praag.co.za

Tag: OB

  • OB se verslae oor verskeie skandale glo nie besonder diepgaande nie

    Inligting oor die verslae wat na verwagting vandag deur die Openbare Beskermer (OB), Busisiwe Mkhwebane, bekend gemaak gaan word, is klaarblyklik nie volledig nie.

    Haar woordvoerder, Cleopatra Mosene, het by navraag bevestig dat verskeie verslae vandag deur die kantoor vrygestel gaan word, maar wou nie verdere inligting bekend maak nie.

    Die OB het gedurende haar besoek aan die Noord-Kaap verlede maand aangedui dat verskeie ondersoeke in die Vrystaat reeds afgehandel is en dat van die verslae nog vandeesmaand vrygestel kan word.

    Mkhwebane het onder meer die omstrede multimiljoenrandse Vrede-suiwelprojek asook die Vrystaatse webtuiste-skandaal in die provinsie ondersoek. Van die verslae sou reeds in April bekend gemaak word, maar uitstel is glo gevra.

    Intussen het die opposisie ‘n beroep op Mkhwebane gedoen om vandag die geleentheid te gebruik om verskeie verslae wat die betrokkenheid van die Gupta-familie insluit, ook openbaar te maak.

  • Nuwe OB wys op Madonsela se misbruik van staatsfondse

    Nuwe OB wys op Madonsela se misbruik van staatsfondse

    Die Openbare Beskermer, Busi Mkhwebane, sê haar voorganger het ‘n duur ampsmotor bly gebruik ten spyte daarvan dat haar termyn verstryk het.

    Die OB sê geld moes van Thuli Madonsela afgetrek word vir ‘n duur BMWX6 asook skade aan die motor na ‘n ongeluk.

    “Ons praat van belastingbetalers se geld,” het Mkhwebane by ‘n media-inligtingsessie gesê.

    Die New Age het berig dat die skade ‘n bedrag R750 000 beloop, maar die waarnemende uitvoerende hoof van die OB se kantoor sê dis minder.

    Madonsela se seun het in 2012 met die motor deur ‘n tuinmuur gery.

    Mkhwebane het ook aangedui dat sy die DA gaan dagvaar oor bewerings dat hulle haar ‘n spioen genoem het.

    Sy sê die party het genoeg kans gehad om verskoning aan te teken, maar het tot dusver dit nog nie gedoen nie.

    “Ek dink nie dié instansie sal daarvan hou om deur ‘n spioen gelei te word nie,” het sy gesê met verwysing na die pos van die OB.

    Die DA het beweer dat sy ‘n spioen in China was terwyl sy daar die land se missie verteenwoordig het.

    Mkhwebane was daarvoor verantwoordelik dat Madonsela aangekla is omdat sy inligting aan eNCA laat uitlek het in die vorm van ‘n klankgreep oor president Zuma se beweerde staatskaping.

  • Nuwe OB goedgekeur

    Nuwe OB goedgekeur

    Die Nasionale Vergadering het die ontleder van die Staatsveiligheidsagentskap, Busisiwe Mkhwebane, as die nuwe Openbare Beskermer goedgekeur.

    Die Vergadering het die adhoc-komitee se verslag oorweeg waarin Mkhwebane as die voorkeurkandidaat aangedui is om die uittredende Thuli Madonsela te vervang.

    Al die partye behalwe die DA het ten gunste van haar gestem. Volgens die DA is sy ‘n “spioen van Suid-Afrika se geheimediens”.

    Volgens die grondwet moes sy minstens 60 persent, oftewel 240, van die 400 stemme kry. ‘n Totaal van 263 lede het vir haar gestem, en slegs nege-en-sewentig teen haar.

    Die uittredende Openbare Beskermer, Thuli Madonsela, het ‘n beroep op haar opvolger Mkhwebane gedoen om haar deur die Grondwet en die oppergesag van die reg te laat lei.

    Madonsela het ‘n toekenning in Pretoria ontvang terwyl die Nasionale Vergadering Mkhwebane se benoeming om haar pos oor te neem bekragtig het, en kon nie die geleentheid bywoon nie.

    Madonsela sê formele gelukwensinge sal volg onmiddellik nadat President Jacob Zuma Mkhwebane se aanstellling bevestig het.

