Kategorie: Nuus

Egipte: Sky-kameraman doodgeskiet in uitgebreide geweld

egiptegeweldOproer en gewelddadige skermutselinge is oornag en Donderdagoggend regoor Egipte aangemeld nadat ‘n noodtoestand in die land afgekondig is.

Ondersteuners van die afgesette pres. Mohamed Morsi het met woede gereageer nadat die weermag vroeër op ‘n groep Morsi-ondersteuners toegeslaan het.
Morsi se Moslem-Broederskap het op sy webwerf gesê opstande is in Alexandrië en twee ander noordelike provinsies aangemeld. Egiptiese polisie- en weermaglede is oornag in die hoofstad, Kaïro en ander stede en provinsies ontplooi om ‘n aandklokmaatreël af te dwing.
Die ministerie van gesondheid in die land sê 278 mense is dood en baie meer beseer in Woensdag se klopjagte in Kaïro om pro-Morsi-ondersteuners uiteen te jaag. Die Broederskap het egter gesê 2 600 mense is dood.
‘n Veteraan Sky News kameraman is doodgeskiet terwyl hy oor die geweld in Kaïro verslag gedoen het, het die uitsaaier gesê.

Mick Deane (61) het 15 jaar vir Sky gewerk. Hy was getroud met twee seuns. Deane – wat gebore is in Hannover, Duitsland – was deel van Sky News se span wat oor die opstande saam met die Midde-Ooste korrespondent Sam Kiley berig het. Nie een van die ander spanlede seergekry het, het die uitsaaier gesê.

Egipte se nasionale Midde-Ooste-Nuusagentskap berig dat duisende Morsi-ondersteuners ook buite ‘n moskee in oostelike Kaïro byeengekom het.
Morsi-ondersteuners het ook polisiekantore in verskeie dele van die land aangeval.
Vader Rafic Greiche, woordvoerder van die Egiptiese Katolieke kerk, het gesê 17 kerke is Woensdag aangeval en afgebrand.
Intussen het Egipte se tussentydse adjunkpresident, Mohamed el Baradei, Woensdag bedank.
In ‘n bedankingsbrief aan die tussentydse president, Adly Mansour, het el Baradei gesê “die bevoordeeldes van wat vandag gebeur het, is diegene wat vra vir geweld, terrorisme en die mees ekstreme groepe.
“Soos julle weet, het ek gesien daar is vreedsame maniere om die botsing in die samelewing te beëindig, daar was voorgestelde een aanvaarbare oplossings vir nuwe maniere wat ons tot ‘n nasionale konsensus sou neem,” het hy geskryf.
“Dit het moeilik geword vir my om die verantwoordelikheid te dra vir besluite waarmee ek nie saamstem nie en wat gevolge het wat ek vrees. Ek kan nie verantwoordelikheid aanvaar vir een druppel bloed nie.” – AFP/BBC

Terugkeer van rassekwotas ‘betreurenswaardig’ sê VF+

Hoskins
Hoskins

Rassekwotas in rugby en sport in die algemeen is ‘n stap agteruit en is onversoenbaar met ‘n aktiwiteit waar deelnemers uitsluitlik na uitnemendheid streef om die hoogste vlak van deelname op meriete te bereik, het ‘n VF+ se woordvoerder gesê

Adv. Anton Alberts sê die besluit van die Suid-Afrikaanse Rugby-Unie (SARU) dat spanne in die Vodacombeker-rugbyreeks aanstaande jaar ten minste sewe spelers in hul groep van 22 moet hê, is ‘betreurenswaardig’ en ‘onversoenbaar met sport’.

“Hierdie besluit is onverstaanbaar aangesien daar in die onlangse verlede die versekering gegee is dat kwotas nie meer toegepas sal word nie.

“Sport ontwikkel van ‘n lae ouderdom af, en vir twee dekades al is daar niks wat jong sportlui daarvan weerhou om vryelik deel te neem en in hul sport te presteer nie.

“Nou word rassekwotas skielik weer van bo toegepas. Soos voorheen sal dit onnodig alle spelers van kleur onder verdenking plaas en hul selfvertroue ondermyn aangesien die stigma van ‘n sogenaamde kwotaspeler hierdeur geskep word.

