Kategorie: Nuus

‘OB se beheptheid met Nkandla is persoonlik’

Die ANC het die openbare beskermer (OB) Thuli Madonsela se beheptheid met Nkandla veroordeel en gesê sy hanteer dit asof dit ’n persoonlike kwessie is.

Madonsela en Julius Malema van die EFF span tans saam om die Nkandla-molshoop ‘n berg te maak.

Zizi Kodwa, nasionale woordvoerder van die ANC, het Sondag gesê hulle vermoed Madonsela hanteer Zuma se Nkandla-antwoord as ’n “persoonlike saak buite haar grondwetlike mandaat”.

“Haar ongehoorde gedrag ontlok vrae oor haar neutraliteit asook oor haar geloofwaardigheid en die doel van haar verslag,” het Kodwa gesê.

Madonsela het in die brief onder meer gesê Zuma “ondermyn” die Grondwet deur die minister van polisie opdrag te gee om haar bevindings te evalueer, maar het vreemd genoeg geen kritiek gehad vir Malema se aapstreke in die parlement nie.

Malema het Zuma verlede week doodgeskree toe hy vrae oor Nkandla wou antwoord. Die presidensie het die antwoorde later per epos uitgestuur. Ten spyte van Zuma se samewerking sê die OB hy “ignoreer” haar verslag.

Zuma het vroeër gesê die minister van polisie moet besluit of hy wel ’n deel moet terugbetaal, asook hoeveel.

Madonsela eis nou Zuma moet binne twee weke redes aan die parlement verskaf hoekom hy nie so ’n terugbetaling moet doen nie.

Stone Sizani, ANC-hoofsweep, het gesê die OB probeer aan die parlement voorskryf wat om te doen, in plaas daarvan om die instelling se gesag te aanvaar.

Sizani het gesê die OB-verslag het reeds in die parlement gedien en ’n ad hoc-komitee gaan dit oorweeg en voorstelle doen. Hy sê haar jongste veldtog, die brief, is onverklaarbaar. “Dit skep ’n gevaarlike presedent dat haar kantoor verhewe is bo die parlement.

“Die ironie is dat die OB se brief aan die president ernstige beskuldigings insluit oor sy beweerde ondermyning van demokratiese instellings, maar sy kies self die pad van ondermyning van die wetgewende gesag, die parlement, en sy grondwetlike prosesse.”

Mbuyiseni Ndlozi, EFF-woordvoerder, het gesê die OB se brief regverdig die standpunt wat die EFF verlede week in die parlement ingeneem het oor Nkandla.

Pres. Jacob Zuma is tans in Rusland tot Woensdag. Daar was onlangs bespiegelings oor Zuma se gesondheid.

Zuma sal pres. Wladimir Poetin vir bilaterale gesprekke ontmoet, het die departement van internasionale betrekkinge en samewerking bevestig.

Valke slaan toe op diamanthandel, rig skade aan verkeerde huis

Die Valke het 17 mense in hegtenis geneem nadat hulle op ‘n onwettige diamanthandelnetwerk in vier provinsies gelyktydig toegeslaan het.

‘n Woordvoerder sê die mense is in Kimberley, Bloemfontein, Johannesburg en Vryburg in hegtenis geneem. Sommige van die mense het reeds in die hof verskyn en is op borgtog van tussen R50.000 en R500.000 rand vrygelaat.

Ramaloko sê klopjagte is uitgevoer op die eiendomme van handelaars wat onwettige diamante koop en dit dan in die wettige mark plaas.

Agt eiendomme en drie sake ondernemings in Gauteng, die Vrystaat, Noordwes en die Noord-Kaap is deursoek.

Die Valke het op ‘n huis van ‘n diamanthandelaar in Kimberley toegeslaan waar hulle met ‘n houer en verskeie sakke uitgekom het. Die eienaar was nie tuis nie, en is glo tans in Mosambiek.

