Twee vrouens en twee mans is gister by ‘n vermaaklikheidspark aan Australië se gewilde Gold Coast dood.
Ooggetuies het beskryf hoe mense geskree het toe ‘n vaartuig op een van die waterritte omgeslaan het.
Queensland se polisie sê die vier slagoffers is op die “Thunder River Rapids”-rit by die Dreamworld park dood.
Australië se eerste minister, Malcolm Turnbull, het sy meegevoel aan hul families getuig en gesê hulle is in sy gebede oor die “baie, baie hartseer en tragiese gebeurtenis”.
Video’s wat ‘n Britse bankier gemaak het van die marteling en gewelddadige dood van twee Indonesiese vroue wat hy na bewering vermoor het, sal vir ‘n jurie vertoon word.
‘n Regter het Maandag in ‘n hof in Hongkong gelas dat die jurie daarna kyk nadat Rurik Jutting se verhoor begin het.
Jutting het vir Bank of America Corp gewerk.
Jutting (31), wat aan die Universiteit van Cambridge gestudeer en skoolgegaan het aan Winchester College, een van die prestigerykste private skole in Brittanje, ontken skuld op klagte van moord op grond van verminderde aanspreeklikheid.
Hy beken skuld op klagte van manslag.
Hy is twee jaar gelede in hegtenis geneem nadat twee lyke in sy luukse woonstel gevind is.
Jutting het verskeie opnames van die moord gemaak. In een kan gesien word hoe die eerste slagoffer doodgemaak word en in ‘n ander praat hy oor sy planne vir die tweede slagoffer, lui die klagstaat.
Die polisie het die lyke van Sumarti Ningsih (23) en Seneng Mujiasih (26) in Oktober 2014 in sy woonstel gevind. Albei se kele was afgesny.
Lees verder.
Beserings tydens mynongelukke het van meer as 2 600 tot meer as 3000 gestyg. Suid-Afrika is die tuiste van diepste myne ter wêreld waar werkers tot 4 km onder die oppervlak werk.
Die sterftesyfer wat deur mynongelukke in die land veroorsaak word, het ‘n afname verlede jaar getoon.
Dit is volgens die jaarverslag van die Nasionale Departement van Mynwese. Volgens die departement het altesaam 79 mynwerkers hulle lewens tydens die 2015/2016 boekjaar verloor, teenoor 71 in die vorige boekjaar.
In Januarie 2015 tot Desember 2015 kan daar ‘n afname waargeneem word. Die verslag dui daarop dat beserings tydens mynongelukke egter van meer as 2 600 tot meer as 3000 gestyg het.
Die departement sê herhaalde ongelukke by myne het daartoe gelei dat veiligheid- en gesondheidsinspeksies by myne drasties moes toeneem.
Statistieke wys dat goud- en platinummyne tot die meeste ongelukke in die land bydra, en die departement het hernude kommer oor die stand van mynveiligheid in die land uitgespreek.
Platinum kan nie veilig bestuur word nie omdat die myne baie diep is, met ‘n baie smal some, wat geologies onstabiel is, sê BHP se woordvoerder Ruban Yogarajah.
Die regering is bekommerd oor veiligheidsinspeksies, maar die bedryf sê inspekteurs veroorsaak arbitrêre werkstakings oor veiligheid, en dit kos miljarde rande aan verlore produksie wat werksgeleenthede op die spel plaas.
Maar die ANC sê die styging in die dodetal toon die behoefte om hul ondersoeke te verhoog. In Julie hjet die regering 38 inspekteurs bygehuur.
In 1993, die jaar voor Nelson Mandela Suid-Afrika se eerste swart president geword het, het 615 mynwerkers gesterf, baie meer as aan die hand van “apartheid” se sogenaamde polisiegeweld.
Teen 2009 het die koers tot 167 gedaal en dit het nou 77 in 2015 bereik, het die Kamer van Mynwese gesê.
Die Universitas Akademiese Hospitaal in Bloemfontein is die swakste opleidingshospitaal in die land.
Dit volg nadat dié hospitaal, wat eens as die top-hospitaal bekroon is, nou die laaste plek op die ranglys beklee. Gesondheidsminister Aaron Motsoaledi sê die ranglys is opgestel nadat inspeksies deur die Kantoor vir die Voldoening aan Gesondheidstandaarde (KVGS) gedoen is.
