Kokosi, Fochville
Oproeriges in Kokosi, Fochville

Sowat 26 oproeriges van Kokosi by Fochville aan die verre Wes-Rand verskyn vandag in die landdroshof op die dorp op aanklagte wat verband hou met openbare geweld.

Een persoon is dood tydens die opstande. Drie huise wat aan ANC-raadslede behoort én winkels wat deur buitelanders bedryf word, is geplunder en aangeval.

Die sekretaris-generaal van die ANC in Gauteng, David Makhura, het by ‘n verkiesingsveldtog vir jeugvrywilligers gesê die inwoners van Fochville word mislei en vir gewelddadige protesaksies gewerf.

Tientalle inwoners van die Kokosi township is reeds vroeër op ‘n waarskuwing vrygelaat nadat hulle in hegtenis geneem is op aanklagte van openbare geweld. Die geweld teen buitelanders, asook ANC-raadslede duur reeds ‘n week.

Die persoon wat doodgeskiet is, was op die dak van ‘n spazawinkel toe hy getref is. Die inwoners is glo ontevrede oor die gebrek aan behuising.

Twee en twintig inwoners van Protea-suid in Soweto verskyn ook vandag in die Protea-landdroshof op aanklagte van openbare geweld.

Geweld het die naweek weer opgevlam en skermutselings het voorgekom tussen inwoners en lede van die polisie.

Paaie is met klippe en brandende buitebande versper en verkeersligte is beskadig. Inwoners is ontevrede oor gebrekkige dienslewering in die gebied. Die betogings het Donderdag begin.

Lede van Julius Malema se EFF-party is deur Protea-suid se inwoners verjaag toe hulle in Soweto opgedaag het. Malema het vroeër aan betogers op Fochville aan die verre Wes-Rand gesê om te veg vir grond.

EWN berig egter dat sekere inwoners wel Malema se teenwoordigheid daar ondersteun het.

Die polisie het begin om strate in Protea-suid skoon te maak waarop klippe ná die oproer gegooi is. Motoriste is aangeraai om die gebied te vermy.

Intussen, het ‘n ANC-raadslid in Johannesburg verantwoordelik vir Behuising, Dan Bovu, gesê hy sal eersdaags ‘n vergadering met die inwoners belê te midde van gewelddadige betogings oor dienslewering.

Die vergadering sal die inwoners se vraag na elektrisiteit te bespreek, onder andere. Bovu sê daar is ook planne om die inwoners te hervestig.

“Protea-Suid kan nie ontwikkel word nie. Jy sal daarvan bewus wees dat Gauteng probeer het om die plek te ontwikkel, maar Geowetenskap sê dat jy nie daardie plek kan ontwikkel nie. Ja, daar is planne om mense van die Protea-Suid te hervestig.“

Chris Hani-rylaan en talle ander strate het deurgeloop onder die verwoesting. – RSG/EWN

Twee verdrinkings tydens langnaweek

Tafelbaai
Tafelbaai

‘n Man is dood nadat sy voertuig van die oostelike landingshoof by die V & A Waterfront in Tafelbaaihawe in Kaapstad afgeloop het.

‘n Woordvoerder van die Nasionale Seereddingsinstituut, Craig Lambinon, sê die passasier kon dit regkry om uit die voertuig te ontsnap en self aan wal te gaan.

‘n Werker in die gebied het in die water gespring en die voertuig se ruit gebreek. Volgens inligting word die bakkie vir instandhouding aangewend.

Lambinon sê die werker het dit reggekry om die bestuurder te bevry, maar hy is deur nooddienswerkers op die toneel dood verklaar. Die passasier word vir skok behandel.

Die liggaam van nog ‘n man is uit die see naby Wildernis in die Suid-Kaap gehaal. Lambinon, sê vrywillige seereddingspanne het ‘n soektog na die man begin na berigte dat vissermanne van Ballotsbaai ‘n liggaam op die rotse gesien het.

Hy sê die reddingsvaartuig kon weens onstuimige seetoestande nie die liggaam bereik nie. Die hulp van ‘n helikopter is toe ingeroep. – RSG

Boendoegeregtigheid: beweerde inbreker in KZN gedood

Boendoeteregstelling
Boendoeteregstelling

Vier mense is in hegtenis geneem vir die beweerde moord vanoggend op ‘n vermoedelike inbreker in Panorama-tuine, Pietermaritzburg, sê die polisie van Kwazulu-Natal.

‘n 27-jarige man is met veelvuldige beserings is in ‘n afloop gevind waar hy blykbaar gepoog het om by ‘n huis in die buurt in te breek, sê kolonel Jay Naicker.

“Ons doen ‘n beroep op lede van die publiek om enige misdaadbedrywigheid aan die polisie te rapporteer en die gereg toe te laat om sy gang te gaan.”