Hulle het ook kontant ter waarde van R100.000 gekonfiskeer en ‘n vuurwapen. Die Valke het daarna na sy sakepersele in die dorp beweeg.

Die Noord-Kaapse Hooggeregshof het ook ‘n bevel uitgereik vir die bevriesing van eiendom ter waarde van sowat R50 miljoen.

Die Valke hoop om nog 35 mense in verband met die netwerk in hegtenis te neem.

In Bryanston, Johannesburg, het hulle in die nag op die verkeerde huis toegeslaan.

‘n Geskokte Jennifer Peers sê die Valke het net na vyf in die oggend uit ‘n helikopter op haar woning aan toue afgeseil en groot skade veroorsaak.

Peers en haar kinders is skielik wakkergemaak deur die geluid van ‘n helikopter en ‘n deurdringende soeklig.

Haar eerste gedagte was dat die polisie ‘n voortvlugtige soek, maar ‘n aantal tuine is verpletter toe gewapende mans haar eiendom binnegedring het en die elektriese heining afgebreek het.

Peers, ‘n vooraanstaande lid van die Gemeenskapspolisiëringforum, was tuis met haar dogter (9), haar baba seun, en drie personeellede toe die polisiemanne met hulle gesigte deur musse bedek, by haar huis ingebreek het.

Die personeel het Peers beskryf as “erg getraumatiseer,” geïntimideer en een werknemer is deursoek.

Peers se dogtertjie het vreesbevange in ‘n kas weggekruip. Die beamptes het ook na bewering gedreig om Peers se drie honde te skiet as sy hulle nie opsluit nie.

“In geen stadium het hulle eintlik vir my gesê wat hulle doen nie,” het sy gesê.

Die aanval is glo deel van ‘n voortgesette ondersoek wat in die Noord-Kaap afgeskop het.

Die smokkelsindikaat is na bewering verbind met internasionale misdaad. ‘n Lasbrief vermeld glo dat voldoende bewyse bestaan ​​om aan te dui dat die huis gebruik word vir kriminele aktiwiteit.

Peers, wat op die Sandton Sektor 2 Gemeenskapspolisiëringsforumkomitee dien, beskryf haarself as iemand wat die polisie ondersteun, maar sy is erg geskok deur die optrede.

Die elektriese heining is gebreek, sowel as vyf glas deure en vensters, en ‘n paar deurrame.

Raad vir Geowetenskap sê skudding was 3,8 nie 4,6

Die Raad vir Geowetenskap, sê die aardbewing wat Suid-Afrika Vrydagoggend vroeg getref het, was 3,8, en nie 4,6 soos deur die Amerikaanse Geologiese Opname (USGS) aangedui nie.

“Dit is dieselfde gebeurtenis. Die USGS meting word gedoen deur ‘n masjien, en die stasies wat hulle gebruik is nie in die nabyheid van die aardbewing soos wat ons s’n is nie, en dit is hoekom dit anders is,” het die Raad se seismologie-eenheidbestuurder Michelle Grobbelaar gesê.

“As hulle dit ontleed, sal dit begin verander.”

Die USGS het gesê die aardbewing plaasgevind 12km wes van Orange Farm, ‘n dorp suid van Johannesburg.

Maar Grobbelaar het gesê die aardbewing het Carletonville getref, wat sowat 70 km weg is, om ongeveer 01:14.

“Daarna was daar verskeie naskokke,” het sy gesê.

Die twee groot naskokke was ‘n 3,2 om 01:15, en ‘n tweede om 01:16.

“Die ander naskokke was kleiner,” het sy gesê.

Die nooddienste was op bystand, maar geen ongevalle is aangemeld nie.

Die Raad het ook gewaarsku dat nog talle aardskokke verwag kan word.

Tutu sê rugby is te wit

Anglikaanse aartsbiskop Desmond Tutu, buikspreker van Brittanje, sê Suid-Afrika verdien ‘n Springbokspan wat sy reënboognasie verteenwoordig.