  • OB-aanstelling: DA-potte wat ketels verwyt

    OB-aanstelling: DA-potte wat ketels verwyt

    Die Nasionale Vergadering sal vandag besluit of hulle die aanbeveling aanvaar om die gewese ontleder van die Staatsveiligheidagentskap, Busisiwe Mkhwebane, as die nuwe Openbare Beskermer aan te stel.

    Die verslag van die ad hoc-komitee oor die OB sal vandag aan die Nasionale Vergadering vir finale oorweging voorgelê word.

    Al die partye, behalwe die DA, het bevestig dat hulle Mkhwebane se aanstelling steun. Die DA voer aan dat Mkhwebane ‘n spioen was en daarom nie geskik is vir die pos nie.

    Dié beskuldiging kom hoofsaaklik van Glynnis Breytenbach wat voorheen deur die Nasionale Vervolgingsgesag self daarvan beskuldig is dat sy vir Israel spioeneer.

    Die DA LP Breytenbach, het gesê dat Mkhwebane gewerk het as ‘n spioen terwyl sy as ‘n immigrasiebeampte aan die Suid-Afrikaanse ambassade in China verbonde was.

    Die DA het gesê verskeie bronne het betroubaar aan hulle gesê dat Mkhwebane op die betaalstaat van die SSA was terwyl sy in China gewerk het.

    Die ANC het in reaksie daarop gesê Mkhwebane het geen wet oortree deur in diens van die SSA te wees nie.

    Die party sê ook regter Sharise Weiner (foto) het die beste gevaar in haar onderhoud.

    Minstens 60 persent van die parlementslede, dit wil sê 240 van die 400 lede, moet ten gunste van Mkhebane stem om haar aanstelling te kan bekragtig deur president Jacob Zuma.

    Weiner sê sy was as student ‘n stigterslid van Regslui vir Menseregte en het anti-apartheidsaktiviste “gratis” verdedig as advokaat.

    Advokate soos Weiner is destyds deur die ANC-terreurfonds wat vanuit Londen, Brittanje bedryf is, betaal.

    Sy het erken dat sy geen Afrikataal magtig is nie.

    Die DA het ook professor Richard Majola vanweë sy ondervinding en kwalifikasie geloof, om kritiek teen hul voorkeur vir Weiner af te weer.

  • EFF se eis dat OB-onderhoude gestaak word verwerp

    EFF se eis dat OB-onderhoude gestaak word verwerp

    Die EFF eis dat die onderhoude vir die pos van Openbare Beskermer gestaak word en dat die proses om kandidate op die kortlys te plaas weer moet begin.

    Die hoofsweep van die EFF, Floyd Shivambu, sê daar moet onderhoude met meer mense gedoen word. Hy het ook gevra dat die besluit om op een dag onderhoude met al die kandidate te doen hersien word.

    Die EFF dreig met regstappe.

    Die Parlement se adhoc-komitee sal vandag onderhoude voer met al 14 kandidate op die kortlys.

    Shivambu sê die pos van Openbare Beskermer is te belangrik om oorhaastig keuses te maak.

    Die komitee se voorsitter, Makhosi Khoza, het egter die EFF se versoek van die hand gewys en gesê die party se eie optrede het daartoe gelei dat hulle nie vroeër aan vergaderings deelgeneem het waar daar oor die program besluit is nie.

    Khoza het bygevoeg dat die doel daarvan is om regverdig teenoor alle kandidate te wees maar indien die onderhoude oor twee dae gehou moes word, sou daar ‘n onregverdige voordeel vir sekere kandidate wees.

    Kandidate met wie onderhoude vandag gevoer gaan word het voor agtuur vanoggend by die Parlement begin opdaag. Al veertien die kandidate sal deur die dag voor die komitee verskyn.

    Kandidate sal in ‘n afgeslote area wag waar hulle nie sal kan sien hoe die ander kandidate se onderhoude verloop nie.

    Die onderhoude sal regstreeks op die parlementêre televisiekanaal en op YouTube gevolg kan word.

    Die kandidate sluit onder andere in die adjunk nasionale direkteur van openbare vervolging, Willie Hofmeyr, die voormalige adjunk openbare beskermer, advokaat Mamiki Goodman, en die huidige adjunk openbare beskermer, Kevin Malunga.

    Verskeie groepe het vroeër kommer uitgespreek omdat net een dag vir al die onderhoude opsygesit is.

    Hulle meen onderhoudvoerders kan moeg word en nie so lank aaneen sal kan konsentreer nie.