Die vier sal binnekort in die Pietermaritzburgse Landdroshof verskyn. – Sapa

DA kies swart kandidaat vir Gautengse premierspos

Zille en Maimane
Zille en Maimane

Die Demokratiese Alliansie (DA) het ‘n swart kandidaat bó ‘n Joodse een gekies om stemme in Gauteng te trek in die komende verkiesing. DA-ondersteuners was nie verbaas deur die keuse van ‘n swart kandidaat nie, en het die stap verwelkom.

Die party het sy nasionale woordvoerder Mmusi Maimane toevertrou met die kandidatuur vir die Premierskap van Gauteng. Hy het teen mede–DA-lid en Gauteng koukus-leier, Jack Bloom, gestaan.

Die party se Kelly Miller sê hulle het baie vertroue in hul gekose kandidaat.

“Ons is vol vertroue dat ons hierdie provinsie kan wen in die 2014-verkiesing en ons glo hy gaan ‘n ongelooflike taak verrig.“

Maimane het gesê hy beplan om die kwessies rondom Gauteng se e–tolstelsel as die DA se kandidaat vir premier van die provinsie aan te spreek.

“Ons het ‘n regering nodig wat bevoeg is, wat dienste lewer en korrupsie beveg. Ons sal die kwessies van tol aanspreek en klein besighede in Gauteng laat floreer.“

Polisie waarsku dat Soweto-onluste motoriste bedreig

proteaprotestBetogers in die suide van Johannesburg, is steeds besig om amok te saai en verbygaande motoriste op die N12 onder klippe te steek.

Motoriste is gevra om paaie in Protea-Suid in Soweto te vermy waar ontevrede plakkers hul protesoptrede van die afgelope paar dae oor dienslewering voortsit.

Die verkeer word herlei nadat inwoners deurpaaie met brandende bande en klippe versper het.

Ten minste 23 mense is vroeër in hegtenis geneem vir die afgelope paar dae se onrus toe Chris Hani-weg, die N12 aansluiting en nog paaie in die omgewing versper is.

‘n Woordvoerder vir die Johannesburgse Metropolisie, Wayne Minnaar het bevestig dat inwoners voertuie in die gebied met klippe bestook. Hy het gevra dat motoriste alternatiewe roetes gebruik.

Olie lek uit gestrande vragskip naby Goukamma

Die gestrande Kiani Satu
Die gestrande Kiani Satu

Olie het begin uitlek uit die gestrande vragskip van 156m naby Buffelsbaai in die Suid-Kaap, wat die gevaar van ‘n omgewingsramp aan die kus verhoog.

Twee van die 19 bemanningslede aanboord is lig beseer toe ongeluk gebeur het. Die seelui is afkomstig uit die Fillipyne en Oekraïene en is per helikopter van die vaartuig gered.

‘n Woordvoerder van SANParke het die situasie as ernstig bestempel. Die skip is in die Goukamma Natuurreservaatomgewing gestrand en die uitlek van olie bedreig dié seebewaringsgebied.

Pogings sou vroeër aangewend word om die skip, wat tonne rys en olie aan boord het, weer vlot te maak, maar die huidige situasie kan planne verander.

Swaar toerusting om met die bergingsoperasie te help, het gister op die toneel aangekom.

Die Kiani Satu het Woensdag laat in onstuimige see meganiese probleme begin ondervind.

Wit ANC-lid ontvang doodsdreigemente oor Pule se skuldigbevinding

Dina Pule
Dina Pule

Die voorsitter van die parlement se etiekkomitee en verbete wit ANC-lid, Ben Turok het doodsdreigemente ontvang, ná die komitee die voormalige minister van Kommunikasie, Dina Pule daaraan skuldig bevind het aan oortredings van parlementêre reëls.

Pule het doelbewus leuens aan die parlement vertel het oor haar finansiële belange. Turok het daarna aan die media laat blyk dat Pule nie swaar genoeg gestraf is nie.

Die parlementêre etiese komitee het bevind dat Pule nie die sakebelange van haar minnaar verklaar het nie. Hy het geldelike voordeel getrek uit die borgskap van verlede jaar se inligtingstegnologie-indaba van haar departement in Kaapstad.

Turok sê die dreigemente is reeds by die minister van Polisie, Nathi Mthetwa en die polisiekommissaris, Riah Phiyega aangemeld. Max Sisulu, die Speaker is ook ingelig.

Turok sê hy is gewaarsku om nie in die parlement te eet nie omdat die kos vergiftig kan wees, en ook om nie alleen rond te beweeg nie.

Hy word tans deur twee lyfwagte van die BBP-beskermingseenheid oral vergesel.

Volgens Turok, was Pule se vennoot en minnaar, sakeman Phosane Mngqibisa vergesel deur ‘n lyfwag na een van die vroeë verhore.

Hoewel die lyfwag buite die kamer waar die verhore plaasgevind het gewag het, was sy blote teenwoordigheid teen parlementêre protokol, het Turok gesê.

“Ek was vertel hy was die lyfwag van ‘n getuie, mnr Mngqibisa.” Turok het gesê dit was duidelik daar Pule en haar kêrel hom wou intimideer.