“Nou, byna 20 jaar later, betreur ek die skilpad-tempo waarteen transformasie op die hoogste vlak gedoen word,” het hy gesê in ‘n brief aan die Cape Times.

Tutu het kritiek uitgespreek oor die SA Rugby-unie (Saru) vir die pas van transformasie in die span, en het gesê dit is “baie seer” dat swart spelers as “spanlede op die kantlyn sit en nooit die kans gegun word om hul spore te verdien nie.”

Hy het gesê die land verdien ‘n span wat die “volle spektrum van die reënboog wat ons definieer” verteenwoordig.

“Sekerlik, met die 20ste herdenking van ons vryheid van gedwonge apartheid, is daar ‘n paar donker buiteperde daar buite wat kan hardloop saam met die bruin en die kastaiingbruin in die resies?”

Saterdag speel die Springbokke weer teen Argentinië. Hulle begin-15-tal sluit drie gekleurde spelers, en die oorblywende 12 is wit. Twee van die agt spelers op die bank is swart.

Chaos breek uit in parlement

President Jacob Zuma se antwoorde op parlementêre vrae het in die slag gebly weens die chaos wat Donderdagmiddag in die Nasionale Vergadering uitgebreek het toe die EFF geweier het om sy antwoord oor Nkandla te aanvaar.

Die antwoorde is later per e-pos uitgestuur.

Die Speaker in die Nasionale Vergadering, Baleka Mbete het intussen om verskoning gevra aan president Zuma oor die ontwrigting in die parlement.

Die verrigtinge is onderbreek toe oproerige EFF-lede vir Zuma oor veiligheidsopgraderings aan sy Nkandla-woning getart het. EFF-lede het Zuma openlik en herhaaldelik uitgejou.

Hulle wou weet wanneer hy van plan is om van die meer as R200 miljoen wat bestee is, terug te betaal.

Mbete het veiligheidsbeamptes ontbied om die EFF parlementslede uit die gebou te verwyder, maar die EFFers het hulself teëgesit daarteen.

Mbete sê die Vryheidsvegters het geen respek vir die parlement nie en dat dit ook die gevoel onder die meerderheid van die ander parlementslede is.

‘n Parlementêre komitee sal aangewys word om die EFF se gedrag te ondersoek. Daar sal glo gekyk word of die lede vir die ontwrigting gestraf moet word.

Die ANC-jeugliga het hul skok oor die “anargie en geweld van die EFF” uitgespreek.

“In hul aandagsoek pogings mag sommige van hulle dink dat hulle radikaal is. Die gedrag gesien in die parlement vandag was nie net ‘n skande nie, maar ook gewelddadig.”

Die Liga sê Suid-Afrikaners moet nie aanvaar dat LP’s betrokke raak in fisiese aanvalle binne die Parlement nie.

‘n Onderonsie het uitgebreek tussen die Liga en die EFF kort nadat Mbete die sitting laat verdaag het na die EFF se weiering om die gebou te verlaat nadat sy beveel het om te gaan. Braam Hanekom is glo bygedam deur die EFFers.

Hanekom se aanranding is ‘n “baie ernstige belediging vir Suid-Afrika, asook ook ‘n kriminele daad” het die Liga gesê.

Die leier van Cope, Mosioua Lekota sê die ANC moet aanspreeklikheid aanvaar vir die chaos in die Nasionale Vergadering.

Volgens Lekota kan daar slegs orde in ‘n land wees wanneer die regerende party die grondwet respekteer.

Intussen het die ANC die EFF-leier Julius Malema veroordeel, en sê sy party het gewelddadige neigings wat die land kan laat agteruitgaan.

Die DA het sy kommer oor die voorval uitgespreek, en sê dit kan die “toekoms van die land in gedrang bring”.