Motsoaledi sê hy weet nie wat alles skeefgeloop het nie, maar die hospitaal se voldoening aan standaarde het van 90% tot 60% geval.
Hy het onlangs tydens ‘n mediakonferensie in Bloemfontein gesê die redes vir die dramatiese verval van standaarde moet dringend ondersoek word, veral in ag genome dat dit die Universiteit van die Vrystaat se opleidingshospitaal is.
Universitas-hospitaal het die afgelope jaar media-opskrifte gehaal vir al die verkeerde redes, soos ‘n uittog van mediese spesialiste, ‘n agterstand in die onderhoud van mediese toerusting en instandhouding. ‘n Saal wat met multi-miljoenrandse skenkings ingerig is, het ook in ‘n wit olifant verander.
Die Vrystaatse departement van gesondheid het nog nie op OFM-nuus se navrae gereageer nie.
Bron: OFM
Die ernstige tekort aan water weens die erge droogte in die Noord-Kaap is nou inwoners van Van Zylsrus se grootste bekommernis en nie meer paaie nie.
Swartes van dié dorp het gister met lede van die Noord-Kaapse regering se uitvoerende raad vergader.
Die John Taolo Gaetsewe streek – waarvan die dorp deel uitmaak – hou al vir jare lank betogings “oor die swak toestand van paaie”.
Maar dit wil voorkom of die paaie as verskoning gebruik word om nie skool te gaan nie. Skole in die gebied is al vir maande gesluit as gevolg van oproer hieroor.
Premier Sylvia Lucas sê die tekort aan water was egter Dinsdag een van die grootste besprekingspunte aangesien bouwerk aan paaie in die gebied fluks voortgaan.
“Gelukkig vir ons is dit minder as 30 kilometer grondpad – slegte grondpad – wat ons besig is om te herstel. Ons is op Van Zylsrus waar ons ‘n gemeenskapsvergadering gehad het. Inwoners kla oor maatskaplike euwels, grondpaaie en munisipale dienste – veral die tekort aan water” sê Lucas.
‘n Boer is op sy plaas by Rashoop naby Brits vanoggend aangeval deur swart plaasaanvallers.
Noordwes-polisiewoordvoerder se, Pelonomi Makau, sê drie swartes het by die plaashuis ingebreek teen ongeveer 03:00. Hulle het glo geld geëis.
Sy sê die 76-jarige boer is in die bobeen geskiet en het ‘n steekwond in die bors opgedoen.
Hy het daarin geslaag om die swart aanvaller se vuurwapen in die hande te kry en het op die aanvallers losgebrand. Hy het een van hulle gewond.
Makau sê die boer het daarna die bure ontbied. Beide die boer en die verdagte is na die hospitaal gehaas. Die vermeende aanvaller is onder polisiebewaking.
Makau sê die twee ander aanvallers het daarin geslaag om van die toneel te vlug met ‘n onbekende bedrag geld en selfone.
‘n Saak van poging tot moord en huisroof word ondersoek.
Intussen het meer as tweehonderd swart grondbesetters geweier om drie plase te verlaat wat hulle buite Brits in Noordwes beset het.
Die besetters, hoofsaaklik van die nabygelë Majakaneng, het in weerwil van ‘n uitsettingsbevel gisteroggend woonstrukture op die grond opgerig.
Hulle voer aan dat hulle nie genoeg kommunale grond het nie, terwyl die plase baie plek het.
Frankryk het gister begin om die sogenaamde “Oerwoud” migrante-kamp by die noordelike stad Calais te ontruim voordat dit opgebreek sal word.
Die migrante word nou na ontvangsentrums elders in Frankryk geneem.
Die kamp bestaan uit ‘n versameling tente en skuilings en staan op ‘n winderige moddervlakte naby Calais. Die kamp is ‘n trekpleister vir migrante wat probeer om die kanaal na Brittanje oor te steek.
Die 6 000 tot 8 000 inwoners van die kamp is hoofsaaklik Afgane, Irakese, Eritreërs en Soedanese.