  • Grondwethof beslis dat Zuma moet opdok vir Nkandla

    Grondwethof beslis dat Zuma moet opdok vir Nkandla

    President Jacob Zuma het tot middel Julie tyd om ‘n gedeelte van die geld wat op sy privaatwoning Nkandla in KwaZulu-Natal verkwis is, terug te betaal.

    Die hoofregter van die Grondwethof, Mogoeng Mogoeng het Donderdag in sy uitspraak beslis dat die president strydig met die grondwet opgetree het deur nie aan die Openbare Beskermer gehoor te gee nie.

    Die OB, Thuli Madonsela se aanbevelings oor Nkandla is as bindend, ingevolge die uitspraak en ‘n spertyd van 105 dae is gestel vir die terugbetaling.

    Die Tesourie het 60 dae tyd om te bepaal hoeveel geld die president moet terugbetaal. Zuma het ná die Tesourie se spertyd, 45 dae tyd om dié bedrag te vereffen.

    Madonsela het Donderdag gesê die aanvanklike geraamde koste was sowat tien miljoen rand, maar dit sal waarskynlik nie die finale bedrag wees nie.

    Die voormalige tesourier-generaal van die ANC, Matthews Phosa het intussen ‘n beroep op Zuma gedoen om te bedank.

    Hy het aan sakeleiers in Phalaborwa, die ANC gevra om beslissende stappe teen die president te neem. Phosa sê Suid-Afrika het nuwe en onselfsugtige leierskap nodig.

    ‘n Voormalige regter van die Grondwethof, Albie Sachs sê hy hoop president Jacob Zuma, die Parlement en die ANC sal die uitspraak oor Nkandla en die magte van die Openbare Beskermer eerbiedig.

    Hy sê hy is bly die Grondwet het geseëvier. Sachs was die hoofspreker by die 350ste herdenking van die Kasteel van Goeie Hoop in Kaapstad.

    Die organisasie, Corruption Watch, sê die kantoor van die Openbare Beskermer kan nou beskryf word as ‘n ware kampvegter en kampioen teen korrupsie.

    ‘n Woordvoerder van Corruption Watch, David Lewis het gesê dit is ‘n “blye dag vir Suid-Afrika se grondwetlike demokrasie, want dit toon daar is instellings wat die demokrasie kan beskerm”.

  • EFF en Madonsela se samewerking gekritiseer

    Die EFF het hul samewerking met die Openbare Beskermer, Thuli Madonsela, verdedig nadat Madonsela as ‘n derde party tot hulle Grondwethofsaak toegetree het.

    Die regerende party het vroeër sy kommer uitgespreek omdat Madonsela haar by die EFF skaar in die party se saak teen president Jacob Zuma.

    Die ANC se hoofsweep, Stone Sizani het gesê hoewel daar niks verkeerd is daarmee dat ‘n instelling soos die Openbare Beskermer politieke partye in regskwessies steun nie, moet die instelling altyd die publiek se vertroue behou.

    Die EFF-woordvoerder, Mbuyiseni Ndlozi sê dié logika verwring die ware begrip van die demokrasie.

    Ndlozi sê Madonsela verdedig die “onafhanklikheid van die funksie van die Openbare Beskermer”.

    ‘n ANC-woordvoerder Moloto Mothapo het in ‘n verklaring gesê: “Hoewel persepsies, net soos moraliteit, nooit alleen deur die wet gereguleer kan word nie, is dit van kritieke belang vir die werking van die instelling en sy openbare beeld.”

    ‘n Instelling soos die OB moet te alle tye gesien word dat dit onafhanklik en onpartydig optree, het die ANC bygevoeg.

  • Spioenasie-beskuldigings kan tot OB-skorsing lei

    Thuli Madonsela, Openbare Beskermer, het gesê sy vermoed die motief vir die ondersoek na bewerings dat sy vir die CIA spioeneer, kan tot haar skorsing lei, het 702 se Eyewitness News berig.

    “Ek dink die motief was om my te dwing om ‘n ondersoek te vra en sodoende aan die president ‘n rede te verskaf om my te skors hangende die ondersoek,” het Madonsela in die radio-onderhoud gesê.

    Volgens Madonsela het sy nooit ‘n ondersoek aangevra nie, en die Staatsveiligheidsagentskap (SSA) het verkeerd opgetree deur te sê hy sal ondersoek instel “bloot omdat iemand die bewerings gemaak het”.