Skepper van Liewe Heksie na Blommeland

Verna Vels, skepper van die geliefde Afrikaanse heksie is na Blommeland sê haar lesers. Die skrywer van die gewilde Liewe Heksie-reeks, is in die ouderdom van 81 jaar oorlede.

Sy het stil in haar slaap by haar huis in Johannesburg heengegaan aan kanker. Vels het in Junie vanjaar haar 81ste verjaardag gevier.

Die eerste Liewe Heksie-reeks is in 1963 op die Afrikaanse Radiodiens uitgesaai, met Blommie Kabouter se avonture vir die kinderprogram Siembamba.

Afrikaanse kinders het algar sedertdien met die vergeetagtige heksie, Karel Kat, Blommie en Matewis die katjie grootgeword. Die reeks is deel van die Afrikaanse kultuurskat.

Altesaam 52 TV-episodes is opgeneem en talle boeke en verhoogproduksies het oor vyf dekades die lig gesien.

Vels was die eerste vrou wat as programdirekteur vir die SAUK se TV1 aangestel is en het in 1993 afgetree ná 39 jaar in radio en televisie.

Vels was tot onlangs betrokke as regisseur by die bekende sepie 7de Laan.

Plaasmoordbeskuldigdes wat bejaarde doodmartel se saak uitgestel

Drie swart mans wat daarvan beskuldig word dat hulle ’n 79-jarige pensioentrekker tydens ‘n plaasaanval vermoor het, het Donderdag in die Lephalale-landdroshof in Ellisras verskyn, het die polisie in Limpopo gesê.

Die saak is tot 30 September uitgestel vir verdere ondersoek, het kol. Ronél Otto gesê.

Die mans is in hegtenis geneem ná die moord op Koos Jonker. Hy is op 3 Augustus doodgemartel op sy badkamervloer aangetref in die wooneenheid wat hy gehuur het.

“Sy hande en voete was vasgebind en hy het ernstige wonde aan sy kop gehad weens die aanranding,” het Otto destyds gesê.

Zuma se seun in hof oor taxi-ongeluk

President Jacob Zuma se seun, Duduzane, sal na verwagting Vrydag ʼn ondersoek bywoon in die landdroshof in Randburg.

Zuma het na bewering in ‘n minibus-taxi vasgery in Rivonia agter die stuurwiel van sy Porsche. Die taxi het omgeslaan en een persoon is dood en drie ander beseer.

Ten tye van die voorval het die woordvoerder van die metro polisie, Wayne Minnaar, gesê dat die Porsche van agter in die taxi vasgery het. Die voorval het op die M1-afrit by Grayston-rylaan plaasgevind.

Die Nasionale Vervolgingsgesag (NVG) het verlede maand besluit om Zuma nie aan te kla nie vanweë onvoldoende bewyse.

Daar is besluit dat die saak na die landdros verwys sou word vir ʼn formele ondersoek om te besluit of die ongeluk veroorsaak is deur ʼn menslike fout.

Zuma het egter nie opgedaag vir sy hofverskyning nie.

Zuma se prokureur het toe die staat meegedeel dat die president se seun nie daarvan bewus was dat hy in die hof moes verskyn het nie.

Bruin stadsbeplanner sink Namaquafees om Steve weg te hou

Die jaarlikse Namaquafees in Vredendal wat einde Oktober plaasvind en jaarliks tot 8.000 mense lok, is afgestel nadat die ANC/DA-stadsraad Steve Hofmeyr se optrede afgekeur het.

Volgens ‘n analfabetiese skrywe van die Matzikama-munisipaliteit is Hofmeyr se “rasisme” [sic] glo die probleem.

Die e-pos lui: “Mnr Hofmeyer [sic] is bekend vir sy rasistiese [sic] opstokery deur die liedjies en opmerkings wat hy sing en maak.

“In die lig van bogenoemde deel ek u graag mee dat die Munisipaliteit u vriendelik dog ernstig versoek om NIE voort te gaan met die uitnodiging aan Mnr Hofmeyer [sic] om op te tree by bogenoemde fees.”