Daar is gevrees dat geweld sou uitbreek oor die gedwonge verskuiwing, maar die eerste dag het glo ordelik verloop.
Die Franse owerhede is gretig om van die oogseer en kriminele nes ontslae te raak voor die verkiesing volgende jaar, maar die dorpies wat die uitlanders moet huisves is woedend en talle betogings teen die asielsoekers is reeds gehou.
Berigte van asielsoekers wat motoriste aanrand en hul motors kaap is reeds verskeie kere aangemeld.
Talle voertuie is vroeg vanoggend by die Universiteit van Kaapstad aan die brand gesteek, het RSG berig.
‘n Woordvoerder vir die Universiteit van Kaapstad, Patricia Lucas, sê ‘n koshuis op die Laer-kampus naby die vier brandende voertuie moes as voorsorgmaatreël ontruim word.
Niemand is beseer nie. Dit volg ná ‘n soortgelyke voorval gister by die Kaapse Skiereiland Universiteit van Tegnologie se Bellville Kampus waar minstens vyf voertuie aan die brand gesteek is.
‘n Sekerheidswag van ‘n maatskappy wat kontrakwerk op die kampus doen, die 38-jarige Miguel Joao, beweer dat ‘n derde mag by die brand betrokke is.
Die universiteit het die voorval skerp veroordeel en sê hulle sal bewerings ondersoek dat veiligheidswagte van ‘n vorige maatskappy op die kampus, daarby betrokke kon wees.
Die sekretarisgeneraal van die Verenigde Nasies, Ban Ki-Moon het ‘n beroep op Suid-Afrika gedoen om sy onttrekking van die Internasionale Strafhof te heroorweeg voordat die besluit oor ‘n jaar in werking tree.
Die VN het bevestig dat Suid-Afrika tot dusver die enigste land is wat ‘n formele kennisgewing ingedien het om van die Statuut van Rome te onttrek, ten spyte van berigte dat Burundi dit reeds gedoen het.
Die regering het verlede week die sekretarisgeneraal ingelig oor sy besluit om van die Strafhof te onttrek.
‘n Woordvoerder van die sekretarisgeneraal, Stephane Dujarric sê die besluit raak nie net die VN nie, maar die internasionale gemeenskap as ‘n geheel.
Die verklaring deur Suid-Afrika is ‘n groot slag vir die aansien van die hof.
Die aankondiging volg na ‘n dispuut verlede jaar toe Soedanese president Omar al-Bashir die land besoek het, ten spyte van ‘n lasbrief oor beweerde oorlogsmisdade wat die hof uitgereik het. Vroeër hierdie maand, het Burundi gesê hulle sal die hof verlaat, terwyl Namibië en Kenia ook die moontlikheid oorweeg.
Die hof is gestig in 2002, maar dikwels daarvan beskuldig dat hulle partydig teenoor Afrika staan.
Die stigting is gekenmerk deur ‘n gebrek aan internasionale samewerking, ook van die Verenigde State, wat die verdrag rakende die jurisdiksie van die hof onderteken het, maar dit nooit bekragtig het nie.
Suid-Afrika se besluit sal die weg baan vir ander Afrika-state om die hof vaarwel te roep. Die hof is opgerig om die “vervolging van die ernstigste misdade wat die gewete van die mensdom skok, naamlik volksmoord, oorlogsmisdade, misdade teen die mensdom en misdade van aggressie”.
Intussen is die DA en derglike surrogate onthuts oor die besluit. Die party wil die besluit “onwettig” laat verklaar omdat dit nie deur die parlement besluit is nie, en gaan “direk” na die Konstitusionele Hof hardloop om dit te doen.
Die leier van die DA, Mmusi Maimane, het sonder ironie gesê die besluit is strydig met die land se verbintenis tot internasionale geregtigheid en menseregte.
Hy sê dit dui op ‘n “drastiese agteruitgang in Suid-Afrika se aansien in die internasionale gemeenskap”. Hy sê Suid-Afrika is besig om weer die muishond van die wêreld te word met ‘n regering wat hom nou skaar by moordenaars en diktators regdeur die wêreld.