“Ons was ongelukkig daaroor, maar ons was so besig met die ondersoek dat ons nie dit opgevolg het nie,” sê Turok. “Daar was iets onsmaakliks oor die hele ding.“

LUR verdink top politici, polisie van bendebetrokkenheid

Dan Plato
Dan Plato

Die Wes-Kaapse LUR vir Gemeenskapsveiligheid, Dan Plato, het ‘n herrie laat losbars oor ‘n plofbare beëdigde verklaring deur ‘n selferkende bendeboef.

Dit kom nadat die Weekend Argus met Pierre Wyngaardt, die man agter die beëdigde verklaring gesels het. Hy beweer senior ANC-lede en top polisiebeamptes is in dwelmhandel, geldwassery, OTM-bomaanvalle en korrupsie, betrokke.

Wyngaardt het gesê hy is ‘n “profeet” met ‘n “spesiale geestelike vermoëns”, wat deur die engele gelei is om by ‘n internasionale NGO sy omstrede verklaring te gaan maak.

Hy beweer die polisiehoof, generaal-majoor Jeremy Vearey, ANC provinsiale voorsitter en adjunk-minister van internasionale betrekkinge en samewerking Marius Fransman, en Max Ozinsky, ANC-LPW, is betrokke by kriminele aktiwiteite van die Wes-Kaapse bendes.

Plato het besluit om Wyngaardt se inligting aan die Openbare Beskermer te oorhandig.

Wyngaardt beweer hy het die eerste keer sy beëdigde verklaring na Zille se kantoor geneem.

Intussen het Vearey Plato beskuldig van wat hy noem “wilde vergesogte bewerings” vervat in die beëdigde verklaring.

‘n Woedende Vearey sê die LUR glo nie alleen nie, maar versprei ook ‘n “Alice in Wonderland-sprokie” saamgeflans deur ‘n “skynbaar mal man”.

Vearey het gesê dit is nie verbasend nie dat die NVG-hoof Rodney de Kock die bron van die bewerings as ‘n getuie beskou wat ‘n tekort aan geloofwaardigheid het, en wie se weergawe nie bevestig kan word in enige opsig nie.

Hy het ook gewaarsku teen die “politieke dorpsidiote wat betrokke is in die aanval op my reputasie”, wat hy beweer persoonlik is.

“Ek sien nie enige ander rasionele rede hiervoor nie, behalwe politieke vooroordeel rondom my (ANC) verlede. Ek maak geen verskoning vir my verlede nie.” – IOL

Kommer oor Stad Kaapstad se buitensporige salarisverhogings

Burgemeester De Lille
Burgemeester De Lille

Daar heers kommer oor die buitensporige las wat salarisse op die begroting van die Stad Kaapstad plaas. Salarisse beloop tans sowat ‘n derde van die stad se begroting en daarbenewens is ‘n gemiddelde salarisverhoging van 6.84% nou ook goedgekeur, sê mnr. André Fourie, Vryheidsfront Plus-raadslid vir Kaapstad.

Volgens mnr. Fourie is die besluit om salarisse te verhoog tydens ‘n raadsvergadering op 31 Julie (verlede maand) geneem.

Hy sê die Vryheidsfront Plus verwelkom daarom die realistiese erkenning van mnr. Ian Nielson, Kaapstad se onderburgemeester en burgemeesterskomiteelid vir finansies, dat die kwessie van salarisse ‘ernstige gevaarligte’ laat flikker.

“Niemand wil amptenare, veral dié wat ‘n swaar las dra en briljant presteer, salarisverhogings ontsê nie. Dit is egter jammer dat die aanbevelings vir die verhogings vir die stadsbestuurder en uitvoerende direkteure noem dit word gedoen om salarisse ‘markverwant’ te hou.

“Munisipale amptenare regdeur Suid-Afrika en nie net in Kaapstad nie, verdien 30% tot 40% meer as hul eweknieë in die private sektor en dit maak so ‘n stelling absurd. Dit is harde feite wat nie weggepraat kan word nie,” sê mnr. Fourie.

Volgens mnr. Fourie sal SALGA (die vereniging vir plaaslike regerings) net soos ander vakverbonde wat onrealistiese looneise najaag, harder aangepraat moet word oor sy roekelose, blatante en voorskriftelike aanbevelings wat net so op alle stadsraads-amptenare en deur die Stad Kaapstad nagevolg en toegepas word.

Hierdie aanbevelings word voorgelê terwyl die Stad en sy amptenare geen simpatie het met Jan en Alleman wat swoeg om te oorleef nie.

“Daar is by duisende pensioentrekkers, gemiddelde werknemers en andere geen hoop om naby ‘n jaarlikse 6.84%-verhoging te kom nie maar hul belastings in Kaapstad het gemiddeld met meer as 100% gestyg oor die laaste ses jaar.

“Daar is stede in Amerika wat bankrot raak en die gevaar loop om bankrot te raak en die Britte het vir ‘n paar jaar reeds ‘n moratorium op munisipale begrotingsverhogings geplaas. Ons kan in hierdie opsig nie bekostig om oorgerus te raak nie,” sê Mnr. Fourie.