“Die Vryheidsfront Plus is van mening dat dit bloot deel is van die ANC se groot transformasieplan om die samelewing kunsmatig te integreer sonder om die diversiteit van die land en sy mense in ag te neem,” sê adv. Alberts.

Volgens adv. Alberts kan die Super 15-rugbyspan van die Southern Kings as voorbeeld geneem word waar geforseerde transformasie misluk het soverre dit blootstelling en ontwikkeling van spelers van kleur aanbetref.

Daarbenewens het dit een van die oudste unies in die land, die Lions, die geleentheid ontsê om aan die reeks deel te neem, wat ‘n bewys is hoe ondeurdag besluite oor sport op die hoogste vlak is.

“Die VF Plus volstaan met sy standpunt dat rassekwotas op die sportveld nie toegelaat moet word nie en dat sportmanskap en meriete, en nie kwotas nie, die enigste vereistes moet wees wanneer spelers op die veld draf,” sê adv. Alberts.

Veertien skole sluit weens bendegeweld in Kaapstad

manenbergVeertien skole in Manenberg, Kaapstad, sal gesluit word vir die volgende twee dae as gevolg van bendegewelddreigemente, het die LUR vir onderwys, Donald Grant, gesê.

“Ongelukkig word die veiligheid van ons leerders en opvoeders voortdurend bedreig in Manenberg. Sommige van ons opvoeders het na berig word by [die] sentrale dienskantoor vir diens aangemeld in plaas van hul skole,” het hy in ‘n verklaring gesê.

Grant het gesê die besluit om die skole te sluit is na aanleiding van advies van onderwysers.

Provinsiale regeringsleiers sal Donderdag met ‘n verteenwoordigende groep van hierdie onderwysers ‘n pad vorentoe bespreek.

Grant het gesê sy departement ‘n groot deel van die hulpbronne en ondersteuning aan Manenberg gegee sedert die uitbreek van die bendegeweld.

“Die departement het alles in sy vermoë gedoen om leerders en onderwysers te beskerm in die skool, maar dit kan ongelukkig nie vrede en veiligheid in die gemeenskap verseker nie,” het hy gesê.

“Ons beamptes en opvoeders is nie wetstoepassers nie. Wetstoepassing is die verantwoordelikheid van die Suid-Afrikaanse Polisiediens.”.

Grant het gesê skole en die departement het staatgemaak op die polisie om orde te handhaaf. – Sapa

Johannesburg een van goedkoopste stede

johannesburgJohannesburg is een van die goedkoopste stede in die wêreld, het ‘n studie deur die Switserse Welvaart-bestuursmaatskappy, UBS bevind.

Volgens dié studie wat in 2012 gedoen is en waarin talle items se pryse en inkomstevlakke tussen beroepe in 72 stede wêreldwyd met mekaar vergelyk is, is ook bevind dat Oslo en Zürich die twee duurste stede is om in te bly en Johannesburg die 16de goedkoopste.

Die studie het ook bevind dat dit goedkoper is om in Kuala Lumpur en Moembaai te woon. ‘n Persoon in Johannesburg moet gemiddeld tien minute lank werk om 1 kg brood te bekostig – teenoor 13 minute in New York, 19 minute in Stockholm en 70 minute in Manilla. – Vryburger

Pakistanse beleggers wil One Time koop

1time‘n Groep Pakistanse beleggers wat in Suid-Afrika woon, het R15 miljoen aangebied aan OneTime Holdings om die genoteerde maatskappy te koop.

Pak Africa Aviation sê hulle beplan om die lugdiens weer in bedryf te stel met ‘n streeksdiens wat in Harare in Zimbabwe gesetel sal wees.

Die maatskappy het sy sakeplan aan die JSE oorhandig.

In beginsel het die sakeplan die steun van OneTime se raad en aandeelhouers wat ongeveer 60% van die lugdiens se aandele besit.