Amnestie Internasionaal het die besluit deur die Suid-Afrikaanse regering as “diep verraad teen miljoene slagoffers wêreldwyd” bestempel en die vrees uitgespreek dat apartheid sal terugkeer.
“Suid-Afrika se skielike kennisgewing om te onttrek van die ISH is diep teleurstellend. Met hierdie skuif, het die land miljoene slagoffers van die ernstigste menseregteskendings verraai en die internasionale regstelsel ondermyn,” het Netsanet Belay, Amnestie Internasionaal se direkteur vir Afrika geweeklaag.
“Die Statuut van Rome is ‘n verbintenis tussen lande dat hulle nie meer misdade onder die internasionale reg, insluitend apartheid, sonder straf sal toelaat nie,” het Belay gesê.
Die voorsitter van die Afrika Unie-kommissie, Nkosazana Dlamini-Zuma, sê Suid-Afrika het die reg gehad om die Internasionale Strafhof te verlaat. Dlamini-Zuma sê lede van die AU besluit self of hulle lid van die strafhof wil wees.
Volgens ‘n presidensiële woordvoerder in Kenia, Manoah Esipisu, het dié land nog nie met die formele proses begin om van die Internasionale Strafhof te onttrek nie.
Indien die groot moondhede soos die VSA en China reeds in 1998 hulself nie wil verbind tot die Statuut van Rome nie, wonder ‘n mens hoekom ander lande daarin sal belangstel.
Die Suid-Afrikaanse Lugdiens (SAL), wat voor die revolusie een van die bes bestuurde lugdienste ter wêreld was, maar tans aanhoudende verliese ly, is verlede jaar deur Ethiopian Airlines as die grootste lugredery in Afrika verbygesteek. Die jongste uitgawe van die Britse Economist bevat ‘n lowende artikel oor Ethiopian, maar vermeld oor SAL: “Suid-Afrika se nasionale redery, wat verlede jaar deur Ethiopian in grootte verbygesteek is, is al sedert 2011 onwinsgewend, en sou sonder regeringswaarborge insolvent wees.”
In die mees onlangse boekjaar het SAL onder die voorsitterskap van Dudu Miyeni ‘n verlies van anderhalf miljard rand gemaak. Dit was ‘n “verbetering” op die vorige jaar se verlies van R2,5 miljard. SAL het ook in die openbaar gesê dat hy waarborge van R16 miljard nodig het.
The Economist het al voorheen oor die onbekwame bestuur by Suid-Afrikaanse openbare maatskappye, waaronder SAL, berig en die volgende grafiek oor hul finansies gepubliseer.
Ethiopië is ‘n arm Afrikaland wat nie eens oor ‘n stabiele regering beskik nie. Desnieteenstaande het Ethiopian Airlines daarin geslaag om ‘n winsgewende lugdiens op te bou wat vriendelike diens aan ‘n toenemende aantal kliënte lewer. Volgens The Economist het Ethiopian verlede jaar bykans $300 miljoen (R4,5 miljard) wins gemaak en is vanjaar bestem om $500 miljoen (R7,5 miljard) se winste te lewer.
Benewens Suid-Afrika, is ander Afrikalande waar die nasionale rederye in ‘n haglike toestand verkeer, onder andere Kenia en Zimbabwe. Trouens, Ethiopian Airlines verdien nou meer geld as al die ander rederye in Afrika saam. In 2015 het die Ethiopiese lugdiens 82 internasionale bestemmings bedien, waarby nog 13 vanjaar gevoeg is.
Die Vrystaat en Limpopo is deur stormwinde gelooi wat plakkershuise weggewaai het.
Deneysville in die Vrystaat, is deur die erge storms getref wat ongeveer 500 mense oor die naweek dakloos gelaat het en die munisipaliteit het sakeondernemings gevra om hulp te verleen.
Die storm het oornag Sondag gewoed.
Volgens die woordvoerder by die Metsimaholo-munisipaliteit, is sowat 100 huise in Refengkgotso buite die dorp geraak.
Die burgemeester van die Metshimaholo Plaaslike Munisipaliteit, Sello Hlasa, sê hulle is besig om die skade te bepaal en hoe hulle die gemeenskap kan bystaan.
