Nasionale Seereddingsinstituut

Seuntjie se lyk in dam opgespoor

Die lyk van ’n kleuter wat Sondag in Hartebeespoortdam geslingers is toe ’n rubber-boot omgeslaan het, is deur polisie duikers gevind.

Noordwes-polisiewoordvoerder Sabata Mokgwabone, sê Zandré Vosloo se liggaam is Maandag met behulp van ‘n snuffelhond opgespoor. Hy het gesê die kind se liggaam is deur ‘n polisiesnuffelhond, wat deur ‘n beampte van die duikeenheid in Rustenburg hanteer is, opgespoor vier uur nadat die soektog om 07:00 hervat is. Zandré sou volgende maand sy tweede verjaardag gevier het. ‘n Geregtelike doodsondersoek is geopen.

Nasionale seereddingsinstituut-woordvoerder, Craig Lambinon, het vroeër aan OFM-nuus gesê dat ’n Pretoria-Noord gesin van ses op ’n vriend se boot was toe dit naby die Eagle Waters-oord omgeslaan het, nadat hulle ’n skerp draai gemaak het.

Die kaptein, pa, ma en hul twee kinders, ’n 18-maande-oue dogter en hul seun, was op die boot. Mokgwabone sê die ondersoek na die voorval duur voort.

Drie tieners verdrink by Knysna

Drie tieners is in die hospitaal oorlede nadat hulle by Leisure Island op Knysna in die Suid-Kaap verdrink het.

Die drie is deur die see meegesleur, terwyl ‘n vierde kind oorleef het.

‘n Woordvoerder van die Nasionale Seereddingsinstituut, Craig Lambinon, het bevestig dat ‘n vierde meisie oorleef het.

Hy sê die NSRI kon daarin slaag om die drie uit die water te haal en hulle op die toneel behandel met mond-tot-mondasemhaling.

Hulle is daarna na die hospitaal gehaas, maar ten spyte van voortgesette noodbehandeling is die drie dood verklaar.

Lambinon sê daar word vermoed dat hulle in vlakwater deur seestrome meegesleur is.

Die munisipaliteit van Knysna het hulle skok uitgespreek oor die dood van drie kinders in ‘n trekstroom.

Hulle was glo tussen tien en dertien jaar oud en is in die plaaslike hospitaal dood.

Die nasionale seereddingsinstituut die vierde kind het ongedeerd uit die water gestap.

Hul name is nie bekendgemaak nie.

Twee verdrinkings tydens langnaweek

‘n Man is dood nadat sy voertuig van die oostelike landingshoof by die V & A Waterfront in Tafelbaaihawe in Kaapstad afgeloop het.

‘n Woordvoerder van die Nasionale Seereddingsinstituut, Craig Lambinon, sê die passasier kon dit regkry om uit die voertuig te ontsnap en self aan wal te gaan.

‘n Werker in die gebied het in die water gespring en die voertuig se ruit gebreek. Volgens inligting word die bakkie vir instandhouding aangewend.

Lambinon sê die werker het dit reggekry om die bestuurder te bevry, maar hy is deur nooddienswerkers op die toneel dood verklaar. Die passasier word vir skok behandel.

Die liggaam van nog ‘n man is uit die see naby Wildernis in die Suid-Kaap gehaal. Lambinon, sê vrywillige seereddingspanne het ‘n soektog na die man begin na berigte dat vissermanne van Ballotsbaai ‘n liggaam op die rotse gesien het.

Hy sê die reddingsvaartuig kon weens onstuimige seetoestande nie die liggaam bereik nie. Die hulp van ‘n helikopter is toe ingeroep. – RSG