Die nuwe bieërs wie se hoofkantoor in Sandton in Johannesburg is, het gevestigde belange in Afrika-lande en in sektore soos kleinhandel, finansiële dienste en vervaardiging. – RSG

Bekende Afrikanerargitek oorlede

libertas
‘n Skaalmodel van Libertas

Die Afrikanerargitek dr. Irma Vermeulen (89) is Sondag in Pretoria oorlede.

Vermeulen was die dogter van Gerhard Moerdyk wat onder meer die Voortrekkermonument asook die presidentswoning Libertas en die indrukwekkende NG-Kerk Pretoria-Oos ontwerp het.

Libertas staan deesdae bekend as Mahlamba ndlopfu.

’n Gedenkdiens vir die ontslape pionier sal Vrydag 11:00 vanuit die NG kerk Pretoria-Oos gehou word.

Vermeulen het ’n doktorsgraad in stadsbeplanning verwerf en aan die Universiteit van die Vrystaat doseer.

Man en monument, ’n biografie oor haar beroemde vader, tesame met verskeie ander vakwerke, het uit haar pen verskyn.

Sy word oorleef deur vier kinders, ses kleinkinders en een agterkleinkind.

Byna tweederdes ry sonder motorversekering

motorsAl hoe meer Suid-Afrikaners kanselleer hul motorversekering na aanleiding van die hoër brandstofprys.

‘n Versekeringskenner, Christelle Fourie waarsku egter dat dit nie wys is nie, aangesien ‘n motor een van die grootste bates is wat ‘n mens besit.

Sy sê mense moet eerder probeer om hul premies te verlaag.

Na haar raming is meer as 70 persent van die motors op Suid-Afrikaanse paaie sonder versekering. – RSG

Kerry spook om vredesproses op koers te hou

vredemoDie Amerikaanse Minister van Buitelandse Sake, John Kerry sê hy het ‘n openhartige gesprek met die Israelse eerste minister, Benjamin Netanyahu gehad oor nuwe omstredenheid rakende Israelse vestings.

Kerry is werp alles in die stryd om sy inisiatief vir vrede in die Midde-Ooste op koers te hou.

Samesprekings word vandag in Jerusalem hervat. Kerry sê hy glo ook dat die Palestynse president, Mahmoud Abbas die samesprekings wil laat voortduur.

Sommige Palestyne het ‘n oproep gedoen om die onderhandelinge te boikot, nadat Israel planne bekendgemaak het om meer as 3 000 huise aan die Wesoewer en in Oos-Jerusalem te bou.

Kerry het benadruk dat Amerika dié planne as onwettig beskou. – RSG

Nege polisie sleepdood-verdagtes kry borg

sleepdoodDie nege polisiebeamptes wat van die moord op die Mosambiekse taxibestuurder Mido Macia beskuldig word, het Dinsdag in die Benoni-landdroshof borgtog gekry.

Die nege beamptes het weer om borg aansoek gedoen nadat hul regsverteenwoordigers aan die hof gesê hulle beskik oor nuwe bewyse. Die hof het vroeër borgtog aan die beamptes geweier.

Macia is op 26 Februarie aan ’n polisievoertuig vasgebind en in ’n straat in Daveyton aan die Oos-Rand gesleep. Hy het ure later in polisie-aanhouding gesterf.

‘n Selfoon-video-opname is van die insident gemaak.

Die beskuldigdes is Meshack Malele (45), Thamsanqa Ncema (35), Percy Mnisi (26), Bongumusa Mdluli (25), Sipho Ngobeni (30), Lungisa Ewababa (31), Bongani Kolisi (27), Linda Sololo (56) en Motome Walter Ramatlou (37). – Sapa

Drie plaasaanvallers vas

newcastleDrie mans wat van die moord op ’n boer van Newcastle beskuldig word, is Dinsdagoggend in hegtenis geneem, het die polisie in KwaZulu-Natal gesê.

Kol. Vincent Mdunge, polisiewoordvoerder, het gesê die mans sal Woensdag in die Newcastle-landdroshof verskyn.

Die drie staan tereg op aanklagte van moord, huisbraak, diefstal en die besit van ’n ongelisensieerde vuurwapen en ammunisie.

Die 44-jarige Timothy Green is Sondagaand op sy plaas doodgeskiet. – Sapa