Lionel Phillips, die bruin waarnemende direkteur: ontwikkeling en stadsbesplanningsdienste, het die e-pos namens die munisipaliteit gestuur.

Die organiseerder van die fees het ook 20 ander kunstenaars gekanselleer weens dié sensuur wat beteken dat die fees van die baan is. Louis le Grange van Events24 sê dis al jare lank dat die bestuur probeer inmeng en dat hy dit nie goedsmoeds gaan aanvaar nie.

​Le Grange het dadelik op die munisipaliteit se e-pos gereageer en gesê Events24 het met onmiddellike effek onttrek.

Van die kunstenaars wat sou optree, sluit in Dozi, Bobby van Jaarsveld, Ray Dylan, Desmond Wells, Andriëtte, Elvis Blue en Blackbyrd.

Die burgemeester, Jakes Botha, het Donderdagmiddag die kansellasie as gerugte afgemaak. “Ons gaan nie goed afstel omdat dié of daai sanger kom nie. Wat my betref is dit nie afgestel nie.”

Hofmeyr het ook op Twitter getwiet dat hy regsadvies inwin na Phillips se skrywe.

Op Facebook het die gewildste Afrikaanse sanger gesê dis duidelik dat Phillips net ‘n buikspreker is vir ander belange.

Die Phillips-Word-Injector. Marxiste, fasciste en Media24 joernaliste gebruik dit om gewone mense te kry om te sê wat hulle wil hoor. Maak mooi oop en sê aaaaa… Lees onder hoe die Vredendal Munisipaliteit dit gebruik op Suid Afrikaanse kunstenaars. Werk soos ‘n bom, seg hulle.

So leer ons ons vriende ken. Die Vredendal stadsraad (naas die feit dat hulle nie meer hul bejaarde dorpenaars veiligheid kan verseker nie), vra toe die agente van die fees om my te ‘help’ met my liedjieskeuses vir die Namaquafees. Die agent onttrek toe sommer ook. Want niemand wil soos in 1970 voorgeskryf word deur ‘n dorpsbeplanner by ‘n kunsteaangeleentheid nie. Daar het jy dit Lionel Phillips: 17 kunstenaars, een agentskap en ‘n hele dorp sonder inkomste daardie naweek. Natuurlik blameer die Burger en Beeldkoerante my (“Steve sink fees”), want hulle is voorstanders van sensuur soos liberale media maar is, of wag, is liberales nie veronderst…eh…ja…en so aan.
Moet my nie voorsê wat om te sing by my konserte nie!
Ek hoop Namaqualand gee jou, Lionel Phillips, goed op jou gat.
Ek sou.

Een van die sakemanne in Vredendal het gesê die fees was nog elke jaar ’n geweldige inspuiting vir die dorp. Die gastehuise, die vulstasies en restaurante verloor geld weens Phillips se besluit.

Aardbewing van 4,6 skud Johannesburg

‘n Aarbewing van 4,6 op die Richterskaal het Johannesburg net na middernag geskud.

Die Amerikaanse geologiese opname (USGS) sê die aardbewing het om 1:14 vanoggend 12 kilometer wes van Orange Farm in die suide van Johannesburg voorgekom.

Nog geen berigte van skade of ongevalle is aangemeld nie.

Dit is die tweede aardbewing in die land die afgelope drie weke nadat die grootste aardbewing nog van 5,6 op 5 Augustus Orkney geskud het. Orkney lê in die Noordwes-provinsie, sowat 170 km suid-wes van Johannesburg.

Die USGS het dié aardbewing aan “natuurlike oorsake” toegeskryf, maar wetenskaplikes van die WNNR sê die aardbewings hou verband met mynbedrywighede.

Een persoon is dood en minstens 34 mense beseer in die aardbewing wat die KOSH-gebied geruk het.