    Sy sê die ondersoek kan gebruik word as ‘n verskoning vir die agentskap om haar fone af te luister en elektroniese pos te onderskep, en bygevoeg dat dit haar kantoor sal ondermyn, omdat sy vertroulike kommunikasie as deel van haar ondersoeke hanteer.

    Die bewerings teen Madonsela het konsternasie onder haar linkse wit ondersteuners veroorsaak en oproepe is gemaak om haar te “beskerm”. Intussen wil gerugte dat Madonsela ‘n politieke krisis sal verwelkom omdat sy haar oog op die land se presidentskap het, ook nie gaan lê nie.

    Sy het gesê die ondersoek is ‘n poging om haar kantoor te ondermyn, maar bygevoeg: “Ons kyk na dinge en as daar nie iets is waarmee ons kan werk nie, dan gaan ons nie daarmee voort nie.”

    Die SSA het verlede week aangekondig dat hy bewerings van spioenasie teen Madonsela, Julius Malema, Lindiwe Mazibuko en Joseph Mathunjwa ondersoek. Die staat glo hulle word moontlik met destabiliseringsveldtogte vir buitelandse belange verbind.

    Brian Dube, woordvoerder van die SSA, het gesê die bewerings teen die vier het die SSA gelei na ’n WordPress-webjoernaal genaamd africainteligenceleaks.wordpress.com.

  • Opposisie se Nkandla-veldtog stort in duie

    Die parlementêre adhoc-komitee oor Nkandla het president Jacob Zuma in sy voorlopige verslag kwytgeskel van enige ongerymdhede met die opgraderings by sy privaat woning.

    Mathole Motshega sê die “pay-back-veldtog” deur opposisie partye het in duie gestort.

    Opposisiepartye het daarop aangedring dat die president ‘n gedeelte van die geld wat op Nkandla se opgraderings spandeer is, terugbetaal.

    Maar Woensdag het die ANC die Wes-Kaapse hooggeregshof se beslissing tussen die DA en die SABC-voorsitter in die opposisie se neuse gevryf oor Nkandla.

    Luidens die beslissing strek die magte van die Openbare Beskermer, Thuli Madonsela, nie so ver as wat die DA beweer tov Nkandla nie.

    Die hof het bevind dat die remedieerende optrede deur die Openbare Beskermer nie bindend is nie.

    Die ANC-lid van die komitee, Motshega is van mening dat die hofuitspraak die komitee se bevindinge regverdig.

    “Die uitspraak sê as die Grondwet in die vooruitsig gestel het dat die remedieerende optrede van die Openbare Beskermer bindend moet wees, sou dit so gesê het. Dit sê nie so nie en die Wet op die Openbare Beskermer sê ook nie so nie.”

    “Die terugbetaalveldtog het dus in duie gestort as gevolg van die hofbevel en die briewe wat geskryf is [deur Madonsela], het hul geldigheid verloor. So ek is bly dat die regbank van hierdie land ons regtig behoorlik gelei het. Ons sal in staat wees om vorentoe te beweeg met spoed sonder enige verwarring van enigiemand se kant.”

    Die komitee wat slegs uit ANC-lede bestaan nadat die opposisie uit die komitee gestap het, het weer begin om sy voorlopige verslag te bespreek.

    ‘n Komiteelid, Mamoloko Kubayi, sê president Zuma was nie deel van ongerymdhede nie, maar dat die argitek van die projek, Minenhle Makhanya, onreëlmatig aangestel is.

    Hy sê dit is duidelik dat die president nie die opgraderings versoek het nie.

  • Madonsela daarvan beskuldig dat sy CIA-spioen is

    Die Openbare Beskermer, Thuli Madonsela het die adjunkminister van Verdediging en Militêre Veterane, Kebby Maphatsoe drie dae gegee om met bewyse vorendag te kom nadat hy beweer het Madonsela is ‘n CIA-spioen.

    Sy sê indien hy dit nie kan bewys nie, moet hy sy stelling terugtrek en amptelik om verskoning vra. Maphatsoe kan aangekla word van minagting van die Openbare Beskermer as hy nie aan die versoek voldoen nie.

    Die Amerikaanse ambassadeur in Suid-Afrika, Patrick Gaspard het bevestig dat ‘n amptelike diplomatieke klag gelê gaan word. Hy sê die bewerings is “ongegrond en beledigend”.