Hy sê van die inwoners weier om die beskadigde huise te verlaat uit vrees vir vandalisme en diefstal. Ander word in kerke en gemeenskapsale gehuisves.
Ouers weier om te gaan werk omdat drie kleuterskole ook beskadig is.
In die Thohoyandou-gebied in Limpopo is dakke van verskeie huise ook tydens ‘n storm afgewaai.
Die woordvoerder van die Vhembe-distrikmunisipaliteit, Matodzi Ralushai, sê die gebiede wat geraak word, sluit in Makonde, Kubvi en Makumeke buite Malamulele.
Ralushai sê hulle sal binnekort die skade assesseer.
‘n Verdagte, wat in hegtenis geneem is in verband met die kweek van daggaplante en in besit van verwerkte dagga was, het Maandag in die Bloemfonteinse landdroshof verskyn.
Provinsiale woordvoerder van die Valke, S’Fiso Nyakane, sê die Valke en lede van die polisie se Taktiese Reaksie- en Misdaadintelligensie-eenheid het ‘n 36-jarige man by sy woning in die stad aangekeer.
Pieter van Tonder, van De Bruinlaan in die gegoede woonbuurt Rayton, is Vrydagoggend vasgetrek.
Nyakane sê Van Tonder het uit twee kamers in sy huis sy onwettige bedryf bestuur. Die polisie het glo inligting ontvang dat dagga by ‘n huis gekweek en verwerk word.
Nyakane sê daar is op toerusting ter waarde van sowat R20 000 beslag gelê. Daggaplante en verwerkte dagga ter waarde van R70 000 is ook daar gevind. Nyakane sê nog mense kan inhegtenis geneem word.
Van Tonder is op borgtog van R5 000 vrygelaat. Hy sal weer op 2 Desember verskyn.
Die dodetal in verlede week se treinongeluk in Kameroen het tot 79 gestyg, het die staatsmedia in die land gister berig.
Owerhede in Kameroen is steeds besig om deur die wrakstukke na die oorskot van passasiers te soek.
Sondag is nog 11 liggame gehaal uit die puin van die passasierstrein wat ten tyde van die ongeluk met 1 400 mense volgepak was.
Die trein was tussen Kameroen se twee belangrikste stede, die hoofstad, Yaounde, en die sentraal-Afrikaland se hawestad, Douala, onderweg toe dit Vrydag naby die dorp Eseka ontspoor het.
Wetgewers in Venezuela is woedend oor ‘n besluit deur die verkiesingsowerhede om voorbereidings vir ‘n referendum te staak en sê daar is ‘n “aftakeling van grondwetlike orde” aan die orde van die dag.
Die aankondiging is tydens ‘n noodsitting oor die ekonomiese en politieke krisis in die olieryke Suid-Amerikaanse land gemaak. Die sitting is vir ‘n wyle in chaos gedompel toe ‘n groep van Maduro se ondersteuners verby veiligheidswagte gebars en die Nasionale Vergadering binnegestorm het. Die sitting is na 45 minute hervat.
Die wetgewers het ‘n beroep op inwoners van Venezuela gedoen om die grondwet “aktief te verdedig”.
“Die voortslepende staatsgreep wat in Venezuela aan die gang is, het daartoe gelei dat ons die geleentheid vir ‘n herroepingsreferendum ontneem is,” het die meerderheidsleier, Julio Borges, van die sentraal-regse opposisiekoalisie gesê.
Wetgewers wat die land se president Nicolas Maduro steun, het op hul beurt die opposisie daarvan beskuldig dat hulle ‘n staatsgreep beplan met die VSA wat daaragter sit.
Die hooggeregshof het die wetgewende meerderheid van minagting van die hof beskuldig nadat hulle, ondanks ‘n ondersoek na verkiesingsbedrog, onlangs drie wetgewers ingehuldig het.
Die opposisie sê die aantygings is vals en die hof is “Maduro se skoothondjie”.
Die hof het sedert die opposisie in Januarie van jaar beheer oorgeneem het, elke wetsontwerp afgeskiet wat in die Nasionale Vergadering aanvaar is.
Intussen het die Pous die land besoek om die krisis te bespreek. Sedert die olieprys gedaal het, sukkel die land ekonomies.