    Gaspard, het homself Maandag tot Twitter gewend om Maphatsoe, ook voorsitter van die Umkhonto we-Sizwe militêre veterane-vereniging (MKMVV), uit te daag.

    “Dit is problematies, maar onbelangrik weens ‘n gebrek aan geloofwaardigheid vir die gemiddelde Suid-Afrikaner wat deur die rookskerms sien,” het Gaspard getwiet.

    Maphatsoe, wat Saterdag in Soweto die beskuldiging teen Madonsela gemaak het, het Maandag by Luthuli-huis in Johannesburg sy aanval voortgesit en bygevoeg buitelandse magte gebruik haar om die land te destabiliseer.

    Verskeie ontleders meen egter dat Madonsela ‘n Britse agenda eerder as ‘n Amerikaanse agenda dryf.

    Maphatsoe sê Madonsela was nooit ’n MK-lid soos sy vroeër beweer het nie. “Sy het ’n openlike agenda teen die ANC en pres. Zuma. Sy ondermyn parlementêre prosesse,” het Maphatsoe gesê.

    Hy het ook verwys na ondersoeke deur Madonsela wat voortdurend aan die media uitgelek word.

    Zizi Kodwa, ANC-woordvoerder, het gesê die party ondersteun die Openbare Beskermer se funksie wat ongehinderd en sonder vrees of guns verslag moet doen.

  • ‘OB se beheptheid met Nkandla is persoonlik’

    Die ANC het die openbare beskermer (OB) Thuli Madonsela se beheptheid met Nkandla veroordeel en gesê sy hanteer dit asof dit ’n persoonlike kwessie is.

    Madonsela en Julius Malema van die EFF span tans saam om die Nkandla-molshoop ‘n berg te maak.

    Zizi Kodwa, nasionale woordvoerder van die ANC, het Sondag gesê hulle vermoed Madonsela hanteer Zuma se Nkandla-antwoord as ’n “persoonlike saak buite haar grondwetlike mandaat”.

    “Haar ongehoorde gedrag ontlok vrae oor haar neutraliteit asook oor haar geloofwaardigheid en die doel van haar verslag,” het Kodwa gesê.

    Madonsela het in die brief onder meer gesê Zuma “ondermyn” die Grondwet deur die minister van polisie opdrag te gee om haar bevindings te evalueer, maar het vreemd genoeg geen kritiek gehad vir Malema se aapstreke in die parlement nie.

    Malema het Zuma verlede week doodgeskree toe hy vrae oor Nkandla wou antwoord. Die presidensie het die antwoorde later per epos uitgestuur. Ten spyte van Zuma se samewerking sê die OB hy “ignoreer” haar verslag.

    Zuma het vroeër gesê die minister van polisie moet besluit of hy wel ’n deel moet terugbetaal, asook hoeveel.

    Madonsela eis nou Zuma moet binne twee weke redes aan die parlement verskaf hoekom hy nie so ’n terugbetaling moet doen nie.

    Stone Sizani, ANC-hoofsweep, het gesê die OB probeer aan die parlement voorskryf wat om te doen, in plaas daarvan om die instelling se gesag te aanvaar.

    Sizani het gesê die OB-verslag het reeds in die parlement gedien en ’n ad hoc-komitee gaan dit oorweeg en voorstelle doen. Hy sê haar jongste veldtog, die brief, is onverklaarbaar. “Dit skep ’n gevaarlike presedent dat haar kantoor verhewe is bo die parlement.

    “Die ironie is dat die OB se brief aan die president ernstige beskuldigings insluit oor sy beweerde ondermyning van demokratiese instellings, maar sy kies self die pad van ondermyning van die wetgewende gesag, die parlement, en sy grondwetlike prosesse.”

    Mbuyiseni Ndlozi, EFF-woordvoerder, het gesê die OB se brief regverdig die standpunt wat die EFF verlede week in die parlement ingeneem het oor Nkandla.

    Pres. Jacob Zuma is tans in Rusland tot Woensdag. Daar was onlangs bespiegelings oor Zuma se gesondheid.

    Zuma sal pres. Wladimir Poetin vir bilaterale gesprekke ontmoet, het die departement van internasionale betrekkinge en samewerking bevestig.

  • Opposisiepartye verwelkom ad hoc-komitee oor Nkandla

    Opposisiepartye verwelkom ad hoc-komitee oor Nkandla

    nkandla-residenceDie Speaker van die parlement het aangekondig dat ‘n ad hoc-komitee ingestel sal word om te handel met die verslag van die Openbare Beskermer oor Nkandla.

    Die veelparty- ad hoc-komitee van 12 lede sal president Jacob Zuma se reaksie op die Openbare Beskermer se Nkandla-verslag bestudeer en voor die verkiesing terugvoer gee.

    Thuli Madonsela, die OB, het onder meer bevind dat Zuma en sy familie onregmatig baatgevind het by die opgraderings van 246 miljoen rand by sy privaatwoning

    Verskeie partye het na die bekendmaking van die OB se verslag vir ‘n openbate debat sowel as vir die instelling van ‘n ad hoc-komitee gevra

    Die ad hoc-komitee sal sowel die antwoord van die president oor die Nkandla-verslag, asook die Proklamasie wat die Spesiale Ondersoekeenheid se ondersoek gemagtig het, nagaan.

    Die Speaker, Max Sisulu het Woensdagaand in ‘n verklaring gesê hy het na raadpleging met die hoofsweep van die regerende party en die hoofswepe van ander partye in die parlement besluit om die komitee ingevolge die Parlementêre Reëls aan te stel.

    Die komitee sal bestaan uit 7 ANC-lede, 2 DA lede, een lid van die IVP en een lid wat die ander partye verteenwoordig.

    Die Parlement sê die komitee se sperdatum vir terugvoer is 30 April. Zuma het verlede week op die Openbare Beskermer, Thuli Madonsela se verslag gereageer.

    Die parlement sal byeen geroep word om met die verslag te handel nadat dit ingehandig is, voor die verkiesing van 7 Mei 2014.

    Opposisiepartye sê die ad hoc-komitee moet reg laat geskied aan die bepalings van die Grondwet, en toesien dat die parlement en wetgewende gesag hulle oorsigrol oor die president en die Uitvoerende Gesag na behore volvoer.

    .

  • Kabinet vra dat Nkandla-verslag vrygestel word

    Kabinet vra dat Nkandla-verslag vrygestel word

    nkandla-residenceDie Kabinet het beveel dat ‘n interministeriële taakspan se verslag oor die Nkandla omstredenheid vrygestel word aan die publiek.

    “Die Kabinet onderskryf die aanbevelings en vra die verslag wat vrygestel word aan die publiek.

    “Die Kabinet het beraadslaag oor die aanbieding deur die Minister van Openbare Werke oor die interministeriële taakspan se verslag oor die veiligheidsopgraderings by die president se Nkandla tuiste,” lui ‘n verklaring ná sy tweeweeklikse vergadering Woensdag.

    Die besluit is Donderdag aangekondig ná ‘n aanval deur die ANC op die openbare beskermer, Thuli Madonsela oor die tydsberekening van haar verslag oor die bouwerk by President Jacob Zuma se landgoed.

  • ANC, OB Nkandla mekaar

    ANC, OB Nkandla mekaar

    nkandla-residenceGwede Mantashe, sekretaris-generaal van die ANC, en Jessie Duarte, adjunk-sekretaris-generaal, het die Openbare Beskermer, Thuli Madonsela, se lekkasies as “gevaarlik” beskryf.

    Nadat die verslag aan die Mail & Guardian gelek is, het veiligheidsministers Vrydag met die OB vergader.

    Die voorlopige Nkandla-verslag is deur die OB vir “poltieke doeleindes” uitgelek, het hulle gesê, want dit kon niemand anders gewees het nie.

    “Ons waardeer die OB se werksaamhede, maar ons is bekommerd oor optrede wat blykbaar ’n openbare ophef wou veroorsaak.

    “Die OB moet na deeglike ondersoek aanbevelings maak, nie uittreksels laat uitlek, die publiek aanhits en dán die finale verslag bekend maak nie.”

    Madonsela het ontken dat die verslag deur haar kantoor uitgelek is. Sy het die publikasie van die voorlopige bevindings veroordeel.

    Die staat het vroeër die hof genader om te verhinder dat die verslag openbaar gemaak word.

    Mantashe het egter gesê die OB-verslag asook die departement van openbare werke se geklassifiseerde Nkandla-verslag moet dringend openbaar gemaak word.

    Daar word vermoed dat die geld gekom het uit ‘n padkontrak ter waarde van R1 miljard.

    Die naam Nkandla kom van die Zoeloewerkwoord  “khandla”, wat beteken om moeg te wees.